1. Kai saja si banci erban kita kuatir janah gulut ukurta? Janah kai pengaruhna banta?

PERNAH nge kam kuatir janah gulut kel ukurndu? * Banci saja gulut ukurndu perban ranan kalak ntah ilakokenna kai si erban kitik ukurndu. Ntah kuatir kam perban ukurindu kai si nggo ikatakenndu ntah pe si ilakokenndu. Misalna, banci saja nggo ilakokenndu sada kesalahen. Kuatir kam perban iakapndu la iampuni Jahwe salahndu e. Si parahna ka, adi kuatir kel kam, banci iakapndu kam labo kalak si erkiniteken ntah pe labo kalak si mehuli. Tapi, payo kin bage?

2. Ise saja contoh bas Pustaka si mbuktiken maka adi kita kuatir, labo ertina kita kurang kiniteken?

² Perdiateken piga-piga contoh bas Pustaka. Nande Nabi Samuel eme Hanna, paguh kel kinitekenna. Tapi, gulut kel ukurna perban la mehuli perbahanen salah sada anggota keluargana man bana. (1 Sam. 1:7) Rasul Paulus pe paguh kinitekenna, tapi pernah gulut ukurna janah ‘kuatir ia nandangi kerina runggun.’ (2 Kor. 11:28) Raja Daud pe paguh kel kinitekenna janah keleng kel ate Jahwe ia. (Perb. 13:22) Aminna pe bage, pernah iban Daud kesalahen, janah gulut kel ukurna erkiteken si e. (Msm. 38:5) Iapuli Jahwe janah ipetenangNa ukur kalak e kerina. Mari sibahas kai si banci sipelajari arah kalak e.

3. Engkai maka ranan kalak banci erban kita tertekan?

³ Sanga kasar pengerana kalak man banta ntah pe la mehuli  perbahanenna, banci saja tertekan kita. Perasan e banci reh parahna adi si erban kitik ukurta eme temanta ntah pe keluarganta sendiri. Banci saja mbiar kita ceda kari hubungenta ras kalak e. Mon-mon, kalak si erban kitik ukurta banci saja la iukurina lebe sope ia ngerana, janah rananna e bagi tikamen pedang siakap! (Kua. 12:18) Entah, lit ka kalak si banci saja sengaja ngataken kai si erban kitik ukurta. Keadan si bage pernah iadapi sekalak turang seninanta si nguda denga. Nina, “Piga-piga tahun si lewat, igosipken teman kompakku aku bas media sosial. Gulut kel ukurku janah tertekan aku. Mamang ateku ngkai maka teman kompakku bage kel man bangku.” Adi pernah kitik ukurndu iban teman ntah pe keluargandu, banci kam erlajar arah Hanna.

4. Masalah kai saja si iadapi Hanna?

⁴ Mberat kel masalah Hanna. Ertahun-tahun dekahna la banci lit anakna. (1 Sam. 1:2) Paksa si e, nterem kalak Israel tek maka adi sekalak diberu la lit anakna, e ertina la ipasu-pasu Dibata ia. Emaka mela kel iakap Hanna. (Kej. 30:1, 2) Lit ka si erbanca reh beratna masalah Hanna. Labo ia ngenca ndehara perbulangenna. Lit ka sada nari, gelarna Penina janah lit piga-piga anakna. Cian ate Penina man Hanna janah “itokoh-tokohi Penina lalap Hanna gelah ceda ukurna.” (1 Sam. 1:6, Terjemahan Dunia Baru) Tangtangna, tertekan kel Hanna perban kerina masalah e. “Tangis ia janah la nggit man kai pe” perban “seh kal atena cedana.” (1 Sam. 1:7, 9, 10) Kai dungna si erban Hanna terapuli?

5. Kai hasilna perban Hanna ertoto?

⁵ Iceritaken Hanna isi pusuhna man Jahwe bas toto. Kenca dung ia ertoto, iceritakenna keadanna man Imam si Mbelin si gelarna Eli. Kenca si e, nina Eli man Hanna, ‘Mulihlah alu dame. Ibereken Dibata Israellah man bandu kai si ipindondu.’ Kai hasilna? “Lawes [Hanna], man ia, janah lanai atena ceda.” (1 Sam. 1:17, 18) Dame pusuh Hanna perban ertoto ia.

6. Kai si banci sipelajari kerna toto arah contoh Hanna bage pe arah ayat bas Pilipi 4:6, 7?

⁶ Banci dame pusuhta adi terus kita ertoto man Jahwe. Ndekah kel Hanna  ertoto man Bapakna si i surga. (1 Sam. 1:12) Kita pe banci gedang ertoto janah situriken man Jahwe kerna kai si erban kita kuatir, kai si erban kita mbiar, bage pe kerna kelemahenta. Sanga kita ertoto, labo perlu sipeseh alu kata-kata si seh kel jilena ntah pe iatur-atur. Mon-mon banci ka kita ngandung sanga situriken masalahta man Jahwe. Amin gia bage, la pernah Jahwe bosan megiken totonta. Selain sitotoken kai si erban kita kuatir, perlu ka silakoken kai si ikataken bas Pilipi 4:6, 7. (Baca.) Ikataken Paulus perlu ka kita ngata bujur sanga ertoto. Melala alasenta ngata bujur man Jahwe. Misalna, ngata bujur kita perban nggo berekenNa kegeluhen banta, perban ciptanNa si mejile, kekelengenNa si setia, bage pe kerna arapen si luar biasa si iberekenNa. Kai nari si banci sipelajari arah Hanna?

7. Kai si ilakoken Hanna ras perbulangenna alu ratur?

⁷ Aminna pe ngadapi erbage masalah, ratur Hanna ras perbulangenna lawes ku kemah ingan ersembah si lit i Silo guna nembah Jahwe. (1 Sam. 1:1-5) Bas kemah e me ikataken Imam si Mbelin Eli maka ngarap kel ia ijawap Jahwe toto Hanna. Pasti terpegegehi kel Hanna megi kata-kata e.​—1 Sam. 1:9, 17.

8. Kai gunana adi reh kita ku perpulungen? Jelasken.

⁸ Banci dame pusuhta adi ratur kita reh ku perpulungen. Perpulungen lalap ibuka alu toto. Biasana ipindo turang seninanta si ertoto gelah lit kesah si badia bas perpulungen e. Salah sada sipat si ihasilken kesah si badia eme kedamen. (Gal. 5:22) Adi reh kita ku perpulungen aminna pe gulut ukurta, Jahwe ras turang seninanta banci mpegegehi kita gelah dame pusuh ras perukurenta. Toto ras perpulungen eme dua cara si penting si igunaken Jahwe guna erban kita tenang. (Heb. 10:24, 25) Mari sibahas pelajaren kai ka si banci sidat arah Hanna.

9. Bas situasi Hanna, kai nge si la mis berubah? Tapi kai si nampati ia?

⁹ Masalah si erban Hanna tertekan la mis bene. Kenca dung Hanna ras keluargana nembah Dibata janah mulih ku rumah, arus denga Hanna tading ras Penina sada rumah. La lit ikataken Pustaka maka Penina nggo berubah. Emaka, banci saja arus terus iadapi Hanna kata-kata Penina si erban kitik ukurna. Tapi, banci terus dame pusuh Hanna. Engkai? Bagi si nggo sibahas ndai, lanai Hanna kuatir kenca iturikenna masalahna man Jahwe. Tek ia man Jahwe. Bas pudi wari, ijawap Jahwe toto Hanna, dungna lit piga-piga anakna.​—1 Sam. 1:19, 20; 2:21.

10. Kai si banci sipelajari arah Hanna?

¹⁰ Banci dame pusuhta amin gia lit denga masalahta. Amin gia nggo tutus kita ertoto janah ratur reh ku perpulungen, banci saja la mis bene masalahta. Tapi arah contoh Hanna, siteh maka banci iban Jahwe kita tenang, la soal uga pe keadanta. Labo pernah ilupaken Jahwe kita, janah adi terus kita setia pasti ipasu-pasu Jahwe kita i bas waktuna.​—Heb. 11:6.

11. Kai saja si erban Paulus kuatir ras gulut ukurna?

¹¹ Melala si erban Paulus kuatir ras gulut ukurna. Misalna, perban keleng atena turang seninana, latih kel ukurna sanga  itehna lit masalah kalak e. (2 Kor. 2:4; 11:28) Selain si e, sanga Paulus ngelayani jadi rasul, nterem kalak si nentang ia. Ipekpeki ia janah imasukken ka ku penjara. Arus ka iadapina masalah si debanna si erbanca gulut kel ukurna. Misalna, pernah ia “nggeluh i bas kekurangen.” (Pil. 4:12) Janah pernah ka karam kapal si inangkihi Paulus silang-langna telu kali. Emaka kuatir kel Paulus adi lawes kenca ia naik kapal. (2 Kor. 11:23-27) Kai si nampati Paulus sanga ia kuatir ras gulut ukurna?

12. Engkai maka Paulus lanai kuatirsa?

¹² Kuatir Paulus sanga lit masalah turang seninana. Tapi, labo iusahakenna ndungi masalah e sisada. Sadar ia maka terbatas si banci ilakokenna. Iaturkenna gelah lit kalak si deban si nampati turang senina e. Misalna, iberena melala tugas man dilaki-dilaki si terteki bagi Timotius ras Titus. Pasti lanai Paulus kuatirsa perban isampati kalak e.​—Pil. 2:19, 20; Tit. 1:1, 4, 5.

13. Kai si banci ilakoken pertua guna ngusih Paulus?

¹³ Pindolah penampat kalak si deban. Gundari, nterem pertua si perkeleng bagi Paulus. Kuatir kalak e adi lit turang senina si sangana ngadapi masalah. Tapi sekalak pertua saja labo ngasup nampati kerina turang senina bas runggun. Adi sadar ia maka terbatas si banci ilakokenna, pasti ipindona penampat senina si deban si lit tanggung jawapna bas runggun. Iberekenna ka pelatihen man senina si nguda denga gelah kalak e pe pagi banci nampati ia ngurus biri-biri Dibata.​—2 Tim. 2:2.

14. Paulus la kuatir kerna kai? Janah kai pelajarenna banta?

¹⁴ Akuilah maka perlu kam ipegegehi kalak si deban. Paulus e meteruk ukur, emaka itehna perlu ia ipegegehi teman-temanna. Iakuina maka nggo ipegegehi kalak si deban ia, janah la ia mbiar ianggap lemah perban si e. Sanga itulis Paulus surat man Pilemon, nina, “Mbelin kel keriahen ukur si kugejapken janah terapul kel aku paksa kubegi kerna kekelengenndu.” (Plm. 7) Itulis Paulus ka gelar piga-piga turang seninana si rusur mpegegehi ia sanga lit masalahna. (Kol. 4:7-11) Adi meteruk ukur kita janah siakui maka  perlu kita ipegegehi kalak si deban, pasti meriah ukur turang seninanta nampati kita.

15. Kai si ilakoken Paulus sanga iadapina situasi si sulit?

¹⁵ Daramilah ayat-ayat Pustaka si banci ngapuli kita. Iteh Paulus maka Pustaka banci mere pengapul ras kepentaren man bana guna ngadapi masalah kai pe. (Rom. 15:4; 2 Tim. 3:15, 16) Sanga Paulus ipenjaraken pedua kaliken i Roma, iakapna lanai bo ndekah ia mate. Kai nge si ilakoken Paulus bas situasi si sulit e? Isuruhna gelah mis reh Timotius ndahi ia janah maba “gulungen-gulungen kitap.” (2 Tim. 4:6, 7, 9, 13) Engkai? Perban banci saja gulungen-gulungen e bagin arah Kitap-Kitap Heber, janah ibaca Paulus atena ras iukurina alu mbages. Adi siusih Paulus alu ratur mpelajari Pustaka, banci ka igunaken Jahwe Pustaka e guna erban kita tenang la soal uga pe keadanta.

16. Uga nge perasan Daud sanga ilakokenna dosa si mbelin?

¹⁶ Pernah ilakoken Daud perbahanen si seh kel jahatna. Erlua-lua ia ras Batseba, kenca si e ibanna ka rencana munuh perbulangenna. Piga-piga waktu dekahna, itutup-tutupi Daud dosana. (2 Sam. 12:9) Tangtangna, terganggu nge pusuhna, tapi ipediatna. Akibatna, nggo ceda hubungenna ras Jahwe. Gulut kel ukurna janah sakit ka ia. (Msm. 32:3, 4) Kai si dungna nampati Daud gelah lanai gulut ukurna? Janah kai si banci nampati kita adi silakoken dosa si mbelin?

17. Menurut Masmur 51:3-6, kai buktina maka Daud tuhu-tuhu menyesal?

¹⁷ Ertotolah gelah iampuni Jahwe. Dungna ertoto Daud man Jahwe. Menyesal kel Daud, janah iakuina dosana man Jahwe. (Baca Masmur 51:3-6.) Hasilna, tenang mulihi pusuh Daud janah meriah ukurna. (Msm. 32:1, 2, 4, 5) Adi ilakokenndu dosa si mbelin, ula tutup-tutupindu. Ertotolah kam man Jahwe, janah akuilah dosandu. Kenca si e, banci dame pusuhndu, janah lanai salah iakapndu bandu. Tapi adi rembak atendu mulihi ras Jahwe, lit ka si perlu ilakokenndu.

18. Uga tanggapen Daud sanga ia idisiplin?

¹⁸ Alokenlah disiplin. Sanga isuruh Jahwe Nabi Natan ndahi Daud guna ncakapken  kerna dosana, la iusahaken Daud mbela dirina ntah pe la ikatakenna maka labo mbelin kel dosana e. Mis iakuina maka nggo erdosa ia man perbulangen Batseba janah terutama man Jahwe. Ialoken Daud disiplin arah Jahwe, janah iampuni Jahwe ia. (2 Sam. 12:10-14) Adi silakoken dosa si mbelin, sikatakenlah kerna si e man turang seninanta si nggo ilantik Jahwe jadi pertua bas runggun. (Jak. 5:14, 15) Ula ka sibela dirita. Adi mis sialoken ras sidalanken disiplin si ibereken man banta, pasti banci dame mulihi pusuhta janah meriah ukurta.

19. Kai si arus siusahaken?

¹⁹ Usahakenlah gelah ula nai silakoken kesalahenta si mbarenda. Iteh Raja Daud perlu ia penampat Jahwe gelah lanai ilakokenna kesalahenna. (Msm. 51:9, 12, 14) Kenca Daud iampuni Jahwe, iusahakenna kel gelah lanai lit sura-surana si salah. Hasilna, banci dame kel pusuh Daud.

20. Kai buktina ngata bujur kita man Jahwe perban nggo iampuniNa?

²⁰ Adi ertoto kita gelah iampuni, nggit kita ngaloken disiplin, janah erusaha kel kita lanai ngelakoken kesalahenta si mbarenda, sibuktiken maka ngata bujur kel kita perban nggo iampuni Jahwe kita. Adi bage siban, banci dame mulihi pusuhta. Bage me si igejapken sekalak turang seninanta si gelarna James, si pernah ngelakoken dosa si mbelin. Nina, “Kenca kuakuken dosaku man pertua, bagi iangkat kuakap baban si mberat das baraku nari. Nggo dame kel pusuhku.” Terpegegehi kel kita perban siteh maka “[Jahwe] nemani kalak si lanai piher ukurna [janah] isampatiNa kalak si enggo bene pengarapenna.”​—Msm. 34:19.

21. Kai buktina nggit kita iapuli Jahwe?

²¹ Perban nggo seh kel deherna kedungen doni enda, banci saja reh gulutna ukurta janah kuatir kel kita. Adi kam kuatir, mislah ertoto mindo penampat Jahwe. Teruslah pelajari Pustaka. Erlajarlah arah contoh Hanna, Paulus, ras Daud. Pindolah penampat Jahwe gelah itehndu kai si erbanca maka gulut kel ukurndu. (Msm. 139:23) Turikenlah man Jahwe kai si erban kam kuatir, khususna sanga la melala si banci ilakokenndu guna ngubah keadanndu. Adi bage banndu, pasti seri perasanndu ras pemasmur si rende man Jahwe, nina, “Kune la tetap ukurku dingen aru ateku, Kam si ngapuli dingen si periahken ateku.”​—Msm. 94:19.