1. Кижиде кандый санааркаштар болуп јат, мынаҥ улам кандый санаалар келердеҥ айабас?

СЛЕР качан бирде санааркаганаар ба? * А эмди ле санааркап турганаар ба? Слерди кем де айткан сӧстӧриле эмезе керектериле ачындырып ийерде, санааркап турган болороор. Ол эмезе слер бойоор кемди-кемди ачындырып ийеле, амыр таппай турганаар. Эмезе јастырып ийеле, Иегова слердиҥ јаманыгарды качан да таштабас деп сананадыгар. Анайда ок бойоорды бӱдӱмјизи уйан, неге де турбас кижи деп сананып турган болороор. Је мынайып сананары чын ба?

2. Санааркап турган кижиниҥ бӱдӱмјизи уйан эмес деп, Агару Бичиктиҥ кандый темдери кӧргӱзет?

² Агару Бичиктеҥ кезик темдер кӧрӱп ийектер. Анна, судурчы Самуилдиҥ энези, Кудайга сӱреен тыҥ бӱткен. Андый да болзо, ого билезиниҥ бир кижизи јаман баштанып турарда, ол тыҥ санааркаган (1 Сам. 1:7). Апостол Павел база Кудайга тыҥ бӱткен, је ол бойы керегинде мындый сӧстӧр бичиген: «Ончо серкпелер керегинде сананып... јадым» (2 Кор. 11:28). Анайда ок Давид каан сӱрекей тыҥ бӱдӱмјилӱ болгоны учун Иегованыҥ јӱрегине јараган эр деп адалган (Ап. ижи 13:22). Је ол до јастыралар эдип, амырын  јылыйткан (Сар. 38:4). Иегова бу улустыҥ кажызын ла токунадып салган. Бу темдердеҥ бис неге ӱренер аргалу?

3. Бисти нениҥ учун ачу сӧстӧр санааркадар болор?

³ Улус, анчада ла јуук најыбыс эмезе тӧрӧӧнис, бисле кату куучындажып турза эмезе бисти тообой турза, биске јаман болуп турган болор. Бу ӧйдӧ бис колбуларыс ӱрелип калганына санааркаардаҥ айабазыс. Кезик улустыҥ јазап сананбай айткан сӧстӧри кылышла кезип ийгенине тӱҥей болот (Укаа 12:18). Је кезик улус ӧнӧтийин ачу сӧстӧр айдып јат. Мындый учурал бир эјеле болгон. Ол куучындайт: «Канча да јыл кайра најым болгон кыс соцсетьтерде мен керегинде тӧгӱн неме бичип баштаган. Меге коркышту ачынчылу болгон! Ол нениҥ учун анайып эткенин чек оҥдобогом». Слерди де јуук најыгар эмезе тӧрӧӧнӧӧр санааркаткан болзо, слерге Аннаныҥ теми болужар.

4. Анна кандый јеҥил эмес айалгада болгон?

⁴ Аннаныҥ айалгазы јеҥил эмес болгон. Ол канча јылдарга балдар јок јӱрген (1 Сам. 1:2). Израильдиҥ культуразында бала таппас ӱй улусты Кудай каргап салган деп айдатан. Андый улус бойлорын јабыс кӧрӧтӧн (Баш. 30:1, 2). Анайда ок Аннаныҥ ӧбӧӧниниҥ экинчи ӱйи, Феннана, Аннага кӧрӧ балдарлу болгон. Ол Аннага кӱнӱркеп, «оны јаантайын базынып, кунуктырып туратан» (1 Сам. 1:6). Аннага озо баштап мындый айалгада кӱч болгон, оныҥ учун ол коркышту тыҥ кунугып, «кӧстиҥ јажын тӧгӱп, курсак-тамак јибей барган». Ого коркышту ачу болгон (1 Сам. 1:7, 10). Је Анна токуналды кайдаҥ тапты?

5. Мӱргӱӱл Аннага канайып болушкан?

⁵ Анна Иеговага мӱргӱп, бойыныҥ сезимдерин ачыгынча куучындап берген. Мыныҥ кийнинде ол бойыныҥ айалгазын улу абыс Илийге куучындаган. Илий ого: «Санааҥ амыр болзын, Израильдиҥ Кудайы сениҥ сурагыҥа каруу берзин» — деп айткан. Анна нени этти? Агару Бичикте айдылганыла, ол «јаткан јерине јанып», «курсак-тамак јип, кунукпай барды» (1 Сам. 1:17, 18). Анна Кудайга мӱргӱп, токунай берген.

6. Бис мӱргӱӱл јанынаҥ Аннаныҥ теминеҥ ле Филиппыдагыларга 4:6, 7-неҥ неге ӱренип јадыс?

⁶ Јаантайын мӱргӱп турзаас, јӱрегисте амыр болор. Анна теҥеридеги Адазыла  узак куучындашкан (1 Сам. 1:12). Биске база бойыстыҥ санааркаштарысты ла јастыраларысты Иеговага тӱргедебей куучындап турар керек. Иегова бисти јаантайын јараш, эптӱ сӧстӧр айдып мӱргӱзин деп сакыбай јат. Кезикте бис санааркаштарысты Иеговага ыйлап јайнап куучындаар аргалу. Је бу да ӧйдӧ Иегова бисти арыбастаҥ угуп јат. Мӱргӱген тужыста јаҥыс ла кӱчтеристи куучындаар керек эмес, је Филиппыдагыларга 4:6, 7-де (кычырыгар) берилген јӧпти ајаруга алар керек. Павелдиҥ аҥылап айтканыла, мӱргӱӱлдеристе Иеговага быйанысты айдарга ундыбай турар керек. Быйан айдатан шылтактар бисте сӱрекей кӧп. Темдектезе, Кудайга јӱрӱм бергени учун, сӱреен јараш јайаандары учун, качан да ӧтпӧс сӱӱжи учун ла сӱреен јакшы ижемји бергени учун быйанду болодыс. Бис Аннаныҥ теминеҥ база неге ӱренип јадыс?

7. Анна ла оныҥ ӧбӧӧни улам сайын нени эдип туратан?

⁷ Анна кӱчтерине де ајарбай, Иеговага бажырарга ӧбӧӧниле кожо Силом калага улам сайын барып туратан (1 Сам. 1:1—5). Аннаны улу абыс Илий, Иегова оныҥ мӱргӱӱлин угар деп, агару байканныҥ јанында бӱдӱмјилеп, токунадып салган (1 Сам. 1:9, 17).

8. Јуунныҥ туштажулары биске канайып болужар аргалу?

⁸ Јуунныҥ туштажуларына јаантайын јӱрӱп турзаас, јӱрегисте амыр болор. Кажы ла туштажуныҥ бажында бис Иеговага мӱргӱп, агару тын сурап јадыс. Амыр — агару тынныҥ тӱжӱмине кирет (Гал. 5:22). Бис неге де санааркап турган болзоос, је христиан туштажуларга јӱрӱп турзаас, Иеговага ла ака-эјелерге бисти токунадатан ла кӱӱнисти кӧдӱретен арга берип јадыс. Иегова эҥ јаан токуналды мӱргӱӱл ле туштажулар ажыра берет (Евр. 10:24, 25). Аннаныҥ теминеҥ бис база неге ӱренер аргалу?

9. Аннаныҥ айалгазы солынган ба? Ого не болушкан?

⁹ Аннаныҥ айалгазы мӱргӱген ле кийнинеҥ солына бербеген. Ол агару байканныҥ јанында Илийле куучындашканыныҥ кийнинеҥ јанып келерде, оноҥ ло ары Феннанала кожо бир турада јаткан. Агару Бичикте Феннана Аннага јакшы баштанып баштаган деп айдылбай јат. Оныҥ учун Аннага оныҥ ачу сӧстӧрин оноҥ ло ары чыдажарга келишкен болор. Је эмди Анна оныҥ сӧстӧрин јӱрегине албай јат. Ол бойыныҥ санааркаштарын Иеговага берип ийерде, кунукпай барган. Анайып Иегова оныҥ јӱрегине амыр берип, токунадып салган. Је кийнинде Иегова оныҥ мӱргӱӱлине каруу берип, эне болотон арга берген (1 Сам. 1:19, 20; 2:21).

10. Аннаныҥ теми бисти база неге ӱредет?

¹⁰ Айалга солынбай да турза, јӱрегис амыр болор аргалу. Бис тыҥ мӱргӱп, јуундарды божотпой до турган болзоос, кезик кӱчтерис анайда ла артардаҥ айабас. Је Аннаныҥ темин кӧргӧнисле, Иегова бисти мындый да айалгада токунадар аргалу. Иегова бисти качан да ундыбас ла чындык артканыска качан бирде кайралын берер (Евр. 11:6).

11. Павелде кандый санааркаштар болгон?

¹¹ Павелде санааркаштар кӧп болгон. Темдектезе, ол сӱӱген ака-эјелердиҥ кӱчтерин сананып, тыҥ санааркаган (2 Кор. 2:4; 11:28). Анайда ок ол ӧштӱлерине канча катап соктыртып, тӱрмеге таштаткан. Павел «немеге јединбей» јӱрген ле ӧскӧ дӧ кӱчтерге табарткан (Флп. 4:12). Бого коштой талайла јӱзӱп тура, кереби ас ла салза, ӱч катап чӧҥӱп турарда, ого нени ӧдӧргӧ келишкенин билбей де јадыс (2 Кор. 11:23—27). Је Павелге санааркабаска не болушкан?

12. Павелге тыҥ санааркабаска не болушкан?

 ¹² Павел ака-эјелер учун санааркаган да болзо, олордыҥ кӱчтериниҥ аайына јаҥыскан чыгарга албаданбаган. Ол бойыныҥ кӱчи јетпезин оҥдоп, јуунды кичеерге болушсын деп, ӧскӧ акаларды сурап туратан. Темдектезе, ол Тимофей ле Тит деп бӱдӱмјилӱ христиандарга кӧп молјулар берген. Бу акалардыҥ болужы Павелге тыҥ санааркабаска болушкан (Флп. 2:19, 20; Тит. 1:1, 4, 5).

13. Аксагалдар Павелдеҥ неге ӱренер аргалу?

¹³ Болуш сурагар. Сӱӱштӱ аксагалдар, Павел ле чилеп, кӱчтерге табарткан ака-эјелер учун санааркап јадылар. Је кажы ла кижиге болужарга олордыҥ ийде-кӱчи јетпей јат. Оныҥ учун јобош аксагалдар јиит акаларга бойыныҥ молјуларын берип, олорды Кудайдыҥ албатызын кичеерге болужарына ӱредип јат (2 Тим. 2:2).

14. Павел недеҥ коркыбаган, бис оныҥ теминеҥ неге ӱренедис?

¹⁴ Токунал сураарга уйалбагар. Павел јобош кижи болгон, оныҥ учун најыларынаҥ болуш сурап туратан. Ол најыларынаҥ болуш алып турганы учун уйан кӧрӱнерге коркыбаган. Павел Филимонго бичиген самаразында мынайып айткан: «Сениҥ сӱӱжиҥ меге улу сӱӱнчи ле коот берген» (Флм. 7). Анайда ок Павел кӱч ӧйлӧрдӧ ого болушкан ӧскӧ дӧ ака-эјелердиҥ ады-јолын бичиген (Кол. 4:7—11). Оныҥ учун бис те јобош болуп, ака-эјелердеҥ болуш сурап турзаас, олор биске сӱӱнип болужар.

15. Павел кӱч ӧйлӧрдӧ токуналды кайдаҥ алган?

¹⁵ Кудайдыҥ Сӧзине иженигер. Павел Агару Бичик токунал берип турган деп билер болгон (Рим. 15:4). Агару Бичик ого кандый ла ченелтени ӧдӧргӧ ойгор берер аргалу болгон (2 Тим. 3:15, 16). Апостол Павел Римде экинчи катап тӱрмеледип турарда, удабас божоп каларын билген. Мындый айалгада ол нени этти? Ол Тимофейди, тӱрбектерди алганча, капшай келзин деп сураган (2 Тим. 4:6, 7, 9, 13). Павел бу тӱрбектерди нениҥ учун алдырткан? Нениҥ учун дезе Павел олорды таҥынаҥ ӱренерге кӱӱнзеген болор. Бу тӱрбектер Еврей Бичимелдиҥ бичиктери болгон болор. Бис те кандый ла кӱчтер тушта, Павел ле чилеп, Агару Бичикти јаантайын ӱренип турзаас, Иегова бисти бойыныҥ Сӧзи ажыра токунадып салар.

16. Давидтиҥ эткен кинчеги бойына кандый каршу јетирген?

¹⁶ Давид уур кинчек эдип саларда, уйады ого амыр бербей барган. Ол ӧскӧ кижиниҥ ӱйиле, Вирсавияла, кожо конып, оныҥ ӧбӧӧнин ӧлтӱртип салала, бойыныҥ кинчегин канча да кире ӧйдиҥ туркунына јажырып јӱрген (2 Сам. 12:9). Давид озо баштап бойыныҥ уйадын укпаган, мынаҥ улам оныҥ Кудайла колбулары ӱрелип калган. Бого коштой ол эткен кинчегинеҥ кыйналып, оорый да берген (Сар. 32:3, 4). Је Давидке бойыныҥ кинчегинеҥ улам јинбеске не болушкан? Биске де, уур кинчек этсеес, не болужар?

17. Давид бурузын акту јӱрегинеҥ алынган деп, Сарын 51:1—4-тӧҥ канайып кӧрӱнет?

¹⁷ Кудайга јаманыгарды таштазын деп мӱргӱгер. Учы-учында Давид Иеговага мӱргӱп, кинчегин куучындап береле, акту јӱрегинеҥ бойыныҥ бурузын алынган. (Сарын 51:1—4 кычырыгар *.) Мыныҥ кийнинде оныҥ санаазы јарый берген! (Сар. 32:1, 2, 4, 5). Слер де уур кинчек эткен болзоор, оны бир де јажырбай, Иеговага куучындап беригер. Мынаҥ улам слердиҥ уйадыгар бир эмеш токунай берер. Је Иегова слердиҥ кинчегерди таштазын деп турган болзогор, база бир алтам эдер керек.

18. Давид тӱзедӱни канайып алынган?

¹⁸ Тӱзедӱни алыныгар. Иегова судурчы Нафанды Давидтиҥ кинчегин кӧргӱзерге ийерде, Давид уур кинчегин бир де актанбай алынган. Ол јӱк ле Вирсавияныҥ ӧбӧӧнине удура кинчек эткен эмес, је озо ло баштап Иеговага удура кинчек эткенин тургуза ла алынып ийген. Давид тӱзедӱни алынарда, Иегова оныҥ јаманын таштап салган (2 Сам. 12:10—14). Айдарда, бис уур кинчек эткен болзоос, биске Иегованыҥ тургускан кӱдӱчилерине баштанар керек (Иак. 5:14, 15). Бис актанбас учурлу. Аксагалдардыҥ тӱзедӱзин канча ла кире тӱрген алынзаас, јӱрегиске амыр ла сӱӱнчи ончо ло кире тӱрген келер.

19. Биске нени этпеске бек сананып алар керек?

¹⁹ Јастыралараарды такып этпеске бек сананып алыгар. Давид каан Иегованыҥ болужы јогынаҥ јастыраларынаҥ айрылып  болбос деп оҥдоп туратан (Сар. 51:7, 10, 12). Иегова Давидтиҥ кинчегин таштап койордо, ол јастыра санааларыла тартыжарга бек сананып алган. Анайып, оныҥ јӱрегине амыр келген.

20. Иеговага бистиҥ кинчектеристи таштап турганы учун быйанысты кӧргӱзерге нени эдер керек?

²⁰ Иегова бистиҥ кинчегисти таштазын деп мӱргӱӱр керек, тӱзедӱни алынар керек, анайда ок јастыраларысты такып этпеске бастыра кӱчистеҥ албаданар керек. Анайып, Иеговага бистиҥ јастыраларысты таштап турганы учун быйанысты кӧргӱзерис. Бу алтамдар јӱрегиске амыр табарга болужар. Мындый амырды, уур кинчек эткен Джеймс ака алган. Ол куучындайт: «Аксагалдарга кинчегимди куучындап береримде, меге сӱрекей јеҥил ле амыр боло берген». «Иегова кунугып јӱрген улусты артыргыспай јат. Санааркап калган улусты аргадап јат» — деп билерге кандый јакшы! (Сар. 34:18).

21. Иегова бисти токунадып салзын деп, нени эдер керек?

²¹ Калју телекейдиҥ учы јууктаган сайын, санааркаштар там ла кӧптӧп јат. Оныҥ учун санааркаштар слерге амыр бербей ле барза, капшай ла Иегованаҥ болуш сурагар. Агару Бичикти тереҥ шиҥдегер. Аннаныҥ, Павелдиҥ ле Давидтиҥ теминеҥ ӱренигер. Анайда ок недеҥ улам санааркап турганыгарды билип аларга, теҥеридеги Адабыстаҥ болуш сурагар (Сар. 139:23). Бастыра кӱчтереерди, анчада ла аайына чыгып болбойтонын, Иеговага берип салыгар. Ол тушта Иеговага: «Кунукчылду санаалар амыр бербей турарда, сениҥ токунадууҥ мени јылыткан» — деп кожоҥдогон сарнаачыныҥ сезимдериндий сезимдер слерде де болор (Сар. 94:19).