1. Aha do na mambahen piga-piga halak holsohan, anjaha aha do pangaruhni ai?

ONGGA do ham holsohan? * Ra do holsohan ham halani dong na mambahen borit uhurmu marhitei pambahenan atap parsahap ni halak. Atap ra do holsohan ham halani pambahenanmu sandiri. Umpamani, ongga ham mambahen dousa na banggal janah haru uhurmu. Pangahapmu lang isasap Jahowa hasalahanmu ai. Ambahni ai, halani lalab haru uhurmu, ra do iahap ham domma galek haporsayaonmu. Ai tongon do ai?

2. Contoh aha ma na dong bani Bibel na patuduhkon sedo na galek haporsayaon ni sasada halak anggo holsohan ia?

² Pingkirhon ma piga-piga contoh na dong bani Bibel. Sahalak naboru na toguh marhaporsayaon do si Hanna. Hassi pe sonai, stres do ia sanggah dong kaluargani na jahat hu bani. (1 Sam. 1:7) Toguh do homa haporsayaon ni apostel Paulus. Tapi gabe stres do ia halani “mansarihon haganup kuria”. (2 Kor. 11:28) Porsaya do Raja Daud anggo ia iharosuhkon Jahowa. (Lah. 13:22) Tapi ongga do ia mambahen hasalahan na mambahen ia holsohan. (Ps. 38:5) Hassi pe sonai, iapoh anjaha ipatoguh Jahowa do sidea ganupan. Ulas hita ma aha na boi iparlajari hita humbani pangalaman ni sidea ai.

3. Sonaha parsahap ni halak boi mambahen hita holsohan?

³ Ra do holsohan hita sanggah adong halak na jahat  atap pe kasar parsahapni hubanta. Tarlobih ma anggo kaluarga atap hasomanta sandiri na mambahen sisonai. Ra do haru uhurta gabe maseda ma holi parhasomananta pakonsi. Sipata, ra do lang sangaja sidea mambahen borit uhurta. Tapi pangahapta parsahap ni sidea ai dos songon paniham ni podang. (Pod. 12:18) Atap, ra do adong na sonai parsahapni halani sangaja mambahen borit uhurta. Ongga do masa sisonai hubani sada hasomanta naboru. Ia mangkatahon, “Piga-piga tahun na salpu, dong hasomanku na manggosipi ahu i internet. Borit tumang uhurhu halani ai. Lang husangka sonai pambahenanni.” Porini ongga ibahen kaluarga atap hasoman borit uhurmu, boi do itiru nasiam si Hanna.

4. Aha do na mambahen borit uhur ni si Hanna?

⁴ Sadokah martahun-tahun lang boi si Hanna marniombah. (1 Sam. 1:2) Ijia, bahat halak Israel marpingkir lang ipasu-pasu Naibata sahalak naboru na lang marniombah. Halani ai, gabe maila ma si Hanna. (1 Mus. 30:1, 2) Dong homa na mambahen lambin sunsah pangahapni. Si Peninna, istri paduahon suamini, boi marniombah. Tapi simburu do si Peninna mangidahsi. Janah ‘seda do uhurni ibahen si Peninna marhitei hata salig-salig’. (1 Sam. 1:6) Ganupan ai mambahen sunsah si Hanna. Halani borit tumang uhurni, “sai tangis ma ia anjaha seng ra mangan”. (1 Sam. 1:7, 10) Aha ma na boi mangapohsi?

5. Aha ma hasilni dob martonggo si Hanna?

⁵ Martonggo ma si Hanna janah iuseihon ma ganup na hinolsohkon ni uhurni bani Jahowa. Dob ai, ipatorang ia ma situasini bani Malim Eli. Nini Malim ai ma, “Laho ma ham ibagas damei, sai na bereon ni Naibata ni Israel do bamu na pinindomu in.” Aha ma hasilni? “Laho ma [si Hanna] mannunuti dalanni anjaha mangan, seng be marposi bohini.” (1 Sam. 1:17, 18) Jadi dob martonggo si Hanna, gabe damei ma pangahapni.

6. Sanggah martonggo, aha na boi iparlajari hita humbani si Hanna ampa humbani Pilippi 4:6, 7?

⁶ Gabe damei use pangahapta anggo tongtong martonggo. Sai inunuti si Hanna do martonggo i lobei ni Jahowa. (1 Sam. 1:12) Hita pe, boi do inunuti hita martonggo bani Jahowa laho patugahkon holsoh ni uhurta, na mambahen  hita gobir, ampa hagalekonta. Sanggah martonggo, lang maningon iatur-atur hita hata na laho sihatahonon. Sipata ra do homa tangis hita sanggah patugahkon hasunsahanta bani Jahowa. Hassi pe sonai, lang ongga loja Jahowa laho manangar tonggonta. Leganni ai, dingat hita ma use podah na isurat bani Pilippi 4:6, 7. (Basa.) Si Paulus mangkatahon sanggah martonggo, maningon idingat hita do homa martarima kasih bani Jahowa. Umpamani, martarima kasih do hita halani hagoluhan, tompaon na jenges, holong-Ni, ampa pangarapan na ibere Jahowa hubanta. Aha use na boi iparlajari hita humbani si Hanna?

7. Aha do na tongtong ihorjahon si Hanna pakon suamini?

⁷ Hassi pe sonai sitaronon ni si Hanna, tongtong do ia laho pakon suamini hu Silo laho manombah Jahowa. (1 Sam. 1:1-5) Sanggah i Tabernakel, ihatahon malim Eli ma sai ibalosi Jahowa ma tonggo ni si Hanna. Gabe tarapoh ma si Hanna halani ai.​—1 Sam. 1:9, 17.

8. Aha do gunani partumpuan hubanta?

⁸ Gabe damei use pangahapta anggo tongtong roh hu partumpuan. Bani tonggo pambuha, somal do sanina na mambobahon tonggo mangindo ase ibere tonduy na pansing laho manogu-nogu hita. Buah ni tonduy do hadameion ai. (Gal. 5:22) Anggo roh hita hu partumpuan hassi pe dong holsoh ni uhurta, gabe boi ma Jahowa pakon sanina botou patoguhkon uhurta. Ujungni damei ma use pangahapta. Marhitei tonggo ampa partumpuan do Jahowa mangapoh hita. (Heb. 10:24, 25) Ulas hita ma use na boi iparlajari hita humbani si Hanna.

9. Sonaha situasi ni si Hanna dob mulak hun Silo, tapi aha do na boi mangurupisi?

⁹ Lang mintor salpu sitaronon ni si Hanna. Sanggah mulak hun rumah panumbahan i Silo, totap ope sarumah ia pakon si Peninna. Janah lang dong ipatugah bani Bibel mubah parlahou ni si Peninna. Jadi, ra do si Peninna totap manrisai si Hanna. Hassi pe sonai, lang be borit uhur ni si Hanna. Dob iondoskon ia holsoh ni uhurni bani Jahowa, gabe damei ma pangahapni. Ipaturut ia do Jahowa mangapoh janah patoguhkon uhurni. Dob piga-piga dokah hunjai, ibalosi Jahowa ma tonggoni. Gabe marniombah ma ia.​—1 Sam. 1:19, 20; 2:21.

10. Humbani pangalaman ni si Hanna, aha ma na boi iparlajari hita?

¹⁰ Dapot hita do use hadameion hassi pe lape salpu sitarononta. Ra, totap ope dong sitarononta hassi pe domma martonggo hita janah ringgas hu partumpuan. Tapi humbani pangalaman ni si Hanna, hita marlajar lang dong na boi manlanglangi Jahowa laho mangapoh janah patoguhkon hita. Sai idingat Jahowa do hita. Anggo totap hita martahan, bereon-Ni do upah domu bani panorangni.​—Heb. 11:6.

11. Aha do na mambahen si Paulus holsohan?

¹¹ Bahat do na mambahen si Paulus holsohan. Umpamani, halani mangkaholongi sanina botou, haru do uhurni sanggah mamingkirhon sitaronon ni sidea. (2 Kor. 2:4; 11:28) Sanggah marbarita, gati do ia ibogbogi halak na sogam mangidahsi, janah ipamasuk do ia hu penjara. Halani ‘manggoluh ibagas hahurangan’,  ra do gabe holsohan ia. (Pil. 4:12) Dob ai, sanggah markapal dong siotikanni tolu hali tardempar kapalni. Ra do homa gabe sunsah tumang pangahapni halani ai. (2 Kor. 11:23-27) Aha ma na mangurupi si Paulus sanggah holsohan ia?

12. Aha do na mangurupi si Paulus ase lang pala haru be uhurni?

¹² Gabe sunsah do uhur ni si Paulus sanggah dong sanina botou na marsitaronon. Tapi ibotoh ia do lang margogoh ia laho pasaloseihon ai sahalaksi. Itugaskon ia ma piga-piga sanina laho mangurupi sidea. Umpamani, ibere ia do bahat tanggung jawab hubani sanina-sanina na boi ihaporsayai, songon si Timoteus ampa si Titus. Halani ihorjahon sidea tugasni, gabe lang pala be haru uhur ni si Paulus.​—Pil. 2:19, 20; Tit. 1:1, 4, 5.

13. Sonaha sintua boi mangusihi si Paulus?

¹³ Pindo ma hasoman ase boi mangurupi ham. Songon si Paulus, sonari pe bahat do sintua na holsohan halani mamingkirhon sanina botou na marsitaronon. Tapi ra do lang tarurupi sahalak sintua ganup hasoman i kuria. Anggo toruh maruhur ia, tontu ipindo ma sanina na boi ihaporsayai laho mangurupisi. Janah ra do ia manlatih sanina-sanina na maposo ase boi dihut mansarihon hulanan ni Naibata.​—2 Tim. 2:2.

14. Aha do na lang igobirhon si Paulus, janah aha do na boi iparlajari hita?

¹⁴ Akui ma anggo ham porlu ipatoguh. Toruh maruhur do si Paulus. Halani ai, ipindo ia ma ojur-ojur humbani hasoman-hasomanni. Lang gobir ia anggo holi dong na mangkatahon ia galek halani dong hasoman-hasoman na patoguhkonsi. Sanggah manurat hubani si Pilemon, ihatahon ia do, “Holongmu ai, ham saninangku, ihorhon do bangku buei malas ni uhur ampa apoh-apoh.” (Pilem. 7) Isobut si Paulus do piga-piga goran ni hasomanni sahorja na mangapohsi sanggah holsohan. (Kol. 4:7-11) Anggo toruh maruhur hita mangakui na porlu do hita ipatoguh, tontu malas uhur ni sanina botou mangurupi hita.

15. Aha ma na ibahen si Paulus sanggah sunsah tumang pangahapni?

¹⁵ Marpangunsandeian ma bani Hata ni Naibata. Ibotoh si Paulus do anggo Hata ni Naibata boi gabe apoh-apoh hu bani. (Rom 15:4) Iparmaloi do homa  ia sanggah ibagas sitaronon. (2 Tim. 3:15, 16) Sanggah ipenjarahon na paduahalihon, ibotoh ia ma dohor mando hamateanni. Aha ma na ibahen si Paulus bani situasi sisonai? Ipindo ia ma ase podas si Timoteus roh janah mamboan “pustaha (perkamen)”. (2 Tim. 4:6, 7, 9, 13) Mase? Halani pustaha ai marisi gulungan humbani Kitab-Kitab Ibrani na igunahon si Paulus sanggah marlajar. Anggo ringgas hita marlajar Bibel songon si Paulus, boi do igunahon Jahowa ayat ni Bibel laho patoguhkon uhurta hassi pe sunsah tumang pangahapta.

16. Sonaha pangahap ni si Daud sanggah ia mangkorjahon dousa na banggal?

¹⁶ Jahat tumang do pambahenan ni si Daud. Marbangkis do ia pakon si Batseba, janah irencanahon ia ma ase matei suamini. Dob ai, marusaha do ia paponopkon dousani ai. (2 Sam. 12:9) Halani lang itangihon ia panggora ni uhurni, gabe maseda ma parhasomananni pakon Jahowa, holsohan, janah boritan. (Ps. 32:3, 4) Aha ma na mangurupi si Daud sanggah sunsah tumang pangahapni halani pambahenanni sandiri? Anjaha aha do na boi mangurupi hita sanggah mambahen hasalahan na banggal?

17. Humbani Psalmen 51:3-6, hunja ibotoh hita anggo si Daud manolsoli hasalahanni?

¹⁷ Martonggo ma mangindo hasasapan ni dousa. Ujungni martonggo ma si Daud bani Jahowa. Humbani gok ni uhurni, isolsoli anjaha iakui ia do dousani ai. (Basa Psalmen 51:3-6.) On ma na mangurupisi ase damei use janah marmalas ni uhur. (Ps. 32:1, 2, 4, 5) Anggo ihorjahon ham dousa na banggal, ulang ma paponop ai. Tapi martonggo ma bani Jahowa anjaha akui ma dousamu ai. Gabe damei ma holi pangahapmu, janah lang be targanggu panggora ni uhurmu. Tapi ase boi ham mardear use pakon Jahowa, lang sungkup pitah martonggo.

18. Aha ma na ibahen si Daud sanggah ipinsang?

¹⁸ Jalo ma pinsang-pinsang. Isuruh Jahowa ma nabi Natan laho patugahkon hasalahan ni si Daud. Sanggah ai, lang marsidalian si Daud. Janah lang adong ihatahon ia anggo hasalahanni ai otik  dassa. Mintor iakui ia do anggo ia lang pitah mardousa hubani suami ni si Batseba, tapi mardousa hubani Jahowa do homa. Ijalo si Daud ma pinsang-pinsang humbani Jahowa, janah isasap Jahowa ma dousani ai. (2 Sam. 12:10-14) Anggo dong ihorjahon hita dousa na banggal, podas ma patugah ai bani sintua i kuria. (Jak. 5:14, 15) Anjaha ulang ma hita marsidalian. Anggo podas idalankon hita pinsang-pinsang aha pe na ibere hubanta, mintor damei ma use pangahapta, anjaha marmalas ni uhur ma hita.

19. Aha do na maningon ibahen hita?

¹⁹ Marusaha ma ase ulang mangulaki hasalahanmu. Ibotoh Raja Daud porlu do ia iurupi Jahowa ase ulang mangulaki hasalahanni ai. (Ps. 51:9, 12, 14) Dob isasap Jahowa hasalahanni, marusaha do ia mangambukkon pingkiran na lepak. Hasilni, damei ma use pangahapni.

20. Sonaha hita patuduhkon tarima kasih halani isasap Jahowa hasalahanta?

²⁰ Tontu martarima kasih do hita bani Jahowa halani ra manasap hasalahanta. Ipatuduh hita ma ai marhitei tonggo, manjalo pinsang-pinsang, janah marusaha ase lang mangulaki hasalahanta ai. Anggo ibahen hita sonai, gabe damei ma use pangahapta. Sonai ma na iahapkon Sanina James na ongga mambahen dousa na banggal. Nini do, “Dob huakui hasalahanku hubani sintua, songon na hampung ma huahap porsanonku. Gabe damei ma use pangahapku.” Tontu gabe tarojur do hita halani mambotoh “dohor do Jahowa bani halak paruhur na marosak, anjaha ipaluah partonduy na maropuk”!​—Ps. 34:19.

21. Sonaha hita boi mandapot apoh-apoh humbani Jahowa?

²¹ Halani lambin dohor ajal ni dunia on, tontu lambin bahat do na mambahen hita holsohan. Sanggah holsohan ham, mintor podas ma martonggo hubani Jahowa. Ringgas ma marlajar Bibel. Marlajar ma humbani contoh na ibahen si Hanna, si Paulus, pakon si Daud. Pindo ma bani Jahowa ase iurupi ham mambotoh aha do na mambahen ham holsohan. (Ps. 139:23) Paturut ma Ia mangurupi ham, tarlobih sanggah iahap ham borat tumang porsanonmu. Anggo ibahen ham sonai, dos songon na idodingkon panurat ni Psalmen ma pangahapmu, “Sanggah lutu pingkiranku ibagas, jadi apoh-apoh-Mu do pasonang uhurhu.”​—Ps. 94:19.