1. Ki kitsoz kapav fer nou trakase, ek ki lefe sa kapav ena lor nou?

ESKI to’nn deza santi twa abat akoz to bann traka? * Par exanp, kitfwa to santi twa blese akoz seki enn kikenn finn dir ouswa fer twa. Ouswa, kitfwa to trakase akoz seki twa to finn dir ouswa fer. Kitfwa to finn fer enn erer ek to trakase tansion Zeova zame pa pardonn twa. Ek kitfwa to panse ki akoz to pe trakase sa kantite-la, savedir ki to pena ase lafwa ek ki to enn move dimounn. Me eski sa li vre?

2. Kan nou trakase, eski savedir ki nou pena lafwa? Explike.

² Anou get sertin lexanp dan Labib. Ann, mama profet Samiel, ti enn fam ki ti ena enn gran lafwa. Kanmem sa, li ti bien trakase kan enn manb so fami pa ti tret li bien. (1 Sam. 1:7) Lapot Pol ti ena enn lafwa bien for, me li ti bien “trakase pou tou bann lasanble.” (2 Kor. 11:28, NW) Lerwa David ti ena enn lafwa telman gran ki Zeova ti bien kontan li. (Zist. 13:22) Kanmem sa, David ti extra trakase akoz bann erer ki li ti fer. (Ps. 38:4) Zeova ti rekonfort ek konsol sakenn parmi zot. Anou gete ki nou kapav aprann ar zot lexanp.

3. Kouma seki lezot dir kapav fatig nou?

³ Kan lezot koz brit ouswa azir dan enn move fason ar nou, sa kapav fatig nou. Ek sa plis afekte nou sirtou si li enn kamarad pros ouswa enn fami. Kitfwa nou trakase tansion nou relasion avek sa dimounn-la gate. Kitfwa sa dimounn ki’nn bles nou la inn koze san reflesi, me seki li’nn dir nou finn telman bles nou ki se koumadir nou’nn gagn enn kout kouto! (Prov. 12:18) Ouswa kikenn kapav mem bles nou par expre par so bann parol. Enn zenn ser ti pas par enn sitiasion koumsa. Li dir: “Finn gagn de-trwa lane, enn kikenn ki mo ti konsider kouma enn bon kamarad ti fann bann rimer lor mwa lor Internet. Sa ti bien bles mwa ek sa ti fatig mo latet. Mo pa ti konpran kifer mo bon kamarad ti bles mwa koumsa.” Si enn kamarad pros ouswa enn fami finn bles twa, to kapav aprann boukou ar lexanp Ann.

4. Ki bann problem Ann ti gagne?

⁴ Ann ti bizin fer fas ar bann problem bien difisil. Pandan lontan, li pa ti kapav gagn zanfan. (1 Sam. 1:2) Sa lepok-la, kan enn madam pa ti kapav gagn zanfan, boukou Izraelit ti panse ki li ti gagn malediksion ar Bondie. Akoz sa, Ann ti gagn onte. (Zen. 30:1, 2) Pli pir ankor, Ann so misie ti ena enn lot madam ki ti apel Penina, ek li ti ena bann zanfan. Penina ti konsider Ann kouma so rival ek li ti “boufonn li pou agas li.” (1 Sam. 1:6) Sa bann sitiasion-la ti bien fatig Ann. Sa ti telman fatig li ki “li ti plore ek li pa ti manze.” Li ti ena boukou lapenn dan so leker. (1 Sam. 1:7, 10) Kouma Ann ti gagn rekonfor?

5. Kouma lapriyer ti ed Ann?

⁵ Ann ti devid so leker ar Zeova dan lapriyer. Apre ki li ti priye, li ti explik Gran Pret Eli so sitiasion. Eli ti dir li: “Al anpe, ek ki Bondie Izrael donn twa seki to’nn demann Li.” Ki rezilta sa finn ena? Ann “ti ale, li ti manze ek so figir ti nepli paret trakase.” (1 Sam. 1:17, 18) Lapriyer ti ed Ann pou santi li anpe.

6. Dan lexanp Ann ek dapre seki nou lir dan Filipien 4:6, 7, ki nou aprann lor lapriyer?

⁶ Nou pou santi nou anpe si nou kontign priye Zeova. Ann ti pas boukou  letan pou koz avek so Papa ki dan lesiel. (1 Sam. 1:12) Nou osi nou kapav fer bann long lapriyer pou dir Zeova seki trakas nou, seki fer nou per, ek pou koz lor nou bann febles. Li pa neseser ki nou bann lapriyer zot poetik ouswa extra bien prepare. Parfwa, nou kapav mem dir Zeova nou bann problem avek bann larm. Zame Li pa pou fatige ekout nou. Nou bizin osi rapel konsey ki trouv dan Filipien 4:6, 7, NW. (Lir.) * Pol ti dir ki nou bizin remersie Zeova dan lapriyer. Nou ena boukou rezon pou remersie Zeova. Par exanp, nou kapav dir Li mersi pou lavi ki Li’nn donn nou, bann zoli kitsoz ki Li’nn fer, so lamour fidel, ek lesperans extraordiner ki Li’nn donn nou. Ki nou kapav aprann ankor ar lexanp Ann?

7. Ki kitsoz Ann ek so misie ti fer regilierman?

⁷ Malgre so bann problem, Ann regilierman ti al ansam avek so misie dan Silo pou ador Zeova. (1 Sam. 1:1-5) Anplis, se laba mem ki Gran Pret Eli ti dir Ann ki li swete ki Zeova reponn so lapriyer ek sa ti bien ankouraz Ann.​—1 Sam. 1:9, 17.

8. Kouma bann renion kapav ed nou? Explike.

⁸ Nou pou santi nou anpe si nou kontign asiste nou bann renion. Kan renion koumanse, enn frer fer lapriyer ek demann Bondie pou donn nou so lespri sin. Lape form parti frwi lespri sin Bondie. (Gal. 5:22) Kan nou asiste nou bann renion mem kan nou trakase, nou donn Zeova ek nou bann frer ek ser lokazion pou ankouraz nou ek ed nou pou gard nou kalm. De kitsoz inportan ki Zeova servi pou rekonfort nou ek konsol nou se lapriyer ek bann renion. (Ebre 10:24, 25) Anou get enn lot leson ki nou kapav aprann ar lexanp Ann.

9. Ki kitsoz pa ti sanze dan sitiasion Ann, me ki kitsoz ti ed li?

⁹ Bann problem Ann pa ti disparet enn kout koumsa. Kan Ann ti sorti tabernak ek ti retourn kot li, li ti ankor touzour bizin viv dan mem lakaz ki Penina. Anplis, okenn par dan Labib pa dir ki latitid Penina ti’nn sanze. Alor, sirman Ann ti bizin kontign siport Penina so bann parol blesan. Me Ann ti santi li anpe. Ann ti ena konfians ki Zeova ti tann so lapriyer, ek sa ti ed li pou nepli trakase. Li ti les Zeova rekonfort li ek konsol li. Plitar, Zeova ti reponn so lapriyer ek Ann ti gagn bann zanfan.​—1 Sam. 1:19, 20; 2:21.

10. Ki nou aprann ar lexanp Ann?

¹⁰ Nou pou santi nou anpe mem si nou problem ankor la. Mem si nou kontign priye ek asiste nou bann renion regilierman, nou bann problem pa pou disparet enn kout koumsa. Me lexanp Ann montre nou ki pena nanye ki kapav anpes Zeova pou ed nou santi nou anpe. Zeova zame pa pou bliye nou. Pa zordi pa dime, nou kapav sir ki Zeova pou rekonpans nou parski nou pa finn abandone.​—Ebre 11:6.

11. Kifer Pol ti trakase?

¹¹ Pol ti ena boukou rezon pou trakase. Par exanp, li ti telman kontan so bann frer ek ser ki li ti bien trakase  akoz bann problem ki zot ti ena. (2 Kor. 2:4; 11:28, NW) Kan Pol ti prese, souvan bann opozan ti bat li ek met li dan prizon. Li ti osi gagn bann difikilte ki ti fer li trakase, kouma par exanp kan li pa ti ena “nanye pou manze.” (Fil. 4:12) Anplis, Pol ti fer nofraz omwin trwa fwa, alor sirman sa ti bien stres li pou vwayaz par bato. (2 Kor. 11:23-27) Ki ti ed Pol kan li ti trakase?

12. Ki ti ed Pol pou ena mwins traka?

¹² Pol ti trakase kan so bann frer ek ser ti ena bann problem, me li pa ti esey regle tou zot problem par limem. Pol ti ena modesti. Li ti rekonet ki li pa ti pou kapav fer tou par limem. Li ti pran bann dispozision pou ki lezot kapav ede pou pran swin lasanble. Par exanp, li ti donn bann zom ki kapav fer konfians, kouma Timote ek Tit, sertin responsabilite. Pena dout ki seki sa bann frer-la ti fer ti ed Pol pou ena mwins traka.​—Fil. 2:19, 20; Tit 1:1, 4, 5, NW.

13. Kouma bann ansien kapav imit Pol?

¹³ Demann lezot pou ed twa. Parey kouma Pol, boukou ansien ki ena lamour trakase kan bann manb zot lasanble ena bann problem. Me enn ansien kitfwa pa pou reisi ed zot tou dan lasanble. Enn ansien ki ena modesti pou donn bann lezot zom kalifie sertin responsabilite ek li pou form bann zenn frer pou pran swin troupo Bondie.​—2 Tim. 2:2.

14. Ki kitsoz Pol pa ti per, ek ki nou kapav aprann ar so lexanp?

¹⁴ Rekonet ki to bizin rekonfor. Pol ti ena limilite, alor li ti kone ki li ti bizin lankourazman so bann kamarad. Li ti aksepte ki bannla ankouraz li ek li pa ti per tansion lezot panse ki li feb. Kan Pol ti ekrir Filemon, li ti dir: “To lamour finn donn mwa boukou lazwa ek lankourazman.” (File. 7) Pol ti koz lor plizir lezot Kretien ki ti ankouraz li dan so bann moman difisil. (Kol. 4:7-11) Kan nou rekonet avek limilite ki nou bizin lankourazman, nou bann frer ek ser pou kontan pou donn nou soutien ki nou bizin.

15. Ki Pol ti fer kan li ti dan enn sitiasion bien stresan?

¹⁵ Etidie Parol Bondie. Pol ti kone ki bann Lekritir ti kapav rekonfort li. (Rom. 15:4) Parol Bondie ti osi donn li  sazes pou fer fas ar ninport ki problem. (2 Tim. 3:15, 16) Deziem fwa ki Pol ti dan prizon dan Rom, li ti kone ki li ti pre pou mor. Ki Pol ti fer dan sa sitiasion bien stresan la? Li ti demann Timote pou vinn get li pli vit posib ek pou amenn “bann roulo.” (2 Tim. 4:6, 7, 9, 13) Kifer? Parski sa bann roulo-la kitfwa ti enn parti bann Lekritir Ebre ki Pol ti kapav servi pou fer so letid personel. Si parey kouma Pol nou osi nou etidie Labib regilierman, Zeova pou servi so Parol pou konsol nou dan ninport ki sitiasion nou ete.

16. Ki David ti resanti kan li ti fer bann pese bien grav?

¹⁶ David so konsians ti fatig li parski li ti fer bann kitsoz bien grav. Li ti komet ladilter avek Betsabe, li ti fer touy so misie, ek li ti esey kasiet seki li ti fer. (2 Sam. 12:9) O-koumansman, David pa ti ekout so konsians. Sa ti gat so relasion avek Zeova, ek li ti bien strese ek malad. (Ps. 32:3, 4) David ti trakase parski li ti fer bann pese bien grav. Ki kitsoz ti ed li pou fer fas ar so traka? Ki kitsoz kapav ed twa si to’nn fer enn pese grav?

17. Kouma Psom 51:1-4 montre nou ki David ti vremem repanti?

¹⁷ Priye ek demann Zeova pou pardonn twa. Avek letan, David ti rod led Zeova dan lapriyer. Li ti vremem regrete ek li ti konfes so pese ar Zeova. (Lir Psom 51:1-4.) Sa ti ed li pou gard so kalm ek regagn so lazwa! (Ps. 32:1, 2, 4, 5) Si to fer enn pese grav, pa esey kasiet seki to’nn fer. Okontrer, priye Zeova ek dir Li tou seki to’nn fer. Lerla, to pou santi twa soulaze ek to pou nepli santi twa koupab sa kantite-la. Me si to anvi regagn to lamitie avek Zeova, lapriyer li pa ase.

18. Kouma David ti reazir kan li ti gagn disiplinn?

¹⁸ Aksepte disiplinn. Kan Zeova ti avoy profet Natan pou dir David ki li ti fer enn pese, li pa ti rod bann pretext ek fer so pese paret mwin grav. Li ti rekonet deswit ki li ti fer enn pese kont mari Betsabe, me pli inportan li ti rekonet ki li ti fer enn pese kont Zeova. David ti aksepte disiplinn Zeova, ek Zeova ti  pardonn li. (2 Sam. 12:10-14) Si to’nn fer enn pese grav, to bizin koz avek bann frer ki Zeova finn etabli kouma bann berze. (Zak 5:14, 15, NW) Fode pa ki to rod bann pretext. Pli vit to aksepte disiplinn ek aplik bann konsey ki to’nn gagne, pli vit to pou santi twa anpe ek to pou regagn to lazwa.

19. Ki nou bizin bien deside pou fer?

¹⁹ To bizin bien deside pou pa refer bann mem erer. Lerwa David ti kone ki li ti bizin led Zeova pou pa refer bann mem erer. (Ps. 51:7, 10, 12) Apre ki Zeova ti pardonn li, David ti bien deside pou nepli ena sa bann move dezir-la. Sa ti ed li pou santi li anpe.

20. Kouma nou montre Zeova ki so pardon ena valer pou nou?

²⁰ Kouma nou montre Zeova ki so pardon ena valer pou nou? Se kan nou priye pou gagn so pardon, nou aksepte disiplinn, ek nou fer zefor pou pa refer bann mem erer. Kan nou swiv sa bann letap-la, nou pou santi nou anpe. James, enn frer ki ti fer enn pese grav, ti swiv sa bann letap-la. Li dir: “Kan mo ti konfes mo pese ar bann ansien, mo ti santi ki’nn tir enn pwa bien lour lor mwa. Mo ti regagn mo lape lespri.” Sa vremem ankouraz nou pou kone ki Zeova “toultan pre ar seki pe perdi kouraz; li replant lespwar kot lespwar finn mor.”​—Ps. 34:18.

21. Kouma nou kapav les Zeova rekonfort nou ek konsol nou?

²¹ Plis lafin pe koste, plis nou bann traka pou ogmante. Kan to trakase, pa tarde pou priye Zeova pou demann Li so led. Etidie Labib an profonder. Swiv lexanp Ann, Pol, ek David. Demann Zeova pou ed twa konpran kifer to trakase. (Ps. 139:23) Les Zeova sarye to bann traka, sirtou bann traka lor ki to pena okenn kontrol. Si to fer sa, to pou kouma sa ekrivin Psom ki ti sant sa sante-la pou Zeova: “Sak fwa mo ena traka ek problem to konsol mwa pou mo regagn lazwa.”​—Ps. 94:19.