1. ǂÂiǂhansende tae-i xa a ǃaroma-e ǁkhā tsî nēsa mati a tsâǀkhā da ǁkhā?

XŪ-I xa du kaise ge ǀnai ǂhansen hâ i? * ǀNîsi du ge ǃgâsa-i ge mî tsî dī xū-i xa kaise ge tsûaǂgao kaihe. Tamas ka io du ge sadu ge mî tsî dī xūn xa tsūse a tsâ ǁkhā. Aiǁgause, du ge ge dīsā tsî ra ǂâi Jehovab ge ǀûba du tide di. Tsî du ge nēs xa ǃaroma-e hâse a ǂâi ǁkhā ǀgaisa ǂgomsa du ūhâ tama hâ tsî a ǁgai khoesa. Xawe nēsa a ama?

2. Mâ Elobmîs aiǁgaude ra ǁgau ǂâiǂhansens tsū tamasa?

² ǀNî Elobmîs aiǁgaude ǃoa kō re. Hannas kēbo-aob Samueli ǁgûs ge ǀgaisa ǂgomsa ge ūhâ i. Xawes ge Hannasa, Peninas xa ǁgaise gere hâ ūhe tsî ǁnās xa ǃaromahe hâse gere ǂâiǂhansen. (1Sam. 1:7) Apostel Paulub ge ǀgaisa ǂgomsa ge ūhâ i xaweb ge gere ‘ǂhansen ǀhaohâgu hoagu ǃgao.’ (2Kor. 11:28) Gao-aob Davib tsîn ge ǀgaisa ǂgomsa ge ūhâ i tsîb ge Jehovaba ǁîba kaise ge ǀnam i. (ǃNǃkh. 13:22) Xaweb ge Davib tsîna ge dīsā tsî nēs xa ǃgâi tamase gere tsâ. (Psa. 38:4) Jehovab ge hoana ge ǁkhaeǂgao. Hā re, i da kō tae-e da ǁîn aiǁgaude xu a ǁkhāǁkhāsen ǁkhā ǃkhaisa.

3. Tae-i ǃaroma da a ǂhansen ǁkhā ǃgâsa-i ga ǃgâi tama xū-e sada xa mî o?

³ Khoen ga ǃgâi tamase tsî ǁgaise sada ǀkha ǃhoa o, o da ge ǃgâi tamase ra tsâ. Xawe nēs ge ǃgōsase a ama ǃgâsa-i ga tsûtsû da o. Nēs ge a ǃaroma ǁkhā îs sida ǀhōsagusisa ǁnā ǃgâsa-i ǀkha ǀam. ǁNā ǃgâsa-i hîna go tsûtsû da i ga ǁgaise sada ǀkha ǃhoa o, o da ge gôab ǀkha ra ǃkhahe khami a tsâ ǁkha. (ǂKhm. 12:18) Tamas ka io i ge ǃgâsa-e tsûaǂgao kai da nî mîna a sîsen-ū ǁkhā. ǀGui ǂkham ǃgâsas ge nē xūna ge ǃkharu ǃnâ. “ǃGâi ǀhōsa-i ase ta gere mû khoe-i ge tide xa ama tama xūna ge ǃhoa tsoatsoa” dis ge ra mî. “Nēs ge gere tsûaǂgao tsî ǂâiǂhansen kaide. ǁNâuǃā tama ta ge ge hâ i, ti ǀhōs tae-i ǃaroma nēti i xū-e tida ǃoa gere mîsa.” ǀGū ǀhōsa-i, ǀaokhoe-i tamas ka io ǃgâsa-i xa du ga tsûtsû-e o, o du ge Hannas aiǁgausa xu a ǁkhāǁkhāsen ǁkhā.

4. Hannasa mâ ǃgomsiba gere hōǃâ?

⁴ Hannas tsîn ge ǃgomsina gere hōǃâ. ǀGôa-es ge ge hō ǁoa i. (1Sam. 1:2) Tare khoes ga ǀgôa-e hō ǁoa o, os ge Elob xa ǀkhaehe tama khoe-i ase gere mû-e Israelǁaes ǃoagu. Nēs ge tarekhoede kaise gere tao kai. (Gen. 30:1, 2) Hannas kaikhoeb ǀgamǁî taras Peninas ge ǀgôana ge hōǁkhā i, tsî nēs ge Hannasa gere tsûaǂgao kai. Peninas ge Hannasa gere suri tsî ǁîsa gere ‘ǁgonǁgonǂgao’ tsî gere ǂhâba îs ǁaixa. (1Sam. 1:6) ǂGuros ge Hannasa nēsa ge tani ǁoa i. ǁÎs ge kaise nēs xa ǁaixa tsî “ā tsî ǂû tama ge hâ i.” ǁÎs ge kaise nēs xa gere “ǃoa” kaihe. (1Sam. 1:7, 10) Hannasa mati ge ǁkhaeǂgaohe?

5. ǀGoresa Hannasa mati ge hui?

⁵ Hannas ge ǁîs tsâsiba Jehovaba ǀgores ǃnâ ge mîba. ǀGore toas ges khaoǃgâs ge ǁîs ǃgomsiba ǀGapi pristeri Eliba ge ǁguiǃāba. ǁÎb ge ǁîsa ge mîba: “ǃGû ǂkhîb ǃnâ, îb Elob Israeli diba sa ǀgores, hîas goro ǀgoresa ǁnâu-am si.” ǀAmǂoasa ge tae-i? Hannas ge “ǁîs di daoba ge ǃgû; tsîs ge ge ǂû.” Tsîs ge ǂguros xa ge  ǃgâiaǂgao. (1Sam. 1:17, 18) ǀGores ge Hannasa ge hui îs ǂkhîba ūhâ.

6. Hannas aiǁgaus tsî Filipeǁîn 4:6, 7 tsîna xu da taena ǀgores xa a ǁkhāǁkhāsen ǁkhā?

⁶ ǀGores ǃnâ da ga mâǀgai o, o da ge sada ǂkhîba a ūhâ ǀgara ǁkhā. Hannas ge ǀgores ǃnâ gaxu ǁaeba ǁîs di ǀhomsi ǁgûb ǀkha gere ǃhoa. (1Sam. 1:12) Sada tsîn ge ǀgores ǃnâ Jehovaba taen xa da ra ǂhansen, ǃaos tsî sada ǂkhabusasigu xas tsîn xa a mîba ǁkhā. Sada ǀgorede ǂoaǂamsa ǀgaugu ǃnâ dīs ge ǂhâbasa tama hâ. ǀNî ǁaen ais tsîna da ge a ā ǁkhā Jehovaba da ga sada ǃgomsin xa a mîba o. Jehovab ge sada ǀgorede ǃgâsa tsau tide. ǀGore da ra ǁaeb ai da ge Paulub daoǁgaus hîna Filipeǁîn 4:6, 7 ǃnâ hâs xa nî ǂâi. (Khomai re.) Paulub ge ge mîba da i da Jehovaba sada ǀgoredi ǃnâ gangan. ǂGui ǃaromade da ge ūhâ Jehovaba da a gangan ǁkhābade. Aiǁgause da ge ǁîba ûib hînab ge mādab, kurus, ǂgomǂgomsa ǀnammi tsî ǃâubasens hîna da ūhâs ǃaroma a gangan ǁkhā. Hannas aiǁgausa xu da tae-e a ǁkhāǁkhāsen ǁkhā?

7. Hannas tsî ǁîs kaikhoeb tsîna tae-e hoaǁae gere dī?

⁷ ǃGomsinas gere hōǃâ xawes ge Hannasa mâ kurib hoaba, ǁîs di kaikhoeb ǀkha Silosa ǃoa gere ī Jehovaba sī ǃoabas ǃgao. (1Sam. 1:1-5) Nēbas Hannas Tabernakeli tawa hâ hînab ge ǀGapi pristeri Eliba ǁîsa ge mîba ǂgomi ra ǃkhaisa Jehovab ǁîs ǀgorede nî ǁnâu-amsa.—1Sam. 1:9, 17.

8. ǀHoade tae-e a diba da ǁkhā? ǁGuiǃā re.

⁸ Sada ǂkhîba da ge a hō-oa ǁkhā ǀhaode ǁhaoǃnâs ǀkha da ga ai ǃgû o. Tsoatsoas ǃnâ ra dī-e ǀgores ǃnâ da ge Elob ǃanu gagaba ra ǂgānbahe. ǂKhîb ge Elob ǂûgu di ǀgui ǂûba. (Gal. 5:22) Sada ǀhaode da ga ǃgomsina da ūhâ hîna a ǁhaoǃnâ o, o da ge Jehovab tsî sada ǃgâsan tsîna aiǂhanuba ra mā în ǂkhâǃnâ tsî hui da i da ǃnomsa ǂgaoga hō. ǀGores tsî ǀhaodi ǃnâ-ūb ge Jehovaba ra ǁkhaeǂgao da. (Heb. 10:24, 25) Hā re i da nēsa ǃhoaǃgao. ǀNî hâ xūn hîna da Hannasa xu a ǁkhākhāsen ǁkhān.

9. Tae-e Hannas mâsib ǃnâ ge ǀkhara tama hâ i xawe Hannasa tae-e ge dī?

⁹ Hannas ǃgomsiba gere ǃaroma xūn ge ǃhaese ge bē tama hâ i. Hannas ge tabernakeli tawas gere ǃoabasa xu a oa ǀkhī xawes ge noxoba Peninas ǀkha ǀgui oms ǃnâ gere hâ. Tsî Elobmîs ge mî tama hâ Peninas tanisen ǀgaub ge a ǀkhara ǃkhaisa. Nēs ǃaromas ge Hannasa noxoba Peninas tsûtsûsa mîde gere ǁnâu. Xawes ge Hannasa ǃaruǀî ge ǁaixa tama hâ i. Hannas ge ge ǂgomǃgâ Jehovab ge ǁîs di ǀgoresa a ǁnâu-amsa tsî nēs ǀkha ge ǃnomsa i. ǁÎs ge Jehovaba ge mā-am îb ǁîsa ǁkhaeǂgao. ǁAe-e ǃkharu tsîb ge Jehovaba Hannas ǀgoresa ge ǁnâu-am tsîs ge Hannasa ǀgôana ge hō.—1Sam. 1:19, 20; 2:21.

10. Hannas aiǁgausa xu da tae-e ra ǁkhāǁkhāsen?

¹⁰ Sada ǃgomsin ga bē tama i xawe da ge ǂkhîba a ūhâ ǁkhā. Hoaǁae da ra ǀgore tsî ǀhaode ǁhaoǃnâ xawen ge sada ǃgomsina bē tide. Xawe da ge Hannas aiǁgausa xu ra mû xū-i Jehovaba ǁkhae tide ǃkhaisa sada ǁkhaeǂgaos ǃnâ. Jehovab ge tātsē ǀuru da tide tsî sada ǂgomǂgomsasib ǃaroma nî ǀkhae da.—Heb. 11:6.

11. Tae ǃaromadeb Pauluba ge ūhâ i ǂkhabuǂâis tide?

¹¹ Paulub ge ǂgui ǃaromadi ǂkhabuǂâiba ǁkhāb ge î de ge ūhâ i. Aiǁgause ǁîb ǃgâsanab ge kaise ǀnam i amagab ge ǁîn ǃgomsin xa gere ǂâiǂhansen. (2Kor. 2:4; 11:28) ǁÎb ge ǃgom ǁaegu ǃnâs tsîna ge ǃkharu hînab ge ‘ǂhâb ǃnâ hâ i ga.’ (Fil. 4:12) Tsîb ge ǂgau khôas ǃnâ ǃnona ǃāde ge hâ i tsî ǂgui ǃgomsin tsîna gere hōǃâ. (2Kor. 11:23-27) Tae-e Pauluba nē ǃgom ǁaegu ǃnâ ge hui?

12. Tae-e Paulub ǃgomsina ǀoroǀoros ǀkha gere hui?

¹² Paulub ge ǁîb ǃgâsan ǃgomsina gere hōǃâ ǁaeb ai gere ǂâiǂhansen xaweb ge ǁîn ǃgomsina ǀguri ge sîsenǂam tama hâ i. Paulub ge ǀnōsa ǂaiǀgauba ge ūhâ i. ǁÎb ge ǀnîna aiǂhanuba gere mā în ǀhaohâb ǃnâ hui. Aiǁgauseb ge ǂgomǃgâhe ǁkhā khoegu Timoteub tsî Titub tsîgu khami i ga aiǂhanuga gere mā. Nē ǃgâsagu gere dī sîsen-i ge Paulub ǃgomsina gere ǀoroǀoro.—Fil. 2:19, 20; Tit. 1:1, 4, 5.

13. ǀHaohâb ǃûi-aoga mati Paulub aiǁgausa a ǁgae ǁkhā?

¹³ Huiba ǂgan re. Paulub khami gu ge nētsē ǀnamxaǃnâ ǀhaohâb ǃûi-aoga nau ǃgâsana ǁîn ǃgomsin ǃnâ ra tsâba. Xawe gu ge ǀhaohâb ǃûi-aoga hoa xūna a dī ǁoa. ǀNōsa ǂâiǀgauba ūhâs ge nî huigu î gu nē mâsiba nēs ǃnâ ǃgâi ǂansa ūhâ ǃgâsagu ǀkha ǀgoragu î gu hui-e Elob gūna kōǃgâs ǃnâ.—2Tim. 2:2.

14. Pauluba tae-i xa ge ǂâiǂhansen tama hâ i tsî tae-e da ǁîb aiǁgausa xu a ǁkhāǁkhāsen ǁkhā?

¹⁴ ǁKhaeǂgao-esa da ǂhâ hâsa da ge nî mûǂan. Paulub ge ge ǃgamǃgamsen xa i tsî ge mûǂan ǁkhaeǂgao-esab ǂhâ hâ ǃkhaisa ǁîb ǀhōsana xu. ǁÎb ge ge ǂâiǂhânsen tama hâ i nau khoen ǁîb a ǂkhabusa di nî mîsa ǁîb ǀhōsana xub huiba ra ǃkhōǃoa amaga. Filemonna ǃoab ge xoa o, ob ge Pauluba ge mî: “Kai ǃgâiaǂgaob tsî ǁkhaeǂgaob tsîkha khom sa ǀnammi ǂama ūhâ.” (Flm. 7) Paulub ge ǀnî hâ hû sîsenǁare-aon tsîna ge ǂgai hîna ge ǁîba ǁîb ǃgom ǁaegu ǃnâ a huina. (Kol. 4:7-11) Mûǂan da ga o ǂkhâǃnâ-esa da ǂhâ hâsa on ge sada ǃgâsana  mâsenxase huib hîna da ǂhâ hâba nî mā da.

15. Pauluba ǃgomsibab gere hōǃâ o, o tae-e ge dī?

¹⁵ Elobmîs ai ǂgomaiǂnûi re. Paulub ge ge ǂan i xoas ǁîba nî ǁkhaeǂgao ǃgâisa. (Rom. 15:4) Nēs ge gā-aisib tsîna nî mā bi ǁîb ǃgomsina tani hōs ǃaroma. (2Tim. 3:15, 16) ǀGamǁî ǃnāsab ge Romes ǃnâ ǃkhōsis ǃnâ ūhe o, ob ge Pauluba ǁîb ǁōb a ǀgūsa ge hōǃâ. Nē ǃgomsigu ǃnâb Pauluba tae-e ge dī? ǁÎb ge Timoteuba ge ǂgan îb ‘ǂkhanide’ hā-ūba bi. (2Tim. 4:6, 7, 9, 13) Tae-i ǃaroma? Nē ǂkhanidi ǀnîsi Hebre Xoadi ǃâ-e ge ūhâ i amaga hînab ǁîb Elobmîs ǁkhāǁkhās ǃnâ a sîsen-ū ǁkhāde. Pauluba da ga ǁgae tsî hoaǁae Elobmîsa ôaǃnâ o, ob ge Jehovaba xoasa nî sîsen-ū ǁkhaeǂgao das ǃgao.

16. Daviba tsū ǁorebab ge dī toas khaoǃgâ mati gere tsâ?

¹⁶ Davib ge ǁgai xū-e de dī. ǁÎb ge Batsebas ǀkha ge ǁgoe tsî ǁîs aoba ge ǃgam kai tsî nēsa gere sâu ǂgao. (2Sam. 12:9) ǂGurob ge Daviba ǁîb ǃgâiǂâisa ge ǃgâ ǂgao tama hâ i. Nēs xa ǃaroma-e hâseb ge ǃgomsina gere hōǃâ tsîs ge nēsa Jehovab ǀkhab ge ūhâ i ǀhōsagusisa ge khôa tsîb ge nēs xa gere tsûadana tsî ge ǀaesen. (Psa. 32:3, 4) Tae-e Daviba ge hui îb nē mâsib hînab ge ǃaromab ǃnâ mâǀgai tsî tae-e nî hui da tsū ǁore-e da ga dī o?

17. Psalmdi 51:1-4 ǃnâ hâ mîde mati Davib di ǂgaoba xu hâ ǃhâusens mîde ra ǁgau?

¹⁷ Sadu ǁoren ǀûbasa ǀgoreba re. Davib ge ǀams ai Jehovaba ǃoa ge ǀgore. Tsîb ge amabes ǃnâ ǃhausen hâse ǀgores ǃnâ Jehovaba hoa xūna ge mîba. (Khomai re Psalmdi 51:1-4.) Nēs ge ge hui bi îb ǂkhîb tsî ǃnomsasib tsîna hō-oa. (Psa. 32:1, 2, 4, 5) Tsū ǁore-e du ga dī o, o tā nēsa sâu re. Xawe sadu ǁorena Jehovaba ǀgores ǃnâ mîba re. Nēs khaoǃgâ du ge ǃnomsase nî tsâ tsî ǂkhabuǂâi tide. Xawe du ga sadu ǀhōsagusisa Jehovab ǀkha dī-unu ǂgao o du ge ǀgores xa ǃnāsa-e nî dī.

18. Daviba ǁnamasa mati ge ǃkhōǃoa?

 ¹⁸ ǁNamasa ūǃoa re. Jehovab ge Natanna sî o îb sī Davib ǁoreba ǂhaiǂhai ob ge Daviba nēsa ge ǃhoabe tamas ka io ge mî tama hâ i nē ǁoreb kaise ǁgai tama hâ di. Xaweb ge ge mûǂan ǁoreb ge ǃkhaisa Batsebas aob ǃoa-ai tsî ǂhâǂhâsase Jehovab ǃoa-ai. Davib ge ǁnamasa Jehovaba xu ge ūǃoa tsîb ge Jehovaba ge ǀûbabi. (2Sam. 12:10-14) Tsû ǁore-e da ga dī o, o da ge Jehovab ge sada kōǃgâs amsi a ǁgaumâi aogu ǀkha nî ǃhoa. (Jak. 5:14, 15) Tsî da ge sada a ǂhanu ǃkhaisa tā nî ǃkham ba. ǃHaese da ga ǁnamasa ūǃoa tsî daoǁgausa soa o, o da ge sada ǂkhîba nî hō-oa.

19. Tae-e da nî mîmâi dīsa?

¹⁹ ǁKhā ǁoreba dīsa xu ǂgō re. Gao-aob Davib ge ge mûǂan ǁkhā ǁoreba dīsa xu ǂgōsens ǃaromab Jehovab huiba ge ǂhâ hâ i ǃkhaisa. (Psa. 51:7, 10, 12) Jehovaba xab ge ǀûbahes khaoǃgâb ge Daviba ǃgarise gere ditsâ îb ta ǁgai ǂâiǀgauba omkhâi. Tsîb ge ǁîb ǂkhîba ge hō-oa.

20. Mati da a ǁgau ǁkhā Jehovab xa ǀûbahesa da ra ǃgôaǃgâ ǃkhaisa?

²⁰ ǃGôaǃgâsiba da ge ra ǁgau Jehovab xa ǀûba-esa da ga ǀgoreba ǁnamasa ūǃoa tsî ǃgarise sîsen o i da tā ǁkhawa ǁkhā ǁore-e dī. Nē xūna da ga dī o, o da ge sada ǂkhîba nî hō-oa. Jamesi hîna ge ǁgai ǁore-e a dīb ge nēs a ama ǃkhaisa ge mûǂan. ǁÎb ge ra mî: “ǀHaohâb ǃûi-aoga ta ge ti ǁoreba a mîba o, o ta ge xū-i ge ti ǃhode xu a ūǁnâhe khami ge tsâ. Ti ǂkhîba da ge ge hō-oa tsoatsoa.” ‘Jehovab ge ǀgūse hâba ǁnān, khôaǂkhūsa ǂgaoga ūhâna, tsîb ge khôaǂkhūsa ǂâidi â-ina ra sâu’ nēsa ǂans ge kaise ra ǂkhâǃnâ da.—Psa. 34:18.

21. Mati da Jehovaba a mā-am ǁkha îb ǁkhaeǂgao da?

²¹ Nē ǀuni tsēdi ra ǀgu khami di ge ǂâi ǂkhansende nî ǂgui. ǂÂiǂhansens tsâsiga da ga hō o, o da ge ǁnā ǁaeb ai Jehovaba ǃoa nî ǀgore. Elobmîsa ǃgâise ôaǃna re. Hannas, Paulub, tsî Davib tsîn di aiǁgaude xu ǁkhāǁkhāsen re. Sadu ǀhomsi ǁGûba ǂgan re îb hui du mûǂansa tae-i sadu ǂhansende ra ǃaromasa. (Psa. 139:23) Mā-am bi re îb sadu ǃgomsin ǀkha hui du ǃgōsase ǁnān hîna du a tani ǁoana. Nēsa du ga dī o, o du ge Psalmdi xoa-aob khami a i ǁkhā Jehovaba ǃoa ge ǁnaeba: “Ti ǂâidi ge ti ǃnâ ǂguio, o di ge sa ǁkhaeǂgaode ti ǀomsa ge khoakhoa.”—Psa. 94:19.