1. Amkam chinta vo uske kiteak zaunk puro, ani tea vellar ami ghoddie kitem chintunk xoktat?

TUMKAM kednam tori khub uske zaleat kai? * Ghoddie dusreamnim tanchea utramnim vo korneamnim tumkam dukhoilam dekhun tumkam chinta zali astoli vo tumi dusreank kitem tori mhunnttlem vo kelem dekhun tumkam chinta zali astoli. Udharonnak, tumi ek patok adarlam astolem ani Jehova tumkam bhogxichoch na mhunn tumkam chinta vo usko zaunk puro. Ani tea vellar tea vixim tumi itlim uskeunk laglim astoli, ki tumcho bhavarth unno zalo astolo ani tumi ek vaitt munis mhunn tumi chintunk laglim astolim. Punn hem khorem kai?

2. Amkam uske vo chinta zavop mhunnche amkam bhavarth na oxem nhoi mhunn Bible-antlea khoinchea udharonnantlean kolltta?

² Atam ami Bible-antlim thoddim udharonnam polloum-ia. Provadi Samuelachi avoi An’nak khub bhavarth aslo. Tori astana, tichea familintli ekli tichea sangata vaitt toren vagli tednam ti chinta korunk lagli. (1 Sam. 1:7) Apostl Paulucho bhavarth ekdom ghott aslo, punn taka “sogllea Povitr-Sobhanchi huskeabhorit kallji” asli. (2 Kor. 11:28) David Razacho bhavarth itlo ghott aslo ki Jehova tacho ekdom chodd mog kortalo. (D.I. 13:22) Tori astana, tannem thoddim patkam adarlim zaka lagon taka khub chinta vo uske zale. (St. 38:4) Jehovan amkam sogleank buzvonn ani monachi xanti dili. Tanchea udharonnantlean ami kitem xikonk xoktat tem ami polloum-ia.

3. Konnem-i amkam dukhoitat toslim utram mhunnttlim zalear ami kiteak chintest zaunk xoktat?

³ Dusrim amchea lagim vaitt toren uloitat vo vagtat  tednam amkam ghoddie chinta zaunk xokta. Ani amkam dukhoila to munis amcho ghott ixtt vo soiro asot zalear ami ani chintest zaunk xoktat. Tea vellar to amcho ixtt anik aschona mhunn amkam chinta zaunk puro. Thodde pavtti tannem uloil’lim utram amkam dukhounk lagon mhunnonk na astolim. Punn tim utram ghoddie amkam tolvari sarkim toplim astolim. (Mho. 12:18) Vo thoddeamnim ghoddie amkam dukhounk lagon mud’dom toslim utram uzar kelim astolim. Eka tornnattea bhoinnik osleach eke oddchonnecho fuddo korcho poddlo. “Thoddea vorsam poilim mhojea eka ghott ixttinnin mhoje vixim fotti kanneo internet-acher ghatleo. Mhaka khub dukh zalem ani hanv chintest zalem. Mhojea hea ghott ixttinnin mhojea sangata oxem kiteak kelem mhunn mhaka somzonk na.” Tumchea ghott ixttan vo soirean tumkam dukhoilam zalear An’nachea udharonnantlean tumi zaitem xikonk zata.

4. An’nak kosleo kotthin somosia asleo?

⁴ An’nak thoddea kotthin poristhitincho fuddo korcho poddlo. Zaitim vorsam thaun tika bhurgim naslim. (1 Sam. 1:2) Eke bailek bhurgim zaina zalear ticher Devachem besanv na mhunn zaitea Israelitkaranchem chintop aslem. (Ut. 30:1, 2) An’nak ani eke chodd kotthin poristhiticho fuddo korcho poddlo. Tichea ghovak Penin’nah nanvachi anik ek bail asli ani tika bhurgim aslim. Tika An’nachi nattkai asli dekhun ti “kikont korunk bogor-bogor tika sotaitali.” (1 Sam. 1:6) Hea kotthin poristhiticho fuddo korunk An’nak survatek kotthin zalem. Ti itli dukhi zatali ki ti, “roddtali ani kai jei-khainasli.” Ti kallzant ‘sogllich khontibhorit zali.’ (1 Sam. 1:7, 10) Punn, An’nak koxi buzvonn mell’lli?

5. Magnnem kelolean An’nak koxi modot zali?

⁵ Apnnank kitlem dukh zalem tem An’nan Jehovak magnneant sanglem. Magnnem kelea uprant tinnem aple poristhiti vixim Porom Iadnik Eli-k sanglem. Tannem tika sanglem: “Xantin voch ani tunvem Israelachea Deva kodde prarthun maglai tem To tuka dium.” Hacho porinnam kitem zalo? An’na “aple vattek lagli ani jevli ani tichem mukh anink kednanch khontin bhorlolem disunk na.” (1 Sam. 1:17, 18) Magnnem kelolean An’nak porot monachi xanti mell’lli.

6. Magnnea vixim An’na thaun ani Filipkarank 4:6, 7-a thaun ami koslim lisanvam xikonk zatat?

⁶ Jehova lagim ami magnnem korit ravlim zalear amkam portun monachi xanti mellonk xokta. An’na aplea sorginchea Bapa lagim zaito vell uloili. Teach toren ami amche uske, amkam dista ti bhirant, vo amchea  unnemponnam vixim ami Jehova lagim magnneant zaito vell ullounk zata. (1 Sam. 1:12) Ami magnnem kortat tednam amchim utram chuk nastana vo ekdom sobit toren asonk zai mhunn na. Amchea uskeam vixim ami Jehovak sangtana ami roddonk pasun puro. Amchim magnnim aikonk Jehova kednanch thokchona. Tea bhair, amchea somosia vixim ami Jehovak magnneant sangtat tednam ami Paulun Filipkarank 4:6, 7 (vachat) hantunt dil’lo sol’lo ugddas dovrunk zai. Khas korun ami magnnem kortat tednam, amchem magnnem dhinvaxi kallzant vo Jehovak upkar attoita toslem asonk zai mhunn Paulun sanglem. Jehovache upkar attounk amkam zaitim karonnam asat. Udharonnak, tannem amkam jivit dilam, tannem amchea pasot sobit vostu keleat, to amkam visvaxi mog dakhoita ani tannem amkam ek boro bhorvonso dila. Hem soglem dil’lea pasot ami tache upkar attounk zai. An’nachea udharonnantlean ami ani kitem xikonk zata?

7. An’na ani ticho ghov chukonastona kitem kortalim?

⁷ An’nak apli somosia asli tori astana ti Jehovachi bhokti korunk Shiloh-nt chukonastana aplea ghova sangata voitali. (1 Sam. 1:1-5) Ti thoim Devachea tombunt astana tichea magnneacho zobab Jehovan dium mhunn sangon Porom Iadnik Eli-n tika buzvonn dili.—1 Sam. 1:9, 17.

8. Mitting amkam koxi modot korunk xoktat? Somzaiat.

⁸ Ami mittingek chukonastona hajir zatat tednam amkam amchi monachi xanti porot mellonk xokta. Amchea mittingechea survatek ek bhav magnnem korta ani Jehovachi povitr xokti magta. Xanti, povitr xoktechea follacho bhag zaun asa. (Gal. 5:22) Ami chintest asta tednam pasun mittingek hajir zatat zalear, Jehova ani amchim bhav-bhoinnam amkam urba diunk xokta. Tea udexim, amkam portun monachi xanti mellonk modot zata. Magnnem ani mitting, hea mhotvachea vattamnim Jehova amkam monachi xanti dita. (Heb. 10:24, 25) An’nachea udharonnantlean ami anik koslem lisanv xikonk xokta tem polloum-ia.

9. An’nachea jivitant kitem bodlonk na, punn tika kitem modot zali?

⁹ An’nacheo somosia rokddeoch suttaveo zaunk nant. Karonn tombunt Jehovachi bhokti korun An’na porot ghora aili tednam tika Penin’nah sangata ekach ghorant ravchem poddlem ani Penin’nah-n aplo sobhav bodol’lo mhunn Bible sangona. Hacho orth, An’nak Penin’nah-chi dukhoita toslim utram ghoddiek aikonk poddttalim astolim. Punn An’nak monachi xanti portun mell’lli ani ti kednanch chintest zaunk na. Jehovan apli magnnim aikolim mhunn An’nan visvas dovorlo tednam, ti portun kednanch chintest zaunk na. Buzvonn ani monachi xanti melloun gheunk tinnem Jehovachi modot ghetli. Thoddea tempa uprant Jehovan tichem magnnem aikolem ani An’nak bhurgim zalim.—1 Sam. 1:19, 20; 2:21.

10. An’nachea udharonnantlean ami kitem xiktat?

¹⁰ Amcheo somosia suttaveo zaina zalear pasun amkam monachi xanti porot mellonk xokta. Ami kallzant thaun magnnem korun ani mittingent chukonastana hajir zalear pasun amcheo thoddeo somosia ghoddie suttaveo zauncheo nant. Punn, amkam monachi xanti diunk Jehovak kainch addaunk xokona mhunn amkam An’nachea udharonnantlean kollon ieta. Jehova amkam kednanch visorchona, ani ami taka visvaxi ravtat zalear to amcher besanv ghaltoloch.—Heb. 11:6.

11. Pauluk chintest zaunk vo uskeunk koslim karonnam aslim?

¹¹ Pauluk chintest zaunk zaitim karonnam aslim. Udharonnak, to aplea bhav-bhoinnancho mog kortalo dekhun, tancher tras ietale tednam to chintest zatalo. (2 Kor. 2:4; 11:28) To porgottnnim kortana zaite  pavtti tache virodhi taka martale ani bondkhonnint ghaltale. Tachea bhair, taka her oddchonneancho pasun fuddo korcho poddlo. Zoxe, thodde pavtti taka ‘gorjecheo vostu nasleo,’ zaka lagon taka uske zatale. (Filp. 4:12) Ani tachea jivitant unnean-unne tin pavtti tarvacher provas kortana tachem tarum futtlem. Tor taka tarvacher provas kortana kitle uske zatale tem ami chintunk zata. (2 Kor. 11:23-27) Pauluk chinta vo uskeancho fuddo korunk koxi modot zali?

12. Pauluk aple uske unne korunk koxi modot zali?

¹² Aplea bhav-bhoinnacher tras ietale tednam, Paulu chintest zatalo tem khorem. Punn tanchi somosia to apunnuch zaun suttavi korunk proitn korinaslo. Soglem apunnuch korunk xokona mhunn tannem ugddas dovorlo. Tor, sobhancho samball korunk tannem dusreancho adar ghetlo. Udharonnak, Timot ani Tita sarke patieupa sarkea dadleank tannem zaiteo zobabdareo vanttleo. Tea bhavamnim apleak dilolem kam kelem dekhun Pauluche uske unne zale mhunn kainch dubhav na.—Filp. 2:19, 20; Tit 1:1, 4, 5.

13. Vhoddilamnim Pauluchi dekh koxi gheunk zata?

¹³ Dusreanchi modot gheiat. Paulu bhaxen, aiz zaite doiall vhoddil somoxeancho fuddo kortolea sobhentlea bhav-bhoinnam vixim usketat. Punn ek vhoddil ghoddie sobhentlea soglea bhav-bhoinnank modot korunk xokona. Hem to manun gheta zalear, sobhentlea dusrea purtea aslolea bhavanchim to modot ghetolo ani aplea sangata Devachea menddranchim dekhrekh korunk to tornnattea dadleank proxikxonn ditolo.—2 Tim. 2:2.

14. Paulu kitea vixim uskeunk na, ani tachea udharonnantlean ami kitem xiktat?

¹⁴ Tumkam buzvonnechi goroz asa mhunn manun gheiat. Paulu khalto aslo dekhun, aplea ixttam thaun urbechi goroz asa mhunn tannem manun ghetlem. Aplea ixttam thaun urba melltta dekhun, dusrim apleak oskot somzotolim mhunn taka chinta zaunk na. Paulun Filemonak boroitana oxem sanglem: “Tujea mogachi khobor aikun mhaka vhodd sontos bhoglo ani ghottai mell’li.” (Fil. 7) Trasanchea vellar apleak khub urba dilolea zaitea bhavanchi nanvam Paulun sanglim. (Kol. 4:7-11) Amkam urbechi goroz asa mhunn ami khaltikaien manun ghetat tednam amkam zai aslolo to tenko amchi bhav-bhoinnam khuxalkaien ditolim.

15. Eka ekdom kotthin poristhitint astana Pauluk monachi xanti koxi mell’lli?

¹⁵ Devachea Utrancher patieun ravat. Devachea Utrantlean apnnank buzvonn  mellttoli mhunn Paulu zannam aslo. (Rom. 15:4) Koslea-i trasancho fuddo korunk tantuntlean taka zannvai pasun mellttoli mhunn taka khobor asli. (2 Tim. 3:15, 16) Pauluk dusrea pavtti Romant bondkhonnint ghatlo tednam te beginunch aplo jiv kaddttole mhunn taka dislem. Tea kotthin vellar Paulun kitem kelem? To Timotak aplea lagim kovlle gheun begin ieunk sangta. Kiteak? Te “kovlle” ghoddie Hebrev bhaxen boroilolea pustokanche thodde bhag asle. (2 Tim. 4:6, 7, 9, 13) Tor Paulu te kovlle svotacho Bible obheas korunk uzar korcho aslo. Ami Paulu bhaxen, Devachea Utracho sodanch obheas kortat zalear ami koslea-i trasancho fuddo korunk xoktat. Ani tea vellar, tantuntlim utram uzar korun Jehova amkam monachi xanti ditolo.

16. Davidan ek gombir patok kelem tednam taka koxem bhoglem?

¹⁶ Davidan ek vhodd chuk keli dekhun to chintest zalo. Tannem Batsheba sangata pordvar kelo. Tichea ghovak jivexim marunk tannem ievzonn keli ani thoddo temp aplim patkam lipounk proitn kelo. (2 Sam. 12:9) Survatek, Davidan aplem ontoskornn sangta taka kan diunk na. Hacho porinnam? Jehova sangata tachi ixttagot pidd’ddear zali ani to ekdom dukhest zalo ani duent poddlo. (St. 32:3, 4) Apnnem kel’lea gombir patkak lagon zal’lea uskeancho fuddo korunk Davidak koxi modot zali? Ani ami ek gombir patok kortat zalear amkam kitem modot korunk xokta?

17. Stotr 51:1-4-antlean Davidan khoro poschatap kelo mhunn amkam koxem kollta?

¹⁷ Bhogsonnem magat. Davidan uprant Jehova lagim magnnem kelem. Kallzant thaun poschatap korun apnnem kelolim soglim patkam tannem Jehovak sanglim. (Stotr 51:1-4 vachat.) Tednam taka monachi xanti ani khuxalkai porot mell’lli. (St. 32:1, 2, 4, 5) Tumi ek gombir patok adarlam zalear tem lipounk proitn korinakat. Bodlek kainch lipoun dovrinastana Jehovak tea vixim sangat. Tednam guneanvkari ontoskornnak lagon zata ti chinta thoddi unni zatoli. Punn Jehova lagim asloli tumchi ixttagot tumkam portun zoddunk zai zalear tumi magnnea bhair anik kitem tori korunk zai.

18. Davidak xist mell’lli tednam tannem kitem kelem?

¹⁸ Xist manun gheiat. Jehovan provadi Natanak, Davidachea patka vixim ulounk tachea lagim dhaddlo. Tea vellar, Davidan aplea patkak lagon koslench nimit diunk na vo  apnnem kelolem tem patok titlem vhoddlem naslem mhunn sangonk na. Tachea bodlek, tannem fokot Batshebachea ghova adduch nhoi punn Jehova add patok kelem mhunn rokddench manun ghetlem. Jehova thaun mell’lloli xist Davidan manun ghetli ani Jehovan taka bhogxilo. (2 Sam. 12:10-14) Ami ek gombir patok adarlam zalear Jehovan amchi dekhrekh korunk nemloleank vochun tea vixim sangonk zai. (Jak. 5:14, 15) Ami kel’lea patkak lagon ami nimit diunk nozo. Uprant amkam mell’lloli xist ami jitli begin manun gheun apnnaitolim, titlea begin amchi xanti ani khuxalkai portun melloun ghetolim.

19. Ami kitem korcho nichov korunk zai?

¹⁹ Tumi kelolim patkam portun korchimnant mhunn nichov korat. Apnnem kelolim patkam portun korina zaunk apleak Jehovachi modot zai mhunn David Raza zannam aslo. (St. 51:7, 10, 12) Jehova thaun bhogsonnem mell’llea uprant chukichem chintop ani vonddounneo pois korunk Davidan nichov kelo. Tacho porinnam, taka monachi xanti mell’lli.

20. Jehovachea bhogsonnea pasot ami upkari asat mhunn ami koxim dakhounk xoktat?

²⁰ Ami bhogsonnem magtat tednam, xist manun ghetat tednam ani ami kelolim patkam portun korina zaunk proitn kortat tednam, Jehovachea bhogsonnea pasot ami upkari asat mhunn dakhoitat. Ami him pavlam ghetat tednam amkam portun monachi xanti melltta. Hem khorem mhunn James nanvachea eka bhavachea udharonnam thaun kollon ieta.Tannem gombir patok kel’lem. To mhunntta: “Hanvem mhojim patkam vhoddilank sanglea uprant mhojea uskeancho bhar unno zalo ani portun mhaka monachi xanti mell’lli.” Tor “zanchem kalliz dukhovlam khontovlam, tanche sorxem Sorvespor asach! Zanchem mon kollvollta vollvollta, tancher Sorvespor hat oddta!” Hem zannam zalolean amkam kitli buzvonn melltta nhoi!—St. 34:18.

21. Jehova amkam monachi xanti koxi diunk xokta?

²¹ Ami nimannea disachea xevottak pavtat toxim amchim chinta anik chodd vaddttoli. Tumkam chinta zata tednam Jehovachi modot rokddich gheunk fattim soronakat. Bible-acho obheas mhenotin korat. An’na, Paulu ani Davidachi dekh gheiat. Tumkam kiteak lagon uske vo chinta zata tem zannam zaunk modot kor mhunn tumchea sorginchea Bapa lagim magat. (St. 139:23)Tumcheo somosia suttaveo korunk Jehovachi modot gheiat. Khas korun, jeo somosia tumi suttaveo korunk xokonant. Tumi oxem kortat zalear, Stotrkaran Jehovak gailem toxem tumkam-i distolem. Tannem mhunnttlem, “Mhojea kallzant huske choddtat tedna Tuji buzvonn mhojea otmeak sukh-sontos dita.”—St. 94:19.