1. Ana jelasi jakwayiye wuli liŵasa lya kumangwakwe Yosefe?

YAKOBO jwanonyelaga ŵanache ŵakwe wosope. Nambope pa ŵanache wosope, ŵamnonyelaga mnope Yosefe juŵakwete yaka 17. Ana achakulugwe ŵa Yosefe yakwayiye chamtuli yeleyi? Jemanjaji ŵamtendelaga jelasi mwamti ŵatandite kumŵenga. Pangali chaŵalemwisye Yosefe chachikatendekasisye kuti amŵenjeje. Atamose yaliji myoyo, achakulugwe ŵa Yosefe ŵamsumisye jwalakwe kuti akaŵe kapolo kaneko nikuja kwalambusya baba ŵawo kuti Yosefe awulajidwe ni chinyama. Jelasi jatendekasisye kuti mtendele wamwiŵasa usokonechele nambosoni kuti baba ŵawo aŵe ŵakudandawula mnope.—Gen. 37:3, 4, 27-34.

2. Mwakamulana ni Agalatiya 5:19-21, ligongo chichi jelasi jili jakogoya?

² Mu Baibulo, jelasi * jili jimo mwa “ndamo syakusakala” syampaka simtendekasye mundu kulepela kwinjila mu Uchimwene wa Mlungu. (Aŵalanje Agalatiya 5:19-21.) Jelasi jili jakogoya mnope, ligongo jikusatendekasya kuti ŵandu aŵenganeje.

3. Ana mungani ajino chitukambilane chichi?

³ Yaŵatesile achakulugwe Yosefeyi, yikulosya kuti jelasi jikusajonanga ubale nambosoni mpaka jisokonasye mtendele wa mwiŵasa. Atamose kuti nganituŵa tutesile yaŵatesile achakulugwe Yosefe, nambope wosopewe tukwete mtima wangali umlama soni wakulambusya. (Yel. 17:9) Ligongo lya yeleyi, ndaŵi sine mpaka tutande kwatendela ŵane jelasi. Kwende tulole yisyasyo yine ya m’Baibulo yakutukalamusya. Yinduyi mpaka yitukamuchisye kumanyilila yayikusatendekasya kuti jelasi jitamilichiche mumtima mwetu. Kaneko chitulole matala gane gampaka gatukamuchisye kuti tumalane ni ndamo ja jelasi soni kuŵa ŵakwikasya mtendele.

4. Ligongo chichi Afilisiti ŵamtendele jelasi Isaki?

⁴ Kusichila. Isaki jwaliji jwakusichila yayatendekasisye kuti Afilisiti amtendeleje jelasi ligongo lya katundu jwakwe. (Gen. 26:12-14) Afilisitiŵa ŵayikene pakusilila yisima ya Isaki yaŵayikamulichisyaga masengo pa kumwesya mesi yilango yakwe. (Gen. 26:15, 16, 27) Mpela Afilisiti, masiku agano ŵandu ŵane akusiŵatendela jelasi ŵandu ŵakwete chipanje kapena ŵandu ŵele yindu yikwajendela chenene. Ngaŵa kuti jemanjaji akusagamba kusaka yindu yakwete ŵane, nambo akusasaka yindu yakweteyo yili yijonasiche.

5. Ligongo chichi achimlongola ŵadini ŵamtendelaga jelasi Yesu?

⁵ Kunonyeledwa ni ŵandu ŵajinji. Achimlongola ŵadini ŵaŵaliji Ayuda ŵamtelaga jelasi Yesu ligongo lyakuti ŵandu ŵajinji ŵamnonyelaga mnope jwalakwe. (Mat. 7:28, 29) Yesu ŵamjimilaga Mlungu soni ŵajiganyaga usyesyene. Atamose kuti yaliji myoyo, achimlongola ŵadiniŵa ŵawandisyaga yindu yaunami soni yakusakala pakusaka kusakasya mbili ja Yesu. (Mak. 15:10; Yoh. 11:47, 48; 12:12, 13, 19) Ana tukulijiganya chichi panganiji? Tukusosekwa kulolechesya kuti ngatukwatendela jelasi abale ni alongo ŵakusawoneka kuti ŵandu mumpingo akwanonyelaga mnope ligongo lya ndamo syawo syambone. Mmalo mwakwe, tulinjelinjeje kusyasya yakusatenda pakulosya chinonyelo.​—1 Akoli. 11:1; 3 Yoh. 11.

6. Ana Diyotilife ŵalosisye chamtuli mtima wa jelasi?

⁶ Kola udindo mumpingo. Mu yaka 100 yandanda, Diyotilife jŵatendelaga jelasi ŵandu ŵaŵalongolelaga mumpingo wa Chiklistu. Jwalakwe ŵasakaga kuti “aŵe jwakulongolela” mumpingo, myoyo ŵamŵechetelaga ndumetume Yohane soni abale ŵane yindu yakusakala pakusaka kuti ŵandu ŵane mumpingo akachimbichisyaga jemanjaji. (3 Yoh. 9, 10) Atamose kuti nganituŵa tutesile yindu mpela Diyotilife, nambope mpaka tutande kwatendela jelasi Aklistu achimjetu ŵapochele udindo watujembecheyeje kuti mpaka tupochele m’wejo. Mpaka tutende yeleyi mnopemnope patukuganisya kuti m’we ni ŵampaka tutende chenene paudindowo.

7. Ana jelasi mpaka jitulepelekasye kutenda chichi?

⁷ Jelasi jili mpela chindu chakonanga. Pajitamilichiche mnope mumtima mwetu mpaka jisawusye kujityosya. Ndamo syakusakala mpela litima, kunyada nambosoni kulinonyela mpaka sitendekasye kuti jelasi jikule mnope. Jelasi mpaka jitutendekasye kuti tukalosyaga ndamo syambone mpela chinonyelo, chanasa soni umbone mtima. Jelasi pajitandite kuwonechela mumtima mwetu tukusosekwa kujityosya ndaŵi jijojo. Ana mpaka tuŵambale chamtuli jelasi?

8. Ana ni ndamo syapi syampaka situkamuchisye kumalana ni jelasi?

⁸ Mpaka tuŵambale jelasi mwakuŵa ŵakulinandiya soni ŵakwikutila. Naga tukwete ndamo syambonesi, nikuti tuchiŵambala kwatendela jelasi ŵane. Kulinandiya kuchitukamuchisya kuti tukaliganichisyaga mnope. Mundu jwakulinandiya jwangaganisyaga kuti ali jwakwapunda ŵane. (Aga. 6:3, 4) Mundu jwakwikutila akusayiwonaga kuti yakwete yili yakwanila soni jwangayilandanya ni yakwete ŵane. (1 Tim. 6:7, 8) Mundu jwakusalinandiya soni jwakwikutila pam’weni mjakwe ali apatile chindu chambone, akusaŵa jwakusangalala.

9. Mwakamulana ni Agalatiya 5:16 soni Afilipi 2:3, 4, ana msimu weswela mpaka utukamuchisye kutenda chichi?

⁹ Tukusosekwa kuŵenda msimu weswela wa Mlungu kuti utukamuchisye kuŵambala jelasi soni kuti tuŵe ŵakulinandiya soni ŵakwikutila. (Aŵalanje Agalatiya 5:16; Afilipi 2:3, 4.) Msimu weswela mpaka utukamuchisye kuti tuwungunye chenene yayili munganisyo mwetu. Ni chikamuchisyo cha Yehofa mpaka tukombole kutyosya nganisyo syakusakala ni kuŵika  nganisyo syambone. (Sal. 26:2; 51:10) Aganichisye ya chisyasyo cha Mose ni Paulo. Jemanjaji ŵalimbene ni ndamo ja jelasiji.

10. Ana Mose akasimene ni chakulingwa chamtuli? (Alole chiwulili cha pachikuto.)

¹⁰ Mose jwakwete udindo wakwalolela ŵandu ŵa Mlungu, nambope jwalakwe nganakola mtima wakuti atendeje jika yosope. Mwachisyasyo pa chakutendekwa chine, Yehofa ŵajigele wine mwa msimu waŵampele Mose ni kuwupeleka kwa achakulungwa ŵakulongolela ŵaŵatamaga chiŵandika tenti jakusonganilana. Pali pagambile kupita ndaŵi jamnono, Mose ŵapikene kuti achakulungwa ŵane ŵaŵili ŵanganasimanikwaga ku tenti jakusonganilana ŵapochele msimu weswela mwamti ŵatandite kutenda yindu mpela ŵakulochesya. Ana Mose ŵatesile wuli pandaŵi jele Yoswa ŵamsalile jwalakwe kuti ŵalekasye yaŵatendaga achakulungwa ŵaŵiliŵa? Mose nganatenda jelasi ligongo lya mwaŵatendelaga yindu Yehofa ni ŵanduŵa. Myoyo mmalo mwakutenda jelasi, jwalakwe jwalinandiye soni kusangalala ligongo lya udindo waŵapochele jemanjaji. (Num. 11:24-29) Ana yaŵatesile Mose pelepa yikutujiganya chichi?

11. Ana achakulungwa ŵamumpingo mpaka amsyasye wuli Mose?

¹¹ Naga wawojo ali jwamkulungwa jwamumpingo, ana pakwete paŵaŵendile kuti ŵajiganye ŵane mwampaka akamulile masengo gakusatendega wawojo, gelesoni akusaganonyela mnope? Mwine mpaka yiŵe kuti akusawunonyela udindo wakutendesya lijiganyo lya Sanja ja Mlonda wiki jilijose. Naga ali ŵakulinandiya mpela Mose, nganiyiŵa yiŵele yakusawusya naga ali ŵaŵendile kuti amjiganye m’bale jwine kuti msogolo chakwanisye kamula chenene masengogo. Mmalo mwakwanyalaya, chachiŵa ŵakusangalala pakumjiganya m’balejo.

12. Ana Aklistu ŵajinji masiku agano akulosya chamtuli kuti ali ŵakwikutila soni ŵakulinandiya?

¹² Aganichisye yindu yakusimana nayo abale ŵachikulile ŵajinji. Kwa yaka yejinji, jemanjaji aŵele mkutumichila mpela ŵakulondesya masengo ga achakulungwa. Mwakusachilila, jemanjaji akusaleka udindowu pagambile kukwanisya yaka 80. Nombe ŵakulolela mikuli ŵakwanisye yaka 70, mwakulinandiya akusaleka udindo wawo kaneko ni kupochela utumiki wasambano. Pachangakaŵapa, ŵakutumichila pa Beteli ŵajinji pachilambo chosope apochele utumiki wakuja kulalichila m’madela gane. Abale ni alongo ŵakulupichikaŵa ngakusiŵalola ni liso lyechejewu achimjawo ŵakukamula utumiki waŵatendega jemanjaji pandanda.

13. Ana ni yindu yapi yayikamtendekasisye Paulo kwatendela jelasi ŵandumetume 12 ŵa Yesu?

¹³ Ndumetume Paulo alisoni chisyasyo chambone pangani ja kuŵa ŵakwikutila soni kulinandiya. Paulo nganakunda kuti jelasi jikule mumtima mwakwe. Jwalakwe jwalimbichilaga mnope utumiki, soni mwakulinandiya jwatite, “Unetu ndili jwamnondi mwandumetume syosope. Nganimba jwakwenela kose kuŵilanjidwa kuti ndumetume.” (1 Akoli. 15:9, 10) Ŵandumetume 12 ŵa Yesu ŵakwete upile wakumkuya jwalakwe pandaŵi ja utumiki wakwe wa pachilambo chapasi. Nambo pandaŵiji Paulo ŵaliji mkanaŵe Mklistu mpaka pandaŵi jele Yesu ŵajimwiche kuŵawe. Atamose kuti jwasagulidwe kuti aŵe “jwandumetume kwa ŵandu ŵamitundu jine,” nambope jwalakwe nganapata upile wakuŵa m’likuga lya ŵandumetume 12 ŵala. (Alo. 11:13; Mase. 1:21-26) Mmalo mwakuti Paulo jwatendeleje jelasi ŵandumetume 12 ŵala ligongo lyakuti ŵaliji paujakwe mnope ni Yesu, jwalakwe jwapitilisyepe kwikutila ni yajwakwete.

14. Ana mpaka tukombole kutenda chichi naga tuli ŵakwikutila soni ŵakulinandiya?

¹⁴ Naga tukuŵa ŵakwikutila soni ŵakulinandiya, tuchilandana ni Paulo, soni tuchachimbichisya ŵandu ŵele Yehofa ŵapele udindo. (Mase. 21:20-26) Yehofa alinganyisye yakuti papagwe achakulungwa ŵakuti alongoleleje mpingo wa Chiklistu. Atamose kuti jemanjaji ali  ŵangali umlama, nambope Yehofa akusiŵawona kuti ali “mituka ja achalume.” (Aef. 4:8, 11, NW) Patukwachimbichisya jemanjaji soni kukuya mwakulinandiya yakusatusalila, yikusatendekasya kuti tuŵe paunasi wambone ni Yehofa soni kuŵa pamtendele ni Aklistu achimjetu.

15. Ana tukusosekwa kutenda chichi kuti tuŵambale jelasi?

¹⁵ Naga tukusatendelana jelasi mpaka yiŵe yakusawusya pasikati petu kola mtendele. Tukusosekwa kutyosya mumtima mwetu nganisyo syakwatendela ŵane jelasi soni kuŵambala kwatendekasya ŵane kola nganisyosi. Tukusosekwa kutenda yeleyi kuti tulosye kuti tukumpikanila Yehofa ‘mwakusosasosa yindu yampaka yikamuchisye kuti paŵe pana mtendele nambosoni kulimbisyana jwine ni mjakwe.’ (Alo. 14:19) Ana tukusosekwa kutenda chichi kuti twakamuchisye ŵane kumalana ni jelasi, soni mpaka tulimbikasye chamtuli mtendele?

16. Ana mpaka twakamuchisye chamtuli ŵane kuti amalane ni ndamo ja kwatendela ŵane jelasi?

¹⁶ Katende ketu ka yindu mpaka kakwaye ŵane. Chilambo chikusasaka kuti ‘tupocheleje’ kapena kuti kulilosya ni yindu yatukwete. (1 Yoh. 2:16) Nambo nganisyo syelesi sikusalimbikasya jelasi. Mpaka tuŵambale kumtendekasya mundu jwine kutenda jelasi naga ngatukutamila kuŵecheta ya yindu yatukwete kapena yatukusaka kusuma. Litala line lyampaka tuŵambalile jelasi, lili kuŵa ŵakulinandiya patupochele maudindo gane mumpingo. Naga tukutamila kuŵecheta ya maudindo gatukwete nikuti  mpaka tutendekasye kuti ndamo ja jelasiji jigambeje kula. Mwakulekangana ni yeleyi, patukutenda chidwi ni ŵane soni kumanyilila yindu yambone yakusatenda, yikusaŵa kuti tukwakamuchisya jemanjajo kuŵa ŵakwikutila. Yeleyi yikusatendekasya kuti mumpingo muŵe mwana mkamulano soni mtendele.

17. Ana achakulugwe ŵa Yosefe ŵakombwele kutenda chichi, soni ŵatesile yeleyi ligongo chichi?

¹⁷ Yili yakomboleka kuwina ngondo jakulimbana ni jelasi. Aganichisyesoni ya chisyasyo cha achakulugwe ŵa Yosefe ŵala. Pali papitile yaka kutyochela paŵamtendele yangali chilungamo, jemanjaji ŵasimene ni jwalakwe ku Iguputo. Mkanaŵe kwamanyisya kuti jwalakwejo ali Yosefe, ŵalinjile kaje jemanjaji pakusaka kumanyilila naga achenjile ndamo syawo. Yosefe jwalinganyisye yakulya ni kwapa achakulugwewo, nambo Benjamini juŵaliji mpwakwe ŵampele yakulya yejinji kupunda ŵanewo. (Gen. 43:33, 34) Nambo achakulugweŵa nganamtendela jelasi Benjamini. Mmalo mwakwe, jemanjaji ŵamtendelaga chanasa mpwawojo soni Yakobo ŵaŵaliji baba ŵawo. (Gen. 44:30-34) Ligongo lyakuti achakulugwe Yosefe ŵalesile mtima wa jelasi, yatendekasisye kuti mwiŵasa mwawo muwujile mtendele. (Gen. 45:4, 15) Mwakulandana ni yeleyi, naga tukutyosya nganisyo syakwatendela ŵane jelasi, tuchitendekasya kuti mwiŵasa soni mumpingo mwetu muŵe mtendele.

18. Mwakamulana ni Yakobo 3:17, 18, ana mpaka chitendekwe chichi naga tukulimbikasya mtendele?

¹⁸ Yehofa akusasakaga kuti tuŵe ŵandu ŵakulimbikasya mtendele soni ŵangali jelasi. Tukusosekwa kulimbichila kuti tukombole kutenda yindu yiŵili yeleyi. Mpela mwatuyiwonele munganiji, wosopewe tukusakolaga nganisyo sya jelasi. (Yak. 4:5) Konjechesya pelepa, chilambo chatukutamachi chigumbele ni ŵandu ŵakusalimbikasya ndamo ja jelasi. Naga tukuŵa ŵakulinandiya, ŵakwikutila soni ŵakuyamichila, tuchiŵa ŵandu ŵangali jelasi. Mmalo mwakwe tuchilimbikasya mtendele ni chakulinga chakuti tukole ndamo syambone.​—Aŵalanje Yakobo 3:17, 18.