1. ?Wanem i save mekem yu yu wari? ?Mo wari i save mekem se yu gat wanem tingting?

?SAMTAEM yu bin wari from wan trabol we yu kasem? * Ating yu wari from we narafala i talem o mekem wan samting we i spolem yu, o yu wari from samting we yu nomo yu talem o mekem. Maet yu mekem wan bigfala mastik, nao yu wari se Jehova i no save fogivim yu. Antap long hemia, yu ting se yu no moa gat bilif mo yu nogud from we yu stap wari tumas. ?Be tingting ya i stret?

2. Taem yumi wari, ?hemia i min se yumi sot long bilif? Talem sam eksampol long Baebol.

² Traem tingbaot samfala long Baebol. Hana, mama blong profet Samuel, i gat strong bilif. Be hem i wari tumas taem woman ya Penina i stap jikim mo spolem hem. (1 Saml. 1:7) Aposol Pol i gat strong bilif, be hem i “wari tu from ol kongregesen.” (2 Kor. 11:28) King Deved i gat strong bilif, taswe Jehova i lavem hem tumas. (Wok 13:22) Nating se i olsem, Deved i mekem sam bigfala mastik we i wari from. (Sam 38:4) Be Jehova i mekem tingting blong trifala evriwan i kwaet. Bambae yumi tokbaot olsem wanem yumi save folem eksampol blong trifala ya.

3. ?Olsem wanem ol toktok blong narafala i save mekem yumi wari?

³ Taem narafala i sakem ol tok we i no kaen, maet yumi wari from. Hemia i tru moa taem wan fren o famle i sakem ol tok olsem. Maet yumi wari se bambae yumi no moa frengud wetem hem. !Maet wan man i no minim blong spolem yumi, be ol tok blong hem oli olsem naef we i stikim yumi! (Prov. 12:18) Samtaem man i minim nomo blong sakem ol tok we i mekem yumi harem nogud. Samting ya i hapen long wan yangfala sista. Hem i se: “Sam yia i pas, wan gudfala fren i raetem ol giaman toktok long saed blong mi long Intenet. Mi harem nogud mo mi wari. Mi no kasem save from wanem wan fren we mi trastem hem, i wantem spolem mi olsem.” Sipos wan gudfala fren o famle i spolem yu, i gud yu folem eksampol blong Hana.

4. ?Wanem bigfala problem we Hana i gat?

⁴ Hana i fesem hadtaem. Plante yia hem i stap olsem nomo, i no gat pikinini. (1 Saml. 1:2) Long tingting blong ol man Isrel, sipos woman i no save gat pikinini, hemia i min se God i panisim hem. Taswe Hana i sem bigwan. (Jen. 30:1, 2) Antap long hemia, hasban blong hem i gat wan narafala waef, Penina, we i gat pikinini. Penina “i stap jikim [Hana], we i mekem hem i harem nogud tumas.” (1 Saml. 1:6) Ol trabol ya i mekem Hana i wari tumas. “Oltaem hem i stap krae, mo i no wantem kakae,” from i “stap harem nogud.” (1 Saml. 1:7, 10) ?Hem i mekem wanem?

5. ?Olsem wanem prea i givhan long Hana?

⁵ Hana i prea long Jehova, mo i talemaot evri samting we i stap long tingting blong hem. Afta, hem i talemaot trabol blong hem long Hae Pris, Ilae. Nao Ilae i talem se: “Prea blong mi, we God ya blong yumi bambae i givim samting ya long yu we yu yu askem. Yu go. Tingting blong yu bambae i stap kwaet.” ?Wanem i hapen afta? Hana “i harem gud, i go afsaed, mo i kakae.” (1 Saml. 1:17, 18) Prea i givhan long Hana blong i gat pis bakegen long tingting blong hem.

6. ?Stori blong Hana mo Filipae 4:6, 7 i tijim yumi long wanem?

⁶ Yumi save gat pis long tingting sipos yumi prea oltaem. Hana i mekem wan longfala prea i go long Papa blong hem long heven. (1 Saml. 1:12) Yumi tu yumi save mekem ol longfala prea blong tokbaot ol wari blong  yumi, ol samting we yumi fraet from, mo ol mastik blong yumi. I no nid blong yusum ol spesel tok we i naes mo i stret gud. Samtaem maet yumi krae taem yumi stap tokbaot ol trabol blong yumi long Jehova. Nating se i olsem, Jehova i no save kam taed blong lesin. Mo tu, yumi mas tingbaot advaes we i stap long Filipae 4:6, 7. (Ridim.) Pol i talem stret se yumi mas talem tangkiu long Jehova. I gat plante samting blong talem tangkiu from, olsem laef we hem i givim, ol naesfala samting we hem i wokem, lav blong hem we i no save finis samtaem, mo ol nambawan promes blong fiuja. ?Stori blong Hana i tijim yumi long wanem narafala samting?

7. ?Oltaem Hana mo hasban blong hem i mekem wanem?

⁷ Nating se Hana i fesem hadtaem, be oltaem hem i folem hasban blong hem i go long Silo blong wosipim Jehova. (1 Saml. 1:1-5) Long haos blong God nao, Hae Pris Ilae i leftemap tingting blong Hana, taem hem i talem se Jehova bambae i ansarem prea blong hem.—1 Saml. 1:9, 17.

8. ?Ol miting oli save givhan long yumi olsem wanem? Eksplenem.

⁸ Yumi save gat pis long tingting sipos yumi go long ol miting. Long stat blong miting, brata we i prea i askem long God blong i givim tabu spirit long yumi. Wan fasin we i frut blong spirit ya, hemia pis. (Gal. 5:22) Nating se yumi gat ol wari, be sipos yumi go long ol miting, yumi givim janis long Jehova mo ol brata mo sista blong oli leftemap tingting blong yumi, mo givhan long yumi blong yumi gat pis long hat mo tingting. Prea mo ol miting, hemia tu impoten samting we Jehova i yusum blong mekem tingting i kwaet. (Hib. 10:24, 25) Naoia, bambae yumi tokbaot wan narafala samting we yumi lanem long stori blong Hana.

9. Long saed blong Hana, ?wanem i no jenis, be wanem i jenis?

⁹ Problem we i mekem Hana i wari, i no finis wantaem nomo. Afta we Hana i mekem wosip long haos blong God, hem i mas go stap long sem haos bakegen wetem Penina. Mo Baebol i no talem se fasin blong Penina i jenis. Taswe ating hem i gohed nomo blong jikim Hana mo mekem hem i harem nogud. Be tingting blong Hana i stap kwaet nomo. Taem hem i lego evri samting long han blong Jehova, hem i no moa wari. Hem i lukluk i go long Jehova blong i mekem hem i harem gud. !Samtaem biaen, Jehova i blesem Hana, i mekem se hem i gat ol prapa pikinini blong hem!—1 Saml. 1:19, 20; 2:21.

10. ?Stori blong Hana i tijim yumi long wanem?

¹⁰ Yumi save gat pis long tingting nating se problem i stap yet. Nating se yumi prea mo yumi go long ol miting, maet sam trabol i no finis. Be stori blong Hana i tijim yumi se, i no gat wan samting we i save blokem Jehova blong i putum pis long tingting blong yumi. Hem i no save fogetem yumi, mo bambae i blesem yumi from we yumi no lego hem.—Hib. 11:6.

11. ?Wanem ol samting we oli save mekem Pol i wari?

¹¹ I gat plante samting we oli save mekem Pol i wari. Wan samting: From we hem i lavem ol brata mo sista, hem i wari long olgeta taem oli kasem problem. (2 Kor. 2:4; 11:28) Long wok blong hem olsem wan aposol, hem i fesem ol man blong agens we oli kilim hem, mo oli sakem hem i go long kalabus. Mo tu, laef blong hem i had, from we hem i gat “smol samting nomo.” (Fil. 4:12) Mo ating hem i wari tumas taem hem i stap ron long wan sip, from we tri taem ol sip we hem i go long olgeta oli rek. (2 Kor. 11:23-27) ?Wanem i givhan  long Pol blong i no letem wari i winim hem?

12. ?Wanem i givhan long Pol blong i no wari tumas?

¹² Pol i wari long ol brata mo sista taem oli fesem ol trabol, be hem i no traem stretem ol trabol ya hem wan. Pol i luksave se hem i no naf blong mekem evri samting. Hem i askem long sam narafala blong oli givhan blong lukaot long kongregesen. Hem i givim wok long ol brata we hem i trastem olgeta, olsem Timoti mo Taetas. I klia se wok we oli mekem i givhan long Pol blong i no wari tumas.—Fil. 2:19, 20; Taet. 1:1, 4, 5.

13. ?Olsem wanem ol elda oli save folem fasin blong Pol?

¹³ Askem long narafala blong i givhan long yu. Tede, plante elda we oli lavem ol brata mo sista olsem Pol, oli wari long olgeta we oli kasem trabol. Be wan elda nomo i no naf blong givhan long evriwan long kongregesen. Sipos hem i luksave se hem i no naf, bambae hem i glad blong serem wok ya wetem sam narafala brata, mo blong trenem sam yangfala brata blong oli givhan long hem blong lukaot long ol sipsip blong God.—2 Tim. 2:2.

14. ?Pol i no wari long wanem, mo yumi lanem wanem?

¹⁴ Luksave se yu nidim narafala blong i leftemap tingting blong yu. Pol i gat tingting daon, taswe hem i luksave se hem i nidim ol fren blong leftemap tingting blong hem. Taem hem i tokbaot olgeta we oli mekem hem i harem gud, hem i no wari sipos samfala oli ting se hem i slak. Long leta we hem i raetem long Filimon, hem i talem se: “Brata. Fasin ya blong yu blong lavem ol man, hem i stap mekem mi mi harem gud tumas, mo i stap leftemap tingting blong mi.” (Flm. 7) Pol i talem nem blong sam narafala tu we oli wok wetem hem, mo oli leftemap tingting blong hem long taem blong trabol. (Kol. 4:7-11) Sipos yumi gat tingting daon mo yumi luksave se yumi nidim ol brata mo sista blong leftemap tingting blong yumi, bambae oli glad blong halpem yumi.

15. ?Pol i mekem wanem taem hem i kasem bigfala trabol?

¹⁵ Dipen long Tok blong God. Pol i save se ol tok blong Baebol bambae oli mekem hem i harem gud. (Rom 15:4) Mo tu, bambae oli givim waes we hem i nidim blong stanap strong taem i fesem trabol. (2 Tim. 3:15, 16) Long namba tu taem we Pol i kalabus long Rom, hem i harem save se klosap nao bambae hem i ded. Long taem blong bigfala trabol ya, ?Pol  i mekem wanem? Hem i singaot Timoti i kam kwik, mo i askem long hem blong i karem “ol skrol” i kam tu. (2 Tim. 4:6, 7, 9, 13) ?From wanem? From we maet ol skrol ya oli sam long ol Hibru haf blong Baebol, we Pol i save yusum long prapa stadi blong hem. Taem yumi folem eksampol blong Pol mo stadi oltaem long Tok blong God, Jehova i save yusum ol tok ya blong mekem tingting blong yumi i kwaet, nomata wanem trabol yumi kasem.

16. ?Wanem i mekem Deved i wari?

¹⁶ Deved i mekem wan nogud samting we tingting blong hem i trabol from. Hem i mekem rabis fasin wetem Batseba, i mekem plan blong kilim hasban blong Batseba i ded, mo i traem blong haedem ol sin ya. (2 Saml. 12:9) Taem tingting blong Deved i stikim hem, hem i no lesin. From samting ya, hem i no moa fren gud wetem Jehova, mo i harem nogud long tingting mo bodi blong hem. (Sam 32:3, 4) ?Wanem i givhan long Deved taem hem i wari tumas long bigfala sin we hem i mekem? ?Mo wanem i save givhan long yumi sipos yumi mekem wan bigfala mastik?

17. ?Olsem wanem Ol Sam 51:1-4 i soemaot se Deved i tanem tingting blong hem?

¹⁷ Prea long God blong i fogivim yu. Biaen Deved i talemaot evri samting long Jehova. Hem i tanem tingting mo i talemaot ol sin blong hem. (Ridim Ol Sam 51:1-4.) !Afta, tingting blong hem i kam kwaet! (Sam 32:1, 2, 4, 5) Sipos yu mekem wan bigfala sin, yu no mas traem blong haedem, be yu mas talemaot long Jehova. Afta, bambae tingting blong yu i kwaet, i no moa stikim yu. Be blong fren gud bakegen wetem Jehova, i no naf blong prea nomo.

18. ?Deved i mekem wanem taem Jehova i stretem hem?

¹⁸ Lesin long olgeta we oli stretem yu. Taem Jehova i sanem profet Natan i go luk Deved, Deved i no traem blong mekem eskius from sin blong hem, olsem we sin ya i nating nomo. Wantaem nomo, hem i talem se hem i mekem sin agensem hasban blong Batseba, mo tu, agensem Jehova. Deved i lesin taem Jehova i stretem hem, nao Jehova i fogivim hem. (2 Saml. 12:10-14) Sipos yumi mekem wan bigfala sin, yumi mas go luk olgeta we Jehova i putumap blong oli lukaot long yumi. (Jem. 5:14, 15) Mo yumi no mas mekem eskius from sin blong yumi. I moagud yumi lesin long olgeta  we oli stretem yumi, mo yumi kwik blong folem advaes we oli givim, nao bambae yumi gat pis long tingting mo yumi glad bakegen.

19. ?Yumi mas strong blong mekem wanem?

¹⁹ Gat strong tingting blong no mekem semfala mastik bakegen. King Deved i save se i nidim help blong Jehova blong i no mekem semfala sin bakegen. (Sam 51:7, 10, 12) Afta we Jehova i fogivim hem, hem i strong blong sakemaot ol nogud tingting we oli save lidim hem blong mekem sin. From samting ya, hem i holemtaet pis long tingting blong hem.

20. ?Olsem wanem blong talem tangkiu long Jehova from we hem i stap fogivim yumi?

²⁰ Taem yumi prea blong Jehova i fogivim yumi, lesin long olgeta we oli stretem yumi, mo wok had blong no mekem semfala mastik bakegen, i olsem we yumi stap talem tangkiu long Jehova from we hem i fogivim yumi, nao tingting blong yumi i save kam kwaet bakegen. Samting ya i hapen long Jemes, wan brata we i mekem bigfala sin. Hem i se: “Taem mi talemaot sin blong mi long ol elda, mi harem olsem se oli tekemaot wan hevi samting long solda blong mi. Tingting blong mi i kam kwaet bakegen.” !I gud tumas blong save se Jehova “i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon”!—Sam 34:18.

21. ?Olsem wanem yumi lukluk i go long Jehova blong i mekem tingting blong yumi i kwaet?

²¹ Taem yumi kam klosap moa long en blong ol las dei, ol trabol we oli mekem yumi wari oli save kam antap moa. Taem yu wari, yu mas kwik blong prea long Jehova blong askem help blong hem. Stadi gud long Baebol. Folem eksampol blong Hana, Pol, mo Deved. Askem long Papa blong yu long heven blong i givhan long yu, blong yu luksave from wanem yu stap wari. (Sam 139:23) Putum ol trabol blong yu long hem, speseli olgeta we oli no save finis kwik. Sipos yu mekem olsem, yu save singsing long Jehova olsem man blong raetem Sam, we i talem se: “Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.”—Sam 94:19.