1. Нәләр нараһатлығымыза сәбәб ола биләр вә биздә һансы фикир јарана биләр?

НӘ ВАХТСА нараһатлыг * кечирмисиниз? Бәлкә дә, киминсә сөзү вә ја һәрәкәти сизи инҹидиб. Јахуд да дедијиниз вә ја етдијиниз шејә ҝөрә пис олмусунуз. Мәсәлән, ола билсин, һансыса сәһвә јол вермисиниз вә нараһатсыныз ки, Јеһова сизи һеч вахт бағышламајаҹаг. Үстәлик, бу гәдәр нараһатлыг кечирдијинизә ҝөрә өзүнүзү гынајыб дүшүнә биләрсиниз ки, бу, иманынызын зәиф олдуғуну, пис инсан олдуғунузу ҝөстәрир. Бәс бу, доғруданмы беләдир?

2. Нараһатлыг кечирмәјин иманымызын зәифлијиндән хәбәр вермәдијинә даир Мүгәддәс Китабда һансы нүмунәләр вар?

² Ҝәлин Мүгәддәс Китабдан бир нечә нүмунәјә нәзәр салаг. Ишмуил пејғәмбәрин анасы Һәннә бөјүк иман саһиби иди. Буна бахмајараг, аиләсинин бир үзвү онунла пис рәфтар етдији үчүн Һәннә кәдәрә гәрг олмушду (1 Ишм. 1:7). Һәвари Булусун ҝүҹлү иманы вар иди, бунунла белә, о, «јығынҹагларын фикрини чәкир», ҝүҹлү нараһатлыг кечирирди (2 Кор. 11:28). Давуд падшаһын иманы о гәдәр ҝүҹлү иди ки, Јеһованын хүсуси рәғбәтини газанмышды (Һәв. 13:22). Лакин сәһвләрә дә јол вермишди вә бу сәһвләрә ҝөрә изтираб чәкирди (Зәб. 38:4). Јеһова бу бәндәләринин һәр үчүнә тәсәлли вермиш, онлары овутмушду. Ҝәлин ҝөрәк онларын нүмунәсиндән нә өјрәнә биләрик.

3. Кимсә сөзү илә бизи инҹидәндә һансы һиссләр кечирә биләрик?

³ Кимсә бизимлә кобуд данышанда, јахуд нәзакәтсизлик едәндә дахилимиздә нараһатлыг баш галдырыр. Үстәлик, һәмин адам јахын достумуз, јахуд гоһумумуздурса, нараһат олуруг ки, бирдән мүнасибәтләримиз корланар. Бәзән кимсә дүшүнмәдән елә сөзләр дејир ки, санки бизә гылынҹ зәрбәси вурур (Мәс. 12:18). Вә јахуд да кимсә бизи инҹитмәк үчүн гәсдән нә исә дејир. Бир ҝәнҹ баҹы бу ҹүр проблемлә үзләшмишди. О дејир: «Бир нечә ил бундан әввәл јахшы рәфигә һесаб етдијим бир нәфәр һаггымда сосиал шәбәкәләрдә јаланлар јајмаға башлады. Бу, чох хәтримә дәјмишди, пис олмушдум. Мәнә нә үчүн архадан зәрбә вурдуғуну анлаја билмирдим». Әҝәр сиз дә јахын достунуз, јахуд гоһумунуз тәрәфиндән зәрбә алмысынызса, Һәннәнин нүмунәси сизә көмәк едә биләр.

4. Һәннәнин һансы бөјүк чәтинликләри вар иди?

⁴ Һәннәнин бөјүк чәтинликләри вар иди. Узун илләр иди ки, ушағы олмурду (1 Ишм. 1:2). Исраилдә сонсуз гадына Аллаһын ләнәтинә дүчар олмуш инсан кими бахырдылар. Буна ҝөрә Һәннә өзүнү алчалдылмыш һисс едирди (Јар. 30:1, 2). Онун дәрдинә дәрд гатан башга бир шеј дә вар иди: оғул-ушаг саһиби олан Фәнинә адлы ҝүнүсү. Фәнинә Һәннәни гысганырды вә «ону әлә салыб дилхор едирди» (1 Ишм. 1:6). Әввәл-әввәл Һәннә бу чәтинликләрин өһдәсиндән ҝәлә билмирди. О гәдәр мәјус олурду ки, «ағлајыр вә чөрәк јемирди». Һәннә «чох кәдәрли иди» (1 Ишм. 1:7, 10). Бәс о, тәсәллини неҹә тапды?

5. Дуа Һәннәјә неҹә көмәк етди?

⁵ Һәннә дуа едиб үрәјини Јеһоваја бошалтды. Сонра вәзијјәти баш каһин Әлијә данышды. Әли ҹавабында она деди: «Саламат ҝет, гој Исраилин Аллаһы сәни мурадына чатдырсын». Бу, нә илә нәтиҹәләнди? Һәннә «ҝетди вә јемәк једи. Артыг онун чөһрәсиндә кәдәр олмады» (1 Ишм. 1:17, 18). Дуа Һәннәнин үрәјинә тәскинлик верди.

6. Һәннәдән вә Филиппилиләрә 4:6, 7 ајәләриндән дуа һагда нә өјрәнә биләрик?

⁶ Даима дуа етсәк, үрәјимиз раһатлыг тапар. Һәннә сәмави Атасына хејли дуа  етмишди (1 Ишм. 1:12). Биз дә нараһатлығымыз, горху вә зәифликләримиз барәдә Јеһова илә узун-узун даныша биләрик. Дуаларымызы бәдии шәкилдә ифадә етмәјә, јахуд сөзләримизи инҹи кими дүзмәјә ҝәрәк јохдур. Һәтта һәрдән елә олур ки, үрәјимизин дәрдини Јеһоваја данышаркән гәһәр бизи боғур, сөзләримиз боғазымызда дүјүнләниб галыр. Һәр бир һалда, Јеһова һеч вахт бизи динләмәкдән јорулмур. Проблемләримиз барәдә дуа етмәклә јанашы, Филиппилиләрә 4:6, 7 ајәләриндәки мәсләһәти дә унутмамалыјыг. (Ајәләри охујун.) Бу ајәләрдә һәвари Булус шүкран, миннәтдарлыг дуалары етмәјин ваҹиблијини хүсусилә вурғулајыр. Јеһоваја тәшәккүр етмәк үчүн о гәдәр сәбәбимиз вар ки! Мисал үчүн, бизә һәјат вердијинә, јаратдығы ҝөзәлликләрә, мәһәббәтинә, бәхш етдији үмидә ҝөрә миннәтдарлығымызы билдирә биләрик. Һәннәдән даһа нә өјрәнмәк олар?

7. Һәннә илә әри мүнтәзәм олараг нә едирди?

⁷ Һәннә чәтинликләринә бахмајараг, Јеһоваја ибадәт етмәк үчүн әри илә бирҝә мүнтәзәм олараг Шилоја ҝедирди (1 Ишм. 1:1—5). Елә Шилодакы мәбәддә баш каһин Әли Һәннәни руһландырыб, дуасына ҹаваб алаҹағына үмид етдијини сөјләмишди (1 Ишм. 1:9, 17).

8. Ибадәт ҝөрүшләримиз бизә неҹә көмәк едә биләр? Изаһ един.

⁸ Ибадәт ҝөрүшләриндә даима иштирак етсәк, үрәјимиз раһатлыг тапар. Ҝөрүшүн әввәлиндә дуа едән гардашлар адәтән Аллаһын мүгәддәс руһунун бизимлә олмасыны диләјир. Мүгәддәс руһун бәһрәсинин бир һиссәси сүлһдүр (Гал. 5:22). Нараһатлығымыза бахмајараг, ибадәт ҝөрүшләриндә иштирак едәндә Јеһованын вә диндашларымызын бизи руһландырмаг, үрәјимиздә вә фикирләримиздә јенидән сүлһүн, гәлб раһатлығынын олмасына көмәк етмәк имканы олур. Дуа вә ибадәт ҝөрүшләри Јеһованын гәлбимизи овутмаг үчүн истифадә етдији әсас үсуллардандыр (Ибр. 10:24, 25). Ҝәлин ҝөрәк Һәннәдән даһа нә өјрәнә биләрик.

9. Һәннәнин вәзијјәтиндә нә дәјишмәди, бәс нә дәјишди?

⁹ Һәннәнин нараһатлығына сәбәб олан проблем дәрһал һәлл олунмады. Мәбәддә ибадәт едиб гајыдандан сонра о, јенә дә Фәнинә илә ејни евдә јашамаг мәҹбуријјәтиндә иди. Үстәлик, Мүгәддәс Китабын һеч бир јериндә Фәнинәнин она олан мүнасибәтинин дәјишдији јазылмајыб. Демәк ки, Һәннә һәлә дә ҝүнүсүнүн тәнәли сөзләринә туш ҝәлирди. Лакин о, бир дә мәјуслуға гәрг олмады. Хатырлајырсынызса, мәсәләни Јеһованын өһдәсинә бурахандан сонра Һәннә даһа нараһат олмурду. О, Јеһоваја етибар етмишди вә Ондан тәсәлли вә гәлб-раһатлығы алмышды. Бир мүддәт сонра исә Јеһова Һәннәнин дуасына ҹаваб олараг, она өвлад бәхш етди! (1 Ишм. 1:19, 20; 2:21).

10. Һәннәнин һадисәсиндән нә өјрәнирик?

¹⁰ Проблемләримиз һәлл олунмаса белә, үрәјимиздәки раһатлығы горуја биләрик. Ола билсин, мүнтәзәм дуа етмәјимизә вә даима ибадәт ҝөрүшләриндә иштирак етмәјимизә бахмајараг, бәзи проблемләримиз һәлә дә һәлл олунмур. Лакин Һәннәнин һадисәсиндән ҝөрдүјүмүз кими, һеч нә Јеһованын бизә тәсәлли вериб овутмасына мане ола билмәз. Јеһова бизи һеч вахт унутмаз, О, ҝеҹ-тез бизим сәдагәтимизи мүкафатландыраҹаг (Ибр. 11:6).

11. Һәвари Булусун һансы чәтинликләри вар иди?

¹¹ Һәвари Булусун нараһатлығына сәбәб ола биләҹәк чох шеј вар иди. Мисал үчүн, о,  баҹы-гардашлары о гәдәр севирди ки, үзләшдикләри чәтинликләрә ҝөрә даима онларын фикрини чәкирди (2 Кор. 2:4; 11:28). Бундан әлавә, һәвари олараг она тапшырылмыш иши ҝөрәркән тәгибләрә мәруз галырды, дөјүлүр вә һәбс едилирди. О, һәјатда башга әзијјәтләр дә чәкмишди, мәсәлән, касыбчылығын нә олдуғуну билирди (Филип. 4:12). Онун азы үч дәфә ҝәми гәзасына дүшдүјүнү нәзәрә алсаг, һәр дәфә ҝәмијә минәндә нә гәдәр нараһатлыг кечирдијини тәсәввүр етмәк олар (2 Кор. 11:23—27). Бәс Булуса нә көмәк етмишди?

12. Нәләр Булусун нараһатлығыны азалтмышды?

¹² Һәвари Булус баҹы-гардашларын үзләшдији проблемләрә ҝөрә нараһатлыг кечирсә дә, онларын проблемләрини өзү һәлл етмәјә чалышмырды. Булус тәвазөкар инсан иди. О, јығынҹаг үзвләринә көмәк етмәји башгаларына тапшырырды. Мисал үчүн, о, Тимути вә Титус кими етибарлы гардашлара чохлу мәсулијјәтләр һәвалә етмишди. Шүбһәсиз ки, бу гардашларын ҝөрдүјү ишләр Булусун нараһатлығыны азалдырды (Филип. 2:19, 20; Тит. 1:1, 4, 5).

13. Ағсаггаллар һәвари Булусдан неҹә өрнәк ала биләр?

¹³ Башгаларындан көмәк истәјин. Һәвари Булус кими, бу ҝүн дә бир чох шәфгәтли ағсаггал чәтинликләрлә үзләшән диндашларына ҝөрә нараһат олур. Лакин бир ағсаггал бүтүн јығынҹаға көмәк едә билмәз. Тәвазөкарлыг сајәсиндә гардаш дашыдығы јүкү башга мәсул гардашларла бөлүшәҹәк вә ҝәнҹ гардашлара Аллаһын әманәт етдији сүрүнүн гејдинә галмағы өјрәдәҹәк (2 Тим. 2:2).

14. Һәвари Булус нәдән нараһат дејилди вә ондан нә өјрәнә биләрик?

¹⁴ Тәсәллијә еһтијаҹ дујдуғунузу гәбул един. Булус тәвазөкар инсан иди вә руһланмаға еһтијаҹ дујдуғуну баша дүшүрдү. О, достларындан алдығы тәсәллијә ҝөрә киминсә ону зәиф һесаб едәҹәјиндән нараһат олмурду. Филимона мәктубунда јазмышды: «Гардашым, сәнин мәһәббәтин барәдә ешитмәк мәнә бөјүк севинҹ вә тәсәлли ҝәтирди» (Флм. 7). Булус чәтин анларда она дајаг олан башга диндашларынын да адыны чәкмишди (Кол. 4:7—11). Биз дә тәвазөкарлыг ҝөстәриб, руһланмаға еһтијаҹ дујдуғумузу етираф етсәк,  баҹы-гардашларымыз бөјүк мәмнунијјәтлә бизә лазыми дәстәји ҝөстәрәҹәк.

15. Һәвари Булус һәјатынын ҝәрҝин дөнәминдә тәсәллини неҹә алырды?

¹⁵ Аллаһын Кәламына бел бағлајын. Һәвари Булус Аллаһын Кәламынын она тәсәлли верәҹәјини билирди (Ром. 15:4). Һәмчинин билирди ки, илаһи кәлмәләр она истәнилән сынаға синә ҝәрмәк үчүн һикмәт верәҹәк (2 Тим. 3:15, 16). Ромада икинҹи дәфә һәбсдә оларкән Булус өлүмүнүн јахынлашдығыны һисс едирди. Белә бир ҝәрҝин вәзијјәтдә о, нә етмишди? Булус Тимутидән тез бир заманда онун јанына ҝәлмәсини вә «тумарлары» да ҝәтирмәсини хаһиш етмишди (2 Тим. 4:6, 7, 9, 13). Нә үчүн? Еһтимал ки, бунлар Төвратын бәзи һиссәләри иди вә Булус онлары фәрди мүталиәси үчүн истәмишди. Булус кими, биз дә мүнтәзәм олараг Аллаһын Кәламыны арашдырсаг, Јеһова һәтта ән ағыр чәтинлијимиздә белә, Кәламы васитәсилә бизи овундураҹаг.

16. Давуд падшаһ ҝүнаһы уҹбатындан һансы һиссләр кечирирди?

¹⁶ Давуд падшаһ ҝүнаһы уҹбатындан виҹдан әзабы чәкирди. О, Бадсәба илә зина етмишди, онун әрини өлдүртмүшдү вә бир мүддәт әмәлләрини өрт-басдыр етмишди (2 Ишм. 12:9). Давуд әввәл-әввәл виҹданыны сусдурмаға чалышырды. Бу, нәинки онун Јеһова илә мүнасибәтләрини корлады, һәтта она физики вә емосионал зәрбә вурду (Зәб. 32:3, 4). Давуд нәјин сајәсиндә чәкдији изтираблардан гуртула билди? Бәс ҹидди ҝүнаһа јол вермишиксә, бизә нә көмәк едә биләр?

17. Зәбур 51:1—4 ајәләриндән Давудун дәрин пешманлыг чәкдији неҹә ҝөрүнүр?

¹⁷ Дуа едиб әфв диләјин. Нәһајәт, Давуд Јеһоваја үз тутуб дуа етди. Дәрин пешманлыг һисси илә ҝүнаһларыны етираф етди. (Зәбур 51:1—4 ајәләрини охујун.) Вә јенидән гәлб раһатлығы дујду! (Зәб. 32:1, 2, 4, 5). Әҝәр ҹидди ҝүнаһа јол вермисинизсә, ону ҝизләтмәјә чалышмајын. Әксинә, дуа едиб ҝүнаһынызы Јеһоваја етираф един. Онда ҝүнаһыныз уҹбатындан чәкдијиниз виҹдан әзабы азалаҹаг. Амма Јеһова илә достлуғунузу бәрпа етмәк истәјирсинизсә, дуа етмәк кифајәт дејил.

18. Давуд дүзәлишә неҹә јанашды?

¹⁸ Дүзәлиши гәбул един. Јеһова Натан пејғәмбәри Давудун ҝүнаһыны ифша етмәјә  ҝөндәрәндә Давуд нә өзүнә һагг газандырды, нә дә ҝүнаһынын ҹиддилијини азалтмаға чалышды. О, Бадсәбанын әринә гаршы, ән әсасы исә Јеһоваја гаршы ҝүнаһ ишләдијини дәрһал бојнуна алды. Давуд Јеһованын вердији тәрбијәни гәбул етди, Јеһова да ону бағышлады (2 Ишм. 12:10—14). Әҝәр ҹидди ҝүнаһа јол вермишиксә, Јеһованын бизә рәһбәрлик етмәјә тәјин етдији кәсләрлә данышмалыјыг (Јаг. 5:14, 15). Өзүмүзә бәраәт газандырмаға чалышмамалыјыг. Бизә верилән дүзәлиши нә гәдәр тез гәбул едиб она ујғун даврансаг, севинҹ вә гәлб раһатлығыны да бир о гәдәр тез дујаҹағыг.

19. Биз нәјә гәтијјәтли олмалыјыг?

¹⁹ Чалышын ејни сәһвләри тәкрарламајасыныз. Давуд падшаһ билирди ки, ејни сәһвләри тәкрарламамаг үчүн Јеһованын көмәјинә еһтијаҹы вар (Зәб. 51:7, 10, 12). Јеһова ону бағышладыгдан сонра, Давуд јанлыш фикир вә арзулардан узаг дурмаға гәтијјәтли иди. Нәтиҹәдә, о, јенидән гәлб раһатлығы тапды.

20. Јеһованын әфвини дәјәрләндирдијимизи неҹә ҝөстәрә биләрик?

²⁰ Јеһованын әфвини дәјәрләндирдијимизи неҹә ҝөстәрә биләрик? Дуа едиб Јеһовадан әфв диләмәклә, дүзәлиши гәбул етмәклә вә сәһвимизи тәкрарламамаг үчүн әлимиздән ҝәләни етмәклә. Беләҹә, гәлб раһатлығы тапаҹағыг. Ҹидди ҝүнаһа јол вермиш Ҹејмс адлы бир гардаш бунун һәгигәт олдуғуну тәсдигләјир. О дејир: «Ҝүнаһымы ағсаггаллара етираф едәндә, елә бил чијнимдән ағыр јүк ҝөтүрүлдү. Јенидән гәлб раһатлығы дујмаға башладым». Нә хошдур ки, «Јеһова гәлбисыныглара јахындыр, пәришан инсанлары азад едир»! (Зәб. 34:18).

21. Јеһованын бизә тәсәлли вериб овутмасы үчүн нә етмәлијик?

²¹ Бу шәр дүнјанын сонуна чох аз галдығы үчүн нараһатлығымыза сәбәб олан шејләр ҝет-ҝедә артаҹаг. Нәјәсә ҝөрә нараһатлыг кечирәндә јубанмадан Јеһовадан көмәк истәјин. Мүгәддәс Китабы јахшыҹа арашдырын. Һәннәдән, Булусдан вә Давуддан нүмунә ҝөтүрүн. Нараһатлығыныза сәбәб олан шејләри ајырд едә билмәјиниз үчүн Јеһоваја дуа един (Зәб. 139:23). Гајғы јүкүнүзү, хүсусилә дә һәлли сизин әлиниздә олмајан гајғыларынызы Она һәвалә един. Белә етсәниз, Јеһоваја һәмд сөјләјән мәзмурчунун һиссләрини сиз дә кечирәҹәксиниз. О демишди: «Фикирләр мәни чулғајанда мәнә тәсәлли вериб овутдун» (Зәб. 94:19).