1. (1) Wa pakayni i maanan a demakan ko saka cariraw ita hani? (2) O cariraway a falocoˈ mamifekad ko masamaanay a harateng ita hani?

NA MACARIRAWAY * kiso to maanan a demakan han? O sowal anca o midemakan no tao na midokaˈay tisowanan alatek, pakasomaday tisowanan. Anca pakayni sowal ato demak no niyah macariraway kiso, alatek calemcemay kiso to cowa ko sasododen ni Yihofa kiso. Mangalefay i, mapaekel no cariraw ko niyah, samanen cangoˈotay ko pakasoˈlinay falocoˈ, tada o awaay ko kapo a Krisciyang saan kiso a miharateng. Kawraan, soˈlinay a mahaen han?

2. O maanan a tinakoan i Fangcalay Cudad ngaˈay a mahapinang, ano macariraw cowa ko cangoˈotay ko pakasoˈlinay a falocoˈ?

² Nengnengen ita ko pina tinakoan i Fangcalay Cudad. Ci Hana o wina ni Samuil, tanektekay ko pakasoˈlinay falocoˈ ningra. Soˈlin mahaen, pakayni pisamsam no paro no lomaˈ na masomaday cingra. (1 Samuil 1:7) Pakasoˈlinay ko falocoˈ no tarokos ci Pawlo to Kawas, kawra na ‘pakayniay kacalemcem to kasakopang a cariraw’ cingra. (2 Korinto 11:28) Ci Tafiti iraay ko pakasoˈlinay falocoˈ, mansa mikiriwiˈ a maolah ci Yihofa cingraanan. (Dmak 13:22) Kawra, na mararaway ci Tafiti, micadaay to taˈangayay saroero. (ˈOlic 38:4) Mihinoman ni Yihofa koniya tatoloay madimadiay sikawdan, parihaday to falocoˈ nangra. Dotoc mamilengo, wa ngaˈay kita mikitira i nalifetan nangra minanam to maanan.

3. Samaan ko sowal no tao, o papaira to cariraw ato somad ita hani?

³ Ano milokes anca misamsam ko tao kitaanan, wa cariraw a masomad kita alatek. O mihaenay to demak a tamdaw ano o salawina anca ngaˈayay a widang, wa mangalef ko kasomad. Cacalemcem kita ecato ka malakangaˈay cingraanan alatek. (Taneng 12:18) Latekay, cowa pisaharaterateng ko tao a mihadak to midokaˈay a sowal. O cecay kaemangay fafahiyan salikaka tahalifaay to mahaenay a pakayraan, sanay cingra: “ˈAyaw no pina miheca, o cecay ngaˈayay a widang paolafay i wangcan takowanan, tada masomaday kako. Cowa ka fanaˈ kako hano mihaen cingra a midokaˈ takowanan.” Ano malifaay iso ko mahaenay a demak, wa ngaˈay mikitini ci Hanaan minanam to maanan hani?

4. Ci Hana na misiˈayaw to maanan a sapalifet hani?

⁴ Na misiˈayaway ci Hana to pasangaray remoen a sapalifet. Pina:ayto miheca caka ngaˈay cingra a ciwawa. (1 Samuil 1:2) Harateng nolitengan Israil tamdaw, eca ka ciwawa ko fafahiyan o cowa pilifok to sapalemed no Kawas sanay. Mihaenay hato mangodoay ci Hana. (Satapangan 30:1, 2) Mangalefay, o roma fafahi no faˈinay ni Hana ci Pinina, adihayay ko mihofocan a wawa. Sapilifokaw to olah no faˈinay, milalikafay ci Pinina cingraanan, pakasomad cingraanan. (1 Samuil 1:6) Salakat, pasangaray ci Hana misiˈayaw toniya sapalifet. ‘misemsemay ko falocoˈ’ ningra, tatangic sanay caka komaen. (1 Samuil 1:7, 10) Ikorto, samanay ci Hana milifok to sahinom hani?

5. Ikor no mitolon ci Hana samanayto ko harateng hani?

⁵ Mitolonay ci Hana ci Yihofaan, mihadak to nafalocoˈan a sowal. Ikor, pasowalan ningra ko pakayraan no niyah i taˈangayay saysi ci Ilian. Hananay ni Ili pasowal cingra: ‘Pinokayto kiso, nanay rihaday kiso, nanay palaˈosien no Kawas ko micangacangan iso.’ Telocto, ‘minokayayto ci Hana komaen, cowato ka somad ko pising.’ (1 Samuil 1:17, 18) O satolon padamaay ci Hanaan patikol a rihaday ko falocoˈ.

6. Pakayni i satolon (1) Mikitini ci Hanaan mananam ita ko maanan? (2) Mikitini i Filipi 4:6, 7 mananam ita ko maanan?

⁶ Padadotoc kita a mitolon, wa patikol a rihaday ko falocoˈ. Koˈedaway ko toki ni Hana mitolon to kakarayan Wama. (1 Samuil 1:12) Wa ngaˈay adihayen ita ko toki, misongilaˈ pasowal ci Yihofaan to cariraw, dangoc,  ato kaciˈangian no niyah. Ora lalakaw no satolon ita cowa pisaali to masieroday anca malecad o miˈolicay a makapah ko sowal. Latekay pakidemay ko kasomad ita alatek, tahatangitangic sanay a mitolon to Kawas. Soˈlin mahaen, cowa ko cacinaˈisangen ci Yihofa a mitengil. Cowa ko pifanaˈ aca ita to pasangaray i Kawas, haratengen ko limoˈot no Filipi 4:6, 7. (ˈOsien.) Itini satolon paihkalen ko piakoˈid sanay ko sinael. Adihayay ko lalangian ita a miakoˈid ci Yihofaan, tinakoen pafeliay Cingra to ˈorip ita, misangaˈay to kasapaan a maamaan, madimadiay a maolah kitaanan, pafeliayho to makapahay hatokel no mita.

7. Soˈlin adihayay ko misiˈayawan ni Hana a sapalifet, kamayan malacafay to faˈinay midemak to maanan hani?

⁷ Soˈlin adihayay ko misiˈayawan ni Hana a sapalifet, kamayan malacafay to faˈinay tayra i Silo a midoko to Kawas. (1 Samuil 1:1-5) Itini fangcalay pakopangan ci Hana i, pasowalay ko taˈangayay saysi ci Ili cingraanan, nanay pacaˈofen ni Yihofa ko satolon ningra, pakalalokay ci Hanaan konini.—1 Samuil 1:9, 17.

8. Mirienang to saˈopo iraay ko maanan a sadama kitaanan hani? Misamaanay?

⁸ Padadotoc kita mirienang to saˈopo, wa patikol a rihaday ko falocoˈ. Itini satapangan no saˈopo a satolon, micangacangay ko salikaka to Kawas pafeli to fangcalay saocor, o minaroˈan no fangcalay saocor mahawpay ko rihadayay. (Kalatiya 5:22) Ano cariraw ko harateng ita kamayan padadotoc a mirienang to saˈopo, wa malifok ko sapakalalok ni Yihofa ato salikaka, patikolto a rihaday ko falocoˈ. Mihaenay, o satolon ato saˈopo sahtoay o pakayraan ni Yihofa a mihinom kitaanan.—Hipray 10:24, 25.

9. (1) Ikor no minokay ci Hana padadotocay misiˈayaw to maanan a pasangaray hani? (2) O maanan ko padamaay cingraanan misiˈayaw to pasangaray hani?

⁹ Cowa ka tangsol saan malahedaw ko pasangaray ni Hana, minokayto cingra kamayan malacafay ci Pininaan a mikilomaˈ. Cowa ka somowal ko Fangcalay Cudad to mafalicay ko waywayan ni Pinina, mihaenay o papadadotoc ci Hana a mihadidi to pilikaf ni Pinina. Kawraan, patikolayto a rihaday ko falocoˈ ni Hana. Pakasoˈlinay ci Hana to mitengilan ni Yihofa ko satolon ningra, mitadiˈecay cingra ci Yihofaan, cowato ka paekel no cariraw. Ikor no cecay liyad, pacaˈofan ni Yihofa ko satolon ni Hana. Iraayto ko wawa ni Hana!—1 Samuil 1:19, 20; 2:21.

10. Mikitini nalifetan ni Hana mananam ita ko maanan hani?

¹⁰ Soˈlin caka lahedaw ko pasangaray, wa ngaˈayho patikol a rihaday ko falocoˈ ita. Latekay, soˈlin mikifalocoˈay kita a mitolon ato micerid mirienang to saˈopo, kawra cowa ka lahedaw ko pasangaray. Mikitini nalifetan ni Hana mahapinangay ita, awaay ko maanan a demakan ko papakaconged ci Yihofaan a mihinom kitaanan. Cowa ko fafalahen ni Yihofa kita, o papalifonen Ningra ko madimadiay a tamdaw.—Hipray 11:6.

11. O maanan a demak ko kacarirawan ni pawlo hani?

¹¹ Adihayay ko cariraw ni Pawlo. Tinakoen, maolahay cingra to salikaka, mansa patadoay a calemcem to pasangaray nangra. (2 Korinto 2:4; 11:28) Pakayni mitosilay demak, na mihadidiay cingra to pipekpek no misafelitay tamdaw, hanaca mipalitan. O mamiremoho cingra to roma pasangaray, tinakoen o ‘manikaway kaˈorip.’ (Filipi 4:12) Roma i, kina toloay tahapades ko tamina ningra, mihaenay calemcemay cingra mikalic to tamina. (2 Korinto 11:23-27) Samanay ci Pawlo miremo to masakenaay a cariraw hani?

12. Hano ngaˈay malowan ko cariraw ni Pawlo hani?

¹² Tahalifa ko salikaka to pasangaray i, soˈlin  patado ci Pawlo a calemcem cangraanan, kawra cowa piharateng to ngangaˈay ko niyah a misaysay to kihcod a pasangaray nangra. Mafanaˈay ci Pawlo to citolasay ko ˈicel no niyah, mansa mitahidang to roma tamdaw a padama midimokos to kasakopang. Tinakoen, patorodan ningra ci Timoti, ci Titus ato roma ngaˈayay pakasoˈlinen a tamdaw to hatayal. Oniya madimadiay a salikaka maedeng milowanay to cariraw ni Pawlo.—Filipi 2:19, 20; Titus 1:1, 4, 5.

13. Sasamaan ko malohemay malitengay a mitodong ci Pawloan hani?

¹³ Micangacang to sapadama no tao. ˈAlomanay sidaˈitay a malohemay malitengay malecaday ci Pawloan, patadoay a calemcem to pasangaray no salikaka. Kawraan citolasay ko ˈicel no tekedan a malohemay malitengay, ira ko misapoeneray a waywayan nangra, wa mitahidang to sadama no roma pakadangaray a salikaka, wa pahatatanamho to masafaay ko mihecaan a salikaka midimokos to siri no Kawas.—2 Timoti 2:2.

14. (1) Cowa ka ngodo ci Pawlo to maanan hani? (2) Mikitini ci Pawloan mananam ita ko maanan hani?

¹⁴ Mihai to misaaliay ko niyah to sahinom. Misapoeneray ko falocoˈ ni Pawlo, mansa micangacang to sadama no widang. Soˈlin o malonayay saan ko pinengneng no tamdaw, cowa ka ngodo cingra a mafanaˈ ko tao to misaaliay ko niyah to sahinom. Itini sapatikami ni Pawlo ci Filimongan sanay ko sowal: ‘Matengil ako iraay ko ciolahay falocoˈ iso tada mahemekay, mahinomay ko harateng.’ (Filimon 7) Masowalay ni Pawlo ko roma Krisciyang, ano tahasiˈayaw ci Pawlo to pasangaray i, adihayay ko sahinom cingraanan. (Kolosay 4:7-11) Misapoener kita a mihai to misaaliay ko niyah to sahinom, wa makahi ko salikaka a padama kitaanan.

15. Ano misiˈayaw to taˈangayay saroero i, samanay ci Pawlo a milifok to sahinom hani?

¹⁵ Mitadiˈec to kimad no Kawas. Mafanaˈay ci Pawlo o mamihinom ko kimad no Kawas cingraanan, pairaayho to taneng ningra, ngaˈay misiˈayaw to masakenaay a pasangaray. (Loma 15:4; 2 Timoti 3:15, 16) Tiya sakina tosa mapalit ci Pawlo i Loma i, mangataayto ko kapatayan a romiˈad no niyah sanay cingra a miharateng, maedeng taˈangayay ko saroero, orato mitahidangay ci Timotian kaliki a miˈaraw cingraanan, halo piˈorong to maloloday a cudad. (2 Timoti 4:6, 7, 9, 13) Ono Hipray a cudad konini alatek, makalimay ci Pawlo  sapisongilaˈaw a micekiw. Anini, ano o maananto ko masiˈayaway ita a pasangaray, ano todongen ko taˈarawan ni Pawlo, micerid a micekiw to Kimad no Kawas, wa pakaynien ni Yihofa i kimad Ningra a parihaday ko falocoˈ no mita.

16. Na pakayniay i maanan a demakan cariraw ci Tafiti hani?

¹⁶ Na mararaway ci Tafiti hato cariraway ko makapahay falocoˈ. Maˈaˈodangay cingra ci Patsipaan, mihalakaayho mipatay to faˈinay ni Patsipa, hanaca sapihimedaw to raraw no niyah. (2 Samuil 12:9) Salakat cowa pisikol ci Tafiti to mihadakan no makapahay falocoˈ a sarikec, telocto mapalakay ko kalalaˈed no niyah aci Yihofaan, marorayay ko falocoˈ. (ˈOlic 32:3, 4) Samaanay ci Tafiti a miremo to hatiniay a cariraw hani? Ano pakidem ko raraw ita, samaan ngaˈ milifok to rihadayay falocoˈ hani?

17. Mikitini i ˈOlic 51:1-4, samaan a mahapinang ita to soˈlinay pasasiyor ko falocoˈ ni Tafiti hani?

¹⁷ Mitolon micangacang to sasodod no Kawas. Ikor, mitolonay ci Tafiti ci Yihofaan, mihai to raraw no niyah, pakayni i raraw no niyah a pasasiyor ko harateng. (ˈOsien ko ˈOlic 51:1-4.) Orato patikolayto a rihaday cingra, miliyaw a talifak! (ˈOlic 32:1, 2, 4, 5) Ano pakidemay ko raraw iso, aka a mihimed, tolonen ci Yihofa, mihai to raraw Cingraanan, mihaen o rarihadayto ko falocoˈ iso. Kawra, sapisalofaw to kalawidang ci Yihofaan, wa midemakho kiso to roma a hademak.

18. Pakayni i sapirikec samanay ko waywayan ni Tafiti hani?

¹⁸ Micada to sapirikec. Tiya ocoren ni Yihofa ci Natan patasekal to raraw ni Tafiti i, cowa pikilim ci Tafiti to sadaˈading to niyah, cowa ka ciharateng to mamangay ko raraw no niyah. Tangsolay cingra a mihai to pakararaway ko niyah to faˈinay ni Patsipa, mangalef pakararaway ci Yihofaan. Micadaay ci Tafiti to sapirikec ni Yihofa, mansa sododen ni Yihofa cingra. (2 Samuil 12:10-14) Ano pakidem ko raraw ita, cangacangen ko sadama no minilnilan ni Yihofa a malohemay malitengay. (Yakop 5:14, 15) Aka pikilim to lalangian a miˈading to raraw no niyah. Kalikien ita micada ko sapirikec misaˈicel a misalof, mihaen ngaˈ patikol a rihaday ko falocoˈ.

19. Ano mararaw kita i, misetek to falocoˈ midemak to maanan hani?

 ¹⁹ Misetek to falocoˈ ecato piliyaw mararaw. Cipinangay ci Tafiti misaaliay ko niyah to sapadama ni Yihofa, ngaˈ ecato piliyaw mararaw to malecaday a demak. (ˈOlic 51:7, 10, 12) Ikor no milifok ci Tafiti to sasodod ni Yihofa i, misetekay to falocoˈ mifalah to mararaway a harateng, mansa patikol a rihaday ko falocoˈ ningra.

20. Ano miakoˈiday kita to pisodod ni Yihofa kitaanan, wa misamaan ko hademak hani?

²⁰ Mitolon kita to Kawas, micada to sapirikec Ningra, misaˈicelho a miliyas to sapiliyawaw a mararaw, mihaen o paihkalay to miakoˈiday to pisodod ni Yihofa kitaanan. Mihaen ko demak wa patikol a rihaday ko falocoˈ ita. O cecay faˈinayan salikaka ci Canmos, na pakidemay ko raraw ningra, sanay: “Tiya Mihai kako to raraw i malohemay malitengay i, o mipaekelay i ˈafala a karetengay ˈinorong malahedawayto. Palidlid sanay a patikol rihaday ko falocoˈ ako.” Sowal i ˈOlic 34:18: ‘Miingiday ci Yihofa to mararomay ko falocoˈ a tamdaw, milidongay to madokaˈay ko falocoˈ a tamdaw.’ Mafanaˈ tonini coko taˈangayay ko pihinom kitaanan han?

21. Sasamaan ko demak ita, wa padamaen ni Yihofa kita a rihaday ko falocoˈ hani?

²¹ Mangataayto ko kahererekan no salikoray romiˈad, o kacalemceman a demak wa matongal ko adihay alatek. Ano macariraw kiso i, kalikien a micangacang to sapadama ni Yihofa. Misarocod a micekiw to Fangcalay Cudad, minanam to taˈarawan ni Hana, ni Pawlo, aci Tafiti, cangacangenho ko kakarayan Wama padama tisowanan mikilim to lalangian no cariraw iso. (ˈOlic 139:23) Hepolen ko karetengay ˈinorong pafeli ci Yihofaan, mangalef ano cangoˈot ko ˈicel iso. Mihaen ko demak iso wa malecad to harateng no mitiliday to ˈOlic, sanay ko sowal ningra ci Yihofaan: ‘Ano mapaekel no cariraw kako i, mihinomay Kiso takowanan, parihaday to falocoˈ ako.’—ˈOlic 94:19 ato roma pihongyak.