XOOK 8
Kaxt jeetsʼelil, maʼ a tsʼíiboltik baʼax yaan tiʼ u maasil
«Maʼ u xuʼulul k-beetkeʼex le baʼaxoʼob ku yáantajoʼob utiaʼal ka yanak jeetsʼeliloʼ bey xan le baʼaxoʼob ku meyajoʼob utiaʼal u paklan líiʼsik u yóol máakoʼ» (ROM. 14:19).
KʼAAY 113 Yaan jeetsʼelil ichiloʼon
TIʼ BAʼAX KUN TʼAAN *
1. Úuchik u pʼektaʼal José tumen u sukuʼunoʼobeʼ, ¿baʼax úuch ichil u familia?
JACOBEʼ u yaabiltmaj tuláakal u paalal, pero u maas yaabiltmaj kaʼach José. ¿Bix tu yuʼubiluba u maasil u paalal ka tu tsʼáajoʼob cuenta u maas yaabiltmaj José? Letiʼobeʼ tu sen pʼektoʼob José kex chéen 17 años yaan kaʼach tiʼ. Joséeʼ mix baʼal u beetmaj tiʼ u sukuʼunoʼob utiaʼal ka pʼektaʼak. Kex beyoʼ tu konoʼob bey esclavoeʼ, tsʼoʼoleʼ tu yaʼaloʼob tiʼ u papáʼob jaantaʼab tumen juntúul tsʼíitsʼik baʼalcheʼ. Úuchik u pʼektik u yíitsʼinoʼoboʼ pʼáat minaʼan kiʼimak óolal ichil u familiaʼob yéetel tu beetoʼob u sen yaatal u yóol u taataʼob (Gén. 37:3, 4, 27-34).
2. Jeʼex u yaʼalik Gálatas 5:19 tak 21, ¿baʼaxten unaj k-kanáantik maʼ k-pʼektik u maasil mix k-tsʼíiboltik baʼax u tiaʼal yaanal?
2 Ichil le «baʼaxoʼob ku túulchʼintaʼal u beet máak tumen u kʼeban wíinklil» ku yaʼalaʼal teʼ Bibliaoʼ táakaʼan u tsʼíiboltik baʼax u tiaʼal yaanal wa u pʼektik yoʼolal baʼaxoʼob yaantiʼ. * Le máaxoʼob yaantiʼob le kʼaakʼas modosaʼ maʼ ken u tiaʼalintoʼob u Reino Dios (xok Gálatas 5:19-21). Le kʼaakʼas modosaʼ ku beetik u pʼektik máak u maasil, maʼ u biskuba tu yéeteloʼob yéetel u séeb pʼuʼujul.
3. ¿Baʼax ken k-kan teʼ xookaʼ?
3 Le baʼax tu beetaj u sukuʼunoʼob Joséoʼ ku yeʼesik bukaʼaj muʼyajil ku taasik u pʼektaʼal máak yoʼolal baʼaxoʼob yaantiʼ, tsʼoʼoleʼ ku beetik xan u pʼáatal minaʼan kiʼimak óolal ichil le familiaoʼ. U jaajileʼ toʼoneʼ maʼ ken k-beet jeʼex u sukuʼunoʼob Joséoʼ, chéen baʼaleʼ maʼ unaj u tuʼubultoʼoneʼ kʼeban máakoʼon yéetel k-puksiʼikʼaleʼ jach séeb u tuskoʼon (Jer. 17:9). Le oʼolal yaan kʼiineʼ k-pʼektik u maasil yoʼolal baʼaxoʼob yaantiʼob wa k-tsʼíiboltik baʼax yaantiʼob. Teʼ xookaʼ yaan k-tʼaan tiʼ jujuntúul máaxoʼob tu pʼektoʼob u maasil yoʼolal baʼaxoʼob yaantiʼob yéetel yaan k-kanik bix jeʼel k-kanáantikba utiaʼal maʼ k-beetik jeʼex letiʼobeʼ. Yaan xan k-ilik baʼax beetik u káajal k-pʼektik u maasil yoʼolal baʼax yaantiʼob. Tu tsʼookeʼ yaan k-kanik baʼax jeʼel k-beetik utiaʼal maʼ u páakʼaltoʼon le kʼaakʼas modosaʼ, beyoʼ yaan k-áantaj utiaʼal ka yanak jeetsʼelil.
BAʼAXOʼOB BEETIK K-PʼEKTIK U MAASIL
4. ¿Baʼaxten pʼektaʼab Isaak tumen le filisteoʼoboʼ?
4 U ayikʼaltal máak. Isaakeʼ jach ayikʼal kaʼachi, le oʼolal joʼopʼ u pʼektaʼal tumen le filisteoʼoboʼ (Gén. 26:12-14). Úuchik u sen pʼektikoʼobeʼ tu butʼoʼob yéetel luʼum le chʼeʼenoʼob tuʼux ku chʼaʼik jaʼ u j-meyajoʼob Isaak utiaʼal u waakaxoʼoboʼ (Gén. 26:15, 16, 27). Teʼ kʼiinoʼobaʼ jujuntúul máakoʼobeʼ beyoʼob jeʼex le filisteoʼoboʼ tumen ku pʼektikoʼob u maasil yoʼolal baʼax yaantiʼob. Tsʼoʼoleʼ maʼ chéen ku tsʼíiboltkoʼob baʼax yaan tiʼ u maasiliʼ, yaneʼ hasta ku yaʼalik: «Kexiʼ maʼ u yantal u maasil baʼaloʼob tiʼeʼ».
5. ¿Baʼaxten pʼektaʼab Jesús tumen u nuuktakil le judíoʼoboʼ?
5 Kéen yaabiltaʼak máak. Jesúseʼ yaʼab máak yaabilte, le oʼolal pʼektaʼab tumen u nuuktakil le judíoʼoboʼ (Mat. 7:28, 29). Dios túuxt Jesús utiaʼal u kaʼansik u jaajil. Kex beyoʼ u nuuktakil le judíoʼoboʼ tu yaʼaloʼob baʼaloʼob tu contra utiaʼal u pʼatkoʼob kʼaasil (Mar. 15:10; Juan 11:47, 48; 12:12, 13, 19). ¿Baʼax ku kaʼansiktoʼon lelaʼ? Ku kaʼansiktoʼoneʼ maʼ unaj k-pʼektik le sukuʼunoʼob wa le kiikoʼob yaabiltaʼanoʼob teʼ múuchʼulil yoʼolal u jatsʼuts modosoʼoboʼ. Baʼaxeʼ unaj k-ilik xan k-eʼesik u jatsʼuts modosoʼob (1 Cor. 11:1; 3 Juan 11).
6. ¿Bix tu yeʼesil Diótrefes u pʼekmaj u maasil?
6 Kéen tsʼaʼabak tiʼ máak u maasil meyajoʼob teʼ múuchʼuliloʼ. Diótrefes, juntúul máax kuxlaj teʼ yáax siglooʼ u pʼekmaj le máaxoʼob nuʼuktik le múuchʼuliloʼ. Letiʼeʼ «uts tu tʼaan u beetik u nojchil ichil» le sukuʼunoʼoboʼ, le oʼolal joʼopʼ u yaʼalik baʼaloʼob kʼaastak yéetel maʼ jaajtak tu yoʼolal apóstol Juan yéetel u maasil sukuʼunoʼoboʼ (3 Juan 9, 10). Kex maʼ ken k-beet le baʼaxoʼob tu beetaj Diótrefesoʼ jeʼel u joʼopʼol k-pʼektik juntúul sukuʼun wa ku tsʼaʼabal u beet junpʼéel meyaj jach k-tsʼíiboltik kaʼacheʼ, maases wa k-tuklik maas k-ojel k-beet le meyajoʼ.
7. ¿Bix jeʼel u kʼaskúuntik k-modos k-tsʼíiboltik baʼax yaan tiʼ u maasileʼ?
7 U pʼektik máak u maasil yoʼolal baʼax yaantiʼeʼ jeʼel u páajtal u keʼetel yéetel junkúul kʼaakʼas xíiweʼ. Wa ku chaʼik máak u táabal u moots le kʼaakʼas modos tu puksiʼikʼaloʼ istikyaj kun xuʼulul u yeʼesik. Tsʼoʼoleʼ le celos, le kaʼanal ichil yéetel le u tuukul máak chéen tu yoʼolaloʼ jeʼel u beetik k-maas pʼektik u maasileʼ. Wa k-pʼektik u maasil yoʼolal baʼax yaantiʼobeʼ maʼ tun páajtal xan k-eʼesik jatsʼuts modos jeʼex yaabilaj, chʼaʼ óotsilil yéetel utsil. Le oʼolal junpuliʼ maʼ unaj k-chaʼik u machkuba u moots t-puksiʼikʼaliʼ. ¿Bix jeʼel k-beetkeʼ?
UNAJ K-EʼESIK KABAL ÓOLAL YÉETEL U KIʼIMAKTAL K-ÓOL YÉETEL BAʼAX YAANTOʼON
8. ¿Baʼax jeʼel u yáantkoʼon utiaʼal maʼ k-pʼektik u maasil yoʼolal baʼax yaantiʼobeʼ?
8 Wa k-eʼesik kabal óolal bey xan wa kiʼimak k-óol yéetel baʼax yaantoʼoneʼ maʼ ken k-pʼekt u maasil yoʼolal baʼaxoʼob yaantiʼob. Tsʼoʼoleʼ yaan k-jokik t-puksiʼikʼal le kʼaakʼas modosaʼ. Wa kabal k-óol xaneʼ maʼ ken k-tukult wa maas maʼaloboʼon tiʼ u maasil yéetel maʼ ken k-tukult wa k-náajaltmaj u tsʼaʼabaltoʼon maas yaʼab baʼaloʼob (Gál. 6:3, 4). Máax ku conformar yéetel baʼax yaantiʼeʼ maʼatech u ketkuba yéetel u maasil (1 Tim. 6:7, 8). Máax kabal u yóol yéetel kiʼimak u yóol yéetel baʼax yaantiʼeʼ, hasta ku kiʼimaktal u yóol kéen xiʼik utsil tiʼ u maasil.
9. Jeʼex u yeʼesik Gálatas 5:16 bey xan Filipenses 2:3 yéetel 4, ¿bix jeʼel u yáantkoʼon le espíritu santo k-eʼes jatsʼuts modosoʼ?
Gálatas 5:16; Filipenses 2:3, 4). U espíritu santo Dioseʼ ku yáantkoʼon k-il jach bixoʼon yéetel baʼax péeksikoʼon k-beet wa baʼax. Yéetel u yáantaj Jéeobaeʼ jeʼel u xuʼulul k-eʼesik kʼaakʼas modoseʼ (Sal. 26:2; 51:10). Koʼox ilik baʼax áant Moisés yéetel Pablo utiaʼal maʼ u pʼektikoʼob u maasil yoʼolal baʼax yaantiʼob.
9 Utiaʼal maʼ k-tsʼíiboltik baʼax yaan tiʼ u maasileʼ kʼaʼabéettoʼon u espíritu santo Jéeoba, k-eʼesik kabal óolal yéetel u kiʼimaktal k-óol yéetel baʼaxoʼob yaantoʼon (xok10. ¿Baʼax eʼes maʼ celosoʼ Moisésiʼ? (Ilawil le dibujo yaan tu yáax táan juʼunil le revistaaʼ).
10 Dioseʼ tu tsʼáaj nojoch autoridad tiʼ Moisés utiaʼal u nuʼuktik u kaajal, pero mix juntéen tu tuklaj wa chéen tiʼ letiʼ unaj u tsʼaʼabal. Juntéeneʼ Jéeobaeʼ tu luʼsaj junjaats le espíritu santo u tsʼaamaj tiʼ Moisésoʼ ka tu tsʼáaj tiʼ junmúuchʼ u nuuktakil le kaaj muchʼukbaloʼob naatsʼ tiʼ le tabernáculooʼ. Ka tsʼoʼokeʼ Moiséseʼ tu yojéelteʼ kaʼatúul tiʼ u nuuktakil le kaaj maʼ bin u muchʼubaʼob naatsʼ tiʼ le tabernáculooʼ tsʼaʼab xan espíritu santo tiʼob tumen Jéeoba, le oʼolal káaj u beetik u profetailoʼob. ¿Baʼax tu beetaj Moisés ka aʼalaʼabtiʼ tumen Josué ka u yaʼaltiʼob ka xuʼuluk u beetik u profetailoʼoboʼ? Moiséseʼ maʼ kʼuuxilnaj yéetel le kaʼatúul máakoʼoboʼ, baʼaxeʼ kiʼimakchaj u yóol úuchik u tsʼaʼabal espíritu santo tiʼob utiaʼal u beetik u profetailoʼob (Núm. 11:24-29). ¿Baʼax k-kanik tiʼ Moisés?
11. Le ancianoʼoboʼ, ¿bix jeʼel u beetkoʼob jeʼex Moiséseʼ?
11 Koʼoneʼex tuukul tiʼ juntúul sukuʼun ku beetik u ancianoil yéetel jach kiʼimak u yóol yéetel le meyajoʼob tsʼaʼan u beet teʼ múuchʼuliloʼ. Junpʼéel tiʼ le meyajoʼoboʼ letiʼe u nuʼuktik U Xookil U Pʼíich Tulumil Kananoʼ. Chéen baʼaleʼ junpʼéel kʼiineʼ ku yaʼalaʼaltiʼ ka u kaʼans uláakʼ sukuʼun utiaʼal u nuʼuktik le xookoʼ. Wa kabal u yóol jeʼex Moiséseʼ maʼ tun kʼuuxil, baʼaxeʼ yéetel kiʼimak óolal ken u kaʼanse.
12. ¿Bix u yeʼesik yaʼab sukuʼunoʼob kabal u yóoloʼob yéetel kiʼimak u yóoloʼob yéetel le baʼax ku beetkoʼob bejlaʼoʼ?
12 Koʼox ilik uláakʼ ejemplo tuʼux táakaʼan junmúuchʼ sukuʼunoʼob yaan u jaʼabiloʼob. Ich yaʼab añoseʼ tu beetaj u coordinadoriloʼob tiʼ le múuchʼ ancianoʼoboʼ. Chéen baʼaleʼ kéen u chuk 80 años tiʼobeʼ unaj u xuʼulul u beetkoʼob le meyajoʼ. Le superintendenteʼob tiʼ circuito tsʼoʼok 70 años tiʼoboʼ ku yeʼeskoʼob kabal óolal kéen xuʼuluk u beetkoʼob le meyajaʼ tsʼoʼoleʼ ku kʼamkoʼob yéetel kiʼimak óolal yaanal meyaj. Tsʼoʼoleʼ teʼ tu tsʼook añosaʼ yaʼab sukuʼunoʼob tsʼoʼok u xuʼulul u meyajoʼob Betel, baʼaleʼ láayliʼ kiʼimak u yóoloʼob táan u beetkoʼob uláakʼ meyajoʼob ichil u kaajal Jéeobaeʼ. Le sukuʼunoʼob yéetel le kiikoʼobaʼ maʼatech u kʼuuxiloʼob tumen yaanal máax beetik le meyaj ku beetkoʼob kaʼachoʼ.
13. ¿Baʼaxten jeʼel kaʼach u pʼektaʼal le apóstoloʼob tumen Pablooʼ?
13 Apóstol Pabloeʼ kabal u yóol tsʼoʼoleʼ tu yeʼesaj kiʼimak u yóol yéetel le baʼaxoʼob yaantiʼoʼ. Letiʼeʼ maʼ kʼuuxilnaj tumen táan u bin utsil tiʼ u maasiliʼ. Jach tu tsʼáaj u yóol u meyajt Jéeoba, baʼaleʼ tu yaʼalaj yéetel kabal óolal: «Teen u maas chichnil tiʼ le apóstoloʼoboʼ; tsʼoʼoleʼ maʼ tin náajmatik ka aʼalaʼakten apóstol» (1 Cor. 15:9, 10). Le 12 apóstoloʼoboʼ tu láakʼintoʼob Jesús ka kʼaʼaytajnaji, baʼaleʼ Pabloeʼ tsʼokaʼaniliʼ u kíimil yéetel u kaʼa kuxkíintaʼal Jesús ka káaj u meyajtik Dios. Kex ka máan kʼiin kʼaj óoltaʼab «bey juntúul apóstol teʼ táanxel luʼumoʼoboʼ», maʼ táakpaj ichil le 12 apóstoloʼoboʼ (Rom. 11:13; Hech. 1:21-26). Kex beyoʼ kiʼimakchaj u yóol yéetel le meyaj tsʼaʼab u beetoʼ, maʼ tu pʼektaj le 12 apóstoloʼoboʼ mix kʼuuxilnaj tu yéeteloʼob úuchik u biskubaʼob maʼalob yéetel Jesúsiʼ.
14. ¿Baʼax ken k-beet wa kabal k-óol bey xan wa kiʼimak k-óol yéetel baʼaxoʼob yaantoʼon?
14 Wa kabal k-óol yéetel kiʼimak k-óol yéetel le Hech. 21:20-26). Letiʼeʼ u tsʼaamaj ancianoʼob utiaʼal u nuʼuktikoʼob le múuchʼuliloʼ. Tsʼoʼoleʼ kex kʼeban máakoʼobeʼ, le Bibliaoʼ ku yaʼalikeʼ beyoʼob siibaloʼob tsʼaʼanoʼob tumen Jéeobaeʼ (Efe. 4:8, 11). Wa k-respetarkoʼob yéetel k-beetik baʼax ku yaʼalikoʼob yéetel kabal óolaleʼ yaan k-bisikba maʼalob yéetel Jéeoba yéetel maʼ ten k-kʼuuxil yéetel le sukuʼunoʼoboʼ.
baʼaxoʼob yaantoʼonoʼ, jeʼex Pabloeʼ yaan k-beetik baʼax ku yaʼalaʼaltoʼon tumen le máaxoʼob tsʼaʼanoʼob tumen Jéeoba utiaʼal u nuʼuktik u kaajaloʼ (MAʼ U XUʼULUL K-BEETIK BAʼAX KU YÁANTAJ UTIAʼAL KA YANAK JEETSʼELIL
15. ¿Baʼax kʼaʼabéet k-beetik utiaʼal maʼ k-kʼuuxil yoʼolal baʼax yaan tiʼ u maasil?
15 Maʼ tu páajtal u yantal jeetsʼelil wa k-kʼuuxil yoʼolal baʼax yaan tiʼ u maasil. Le oʼolal kʼaʼabéet k-jóokpaytik t-puksiʼikʼal le kʼaakʼas modosaʼ, beyoʼ maʼ tun páakʼal tiʼ u maasil. Jach kʼaʼabéet k-beetik le baʼax tsʼoʼok k-aʼalikaʼ, beyoʼ k-eʼesik táan k-beetik le baʼax tu yaʼalaj Jéeobaaʼ: «Maʼ u xuʼulul [a beetkeʼex] le baʼaxoʼob ku yáantajoʼob utiaʼal ka yanak jeetsʼeliloʼ bey xan le baʼaxoʼob ku meyajoʼob utiaʼal u paklan líiʼsik u yóol máakoʼ» (Rom. 14:19). ¿Bix jeʼel k-áantik u maasil utiaʼal maʼ u kʼuuxiloʼob yoʼolal baʼax yaan tiʼ u maasileʼ? ¿Bix jeʼel k-áantaj utiaʼal ka yanak jeetsʼelileʼ?
16. ¿Bix jeʼel k-áantik u maasil utiaʼal maʼ u tsʼíiboltkoʼob baʼax yaan tiʼ u maasileʼ?
16 Le modos k-eʼesik yéetel le baʼaxoʼob k-beetkoʼ séeb u páakʼal tiʼ u maasil. U máakiloʼob le yóokʼol kaabaʼ u kʼáatoʼob ka ‹u taasuba máak nojbaʼalil tu yoʼolal le baʼaxoʼob yaantiʼoʼ› (1 Juan 2:16). Baʼaleʼ lelaʼ chéen ku beetik u pʼektikuba máak. ¿Baʼax unaj k-beetik utiaʼal maʼ k-pakʼik tiʼ u maasil? Maʼ unaj k-máan k-kʼay wa k-tsikbalt baʼax yaantoʼoniʼ mix le baʼaxoʼob taak k-manikoʼ. Unaj xan k-eʼesik kabal óolal yéetel maʼ unaj k-máan k-tsikbalt baʼax meyajil k-beetik teʼ múuchʼuliloʼ. Wa chéen le k-sen tsikbaltikeʼ chéen táan k-kaxtik ka chʼaʼkʼuxtaʼakoʼon tumen u maasil. Baʼaleʼ wa k-kaxtik u yutsil u maasil yéetel k-ilik le baʼaloʼob maʼalobtak ku beetkoʼoboʼ yaan k-áantaj utiaʼal ka kiʼimakchajak u yóoloʼob yéetel ka yanak jeetsʼelil teʼ múuchʼuliloʼ.
17. ¿Baʼax xuʼul u beetik u sukuʼunoʼob José, yéetel baʼax utsil tu taasaj?
17 Jeʼel u páajtal u xuʼulul k-tsʼíiboltik baʼax yaan tiʼ u maasileʼ. Koʼox kaʼa tʼaan tiʼ baʼax úuch tiʼ u sukuʼunoʼob José. Ka máan años u kon u yíitsʼinoʼobeʼ tu kaʼa iloʼob Egipto. Baʼaleʼ utiaʼal u yilik José wa tsʼoʼok u kʼexik u tuukuloʼobeʼ maʼ tu jáan aʼalajtiʼob máaxiʼ, ka túun tu invitartoʼob janal. Ka jáalaʼab u yoʼoch Benjamíneʼ tu beetaj u tsʼaʼabal cinco u téenel u maas yaʼabil ke tiʼ u maasil u sukuʼunoʼoboʼ (Gén. 43:33, 34). Chéen baʼaleʼ mix baʼal eʼesik wa kʼuuxilnaj u sukuʼunoʼob, baʼaxeʼ tu yeʼesoʼob u yaabiltmoʼob Benjamín yéetel Jacob, u papáʼoboʼ (Gén. 44:30-34). U sukuʼunoʼob Joséeʼ xuʼul u tsʼíiboltkoʼob baʼax yaan tiʼ u maasil, bey úuchik u kaʼa antal kiʼimak óolal ichil u familia Joséoʼ (Gén. 45:4, 15). Wa k-kanáantik maʼ k-tsʼíiboltik baʼax yaan tiʼ u maasileʼ yaan k-áantaj utiaʼal ka yanak kiʼimak óolal ichil k-familia yéetel ka yanak jeetsʼelil teʼ múuchʼuliloʼ.
18. Jeʼex u yeʼesik Santiago 3:17 yéetel 18, ¿baʼax utsil jeʼel u taasik wa k-áantaj utiaʼal u yantal jeetsʼelileʼ?
18 Jéeobaeʼ u kʼáat ka yanak jeetsʼelil ichiloʼon, le oʼolal ku yaʼalik ka xuʼuluk k-tsʼíiboltik baʼax yaan tiʼ u maasil. Baʼaleʼ utiaʼal ka páajchajak k-beetkeʼ jach kʼaʼabéet k-tsʼáaik k-óoliʼ, tumen jeʼex tsʼoʼok k-ilik teʼ xookaʼ jach séeb k-tsʼíiboltik baʼax maʼ k-tiaʼaliʼ (Sant. 4:5). Tsʼoʼoleʼ u máakiloʼob le yóokʼol kaabaʼ uts tu tʼaan u nojbaʼalkúuntkubaʼob yoʼolal baʼaxoʼob yaantiʼob. Chéen baʼaleʼ wa kabal k-óol, suuk k-tsʼáaik u diosboʼotikil yéetel kiʼimak k-óol yéetel baʼax yaantoʼoneʼ, maʼ tun antaltoʼon le kʼaakʼas tsʼíibolalaʼ. Tsʼoʼoleʼ yaan k-áantaj utiaʼal ka yanak jeetsʼelil yéetel yaan u yantaltoʼon le jatsʼuts modos tsʼoʼok k-ilik teʼ xookaʼ (xok Santiago 3:17, 18).
KʼAAY 130 Unaj k-perdonar
^ xóot’ol 5 Ichil u kaajal Jéeobaeʼ jach chíikaʼan u yilaʼal yaan jeetsʼeliliʼ. Baʼaleʼ wa ku káajal k-pʼektik u maasil yoʼolal baʼaxoʼob yaantiʼob yéetel wa ku káajal xan k-tsʼíiboltik baʼax yaantiʼobeʼ jeʼel u xuʼulul u yantal le jeetsʼeliloʼ. Teʼ xookaʼ yaan k-ilik baʼax jeʼel u beetik k-pʼektik u maasil yoʼolal baʼax yaantiʼob bey xan baʼax jeʼel u beetik k-tsʼíiboltik baʼax yaantiʼobeʼ. Yaan xan k-ilik bix jeʼel k-kanáantikba utiaʼal maʼ u páakʼaltoʼon le kʼaakʼas modosaʼ yéetel baʼax unaj k-beetik utiaʼal u yantal jeetsʼelil ichiloʼon.
^ xóot’ol 2 BAʼAX KU TSOʼOLOL: Le Bibliaoʼ maʼ chéen ku yaʼalik maʼ unaj k-tsʼíiboltik baʼax yaan tiʼ u maasiliʼ, ku yaʼalik xaneʼ maʼ unaj k-tsʼíikil kéen k-il táan u bin maʼalobil tiʼ u maasiliʼ.
^ xóot’ol 61 FOTOʼOB: U ancianoiloʼob junpʼéel múuchʼulileʼ táan u yaʼalikoʼob tiʼ le sukuʼun nuʼuktik U Xookil U Pʼíich Tulumil Kanan ka u kaʼans juntúul anciano maas táankelem u beet le meyajoʼ, tumen letiʼeʼ tsʼoʼok u chʼíijil. Kex uts tu yich u beetik le meyajoʼ yéetel kiʼimak óolal ku beetik le baʼax aʼalaʼabtiʼoʼ. Letiʼeʼ ku yaʼalik tiʼ le táankelem bix unaj u beetik le meyajoʼ, tsʼoʼoleʼ ku felicitartik.