1. Zvicinyi zvingavisa kuthimwa-thimwa, zve izvi zvingatipsasisa kudini?

MAKAMBOTHIMWA-THIMWA ngo ciricese here? * Zvingaita kuti imwimwi makambothimwa-thimwa ngo pamusoro po kukhugunywa ngo zvakabhuiwa kana kuitwa ngo vamweni. Kana makambothimwa-thimwa ngo zvamakananga kana kuita. Inga muezaniso, imwimwi kangaije makamboita cishaishi cikuru, morangarira kuti Jehovha aazomuregererizve. Mukunyanyisa, imwimwi mungatozvidavira ngokuti kuthimwa-thimwa kwenyu kunonga kwakura maningi zve motama rutendo mojizwa inga mucikasisiri. Asi ngozvokadi here?

2. Muezaniso japi jo mu Bhaibheri jinovonesa kuti kuthimwa-thimwa asipi kutama rutendo wakavanga?

² Vonanyi basi muezaniso munganani jo mu Bhaibheri. Ana, uwo wakava mai wo muporofeti Samueri, wainga no rutendo wakavanga. Asi yena wainga wakasuruvara maningi ngokuti waishaiswa kutajwa ngo umwe wo pa mbhuri yake. (1 Samueli 1:7) Mupostori Pauro wainga no rutendo wakavanga, asi ‘waithimwa-thimwa [maningi] ngokuda kungwarira magungano ese.’ (2 VaKorinto 11:28) Mambo Dhavhidhi wakava no rutendo wakavanga zve Jehovha waimuda maningi. (Maitiro o Vapostori 13:22) Pikija zvakadaro, Dhavhidhi wakashaisha, zvomuita kuti atambujike no kuthimwa-thimwa. (Nduyo 38:5) Jehovha wakavangisa no kuembezera umwe nga umwe wavo. Wari ngativone kuti zvicinyi zvatingajija ngo muezaniso javo.

3. Ngenyi tingathimwa-thimwa, mundhu paanovereketa ngo hasha?

³ Vamweni povanovereketa ngo hasha kana ngo njira icizivi kunaka, tingathimwa-thimwa. Izvi ndizvona kamare zvinoitika, kudari watinyangajisaro ngo wo pa mbhuri yedu kana i shamwari yedu. Itusu tingatothya tecirangarira kuti ushamwari hwedu navo wapera. Nguva jimweni, mundhu anotinyangajisaro, angavereketa ngo hasha zve izvo zvingaita inga tabaiwa ngo banga. (Mazwi Akangwara 12:18) Kangaije vamweni vangashandisa magama avanoziva kuti anokhuvaza vamweni. Hambzaji imweni iri musikane yakasongana no mugariro wakadari. Iyona yakati: “Makore manganani adarika, mundhu wandairangarira kuti wainga shamwari yaushoni, wakatanga kundhandhanisa manyepo ngo pamusoro pangu. Ndakahwajihwa maningi zve ndakathimwa-thimwa. Andizivi kuzwisisa kuti ngenyi shamwari yangu ingandipota ngo sure.” Kudari imwimwi makambonyangajiswa ngo shamwari kana wo pa mbhuri yenyu, mungajijira zvizinji ngo muezaniso wa Ana.

4. Zvineso zvapi zvakasongana na Ana?

⁴ Ana waidikana kuhwisana no zvineso zvimweni. Iyena aacaibara ko makore mazinji. (1 Samueli 1:2) Vaiziraeri vaitenda kuti mwanakaji acikabari, aazivi kukomborehwa ndi Mwari. Izvi zvakamuita kuti anyowejeke. (Genesi 30:1, 2) Painga no ciro caitisa kuti Ana athimwe-thimwe, mwamunake wainga no mukaji umweni waidanijwa Penina waakabara naye vana. Penina wainga no ushanje na Ana zve ‘waimunyangajisa no kumurunja.’ (1 Samueli 1:6) Ana wainga wakasuruvara ngo pamusoro po mugariro wake. Iyena wainga wakasuruvara zvokuti “waicema, aacaihepi.” Iyena wakaguma ‘pakucamwa mwoyo.’ (1 Samueli 1:7, 10) Ana wakawanisa kudini embezero?

5. Mukumbiro wakabeseresa kudini Ana?

⁵ Ana wakaita mukumbiro kuna Jehovha wonanga mazwiro ake. Pakupera kuita mukumbiro, iyena wakasanangurira mugariro wake ku Mupiri Mukuru, Eri. Zve Eri wakamuvhunja kuti: “Endai ngo kunyarara! Mwari wa Israeli ngaakupe bzo wamukumbira.” Ngowapi wakava muviyo wakona? Ana “wakatevera gwanja rake, wakaha, no hope yake aizivi kuzocamwabze.” (1 Samueli 1:17, 18) Mukumbiro wakabesera Ana kuti awane runyararo.

6. Tingajijenyi ngo pamusoro po mukumbiro kuvhira ku muezaniso wa Ana no zvakatahwa pana VaFilipi 4:6, 7?

⁶ Patinoramba teciita mukumbiro kuna  Jehovha tinowana runyararo. Ana wakapeja mukuvo wakareba ecibhuya na Babake vo mugore. (1 Samueli 1:12) Inga ndi Ana, tingapejavo nguva yakawanda tecibhuya na Jehovha, tecimuvhunja ngo pamusoro po kuthimwa-thimwa kwedu, zvatinothya no patakarembera. Atingaveteri kuti mukumbiro jedu jive jakakwana kana jakaseja maningi. Nguva jimweni tingatocema patinonga tecivhunja Jehovha zvineso zvedu. Pikija zvakadaro, Jehovha narini aazorembi kuzwa mukumbiro jedu. Kusiyapo basi kuita mukumbiro ngo pamusoro po zvineso zvedu, tinodikana kuceuja ngwajo iri pana VaFilipi 4:6, 7. (Verenganyi.) Pauro wakativhunja kuti tinodikana kubonga Jehovha mu mukumbiro. Tino mathangwe akawanda anotiita kuti tibonge Jehovha. Inga muezaniso, tingamubonga ngo kutipa upenyu, ngo zviro zvaakasika, ngo rudo wo kugondeka no vetero inoshamaisa yaanotipa. Ngo zvapi zvatingajijazve ngo muezaniso wa Ana?

7. Ana no mwamunake vaiitenyi mukuvo wese?

⁷ Pikija no zvineso zvake, Ana nguva jese waiyenda no murume wake ku ndau yo kunamatira Jehovha ku Siro. (1 Samueli 1:1-5) Paainga ari mu Tabherinake, Mupiri Mukuru Eri, wakamuvangisa ngo kumuvhunja kuti iyena anovetera kuti Jehovha anozodavira mukumbiro wake.—1 Samueli 1:9, 17.

8. Musongano jingatibeseresa kudini? Sananguranyi.

⁸ Tinowanazve runyararo patinoenda ku musongano jo ungano. Mukumbiro wo kutanga pa musongano jedu kazinji unobatanija kukumbira mujimu mucena wa Jehovha kuti uve nesu. Runyararo i divi ro mucero wo mujimu wondhoo. (VaGalàsia 5:22) Patinoenda kumusongano jedu pikija patinonga takasuruvara, tinopa Jehovha, hama jedu no hambzaji mukana kuti vakwanise kutivangisa no kutibesera kuti tiwanezve runyararo wo mu murangariro no mu mwoyo. Mukumbiro no musongano i njira jakanakisisa jinoshandiswa ndi Jehovha kuti atiembezere. (Vaheberi 10:24, 25) Ngativone zvimweni zvatingajija ngo muezaniso wa Ana.

9. Ngozvapi zvicizivi kucinja kuna Ana zve ngozvapi zvakamubesera?

⁹ Zvineso zva Ana azvizivi kupera ciripo-ri- poco. Iyena paakahwirira ku muzi ecivha konamata ku tabherinake, wakaenda kogarazve pa muzi umwewo na Penina. Bhaibheri arinangi kuti zviito zva Penina zvakacinja. Asi, Ana wakadikana kucungirira mavereketero akashata a Penina. Ngokudaro, iyena wakakwanisa kuva no runyararo wo mukati no kuramba anawo. Paakasiya zvese mu nyara ja Jehovha, aazivi kuzothimwa-thimwazve. Ana wakatendera kuti Jehovha amuvangise no kumuembezera. Pa kufamba ko mukuvo, Jehovha wakazodavira mukumbiro wa Ana zve iyena wakazobara vana.—1 Samueli 1:19, 20; 2:21.

10. Tajijenyi ngo muezaniso wa Ana?

¹⁰ Tingava no runyararo pikija cinotiitisa kuti tithimwe-thimwe cirambe ciripo. Pikija teciita mukumbiro mukuvo wese no kuviya pa musongano, zvineso zvimweni zvinoramba zviripo. Asi ngo muezaniso wa Ana, tajijira kuti apana cingaimisa Jehovha kuti atiembezere patinonga ticithimwa-thimwa. Jehovha na kamwe aazotikanganwi zve sambiri pano anozotipa mupocero wedu kudari tikaramba takagondeka.—Vaheberi 11:6.

11. Ngoapi mathangwe akaitisa kuti Pauro athimwe-thimwe?

¹¹ Pauro wainga no mathangwe mazinji okujizwa ecithimwa-thimwa. Inga muezaniso, zvecivoneka kuti Pauro waida hama no hambzaji jake, zvineso zvakasongana no hama iji, zvaimuita kuti athimwe-thimwe. (2 VaKorinto 2:4; 11:28) Pa basa rake inga mupostori, Pauro wakadikana kuhwisana no vavengi avo vaimutaka  no kumudira mu kadheya. Zve waidikana kucungirira zvineso zvaimuthimwathimwisa zvakadari inga kurarama ngo zviro zvishoma. (VaFilipi 4:12) Tikarangarira ngo kundondomera katatu kwakaitika pa mukuvo wondhoo, tinokwanisa kuvona kuthimwa-thimwa kwaakava nako paainga ari mungarava. (2 VaKorinto 11:23-27) Zvicinyi zvakabesera Pauro paainga acithimwa-thimwa?

12. Zvicinyi zvakabesera Pauro kuti atame kuthya maningi?

¹² Pauro wakathimwa-thimwa ngo pamusoro po hama no hambzaji jake pojakasongana no zvineso. Asi iyena aazivi kueja kuhwisana no zvineso izvi ega. Ngokuti iyena waizviziva zvaari. Ngo kudaro, wakakumbira vamweni kuti vamubesere pa kungwarira ungano. Inga muezaniso, iyena wakagaja vanarume vakagondeka inga ndi Timoti na Tito. Basa rakaitwa ngo hama iji, zvokadi kamare rakapungura kuthimwa-thimwa ka Pauro.—VaFilipi 2:19, 20; Tito 1:1, 4, 5.

13. Vakuru vangatevejeresa kudini muezaniso wa Pauro?

¹³ Kumbiranyi vamweni kuti vamubesere. Inga ndi Pauro, vakuru vazinji nyamasi uno, vanothimwa-thimwa ngo ndava yo hama jese jo mu ungano jiri kusongana no zvineso. Asi, mukuru umwe anganesehwa maningi kuti abese vese mu ungano. Kudari iyena i mundhu anoziva kuti aazokwanisi kubesesa vese vari kuneseka mu ungano, anozoeja kuroveja majaha anokwanirisa kuti amubesere kungwarira mavhuta a Mwari.—2 Timoti 2:2.

14. Pauro aacaithimwa-thimwa ngo pamusoro penyi zve tingajijenyi ngo muezaniso wake?

¹⁴ Zivanyi kuti imwimwi munodavo kuembezehwa. Pauro wainga mundhu anojidodokesa, ngo iyo ndava iyena waizviziva kuti waida kuembezehwa. Kunasa kunanga, aacaithimwa-thimwa kuti vandhu vanozomuvona inga mundhu wakarembejeka kudari vakaziva kuti anodavo kuembezehwa ngo vamweni. Pa karata yake kuna Firimoni, iyena wakatara kudari: “Ndakadakara kukuru no kunyarajwa, ngo ndava yo rudo hwako.” (Filemoni 1:7) Pauro wakanangavo hama zinji jakamuvangisa pa mukuvo wo bonezi. (VaKolosi 4: 7-11) Patinozwisisa ngo kujidodokesa kwese kuti tinoda kuvangiswa, hama jedu no hambzaji jinozokwanisa kutibesera patinodaya besero.

15. Pauro wakaitenyi paainga pa mugariro unonesa?

¹⁵ Thembanyi Soko ra Mwari. Pauro waizviziva kuti Bhaibheri raizokwanisa kumuembezera. (VaRoma 15:4) Irona raizokwanisazve  kumupa ungwaru kuti ahwisane no zvineso. (2 Timoti 3:15, 16) Paakadihwa mu kadheya ku Roma pa vhaza yo cipiri, Pauro wakajizwa ari phedo no kufa. Pa mugariro wakadari, iyena wakaitenyi? Iyena wakakumbira Timoti kuti akasike kuviya no “mabuku” kana muphukutu. (2 Timoti 4:6, 7, 9, 13) Ngenyi? Ngokuti muphukutu jondhojo jainga no matimbu o Matahwa o Cigiriki aaizoshandisa kuti aite jijo yo Bhaibheri yo mundhu ega. Patinotevejera muezaniso wa Pauro ngo kuita jijo yo mundhu ega nguva jese, Jehovha anozoshandisa Bhaibheri kuti atiembezere azvinenyi zvineso zvatinosongana nazvo.

16. Dhavhidhi wakazwa kudini paakapera kuita cishaishi cikuru?

¹⁶ Dhavhidhi wakaita ciro cakashata maningi. Iyena wainga wakaita upombo na Bhati-sheba, woita nasiriro kuti mwamuna wake vaurawe. Pa kufamba ko nguva wakaeja kuviga cishaishi condhoco. (2 Samueli 12:9) Pakutanga, Dhavhidhi wakaphurusa hana yake. Inga muviyo, zvakakhuvaza maningi ushamwari wake a Jehovha zve zvakamuita kuti asuruvare maningi wogumira pa kuhwaja. (Nduyo 32:3, 4) Zvicinyi zvakabesera Dhavhidhi kuti ahwisane no kuthimwa-thimwa kwaakava nako zve zvicinyi zvingatibesera kudari tikaita cishaishi cikuru?

17. Mukuzwirana na Nduyo 51:1-4, inokhombijisa kudini kuti Dhavhidhi wainga wakhauya kamare?

¹⁷ Itanyi mukumbiro mecikumbira kuregerehwa. Pejisire, Dhavhidhi wakaita mukumbiro kuna Jehovha. Ecikhombija kukhauya kwake, iyena wakananga zvishaishi zvake zvese. (Verenganyi Nduyo 51:1-4.) Izvo zvakamubesera maningi kuti atamezve kuthimwa- thimwa zve wakavazve mundhu anomudakaro. (Nduyo 32:1, 2, 4, 5) Kudari mukaita cishaishi cikuru, mucadoeja kuviga cishaishi condhoco. Kusiyapo zvondhozvo, fununguranyi mwoyo kuna Jehovha ngo mukumbiro mecidekeca cishaishi cenyu. Mukadaro, munozojizwa makasujunuka zve muno hana yakacena. Asi, kudari munoda kumusijira ushamwari hwenyu na Jehovha, munodikana kuita zvizinji kusiyapo kuita mukumbiro.

18. Dhavhidhi wakaitenyi paakapangihwa?

¹⁸ Tenderanyi kupangihwa. Jehovha paakatuma muporofita Natani kuti aende koobhuya na Dhavhidhi ngo pamusoro po cishaishi cake, Dhavhidhi aazivi kueja kujiinikira nee kunanga kuti cishaishico acicaikura maningi.  Ngo kukasika iyena wakatenda kuti wakashaisha kuna mwamuna wa Bhati-sheba, maningi- ningi kuna Jehovha. Dhavhidhi wakatendera kupangihwa ndi Jehovha zve Jehovha wakamuregerera. (2 Samueli 12:10-14) Kudari tikaita cishaishi cikuru, tinodikana kubhuya no vaya vakagajwa ndi Jehovha kuti vatingwarire. (Jakobo 5:14, 15) Patinoita izvi, tinodikana kungwarira kuti titame kuviga cishaishi cedu. Tikakasika kutendera no kushandisa mbhangiro yotapuwa, tinokasikavo kuwanazve runyararo wedu no mudakaro.

19. Tinodikana kutema civaringo capi?

¹⁹ Temanyi civaringo co kutama kuitazve zvishaishi zvondhozvo. Mambo Dhavhidhi waizviziva, kuti atame kuitazve zvishaishi zvondhozvo, waidikana kubesehwa ndi Jehovha. (Nduyo 51:9, 12, 16) Pakupera kuregerehwa ndi Jehovha, Dhavhidhi wakatema civaringo co kutama kuva no murangariro jakashata. Inga muviyo, iyena wakavazve no runyararo wo mukati.

20. Tingakhombijisa kudini kuti tinobongesera ruregerero wa Jehovha?

²⁰ Tinokhombija kuti tinobongesera ngo ruregerero wa Jehovha, patinoita mukumbiro tecikumbira kuregerehwa, kutendera kupangihwa no kushanda ngo simba kuti titame kuitazve zvishaishi zvondhozvo. Patinoita zvese izvi, tinovazve no runyararo hwo mukati. Jemes, imwe hama yakaita cishaishi cikuru, yakavona kuti izvi ndizvona kamare. Iyona yakati: “Pandakavhunja vakuru cishaishi cangu, ndakazwa inga kuti ndavhisa mutoro mukuru pa mapfuji angu. Ndakatanga kuvazve no runyararo wo mukati.” Zvinovangisa maningi kuziva kuti Jehovha “ari phedo no mwoyo yakakhuvazwa; anoponesa vese vakapera simba”!—Nduyo 34:19.

21. Tingatenderesa kudini kuti Jehovha atiembezere?

²¹ Zvecivoneka kuti njiku jino jo kupejisira jiri kuguma kumbhiri, zviro zvinotiita kuti tithimwe-thimwe zvinoramba zveciengejeka. Panomunohwisana no murangariro jakashata, mucanonoka kukumbira besero ra Jehovha. Vangisiranyi pa kujija kwenyu Bhaibheri. Jijanyi ngo muezaniso jakagajwa ndi Ana, Pauro pomwe na Dhavhidhi. Kumbiranyi kuti Baba wenyu vo mugore vamubesere pa kuvona cinomuitisaro kuti muthimwe-thimwe. (Nduyo 139:23) Tenderanyi kuti iyena amubesere pa kuhwisana no zvineso zvenyu. Mukaita kudaro, munozofanana no mutari wo nduyo uwo, wakaimba kudari kuna Jehovha: “Apo kuthimwa-thimwa kunoengejeka kondiri, maembejero enyu anondidakajisa.”—Nduyo 94:19.