1. Oshike tashi vulu oku tu ningitha tu ipule unene, notashi vulu oku tu dhiladhilitha shike?

MBELA owi iyadhele nale wa gwililwa po kiimpwiyu? * Otashi vulika to ipula unene, molwaashoka wa yematekwa kwaashoka yalwe ya popya nenge ya ninga. Nenge tashi vulika to ipula unene, omolwoshinima shoka wa popya nenge wa ninga. Pashiholelwa, otashi vulika wa ninga epuko lyontumba, notashi vulika to dhiladhila kutya Jehova ke na esiku e ku dhimine po. Shoka oshiwinayi unene, otashi vulika wu itaale kutya molwaashoka owa gwililwa po komaipulo, kungawo ku na we eitaalo nowu li omuntu omwiinayi. Ihe mbela shoka oshoshili?

2. Iiholelwa yini yopaMbiimbeli tayi ulike kutya okukala twa gwililwa po kiimpwiyu, itashi ti kutya katu na eitaalo?

² Natu taleni kiiholelwa yimwe yopaMbiimbeli. Hanna, yina yomuhunganeki Samuel, okwa li omukiintu e na eitaalo lya kola. Nonando ongawo, okwa li a gwililwa po komaipulo, sho gumwe maandjawo a kala ta ungaunga naye nayi. (1 Sam. 1:7) Omuyapostoli Paulus okwa li e na eitaalo lya kola, ihe okwa li a gwililwa po “koshimpwiyu shomagongalo agehe.” (2 Kor. 11:28) Omukwaniilwa David naye okwa li e na eitaalo lya kola, shoka sha ningitha a kale a hokiwa noonkondo kuJehova. (Iil. 13:22) Nonando ongawo, David okwa li a ningi omapuko ngoka ge mu ningitha a kale a gwililwa po noonkondo. (Eps. 38:4) Jehova aapiya ye ayehe mboka,  okwa li e ya hekeleke nokwe ya nyanyudha. Natu taleni kutya oshike tatu vulu okwiilonga miiholelwa yawo.

3. Ongiini oohapu dhayalwe tadhi vulu oku tu ningitha tu kale twa gwililwa po komaipulo?

³ Uuna yalwe taye tu haula nenge kaaye na ombili natse, otashi vulika tu kale tatu ipula unene nasho. Ohashi kala ngawo, unene tuu ngele ngoka e tu uvitha nayi, okuume ketu kopothingo nenge omukwanezimo. Otashi vulika tu kale tatu ipula kutya ekwatathano lyetu nomuntu ngono kali po we. Omathimbo gamwe, omuntu ngoka e tu uvitha nayi, otashi vulika a popye iinima inaayi dhiladhilwa nawa, notashi vulika tu kale tu uvite twa fa twa ululwa negongamwele. (Omayel. 12:18) Nenge gumwe tashi vulika nokuli a kale ta longitha owina oohapu ndhoka e shi kutya otadhi tu ehameke. Omumwameme gumwe omugundjuka okwa li a ungaunga neshongo ndyoka. Ota ti: “Omimvo dhontumba opo dha zi ko, gumwe ngoka nda li tandi dhiladhila kutya okuume kandje kopothingo, okwa li a tameke okutaandelitha omitotolombo kombinga yandje kointaneta. Osha li sha uvitha ndje nayi, nonda li tandi ipula unene nasho. Kanda li ndi shi uvite ko kutya omolwashike ta uvitha ndje nayi ngawo.” Ngele owa uvithwa nayi kukuume koye kopothingo nenge komukwanezimo, oto vulu okwiilonga oshindji kuHanna.

4. Hanna okwa li e na okuungaunga nomaupyakadhi omanene geni?

⁴ Hanna okwa li e na okuungaunga nomaupyakadhi gamwe omanene. Uule womimvo, okwa kala ihaa mono aanona. (1 Sam. 1:2) Paputuko lyAaisraeli, ngele omukiintu iha mono aanona, okwa li ha talika ko kutya okwa thingwa. Shika osha li she mu ningitha a kale a sa ohoni noonkondo. (Gen. 30:1, 2) Shoka sha ningitha onkalo yaHanna yi nayipale unene, osho kutya omusamane gwe okwa li e na omukulukadhi gulwe, Peninna, ngoka a li e mu valele aanona. Peninna okwa li a tala ko Hanna e li omukondjithi gwe, nokwa li he “mu ehameke noku mu sitha ohoni.” (1 Sam. 1:6) Petameko, Hanna ka li ta vulu okwiidhidhimikila onkalo ndjoka ondhigu. Okwa li a yemata noonkondo e ta “lili nokwa tindi okulya.” Okwa li e “uvite uudhigu” noonkondo momutima gwe. (1 Sam. 1:7, 10) Hanna okwa li a mono ngiini ehekeleko?

5. Egalikano olya li lya kwathele ngiini Hanna?

⁵ Hanna okwa li a mbumbulile Jehova omutima gwe megalikano. Konima yokugalikana, okwa yelithile Omuyambi Omukuluntu, Eli, onkalo ye.  Opo nduno Eli okwe mu lombwele, a ti: “Inda nombili. Kalunga kalsrael ne ku pe shoka we mu indile.” Oshizemo? Hanna “okwa zi po e ta li ye ina sa we oluhodhi.” (1 Sam. 1:17, 18) Egalikano olya li lya kwathele Hanna a kale ishewe e na ombili.

6. Oshike tatu vulu okwiilonga kuHanna nosho wo mAafilippi 4:6, 7, kombinga yegalikano?

⁶ Otatu vulu okukala ishewe tu na ombili, ngele otwa dhiginine okugalikana. Hanna okwa li a galikana kuHe gwomegulu, ethimbo ele. (1 Sam. 1:12) Natse otatu vulu okupopya naJehova ethimbo ele, tatu mu lombwele iimpwiyu yetu, shoka twa tila nosho wo omaunkundi getu. Omagalikano getu kage na okukala ga fa okatewo nenge ga fa gomuntu a gwanenena. Otashi vulika nokuli tu iyadhe tatu popi oohapu ndhoka tadhi tu ningitha tu hukule ehodhi. Nonando ongawo, Jehova ke na esiku a vulwe oku tu pulakena. Kakele kokugalikana kombinga yomaupyakadhi getu, otwa pumbwa okudhimbulukwa omayele ngoka ge li mAafilippi 4:6, 7. (Lesha.) Paulus okwa popya kondandalunde kutya otu na okupandula Jehova megalikano. Otu na omatompelo ogendji gokupandula Jehova. Pashiholelwa, otatu vulu oku mu pandula, omolwomagano gomwenyo, iinima iiwanawa mbyoka a shita, ohole ye nosho wo etegameno ekumithi ndyoka e tu pa. Oshike ishewe tatu vulu okwiilonga kuHanna?

7. Hanna nomusamane gwe, oya li ye na ondjigilile yokuninga shike?

⁷ Nonando Hanna okwa li e na omaupyakadhi, okwa li aluhe ha yi pamwe nomusamane gwe kongulu yOmuwa, kuShilo. (1 Sam. 1:1-5) Manga Hanna a li metsalihangano, Omuyambi Omukuluntu, Eli, okwa li e mu ladhipike kutya Jehova ota ka yamukula egalikano lye. — 1 Sam. 1:9, 17.

8. Omakugongala otaga vulu oku tu kwathela ngiini? Shi yelitha.

⁸ Otatu vulu ishewe okukala tu na ombili, ngele otwa tsikile okukala hatu yi kokugongala. Megalikano lyotango pokugongala, olundji omumwatate oha galikana tu pewe ombepo ondjapuki. Ombili oyi li shimwe shomiiyimati yombepo ndjoka. (Gal. 5:22) Uuna tatu yi kokugongala, nonando otwa gwililwa po, kungawo otatu pe Jehova nosho wo aamwatate naamwameme ompito ye tu ladhipike noye tu kwathele tu kale ishewe tu na ombili yopamadhiladhilo noyokomwenyo. Egalikano nomakugongala, oyi li omikalo dha simanenena ndhoka Jehova ha longitha e tu mbilipaleke. (Heb. 10:24, 25) Natu taleni ishewe shoka tatu vulu okwiilonga koshiholelwa shaHanna.

9. Oshike sha li inaashi lunduluka monkalo yaHanna, noshike sha li sha lunduluka?

⁹ Uupyakadhi waHanna kawa li wa kandulwa po nziya. Sho Hanna a galuka ketsalihangano, natango okwa li e na okutsikila okukala megumbo limwe naPeninna. Ombiimbeli inayi popya kutya Peninna okwa li a lundulula iikala ye. Onkene Hanna okwa li e na okutsikila okwiidhidhimikila oohapu tadhi ehameke dhomukondjithi gwe. Nonando ongawo, okwa li a vulu ishewe okukala e na ombili yokomwenyo. Dhimbulukwa kutya konima sho Hanna a ethele iinima momake gaJehova, ka li we a gwililwa po. Okwa etha Jehova e mu hekeleke noku mu mbilipaleke. Lwanima, Jehova okwa yamukula egalikano lyaHanna nokwa mono aanona. — 1 Sam. 1:19, 20; 2:21.

10. Oshike tatu ilongo koshiholelwa shaHanna?

¹⁰ Otatu vulu ishewe okukala nombili, nonando omaupyakadhi getu inaga kandulwa po. Nonando ohatu galikana twa mana mo nokuya komakugongala pandjigilile, omaupyakadhi getu gamwe, otashi vulika kaaga ze po. Ihe okutala koshiholelwa shaHanna, otatu ilongo kutya ngele otwa pe Jehova ompito, kapu na shoka tashi vulu oku mu imba a mbilipaleke omutima gwetu ngoka gwa dhigupalelwa. Jehova ke na esiku e tu dhimbwe, na masiku ote ke tu pa ondjambi, omolwuudhiginini wetu. — Heb. 11:6.

11. Omatompelo geni Paulus a li e na, gokukala e uvite a gwililwa po?

¹¹ Paulus okwa li e na omatompelo ogendji gokukala e uvite a gwililwa po. Pashiholelwa, molwaashoka okwa li e hole ooitaali ooyakwawo, okwa li hi ipula unene kombinga yomaupyakadhi ngoka ye na. (2 Kor. 2:4; 11:28) Sho Paulus a li ha uvitha, aapataneki oya li haye mu dhenge noku mu tula mondholongo. Okwa li e na okwiidhidhimikila oonkalo oondhigu, ndhoka dha li hadhi mu ningitha i ipule unene, ngaashi kombinga okukala e na “oshishona.” (Fil. 4:12) Molwaashoka okwa li metekosikepa iikando itatu, otashi vulika a li ha kala ti ipula unene, uuna ta yi molweendo nosikepa. (2 Kor. 11:23-27) Oshike sha li sha kwathele Paulus, sho a li a gwililwa po?

12. Oshike sha li sha kwathele Paulus kaa kale we e uvite a gwililwa po unene?

¹² Paulus okwa li hi ipula unene nooitaali ooyakwawo, uuna ya taalela omaupyakadhi, ihe ka li a kambadhala oku ga kandula po agehe oye awike. Paulus okwa li e na ondjele. Okwa li a pula yalwe ye mu kwathele mokusila oshimpwiyu egongalo. Pashiholelwa, iinakugwanithwa yimwe okwa li e yi pe aalumentu aainekelwa, ngaashi Timoteus naTitus. Kapu na omalimbililo kutya iilonga mbyoka ya li ya longwa kaamwatate mboka, oya kwathele Paulus kaa kale we a gwililwa po unene. — Fil. 2:19, 20; Tit. 1:1, 4, 5.

13. Aakuluntugongalo otaya vulu ngiini okuholela Paulus?

¹³ Pula yalwe ye ku kwathele. Ngaashi Paulus, aakuluntugongalo kunena mboka ye na olukeno, ohaya kala tayi ipula naakwanegongalo mboka ye li momaupyakadhi. Ihe omukuluntugongalo ita vulu okukwathela egongalo alihe. Eifupipiko otali ke mu inyengitha a pule aamwatate yalwe megongalo mboka ya pyokoka ye mu kwathele, nokudheulwe aamwatate aagundjuka ye mu kwathele mokusila oshimpwiyu oshigunda shaKalunga. — 2 Tim. 2:2.

14. Paulus ka li hi ipula nashike, noshike tatu vulu okwiilonga koshiholelwa she?

¹⁴ Zimina kutya owa pumbwa ehekeleko. Paulus okwa li omwiifupipiki, onkene okwa li e shi kutya okwa pumbwa okutsuwa omukumo kookuume ke. Oshi iwetikile kutya ka li a tila a talike ko e li ekatalume, ngele okwa zimine kutya okwa hekelekwa kuyalwe. Paulus okwa li a nyolele Filemon, a ti: “Ohole yoye oya pe ndje enyanyu olindji nomukumo.” (Filem. 7) Paulus okwa li a tumbula aalongi pamwe naye yontumba, mboka ya li ekwatho enene kuye momathimbo omadhigu. (Kol. 4:7-11) Ngele otwa zimine neifupipiko  kutya otwa pumbwa ekwatho, aamwatate naamwameme otaya ka kala ye na ehalo lyoku tu ambidhidha naashoka twa pumbwa.

15. Paulus okwa li a ningi po shike, sho a li monkalo ondhigu?

¹⁵ Inekela mOohapu dhaKalunga. Paulus okwa li e shi kutya Omanyolo otage ke mu hekeleka. (Rom. 15:4) Okwa li wo e shi kutya otage ke mu pa uunongo a taalele eshongo kehe. (2 Tim. 3:15, 16) Sho a li a tulwa mondholongo muRoma oshikando oshitiyali, okwa li e uvite kutya oku li pokusa. Sho Paulus a li monkalo ndjoka, oshike a li a ningi po? Okwa li a pula Timoteus e ye kuye mbalambala noku etelele ‘oondhingambo.’ (2 Tim. 4:6, 7, 9, 13) Omolwashike? Omolwaashoka moondhingambo moka, otashi vulika mwa li mu na iitopolwa yOmanyolo gOshihebeli, ngoka Paulus a li ta vulu okulongitha mekonakonombiimbeli lye lyopaumwene. Uuna tatu holele Paulus, mokukonakona pandjigilile Oohapu dhaKalunga, Jehova ota ka longitha Omanyolo ge tu kwathele tu kale twa mbilipalelwa kutya nduno otwi iyadhe meshongo lya tya ngiini.

16. David okwa li e uvite ngiini, sho a yono sha kwata miiti?

¹⁶ David okwa li a yono sha kwata miiti. Okwa li a hondele naBatseba, okwa li a dhipagitha omusamane gwaBatseba nokwa li a kambadhala okusiikila omayono ge. (2 Sam. 12:9) Petameko, David okwa li i ipwililike eiyuvo lye. Oshizemo, shoka kasha li owala sha yono po ekwatathano lye naJehova, ihe osha li wo she mu ehameke pamadhiladhilo nopalutu. (Eps. 32:3, 4) Oshike sha li sha kwathele David a ungaunge nuupyakadhi mboka a li i iyetele, noshike tashi vulu oku tu kwathela, ngele otwa yono sha kwata miiti?

17. Episalomi 51:1-4, otali ulike ngiini kutya David okwa li i iyela ombedhi shili tashi zi komutima?

¹⁷ Galikana wu dhiminwe po. Hugunina, David okwa li a galikana kuJehova. Okwa li i iyele ombedhi e te mu hempululile omayono ge. (Lesha Episalomi 51:1-4.) Shoka kasha li tuu she mu kwathele a kale ishewe a nyanyukwa! (Eps. 32:1, 2, 4, 5) Ngele owa yono eyono lya kwata miiti, ino kambadhala oku li holeka. Pehala lyaashono, li hempululila Jehova megalikano. Kungawo oto ka tameka okukala wu uvite wa mbilipalelwa noito ki ipa we uusama unene. Ihe ngele owa hala okukala ishewe wu na ekwatathano ewanawa naJehova, owa pumbwa okuninga oshindji shi vulithe pokugalikana.

18. David okwa li i inyenge ngiini kegeeloputudho ndyoka a pewa?

¹⁸ Taamba ko egeeloputudho. Sho Jehova a  tumu omuhunganeki Natan a ka yambulule eyono lyaDavid, David ka li i ipopile nenge a tye kutya hoka okapuko owala okashona. Pehala lyaashono, okwa li e shi zimine nziya kutya ina yona owala komusamane gwaBatseba, ihe komeho gaayihe, okwa yona kuJehova. David okwa li a taamba ko egeeloputudho ndyoka a li a pewa kuJehova, na Jehova okwe mu dhimine po. (2 Sam. 12:10-14) Ngele otwa yona eyono lya kwata miiti, otwa pumbwa okupopya naamboka Jehova a langeka po ye tu tonatele. (Jak. 5:14, 15) Otu na wo okuyanda okwiipopila. Ngele owa taamba ko nokutula miilonga nziya epukululo ndyoka wa pewa, itashi ke ku pula ethimbo wu kale ishewe wu na ombili nenyanyu.

19. Otu na okukala twa tokola toko tu ninge shike?

¹⁹ Kala wa tokola toko okuyanda okweendulula omapuko ga faathana. Omukwaniilwa David okwa li e shi kutya opo a yande okweendulula omapuko ga faathana, okwa pumbwa ekwatho lyaJehova. (Eps. 51:7, 10, 12) Konima sho Jehova e mu dhimine po, David okwa li a tokola toko a yande okukala e na omadhiladhilo ga puka. Oshizemo? Okwa kala ishewe e na ombili yokomwenyo.

20. Ongiini tatu vulu okuulika kutya otwa pandula, sho Jehova he tu dhimine po?

²⁰ Ohatu ulike kutya otwa pandula sho Jehova he tu dhimine po, uuna tatu mu pula e shi ninge, tatu taamba ko egeeloputudho nuuna tatu longo nuudhiginini tu yande okweendulula omapuko ga faathana. Uuna twa ningi iinima mbyoka, ohatu kala ishewe tu na ombili yokomwenyo. Omumwatate James, ngoka a li a yono eyono lya kwata miiti, ota tsu kumwe nasho. Ota ti: “Sho nda hempululile aakuluntugongalo eyono lyandje, onda kala ndi uvite nda kuthwa omutenge omudhigu komapepe gandje. Onda tameke ishewe okukala ndi na ombili yopamadhiladhilo.” Itashi tu tsu tuu omukumo okutseya kutya “Omuwa oku li popepi naamboka ya dhengwa pevi; [nota] hupitha mbo ya kanitha etegameno”! — Eps. 34:18.

21. Ongiini tatu vulu okweetha Jehova e tu nyanyudhe?

²¹ Sho ehulilo tali ende tali hedha popepi, iinima mbyoka hayi tu ningitha tu kale tatu ipula unene, otashi vulika yi indjipale. Uuna wa gwililwa po pamadhiladhilo, ino kakadhala okupula ekwatho kuJehova. Konakona Ombiimbeli nuudhiginini. Ilonga koshiholelwa shaHanna, Paulus naDavid. Pula Tate gwoye gwomegulu e ku kwathele wu ndhindhilike mo shoka hashi ku ningitha wu kale to ipula unene. (Eps. 139:23) Mu etha e ku kwathele nuupyakadhi woye, unene tuu mboka itoo vulu okwiidhidhimikila. Ngele owe shi ningi, oto vulu okukala wa fa omupisalomi ngoka a li a imbile Jehova, ta ti: “Uuna nda tila nonda sa iimpwiyu, oto hekeleke ndje e to nyanyudha ndje.” — Eps. 94:19.