1. Ka katei gayaraabei ladügün lun nidiheri wamá ani ka lánibei le wawagu?

ANIHEIN san dan sandigua wamá woungua lau saragu idiheri? * Másiñati ladüga lan lariñagun o ladügün somu gürigia somu katei le gáriti woun. Másiñati giñe le lan wariñagubei o le lan wadügübei ligía lan adiheridagüdübadiwa. Háfuga afigouha wamá ani nidiherigüda lumutiwa úabei lan feruduna lani Heowá wafigoun. Gama lumoun, másiñati sandigua wamá woungua ítara ladüga wasaminarun féridi wamá lan wafiñen, ladüga gürigia wamá wuribatiña. Inarüni san katei le?

2. Ka sügǘ tídangiñeti Bíbülia arufudubalin mama lan lilouguan afiñeni lasandirun aban gürigia idiheri?

² Ariha wamá fiu sügǘ tídangiñeti Bíbülia. Wéiriti meha tafiñen Ana, dan lárigiñe tuguya meha lúguchuboun profeta Samueli. Íbini ítara, sandiguatu tungua lau saragu idiheri ladüga luriban tóuserunun aban hádangiñe tílana tuban (1 Sam. 1:7). Derebuguti meha giñe lafiñen apostolu Pábulu, lau sun lira, ariñagati “sagü weyu nasandiruni lihürü nidiheri” hawagu lílana sun damuriguaü (2 Ko. 11:28). Derebuguti meha giñe lafiñen urúei Dawidi darí lun lasandirun Heowá aban lanarime ínsiñeni espechaliti luagu (Adü. 13:22). Lau sun lira, afigouhati ani adügati katei le lun ladiheridun saragu (Sal. 38:4). Ruti Heowá darangilaü luma dǘgüdaguaü houn sun hagía. Akutiha waméi le wafurendeirubei lídangiñe hásügürün.

3. Ka uagu gayara lubéi aban lan katei lánina idiheri le hariñagubei amu gürigia?

³ Aban katei le gayaraabei ladügün lun nidiheri wamá layanuhan o lóuseruniwa somu gürigia wuriba, dántima le aban lan umadaü o iduhei. Háfuga wadiheridun lagumuchagua lan wamadagua luma gürigia ligía. Anihein dan ha adügübaña dañu woun ayanuhatiña masaminarunga, ani “abuleseihatiña láurügü hererun” (Ari. 12:18). Ani anihein dan ariñagatiña gürigia dimurei wuribati lun hadügün dañu woun. Ligía asuseredubei tun aban íbiri nibureintu. Ariñagatu: “Fiu irumu guenlé, aba taburuchaguagüdün aban gürigia to yebe uáguboun nasaminara numada lan dimurei wuribati nuagu lidan páhina le ñein lubéi hadügǘwa umadagu lidan Internet. Sandiguatina nungua wuriba ani lau idiheri. Úati meha gunfuranda nani, ítara liña kamá hamuga miraguarügü tumutina nanagangiñe”. Anhein adüga aban wamada o waduhe wuribani woun, gayaraati wafurendeirun saragu lídangiñe tikesin Ana.

4. Ka turobuli wéiriti úmabei tagagibudagua Ana?

⁴ Mosu meha tawandun Ana lanarime burí turobuli. Sügütu saragu irumu, siñati meha garahüñü tan (1 Sam. 1:2). Hadan meha ísüraelina dan le marahüñü tan aban würi ítara liña meha kamá hamuga íñarawaguni. Ligíati tasandiragunbei Ana tungua wuriba (Agu. 30:1, 2). Lanwoun lira, gámariti meha tani weiriei amu würi, Peniná meha tíribei ani garahüñütu meha lau. Ariha tumutu meha Peniná Ana kei aban ágani ani ligía méhati “tañawarihanbeiha Peniná to tubuyamun tun” adüga tuguya bula tau (1 Sam. 1:6). Furumiñe, adügati meha katei le dañu tun Ana saragu. Wuribati meha tasandiragun tungua darí lun terederun “ayahuaheina lau igarigu” (1 Sam. 1:7, 10). Ida liña tibihin Ana dǘgüdaguaü?

5. Ida liña líderagunu furíei Ana?

⁵ Aba tadararunu Ana tanigi lun Heowá. Lárigiñe tafurieidun, aba tafuranguagüdüni lun Elí, fádiri le íñutimati, le asuseredubei tun. Aba lariñagun tun: “Beiba darangilañu, rulei Lubungiute Ísüraeli le bamuriahabei luma bun”. Ka asuseredubei lárigiñe? “Aba tagiribudun [Ana] le buga ñéingiñe lubéi tiabin, aba tidin eiga, aba mírudundigiaaru lan” (1 Sam. 1:17, 18). Íderagua lumutu furíei lun darangilu tan.

6. Ka gayaraabei wafurendeirun lídangiñe tani Ana hénpulu luagu furíei luma lídangiñe dimurei le lídanbei Filipuna 4:6, 7?

⁶ Gayaraati wibihin darangilaü ánhawa afurieida. Sügütu meha Ana saragu dan ayanuha  luma Túguchi Bungiu le siélubei (1 Sam. 1:12). Gayaraabei giñe wayanuhan luma Heowá saragu wéiyaasu lun wariñaguni sun wadiheri lun, wabahüdahani anufudei le wasandirubei luma wachara lun. Mama mosu lun aban lan furíei le aganbubei kamá hamuga poema ni lun buídumeraüya lan dimurei burí le ayusurúbei. Gayaraati wafurieidun íbini ayahuaheina. Gama lumoun, mabuchadunbei luagu Heowá aganbawa. Amu luéi wayanuhan luagu waturobulin, lunti waritaguni dimurei le ariñawagúbei lidan Filipuna 4:6, 7 (aliiha huméi). Ñein lariñaga Pábulu lunti lan wíchugun seremei lun Bungiu dan le wafurieidun. Anihein saragu resun wamá lun weteingiruni, kéiburi luagu idewesei le lánina ibagari, luagu katei le adüga laalibei, ínsiñeni le úaraguati luma lubuidun emenigini le líchugubei woun. Ka amu katei wafurendeirubei lídangiñe le asuseredubei tun Ana?

7. Ka tadügübei Ana luma tani weiriei súnwandan?

⁷ Íbini gaturobulin tan meha Ana, súnwandan tidin luma tani weiriei lidoun fulasu le ñein lubéi láhudurawagua lun Heowá, Siló (1 Sam. 1:1-5). Ñein tidan sanduariu líchiga Elí, fádiri le íñutimati, dǘgüdaguaü tun lau lariñagun aguraba lan lun lóunabuni Heowá tafurieidun (1 Sam. 1:9, 17).

8. Afuranguagüda huméi ida luba lan líderaguniwa adamuridaguni.

⁸ Gayaraati wasandirun darangilaü ánhawa asigira ñüdün lidoun adamuridaguni. Liibe-agei dan, amuriahóuati luma Heowá lidan furumiñe furíei lidan adamuridaguni lun ñein lan lani sífiri wama. Ani darangilaü ligía aban lídangiñe igaburi le líchugubei sífiri (Gal. 5:22). Dan le woudin adamuridagua íbini nidiheri wamá wíchuguña chansi lun Heowá luma houn wíbirigu lun híchugun dǘgüdaguaü woun luma lun híderaguniwa lunya wibihin darangilaü. Biámañein katei súdiniti layusurun Heowá lun darangilu lan wasandiragun woungua, furíei luma adamuridaguni (Ebü. 10:24, 25). Arihaya wamá amu katei le gayaraabei wafurendeirun lídangiñe le tásügürübei Ana.

9. Ka masansirubei lidan tibagari Ana, ani ka íderagubarun?

⁹ Idiheri le adügübei lun tasufurirun Ana magumuchagunti lau lóufudagun. Dan le tagiribudunbei luéigiñe táhuduragun lun Bungiu tidan sanduariu, sigimémetu awinwanda tidan tuguyaméme muna úara tuma Peniná. Mariñagun tumuti Bíbülia aba lan lasansirun tigaburi Peniná. Ligíati, chóuruti sigí tan Ana awandei dimurei le táchuhabei tubuyamun. Gama lumoun, aba masandirun taali lan idiheri ligía ani aba darangilu lan tasandiragun tungua. Haritagua waméi aba lan masandirunharu lan idiheri lárigiñe tígiruni sun katei lúhaburugun Heowá. Ígiratu lun líchugun dǘgüdaguaü luma darangilaü tun. Ani dan lárigiñe aba lóunabuni Heowá tafurieidun ani aba gasaanigu tan (1 Sam. 1:19, 20; 2:21).

10. Ka larufudahabei le asuseredubei tun Ana woun?

¹⁰ Gayaraati darangiluya lan wasandiragun woungua íbini magumuchagun lan le adügübei lun nidiheri wamá. Anihein burí dan magumuchagunti turobuli íbini furíei wamá saragu ani ñüdün wagía adamuridagua súnwandan. Arufudahati tikesin Ana woun úa lan ni kata lun ladügün lun míchugun lani Heowá darangilaü le wemegeirubei woun. Maweiyasunbei abulieidawa, mama uguñe mama haruga líchugubei wafayeiruaha woun luagu úaragua wamá (Ebü. 11:6).

11. Ka meha lébunabei ladiheridun Pábulu?

¹¹ Anihein meha saragu resun luma Pábulu lun lasandirun idiheri. Kei hénpulu, hínsiñetiña meha líbirigu lun adügatiti haturóbulin lun ladiheridun hawagu (2 Ko. 2:4; 11:28). Lidan sun lapurichihan, dúnguati meha hamá láganiñu inarüni, agayuwahatiña luagu ani daü haméi. Ábaya katei le adügübei lun nidiheri lan “labagaridúniwa  lidan gudemei” (Fili. 4:12). Ani gabaroun waméi dibiguata ugunei lau kei burí ǘrüwa wéiyaasu, gayaraati wasaminarun luagu anufudei le lasandirubei sagü láfayahan lan tidan waporu (2 Ko. 11:23-27). Ka íderagubalin?

12. Ka ídehabei lun lasandiragun Pábulu lungua lau darangilaü?

¹² Meredeti meha lasaminarun Pábulu luagu haturóbulin líbirigu, kei meha le ǘnabugu lubéi málugunti laransehani katei lábugua. Amuriahati hama amu líbirigu lun híderaguni óunigirei damuriguaü. Ruti üma houn wügüriña afiñewati hawagu, kei Timotéu luma Titu lun harihin lau ítaga dasi. Chóuruti dasi lan le hadügübei íbirigu ha ídehati lun lasandiragun Pábulu lungua lau darangilaü (Fili. 2:19, 20; Titu 1:1, 4, 5).

13. Ida luba háyeihani wéiyaaña lidan afiñeni apostolu Pábulu?

¹³ Amuriaha wamá ídemuei. Ítara kei Pábulu, uguñe weyu nidiheritiña giñe wéiyaaña lidan afiñeni hawagun lílana damuriguaü ha agagibudagubaña luma idiheri. Gama lumoun, siñati laransehani aban wéiyaali lidan afiñeni sun turobuli lábugua. Línchahabei ǘnabuguni lun lamuriahan ídemuei hama amu íbirigu ha subudihaña saragu luma lun larufudahan houn nibureintiña lun híderaguni óunigiraña lumutuniña Bungiu (2 Tim. 2:2).

14. Ka uagu madiheridun lubéi Pábulu, ani ka gayaraabei wafurendeirun lídangiñe lásügürün?

¹⁴ Subudi waméi megei wamá dǘgüdaguaü. Ǘnabuguti meha Pábulu, ligía láluahabei dǘgüdaguaü hama lumadagu. Furanguti madiheridun lan lau gayara lan hasaminarun amu débili lan ladüga híchugun líbirigu gurasu lun. Ariñagati tidan gárada to labürühaboun lun Filemón: “Niduhe, óunwenbu nugundan luma dǘgüdaguaü le nídanbei luagu bínsiñehabu” (Fil. 7). Lidan amu dan írida lumutiña saragu hádangiñe lánigu paaná ha meha íchugubaña saragu dǘgüdaguaü lun dan le nidiheri lubéi (Kol. 4:7-11). Ánhawa íchiga fe lau ǘnabuguni megei wamá dǘgüdaguaü, gúndaabaña íbirigu lun híchuguni woun.

15. Ka íderagubalin Pábulu dan le lagagibudagunbei luma saragu idiheri?

¹⁵ Afiñe wamá tuagu Lererun Bungiu. Subudi lumuti meha Pábulu gayara lan tíchugun Lererun Bungiu dǘgüdaguaü lun (Rom. 15:4). Subudi lumuti giñe gayara lan tíchugun lichú aau lun lun gayara lan lagagibudagun luma furumiñeguarügü óuchawaguni (2 Tim. 3:15, 16). Lidan libiaman wéiyaasu ladaürǘnbei Roma, aba líchugun fe málühali lan lun lounwen. Ka ladügübei lidan dan hénrenguti ligía? Aba lariñagun lun Timotéu lun lidin arihei lau lóufudagun  luma lun barüina lanu burí “líburu” o hóuburatu lun (2 Tim. 4:6, 7, 9, 13). Ka uagu lamuriahóun? Chóuruti tidan lan líburu tuguya anihein lan fánreinti lídangiñe Abürüdǘni Ebüréu, ani ligíati gayara lubéi layusurunu lun laturiahan lábugua. Ánhawa áyeihei Pábulu lau waturiahanu Lererun Bungiu súnwandan, layusuruboun Heowá Lererun lun líchugun darangilaü woun, meberesenga ka lan turobuli úmabei wagagibudagua.

16. Ida liña meha lasandiragun Dawidi lungua dan le léiguadunbei lidoun aban óunwenbu figóu?

¹⁶ Mederaguagüdünti meha lisaminan Dawidi ladüga lifigoun. Aba meha lagabara tuma Betüsawé ani adüga ligía aransehani lun lafarún tani weiriei ani sügüti saragu dan lau aramudei lifigoun (2 Sam. 12:9). Furumiñe álugati yebe lóuserun kamá hamuga masuseredunti ni kata, adügati lira lun lasufurirun luma lun lagadeiruni lumadagua luma Bungiu (Sal. 32:3, 4). Ka ladügübei lun labulubudun asufuriruni le láluahabei lungua? Ani ka gayaraabei líderaguniwa ánhawa éiguada lidoun aban figóu wéiriti?

17. Ida liña larufuduni Sálumu 51:1-4 asaküriha lan Dawidi tídangiñe sun lanigi?

¹⁷ Amuriaha wamá luma Heowá lun feruduna lániwa. Chülüdüga buga dan lun lafurieidun Dawidi lun Heowá lau aban lanarime asakürihani aba lagufeseruni lifigoun (aliiha huméi Sálumu 51:1-4). Adügati katei le lun lasandiragun lungua buidu (Sal. 32:1, 2, 4, 5). Ánhawa éiguada lidoun aban figóu wéiriti máluga wamá waramuduni. Furíei wamá lun Heowá ani abahüdaha waméi figóu le wadügübei lun. Ábameti wasandiragun woungua gidawa lan lídangiñe lihürü wadurun le lanügübei wachara. Ánhawa busén lunya gamadagua wamá luma Heowá, lunti wadügün amu katei.

18. Ida liña lóunabun Dawidi dan le lererehanbei Heowá lun?

¹⁸ Ánhara wamá lun ererehóuni. Dan le lóunahanbalin Heowá profeta Natán lun lasubudiragüdüni lun Dawidi afigouhaali lan Dawidi, málugunti Dawidi lun laramuduni lichara ni lun larufudun mebereseni. Lau lóufudagun ruti fe afigouhaali lan mámarügü ladüga láfaruni tani Betüsawé weiriei, afigouhati giñe ligibugiñetima Heowá. Ánhati lun lererehan Heowá lun, ani aba feruduna lani Heowá (2 Sam. 12:10-14). Anhein héiguadiwa lubéi lidoun figóu wéiriti, lunti wayanuhan hamá wügüriña ha líridubaña Bungiu lun hadundehaniwa (Sant. 5:14, 15). Ani lunti wáfaagun lun mariñagun wamá madürü wamá. Dan le wánharun lau lóufudagun lun ererehóuni  ani adüga wagía asansiruni le mégeiwabei, wibihinbei darangilaü luma ugundani furumiñe.

19. Ka katei aranseñu wabéi lun wadügüni?

¹⁹ Méiguadaya wamá lidoun ligiaméme charati. Subuditi meha lun urúei Dawidi megei lani lídehan Heowá lun méiguadun lan lidoun ligiaméme figóu (Sal. 51:7, 10, 12). Dan le feruduna lubalin Heowá, aba láfaagun lun lagidaruni luriban saminaü luáriua. Lau ladügüni lira, aba darangilu haali lan lasandiragun lungua.

20. Ida liña warufuduni seremei wamani Heowá lau feruduna lániwa?

²⁰ Arufuda waméi lun Heowá dan le wamuriaha lidan furíei seremei wamani lau feruduna lániwa, ánhara wamá lun ererehóuni ani áfaagua wamá lun méiguadunya wamá lidoun wachara. Dan le wadügüni lira, darangilubei wasandiragun woungua. Ligía asuseredubei lun James, aba íbiri le éiguadubei lidoun aban figóu wéiriti. Ariñagati: “Lárigiñe nagufeseruni nifigoun houn wéiyaaña lidan afiñeni ítara liña kamá hamuga nagidaruña aban hǘrüti nuáriua. Aba nagumeserun asandira darangilaü”. Ruti dǘgüdaguaü wasubudiruni yarafa lan Heowá woun “lun lesefuruniña ha gáribei hasandirunu hanigi ha féridi hamaalibei hemenigin” (Sal. 34:18).

21. Ida luba wígiraguagüdün woungua lun líchugun Heowá darangilaü woun?

²¹ Eibu ayarafadeina lan lagumuchagüle lagumuhóun dan, másiñati laganwounduba lan idiheri. Danme le nidiheri wamá, madarasahan wamá, áluaha waméi lídehan Heowá. Aturiaha wamóun Bíbülia lau lóufudagun. Furendei wamá lídangiñe tásügürün Ana, Pábulu, luma Dawidi. Amuriaha wamá luma Heowá lun líderaguniwa lun wasubudiruni ka lan adügübei lun wadiheridun (Sal. 139:23). Ígira wamá lun ligía lan anügei wanügün wau, létima hénrengubei, o le siñá wabéi anüga. Ánhawa adügei, wasandiraguba woungua kei abürühati Sálumu le eremuhabei lun Heowá: “Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sal. 94:19).