1. Engin nge lungkhamna thlen thei a, chu chuan engtin nge min nghawng theih?

LUNGKHAMNA nasa tak i nei tawh ṭhîn em? * Mi dangte thusawi leh thiltihin i rilru a tihnat avângin lungkhamna i nei mai thei a. A nih loh leh, i thusawi leh thiltihte avângin lungkhamna i nei mai thei bawk. Entîr nân, thil i tihsual avângin Jehova’n a ngaidam tawh ngai lo vang che tih i hlau pawh a ni thei. Chu aia pawi zâwk chu, lungkhamna nasa tak i neih avângin rinna nei lo leh misual tak nia inhriatna i nei mai thei hi a ni. Mahse, chu chu a dik em?

2. Lungkhamna neih chu rinna tlâkchham vâng a ni lo tih eng Bible entîrnate’n nge târ lang?

² Bible-a entîrna ṭhenkhat hi lo ngaihtuah ta ila. Zâwlnei Samuela nu Hani chuan rinna nghet tak a nei a. Mahse, a chhûngkaw zînga miin ṭha lo taka a cheibâwl avângin lungkhamna nasa tak a nei a ni. (1 Sam. 1:7) Tirhkoh Paula chuan rinna nghet tak nei mah se, ‘kohhranho zawng zawng ngaihtuahin’ a lungkham hle a. (2 Kor. 11:28) Lal Davida chuan chutiang rinna nghet tak chu a neih avângin, Jehova’n ani chu a ngaina hle. (Tirh. 13:22) Chuti chung pawhin, Davida chuan rilru hahna nasa tak thlentu thil sual tak a ti a ni. (Sâm 38:4) Jehova chuan chûng mite chu a thlamuanin, rilru hahdamna a pe a ni. An hnên aṭanga kan thil zir theihte chu i lo bih chiang ang u.

3. Engtin nge mite thusawi chuan kan rilru a tihnat theih?

³ Mite’n min vîn a, ngilnei lo taka min cheibâwl hian, kan rilru a na thei a. Chutianga min titu chu kan ṭhian hnai tak emaw, kan chhûngte emaw an nih hian a dik lehzual a ni. Anmahni nêna kan inlaichînna a chhiat chu kan hlau mai thei a. A châng chuan, min tinatu chuan ngaihtuah chiang lovin thu a sawi pawh a ni thei a, khandaiha chhun angin na kan ti thei a ni! (Thuf. 12:18) A nih loh leh, tuemaw chuan min tihnat tum hrim hrimin ṭawngkam na tak a hmang pawh a ni thei bawk. Ṭhalai unaunu chuan chutiang chu a tawng a ni. Ani chuan: “Kum kalta rei vak lovah khân, ṭhian ṭha tak anga ka ngaih tuemaw chuan online aṭangin ka chanchin dik lo takin a theh darh a. Ka rilru a nain, hrehawm ka ti hle. Chutianga hnung lam aṭanga min sawichhe duh chu ka hre thiam thei lo,” tiin a sawi. Kan ṭhian ṭha tak emaw, kan chhûngkhat lainâ emawin kan rilru a tina a nih chuan, Hani hnên aṭangin thil tam tak kan zir thei a ni.

4. Hani chuan eng harsatnate nge a hmachhawn a ngaih?

⁴ Hani chuan harsatna ṭhenkhat a hmachhawn a ngai a. Kum tam tak chhûng chu fa nei thei lovin a awm a. (1 Sam. 1:2) Israel hnam dânah chuan, fa nei thei lo hmeichhia chu ânchhe dawng nia ngaih a ni. Chu chuan a tihrehawm hle. (Gen. 30:1, 2) Hani rilru hahna tizualtu chu a pasal tâna fate hrinsaktu, a nupui dang Penini hi a ni. Penini chuan Hani chu a er tlat a, “a lungngaihna tizual tûrin . . . a lo deusawh ṭhîn a.” (1 Sam. 1:6) A tîr chuan, Hani chu chûng harsatnate avângin a rilru a na hle a. ‘A ṭap a ṭap a, chaw pawh ei thei lo’ khawpin a rilru a hrehawm a ni. “A rilru a mangang êm êm mai a.” (1 Sam. 1:7, 10) Engtin nge Hani chuan thlamuanna a hmuh?

5. Engtin nge ṭawngṭaina chuan Hani chu a ṭanpui?

⁵ Hani chuan Jehova hnênah ṭawngṭaiin a rilru a leih bua a. A ṭawngṭai hnu chuan, a dinhmun chu Puithiam Lal Elia hnênah a hrilh a. Elia chuan: “Thlamuang takin kal rawh khai, Israelte Pathian chuan i thil dîl chu pe che rawh se,” tiin a chhâng a ni. Eng nge a rah chhuah? Hani chu “a kal ta a, chaw te a ei a, lungngai hmêl a pu ta lo va.” (1 Sam. 1:17, 18) Ṭawngṭaina chuan Hani chu rilru hahdamna nei tûrin a ṭanpui a ni.

6. Ṭawngṭaina chungchângah Hani leh Philippi 4:6, 7 aṭangin eng nge kan zir theih?

⁶ Kan ṭawngṭai fan fan chuan thlamuanna  kan nei leh thei. Hani chuan a Pa vâna mi biak nân hun rei tak a hmang a. (1 Sam. 1:12) Keini pawhin, kan lungkhamna te, kan hlauhna te, leh kan chak lohnate chu Jehova hnênah eng anga rei pawh kan hrilh thei a. Kan ṭawngṭainate chu ṭawngkam mawi tak emaw, ṭha taka siam rem emaw a nih kher a ngai lo. Kan lungchhiat êm avângin ṭawngkam ṭha lote pawh kan sawi chhuak mai thei a. Chuti chung pawhin, Jehova chuan kan ṭawngṭainate chu ngaithla lovin a awm ngai lo vang. Kan harsatnate chungchânga ṭawngṭaina mai bâkah, Philippi 4:6, 7-a fuihna hi kan hre reng tûr a ni. (Chhiar rawh.) Paula chuan kan ṭawngṭai hunah lâwmthute sawi ṭhîn tûrin min hrilh a. Jehova chungah lâwmna tûr chhan tam tak kan nei a ni. Entîr nân, nunna thilpêk te, thil siam te, a hmangaihna rinawm te, leh beiseina ropui tak min pêkte avângin a hnênah lâwm thu kan sawi thei a ni. Hani hnên aṭangin eng thil dangte nge kan la zir theih?

7. Hani leh a pasal chuan eng nge an tih ziah?

⁷ Harsatnate a nei chung pawhin, Hani chu Silo khuaa Jehova biakna hmunah a pasal nên an kal ziah a. (1 Sam. 1:1-5) Biak bûka Hani a awm laiin, Puithiam Lal Elia’n a ṭawngṭaina chu Jehova’n a chhân a beisei thu hrilhin a fuih a ni.—1 Sam. 1:9, 17.

8. Inkhâwmte chuan engtin nge min ṭanpui theih? Hrilhfiah rawh.

⁸ Kohhran inkhâwmahte kan tel zawm zêl chuan thlamuanna kan hmu thei. Inkhâwm ṭanna ṭawngṭaiah Pathian thlarau thianghlim min awmpui tûra dîlna a tel fo va. Remna, a nih loh leh thlamuanna chu Pathian thlarau rah pêng pakhat a ni a. (Gal. 5:22) Rilru hahna kan nei chung pawha kan inkhâwm ṭâng ṭâng hian, Jehova leh kan unaute chu min fuih tûr leh rilrua thlamuanna nei tûra min ṭanpui turin hun remchâng kan pe a ni. Ṭawngṭaina leh inkhâwmte chu Jehova’n rilru hahdamna min neihtîr dân kawng pawimawh takte a ni. (Heb. 10:24, 25) Hani hnên aṭanga kan zir theih dang leh hi lo chhinchhiah ang che.

9. Hani dinhmunah eng nge inthlâk danglam lo va, eng nge inthlâk danglam?

⁹ Hani lungkhamna thlentu chu a bo nghâl mai lo. Biak bûk aṭanga a haw hnu chuan, Penini nên in khata a chên chhunzawm a la ngai a. Chu bâkah, Bible chuan Penini’n a rilru put hmang a thlâk thu a sawi lo. Chuvângin, Hani chuan amah ertu ṭawngkam na tak takte chu chhel taka a tawrh a la ngai reng niin a lang. Mahse, ani chuan chhûngrila thlamuanna a nei zawm zêl a ni. A dinhmun chu Jehova kuta a dah hnu chuan, lungkhamna a nei tawh lo tih hre reng ang che. Jehova’n thlamuanna leh rilru hahdamna a pe a. Hun engemaw chen a liam hnuah, Hani chuan malsâwmna dawngin ama fa ngei a pawm thei ta!—1 Sam. 1:19, 20; 2:21.

10. Hani thiltawn aṭangin eng nge kan zir theih?

¹⁰ Lungkhamna kan nei reng chung pawhin thlamuanna kan nei thei. Tih tak zeta ṭawngṭaiin leh inkhâwmahte kan tel ziah chung pawhin, harsatna ṭhenkhat kan la nei reng thei a. Mahse, rilru hahdamna min pe tûrin Pathian Jehova chu engmahin a dang thei lo tih Hani thiltawn aṭangin kan hria a ni. Jehova chuan min theihnghilh ngai lo vang a, a hun takah kan rinawmna chu mal a sâwm ang.—Heb. 11:6.

11. Paula rilru hah chhante chu eng nge ni?

¹¹ Paula chuan lungkhamna tûr chhan tam tak a nei a. Entîr nân, a unaute chu a hmangaih êm avângin, an hmachhawn harsatnate  chuan a rilru a tihah thei hle. (2 Kor. 2:4; 11:28) Tirhkoh nia rawng a bâwlnaah, Paula chuan amah dodâla vawtu leh tân ina khungtute chu a hmachhawn a ngai a. Chu bâkah, “tlâwm taka awm” ang chi lungkhamna awmtîr theitu harsatnate pawh chhel taka a tawrh a ngai bawk. (Phil. 4:12) A lo berah pawh, a nunah vawi thum lawng chhiatna a tâwk tih kan ngaihtuah hian, lawnga a zin laia a rilru hah dân tûr chu kan mitthla thei a ni. (2 Kor. 11:23-27) A nih leh, Paula chuan chûng a rilru hahnate chu engtin nge a hmachhawn?

12. Paula lungkhamna tikiam tûrin engin nge ṭanpui?

¹² Paula chuan a unaute’n harsatna an hmachhawn tih a hriat avângin lungkhamna a nei a; mahse, chûng an harsatna zawng zawng chu mahnia chinfelsak a tum lo. Ani chu mi inngaitlâwm tak a ni a. Kohhrana unaute ṭanpui tûrin mi dangte chu a ruat a ni. Entîr nân, Timothea leh Tita anga mi rinchhan tlâkte hnênah chuan thuneihna a pe a. Chûng unaute thiltih chuan Paula lungkhamna chu a tikiam ngei ang tih rinhlelh rual a ni lo.—Phil. 2:19, 20; Tit. 1:1, 2, 4, 5.

13. Engtin nge kohhran upate chuan Paul an entawn theih?

¹³ Mi dangte hnênah ṭanpuina dîl rawh. Paula angin, tûn laiah hmangaihna nei tak kohhran upate chuan fiahna hmachhawntu unaute tân an rilru an sêng nasa hle a. Mahse, kohhran upa pakhat chauh chuan unau zawng zawngte chu a ṭanpui vek thei lo. Inngaihtlâwmna chuan thlarau lama puitling unau dangte hnêna ṭanpuina dîl tûr leh Pathian berâmte enkawlnaa ṭhalaite zirtîr tûrin ani chu a chêttîr ang.—2 Tim. 2:2.

14. Paula’n eng nge pawi a tih lo va, a entawn tûr siam aṭangin eng nge kan zir theih?

¹⁴ Thlamuanna i mamawh tih pawm rawh. Paula chu inngaitlâwm tak a nih avângin, a ṭhiante fuihna a mamawh tih a hria a. Ani chuan mi dangte thlamuanna a dawn avânga mite’n mi chak lo anga an thlîr tûr chu pawi a ti lo tih a chiang a ni. Philemona hnêna a lehkha thawnah, Paula chuan: “I hmangaihnaah chuan ka hlimin ka thlamuang êm êm ṭhîn asin,” tiin a sawi a. (Philm. 7) Ani chuan lungkhamna a neih laia tih tak zeta amah fuihtu unau tam takte hming chu a târ lang a ni. (Kol. 4:7-11) Fuihna kan mamawh tih inngaitlâwm taka kan pawm chuan, kan unaute’n kan mamawh ṭanpuina chu phûr takin min pe ang.

15. Paula’n dinhmun harsa tak a hmachhawn khân engtin nge thlamuanna a hmuh?

¹⁵ Pathian Thu chu rinchhan rawh. Paula  chuan Pathian Thu-in a thlamuan ang tih a hria a. (Rom 15:4) Pathian Thu chuan fiahna engpawh hmachhawn tûrin finna a pe ang tih a hre bawk. (2 Tim. 3:14-16) Rom khuaa a ṭum hnihna atâna tân ina khung a nih khân, a thih hun a hnai tawh tih a hria a. Chu dinhmun khirh tak a hmachhawnnaah, Paula’n eng nge a tih? Ani chuan Timothea chu “lehkhabute” keng a, a hnêna kal vat tûrin a ngên a ni. (2 Tim. 4:6, 7, 9, 13) Engvângin nge? Chûng lehkhabute chu Paula’n a mi mal Bible zirnaa a hman theih, Hebrai Pathian Lehkha Thu-a thuziak ṭhenkhat a nih ngei a rinawm. Paula entawna Pathian Thu kan zir ziah chuan, eng ang fiahna pawh tâwk mah ila, Jehova chuan a Thu, Bible hmangin rilru hahdamna mi pe ang.

16. Davida’n eng rilru hahna nge a inthlen?

¹⁶ Davida chu thil sual lian tak a tih avângin a rilru a buai hle a. Ani chuan Bat-sebi a uire a, a pasal tihlum tûrin ruahmanna a siam a, a thil sual tih chu hun engemaw chen thup bo a tum a ni. (2 Sam. 12:9) A tîr chuan, Davida’n a chhia leh ṭha hriatna chu a ngaihthah a. Chuvângin, thlarau lam mai ni lovin, rilru lam leh taksa lamah a tawrh phah ta a ni. (Sâm 32:3, 4) A nih leh, rilru hahna a inthlen chu hmachhawn thei tûrin Davida chu engin nge ṭanpui a, keini pawh sual lian tak kan ti a nih chuan engin nge min ṭanpui thei?

17. Sâm 51:1-4-na chuan tih tak zeta Davida inchhîrna chu engtin nge a târ lan?

¹⁷ Ngaihdam dîlin ṭawngṭai rawh. A tâwpah Davida chuan, ṭawngṭaiin Jehova a pan a. Inchhîrna dik tak lantîrin, a thil sual tihte chu a inpuang a. (Sâm 51:1-4 chhiar rawh.) Chumi hnu chuan, rilru hahdamna a nei ta! (Sâm 32:1, 2, 4, 5) Sual lian tak i ti a nih chuan, thup bo tum suh. Chu aiin, i thil sual tihte chu Jehova hnênah tlang takin sawi rawh. Chutianga i tih chuan, mahni inthiam lohna i neih avânga lungkhamna lakah hahdamna engemaw chen i nei ṭan thei ang. Mahse, Jehova nêna inlaichînna ṭha neih leh i duh chuan, ṭawngṭai mai aia tam i tih a ngai a ni.

18. Engtin nge Davida’n thununna chu a chhân lêt?

¹⁸ Thununna chu pawm rawh. Jehova’n Davida sualna hai lang tûra zâwlnei Nathana a tirh khân, ani chuan a thiamthu sawi emaw, a thil sual tih chu sawi nêp emaw a tum lo. Bat-sebi pasal chungah chauh ni lovin, a bîk takin,  Jehova chungah thil a tisual tih a pawm nghâl a ni. Davida chuan Jehova thununna chu a pawm a, ngaihdam a ni ta a. (2 Sam. 12:10-14) Sual lian tak kan ti a nih chuan, Jehova’n min vêngtu atâna a ruatte hnênah kan sawi tûr a ni. (Jak. 5:14, 15) Chu bâkah, mahni thiam inchantîr duhna chu kan pumpelh tûr a ni. Thununna kan dawn engpawh chu kan pawm a, kan nunpui nghâl vat chuan, thlamuanna leh hlimna kan nei hmâ lehzual ang.

19. Eng tih nge kan tum tlat ang?

¹⁹ Thil sual tihnawn fo chu pumpelh tum rawh. Lal Davida chuan a thil sual tihte tinawn fo lo tûr chuan Jehova ṭanpuina a mamawh tih a hria a. (Sâm 51:7, 10, 12) Jehova’n a ngaihdam hnu chuan, Davida’n ngaihtuahna ṭha lo chu pumpelh a tum tlat avângin, rilrua thlamuanna a nei leh ta a ni.

20. Jehova ngaihdamna chu kan hlut tih engtin nge kan lantîr theih?

²⁰ Jehova ngaihdamna dîla kan ṭawngṭai a, a thununna kan pawm a, thil sual tinawn lo tûra theih tâwp kan chhuah hian, a ngaihdamna chu kan hlut tih kan lantîr a ni. Chutianga kan tih chuan, rilrua thlamuanna kan nei leh ang. Sual lian tak titu unau James-a chuan chumi dikzia chu a takin a tawng a. Ani chuan: “Kohhran upate hnêna ka thil sual tih ka puan chuan, ka dâr aṭanga phurrit tak hlân thlâksak ang hian ka inhria. Chumi hnu chuan rilrua thlamuanna ka nei leh a ni,” tiin a sawi. “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” tih hriat chu a va thlamuanthlâk tak êm!—Sâm 34:18.

21. Engtin nge Jehova chu kan rilru kan tihhahdamtîr theih?

²¹ He ni hnuhnûng tâwpna kan hnaih zêl rual hian lungkhamna tûr chhante chu a pung tawlh tawlh niin a lang. Rilrua lungkhamna i neih hunah Jehova hnênah ṭanpuina dîl vat ang che. Tih tak zetin Bible zir la. Hani te, Paula te, leh Davida te entawn tûr siam aṭangin inzir rawh. Lungkhamna i neih chhante hre tûrin kan Pa vâna mi hnênah ṭanpuina dîl ang che. (Sâm 139:23) I phurrit, a bîk takin, i thunun theih loh phurritte chu a chungah nghat ang che. Chutianga i tih chuan, Jehova hnêna: “Ka rilrua ngaihtuah tam tak ka neih lai chuan, i thlamuannate chuan ka nunna hi a tihlim [tihahdam, NW] ṭhîn,” tia sawitu fakna hla phuahtu ang i ni ve thei ang.—Sâm 94:19.