1. Dahaka ese lalohekwarahi ia havaraia diba, bona dahaka ia vara diba?

OI BE nega ta gau ta dainai oi lalohekwarahi, * a? Reana ta ese oi dekenai ia gwauraia herevana eiava ia karaia gauna ta dainai oi lalohekwarahi. Eiava oi gwauraia herevana o oi karaia gauna ta dainai oi lalohekwarahi. Hegeregere, reana oi be kerere ta oi karaia, bona oi laloa momo Iehova ese emu dika do ia gwauatao eiava lasi. Danu, oi laloa momo dainai reana do oi laloa emu abidadama ia manoka bona oi be tau namona lasi. To, unai be momokani, a?

2. Baibel ai edena haheitalai haida amo ita diba, lalohekwarahi karana ese ia hahedinaraia lasi iseda abidadama be ia manoka?

² Baibel ai idia noho haheitalai haida mani ita herevalaia. Hana, peroveta tauna Samuela ena sinana, be abidadama goada hahinena ta. To, ena ruma bese lalonai ta ese ia kara auka henia neganai, ia lalohekwarahi bada. (1 Sam. 1:7) Aposetolo Paulo be abidadama goada tauna, to ia be ‘kongrigeisen iboudiai dainai ia lalohekwarahi.’ (2 Kor. 11:28) King Davida ena abidadama be ia goada dainai Iehova ese ia lalokau henia bada. (Kara 13:22) To, Davida be ia karaia kerere haida dainai ia lalohekwarahi bada. (Sal. 38:4) Iehova ese idia ta ta ia durua bona hagoadaia. Mani edia haheitalai amo do ita dibaia gaudia ita herevalaia.

3. Edena dala ai haida edia hereva dainai ita lalohekwarahi diba?

³ Haida ese ita idia hereva auka henia eiava idia kara auka neganai, reana do ita lalohekwarahi. Momokani, unai ia vara diba bema ita ia hahisia tauna be iseda tura namona ta eiava iseda varavara. Reana do ita lalohekwarahi badina unai ese iseda hetura karana do ia hadikaia. Nega haida, ita ia hahisia tauna be ia laloa namonamo lasi bona ia hereva dainai, reana do ita lalohisihisi bada! (Aon. 12:18) Eiava ta be reana mai ura ida ita ia hahisia herevadia do ia gwauraia. Taihu matamata ta dekenai unai bamona ia vara. Ia gwau: “Lagani haida gunanai, egu turana namona ta ese Intanet amo lau ia hahisia koikoi herevadia ia gwauraia. Egu hemami ia dika bona lau lalohekwarahi bada. Lau daradara bada badina egu turana ese lau dekenai unai bamona ia karaia.” Bema emu tura namona ta eiava varavara ta ese oi ia hahisia, Hana ena haheitalai ese oi ia durua diba.

4. Hana be dahaka hekwakwanai badadia haida ia davaria?

⁴ Hana be hekwakwanai badadia haida ia davaria. Lagani momo lalonai ia be natuna ia havaraia diba lasi. (1 Sam. 1:2) Israela taudia edia kastom be, bema hahine ta be natuna ia havaraia lasi idia laloa Dirava ese unai hahine ia hanamoa lasi. Hana be natuna ia havaraia diba lasi dainai ia hemarai bada. (Gen. 30:1, 2) Ena hekwakwanai ia habadaia gauna ta be, ena tau ena adavana ma ta Penina, be natudia ia havaraia. Penina ese Hana “ia kirikirilaia, bona iena lalona ia hisihisi.” (1 Sam. 1:6) Matamanai, Hana ia hekwarahi unai hekwakwanai ia haheaukalaia totona. Ia lalohisihisi bada dainai “ia taitai, bona aniani ia ania lasi.” Bona “ena lalona ia hisihisi bada.” (1 Sam. 1:7, 10) Hana be edena dala ai lalogoada ia abia?

5. Edena dala ai guriguri karana ese Hana ia durua?

⁵ Hana be guriguri amo Iehova dekenai ena lalohekwarahi ibounai ia gwauraia hedinarai. Bona ia guriguri murinai, ena hekwakwanai be Hahelaga Tauna Badana Eli dekenai ia herevalaia. Bena Eli ese ia hamaoroa: “Mai oiemu maino danu do oi lao, bona Israela ena Dirava ese oiemu noinoi gauna oi dekenai do ia henia.” Dahaka ia vara? Hana be “iena dala dekenai ia lao, ia aniani, bona iena lalohisihisi ia ore.” (1 Sam. 1:17, 18) Guriguri karana ese Hana ia durua lalomaino ia abia totona.

6. Guriguri karana dekenai, Hana ena haheitalai bona Filipi 4:6, 7 ena sisiba amo dahaka ita dibaia?

 ⁶ Guriguri hanaihanai karana amo lalomaino ita abia diba. Hana be nega momo guriguri amo ena guba Tamana ia hereva henia. (1 Sam. 1:12) Ita danu be Iehova dekenai iseda lalohekwarahi gaudia, iseda gari karana, bona iseda manoka gaudia ita herevalaia diba. Namo lasi guriguri namo hereana ta ita gwauraia. Nega haida reana ita lalohisihisi dainai iseda guriguri lalonai hereva maorodia do ita gwauraia lasi. To, Iehova be ia hesiku lasi iseda guriguri kamonai henia totona. Danu, ita davaria hekwakwanai dainai ita guriguri neganai, namona be Filipi 4:6, 7 ena sisiba herevana ita laloatao. (Duahia.) Paulo ia gwau namona be mai tanikiu ida ita guriguri. Ita be badina momo dainai Iehova ita tanikiu henia diba. Hegeregere, ia havaraia gaudia, iena noho hanaihanai lalokauna, bona ita dekenai ia henia helaro namona dainai, ia ita tanikiu henia. Hana ena haheitalai amo dahaka gaudia ma haida ita dibaia?

7. Hana bona ena adavana be hanaihanai dahaka idia karaia?

⁷ Herevana Hana be hekwakwanai idauidau ia davaria, to hanaihanai ena adavana ida Iehova tomadiho henia gabuna, Silo dekenai ia lao. (1 Sam. 1:1-5) Hana be dubu helaga dekenai ia noho neganai, Hahelaga Tauna Badana Eli ese ia hamaoroa Iehova ese ena guriguri do ia haerelaia bona unai ese Hana ia hagoadaia.​—⁠1 Sam. 1:9, 17.

8. Kongrigeisen heboudia dekenai ita lao ena namo be dahaka? Herevalaia.

⁸ Lalomaino ita abia diba bema hanaihanai kongrigeisen heboudia dekenai ita lao. Nega momo iseda hebou idia kehoa guriguridia lalonai Dirava ena lauma ena heduru totona idia noinoi. Maino be lauma helaga ena huahua ta. (Gal. 5:22) Ena be ita lalohekwarahi to hebou dekenai ita lao, unai ese dala ia kehoa Iehova bona iseda tadikaka taihu ese ita idia hagoadaia, bona ita idia durua lalomaino ita abia totona. Guriguri bona hebou lao henia karana be mai anina bada, badina unai dala amo Iehova ese ita ia hagoadaia. (Heb. 10:24, 25) Hana ena haheitalai amo ita dibaia gauna ma ta mani ita herevalaia.

9. Hana ena hekwakwanai be idia ore haraga lasi, to dahaka ia karaia?

⁹ Hana ena hekwakwanai be idia ore haraga lasi. Hana be dubu helaga amo ia giroa lou neganai, ia be Penina ida ruma tamona ai idia noho. Bona Baibel ia gwau lasi Penina be ena kara ia haidaua. Unai ese ia hahedinaraia, Hana be Penina ena hahisia herevadia ia do haheaukalaia noho. To, Hana be ia goada noho bona lalomaino ia abia. Danu, iena hekwakwanai ibounai be Iehova dekenai ia gwauraia dainai, ia lalohekwarahi lou lasi. Ia be Iehova dekenai ia tabekau. Gabeai, Hana be natuna ta ia havaraia!​—⁠1 Sam. 1:19, 20; 2:21.

10. Hana ena haheitalai amo dahaka ita dibaia?

¹⁰ Lalomaino ita abia diba ena be iseda hekwakwanai idia ore lasi. Ena be hanaihanai ita guriguri bona hebou ita lao henia, to iseda hekwakwanai haida be idia ore lasi. Hana ena haheitalai amo ita diba, gau ta ese Iehova do ia koua diba lasi ita ia hagoadaia totona. Iehova be ita do ia laloaboio diba lasi, bona kahirakahira iseda abidadama karana dainai ita do ia hanamoa.​—⁠Heb. 11:6.

11. Dahaka badina haida dainai Paulo ia lalohekwarahi diba?

¹¹ Paulo be badina haida dainai ia lalohekwarahi. Hegeregere, ena tadikaka taihu ia lalokau henidia bada dainai, idia davaria hekwakwanai ese ena lalona idia hahisia.  (2 Kor. 2:4; 11:28) Paulo be haroro gaukara ia karaia neganai, ena inai taudia ese idia botaia bona dibura ruma ai idia atoa. Danu hekwakwanai ma haida ia haheaukalaia, hegeregere ia dekenai “gau momo idia noho lasi.” (Fili. 4:12) Bona bouti amo ia loaloa neganai, nega toi davara dekenai bouti ia dika, unai negai reana ia lalohekwarahi bada. (2 Kor. 11:23-27) Edena dala ai Paulo ese ena lalohekwarahi karana ia haheaukalaia?

12. Dahaka ese Paulo ena lalohekwarahi ia hamaragia?

¹² Paulo be ena tadikaka taihu ese idia davaria hekwakwanai dainai ia lalohisihisi, to ia sibona ese edia hekwakwanai ibounai ia hamaoromaoroa lasi. Paulo be ia manau, bona ma haida ia noia kongrigeisen taudia idia durua totona. Hegeregere, ia ese Timoteo bona Tito dekenai gaukara ia henia. Unai tadikaka ese idia karaia gaukara ese Paulo ena lalohekwarahi ia hamaragia.​—⁠Fili. 2:19, 20; Tito 1:1, 4, 5.

13. Edena dala ai elda taudia ese Paulo idia tohotohoa diba?

¹³ Ma haida oi noia oi idia durua totona. Paulo bamona, hari elda taudia momo be mai ura ida kongrigeisen lalonai hekwakwanai idia davaria taudia idia durua. To, elda tamona be ia hegeregere lasi kongrigeisen taudia ia durua totona. Manau karana ese elda tauna do ia durua tadikaka ma haida dekenai gaukara ia henia, bona tadikaka matamata dekenai treinini ia henia Dirava ena mamoe oreana idia naria totona.​—⁠2 Tim. 2:2.

14. Paulo be dahaka ia laloa lasi, bona iena haheitalai amo dahaka ita dibaia?

¹⁴ Ma haida amo hagoadaia herevadia oi abia. Paulo be ia manau, unai dainai ena turadia amo hagoadaia herevadia ia abia. Danu, ia be ena turadia amo heduru ia abia dainai, ma haida do idia laloa ia be ia manoka, to unai ia laloa lasi. Paulo be Filemona ia tore henia neganai, ia gwau: “Emu lalokau ena sivarai lau kamonai dainai lau moale bada bona goada lau abia.” (File. 7) Paulo ia lalohekwarahi neganai, ia ida idia gaukara hebou bona idia hagoadaia taudia ma haida ia gwauraia danu. (Kol. 4:7-11) Bema mai manau ida ita hahedinaraia ita ura hagoadaia herevadia ita abia, iseda tadikaka taihu be mai moale ida ita do idia durua.

15. Paulo be hekwakwanai ia davaria neganai, dahaka ese ia hagoadaia?

¹⁵ Dirava ena Hereva dekenai ita tabekau. Paulo ia diba Baibel ena hereva ese ia do idia  hagoadaia. (Roma 15:4) Danu, ia do ia durua mai aonega ida hekwakwanai idauidau ia hanaia totona. (2 Tim. 3:15, 16) Paulo be nega iharuana Roma ai idia hadiburaia neganai, ia mamia ia be kahirakahira do ia mase. Unai hekwakwanai negana ai, Paulo be dahaka ia karaia? Ia be Timoteo ia noia ia dekenai do ia lao haraga bona “lokua toretore” ia abia lao. (2 Tim. 4:6, 7, 9, 13) Dahaka dainai? Badina unai lokua toretore be reana Heberu Revarevadia edia kahana haida, bona Paulo be sibona ena Baibel stadi lalonai unai buka ia duahia diba. Paulo bamona, bema hanaihanai Dirava ena Hereva ita stadilaia, Iehova ese Baibel amo ita do ia hagoadaia, herevana dahaka hekwakwanai ita davaria.

16. Davida be dahaka ia karaia dainai ia lalohisihisi?

¹⁶ Davida be ia karaia kara dika badana ta dainai ia lalohisihisi. Ia be Bataseba ida ia heudahanai, Uria ena mase dalana ia karaia, bona ia ura ena kerere ia hunia. (2 Sam. 12:9) Matamanai, Davida be ia karaia karana ia laloa bada lasi. Unai dainai, iena hetura karana Dirava ida ia hadikaia, bona ia lalohekwarahi bada. (Sal. 32:3, 4) Dahaka ese Davida ia durua ena kara dika dainai ia abia lalohisihisi ia haheaukalaia totona, bona dahaka ese ita ia durua diba, bema kerere badana ta ita karaia?

17. Edena dala ai Salamo 51:1-4 ese Davida ena helalo-kerehai momokani karana ia hahedinaraia?

¹⁷ Dika gwauatao totona oi guriguri. Davida be Iehova dekenai ia guriguri. Mai kudouna ibounai ida ia helalo-kerehai, bona ena kara dika ia gwauraia hedinarai. (Salamo 51:1-4 duahia.) Unai bamona ia karaia dainai ia moale! (Sal. 32:1, 2, 4, 5) Bema kara dika badana ta oi karaia, namo lasi emu dika oi hunia. To, mai momokani ida guriguri amo Iehova dekenai emu dika oi gwauraia hedinarai. Unai bamona oi karaia neganai, do oi lalohekwarahi momo lasi. Bema oi ura emu hetura karana Iehova ida oi hanamoa lou, oi guriguri sibona lasi, to gau ma haida oi karaia danu be namo.

18. Davida be sisiba ia abia neganai dahaka ia karaia?

¹⁸ Sisiba oi abia dae. Iehova ese peroveta tauna Natana be Davida dekenai ia siaia neganai, Davida be ekskius herevadia ia gwauraia lasi eiava ena kara dika ia hunia lasi. Ia be maoromaoro ia gwau, Bataseba ena adavana sibona dekenai ia kara dika lasi, to Iehova dekenai  ia kara dika danu. Davida be Iehova amo ia mai sisiba ia abia dae, bona Iehova ese ena dika ia gwauatao. (2 Sam. 12:10-14) Bema ita be kara dika badana ta ita karaia, namona be Iehova ese ia abia hidi taudia ita hereva henia, ita idia durua totona. (Iam. 5:14, 15) Bona iseda kara dika ita hunia lasi be namo. Ita abia sisiba ita abia dae bona ita badinaia haraga neganai, lalomaino do ita abia bona do ita moale.

19. Iseda lalona ita hadaia dahaka ita karaia totona?

¹⁹ Namona be iseda lalona ita hadaia ita kara dika lou lasi totona. King Davida ia diba ia kara dika lou lasi totona, Iehova ena heduru ia abia be namo. (Sal. 51:7, 10, 12) Iehova ese ena dika ia gwauatao murinai, Davida be ena lalona ia hadaia lalohadai dikadia do ia dadaraia. Unai bamona ia karaia dainai, lalomaino ia abia.

20. Iehova ese iseda dika ia gwauatao totona dahaka ita karaia be namo?

²⁰ Iehova ese iseda dika ia gwauatao totona ia dekenai ita guriguri, sisiba ita abia dae, bona iseda lalona ita hadaia ita kara dika lou lasi totona. Unai dala ta ta ita badinaia neganai, lalomaino do ita abia. Kara dika badana ia karaia tadikaka ta, James ese unai ia hamomokania. Ia gwau: “Elda taudia dekenai egu kara dika lau gwauraia hedinarai neganai, lau mamia gau metauna ta be egu pagana amo idia kokia bamona. Lalomamina namona lau abia matamaia.” Momokani “[Iehova] be lalohisihisi taudia kahirakahira ia noho, bona ia ese edia lalona ia ore taudia ia hamauria noho,” unai ita dibaia neganai goada ita abia!​—⁠Sal. 34:18.

21. Edena dala ai Iehova ese ita ia hagoadaia diba?

²¹ Nega ena dokona be ia kahirakahira noho lalonai, lalohekwarahi idia havaraia gaudia be do idia bada idia lao. Bema gau haida dainai oi lalohekwarahi noho, karaharaga Iehova ena heduru oi tahua be namo. Baibel oi stadilaia namonamo. Bona Hana, Paulo, bona Davida edia haheitalai amo diba oi abia be namo. Guriguri amo emu guba Tamana oi noia, oi ia durua oi lalohekwarahilaia gaudia edia badina oi diba totona. (Sal. 139:23) Emu lalohekwarahi gaudia be ia dekenai oi gwauraia, hegeregere oi hamaoromaoroa diba lasi gaudia danu. Unai bamona oi karaia neganai, salamo torea tauna ese Iehova dekenai ia abia ane bamona, do oi gwau: “Lau lalohekwarahi bada neganai, oi ese lau oi hagoadaia bona egu lalona oi hanamoa.”​—⁠Sal. 94:19, NWT.