1. Mu kibila ki nsoki, mambu mbi mamonika va dikanda di Yosefi?

 YAKOBI waba zolanga bana bandi boso, vayi waba luta zolanga Yosefi wuba 17 di mimvu. Vayi buidi zikhomba zi Yosefi bamuena mawu? Bawu bakuna nsoki ayi mu kibila beni bayiza kunlenda. Yosefi kasa vanga ko ni diambu muingi zikhomba ziandi banlenda. Vayi bawu bansumbisa buka mvika ayi bavuna tat’awu ti kibulu ki nsitu kidia muan’andi kaba luta zolanga. Mu kibila ki nsoki, bawu batulula ndembama va dikanda, ayi banyongisa ntima wu tat’awu.—Ngenesi 37:3, 4, 27-34.

2. Dedi bummonisina Ngalatia 5:19-21, kibila mbi nsoki yidi khadulu yimbi?

² Mu Kibibila, nsoki b widi kithuadi na ‘mavanga ma kinsuni’ malenda tuadisa lufua ayi kuvanga mutu kuzimbisa luaku lu kukota mu Kintinu ki Nzambi. (Tanga Ngalatia 5:19-21.) Nsoki yawu tho yi mavanga amomo ma kinsuni.

3. Mbi tunkuiza tubila mu dilongi adidi?

³ Kifuani ki zikhomba zi Yosefi kimmonisa buidi nsoki wulenda tuludila kinkundi ayi ndembama yidi va dikanda. Kheti tuisinkuiza vanga ko mambu zikhomba zi Yosefi bavanga, befu boso tuidi batu ba masumu ayi tuidi ntima wu bukhita. (Yelemia 17:9) Bo khumbu zinkaka tulenda mona bankaka nsoki, diawu mu dilongi adidi tuemmona bifuani bi Kibibila binkuiza tusadisa kuvisa kibila mbi mayindu ma nsoki malenda konzukila mu ntim’itu. Bosi tunkuiza mona buidi tulenda nungina nsoki ayi kutuadisa ndembama.

4. Kibila mbi basi Filistea baba muenanga Izaki nsoki?

⁴ Biuma bi kinsuni. Izaki wuba beni kimvuama, ayi basi Filistea baba kummonanga nsoki. (Ngenesi 26:12-14) Bawu bafuka mabulu Izaki kaba sadila muingi kunuikina bibulu biandi nlangu. (Ngenesi 26:15, 16, 27) Dedi basi Filistea, batu bawombo bubu bammonanga nsoki batu baba lutidi kimvuama. Bawu bansitomba ko to biuma bankaka badi, vayi mvandi bantomba kuba tula nkaku mu biuma badi.

5. Kibila mbi zimfumu zi binganga baba muenanga Yesu nsoki?

⁵ Mutu banzolanga kuidi batu bawombo. Zimfumu zi binganga bi basi Yuda baba monanga Yesu nsoki, kibila batu bawombo baba kunzolanga. (Matai 7:28, 29) Yesu wuba mvuala wu Nzambi ayi nandi waba longanga kiedika. Kheti bobo, zimfumu zi binganga bamvunina mambu muingi kubifisa dizina diandi. (Malako 15:10; Yoane 11:47, 48; 12:12, 13, 19) Mambu mbi tulenda longuka mu kinongo akioki? Tulenda longuka ti, tufueti vanga mangolo muingi tubika mona nsoki zikhomba badi zikhadulu zimboti ayi banzolanga kuidi batu bawombo mu kimvuka. Vayi tufueti tomba kulandakana kifuani kiawu mu kukuna zikhadulu ziawu zimboti.—1 Kolinto 11:1; 3 Yoane 11.

6. Buidi Diotelefe kamonisina ti wuba nsoki?

⁶ Biyeku mu Kimvuka. Mu sekulu yitheti Diotelefe wuba nsoki mu batu baba tuamanga ntuala mu kimvuka ki Baklisto. Nandi waba ‘tomba kuba wutheti’ mu zikhomba zi kimvuka, diawu nandi katiamunina mambu mawombo mambi ayi ma luvunu, muingi batu babika kukikinina mvuala Yoane ayi zikhomba zinkaka baba tuama ntuala. (3 Yoane 9, 10) Dedi Diotelefe, befu mvitu tulenda tona kumona nsoki boti khomba mu kimvuka betambula kiyeku befu tuaba tomba kutambula. Ayi tulenda luta kuba mona nsoki, befu kuyindulanga ti tulutidi ba bakubama muingi kukieba kiyeku beni.

7. Mambu mbi malenda monika befu kuba nsoki?

⁷ Nsoki widi buka kititi kimbi. Befu kubika kiawu kiyonzuka mu tsola, kilenda vonda mbongo yoso. Bobuawu mvandi befu kubika nsoki kukonzuka mu ntim’itu, dilenda ba diambu diphasi kumanisa wawu. Kuba nsoki kuntuadisanga mvandi, zikhadulu zinkaka zimbi dedi kiphala, lungundayi ayi buimi. Nsoki wulenda kutu vanga kubika ba zikhadulu zimboti dedi luzolo, kiadi ayi kuba nkua mamboti. Boti nsoki wuma tona kukonzuka mu ntim’itu, tufueti vanga mangolo muingi kumanisa khadulu ayoyi yimbi. Mbi tulenda vanga muingi kumanisa nsoki tuidi mu ntima?

8. Zikhadulu mbi zilenda kutusadisa kununga nsoki?

⁸ Tulenda nunga nsoki befu kukikululanga ayi kukuangalalanga mu biuma tuidi. Befu kuwesa zikhadulu aziozi mu ntim’itu, nsoki wuisinkuiza yonzuka ko mu ntim’itu. Kukikulula kuala tusadisa kubika yindulanga beni mu befu veka ayi tualasa yindulanga ko ti tulutidi bankaka. (Ngalatia 6:3, 4) Mutu wunkuangalanga mu biuma kadi widi mayangi ayi kayidedikisanga ko na bankaka. (1 Timoteo 6:7, 8) Mvandi mutu wuyikululanga ayi wunkuagalalanga mu biuma kadi, wumbanga mayangi bo kammona bankaka bantambula biuma bimboti.

9. Dedi buntubila Ngalatia 5:16 ayi Filipi 2:3, 4, mbi phevi yinlongo yela tusadisa kuvanga?

⁹ Muingi tununga nsoki, ayi kukuna khadulu yi kukikulula ayi kukuangalala mu biuma tuidi, tufueti dinda lusalusu lu phevi yinlongo  yi Yave. (Tanga Ngalatia 5:16; Filipi 2:3, 4.) Phevi yinlongo yilenda kutu sadisa kufiongunina mabanza mitu ayi mayindu ma tsi ntim’itu. Ma kuba mambi, Yave kalenda kutusadisa kuvingisa mawu mu mabanza mamboti. (Minkunga 26:2; 51:10) Mose ayi Polo banunga nsoki. Diawu tuentubila bifuani biawu.

10. Mambu mbi mabina tota Mose? (Tala foto yidi va thononu.)

¹⁰ Mose wuba kiyeku ki kutuama ntuala mu dikabu di Nzambi. Vayi nandi kasa tula ko nkaku bankaka muingi kubaka kiyeku beni. Dedi, khumbu mueka Yave wubonga nkadu phevi yinlongo yiba mu Mose ayi wuvana yawu kuidi dingumba di bakulutu ba basi Isaeli baba bakutakana va nganda nzo ngoto voti nzo lukutukunu. Vasa vioka ko beni thangu, Mose wuyiza bakula ti bakulutu buadi basa kuenda ko mu lukutukunu beni, mvandi batambula phevi yinlongo ayi batona kubikula mambu. Yosua wudinda Mose muingi kaba kandimina kubikula. Mbi Mose kavanga? Nandi kasa mona ko nsoki bo Yave kaba vana phevi beni. Vayi nandi wukikulula ayi wuyangalala mu kiyeku batambula. (Zintalu 11:24-29) Mbi tulenda longuka mu kifuani ki Mose?

11. Buidi bakulutu ba kimvuka balenda landikinina kifuani ki Mose?

¹¹ Ngie widi nkulutu wu kimvuka? Dingumba di bakulutu bamana kudinda muingi wukubika khomba wunkaka mu kiyeku kio ngie wunzolanga beni? Buka, ḿba ngie wunzolanga beni kutuadisa ndongukulu yi Kibanga ki Nsungi kadika sabala. Ngie ku kikulula buka Mose, walasa nionga ko ba ku kudinda wukubika mutu wunkaka muingi kukieba kiyeku beni. Vayi wala ba mu mayangi mu kusadisa khomb’aku.

12. Buidi baklisto bawombo bubu ba kikuludilanga ayi bankuangalalanga mu biuma badi?

¹² Tala diambu dinkaka zikhomba beka binunu, badi mu kuviokila. Bawombo mu bawu badi mintuadisi mi dingumba di bakulutu ba kimvuka mu mimvu miwombo. Vayi bo bandukisa 80 di mimvu, mu mayangi bamvananga kiyeku beni kuidi khomba yinkaka. Minkengididi mi bimvuka bamvanganga mvandi mawu. Bo bandukisa 70 di mimvu, bawu bambikanga kusala buka nkengididi wu bimvuka ayi bankikininanga kiyeku kimona. Mu mimvu mima vioka, zibetelita ziwombo baba tumisa muingi kusala mu bibuangu binkaka. Zikhomba aziozi zikuikama, bamonanga ko nsoki zikhomba zimvanga kisalu bawu baba vanganga.

13. Kibila mbi Polo kabina ba muingi kumona nsoki 12 di bapostolo ba Yesu?

¹³ Mvuala Polo widi kifuani kinkaka mu kukikulula ayi kukuangalala mu biuma kaba. Nandi kasa bika ko nsoki kukonzuka mu ntim’andi. Kheti wukivana beni mu kisalu ki kusamuna, nandi wukikulula ayi wutuba: ‘Minu yilutidi buluelo mu zimvuala zioso, ayi yisi ko wufuana mu kutedulu mvuala.’ (1 Kolinto 15:9, 10) Polo kasa ba ko mu khati 12 di bapostolo balandakana Yesu bo nandi kaba va ntoto, vayi bo vavioka mua thangu bo Yesu kavulubuka, buawu nandi kayiza ba mu dingumba di baklisto bakiedika. Kheti kuntuala Polo bansola muingi ‘kusadisa bapakanu,’ nandi kasa ba ko mu khati 12 di bapostolo. (Loma 11:13; Mavanga 1:21-26) Ayi nandi kasa mona ko nsoki bo bazinga na Yesu, vayi nandi wuyangalala mu luaku bawu baba.

14. Befu kukuna khadulu yi kukikulula ayi kukuangalala mu biuma tuidi, mbi mawu mala tusadisa kuvanga?

¹⁴ Dedi Polo, befu kukuna khadulu yi kukikulula ayi kukuangalala mu biuma tuidi, mawu mala tusadisa kukinzika batu Yave kavana biyeku mu kimvuka. (Mavanga 21:20-26) Nandi wukubika batu muingi kutuama ntuala mu kimvuka. Batu beni basi ko  basonga, vayi Yave wuba tadilanga dedi ‘makaba ma batu.’ (Efeso 4:8, 11) Buboti beni kukinzika zikhomba aziozi badi biyeku ayi kulandakana zithuadusulu ba tuvananga. Befu kuvanga mawu, tuala fikama Yave ayi tuala ba mu ndembama na bankaka.

15. Mbi tufueti vanga?

¹⁵ Befu kubika nsoki kukonzuka mu ntim’itu, mawu mala manisa ndembama tuidi. Diawu, tufueti tulula mosokua mayindu malenda kutuvanga kumona nsoki bankaka ayi kuba keba keba muingi mayindu beni mabika kubue konzuka. Mambu amomo, madi beni nkinza boti tutidi kutumukina nsiku wu Yave wuntuba: ‘Tomba mambu mantuadisanga ndembama ayi ma tukindisanga.’ (Loma 14:19) Mbi tufueti vanga muingi kusadisa bankaka kununga nsoki? Buidi tulenda tuadisila ndembama?

16. Biudi tulenda sadisila bankaka kununga nsoki?

¹⁶ Mambu tumvanga ayi tuntuba malenda sadisa bankaka voti ndamba. Nza yintomba befu tuba ‘luniemu mu luzingu’ mu kibila ki biuma tuidi. (1 Yoane 2:16) Vayi mawu mantuadisanga nsoki. Diawu muingi kusadisa bankaka kununga nsoki, tufueti bika kukolukanga khumbu zioso matedi biuma befu tuidi ove biuma tutidi kusumba. Phila yinkaka tulenda manisina nsoki, yidi mu kuba mayindu mafuana mu biyeku tuidi mu kimvuka. Kutubilanga khumbu zioso mambu tumvanganga mu kisalu ki Yave, kulenda vanga bankaka  kuba nsoki. Kiuma kilutidi tufueti vanga, kidi kuvua bankaka nkinza ayi kuba tonda mu mambu bamvanganga. Mu phila ayoyi, befu tuala basadisa kukuangalala mu biuma badi ayi tuala buela tuadisa ndembama ayi kithuadi mu kimvuka.

17. Mambu mbi zikhomba zi Yosefi banunga kuvanga ayi kibila mbi?

¹⁷ Befu tulenda nunga nsoki! Bue yindulabu kifuani ki zikhomba zi Yosefi. Mimvu miwombo kuntuala bo basumbisa Yosefi, bawu bayenda kumbata ku Ngipiti. Vayi ava kuyizabikisa kuidi zikhomba ziandi, Yosefi wuba thota muingi kazaba boti bawu babalula mavanga mawu. Bo baba dia, Yosefi wuvana bidia biwombo kuidi Benyamini khomb’awu wu kilezi kuvioka zikhomba ziandi zinkaka. (Ngenesi 43:33, 34) Kheti abobo, vasi ko bivisa bimmonisa ti bawu bamona Benyamini nsoki. Bawu bamonisa ti baba vuanga nkinza khomb’awu ayi tat’awu Yakobi. (Ngenesi 44:30-34) Bo babotula nsoki mu ntim’awu, zikhomba zi Yosefi banunga kuvutula ndembama va dikanda diawu. (Ngenesi 45:4, 15) Befu kununga kubotula mosokua mayindu ma nsoki mu ntim’itu, tuala tuadisa ndembama va dikanda ditu ayi mu kimvuka.

18. Dedi bummonisina Yakobi 3:17, 18, mambu mbi mala monika befu kukuna zikhadulu zimboti?

¹⁸ Yave wuntomba tubika nsoki ayi tutatamana kutuadisa ndembama. Kuvanga mambu mamuadi amomo, kuntombuluanga beni kibakala. Dedi bo tuma muena mu dilongi adidi, mayindu ma nsoki ma tukuizilanga beni mu ntima. (Yakobi 4:5) Ayi tuidi mu kuzingila mu nza yinkindisanga batu kumona bankaka nsoki. Vayi befu kukuna khadulu yi kukikulula, kukuangalala mu biuma tuidi ayi kutondanga bankaka, nsoki walasa konzuka ko mu ntim’itu. Zikhadulu aziozi zimboti, ziala tusadisa kubuela tuadisa ndembama va khat’itu ayi kuzingila mu kithuadi.—Tanga Yakobi 3:17, 18.