1. Nama utai ke ngasuh kitai irau, lalu baka ni nya ulih ngachau kitai?

KALA nuan irau * pasal sekeda utai? Nuan engka irau ketegal nuan udah dikemediska orang ngena jaku tauka ulah. Tauka nuan engka irau pasal utai ke udah disebut tauka digaga nuan. Ambika chunto, nuan engka udah ngaga penyalah, lalu irau enggaika Jehovah enda ngampunka nuan. Ketegal kelalu balat irau, nuan tentu ngumbai nya amat nyentukka nuan nyau ngumbai diri jai lalu enda arapka Jehovah. Kati nya amat?

2. Nama chunto ari Bup Kudus ke nunjukka lebuh napi asai ati ti irau ukai reti nya pengarap kitai ngagai Jehovah lemi?

² Peratika sekeda chunto ari Bup Kudus. Indai nabi Samuel ke benama Hanah, ngembuan pengarap ti besai ngagai Jehovah. Tang, iya napi asai ati ti irau lebuh seiku ari sida sebilik jai enggau iya. (1 Sam. 1:7) Pengarap rasul Paul ngagai Jehovah amat tegap. Tang iya irauka utai ke nyadi ba semua eklisia. (2 Kor. 11:28) Raja David mega ngembuan pengarap ti chukup tegap ngagai Jehovah, lalu Jehovah sayau amat ke iya. (SKR. 13:22) Taja pia, David ngaga penyalah ke ngasuh iya berasai balat tusah ati sereta irau. (Mas. 38:4) Jehovah  ngelantangka ati tiap iku sida nya. Aram beratika utai ke ulih dipelajarka kitai ari sida tiga.

3. Nama engka nyadi enti sema orang bisi nyebut utai ti enda manah bekaul enggau kitai?

³ Lebuh orang bejaku kasar tauka jai enggau kitai, kitai engka berasai irau. Kelebih agi enti orang ke ngemediska ati kitai nya bakih rapat tauka kaban belayan kitai. Kitai engka irauka diri enda ulih bebakih baru enggau orang nya. Kadang-kadang, orang enda sengaja nyebut utai ke enda manah ngagai kitai, tang utai ke disebut sida balat ngemediska ati kitai. (J-lam. 12:18) Tauka orang engka sengaja nyebut utai ti ngemediska ati kitai. Seiku menyadi Kristian indu ke biak napi penanggul tu. Ku iya madah: “Beberapa taun suba, orang ke dikumbai aku bakih ti rapat betenahka aku ba internet. Ati aku balat pedis sereta irau. Aku enda nemu nama kebuah iya deka ngemediska aku baka nya.” Enti nuan kala dikemediska bakih ti rapat tauka kaban belayan, nuan ulih belajar ari Hanah.

4. Nama penanggul ti berat ke ditapi Hanah?

⁴ Hanah napi sekeda penanggul ti berat. Betaun-taun iya enda ulih beranak. (1 Sam. 1:2) Maya jeman orang Israel kelia, indu ke enda ulih beranak dikumbai enda diberekat Petara. Nya ke ngasuh Hanah berasai malu. (P-kal. 30:1, 2) Siti agi utai ke ngasuh pengidup Hanah balat tusah iya nya, Peninah, ulih beranak. Peninah nya bini kedua laki iya. Peninah mega kepapaska Hanah lalu iya “selalu ngeleseka Hanah ngambika iya ringat.” (1 Sam. 1:6) Terubah-rubah, Hanah balat tusah ati enggau utai ke nyadi ba iya nyentukka iya “nyau nyabak, lalu enggai makai.” Ati iya “balat amat tusah.” (1 Sam. 1:7, 10) Baka ni Hanah bulih pengelantang?

5. Baka ni sampi ulih nulung Hanah?

⁵ Hanah mantaika semua asai ati iya ngagai Jehovah nengah sampi. Pengudah besampi, iya nerangka utai ke ditapi iya ngagai Imam Besai, Eli. Eli madah ngagai Hanah: ‘Mupuk meh nuan enggau selamat. Awakka Petara ke  disembah orang Israel meri ngagai nuan utai ti dipinta nuan.’ Nama asil iya? Hanah lalu “mupuk, makai mimit, lalu mua iya enda agi tusah.” (1 Sam. 1:17, 18) Sampi nulung Hanah berasai lantang.

6. Nama ulih dipelajarka kitai ari Hanah sereta ari Pilipi 4:6, 7 pasal sampi?

⁶ Kitai tau bulih pengelantang enti kitai suah besampi ngagai Jehovah. Hanah lama berandau enggau Jehovah nengah sampi. (1 Sam. 1:12) Kitai mega ulih lama berandau enggau Jehovah pasal pengelemi diri, utai ti ngasuh kitai irau sereta takut. Kitai enda ibuh nyebut semua utai ke diasaika kitai ngena leka jaku ti dalam reti. Kadang-kadang kitai nyabak lebuh madah ngagai Jehovah pasal asai ati kitai ti balat tusah. Taja pia, Jehovah nadai kala lelak ninga sampi kitai. Kelimpah ari bejaku pasal penanggul diri, kitai mega patut ingatka jaku lalau ba Pilipi 4:6, 7. (Bacha.) Paul enggau nyemetak madahka kitai patut nyebut sampi terima kasih ngagai Jehovah. Kitai bisi mayuh kebuah beterima kasih ngagai Iya. Ambika chunto, kitai beterima kasih ke utai ti ditempa Iya, pengidup ti diberi Iya ngagai kitai, pengerindu Iya ti meruan sereta pengadang ke deka diberi Iya ngagai kitai jemah ila. Nama utai bukai ke ulih dipelajarka kitai ari Hanah?

7. Nama utai ke suah digaga Hanah enggau laki iya?

⁷ Taja pan Hanah napi penanggul, iya suah enggau laki iya nyembah Jehovah ba Siloh. (1 Sam. 1:1-5) Lebuh Hanah ba langkau sembiang, Imam Besai Eli madahka iya ngarapka Jehovah nyaut sampi Hanah lalu tu ngelantang ati Hanah.—1 Sam. 1:9, 17.

8. Baka ni pengawa datai begempuru ulih nulung kitai? Terangka.

⁸ Kitai tau bulih pengelantang enti kitai seruran datai begempuru. Ba pun gempuru kitai, menyadi lelaki ke besampi bisi minta roh kudus Petara ngambika enggau kitai. Pemaik nya siti ari buah roh kudus. (Gal. 5:22) Enti kitai datai begempuru taja pan ati kitai tusah tauka irau, Jehovah enggau bala menyadi ulih meransang kitai ngambika berasai lantang baru. Sampi sereta pengawa datai begempuru nya chara Jehovah ngelantangka kitai. (Heb. 10:24, 25) Aram kitai belajarka siti agi utai ari Hanah.

9. Nama utai ke agi ditapi Hanah, lalu nama nulung iya ulih napi utai nya?

⁹ Penanggul ke ditapi Hanah enda dibuai tekala nya. Iya agi diau serumah enggau Peninah. Lalu Bup Kudus nadai madahka Peninah berubah. Ketegal nya, Hanah agi natka diri ninga jaku Peninah ti ngemediska ati. Tang runding enggau ati Hanah udah lantang baru, lalu iya ngetanka pengelantang nya. Lebuh Hanah arapka Jehovah ninga sampi iya, iya enda irau agi. Iya ngelakka Jehovah ngelantangka ati iya. Enda lama udah nya, Jehovah ninga sampi Hanah, lalu iya mega bisi anak!—1 Sam. 1:19, 20; 2:21.

10. Nama ulih dipelajarka kitai ari Hanah?

¹⁰ Kitai tau bulih pengelantang taja pan agi napi penanggul ke ngirauka ati. Taja pan kitai bebendar besampi sereta suah datai begempuru, penanggul nya agi bisi. Tang ari Hanah kitai belajar, nadai utai ke ulih nagang Jehovah ari ngelantangka ati kitai. Jehovah seruran ingatka kitai, lalu Iya tentu deka merekatka penetap ati kitai ngagai Iya.—Heb. 11:6.

11. Nama utai ke ngasuh Paul irau?

¹¹ Mayuh utai ke ngasuh Paul irau. Ambika chunto, ketegal iya rinduka bala menyadi, penanggul ke ditapi sida ngasuh iya balat irau.  (2 Kor. 2:4; 11:28) Lebuh Paul nginjil, orang ke nyakal iya suah malu lalu ngejil iya. Iya mega napi penusah baka penyuntuk. (Plp. 4:12) Lalu ketegal kala ditabanka kapal karam tiga kali, iya tentu berasai irau lebuh deka nepan kapal. (2 Kor. 11:23-27) Baka ni Paul mutarka asai ati iya ti irau?

12. Nama nulung Paul enda kelalu irau?

¹² Paul irauka bala menyadi Kristian iya lebuh sida napi penanggul. Tang iya enda nguji mutarka semua penanggul sida. Paul nemu iya enda ulih ngereja semua nya kediri. Ketegal nya, iya ngasuh menyadi bukai nulung sida ke napi penanggul. Ambika chunto, iya meri mayuh tanggung pengawa ngagai Timoti seduai Titus. Pengawa ke digaga seduai iya tentu ngasuh Paul enda kelalu irau.—Plp. 2:19, 20; Tit. 1:1, 4, 5.

13. Baka ni tuai gempuru ulih neladan Paul?

¹³ Minta saup ari orang bukai. Baka Paul, mayuh tuai gempuru kemayaharitu irau pasal bala menyadi Kristian ke napi penusah. Tang seiku aja tuai gempuru enda ulih mutarka semua penusah ke ditapi bala menyadi. Enti iya ngasaika diri enda ulih ngereja nya kediri, iya tau minta saup ari tuai gempuru bukai ngambika ulih nulung sida ke begunaka bantu. Iya mega tau ngelatih bala menyadi lelaki ke biak ngambika sida ulih nyaup dudi hari.—2 Tim. 2:2.

14. Nama utai ke enda ngirauka ati Paul, lalu nama ulih dipelajarka kitai ari iya?

¹⁴ Nemu diri begunaka pengelantang. Paul nya orang ti baruh ati. Iya nemu diri begunaka jaku peransang ari bala bakih iya. Iya enda irau enti bisi orang ngumbai iya lemi laban iya nemu diri deka diperansang bala bakih. Paul nulis ngagai Pilimon: “Pengerindu nuan udah ngasuh ati aku balat gaga.” (Plm. 7) Paul mega bisi nyebut nama sida ke udah meransang iya lebuh iya napi penusah. (Kol. 4:7-11) Enti kitai baruh ati lalu nemu diri begunaka jaku peransang, bala menyadi tentu deka nyaup kitai.

15. Nama digaga Paul lebuh napi penusah ti berat?

¹⁵ Belajarka Bup Kudus. Paul nemu jaku Petara ulih ngelantangka ati iya. (Rom. 15:4) Jaku Petara ulih meri iya penemu-dalam kena napi sebarang penusah. (2 Tim. 3:15, 16) Lebuh dijil ba Rome kedua kali, iya  nemu enda lama agi iya deka diukum bunuh. Nama digaga Paul lebuh napi penusah ti berat tu? Iya ngasuh Timoti mai gulung surat ke iya. (2 Tim. 4:6, 7, 9, 13) Nama kebuah? Laban gulung surat tu engka sekeda ari Bup Kudus jaku Hebrew ke dikena Paul belajar. Lebuh kitai neladan Paul maya belajarka Bup Kudus, Jehovah ulih ngena ayat Bup Kudus ngelantangka ati kitai indah lebuh kitai napi penusah ti berat.

16. Baka ni asai ati David pengudah iya ngereja penyalah ti besai?

¹⁶ David udah ngereja penyalah ti besai. Iya butang enggau Batseba, ngatur pelan kena munuh laki Batseba, lalu nguji deka ngelalaika penyalah diri. (2 Sam. 12:9) Keterubah, David enda ibuhka asai ati iya ti besalah. Ketegal nya, kaul iya enggau Jehovah rusak, lalu tu mega ngasuh iya balat tusah ati nyentukka nya ngasuh iya sakit. (Mas. 32:3, 4) Nama nulung David mutarka asai ati iya ti irau ketegal penyalah ke digaga iya? Lalu nama ulih nulung kitai enti sema kitai bisi ngereja penyalah ti besai?

17. Ari Masmur 51:1-4, baka ni kitai nemu David amat nesal ati ke penyalah ti udah digaga iya?

¹⁷ Besampi lalu minta Jehovah ngampunka penyalah. Pengujung iya, David besampi ngagai Jehovah. Iya balat nesal ati enggau utai ke udah digaga iya. Iya madahka semua penyalah iya ngagai Jehovah. (Bacha Masmur 51:1-4.) Udah nya, ati iya lantang baru sereta gaga. (Mas. 32:1, 2, 4, 5) Enti sema nuan bisi ngereja penyalah ti besai, anang nguji ngelalaika iya. Tang besampi meh ngagai Jehovah lalu padahka semua penyalah nuan ngagai Iya. Pengudah nya, ati nuan deka berasai lantang agi. Nuan pan enda kelalu berasai besalah agi. Tang enti nuan deka ngaduka baru kaul nuan enggau Jehovah, besampi aja enda chukup. Nuan patut ngereja utai bukai.

18. Nama digaga David lebuh Jehovah disiplin iya?

¹⁸ Nerima disiplin. Lebuh Jehovah nganjung nabi Natan bejaku pasal penyalah David, David enda nguji ngetanka diri. Iya jampat ngaku penyalah diri. Iya ukai semina  besalah ngagai laki Batseba, tang kelebih agi ngagai Jehovah. David nerima disiplin ari Jehovah, lalu Jehovah ngampunka iya. (2 Sam. 12:10-14) Enti sema kitai bisi ngereja penyalah ti besai, kitai patut bejaku enggau orang ke udah dipilih Jehovah ngiring kitai ba eklisia. (Jas. 5:14, 15) Lalu kitai enda patut nguji ngetanka diri. Jampat agi kitai nerima sereta nitihka jaku lalau ke diberi, jampat agi kitai deka bulih pengelantang sereta pengaga ba ati.

19. Nama utai ke keran deka digaga kitai?

¹⁹ Keran nyeliah ari ngereja penyalah ti sama. Raja David nemu, iya begunaka saup ari Jehovah enti iya deka nyeliah ari ngereja penyalah ti sama. (Mas. 51:7, 10, 12) Pengudah Jehovah ngampunka iya, iya keran deka nyeliah ari ngembuan runding tauka pengingin ti salah. Ketegal nya, iya bulih pengelantang ba ati baru.

20. Baka ni kitai nunjukka diri beterima kasih ke pengampun ari Jehovah?

²⁰ Kitai nunjukka diri beterima kasih ke pengampun ari Jehovah enti kitai besampika nya, nerima disiplin ari Iya sereta keran nyeliah ari ngereja penyalah ti sama. Enggau tu, kitai tentu deka bulih pengelantang ba runding sereta ati. Seiku menyadi Kristian lelaki ke benama James ke udah ngereja penyalah ti besai ngasaika tu amat. Ku iya madahka: “Lebuh aku ngaku penyalah diri ngagai bala tuai gempuru, aku ngasaika utai ti amat berat udah diangkatka ari bau aku. Runding aku nyau lantang agi.” Kitai berasai diperansang lebuh nemu ‘Jehovah diau semak orang ke tusah ati lalu ngidupka sida ke nadai agi pengadang’!—Mas. 34:18.

21. Baka ni kitai ulih ngawakka Jehovah ngelantangka ati kitai?

²¹ Ketegal pengujung majak semak, kitai deka napi mayuh agi utai ke ngasuh kitai irau. Lebuh kitai irau, anang laun minta saup ari Jehovah nengah sampi. Bagas agi belajarka Bup Kudus. Belajar meh ari Hanah, Paul enggau David. Minta Jehovah nulung nuan nemu kebuah nuan berasai irau. (Mas. 139:23) Awakka Iya nulung nuan, kelebih agi enti penanggul nuan nya enda ulih diseliahka. Enti nuan ngereja nya, nuan baka pemasmur ke belagu ngagai Jehovah: “Lebuh ati aku mayuh pengirau, Nuan merindang aku, lalu ngasuh ati aku gaga.”—Mas. 94:19.