1. Pine nemene matre easa hnehengazo nge nemene la mekuna së e cili?

 HAPEU, hne së kö hna hane hnehengazone la ketre ewekë? * Maine jë, easa akötr pine la hna qaja maine kuca hnei itre xan. Maine pena, easa hnehengazo ke, hne së hna qaja maine kuca la ketre ewekë ka ngazo. E cili, easa xou ka hape, tha tro kö Iehova a nue la ngazo së. Easë fe a mekun laka, nanazije catre la lapaune së, nge tha tro hmaca kö a kepe së hnei Iehova. Ngo ka nyipici kö lai?

2. Drei la itre tulu ne lapaune ka hane hnehengazo, e hnine la Tusi Hmitrötr?

² Hanawang la itre tulu hna hamën hnei Tusi Hmitrötr. Hana, la ketre föe ka lapaun, nge thine i Samuela perofeta. Hnei eahlo hna hnehengazo ke, hna akötrë eahlo hnene la ketre atrene la fami eahlo. (1 Sam. 1:7) Paulo aposetolo fe la ketre atre lapaun. Hnei nyidrëti hna “hnehengazone la itre ekalesia.” (2 Kor. 11:28) Ketre tulu ne lapaune fe Dravita joxu, nge tru la ihnimi Iehova koi nyidrë. (Itre hu. 13:22) Ame pe, hace catre Dravita ke, hetre ewekë hnei nyidrëti hna kuca. (Sal. 38:4) Ngo hnei Iehova palahi hna xatuane la itre hlue i Nyidrë. Tro sa xomi ini qa ngöne la itre hnei angatr hna melën.

3. Pine nemene matre easa hnehengazo ngöne la kola ithanata akökötreny koi së?

³ Maine ketre sinee së a ithanata akökötreny koi së me akötrë së, tro hë sa hnehengazo. Tro hë sa mekun ka hape, tha lue treme sinee hmaca kö së me angeic. Ame itre xaa ijin, tha aja i angeice kö troa akötrë së. Ngo, kösë kola thinyi së hnei taua la aqane ithanata i angeic! (Ite edomë 12:18) Ame itre xan, angatr a ajane troa akötrë së. Celë hi la hna melën hnene la ketre trejine föe. Öni angeic: “Hna silitrengathoi ni hnene la ketre sineeng, matre eni a akötr me hnehengazo. Thatre kö ni la kepin matre angeic a akötrë ni. Eni lo a mejiune koi angeic.” Maine hna akötrë së hnene la ketre sinee së, ijije hi tro sa xomi ini qa ngöne la tulu i Hana.

4. Nemene la itre jol ka traqa koi Hana?

⁴ Nyimutre la itre jol ka traqa koi Hana. Itre macatre ne akötre Hana ke, ka safëj eahlo. (1 Sam. 1:2) Ame koi angetre Isaraela, tha hna amanathithine kö la föe ka tha hnaho. Celë hi nyine hmahmane koi Hana. (Gen. 30:1, 2) Ketre, ka hnaho Penina, lo hnaaluene föe i Elekana. Hnei Penina hna zalu koi Hana, matre hnei angeic “hna akötëne catë [Hana], mate teije [eahlo].” (1 Sam. 1:6) Hace catre Hana ngöne lo xötrei, matre hnei eahlo “hna teije nge tha hane kö xen.” Ketre, “aköte la hni” Hana. (1 Sam. 1:7, 10) Nemene la ka akeukawane la hni Hana?

5. Nemene la aqane xatua Hana hnene la thith?

⁵ Hnei Hana hna xëwe fë la itre akötre i eahlo koi Iehova, ngöne la thith. Thupene lai, hnei eahlo hna ithanata koi Eli, atre huuj ka sisitria. Öni nyidrë koi eahlo: “Trojë memine la tingeting, nge tro Akötesi angete Isaraela a hamëne la ewekë hnei ’ö hna sipone thei nyidë.” Nemene hë la thangan? Hnei Hana hna “hna tro, me xen, nge ame la qëmeke i angeic, te, tha iëzi hmaca kö.” (1 Sam. 1:17, 18) Hnene la thith hna xatua Hana, matre tingeting la hni eahlo.

6. Nemene la itre ini hna xom qa ngöne la tulu i Hana göne la thith, me ngöne Filipi 4:6, 7?

⁶ Troa catre thithi koi Iehova, matre tingeting la hni së. Hnei Hana palahi hna  thithi koi Iehova. (1 Sam. 1:12) Loi e tro fe sa qaja koi Iehova la itre hne së hna hnehengazon, me xouen, me thatreine kuca. Tha nyipiewekë kö troa qaja la itre trengewekë ka mingöming. Ame itre xaa ijin, easa treij ngöne la easa xëwe fë la itre akötre së koi Iehova. Nyidrëti a ajane troa dreng la itre thithi së. Ngo tha tro kö sa thëthëhmine la hnei Paulo hna qaja ngöne Filipi 4:6, 7. (E jë.) Öni Paulo ka hape, loi e tro fe sa olene koi Iehova. Tro sa olene koi Nyidrëti la mano ne mel, me itre hna xup, me ihnimi Nyidrë, memine la mejiune së koi elany. Nemene la itre xaa ini hna hamën hnene la tulu i Hana?

7. Nemene la hna majemine kuca hnei Hana me föi eahlo?

⁷ Ngacama nyimutre la itre jol, ngo hnei Hana palahi hna ce tro me Elekana troa atrunyi Iehova e Silo. (1 Sam. 1:1-5) Ame ngöne la uma ne hmi Iehova, hnei Eli hna ithuecatre koi Hana, me qaja la aja i nyidrëti tro Iehova a dreng me sa la thithi eahlo.—1 Sam. 1:9, 17.

8. Pine nemene matre kola xatua së hnene la itre icasikeu? Qejepengöne jë.

⁸ Troa sine la itre icasikeu, matre tingeting la hni së. Ame ngöne la thithi ne nyiqane la icasikeu, easa sipo Iehova la uati hmitrötre i Nyidrë. Ame la tingeting, tre, ketre igötranene la wene ne la ua i Iehova. (Gal. 5:22) Ngacama easa hnehengazo, ngo loi e tro palahi sa sine la itre icasikeu ke, e cili hi la hna ithuecatre koi së hnei Iehova me itre trejin. Iehova a akeukawane la hni së jëne la thith me itre icasikeu. (Heb. 10:24, 25) Hanawang la ketre ini hna hamën hnene la tulu i Hana.

9. Nemene la jol hnei Hana hna xomihnin, ngo nemene la ka xatua eahlo?

⁹ Tha hna canga paatre kö la jole i Hana. Ame la Hana a bëek qa ngöne la ene, eahlo hmaca a iöhnyi me Penina. Tha hna qaja kö hnei Tusi Hmitrötr ka hape, hna saze la aqane ujë i Penina. Hnei Hana hna xomihnine la itre trengewekë ka catre i Penina. Tha hnei angeic kö hna elëhni. Atre hi Hana laka, drenge hi Iehova la thithi eahlo, matre tha hnehengazo hë eahlo. Hnei eahlo hna nue Iehova troa akeukawane la hni eahlo. Thupene lai, hnei Iehova hna sa la thithi Hana, me aijijë eahlo troa hnaho!—1 Sam. 1:19, 20; 2:21.

10. Nemene la hna ini së hnene la tulu i Hana?

¹⁰ Ngacama ka cile hut la itre jole së, ngo ijije hi troa tingeting la hni së. Ngacama easa catre thith me sine la itre icasikeu, ngo tha canga paatre kö la itre jole së. Jëne la tulu i Hana, hne së hna inine laka, pëkö ewekë ka atreine troa sewe Iehova troa xatua së. Tha tro kö Nyidrëti a thëthëhmi së. Nge tro kö Nyidrëti a amanathithine la lapaune së.—Heb. 11:6.

11. Pine nemene matre hnei Paulo hna hnehengazo?

¹¹ Nyimutre la itre kepin matre Paulo aposetolo a hnehengazo. Tru catr la ihnimi Paulo kowe la itre trejin, matre nyidrëti a hnehengazo angatr, pine la itre jole i angatr. (2 Kor. 2:4; 11:28) Ame lo Paulo a cainöj, hna lep me akalabusi nyidrë hnene la itre ka icilekeu. Hnei nyidrëti mina fe hna hnehengazo ke, kola “pë xen.” (Fil. 4:12) Maine jë, hnei Paulo  hna xou troa xomi he ke, hna akönia lö la he i nyidrëti ngöne la tim. (2 Kor. 11:23-27) Nemene la ka xatua Paulo matre tha tro kö a hnehengazo menu?

12. Nemene la ka xatua Paulo matre tha tro hmaca kö a hnehengazo menu?

¹² Hnei Paulo hna hnehengazone la itre trejin ke, nyimutre la itre jol ka traqa koi angatr. Ngo tha hnei nyidrëti kö hna thele troa nyinyine la itre jol cili, hnene la sipu trengecatre i nyidrë. Atre hi Paulo laka, thatreine kö nyidrë troa ujë caas. Hnei nyidrëti hna sipo ixatua koi itre xan troa thupëne la ekalesia. Hnei Paulo hna ahnithe la hnëqa cili koi Timoteo me Tito. Hnene la huliwa i nyidro hna xatua Paulo, matre tha hnehengazo menu hmaca kö nyidrë.—Fil. 2:19, 20; Tito 1:1, 4, 5.

13. Nemene la aqane tro la itre qatre thup a nyitipu Paulo?

¹³ Troa sipo ixatua. Nyimutre la itre qatre thup ka mekun tui Paulo. Tru la ihnimi angatr kowe la itre trejin ka cile kowe la itre jol ka tru, matre angatr a utipin me hnehengazo. Ngo tha ijiji ala caasi kö troa xatuane la nöjei atrene la ekalesia. Itre qatre thup a hetre hni ne ipië me sipo ixatua thene la itre xaa trejin ka macaj. Tro fe angatr a inine la itre trejine thöth troa hane thupëne la itre mamoe i Akötresie.—2 Tim. 2:2.

14. Nemene la hna atre hnei Paulo, nge nemene la ini koi së?

¹⁴ Troa atrehmekune laka, easa aja ixatua. Ka hni ka ipië Paulo. Atre hi nyidrëti laka, nyipiewekë la ixatua hna hamën hnene la itre sinee i nyidrë. Tha hnei nyidrëti kö hna hmahma e tro itre xan a öhn laka, nyidrëti a kucakuca. Öni Paulo koi Filemona: “Hna amadrinë ni me akeukawanyi ni la eni a drenge la ihnimi eö.” (Filem. 7) Hnei Paulo hna qaja la ëjene la itre xaa sine huliwa i nyidrë ka ithuecatr me ixatua ngöne ijine jol. (Kol. 4:7-11) Maine tro sa atrehmekun laka easa aja ixatua, troa ithuecatre koi së hnene la itre trejin.

15. Nemene la hna kuca hnei Paulo ngöne la itre ijine jol?

¹⁵ Troa mejiune kowe la Itre Trengewekë i Akötresie. Atre hi Paulo laka, troa akeukawane la hni nyidrë hnene la Itre Hna Cinyihan. (Rom. 15:4) Celë fe hi  la ka troa hamë inamacane koi nyidrë, matre elë hun la itre jol. (2 Tim. 3:15, 16) Ame ngöne lo hnaaluene ijine kola akalabusi Paulo, hnei nyidrëti hna mekun laka, tro hë nyidrëti a mec. Nemene la hnei Paulo hna kuca? Hnei nyidrëti hna upi Timoteo troa canga wai nyidrë, me xome la “itre tusi hna ewath.” (2 Tim. 4:6, 7, 9, 13) Pine nemen? Kolo Itre Hna Cinyihan Qene Heberu hnei Paulo hna xom matre troa ini tusi caas. Maine tro sa tui Paulo me catre ini Tusi Hmitrötr, tro hë Iehova a hamë tingeting koi së ngöne la itre ijine jol.

16. Nemene la pun koi Dravita ngöne la nyidrëti a tria?

¹⁶ Hnei Dravita hna hnehengazo ke, hetre ewekë hnei nyidrëti hna kuca. Hnei Dravita hna nyixetë me Batheseba, me humuthe la föi eahlo, me thele troa juetrëne la ngazo i nyidrë. (2 Sam. 12:9) Ame ngöne lo xötrei, tha hnei Dravita kö hna drenge la mekuthetheu i nyidrë. Ame la pune lai ke, hna hetre ethane kowe la aqane imelekeu i nyidrë me Iehova. Ketre, akötr me hleuhleu la hni nyidrë, nge göi wezipo fe nyidrë. (Sal. 32:3, 4) Nemene la ka xatua Dravita ngöne lo nyidrëti a hnehengazone la tria i nyidrë? Nge nemene la ka troa xatua së e traqa ju së tria?

17. Nemene la ka amamane ngöne Salamo 51:1-4 laka, hnei Dravita hna ietra?

¹⁷ Troa thith matre troa nue la ngazo së. Hnei Dravita hna thithi koi Iehova. Hnei nyidrëti hna ietra me qaja koi Iehova la itre ngazo hnei nyidrëti hna kuca. (E jë la Salamo 51:1-4.) Celë hi matre, tingetinge hmaca la hni nyidrë! (Sal. 32:1, 2, 4, 5) Maine hetre ewekë hne së hna kuca, tha tro pi kö sa juetrën. Loi e tro pe sa ietra me qaja asë koi Iehova ngöne la thith. Tro ha nango tingeting la hni së me lolo la mekuthetheu së. Ngo maine easa ajane troa acatrene hmaca la aqane imelekeu së me Iehova, hetre nyine tro palakö sa kuca.

18. Nemene la aqane ujë i Dravita ngöne la kola haji nyidrë?

¹⁸ Troa kapa la ihaji. Ame lo Iehova a upi Nathana perofeta troa qaja amamane  koi Dravita la ngazo i nyidrë, tha hnei nyidrëti kö hna wangacone maine thele kepin. Hnei Dravita pe hna wangatrehmekune laka, hnei nyidrëti hna ngazo kowe la föi Batheseba, me ngazo koi Iehova. Hnei Dravita hna kapa la ihaji qaathei Iehova, nge hnei Iehova hna nue la ngazo i nyidrë. (2 Sam. 12:10-14) Maine hne së hna tria, loi e tro sa ithanata kowe la itre trejin hnei Iehova hna acil matre troa xatua së. (Iako. 5:14, 15) Tha tro kö sa thele kepine la ngazo së. Loi e tro pe sa canga kapa la ihaji, matre canga madrin me tingeting la hni së.

19. Nemene la nyine tro sa kuca?

¹⁹ Tha tro hmaca kö a kei kowe la ngazo hna kuca ekö. Atre hi Dravita joxu laka, nyipiewekë tro nyidrëti a sipo ixatua koi Iehova, matre tha tro hmaca kö a kei kowe la ngazo. (Sal. 51:7, 10, 12) Thupene la Iehova a nue la ngazo i Dravita, hnei Dravita hna thele troa lepetrij la itre mekun me itre aja ka ngazo. E cili, tingeting hë la hni nyidrë.

20. Nemene la aqane tro sa amamane la hni ne ole së koi Iehova?

²⁰ Easa amamane la hni ne ole së koi Iehova, ngöne la easa thith me qaja la itre ngazo së, me kapa la ihaji, me thel matre tha tro kö a kei kowe la ngazo hna kuca ekö. E cili, troa tingeting la hni së. Celë hi la hna qaja hnei James, ketre trejin ka tria. Öni angeic: “Thupene la eni a qaja kowe la itre qatre thup la ngazong, kösë eni a una la ketre ehnef ka tru. Kola tingeting la hning.” Easa madrin troa atre laka, “eashenyi Iehova koi angete thë fë hni; nge kola amele ange aköte u”!—Sal. 34:18.

21. Nemene la nyine tro sa kuca matre troa nue Iehova troa akeukawane la hni së?

²¹ Easa melëne la pune la fene celë, matre tro palakö sa hnehengazo. Ngo loi e tro sa canga thith me sipo ixatua koi Iehova. Loi e tro fe sa catre ini Tusi Hmitrötr, me xomi ini qa ngöne la tulu i Hana me Paulo me Dravita. Ketre, loi e tro sa sipo Iehova troa xatua së troa öhn la kepin matre easa hnehengazo. (Sal. 139:23) Tro sa nue Iehova troa xatua së ngöne la itre jol hne së hna thatreine nyinyin. E cili, tro hë sa mekun tune lo atre cinyihane la Salamo, ka hape: “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei cilie.”—Sal. 94:19.