1. Vyuma muka vinahase kulingisa mutu ahombe chipwe kulizakamina, kaha nahase kushinganyeka ika?

KUTALA walizakaminaho lyehi chipwe kuhomba tahi? * Pamo weji kuhombanga kachi nge mukwenu nakwambe chipwe kukulinga mwamupi. Unahase nawa kulizakamina kachi nge ove yove unahanjika chipwe kulinga chuma chachipi. Chakutalilaho, pamo unalimbenje, kaha unalizakamina ngwove pamo Yehova keshi kukukonekelako. Pamo unahase kulizakamina chikumanyi nge mushinganyeka ngwove kulizakamina chipwe kuhomba chili nakusolola nge kaweshi nalufweleloko. Uno vishinganyeka kana vyakwoloka tahi?

2. Vyakutalilaho muka vyamuMbimbiliya vize vyasolola nge kulizakamina kachalumbununa nge mutu keshi nalufweleloko?

² Tuchitalenu vyakutalilaho vimwe vyamuMbimbiliya. Hana naye yakapolofweto Samwele apwile pwevo walufwelelo. Chipwe ngocho alizakaminyinenga, mwomwo vamutolekelenga kuli muhalika wenyi. (Samwe. 1, 1:7) Kaposetolo Paulu apwilenga nalufwelelo lwakukola, oloze ‘alizakaminyine havikungulwilo vyosena.’ (Koli. 2, 11:28) Mwangana Ndavichi nawa apwile nalufwelelo lwakukola, kaha vamuzangile chikuma kuli Yehova. (Vili. 13:22) Chipwe ngocho, Ndavichi alingile vyuma vyavipi, kahechi chamuhombeselenga chikuma. (Samu 38:4) Tushimutwilenu havishina natulinangula kuli vatu kana.

3. Mwomwo ika hanjikiso yavakwetu yinahase kutuhombesa?

³ Kachi nge vakwetu navatwamba chipwe kutulinga mwamupi, tunahase kuhomba, chikumanyi nge sepa lyetu chipwe kausoko ketu ikiye mwalinga chuma kana. Tunahase kushinganyeka ngwetu usepa wetu chipwe usoko wetu unafu. Lwola lumwe mutu nahase kulusuka kuhanjika, ngocho natwivwa kwijiva nge natutuwu poko yamukwale. (Vishi. 12:18) Shimbu jimwe mutu nahase kuhanjika mazu amapi mangana evwise mukwavo kupihya kumuchima. Ndumbwetu umwe wapwevo wakanyike ambile ngwenyi: “Sepa lyami aputukile kutandakanyisa mijimbu yamakuli hali ami haInternet. Ngocho ngwalinyengele chikuma mwomwo katelele kulinga chuma kanako hakupwa ngusepa lyenyi.” Kachi nge sepa lyove chipwe kausoko nakulingi mwamupi, kaha chakutalilaho chaHana nachikukafwa uunde muchima.

4. Ukalu muka amwenenga Hana?

⁴ Hana amwenenga ukalu wauvulu. Atwamine myaka yayivulu chakuzeneka kupwa namwana. (Samwe. 1, 1:2) Muchisemwa chavaIsalele, nge pwevo mwapwa mumba kaha vashinganyekele ngwavo apwile wakwangula kuli Kalunga. Echi chevwishile Hana sonyi. (Kupu. 30:1, 2) Ukalu kana watohwele chikumanyi mwomwo muhalika wenyi Penyina apwile navana, kaha nawa “amutolekelenga chikuma mangana amwivwise kumuchima kupihya.” (Samwe. 1, 1:6) Hakavanga, Hana ahombelenga chikuma. Evwilenga kupihya chikuma, “kaha alililenga nakulitwamina kulya.” Hana “alyonyingile chikuma mumuchima.” (Samwe. 1, 1:7, 10) Uno vyuma muka vyamuvendejekele?

5. Uno kulomba chakafwile ngachilihi Hana?

⁵ Hana alombele namuchima wenyi wosena kuli Yehova. Kufumaho, alwezele Kapilishitu Wakulitulaho Eli ukalu wenyi. Kaha Eli amulwezele ngwenyi: “Yakonga mukuunda. Kalunga kaIsalele akuhane vyuma unamulombo.” Uno vyuma muka vyafuminemo? Hana “akatukile nakuya, akalile vyakulya, kaha kahombele chekako.” (Samwe. 1, 1:17, 18) Shikaho, kulomba chakafwile Hana aunde muchima.

6. Vyuma muka natulinangula kuli Hana nakuchisoneka chaWavaka-Fwilipi 4:6, 7 kupandama kukulomba?

⁶ Tunahase kuunda muchima nge natulombanga naluzema. Hana alombele kuli Ise  wamwilu halwola lwalusuku. (Samwe. 1, 1:12) Shikaho nayetu tunahase kulinga mwomumwe hakulweza Yehova vyuma vize tunalizakamina, chipwe kwivwa woma, chipwe vize tunalimbenje. Katwatela kushinganyeka ngwetu kuvanga tulombe mujila yakusungamako. Lwola lumwe tunahase vene nakulila hakulweza Yehova omwo tuli nakwivwa, oloze Yehova mwatwalaho lika kwivwilila kukulomba chetu. Kaha nawa omu natulomba nakulweza Yehova ukalu wetu, twatela kwanuka mazu atwama hali Wavaka-Fwilipi 4:6, 7. (Tangenu.) Paulu avulukile hatoma ngwenyi twatela nawa kulombanga kuli Kalunga mangana tumusakwilile havyuma atulingila. Yehova atulingila vyuma vyavivulu chikuma vize vyatela kutulingisa tumusakwililenga. Chakutalilaho, tunahase kumusakwilila hakuyoya chize atuhana, nahavyuma vyamwaza atenga, nahazangi yenyi yakwilila, nahavyuma vyamwaza atushika. Vyuma vyeka muka tunahase kulinangula kuli Hana?

7. Hana nalunga lyenyi valingilenga ika?

⁷ Hana ayilenga nalunga lyenyi kuShilo nakulemesa Yehova chamokomoko naukalu apwilenga nawo. (Samwe. 1, 1:1-5) Halwola apwile Hana hatavanaku hakiko Kapilishitu Wakulitulaho Eli amukolezezele nakumufwelelesa ngwenyi, Yehova mwakumbulula kulomba chenyi.—Samwe. 1, 1:9, 17.

8. Uno kupwanga kukukunguluka chinahase kutukafwa ngachilihi? Lumbununenu.

⁸ Tunahase kuunda muchima nge natukungulukanga. Kakavulu, vandumbwetu vaze veji kulombanga hakuputuka kukunguluka, veji kulombanga Kalunga atuhane shipilitu yajila. Kaha muhako umwe washipilitu kana shina kuunda. (Ngale. 5:22) Kachi nge natupwanga kukukunguluka chamokomoko naukalu tuli nawo, kaha Yehova navandumbwetu navatukolezeza nakutukafwa tuunde muchima. Shikaho, nge natulombanga nakupwanga kukukunguluka, kaha Yehova mwaunjisa michima yetu. (Hepe. 10:24, 25) Talenu cheka chishina chikwavo tunahase kulinangula kuli Hana.

9. Chuma muka chize kachakumine washi mukuyoya chaHana, oloze ikiye alingile ika?

⁹ Ukalu amwene Hana kawakumine hahaze veneko. Omu Hana akindulukile kuzuvo kufuma kutavanaku, atwalileho lika kutwama hamwe naPenyina. Kaha nawa Mbimbiliya kayasolola ngwayo Penyina alitwaminyine kutoleka Hanako. Shikaho Hana pamo atwalileho lika kumona ukalu kuli muhalika wenyi. Oloze Hana kahombelenga chekako. Anukenu ngwenu omu Hana ambilile kulizakamina chenyi hali Yehova, hakiko jino aunjile muchima. Apendaminyine hali Yehova amuvendejeke nakumuunjisa muchima. Kutwala muze, Yehova akiswile Hana hakumuhana vana.—Samwe. 1, 1:19, 20; 2:21.

10. Vyuma muka tunalinangula kuvyuma ahichilemo Hana?

¹⁰ Tunahase kuunda muchima numba tuhu chuma chize chili nakuneha ukalu kuchichili. Numba tuhu natulomba namuchima wetu wosena nakuyanga kukukunguluka, oloze ukalu umwe kaweshi kukumako. Chipwe ngocho, vyuma ahichilemo Hana vinatunangula nge Yehova mwatwalaho lika kuunjisa michima yetu. Yehova keshi kukatuvulyamako, kaha nawa mwakatukisula.—Hepe. 11:6.

11. Vyuma muka vyalingishilenga Paulu alizakamine?

¹¹ Kwapwile vyuma vyavivulu vize vyalingishilenga kaposetolo Paulu alizakamine. Chakutalilaho, kuzanga chikuma vandumbwenyi chamulingishile alizakamine hakumona ukalu  vapwile nakuhitamo. (Koli. 2, 2:4; 11:28) Kahomu nawa azachilenga mulimo wenyi wauposetolo, vamuvetelenga kuli vaka-kole nakumukasa mukamenga. Ukalu ukwavo wamulingishilenga alizakamine shina kupwa “navyuma vyavindende.” (Fwili. 4:12) Kaha nawa hakuwana nge avombele kafwe mapapa katatu, ngocho pamo alizakaminyinenga omu atambukilenga maungeji mumato. (Koli. 2, 11:23-27) Vyuma muka vyakafwilenga Paulu omu alizakaminyinenga nakuhomba?

12. Chuma muka chakafwile Paulu ahone kulizakamina chikuma?

¹² Numba tuhu Paulu alizakaminyinenga chikuma hakumonomu vandumbwenyi vahichilenga muukalu, oloze kahashilenga kukumisa ukalu kana ukawenyiko. Apwile lunga wakulinyisa. Alwezelenga vandumbwenyi vamwe vazakame vikungulwilo. Chakutalilaho, ahanyine mulimo kuli malunga vakushishika vakufwana nge Chimoteu naChituse. Mulimo vazachile ava vandumbwetu walingishilenga Paulu akeheseko kulizakamina.—Fwili. 2:19, 20; Chitu. 1:1, 4, 5.

13. Uno vakulwane muchikungulwilo vanahase kulondezeza ngachilihi Paulu?

¹³ Hanangako vakwenu milimo vakukafwe. Ngana muze chapwile kuli Paulu, vakulwane vavavulu muvikungulwilo veji kulizakaminanga chikuma hakumona vandumbwavo vali nakuhita muvyeseko. Oloze mukulwane chinahase kumukaluhwila kuzakama vatu vosena muchikungulwilo. Kulinyisa nachimulingisa ahaneko vakwavo vakulwane milimo nakunangula nawa vakweze vamalunga vamukafwe kulama kanawa mikoko jaKalunga.—Chimo. 2, 2:2.

14. Chuma muka chize kashinganyekele Pauluko, kaha natulinangulako ika?

¹⁴ Lweza vakwenu vakuvendejeke. Paulu apwile wakulinyisa, ngocho ejivile ngwenyi asakiwile kumuvendejeka kuli vandumbwenyi, ngocho vamuvendejekele. Kashinganyekele ngwenyi vatu navamumona kupwa wakuhehela, kachi nge mwetavila ngwenyi vamuvendejeke kuli vakwavoko. Omu Paulu asonekelele Fwilemone mukanda, ambile ngwenyi: “Hakwivwa zangi yove, ngwevwile kuwaha chikuma nakunguvendejeka.” (Fwile. 7) Avulukile nawa vandumbwenyi vavavulu vaze azachilenga navo nakumuvendejeka chikuma mulwola lwaukalu. (Kolo. 4:7-11) Kachi nge natulinyisa nakulweza vandumbwetu vatuvendejeke, kaha chikupu vene navatukafwa chikuma.

15. Chuma muka chakafwile Paulu omu apwilenga muukalu?

 ¹⁵ Pendamina haMazu aKalunga. Paulu atachikijile ngwenyi visoneka navimuvendejeka. (Loma 15:4) Kaha nawa ngwenyi, navimuhana mangana akumukafwa kufungulula kala cheseko. (Chimo. 2, 3:15, 16) Omu Paulu vamukashile kamuchivali mukamenga muLoma, amwene chikupu ngwenyi apwile hakamwihi nakufwa. Vyuma muka alingile Paulu halwola kanelu lwalukalu ngana? Asanyikile Chimoteu ezenga washi, nakumuhichika nawa “mikanda yakuvunga.” (Chimo. 2, 4:6, 7, 9, 13) Mwomwo ika? Mwomwo yize mikanda yakuvunga pamo yapwile vihanda vyaVisoneka VyachiHepeleu vize asakile kuzachisa hachilongesa chenyi chaMbimbiliya chauka. Kachi nge natulondezeza Paulu hakulinangulanga Mazu aKalunga, kaha Yehova mwazachisa Visoneka mangana aunjise michima yetu chamokomoko naukalu natupwa nawo.

16. Ukalu muka uze Ndavichi alinehelelele yivene?

¹⁶ Ndavichi alingile vyuma vyavipi chikuma vize vyalingishile chivezu chenyi chimuhane milonga. Alingile ukoji naMbate-sheva, kufumaho ajihishile lunga lyaMbate-sheva, kaha asakile nawa kusweka milonga yenyi. (Samwe. 2, 12:9) Hakavanga, Ndavichi aliwile chivezu chenyi omu chamuhanyinenga milonga. Kahechi chajihishile usoko wenyi naYehova nakumuhombesa kuhakilako vene nakuviza. (Samu 32:3, 4) Chuma muka chakafwile Ndavichi halwola apwile muukalu kanou wakulinehela, kaha vyuma muka twatela kulinga nge tunalingi shili yayinene?

17. Uno mukanda waSamu 51:1-4, wasolola ngachilihi nge Ndavichi apihililile nakwalumuka?

¹⁷ Lomba Yehova akukonekele. Ndavichi alombele jino kuli Yehova. Apihililile nakwalumuka nakwambulula milonga yenyi kuli Yehova. (Tangenu Samu 51:1-4.) Echi chamukafwile aunde muchima nakupwa wakuwahilila. (Samu 32:1, 2, 4, 5) Kachi nge unalingi shili yayinene kaha kanda kuyiswekako. Oloze watela kumulweza Yehova mukulomba. Kulinga ngocho nachikukafwa uputuke kuunda muchima. Kaha nge uli nakusaka jino kuzamisa cheka usoko wove naYehova, kaha kawatela kukumina kaha hakulombako.

18. Uno Ndavichi akwileko ngachilihi kukuzangamisa chaYehova?

 ¹⁸ Itavila kuzangamisa chaYehova. Omu Yehova atumine kapolofweto Natane akalweze Ndavichi shili alingile, Ndavichi kalihakwililile chipwe kusolola nge mulonga alingile wapwile waundendeko. Etavilile ngwenyi apwile namulonga kuli lunga lyaMbate-sheva, kaha chachinenenyi alingile shili kuli Yehova. Ndavichi etavilile kuzangamisa chaYehova kaha Yehova amukonekelele. (Samwe. 2, 12:10-14) Shikaho nge tunalingi shili, twatela kulweza malunga vaze atongola Yehova mangana vatufungenga. (Yako. 5:14, 15) Kaha katwatela kufwila kulihakwilangako. Kachi nge natwitavilanga kuzangamisa chaYehova chakuzeneka kulangisa kaha hahaze vene natupwa vakuunda nakuwahilila.

19. Chuma muka katwatela kulingako?

¹⁹ Kanda kukindulukilanga kuvyuma walimbenjeleko. Mwangana Ndavichi atachikijile ngwenyi Yehova kaha ikiye atelelele kumukafwa numba ahone kulinga shili yize alingile cheka. (Samu 51:7, 10, 12) Omu Ndavichi vamukonekelele kuli Yehova, afwililile jino kulihenda kuvishinganyeka vyavipi. Kahechi chamukafwile apwenga wakuunda.

20. Natusolola ngachilihi ngwetu twasakwilila Yehova hamuchima wenyi wakukonekela?

²⁰ Kachi nge natulombanga Yehova atukonekele nakwitavila kuzangamisa chenyi nakukilikita tuhone kukindulukila kuvyuma twalimbenjele, kaha natusolola hatoma ngwetu twasakwilila Yehova hamuchima wenyi wakukonekela. Kachi nge natulinga vyuma kana, kaha natuunda michima. Ndumbwetu James uze alingile shili etavilile chuma kana. Ambile ngwenyi: “Omu ngwalwezele tulama shili ngwalingile ngwevwile kwijiva nge vanangutulu chiteli chachilemu chikuma. Hahaze vene ngwaunjile muchima.” Cheji kutuvendejekanga chikuma kutachikiza ngwetu “Yehova ali hakamwihi navaze vali nakulyonyinga mumuchima. Kaha eji kulwilanga vaze vanahombo.”—Samu 34:18.

21. Vyuma muka twatela kulinga mangana Yehova aunjise michima yetu?

²¹ Omu tuli nakupandama kusongo yamakumbi akukuminyina, nakupwa vyuma vyavivulu vyakutuhombesa. Shikaho kachi nge unalizakamina havyuma vimwe, kaha lomba washi Yehova akukafwe. Linangulenga chikuma Mbimbiliya. Londezeza chakutalilaho chaHana naPaulu naNdavichi. Lomba Yehova akukafwe utachikize vyuma vili nakukulingisa ulizakamine. (Samu 139:23) Itavila akukafwe chikumanyi haukalu uze kaweshi kuhasa kukumisa mungolo joveko. Nge naulinga ngocho, kaha naupwa ngana mwamuka-kwimba jisamu uze embile ngwenyi: “Omu ngwalizakaminyine chikuma, ove wanguvendejekele nakunguunjisa muchima.”—Samu 94:19.