1. Dahaka ese lalohekwarahi e havaraiamu, bona una dainai ede ta lalo tomamu?

NEGA ta ḡau ta dainai o lalohekwarahi bada, a? * Reana haida edia hereva o kara ese e hahisimu dainai o lalohekwarahi. Eiava reana emu kara o hereva ta dainai o lalohekwarahi. Heḡereḡere, reana kerere ta o karaia bona o laloamu Iehova ese emu dika na basine gwauataomu dainai o lalohekwarahimu. Una ese emu lalohekwarahi na e habadaiamu dainai o laloamu oi na asi emu abidadama bona oi na taunimanima dikana ta. To una be momokani, a?

2. Daidia sivaraidia ese e hahedinaraimu lalohekwarahi karana dainai basitato ta na asi ena abidadama?

² Mani Baibul ai e herevalaidia taudia haida aita lalodia. Hana na peroveta tauna Samuel sinana bona ia na abidadama hahinena ta. To ia na e lalohekwarahi bada badina ena rumai e nohova tauna ta ese lalona e hahisiava. (1 Sam. 1:7) Aposetolo Paulo ena abidadama na goada, to “ekalesia oreadia ireḡudia” totona lalona na e hekwarahi bada. (2 Kor. 11:28) King David ena abidadama na goada dainai Iehova ese e lalokau henia bada. (Apos. 13:22) To, David na e kara kereredia daidiai e lalohekwarahi bada. (Sal. 38:4) Iehova ese idia ta ta na e hagoadadia bona lalomaino e henidia. Mani edia haheitalai amo baita dibadiamu ḡaudia aita herevalai.

3. Dahaka dainai haida edia hereva o kara dainai baita lalohekwarahimu?

³ Haida edia hereva o kara auka dainai baita lalohekwarahi  dibamu. Nega momo unu e vara tomamu, bema unu e kara toma tauna na ita turada namona o varavarada ta. Reana eda hebamo ia ida be dikamu dainai baita lalohekwarahimu. Nega haida laloda e hahisiamu tauna na se lalo namonamomu bena e herevamu, una dainai ena hereva na vaitani dare e hegwadamu na heto. (Her. 12:18) Eiava ena be mai dibadia be gwauraimu herevadia ese be hahisidamu to dounu e gwauraimu. Eregabe taihuna ta enai una na e vara. Ia na eto: “Laḡani haida vada ela, guna na tomava lau turagu namona ta, ese intanet ai e sivarailaigu koikoi. Una ese e hahisigu dainai na lalohekwarahi. Asina lalopararava dahaka dainai unu e kara toma.” Bema oi na turamu namona ta eiava varavaramu ta ese e hahisimu, Hana ena haheitalai ese baine durumu diba.

4. Hana ese e davari hekwakwanai haida be dahaka?

⁴ Hana na hekwakwanai haida daidiai e lalohekwarahi. Laḡani momo lalodiai ia na e gabani o asi natuna. (1 Sam. 1:2) Israel taudia na e laloava gabani hahinena enai Dirava ena hahenamo na lasi. Una ese e hahemaraia bada. (Gen. 30:1, 2) Dia una mo to ia adavana na ma hahine ta e adavaia, ladana na Penina bona natuna e havara. Bona Penina na e laloava Hana na ienai e mamava dainai, “e ha-uraia, bona lalona e hahisia.” (1 Sam. 1:6) Matamanai, Hana enai na e auka una baine haheaukalaia. Una dainai ia na “e taitaiva, bona se anianiva.” Oibe ‘lalona na e hisihisi bada.’ (1 Sam. 1:7, 10) Dahaka ese Hana lalona e hagoadaia?

5. Edena dalai ḡuriḡuri karana ese Hana e durua?

⁵ Hana ese Iehova e ḡuriḡuri henia bona ena lalohekwarahi na ia e hamaorolaia. E ḡuriḡuri murinai, enai e vara ḡauna na Hahelaḡa Tauna Badana Eli e hamaorolaia. Bena Eli ese e hamaoroa: “Mai mainomu ida aola; Israel Diravana ese o noilaia ḡauna na baine henimu.” Bena dahaka e vara? Hana na “ena dala ela, e aniani, vairana danu se huaia lou.” (1 Sam. 1:17, 18) Ḡuriḡuri karana ese Hana e durua bena lalomaino e abia.

6. Hana ena haheitalai bona Filipi 4:6, 7 amo dahaka ta dibamu?

⁶ Bema hanaihanai Iehova baita ḡuriḡuri heniamu, laloda na baine maino lou diba. Hana na nega bada e ato Tamana guba ai e hereva heniava. (1 Sam. 1: 12) Ita danu nega bada baita ato diba Iehova baita hereva henia unu amo ta lalohekwarahilaimu o ta garilaimu ḡaudia bona eda manoka ḡaudia na Ia baita hamaorolaia. Eda ḡuriḡuri lalonai hereva iboudiai baita gwaurai ḡoevaḡoeva na dia ḡau badana. Reana nega haida mai taida ida eda lalohekwarahi ḡaudia na Iehova baita hamaorolaiamu. To Iehova na eda ḡuriḡuri ihakala henidia ai basine hesikumu. Dia eda hekwakwanai daidiai mo Iehova baita ḡuriḡuri henia, to namona na Filipi 4:6, 7 ena hereva danu baita laloa. (Ba duahi.) Paulo na e gwaumu namona na ḡuriḡuri lalonai Iehova baita tenkiu henia. Badi momo daidiai Iehova baita tenkiu henia. Heḡereḡere, iena harihari ḡauna mauri, e havara ḡaudia, ena mia hanaihanai lalokauna bona e henida helaro hereadaena dainai baita tenkiu henia. Hana ena haheitalai amo ma dahaka ta dibamu?

7. Hana bona adavana be hanaihanai dahaka e karava?

⁷ Ena be Hana na mai ena hekwakwanai, to ia na hanaihanai adavana e bamoava e laova Iehova itoma henina diho gabuna, Silo ai. (1 Sam. 1:1-5) Unuseniai, Hana na dubu lalonai Hahelaḡa Tauna Badana Eli ese e hamaoroa ia na e urava Iehova ese Hana ena ḡuriḡuri baine haerelaia, unu amo e hagoadaia.​—⁠1 Sam. 1:9, 17.

8. Hebou ese ita be ede baine duruda toma? Ba herevalaia.

⁸ Bema hanaihanai kongrigeisin heboudia baita laomu, laloda na baine maino lou diba. Eda hebou ikehona ḡuriḡurina lalonai tadikaka na Dirava ena lauma helaḡa ena heduru baita abia totona e noinoimu. Maino na lauma huahuana ta. (Gal. 5:22) Ena be ta lalohekwarahimu to hebou baita laomu neganai, Iehova bona tadikaka taihu ese ita na be hagoadadamu bona be durudamu baita lalomaino totona. Iehova ese ḡuriḡuri bona hebou amo lalomaino e henidamu. (Heb. 10:24, 25) Hana ena amo baita dibaiamu ḡauna ma ta aita herevalaia.

9. Hana ena lalohekwarahi e havaraia ḡauna be e ore haraḡa, a? To dahaka ese e durua?

⁹ Hana ena lalohekwarahi e havaraia ḡauna na se ore haraḡa. Ia na dubu amo e lou neganai, dounu Penina ida ruma tamona ai e nohova. Baibul na se gwaumu Penina ese ena kara na e haidaua. Una dainai Hana na dounu Penina ena hahehisi herevadia e haheaukalai. Hana na se badu to e lalomaino. Hana na e diba ena ḡuriḡuri na Iehova ese e haerelaia neganai, ia na se lalohekwarahi. Iehova ese e hagoadaia bona lalomaino e henia. Gabeai, Iehova ese e hanamoa dainai natuna e havara.​—⁠1 Sam. 1:19, 20; 2:21.

10. Hana ena haheitalai amo dahaka ta dibamu?

¹⁰ Ena be ta davarimu hekwakwanaidia na se oremu, to laloda na baine maino lou diba. Eda hekwakwnai na asie oremu ena be hanaihanai ta ḡuriḡurimu bona hebou ta laomu. To, Hana ena haheitalai amo ta dibamu ḡau ta ese Iehova na basine koua diba lalomaino baine henida totona. Iehova ese ita na basine laloda boio bona eda abidadama dainai davada baine heni.​—⁠Heb. 11:6.

11. Dahaka dainai Paulo na e lalohekwarahi?

¹¹ Paulo na ḡau momo daidiai e lalohekwarahiva. Heḡereḡere, ia na tadikaka taihu e lalokau henidiava dainai edia hekwakwanai na e lalohekwarahilaiva. (2 Kor. 2:4; 11:28) Ena hesiai ḡaukara lalonai,  ia na e daḡedaḡe heniava taudia ese e dadabaia bona e hadiburaia. Dia unu mo to ena mauri na e auka, heḡereḡere, “ogoḡami” maurina e mamia dainai e lalohekwarahi. (Flp. 4:12) Bona nega toi e gui kau boutina na davara ai e dika, una dainai ta dibamu ia na e lalohekwarahi bada. (2 Kor. 11:23-27) Paulo be dahaka ese e durua?

12. Dahaka ese Paulo ena lalohekwarahi e hamaraḡia?

¹² Ena be Paulo na tadikaka taihu ese e davariva hekwakwanai daidiai e lalohekwarahiva, to ia sibona ese unu iboudiai na se hamaoromaorodia. Paulo na e diba ia sibona ese ḡau iboudiai na basine karadia diba. Una dainai, ia na ma haida e noidia kongrigeisin bae durua. Heḡereḡere, Timoteo bona Tito na maduna haida e henidia. Momokani, idia e kara ḡaukaradia ese Paulo ena lalohekwarahi na e hamaraḡia.​—⁠Flp. 2:19, 20; Tito 1:1, 4, 5.

13. Edena dalai elda taudia ese Paulo ena haheitalai bae tohotohoa?

¹³ Haida ba noidia oi bae durumu. Paulo heḡereḡerena, hari ina negai elda taudia na kongrigeisin ai hekwakwanai e davarimu taudia daidia e lalohekwarahimu. To elda tamona na dia heḡereḡere iboudiai baine durudia. Ia na mai dibana ia sibona ese ḡau iboudiai na basine karadia diba dainai, ḡaukara na baine haridia bona ma haida baine hadibadia Dirava ena mamoe bae naridia.​—⁠2 Tim. 2:2.

14. Paulo ese se lalohekwarahilaia ḡauna be dahaka, bona ena haheitalai amo dahaka ta dibamu?

¹⁴ Hahegoada bavabi na namo. Paulo na e manau, una dainai e diba turana ese bae hagoadaia na namo. Ena be turana ese e hagoadaia dainai haida na bae lalo ia na dia heḡereḡere, to ia ese una na se lalohekwarahilaia. Paulo ese Filemona e tore henia neganai, eto: “Name moale bada bona taugu danu eme lo, emu lalokau dainai.” (Filem. 7) Paulo na ia e lalohekwarahi negadiai e hagoadaia taudia ladadia e gwaurai. (Kol. 4:7-11) Bema baita manau bona baita diba hahegoada baita abi na namo, tadikaka taihu na mai moaledia ida ita bae duruda diba.

15. Nega aukana lalonai Paulo be dahaka e kara?

¹⁵ Dirava ena Hereva ba laloa bada. Paulo na e diba Toretore Helaḡadia amo goada baine abi diba. (Roma 15:4) Unu ese aonega bae henia hahetoho baine haheaukalai totona. (2 Tim. 3:15, 16) Roma  ai Paulo na nega iharuana e hadiburaia neganai, ia na e diba bae hamasea negana na kahirakahira. Una nega aukana lalonai ia be dahaka e kara? Ia na Timoteo e noia ena “toretore ḡaudia” baine laohai haraḡa. (2 Tim. 4:6, 7, 9, 13) Dahaka dainai? Badina unu toretore na Heberu Toretoredia amo e abi bona Paulo ese sibona ena stadi ai baine ḡaukaralai diba. Paulo heḡereḡerena, hanaihanai Dirava ena Hereva baita stadilaiamu neganai, herevana dahaka hahetoho ta davarimu, to una dala amo Iehova ese lalomaino be henidamu.

16. David be dahaka dainai e lalohekwarahi?

¹⁶ David na kerere badadia haida e kara dainai e lalohekwarahi. Ia na Bataseba ida e heudahanai, Bataseba adavana Uria ena mase dalana e karaia, bona ena kara dika e hunidia. (2 Sam. 12:9) Matamanai, David ese unu na se lalo bada. Una dainai, ena hetura karana Iehova ida e hadikaia, e lalohekwarahi bada bona e gorerea. (Sal. 32:3, 4) David be dahaka ese e durua bona bema kerere badana ta baita karaia neganai, dahaka ese baine duruda diba?

17. Salamo 51:1-4 ese edena dalai e hahedinaraiamu David na mai kudouna idoinai ida e helalo-kerehai?

¹⁷ Iehova ba ḡuriḡuri henia emu dika baine gwauatao totona. David na Iehova e ḡuriḡuri henia. Ia na mai kudouna idoinai ida e helalo-kerehai bona ena dika iboudiai e gwaurai hedinarai. (Salamo 51:1-4 ba duahi.) Una ese e durua dainai e lalomaino bona e moale. (Sal. 32:1, 2, 4, 5) Bema kerere badana ta o karaia, basio hunia. To namona na Iehova ba ḡuriḡuri henia bona ia vairanai una kerere ba gwauraia hedinarai. Una neganai oi na bo lalomainomu. To bema o uramu emu hetura karana Iehova ida baine namo, ḡau ma haida danu ba kara.

18. David na matahakani e abi neganai dahaka e kara?

¹⁸ Matahakani bavabia dae. Iehova ese peroveta tauna Natan e siaia David ena kerere baine hahedinaraia neganai, David na se hahekora o eskius herevadia na se gwaurai eiava se gwa unu na kerere maraḡidia. Maoromaoro e laloparara ia na Bataseba adavana e kara dika henia,  bona bada hereana be Iehova e kara dika henia. David na Iehova ena matahakani e abia dae bona Iehova ese ena kara dika na e gwauatao. (2 Sam. 12:10-14) Bema ita na kara dika badana ta ta karaia, namona na Iehova ese e abidia hidi taudia ediai baita herevalai hedinarai. (Iak. 5:14, 15) Bona hahekora herevadia na basita gwaurai. Matahakani baita abi dae bona baita badina haraḡamu neganai, baita lalomainomu bona baita moalemu.

19. Laloda baita hadai dahaka baita kara?

¹⁹ Lalomu ba hadaia o kara kereredia na ma basio kara lou. King David na e diba unu kara dikadia basine kara lou totona, Iehova ena heduru baine abia na namo. (Sal. 51:7, 10, 12) Iehova ese ena dika e gwauatao murinai, ia na lalona e hadaia lalohadai kereredia na baine dadarai. Una dainai lalona na ma e maino lou.

20. Edena dalai baita hahedinaraia Iehova ese dika e gwautaomu karana na ta laloa badamu?

²⁰ Ta hahedinaraiamu Iehova ese dika e gwautaomu karana na ta laloa badamu bema eda dika igwautaona totona ia baita ḡuriḡuri henia, matahakani baita abi dae, bona baita hekwarahi kerere gunadia basita kara lou. Unu baita kara tomamu neganai lalomaino baita abia loumu. Tadikaka ta ladana na James, na guna kerere badana ta e karaia. Ia na e gwa: “Egu kara dika na elda taudia vairadiai na gwaurai hedinarai neganai, egu hemami na vaitani ḡau metauna ta na paḡagu amo e hekoki. Bena na lalomaino.” Ta dibamu “Iehova na lalo-hisihisi taudia dekedekediai; dara-doko taudia ia ese e hamauridiamu,” una ese ita na e hagoadadamu.​—⁠Sal. 34:18.

21. Iehova ese lalomaino baine henida totona, ita be dahaka baita kara?

²¹ Dina gabedia na kahirakahira be oremu dainai, lalohekwarahi e havaramu ḡaudia na be momomu. O lalohekwarahimu neganai, Iehova ena heduru ba tahua haraḡa. Baibul ba stadilaia goadagoada. Hana, Paulo bona David edia haheitalai ba tohotoho. Tamamu gubai e nohomu ba noia bena ia ese baine durumu emu lalohekwarahi e havaraiamu ḡauna ba laloparalaia totona. (Sal. 139:23) Namona na iena heduru bavabia dae, bona una na mai anina bada bema o mamiamu una lalohekwarahi na basio hanaia dibamu. Unu bo kara tomamu neganai, oi danu Salamo e torea tauna bamona, ia na ane amo Iehova e hereva henia, eto: “Lalogu e hekwarahi momomu negadia ai, emu tauhalo ese laumagu e hamoaleamu.”​—⁠Sal. 94:19.