1. ¿Tlen uelis techtekipachos uan tlen uelis timokuayejyekoskej?

¿SAPANOUA timotekipachouaj? * Xamo timotekipachouaj porque ikaj itlaj okijto noso itlaj okichi uan otechyolkoko. Noijki xamo timotekipachouaj porque otikchijkej itlaj amo kuali noso otikijtojkej. Xamo otitlajtlakolchijkej uan techtekipachoua kox yotechtlapojpolui Jehová. Xamo timokuayejyekouaj ijkon timomachiliaj porque amo titlaneltokaj uan amo kuali toyelis. Pero ¿kuali tla ijkon timokuayejyekouaj?

2. ¿Ken tikmatij ijkuak timotekipachouaj amo kijtosneki amo titlaneltokaj?

² Ma tikitakan tlen okinpanok sekimej itekipanojkauan Jehová tlen yiuejkika okatkaj. Ana tlen okatka inantsin Samuel sapanoua otlaneltokaya. Pero sapanoua omotekipachouaya porque se siuatl okitlajyouiltiaya (1 Sam. 1:7). Tlatitlanil Pablo noijki otlaneltokaya pero okitekipachouaya  ‘kenomi kateh sentetl n tokniwah’ (2 Cor. 11:28). Jehová okitlasojtlaya David porque ye okineltokaya (Hech. 13:22). Pero otlajtlakolchi uan otlajyoui (Sal. 38:4). Maski otlajyouijkej, Jehová okinyolchika uan okinyolseui. Ma tikitakan tlen techmachtia tlen okichijkej.

3. ¿Tleka ualeua techtekipachoua tlen oksekimej kijtouaj?

³ Ualeua timotekipachouaj porque techiluiaj itlaj amo kuali noso itlaj techchiuiliaj. Pero okachi techyolkokoua tla otechchiuili se toyolikni noso ikaj tlen iuan tichantij. Xamo techtekipachoua kox ok iuan timouikaskej. Ualeua akinmej techyolkokouaj amo kitaj tlen techchiuiliaj uan tikmachiliaj ‘techtsopitiaj ken se espada’ (Prov. 12:18). Pero ualeua itlaj techiluiaj porque kinekij techyolkokoskej. Ma tikitakan tlen okipanok se tokni. Ye okijto: “Yikipia seki xiuitl se noyolikni san tlen amo opejki kitlalia itech Internet kanin okijtouaya tlen onikchiuaya. Onimoyolkoko uan onimotekipacho. Amo onikajsikamatiaya tleka ijkon onechchiuili. Onikmachiliaya ken onechtsoponili se cuchillo nokuitlapan”. Tla ikaj ijkon yotechyolkoko, techpaleuis tlen okichi Ana.

4. ¿Tlen ouijkayotl okixnamik Ana?

⁴ Ana okixnamik miak ouijkayotl. Ye amo ueli okinpiaya ikoneuan (1 Sam. 1:2). Ijkuak okatkaj israelitas okinpinauiayaj siuamej tlen amo okinpiayaj inkoneuan. Ik non, Ana sapanoua omoyolkokouaya (Gén. 30:1, 2). Noijki omoyolkokouaya porque inamik okipiaya okse siuatl itoka Peniná uan ye okinpixki ikoneuan. Peniná okikokoliaya Ana uan nochipa okipinauiaya (1 Sam. 1:6). Ana amo kuali omomachiliaya. Ik non, “ochokaya uan ayakmo otlakuaya” uan “sapanoua omoyolkokouaya” (1 Sam. 1:7, 10). ¿Tlen okipaleui ayakmo ma moyolkoko?

5. ¿Ken okipaleui Ana ijkuak omotlatlaujti?

⁵ Ana okilui Jehová nochi tlen okitekipachouaya. Ijkuak otlanki omotlatlaujti okilui Elí nochi tlen okipanouaya. Elí okilui: “Xio uan ayakmo ximotekipacho uan iDios Israel ma mitsmaka tlen otiktlajtlanili”.  ¿Tlen okipanok? Ana “oyajki uan opejki tlakua uan ayakmo omotaya itlaj okitekipachouaya” (1 Sam. 1:17, 18). Omoyolseui ijkuak omotlatlaujti.

6. ¿Tlen techmachtia ijkuak Ana omotlatlaujti uan tlen techmachtia Filipenses 4:6, 7?

⁶ Timoyolseuiskej tla nochipa timotlatlaujtiaj. Ana ouejkauaya omotlapouiaya iuan Jehová (1 Sam. 1:12). Tejuan noijki uelis tikiluiskej nochi tlen techtekipachoua, tlen techmomojtia uan tlen amo kuali tikchiuaj maski tiuejkauaskej. Amo moneki tiktemoskej tlajtolmej tlen okachi kuajkualtsitsintin ijkuak timotlapouiskej iuan Jehová noso achto tikitaskej ken iuan timotlapouiskej. Xamo ualeua hasta titlauelchokaskej. Pero Jehová amo keman kijtoua ayakmo techkakis. Pero amo san moneki tikiluiskej tlen ouijkayotl tikixnamikij. Noijki moneki tikilnamiktoskej tlen kijtoua Filipenses 4:6, 7 (xiktlajtolti). Pablo okijto ma tiktlasojkamatilikan Jehová ijkuak iuan timotlapouiaj. Ma tiktlasojkamatilikan techmaka toyolilis, tlen okichijchi, techtlasojtla uan nochi tlen yotechilui kichiuas. ¿Tlen techmachtia tlen okichi Ana?

7. ¿Tlen okichiuaya Ana uan inamik?

⁷ Ana maski otlajyouijtoka oyaya iuan inamik ompa Siló kanin okiueyichiuayaj Jehová (1 Sam. 1:1-5). Teopixki Elí okiyolchika Ana ompa kanin okatka tabernáculo uan okilui Jehová ma kimaka tlen okitlajtlanili (1 Sam. 1:9, 17).

8. Xikijto ken techpaleuia tla timonechikouaj.

⁸ Timoyolseuiskej tla timonechikouaj. Ijkuak peua tonechikol, se tokni motlatlaujtia uan kiluia Jehová ma techmaka iespíritu santo. Porque iespíritu santo toTajtsin Dios techpaleuia ma timoyolseuikan (Gál. 5:22). Ma timonechikokan maski ualeua sapanoua timotekipachouaj porque ijkon tikkauiliaj Jehová ma techyolchikaua uan noijki timoyolchikauaj iuan tokniuan. Jehová techyolchikaua ijkuak timotlatlaujtiaj uan timonechikouaj (Heb. 10:24, 25). Ma tikitakan tlen okseki techmachtia tlen okichi Ana.

9. ¿Tlen amo okikixtilijkej Ana uan ken omomachili satepan?

⁹ Jehová amo san niman okikixtili tlen okitekipachouaya Ana. Ijkuak Ana otlanki omotlapoui iuan Jehová, omokopki ikalijtik uan ok ochantiaya iuan Peniná. Biblia amo kanaj kijtoua Peniná okipatlak iyelis. Ik non, ok okipinauiaya Ana. Pero Ana omoyolchika uan okatka ika yolseuilistli. Ayakmo omoyolkoko ijkuak ouijkayotl okika imak Jehová. Okikauili ma kiyolchikaua uan ma kiyolseui. Satepan Jehová okinankili uan okinpixki ikoneuan (1 Sam. 1:19, 20; 2:21).

10. ¿Tlen techmachtia tlen okipanok Ana?

¹⁰ Uelis timoyolseuiskej maski amo techkixtiliskej ouijkayotl. Ualeua amo moyektlalia ouijkayotl maski nochipa timotlatlaujtiskej uan maski timonechikoskej. Pero Ana techititia amikaj uelis kiluis Jehová amo ma techyolseui. Jehová amo keman techilkauas uan se tonal technankilis (Heb. 11:6).

11. ¿Tleka Pablo omotekipachouaya?

¹¹ Pablo noijki okitekipachouaya miak tlamantli. Okintlasojtlaya tokniuan, ik  non, okitekipachouaya tlen okinpanouaya (2 Cor. 2:4; 11:28). Ijkuak otetlapouiaya okiuitekej uan okitsakuatoj akinmej okikokoliayaj. Noijki okitekipachouaya kox kajxiliskia itomin porque amo miak okipiaya (Filip. 4:12). Noijki kanaj eyi uelta oapolaki barco tlen itech oyaya, ik non, xamo omomojtiaya ijkuak ompa oyaya (2 Cor. 11:23-27). ¿Tlen okipaleui Pablo?

12. ¿Tlen okipaleui Pablo amo okachi ma motekipacho?

¹² Pablo okitekipachouaya tlen okinpanouaya tokniuan pero amo keman okijto ye kiyektlaliskia ouijkayotl tlen okipiayaj. Okilui Timoteo uan Tito ma kinmaluikan tokniuan. Ninmej tokniuan okipaleuijkej Pablo amo okachi ma motekipacho (Filip. 2:19, 20; Tito 1:1, 4, 5).

13. ¿Ken uelis kichiuaskej tlayekankej ken Pablo?

¹³ Ma tikinmiluikan tokniuan ma techpaleuikan. Axkan miakej tlayekankej noijki motekipachouaj ken Pablo. Kintlasojtlaj tokniuan, ik non, noijki tlajyouiaj ijkuak yejuan kixnamikij ouijkayotl. Pero san se tlayekanki amo uelis kinpaleuis nochtin tokniuan. Tla yolyamanki kinmiluis oksekimej tokniuan ma kipaleuikan uan kinmachtis telpokamej ma kinmaluikan oksekimej tokniuan (2 Tim. 2:2).

14. ¿Tlen amo okitekipachouaya Pablo uan tlen techmachtia?

¹⁴ Ma tikmatokan moneki ma techyolseuikan. Pablo amo omoueyinekiaya uan okinmiluiaya iyolikniuan tlen okipanouaya uan yejuan okiyolseuiayaj. Amo omokuayejyekouaya oksekimej kijtoskiaj amo yolchikauak, ik non, omonekiaya ma kiyolseuikan. Carta tlen okijkuilili Filemón, okijto: “Miak nipaki, ken titetlasojtla yika nimoyolchikawa” (Filem. 7). Pablo noijki okijto miakej tokniuan okiyolchikajkej ijkuak otlajyouijtoka (Col. 4:7-11). Tla tikmatokej moneki ma techyolseuikan, tokniuan techyolseuiskej.

15. ¿Tlen okipaleui Pablo ijkuak otlajyouijtoka?

¹⁵ Ma tikneltokakan iTlajtol toTajtsin Dios. Pablo okimatiaya kiyolseuiskia iTlajtol toTajtsin Dios (Rom. 15:4). Noijki okimatiaya iTlajtol toTajtsin Dios kimakaskia ixtlamatilistli uan ijkon kixnamikiskia ouijkayotl (2 Tim. 3:15, 16). Noijki ijkuak ome uelta okitsakej ompa Roma okitak san  niman ixpoliuiskia. ¿Tlen okichi? Okilui Timoteo san niman ma kitlajpaloti uan okilui “techalinwikili noamawah” (2 Tim. 4:6, 7, 9, 13). ¿Tleka? Porque non rollos xamo okipiayaj Escrituras Hebreas uan okinekiaya ika momachtis. Tla tejuan noijki timomachtiaj ken Pablo okichi, uelis tikixnamikiskej san tlen ouijkayotl.

16. ¿Ken omomachili David ijkuak otlajtlakolchi?

¹⁶ David okikuejsouaya itlalnamikilis porque oauilnenki iuan Bat-Seba uan otlanauati ma kimiktikan inamik. Amo okinekiaya ikaj ma kimati otlajtlakolchi (2 Sam. 12:9). Ijkuak yikin otlajtlakolchi amo okikuejsouaya itlalnamikilis pero satepan ayakmo kuali omomachiliaya, omoyolkokouaya uan ayakmo kuali omouikaya iuan Jehová (Sal. 32:3, 4). ¿Tlen okipaleui ayakmo ma tlajyoui? ¿Tlen techpaleuis tla titlajtlakolchiuaskej?

17. ¿Ken kiteititia Salmo 51:1-4 David omoyolkopki?

¹⁷ Ma tikiluikan Jehová ma techtlapojpolui. David omoyolkopki uan okilui Jehová otlajtlakolchi (xiktlajtolti Salmo 51:1-4). Non okipaleui kuali ma momachili (Sal. 32:1, 2, 4, 5). Amo ma tiktlatikan tla titlajtlakolchiuaj. Ma tikiluikan Jehová tlen otikchijkej. Ijkon totlalnamikilis amo techkuejsos uan ayakmo tikmachiliskej itlaj tikmamajtokej. Pero moneki itlaj tikchiuaskej tla tiknekij oksepa kuali timouikaskej iuan Jehová.

18. ¿Tlen okichi David ijkuak Jehová okiyektlali?

¹⁸ Ma tikselikan ijkuak Jehová techyektlalia. David amo okitlati itlajtlakol ijkuak Jehová okititlanki profeta Natán iuan ma motlapouiti. San niman okijto otlajtlakolchi ixpan toTajtsin Dios. Okiseli ijkuak Jehová okiyektlali uan ye okitlapojpolui (2 Sam. 12:10-14). Ma tikinmiluikan tlayekankej tla otitlajtlakolchijkej (Sant. 5:14, 15). Amo ma tiktlatikan totlajtlakol. Tla san niman tikseliaj ijkuak techyektlaliaj uan timoyolkopaj, oksepa tikpiaskej yolseuilistli uan tiyolpakiskej.

19. ¿Tlen moneki tikchiuaskej?

¹⁹ Ayakmo ma tikchiuakan tlen otikchijkej. David okimatoka omonekiaya ma kipaleui  Jehová para amo oksepa tlajtlakolchiuaskia (Sal. 51:7, 10, 12). Ijkuak Jehová okitlapojpolui, okijto ayakmo mokuayejyekoskia tlen amo kuali. Ijkon oksepa omoyolseui.

20. ¿Ken tikteititiaj tiktlasojkamatiliaj Jehová techtlapojpoluia?

²⁰ Ma tiktlasojkamatilikan Jehová ijkuak iuan timotlapouiaj porque techtlapojpoluia, ma tikselikan ijkuak techyektlalia uan ayakmo ma tikchiuakan tlen amo kuali otikchijkej. Ijkon tiyetoskej ika yolseuilistli. Ma tikitakan tlen okipanok James ijkuak otlajtlakolchi. Ye okijto: “Onikinmilui tlayekankej onitlajtlakolchi uan onikmachili ken onechkixtilijkej itlaj sapanoua etik tlen onikmamajtoka. Opejki nimoyolseuia”. Sapanoua timoyolchikauaj porque “Jehová kajki inmiuan akinmej moyolkokouaj; ye kinmakixtia akinmej yolpatlachitokej” (Sal. 34:18).

21. ¿Ken tikkauiliskej Jehová ma techyolseui?

²¹ Okachi yitikatej itlamian tonalmej, ik non, okachi timotekipachoskej. Pero ma tikiluikan Jehová ma techpaleui. Nochipa ma timomachtikan Biblia. Ma tikitakan tlen okichi Ana, Pablo uan David. Ma tikiluikan Jehová ma techpaleui ma tikmatikan tlen techtekipachoua (Sal. 139:23). Amo ma tiknekikan san tejuan tikyektlaliskej ouijkayotl tla amo tiuelij. Tla tikiluiskej Jehová ma techpaleui, uelis tikijtoskej ken salmista akin okitlakuikili Jehová: “Ijkuak opejki sapanoua nimotekipachoua, te otechyolchika uan otechyolseui” (Sal. 94:19).