1. Aha do na boi mambahen hita marsak, jala aha do pengaruhna tu hita?

HEA do hamu marsak? * Olo do ra gabe marsak hamu manang haccit rohamuna alani pakkataion dohot pambahenan ni halak. Manang marsak do hamu taringot aha na dihatahon manang na diulahon hamu. Umpamana, hea do ra hamu mangulahon dosa jala didok rohamu dang sesaon ni Jahowa dosamuna i. Jala ala marsak situtu hamu, gabe didok rohamu ma na gale haporseaonmuna tu Debata. Tutu do i?

2. Aha do piga-piga contoh di Bibel na patuduhon dang na gale haporseaon ni sasahalak tikki marsak ibana?

² Pikkirhon ma piga-piga contoh na adong di Bibel. Si Hanna omak ni panurirang Samuel, i ma sahalak borua na togu haporseaonna. Alai hea do marsak rohana ala adong sasahalak di keluargana na mambahen jut rohana. (1 Sam. 1:7) Togu do haporseaon ni apostel Paulus, alai jotjot do ibana “holsoan alani sude huria”. (2 Kor. 11:28) Togu do haporseaon ni Raja Daud jala massai holong do roha ni Jahowa tu ibana. (Ul. 13:22) Nang pe songon i, hea do ibana mangulahon dosa na balga na mambahen ibana marsak situtu. (Ps. 38:5) Alai, dipatogu jala diapuli Jahowa do nasida sude. Taulas ma aha na boi taparsiajari sian pengalaman ni nasida.

3. Songon dia hata ni sasahalak boi mambahen hita gabe marsak?

³ Tikki kasar sasahalak makkatai manang mambahen  na so denggan tu hita, boi do i mambahen marsak rohatta. Tarlumobi molo na mangulahon i ale-ale manang keluargatta. Alani i, olo do ra gabe mabiar rohatta molo sega parale-aleonta dohot ibana. Sipata, dang na sengaja ibana lao mambahen haccit rohatta. Alai sian carana mandok hata, boi do gabe mambahen haccit rohatta. (Poda 12:18) Manang, adong sasahalak na sengaja mandok hata na mambahen haccit rohatta. On ma na diadopi sahalak dongatta borua. Didok ibana, “Piga-piga taon naung salpu, sahalak donganku mandok na so tutu taringot au di internet. Haccit jala marsak do rohakku alani i. Dang hurippu bahenonna songon i tu au.” Molo hea dibahen dongan manang keluarga haccit rohamuna, boi ma hamu marsiajar sian pengalaman ni si Hanna.

4. Aha do hasusaan na diadopi si Hanna?

⁴ Godang do hasusaan na diadopi si Hanna. Saleleng martaon-taon, dang boi ibana marianakkon. (1 Sam. 1:2) Didok halak Israel najolo, molo dang boi sahalak borua marianakkon na so dipasu-pasu Debata do ibana. Gabe maila do si Hanna alani i. (1 Mus. 30:1, 2) Jala na mambahen lam susa ibana, adong imbangna i ma si Pininna jala boi ibana marianakkon. Mangiburu do si Pininna tu si Hanna. Jala “dibahen si Pininna imbangna i do hansit rohana jala dipalea ibana”. (1 Sam. 1:6, Bibel siganup ari) Mulana, massai lungun do roha ni si Hanna dibahen i. Alani jut ni rohana, “gabe tumatangis ibana jala ndang olo mangan”. On mambahen “marsak situtu rohana”. (1 Sam. 1:7, 10) Songon dia si Hanna boi dipatogu?

5. Songon dia do tangiang mangurupi si Hanna?

⁵ Martangiang ma si Hanna tu Jahowa jala dipaboa ma sude arsak ni rohana. Dung sae martangiang, dipatorang ibana ma situasina tu Sintua ni Malim, i ma si Eli. Didok ma tu si Hanna, ‘Antong molo na songon i do, sai horas ma ho, sai anggiat ma dilehon Debata ni Israel na pinangidom i sian Ibana.’ Aha ma hasilna? Dukkon i, “laho ma [si Hanna], mangan ma ibana jala ndang marsak be ibana.” (1 Sam. 1:17, 18, Bibel siganup ari) Tangiang, mangurupi si Hanna asa toktong dame.

6. Aha do na boi taparsiajari sian si Hanna dohot sian Pilippi 4:6, 7 taringot tangiang?

 ⁶ Boi do dame muse rohatta molo toktong martangiang tu Jahowa. Godang do tikki na dipakke si Hanna lao martangiang tu Debata. (1 Sam. 1:12) Hita pe, boi do leleng martangiang tu Jahowa paboahon holso ni rohatta, biar ni rohatta, dohot hagaleonta. Dang pola ikkon sempurna hata na tadok tikki martangiang. Sipata, olo do hita gabe tangis tikki paboahon arsak ni rohatta tu Jahowa. Nang pe songon i, dang hea loja Jahowa lao manangihon hita. Asing ni paboahon arsak ni rohatta, taingot ma poda na disurat di Pilippi 4:6, 7. (Jaha.) Takkas do dipaboa si Paulus, tikki martangiang porlu do hita mandok mauliate. Godang do alasan na boi mambahen hita mandok mauliate tu Jahowa. Umpamana hangoluanta, toppaanna, holongna, dohot pakkirimon na dilehon tu hita. Aha do muse na boi taparsiajari sian si Hanna?

7. Aha do na toktong diulahon si Hanna dohot suamina?

⁷ Nang pe godang hasusaan na diadopi si Hanna, toktong do lao ibana dohot suamina tu bagas joro di Silo. (1 Sam. 1:1-5) Tikki di tabernakel, didok Sintua ni Malim Eli ma, na pos do rohana alusan ni Jahowa do tangiang ni si Hanna i. Gabe dipatogu ma roha ni si Hanna alani i.​—1 Sam. 1:9, 17.

8. Songon dia parpunguan boi mangurupi hita? Patorang ma.

⁸ Boi do dame muse rohatta molo toktong ro tu parpunguan. Di tangiang pamukka di parpunguan, somalna tapangido do tondi parbadia lao manogu-nogu hita. Sada sian parbue ni tondi, i ma dame. (Gal. 5:22) Molo ro hita tu parpunguan nang pe marsak rohatta, na tapaloas do Jahowa dohot akka dongan lao patoguhon jala mangurupi hita asa dame muse roha dohot pikkiranta. Tangiang dohot parpunguan, i ma cara ni Jahowa lao patoguhon hita. (Heb. 10:24, 25) Parrohahon ma muse aha na boi taparsiajari sian pengalaman ni si Hanna.

9. Aha do na so muba di ngolu ni si Hanna, alai aha do na mangurupi ibana?

⁹ Dang pittor salpu hasusaan na diadopi si Hanna. Dung mulak ibana sian bagas joro, toktong do sajabu ibana dohot si Pininna. Jala dang adong didok di Bibel, muba pangalaho ni si Pininna. Alani i, ikkon toktong do sabar ibana mangadopi si Pininna. Alai dang jut be roha ni si Hanna. Ala pos do rohana na ditangihon Jahowa tangiangna i, gabe dang marsak be rohana. Dipaloas ibana do Jahowa lao patoguhon ibana. Dang leleng dukkon i, dialusi Jahowa do tangiang ni si Hanna. Gabe boi ma ibana marianakkon!​—1 Sam. 1:19, 20; 2:21.

10. Aha do na boi taparsiajari sian contoh ni si Hanna?

¹⁰ Boi do dame muse rohatta nang pe toktong mangadopi hasusaan. Nungnga ringgas hita martangiang jala toktong ro tu parpunguan. Alai ra dang salpu dope hasusaanta. Boi ma hita marsiajar sian contoh ni si Hanna. Dang adong na boi mangambati Jahowa lao patoguhon rohatta. Dang lupahonon ni Jahowa hita jala pasu-pasuonna do hita molo dang menyerah.​—Heb. 11:6.

11. Akka aha do na mambahen marsak roha ni si Paulus?

¹¹ Godang do na boi mambahen marsak roha ni si Paulus. Umpamana, ala holong  rohana tu akka dongan, marsak do rohana molo mamikkirhon sitaonon ni nasida. (2 Kor. 2:4; 11:28) Tikki marbarita, jotjot do si Paulus dipukkuli jala dipenjarahon, ala sogo roha ni akka halak tu ibana. Jala tikki “marhahurangan”, olo do gabe marsak rohana. (Plp. 4:12) Asing ni i, hea do tolu hali naeng lonong kapal na ditoppang si Paulus. Boi ma tabayakkon marsak do rohana tikki markapal. (2 Kor. 11:23-27) Aha do na mangurupi si Paulus tikki marsak rohana?

12. Aha do na mambahen moru arsak ni roha ni si Paulus?

¹² Marsak do roha ni si Paulus tikki akka dongan mangadopi hasusaan. Alai dang olo ibana pasaehon sude hasusaan ni nasida i sahalakna. Serep do roha ni si Paulus. Diboto ibana dang boi ulahononna i molo holan mangasahon gogona sandiri. Alani i, dipangido ibana akka dongan na asing asa dohot manarihon huria. Umpamana, dilehon ibana do godang tanggung jawab tu akka baoa na boi dihaporseai, songon si Timoteus dohot si Titus. Tikki akka dongan i mangulahon tugasna, on mambahen moru arsak ni roha ni si Paulus.​—Plp. 2:19, 20; Tit. 1:1, 4, 5.

13. Songon dia akka sintua boi maniru si Paulus?

¹³ Pangido ma na asing asa mangurupi hamu. Songon si Paulus, saonari pe godang do sintua na marsak rohana ala mamikkirhon hasusaan na diadopi akka dongan di huria. Alai dang boi sahalak sintua mangurupi sude na adong di huria. Molo serep rohana, tontu dipangido ibana do akka baoa na boi dihaporseai asa mangurupi ibana. Jala dilatik ibana do akka baoa na poso asa boi dohot manarihon biru-biru ni Debata.​—2 Tim. 2:2.

14. Aha do na so dihabiari si Paulus, jala aha do na boi taparsiajari sian i?

¹⁴ Akkui ma na porlu do hamu dipatogu. Serep do roha ni si Paulus. Diboto ibana, na porlu do ibana dipatogu akka dongan. Dang mabiar ibana molo akka halak marpikkir na gale do ibana umbahen porlu dipatogu akka dongan. Di suratna tu si Pilemon, didok si Paulus do, “Las situtu do rohangku jala tarapul do ahu mambege holong ni roham”. (Plm. 7) Dipaboa si Paulus do piga-piga dongan saulaonna na sai patoguhon ibana di tikki susa. (Kol. 4:7-11) Molo serep rohatta, jala taakkui na porlu do hita dipatogu, gabe las ma roha ni akka dongan lao mangurupi hita.

15. Aha do na diulahon si Paulus di situasi na massai susa?

 ¹⁵ Marhaposan ma tu Hata ni Debata. Diboto si Paulus do Hata ni Debata boi patoguhon rohana. (Rom 15:4) Jala boi do i mambahen ibana marbisuk tikki mangadopi ambat-ambat. (2 Tim. 3:15, 16) Tikki dipenjarahon si Paulus na paduahalihon di Rom, diboto si Paulus naeng dipamate nama ibana. Di tikki sisongon i, aha do na diulahon si Paulus? Dipangido ibana do si Timoteus asa hatop ro manjumpangi ibana jala mamboan “angka gulungan.” (2 Tim. 4:6, 7, 9, 13) Boasa? Alana akka gulungan i, marisi Akka Bukku Heber na dipakke si Paulus tikki pelajaran pribadi. Molo ringgas hita marsiajar songon si Paulus, boi do dipakke Jahowa akka ayat ni Bibel lao patoguhon hita, nang pe di situasi na massai susa.

16. Songon dia do pakkilalaan ni si Daud dung mangulahon dosa na balga?

¹⁶ Diulahon si Daud do dosa na balga. Mangalakkup do ibana dohot si Batseba, dibahen ibana ma cara asa mate suami ni borua i, jala ditabunihon ibana do hajahatonna i. (2 Sam. 12:9) Ala dang ditangihon si Daud panggora ni rohana, gabe sega ma parale-aleonna tu Jahowa. Sai marsak do rohana jala marsahit. (Ps. 32:3, 4) Aha do na mangurupi si Daud tikki marsak alani dosana sandiri, jala aha do na boi mangurupi hita tikki taulahon dosa na balga?

17. Songon na tajaha di Psalmen 51:2-6, sian dia taboto na manolsoli do si Daud?

¹⁷ Martangiang ma asa disalpuhon dosamuna. Ujungna, martangiang ma si Daud tu Jahowa. Sai manolsoli do ibana jala dipaboa do sude dosana tu Jahowa. (Jaha Psalmen 51:2-6.) On mangurupi ibana asa dame jala marlas ni roha muse. (Ps. 32:1, 2, 4, 5) Molo diulahon hamu dosa na balga, unang ma tabunihon i. Alai, martangiang ma tu Jahowa jala paboa ma sude hasalaan na diulahon hamu. Gabe dame do pakkilalaanmu, jala dang sai ganggu be panggora ni rohamu. Alai asa boi hamu marale-ale muse tu Jahowa, dang sae holan martangiang.

18. Aha do na diulahon si Daud tikki dipasingot?

¹⁸ Jakkon ma sipasingot. Disuru Jahowa do panurirang Natan lao paboahon dosa ni si Daud. Alai dang marsidalian  si Daud manang marpikkir dang pola balga dosana i. Pittor diakkui ibana do na mardosa ibana tu suami ni si Batseba. Alai na rumikkot, diakkui ibana do dosana tu Jahowa. Dijalo ibana ma sipasingot sian Jahowa, dung i disalpuhon ma dosana. (2 Sam. 12:10-14) Molo taulahon dosa na balga, pittor makkatai ma hita dohot akka sintua na dilantik Jahowa. (Jak. 5:14, 15) Jala unang ma marsidalian. Molo pittor tajakkon jala tajalo sipasingot i, pittor dame ma jala las rohatta muse.

19. Aha do na ikkon toktong taulahon?

¹⁹ Marsitutu ma asa unang mangulahon muse dosa na sarupa. Diboto Raja Daud do, ikkon diurupi Jahowa ibana asa unang be mangulahon dosa na sarupa. (Ps. 51:9, 12, 14) Dung disalpuhon Jahowa dosana, marsitutu do si Daud lao pasidikkon pikkiran na so denggan. Hasilna, gabe dame ma muse rohana.

20. Songon dia hita patuduhon hamauliateotta tu Jahowa ala olo manalpuhon dosatta?

²⁰ Mandok mauliate do hita ala olo Jahowa manalpuhon dosatta. Tapatudu ma i marhite martangiang paboahon sude hasalaanta, manjakkon sipasingot jala marsitutu asa unang be mangulahon dosa na sarupa. Molo taulahon i, gabe dame ma muse rohatta. I do na dihilala si James, sahalak dongatta baoa na hea mangulahon dosa na balga. Didok ibana, “Tikki hupaboa dosakku tu akka sintua, gabe moru ma arsak ni rohakku. Dame ma muse pikkiranku.” Mansai dipatogu do rohatta ala mamboto “jonok do Jahowa tu angka halak na marsak roha, dipalua do angka halak naung mandele”!​—Ps. 34:19, Bibel siganup ari.

21. Songon dia do hita paloashon Jahowa lao patoguhon hita?

²¹ Ala nungnga jonok ajal ni portibi on, lam godang ma na boi mambahen marsak rohatta. Molo marsak hamu, pittor hatop ma martangiang tu Jahowa asa diurupi. Ringgas ma marsiajar Bibel. Marsiajar ma sian contoh ni si Hanna, si Paulus, dohot si Daud. Pangido ma asa diurupi Jahowa hamu mamboto aha do na mambahen marsak rohamu. (Ps. 139:23) Paloas ma Ibana patoguhon hamu tikki mangadopi hasusaan, tarlumobi molo dihilala hamu dang tolap be hamu mangadopi i. Molo diulahon hamu i, boi ma hamu songon sahalak panurat psalmen na marende tu Jahowa. Didok ibana, “Di na sai ganggu jala susa ahu, dibahen Ho do las ni rohangku.”​—Ps. 94:19, Bibel siganup ari.