1. ¿Ndáa xa̱ʼa̱ kúú ña̱ kivi ndi̱ʼi̱ní-iniyó, ta ndáaña kivi kundoʼoyó xa̱ʼa̱ ña̱yóʼo?

¿Á XA̱A̱ ndíʼi̱ní-iniyó sava yichi̱? * Sana xóʼvi̱yó xa̱ʼa̱ ña̱ ke̱ʼé iinna xíʼinyó á xa̱ʼa̱ ña̱ ni̱ka̱ʼa̱nna. Ta sanatu ña̱ sáxo̱ʼvi̱ miíyó kúú ña̱ ni̱ka̱ʼa̱nyó á ña̱ ke̱ʼéyó. Sana ni̱ki̱ʼviyó iin ku̱a̱chi ta ndíʼi̱-iniyó ña̱ va̱ása kukáʼnu-ini Jehová xa̱ʼa̱yó. Á sanatu túviyó ña̱ ndóʼoyó saá, xa̱ʼa̱ ña̱ va̱ása kándíxa va̱ʼayó Ndióxi̱, chi su̱ví na̱ yiví va̱ʼa kúúyó. Soo, ¿á ña̱ nda̱a̱ kúú ña̱yóʼo?

2. ¿Ndáa ejemplo ña̱ va̱xi nu̱ú Biblia kúú ña̱ náʼa̱, ña̱ tá ndíʼi̱-iniyó su̱ví xa̱ʼa̱ ña̱ va̱ása kándíxayó Ndióxi̱ kúúña?

² Ná kotoyó sava ejemplo ña̱ va̱xi nu̱ú Biblia. Ñá Ana siʼí ta̱ profeta Samuel xi̱kandíxaníñá Ndióxi̱. Soo ni saá, ni̱ndi̱ʼi̱ní-iniñá tá ke̱ʼé iin na̱ veʼeñá ña̱ va̱ása va̱ʼa xíʼinñá (1 Sam. 1:7). Saátu ndakúní ni̱xi̱yo ña̱ xi̱kandíxa ta̱ apóstol Pablo Ndióxi̱, soo ni saá, ni̱ndi̱ʼi̱ní-inira xa̱ʼa̱ ndiʼi na̱ congregación (2 Cor. 11:28). Ta saátu ndakúní ni̱xi̱yo ña̱ xi̱kandíxa ta̱ rey David, ña̱kán Jehová xi̱kuʼvi̱ní-inira xi̱xinirara (Hech. 13:22). Soo ni saá, ni̱ki̱ʼvira iin ku̱a̱chi ña̱ sa̱ndíʼi̱ní-inira (Sal. 38:4). Jehová sa̱ndíkora-ini ndiʼi na̱yóʼo. Ná kotoyó ndáaña kivi sakuaʼayó xíʼin ejemplona.

3. ¿Nda̱chun kivi ndi̱ʼi̱-iniyó xa̱ʼa̱ ña̱ káʼa̱n inka na̱ yiví xíʼinyó?

³ Iin ña̱ kivi sandi̱ʼi̱-iniyó kúú ña̱ tá kéʼéna á káʼa̱nna ña̱  va̱ása va̱ʼa xíʼinyó, kachikaví tá iin na̱ migoyó á na̱ veʼeyó kúúna. Sana ndíʼi̱-iniyó xa̱ʼa̱ ña̱ kivi ndiʼi-xa̱ʼa̱ ña̱ kítáʼanyó xíʼin na̱ yiví kán. Sava yichi̱, na̱ yiví va̱ása ndákanixi̱nína xíʼin ña̱ káʼa̱nna ta sáxo̱ʼvi̱níña miíyó (Prov. 12:18). Soo sava yichi̱, iin na̱ yiví kivi ka̱ʼa̱nna iin ña̱ʼa xa̱ʼa̱ ña̱ kúni̱na saxóʼvi̱na miíyó. Ña̱yóʼo kúú ña̱ ndo̱ʼo iin ñá hermana, ñáyóʼo káchiñá: “Xa̱a̱ íyo sava ku̱i̱ya̱, iin ñá va̱ʼaní xi̱kuu migai̱ ki̱xáʼañá káʼa̱nñá ña̱ va̱ása va̱ʼa xa̱ʼíi̱ nu̱ú Internet. Ku̱suchíní-inii̱ ta ni̱ndi̱ʼi̱ní-inii̱ xa̱ʼa̱ ña̱yóʼo. Va̱ása níkunda̱a̱-inii̱ nda̱chun kúú ña̱ ke̱ʼéñá ña̱yóʼo xíʼi̱n”. Tá iin na̱ migoyó á na̱ veʼeyó sa̱xóʼvi̱na miíyó, íyo ku̱a̱ʼání ña̱ kivi sakuaʼayó xíʼin ña̱ ndo̱ʼo ñá Ana.

4. ¿Ndáa tu̱ndóʼo xi̱niñúʼu kundeé-ini ñá Ana nu̱ú?

⁴ Ñá Ana xi̱niñúʼu kundeé-iniñá nu̱ú tu̱ndóʼo, chi ku̱a̱ʼání ku̱i̱ya̱ va̱ása níkivi koo se̱ʼeñá (1 Sam. 1:2). Na̱ ñuu Israel xi̱ndakanixi̱nína ña̱ tá va̱ása kivi koo se̱ʼe iin ñaʼá, xi̱ka̱ʼa̱nna ña̱ va̱ása táxi Ndióxi̱ bendición ndaʼa̱ñá. Xa̱ʼa̱ ña̱yóʼo xi̱kukaʼanní nu̱ú ñá Ana (Gén. 30:1, 2). Soo yiíñá ni̱xi̱yo inka ñá síʼíra ñá xi̱naní Peniná, ta ñáyóʼo va̱ʼa ni̱xi̱yo se̱ʼeñá. Ñá Peniná xi̱sa̱a̱-iniñá xi̱xiniñá ñá Ana, ta xi̱xaku̱ndaañá ñáyóʼo (1 Sam. 1:6). Tá xa̱ʼa̱, ña̱yóʼo sa̱xóʼvi̱níña ñá Ana. Xa̱ʼa̱ ña̱ xi̱kusuchíní-iniñá nda̱a̱ xi̱xakuñá ta va̱ása níxixixiñá, ta ndeéní ni̱ndi̱ʼi̱-iniñá (1 Sam. 1:7, 10). ¿Ndáa ki̱ʼva ni̱ndi̱ko-ini ñá Ana?

5. ¿Ndáa ki̱ʼva chi̱ndeétáʼan ña̱ oración xíʼin ñá Ana?

⁵ Ñá Ana xíʼin ndiʼi níma̱ñá ni̱ka̱ʼa̱nñá xíʼin Jehová. Tándi̱ʼi ni̱ka̱ʼa̱nñá xíʼinra, na̱túʼunñá xíʼin ta̱ su̱tu̱ Elí xa̱ʼa̱ ña̱ xi̱ndoʼoñá. Ta̱yóʼo ni̱ka̱ʼa̱nra xíʼinñá: “Ná ku̱ʼu̱n va̱ʼún, ta ná taxi Ndióxi̱ na̱ ñuu Israel ña̱ ndu̱kún nu̱úra”. Ta, ¿ndáaña ku̱u? Ñá Ana “nda̱kiʼinñá ku̱a̱ʼa̱nñá ta xi̱xiñá ta va̱ása níkusuchíka-iniñá” (1 Sam. 1:17, 18). Ña̱ oración chi̱ndeétáʼan xíʼinñá ña̱ va̱ása níndi̱ʼi̱ka-iniñá.

6. Xíʼin ejemplo ñá Ana, ¿ndáaña sákuaʼayó xa̱ʼa̱ ña̱ oración ta saátu xíʼin tu̱ʼun ña̱ va̱xi nu̱ú Filipenses 4:6, 7?

⁶ Va̱ása ndi̱ʼi̱ka-iniyó tá ná ka̱ʼa̱n ni̱ʼiyó xíʼin Jehová. Ñá Ana ku̱a̱ʼá tiempo xi̱ka̱ʼa̱nñá xíʼin yiváñá ta̱ íyo chí ndiví (1 Sam. 1:12). Ta saátu miíyó kivi ku̱a̱ʼá tiempo ka̱ʼa̱nyó xíʼin Jehová, xa̱ʼa̱ ña̱ sándi̱ʼi̱-iniyó, ña̱ sáyi̱ʼví miíyó xíʼin xa̱ʼa̱ ña̱ va̱ása va̱ʼa ña̱ ke̱ʼéyó. Tá káʼa̱nyó xíʼin Jehová va̱ása xíniñúʼuví kuniñúʼuyó tu̱ʼun ña̱ yo̱ʼvi̱ní. Chi sava yichi̱, nda̱a̱ kivi kuakuyó tá káʼa̱nyó xíʼinra xa̱ʼa̱ ña̱ sándi̱ʼi̱-iniyó. Soo Jehová va̱ása kunaara ña̱ kuniso̱ʼora  ña̱ káʼa̱nyó. Ta su̱ví nda̱saa xa̱ʼa̱ ña̱ sáxo̱ʼvi̱ miíyó ka̱ʼa̱nyó xa̱ʼa̱ xíʼinra, chi saátu xíniñúʼu ndakaʼányó xa̱ʼa̱ consejo ña̱ káʼa̱n Filipenses 4:6, 7 * (kaʼviña). Nu̱ú ña̱ texto yóʼo káxiní ni̱ka̱ʼa̱n ta̱ Pablo, ña̱ xíniñúʼu taxiyó tíxa̱ʼvi nda̱ʼa Ndióxi̱ tá káʼa̱nyó xíʼinra. Ta ku̱a̱ʼání xa̱ʼa̱ kivi taxiyó tíxa̱ʼvi ndaʼa̱ra, tá kúú xa̱ʼa̱ ña̱ táxira ña̱ tákuyó, xa̱ʼa̱ ndiʼi ña̱ʼa ña̱ i̱xava̱ʼara, xa̱ʼa̱ ña̱ nda̱kúní íyo ña̱ kúʼvi̱-inira xínira miíyó, ta saátu xa̱ʼa̱ ña̱ ndátuyó ndakiʼinyó chí nu̱únínu. ¿Ndáaña sákuaʼakayó xíʼin ejemplo ñá Ana?

7. ¿Ndáaña xi̱keʼé ñá Ana xíʼin yiíñá?

⁷ Ni ni̱xo̱ʼvi̱ní ñá Ana, ndiʼi tiempo xi̱xa̱ʼa̱nñá xíʼin yiíñá nu̱ú xi̱ndasakáʼnuna Jehová, chí Siló (1 Sam. 1:1-5). Ta kán, kúú nu̱ú chi̱ka̱a̱ ta̱ su̱tu̱ Elí ndee̱ xíʼinñá tá ni̱ka̱ʼa̱nra xíʼinñá, ña̱ ndátura ña̱ ná ndakuiin Jehová ña̱ ni̱ka̱ʼa̱nñá xíʼinra (1 Sam. 1:9, 17).

8. Ka̱ʼa̱n ndáa ki̱ʼva kivi chindeétáʼan reunión xíʼinyó.

⁸ Kivi ndi̱ko-iniyó tá ná ndakundeéyó ku̱ʼu̱nyó reunión. Chi tá kúma̱níka kixáʼa reunión, kéʼéna iin oración ta káʼa̱nna xíʼin Jehová ña̱ ná taxira espíritu santora ndaʼa̱ ndiʼiyó. Ta ña̱ táxin-ini kúú táʼan ña̱ va̱ʼa ña̱ kúúmií espíritu Ndióxi̱ (Gál. 5:22). Ni tá ndíʼi̱ní-iniyó ku̱a̱ʼa̱nyó reunión, táxiyó ña̱ ná chindeé Jehová xíʼin na̱ hermano miíyó ña̱ táxin koo iniyó. Ña̱ oración xíʼin reunión, kúú u̱vi̱ ña̱ xíniñúʼu Jehová ña̱ sandíkora-iniyó (Heb. 10:24, 25). Ná kotoyó inka ña̱ sákuaʼayó xíʼin ña̱ ndo̱ʼo ñá Ana.

9. ¿Ndáaña va̱ása nínasa̱ma nu̱ú ñá Ana, ta ndáaña na̱sama?

⁹ Ña̱ xi̱sandíʼi̱-ini ñá Ana va̱ása níndiʼi kamaña. Tá nda̱ndikóñá ña̱ ni̱xa̱ʼa̱nñá nda̱sakáʼnuñá Ndióxi̱ ti̱xin ña̱ tabernáculo, inkáchika veʼe ni̱xi̱yoñá xíʼin ñá Peniná. Ña̱ Biblia va̱ása káʼa̱nña ña̱ na̱sama ñá Peniná ki̱ʼva ña̱ ni̱xi̱yoñá. Ta ñá Ana xi̱niñúʼu kundeéka-iniñá xa̱ʼa̱ ña̱ va̱ása va̱ʼa ña̱ xi̱ka̱ʼa̱n ñáyóʼo xíʼinñá. Soo ku̱táxinva-ini ñá Ana. Ná ndakaʼányó chi tá na̱túʼunñá xa̱ʼa̱ ndiʼi ña̱ xi̱ndoʼoñá xíʼin Jehová, va̱ása níndi̱ʼi̱ka-iniñá, ta̱xiñá ña̱ ná sandíkora-iniñá. Ta tá ni̱ya̱ʼa tiempo Jehová nda̱kuiinra ña̱ ni̱ka̱ʼa̱nñá xíʼinra, ta ka̱ku se̱ʼeñá (1 Sam. 1:19, 20; 2:21).

10. ¿Ndáaña sánáʼa̱ ña̱ ndo̱ʼo ñá Ana miíyó?

¹⁰ Kiviva ndi̱ko-iniyó ni tá va̱ása ndíʼi-xa̱ʼa̱ ña̱ sándi̱ʼi̱-iniyó. Sava yichi̱, tu̱ndóʼo ña̱ ndóʼoyó va̱ása kama ndíʼiña, ni káʼa̱nníyó xíʼin Ndióxi̱ ta xáʼa̱nyó ndiʼi reunión. Soo ña̱ ndo̱ʼo ñá Ana, sánáʼa̱ña miíyó ña̱ nda̱a̱ ni iin ña̱ʼa va̱ása kivi kasi nu̱ú Jehová ña̱ sandíkora-iniyó. Ta̱kán va̱ása nandósóra xa̱ʼa̱yó, ta taxivara ña̱ va̱ʼa ndaʼa̱yó xa̱ʼa̱ ña̱ nda̱kú íyo iniyó xíʼinra (Heb. 11:6).

11. ¿Ndáa xa̱ʼa̱ kúú ña̱ xi̱ndi̱ʼi̱-ini ta̱ Pablo?

¹¹ Íyo ku̱a̱ʼání xa̱ʼa̱ kúú ña̱ xi̱ndi̱ʼi̱-ini ta̱ Pablo. Tá kúú xa̱ʼa̱ ña̱ xi̱kuʼvi̱ní-inira xi̱xinira na̱ hermano, xi̱ndi̱ʼi̱ní-inira xa̱ʼa̱na tá xi̱yaʼana nu̱ú tu̱ndóʼo (2 Cor. 2:4; 11:28). Tá ni̱xi̱kara na̱túʼunra xa̱ʼa̱ Ndióxi̱, na̱ yiví na̱ xi̱sasi nu̱úra ka̱ninara ta chi̱ka̱a̱nara veʼeka̱a. Ta inka ña̱ xi̱sandíʼi̱-inira kúú ña̱ xi̱kuma̱ní ña̱ xi̱xiniñúʼura (Filip. 4:12). Ta ni̱xo̱ʼvi̱tura tá ni̱ki̱ʼvi barco tú ku̱a̱ʼa̱nra xíʼin ti̱xin ti̱kui̱í u̱ni̱ yichi̱, ña̱kán sana tá xi̱xa̱ʼa̱nra xíʼin barco xi̱yi̱ʼvíra (2 Cor. 11:23-27). ¿Ndáaña chi̱ndeétáʼan xíʼinra?

12. ¿Ndáaña chi̱ndeétáʼan xíʼin ta̱ Pablo ña̱ va̱ása níndi̱ʼi̱ka-inira?

 ¹² Ta̱ Pablo xi̱ndi̱ʼi̱-inira xa̱ʼa̱ tu̱ndóʼo ña̱ xi̱yaʼa na̱ hermano nu̱ú, ta xa̱ʼa̱ ña̱ vitá ni̱xi̱yo inira va̱ása níndasavií iinlá miíra ku̱a̱chi ña̱ xi̱kuumiína. Chi ni̱ka̱ʼa̱nra xíʼin inka na̱ cristiano ña̱ chindeétáʼanna xíʼinra ña̱ kundaana na̱ congregación. Tá kúú, ta̱xira chiñu yóʼo ndaʼa̱ ta̱ Timoteo xíʼin ta̱ Tito. Xa̱ʼa̱ ña̱ chi̱ndeétáʼan na̱ hermano yóʼo xíʼin ta̱ Pablo, va̱ʼaní ku̱nira ta va̱ása níndi̱ʼi̱ka-inira (Filip. 2:19, 20; Tito 1:1, 4, 5).

13. ¿Nda̱saa kivi kundiku̱n na̱ anciano yichi̱ ta̱ Pablo?

¹³ Ná ka̱ʼa̱nyó xíʼin inkana ña̱ chindeétáʼanna xíʼinyó. Tiempo vitin, ku̱a̱ʼání na̱ anciano ndóʼona nda̱a̱ táki̱ʼva ndo̱ʼo ta̱ Pablo. Xa̱ʼa̱ ña̱ kúʼvi̱ní-inina xínina na̱ hermano, xóʼvi̱na tá xítona yáʼa na̱yóʼo nu̱ú tu̱ndóʼo. Soo va̱ása kuchiñu iinlá na̱ anciano ndasaviína ku̱a̱chi ña̱ kúúmií na̱ hermano. Tá vitá íyo inina, ka̱ʼa̱nna xíʼin inka na̱ hermano ña̱ chindeétáʼanna xíʼinna, ta saátu sanáʼa̱na inkaka na̱ hermano ña̱ va̱ʼa chindeétáʼanna xíʼinna ña̱ kundaana na̱ congregación (2 Tim. 2:2).

14. ¿Ndáaña va̱ása níndi̱ʼi̱-ini ta̱ Pablo xa̱ʼa̱, ta ndáaña kivi sakuaʼayó xíʼin ña̱ ke̱ʼéra?

¹⁴ Ná ndakuniyó ña̱ xíniñúʼu sandíkona-iniyó. Ta̱ Pablo vitá ni̱xi̱yo inira, xa̱ʼa̱ ña̱yóʼo ta̱xira ña̱ ná sandíko na̱ migora inira. Va̱ása níndi̱ʼi̱-inira xa̱ʼa̱ ña̱ kivi ka̱ʼa̱n inka na̱ yiví xa̱ʼa̱ra, tá xi̱ka̱ʼa̱nra xíʼin na̱ hermano ña̱ chindeétáʼanna xíʼinra. Nu̱ú carta ña̱ ka̱ʼyíra ku̱a̱ʼa̱n ndaʼa̱ ta̱ Filemón, ni̱ka̱ʼa̱nra: “Ku̱si̱íní-inii̱ ta ni̱ndi̱ko-inii̱ tá na̱kunda̱a̱-inii̱ xa̱ʼa̱ ña̱ kúʼvi̱ní-iniún” (Filem. 7). Iin yichi̱, ni̱ka̱ʼa̱nra xa̱ʼa̱ sava na̱ sa̱ndíko-inira tá ni̱ndi̱ʼi̱ní-inira (Col. 4:7-11). Tá xíʼin ña̱ vitá-ini ndákuniyó ña̱ xíniñúʼu taxina ndee̱ ndaʼa̱yó, na̱ hermano xíʼin ña̱ si̱í-ini kivi keʼéna ña̱yóʼo.

15. ¿Ndáaña chi̱ndeétáʼan xíʼin ta̱ Pablo tá ni̱ndi̱ʼi̱ní-inira?

¹⁵ Ná kandíxayó ña̱ káʼa̱n tu̱ʼun Ndióxi̱. Ta̱ Pablo xi̱kunda̱a̱-inira ña̱ kivi sandíko tu̱ʼun Ndióxi̱ inira (Rom. 15:4). Ta saátu kivi taxiña ña̱ ndíchi ndaʼa̱ra ña̱ ya̱ʼara nu̱ú nda̱a̱ ndáaka tu̱ndóʼo (2 Tim. 3:15, 16). Ña̱ yichi̱ u̱vi̱ ña̱ xi̱ndika̱a̱ra veʼeka̱a ña̱ ñuu Roma, ku̱ndaa̱-inira ña̱ si̱lóʼo kúma̱ní ta kuvira. ¿Ndáaña ke̱ʼé ta̱ Pablo tá xi̱ndika̱a̱ra nu̱ú tu̱ndóʼo yóʼo? Ni̱ka̱ʼa̱nra xíʼin ta̱ Timoteo ña̱ kama ná ku̱ʼu̱nra kotorara, ta ná ku̱ʼu̱n rollo xíʼinra (2 Tim. 4:6, 7, 9, 13). ¿Nda̱chun? Saáchi nu̱ú ña̱ rollo yóʼo, sana va̱xi sava táʼví ña̱  Escrituras Hebreas, ta kivi kuniñúʼuraña ña̱ kaʼvira. Tá ná kaʼvi ni̱ʼiyó Biblia nda̱a̱ táki̱ʼva ke̱ʼé ta̱ Pablo, Jehová kivi kuniñúʼuraña ña̱ sandíkora-iniyó, ni nda̱a̱ ndáaka nu̱ú tu̱ndóʼo ná ya̱ʼayó.

16. ¿Ndáaña ndo̱ʼo ta̱ David xa̱ʼa̱ ña̱ ni̱ki̱ʼvira ku̱a̱chi?

¹⁶ Ña̱ xínitúni̱ ta̱ David sa̱ndíʼi̱níña-inira xa̱ʼa̱ ña̱ va̱ása va̱ʼa ña̱ ke̱ʼéra. Ni̱ki̱ʼvira ku̱a̱chi xíʼin ñá Bat-Seba, ta ndu̱kúra ki̱ʼva ña̱ kaʼnína yiíñá, ta xi̱kuni̱ra chise̱ʼéra ña̱ va̱ása va̱ʼa ña̱ ke̱ʼéra (2 Sam. 12:9). Tá xa̱ʼa̱, va̱ása níxikuni̱kara ndakanixi̱níra xa̱ʼa̱ ña̱ ke̱ʼéra, ta xa̱ʼa̱ ña̱yóʼo va̱ása viíka níkitáʼanra xíʼin Jehová, ta saátu ni̱ndi̱ʼi̱ní-inira, ta nda̱a̱ ki̱ʼin kue̱ʼe̱ miíra (Sal. 32:3, 4). ¿Ndáaña ke̱ʼéra ña̱ va̱ása níxo̱ʼvi̱kara xa̱ʼa̱ ña̱ ke̱ʼéra? ¿Ndáaña kivi chindeétáʼan xíʼinyó tá ná ki̱ʼviyó iin ku̱a̱chi?

17. ¿Ndáa ki̱ʼva náʼa̱ ña̱ káʼa̱n Salmo 51:1-4 ña̱ xíʼin ndiʼi níma̱ ta̱ David nda̱ndikó-inira?

¹⁷ Ná ka̱ʼa̱nyó xíʼin Jehová ña̱ kukáʼnu-inira xa̱ʼa̱yó. Tasaá ta̱ David ni̱ka̱ʼa̱nra xíʼin Jehová, ta xíʼin ndiʼi níma̱ra nda̱ndikó-inira, ta ni̱ka̱ʼa̱nra xíʼinra xa̱ʼa̱ ndiʼi ña̱ ke̱ʼéra (kaʼvi Salmo 51:1-4). * Ta va̱ʼaní ku̱nira xa̱ʼa̱ ña̱yóʼo (Sal. 32:1, 2, 4, 5). Tá ná ki̱ʼviyó iin ku̱a̱chi ná va̱ása chise̱ʼéyóña. Ná kuyatinyó nu̱ú Jehová ta ná ka̱ʼa̱nyó xíʼinra xa̱ʼa̱ ndiʼi ña̱ ke̱ʼéyó. Tasaá va̱ʼaní kuniyó, ta va̱ása xoʼvi̱kayó xa̱ʼa̱ ña̱ ke̱ʼéyó. Soo tá kúni̱yó ndikó tukuyó kutáʼanyó xíʼin Jehová, íyo inka ña̱ xíniñúʼu keʼéyó.

18. ¿Ndáaña ke̱ʼé ta̱ David tá ta̱xi Jehová consejo ndaʼa̱ra?

¹⁸ Ná ndakiʼinyó consejo ña̱ táxina ndaʼa̱yó. Tá chi̱ndaʼá Jehová ta̱ profeta Natán ña̱ ku̱ʼu̱nra ka̱ʼa̱nra xíʼin ta̱ David xa̱ʼa̱ ña̱ ke̱ʼéra, ta̱yóʼo kǒo níka̱ʼa̱nra ña̱ va̱ása ndeé ña̱ ke̱ʼéra. Chi ndi̱ku̱n nda̱kunira ña̱ ke̱ʼéra ña̱ va̱ása va̱ʼa xíʼin yií ñá Bat-Seba, ta saátu ni̱ki̱ʼvira ku̱a̱chi nu̱ú Ndióxi̱. Ta̱ David nda̱kiʼinra consejo Jehová tasaá i̱xakáʼnu-inira xa̱ʼa̱ra (2 Sam. 12:10-14). Tá ni̱ki̱ʼviyó iin ku̱a̱chi, ná ka̱ʼa̱nyó xa̱ʼa̱ ña̱ ke̱ʼéyó xíʼin na̱ nda̱kaxin Ndióxi̱ kuniʼi yichi̱ nu̱úyó (Sant. 5:14, 15). Ta xíniñúʼu ndakuniyó ku̱a̱chiyó. Tá kama ná ndakiʼinyó  consejo ta nasamayó ña̱ kéʼéyó, va̱ása ndi̱ʼi̱ka-iniyó ta si̱í kuniyó.

19. ¿Ndáaña xíniñúʼu chika̱a̱-iniyó keʼéyó?

¹⁹ Ná chika̱a̱-iniyó ña̱ va̱ása ki̱ʼvi tukuyó ku̱a̱chi ña̱ xa̱a̱ ni̱ki̱ʼviyó. Ta̱ rey David xi̱kunda̱a̱-inira ña̱ xíniñúʼu chindeétáʼan Jehová xíʼinra, ña̱ va̱ása ndikó tukura ki̱ʼvira ku̱a̱chi ña̱ xa̱a̱ ni̱ki̱ʼvira (Sal. 51:7, 10, 12). Tá i̱xakáʼnu-ini Jehová xa̱ʼa̱ra, chi̱ka̱a̱-inira ña̱ va̱ása ndakanikaxi̱níra xa̱ʼa̱ ña̱ va̱ása va̱ʼa. Ta ña̱ va̱ʼa nda̱kiʼinra kúú ña̱ ku̱táxin-inira.

20. ¿Ndáa ki̱ʼva náʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ íxakáʼnu-inira xa̱ʼa̱yó?

²⁰ Náʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ íxakáʼnu-inira xa̱ʼa̱yó, tá ndúkúyóña nu̱úra ti̱xin oración, tá ndákiʼinyó consejo ña̱ táxira ndaʼa̱yó, ta saátu tá chíka̱a̱yó ndee̱ ña̱ va̱ása ki̱ʼvi tukuyó ku̱a̱chi ña̱ xa̱a̱ ni̱ki̱ʼviyó. Tá kéʼéyó ña̱yóʼo va̱ʼaní kúniyó. Ña̱yóʼo kúú ña̱ ndo̱ʼo iin ta̱ hermano ta̱ naní James ta̱ ni̱ki̱ʼvi iin ku̱a̱chi. Káchira: “Tá na̱túʼi̱n xíʼin na̱ anciano xa̱ʼa̱ ña̱ ke̱ʼíi̱, nda̱a̱ táki̱ʼva íyo na̱ sa̱kútaʼa iin ña̱ ve̱e sa̱tái̱ saá ni̱xi̱yona. Ta nda̱a̱ va̱ʼa ki̱xáʼa kúnii̱”. Va̱ʼaní kúniyó tá kúnda̱a̱-iniyó, ña̱ yatin íyo Jehová xíʼin na̱ kúsuchí-ini, ta chíndeétáʼanra xíʼin na̱ ndákava-ini (Sal. 34:18).

21. ¿Nda̱saa kivi taxiyó ña̱ sandíko Jehová iniyó?

²¹ Tá kúyatinka ña̱ ndiʼi-xa̱ʼa̱ ñuyǐví yóʼo, sana koo ña̱ sandi̱ʼi̱ka-iniyó. Tá ná kixáʼa ndi̱ʼi̱ní-iniyó, kama ná ka̱ʼa̱nyó xíʼin Jehová ña̱ chindeétáʼanra xíʼinyó. Ná kaʼvi ni̱ʼiyó Biblia. Ná kundiku̱nyó ña̱ ke̱ʼé ñá Ana, ta̱ Pablo xíʼin ta̱ David. Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ kunda̱a̱-iniyó ndáaña sándi̱ʼi̱-iniyó (Sal. 139:23). Ná sandákooyó ña̱ sándi̱ʼi̱-iniyó ndaʼa̱ Jehová, tá kúú ña̱ kǒo kívi nasamayó. Tá ná keʼéyó ña̱yóʼo va̱ʼaní kuniyó, nda̱a̱ táki̱ʼva ndo̱ʼo ta̱ salmista ta̱ xi̱ta ña̱yóʼo nu̱ú Jehová: “Tá ki̱xáʼa ni̱ndi̱ʼi̱ní-inii̱, miíún sa̱ndíkoún-inii̱” (Sal. 94:19).