1. Kwa ki kapab fer nou enkyet e ki nou kapab konmans mazinen?

ESKI ou’n deza enkyet oubyen trakase akoz en keksoz? * Petet ou trakase akoz en dimoun in dir oubyen fer en keksoz ki bles ou. Oubyen, i kapab ki ou enkyet akoz en keksoz ki ou’n dir oubyen fer. Par egzanp, i kapab ki ou’n fer en fot e ou enkyet konsernan si Zeova pou pardonn ou. Pli pir ankor, ou kapab krwar ki vi ki ou sitan enkyet oubyen trakase, sa i vedir ki ou napa ase lafwa e ki ou en move dimoun. Me eski sa i vre?

2. Ki legzanp dan Labib ki montre ki ler nou enkyet sa pa vedir ki nou mank lafwa?

² Annou vwar trwa legzanp dan Labib. Ana, ki pli tar ti vin manman profet Samyel, ti en madanm ki ti annan bokou lafwa. Kantmenm sa, i ti trakase parski en manm son fanmir pa ti azir byen avek li. (1 Sam. 1:7) Zapot Pol ti annan en lafwa for me i ti “enkyet pour tou bann kongregasyon.” (2 Kor. 11:28) Lerwa David ti annan en lafwa for e Zeova ti kontan li en kantite. (Akt 13:22) Kantmenm sa, David ti fer fot e sa ti fer li enkyet en kantite. (Ps. 38:4) Zeova ti rekonfort e soulaz sakenn ant zot. Annou vwar ki nou kapab aprann avek zot legzanp.

3. Ki mannyer sa ki dimoun i dir i kapab fer nou enkyet?

³ Ler lezot i koz dan en fason brit oubyen fer keksoz ki bles nou, sa i kapab fer nou trakase. Sa i vre sirtou si sa  enn ki bles nou i nou bon zanmi oubyen nou fanmir. Nou kapab enkyet lo si sa ki’n arive pou gat nou lanmitye. Parfwa, sa dimoun i kapab dir bann parol san reflesir ki kapab parey bann kou lepe. (Prov. 12:18, NWT) I kapab osi ki en dimoun i fer ekspre e i dir en keksoz ki i konnen pou bles ou. En zenn ser ti fer fas avek en sityasyon parey. I dir: “Detrwa lannen pase, en dimoun ki mon ti krwar i mon zanmi ti konmans fann rimer lo mwan lo Enternet. Sa ti bles mwan e mon ti trakase. Mon ti zis pa kapab konpran akoz mon bon zanmi ti pou kraz mwan par deryer mon ledo.” Si en bon zanmi oubyen fanmir in bles ou koumsa, ou kapab aprann avek legzanp Ana.

4. Ki bann problenm vreman difisil Ana ti fer fas avek?

⁴ Ana ti bezwen fer fas avek bann problenm vreman difisil. Pour plizyer lannen i pa ti kapab fer zanfan. (1 Sam. 1:2) Bokou Izraelit ti krwar ki si en madanm pa ti kapab fer zanfan, sa ti vedir ki Bondye pa ti pe beni li. Sa ti fer Ana santi li onte. (Zen. 30:1, 2) I ti annan en lot keksoz ki ti fer lavi Ana pli difisil. Son msye ti annan en lot madanm ki ti apel Penina e Penina ti kapab fer zanfan. Deplis, Penina ti zalou Ana e i ti “provok [Ana] pour fer li sagren.” (1 Sam. 1:6) O konmansman, Ana ti vreman sagren konsernan son sityasyon. I ti sitan sagren ki i ti “plere e i pa ti manze.” I ti vin anmer. (1 Sam. 1:7, 10) Ki mannyer Ana ti ganny rekonforte?

5. Ki mannyer lapriyer ti ed Ana?

⁵ Ana ti devid son leker avek Zeova dan lapriyer. Apre ki i ti’n priye, i ti koz avek Granpret Eli lo son problenm. Granpret Eli ti dir li: “Al anpe! Bondye Izrael ava donn ou tou sa ki ou’n demande.” Ki ti arive apre sa? Ana “ti ale. I ti manze e i ti nepli tris.” (1 Sam. 1:17, 18) Lapriyer ti ed Ana ganny lape lespri.

6. Ki nou aprann konsernan lapriyer avek legzanp Ana e dan Filipyen 4:6, 7?

⁶ Nou kapab ganny lape lespri si nou kontinyen priy Zeova. Ana ti koz avek son Papa ki dan lesyel pour en kantite letan. (1 Sam. 1:12, NWT) Nou osi nou kapab koz lontan avek Zeova lo nou bann lenkyetid, bann keksoz ki fer nou per e  lo nou bann febles. Nou pa bezwen dir tou keksoz dan en fason parfe. Parfwa, nou kapab menm plere ler nou pe koz avek Zeova lo bann keksoz ki fer nou enkyet. Kantmenm sa, Zeova pa pou zanmen fatige pour ekout nou lapriyer. An plis ki koz lo nou bann problenm, nou bezwen gard antet sa konsey ki dan Filipyen 4:6, 7. (Lir.) Pol ti dir ki nou bezwen remersye Zeova dan nou lapriyer. Nou annan plizyer rezon pour remersye Zeova. Par egzanp, nou kapab remersye li pour sa lavi ki i’n donn nou, pour bann zoli keksoz ki i’n kree, pour lanmour fidel ki i’n demontre e pour sa zoli lespwar ki i’n donn nou. Ki lezot keksoz ki nou kapab aprann avek legzanp Ana?

7. Ki Ana ek son msye ti fer tou le z-an?

⁷ Menm si Ana ti annan problenm, tou le-z-an i ti al avek son msye kot landrwa ladorasyon Silo. (1 Sam. 1:1-5) I ti lanmenm kot tabernak ki Granpret Eli ti ankouraz li e dir li ki i swete ki Zeova i reponn son lapriyer.​—1 Sam. 1:9, 17.

8. Ki mannyer nou bann renyon i kapab ed nou? Eksplike.

⁸ Nou pou ganny lape lespri si nou kontinyen asiste nou bann renyon. Normalman, o konmansman nou bann renyon en frer i priye pour demann Zeova son lespri sen. Lape i en laspe fri lespri sen. (Gal. 5:22) Ler nou asiste renyon menm si nou trakase, nou donn Zeova ek nou bann frer ek ser sa loportinite pour ankouraz nou e pour ed nou ganny lape lespri ek leker. Lapriyer ek bann renyon i bann fason enportan ki Zeova i soulaz nou. (Ebr. 10:24, 25) Annou vwar en lot leson ki nou kapab aprann avek leksperyans Ana.

9. Kwa ki pa ti sanze dan lavi Ana me kwa ki ti ed li?

⁹ Sa problenm ki ti pe fer Ana enkyet ti ankor la. Ler i ti retourn kot li sorti kot tabernak, i ti ankor bezwen viv dan menm lakaz avek Penina. Labib pa dir ki latitid Penina ti sanze. Alor, i tre probab ki Ana ti ankor bezwen siport bann parol blesan ki Penina ti dir li. Kantmenm sa, Ana pa ti les sa fatig li. Rapel ki Ana ti’n fini kit keksoz dan lanmen Zeova alor i ti nepli enkyet. Ana ti’n les Zeova rekonfort e soulaz li. En pe letan apre, Zeova ti reponn lapriyer Ana e i ti kapab annan zanfan!​—1 Sam. 1:19, 20; 2:21.

10. Ki nou aprann avek legzanp Ana?

¹⁰ Nou kapab ganny lape lespri menm si nou problenm i ankor la. Menm si nou kontinyen priye e asiste nou bann renyon, i kapab ki serten nou bann problenm i persiste. Me atraver legzanp Ana, nou aprann ki napa nanryen ki kapab anpes Zeova soulaz nou. Zeova pa pou zanmen oubliy nou e to ou tar i pou rekonpans nou pour nou fidelite.​—Ebr. 11:6.

11. Akoz Pol ti enkyet?

¹¹ Zapot Pol ti annan plizyer rezon pour li enkyet. Par egzanp, ler bann frer ek ser ki i ti kontan ti fer fas avek problenm, Pol ti vreman enkyet pour zot. (2 Kor. 2:4; 11:28) Ler Pol ti pe anons sa bon nouvel, bokou dimoun ti opoz li e souvan i ti ganny bate e ganny met dan prizon. I ti osi fer fas avek bokou problenm ki ti fer li enkyet tel parey ler i ti bezwen “viv avek ptigin.” (Fili. 4:12) Deplis, Pol ti’n eksperyans nofraz trwa fwa e i tre probab ki i ti enkyet ler i ti voyaz  lo bato. (2 Kor. 11:23-27) Ki mannyer Pol ti fer fas avek son bann lenkyetid?

12. Kwa ki ti ed Pol pour pa tro enkyet?

¹² Menm si Pol ti enkyet ler son bann frer ek ser ti pas dan problenm, i pa ti esey rezourd zot problenm li tousel. Pol ti konnen ki i pa ti pou kapab fer tou keksoz lo li menm. Alor, i ti fer laranzman pour lezot Kretyen ede pran swen avek kongregasyon. Par egzanp, i ti donn bann zonm ki ti diny konfyans, tel parey Timote ek Tit bokou responsabilite. San dout, sa travay ki sa bann frer ti fer ti ed Pol pour pa tro enkyet.​—Fili. 2:19, 20; Tit 1:1, 4, 5.

13. Ki mannyer bann ansyen i kapab swiv legzanp Pol?

¹³ Demann lezot pour ed ou. Parey Pol, ozordi bann ansyen i enkyet pour bann frer ek ser dan kongregasyon ki pe fer fas avek problenm. Me en ansyen pa kapab ed tou dimoun dan kongregasyon. Si sa ansyen i rekonnet ki i pa kapab ed tou dimoun dan kongregasyon, i pou demann led avek lezot zonm kalifye e i pou form lezot zenn frer pour ed li pran swen avek troupo Bondye.​—2 Tim. 2:2.

14. Kwa ki Pol pa ti enkyet lo la e ki nou kapab aprann avek son legzanp?

¹⁴ Rekonnet ki ou bezwen ganny rekonforte. Pol ti annan limilite, alor i ti konnen ki i ti bezwen lankourazman avek son bann zanmi. I pa ti enkyet ki lezot ti pou krwar ki i en dimoun ki feb akoz son bann zanmi ti’n ankouraz li. Dan son let pour Filemon i ti dir: “Mon dan en gran lazwa e i’n vreman rekonfort mwan ler mon’n tann koz lo ou lanmour.” (Filem. 7) Pol ti koz lo plizyer lezot Kretyen ki ti’n ankouraz li ler i ti dan problenm. (Kol. 4:7-11) Ler nou annan limilite e rekonnet ki nou bezwen lankourazman, nou bann frer ek ser pou kontan pour donn nou sa sipor ki nou bezwen.

15. Ki Pol ti fer ler i ti dan bann sityasyon difisil?

¹⁵ Depan lo Parol Bondye. Pol ti konnen ki Parol Bondye ti kapab rekonfort li. (Rom. 15:4) Parol Bondye ti pou osi donn li lasazes ki i ti bezwen pour fer fas avek problenm. (2 Tim. 3:15, 16) Ler Pol ti dan prizon Ronm pour dezyenm fwa, i ti santi ki i ti pros pour mor. Ki Pol ti fer dan sa sityasyon? I ti demann Timote pour vin kot li san tarde e pour anmenn  “bann roulo.” (2 Tim. 4:6, 7, 9, 13) Akoz i ti fer sa? I tre probab ki lo sa bann roulo i ti annan bann verse ki ti sorti dan Lekritir Ebre e Pol ti kapab etidye sa bann verse dan son letid personnel. Si nou swiv legzanp Pol e etidye Parol Bondye regilyerman, Zeova pou servi son Parol pour soulaz nou dan nenport problenm ki nou fer fas avek.

16. Ki mannyer David ti santi apre ki i ti’n fer bann fot grav?

¹⁶ David ti’n fer en keksoz vreman mal e i ti santi li koupab. I ti’n komet adilter avek Bat-Seba, fer laranzman pour touy son msye e i ti esey kasyet sa ki i ti’n fer. (2 Sam. 12:9) Premye kou, David pa ti ekout son konsyans. Me sa ti gat son lanmitye avek Zeova, ti fer li trakase e menm malad. (Ps. 32:3, 4) Kwa ki ti ed David pour fer fas avek lenkyetid apre ki i ti’n fer bann fot grav e kwa ki kapab ed nou si nou fer en fot grav?

17. Dapre Psonm 51:1-4, kwa ki montre ki David ti vreman regret son bann fot?

¹⁷ Priy Zeova pour ganny pardonnen. Apre en pe letan, David ti priy Zeova. I ti regret senserman sa ki i ti’n fer e i ti dir tou avek Zeova dan lapriyer. (Lir Psonm 51:1-4.) Sa ti ed li santi li kalm e zwaye! (Ps. 32:1, 2, 4, 5, NWT) Si ou fer en pese grav, pa esey kasyet ou fot. O kontrer konfes ou pese avek Zeova dan lapriyer. Apre, ou pou santi ou pli kalm e ou pou nepli santi ou sitan koupab. Me si ou anvi aranz ou lanmitye avek Zeova, ou bezwen fer plis ki zis priye.

18. Ki mannyer David ti reazir ler i ti ganny disiplinen?

¹⁸ Aksepte disiplin. Ler Zeova ti anvoy profet Natan pour koz avek David lo son pese, David pa ti donn bann leskiz oubyen dir ki sa ki i’n fer pa ti sitan mal. Deswit i ti rekonnet ki i ti’n fer pese kont msye Bat-Seba e pli pir ankor i ti’n fer pese kont Zeova. David ti aksepte disiplin Zeova e Zeova ti pardonn li. (2 Sam. 12:10-14) Si nou’n fer en pese grav, nou bezwen koz avek bann ki Zeova in apwente pour pran swen avek nou. (Zak 5:14, 15) Nou pa devret donn leskiz pour sa ki nou’n fer. Si nou pa  tarde pour aksepte e aplik disiplin, nou pou kapab ganny lape lespri ek lazwa pli vitman.

19. Ki nou devret determinen pour fer?

¹⁹ Fer tou sa ki ou kapab pour pa zanmen fer menm fot. Lerwa David ti konnen ki i ti bezwen led Zeova pour li pa fer menm fot ankor. (Ps. 51:7, 10, 12, NWT) Apre ki Zeova ti’n pardonn David, David ti determinen pour fer tou sa ki i kapab pour pa annan okenn move dezir ankor. Akoz sa, i ti ganny son lape lespri.

20. Ki mannyer nou kapab montre ki nou apresye ler Zeova i pardonn nou?

²⁰ Ler nou demann pardon dan lapriyer, nou aksepte disiplin e nou fer bokou zefor pour pa fer menm fot ankor, nou montre ki nou apresye ler Zeova i pardonn nou. Ler nou fer sa bann keksoz, nou pou ganny lape lespri. James, en frer ki ti fer en pese grav ti eksperyans sa. I dir: “Apre ki mon ti’n konfes mon pese avek bann ansyen, mon ti santi konmsi en pwa lour ti’n ganny tire lo mwan. Mon ti konmans santi mwan byen e mon ti ganny lape lespri.” Pa i vreman ankourazan pour konnen ki “[Zeova] i pros avek sa enn ki’n dekouraze. I sov sa enn ki’n perdi tou lespwar.”​—Ps. 34:18.

21. Ki mannyer nou kapab les Zeova soulaz nou?

²¹ Anmezir ki lafen i aprose, nou pou annan bokou plis rezon pour nou enkyet. Ler ou trakase, pa tarde pour demann Zeova led. Etidye Labib regilyerman. Aprann avek legzanp Ana, Pol ek David. Demann ou Papa ki dan lesyel pour ed ou konpran akoz ou trakase. (Ps. 139:23, NWT) Les li ed ou fer fas avek ou bann problenm, espesyalman bann keksoz ki ou napa bokou kontrol lo la oubyen ki ou pa kapab sanze. Si ou fer sa, ou pou kapab santi parey sa psalmis ki ti sant pour Zeova e dir: “Ler bann traka ti fatig mwan en kantite, ou ti rekonfort mwan e soulaz mwan.”​—Ps. 94:19, NWT.