1. ¿Tlenon ueliskia techajmanas, niman kenon uelis techijtlakos yejon?

¿ITLAJ mopan yonochiujka tlen melak omitsajman? * Kanaj yakaj omitsteneuili itlaj noso itlaj omitschiuili tlen omitsyolkoko. Noso kanaj mitsajmana tlen tejua otikchiuj noso tlen otikijto. Kanaj otikchiuj tlen xkuajli niman mitsajmana tla Jehová xkeman mitstlapopoluis. Ika yejon, kanaj tiknemilia: “Ijkon ninomachilia pampa xchikauak notlaneltokil, xkeman nikchiua tlen kuajli”. San ika ¿yejon melauak?

2. ¿Kenon techititia Biblia ika timoyolajmanas xkijtosneki tla xtikpiya chikauak motlaneltokil?

² Matitlajtokan intech sekimej itekipanojkauan Jehová akin yeuejkaui onenkej. Ana, inan teotlajtoketl Samuel, melak tlaneltokaya. Maski ijkon, noyolajmanaya pampa yakaj akin chantiya ichan melak kitlajyouiltiaya (1 Sam. 1:7). Niman apóstol Pablo, maski chikauak kipiaya itlaneltokil, kajmanaya tlen inpan nochiuaya tokniuan (2 Cor. 11:28). Tekiuaj David noijki chikauak kipiaya itlaneltokil niman Jehová melak kitlasojtlaya (Hech. 13:22). Maski ijkon, okichiuj tlen xkuajli niman yejon melak kitekipachouaya (Sal. 38:4). Jehová okinyolseui yejuin itekipanojkauan niman okinpaleui maka sa manoyolajmanakan. Matikitakan tlenon tiuelij intech.

3. ¿Tleka ueliskia techajmanas tlen oksekimej kijtouaj?

³ Uelis techajmanas ijkuak yakaj xkuajli technotsa noso texchiuilia tlen xkuajli, niman kanaj más xkuajli tomachiliskej tla ijkon texchiuilia se toamigo noso se tochanejkauj. Kanaj techajmana ika xok iuan touikaskej. Kemantika yakaj techyolkokoua pampa xkinemilia tlen kijtoua, ijkuak ijkon panoua, tikmachiliaj kentla techtsopiniskiaj ika se cuchillo (Prov. 12:18). San ika, kemantika, kanaj nemi yakaj akin itlaj techijtouilia pampa kineki techyolkokos. Yejon tlen ipan onochiuj se tokniuj ichpochtli. Yejua kijtoua: “Ikipiya seki xiujtin, se akin melak iuan ninouikaya opeuj san tlemach nechteneuilia ipan Internet. Yejon melak onechyolkoko niman xkuajli oninomachili. Xueliya nikasikamatiya tleka hasta ijkon onexchiuili”. Tla se toamigo noso se tochanejkauj yotechyolkoko, uelis techpaleuis tla tikitaj tlen ipan onochiuj Ana.

4. ¿Tlenon okixnamik Ana?

⁴ Ana okijyoui miyek tlemach. Yejua xueliya kinpiaya ikoneuan (1 Sam. 1:2). Miyekej israelitas kinemiliayaj ika tla se siuatl xueliya kinpiaya ikoneuan, kijtosnekiya ika toTajtsin xkiteochiujtoya. Yejua ika, Ana melak xkuajli nomachiliaya (Gén. 30:1, 2). Niman xsan yejon okixnamik. Iueuentsin kipiaya okse isiuauj, itoka katka Peniná, akin kema ueliya kinpiaya ikoneuan. Peniná kitlauelitaya Ana niman nochipa kipijpinaujtiaya pampa kinekiya kiyolkokos (1 Sam. 1:6). Ika yejon, Ana melak xkuajli nomachiliaya, yejua “sanoyej chokaya niman hasta xtlakuaya”. Ana yemelak noyolajmanaya (1 Sam. 1:7, 10). ¿Tlenon okiyolseui?

5. ¿Kenon onomachili Ana pampa okichiuili teoyotl Jehová?

⁵ Ana okichiuili teoyotl Jehová niman okijli nochi tlen kiyolkokouaya. Sakin ika okichiuj teoyotl, okijli ueyi teopixki Elí tlen ipan nochiujtoya. Elí okijli: “Xuiya ikan yolseuilistli, niman iDios Israel ma mitsmaka on tlen tiktlajtlanilia”. ¿Tlenon opanok sakin? Biblia kijtoua: “Ana onokuep kampa oualeu, niman otlakuaj. Niman xokaman onajman” (1 Sam. 1:17, 18). Teoyotl okipaleui Ana oksejpa manemi ika iyojlo.

6. ¿Tlenon tiuelij itech iteoyouj Ana niman itech tlen kijtoua Filipenses 4:6, 7?

⁶ Uelis oksejpa tinemiskej ika toyojlo tla  nochipa tikchiuaj teoyotl. Ana ouejkauj kichiuilijtoya teoyotl Jehová (1 Sam. 1:12). Ijkuak tejuamej tiknotsaskej Jehová, noijki uelis tiuejkauiskej niman uelis tikijliskej tlen techajmana, tlen techmojtia niman ijkuak topopolouaj. Toteoyouan xnoneki melak kuajli makakistikan nion xnoneki tikintlapejpeniskej tlajtoltin tlen melak temojkatlachialtijkej. Kemantika hasta uelis tiajmankachokaskej ijkuak tikijliskej Jehová tlen techajmana. Maski ijkon, matikilnamikikan ika yejua nochipa kinektos techkakis. San ika, onka okse tlemach tlen noneki tikchiuaskej. ¿Itech tlenon titlajtotokej? Noneki tikilnamikiskej Filipenses 4:6, 7 (xpoua). Ipan yejuin tlaxeloltin, Pablo okijto ika ijkuak tikchiuiliskej teoyotl Jehová, noneki tiktlasojkamachiliskej. Niman melak kinamiki ijkon matikchiuakan. ¿Tleka? Pampa yejua techmaka tonemilis, yokichijchiuj miyek tlemach, techititia ika nochipa techtlasojtla niman techijlia ika uelis tikseliskej itlaj tlen melak kualtsin ika tlayekapan. ¿Tlenon más tiuelij itech Ana?

7. ¿Tlenon nochipa kichiuayaj Ana iuan iueuentsin?

⁷ Maski Ana kixnamikiya miyek tlemach, yejua iuan iueuentsin nochipa konueyichiuayaj Jehová ne Siló (1 Sam. 1:1-5). Ana nemiya ipan tabernáculo ijkuak ueyi teopixki Elí okijli ika kichiaya ika Jehová makimaka tlen kitlajtlaniliaya. Ana melak kuajli onomachili pampa ijkon okijlikej (1 Sam. 1:9, 17).

8. Xkijto kenon techpaleuis tla tiauej tlanechikoltin.

⁸ Uelis oksejpa tinemiskej ika toyojlo tla nochipa tiauej tlanechikoltin. Miyekpa, ijkuak peuaj totlanechikoluan, nochiua se teoyotl kampa notlajtlani iespíritu Jehová. Niman, matikilnamikikan ika espíritu santo kichiua maonia yolseuilistli (Gál. 5:22). Tla tiauej tlanechikoltin maski melak tajmantokej, Jehová niman oksekimej tokniuan uelis techyolchikauaskej niman uelis techpaleuiskej oksejpa matinemikan ika toyojlo. Jehová techyolseuiya ijkuak tikchiuaj teoyotl niman ijkuak tiauej tlanechikoltin (Heb. 10:24, 25). Aman matikteneuakan okse tlemach tlen tiuelij itech Ana.

9. ¿Tlenon ok kixnamikiya Ana, san ika, tlenon okiyolseui?

⁹ Tlen kiyolajmanaya Ana, xnimantsin opopoliuj. Ijkuak youajnokuepka ika okiueyichiuato Jehová ipan tabernáculo, yejua ok chantiya iuan Peniná. Niman Biblia xkijtoua tla Peniná onopatlak. Kuakon, uelis tikijtoskej ika Peniná ok kijliaya tlen teyolkoko. San ika, aman Ana yolpakiya niman xok najmanaya. Ijkuak Ana okineltokak ika Jehová kikakiskia iteoyouj, yejua xok onoyolajman. Okinokauili makiyolseui Jehová. Oajsik tonajli ijkuak Ana okinpix ikoneuan, Jehová ijkon okinankili iteoyouj (1 Sam. 1:19, 20; 2:21).

10. ¿Tlenon tiuelij itech Ana?

¹⁰ Uelis oksejpa tinemiskej ika toyojlo maski xpopoliui tlen kichiua matajmanakan. Seki tlemach tlen tikixnamikij kanaj xpopoliuiskej maski tikchiuaskej teoyotl niman maski nochipa tiaskej tlanechikoltin. San ika, tlen ipan onochiuj Ana techititia ika Jehová nochipa techyolseuis, niman xitlaj uelis kitsakuilis ijkon makichiua. Jehová xkeman techilkauas, niman ajsis tonajli ijkuak yejua techteochiuas pampa otitlaxikojkej (Heb. 11:6).

11. ¿Tlenon kixnamikiya Pablo tlen kichiuaya manajmana?

¹¹ Pablo kixnamikiya miyek tlemach, niman yejon kichiuaya manajmana. Yejua melak kintlasojtlaya tokniuan niman kajmanaya tlen inpan nochiuaya (2 Cor. 2:4; 11: 28). Ijkuak otenojnotstinen, miyekej akin kitlauelitayaj okiuijuisojkej niman okitsajkej. Noijki najmanaya pampa xkipiaya miyek tlemach (Filip. 4:12). Niman noijki matikilnamikikan ika yejua yexpa oapolajka ijkuak yaya ipan barco, yejua ika, uelis tikonnemiliskej kenon nomojtiaya nochipa ijkuak tlejkouaya ipan se barco (2 Cor. 11:23-27). ¿Tlenon okiyolseui?

12. ¿Tlenon okipaleui Pablo mayolseui?

¹² Pablo kajmanaya tlen inpan nochiuaya tokniuan, san ika, kasikamatiya ika san iselti xueliskia kinpaleuis. Ika yejon, okintlajtlanili oksekimej tokniuan makipaleuikan makitlajpiyakan tlanechikojli. Okinmakak seki tekitl akin intech tlaneltokaya, ken Timoteo niman Tito. Kuajli tikmatstokej ika tlen okichiujkej yejuin tokniuan, okichiuj ika Pablo mayolseui (Filip. 2:19, 20; Tito 1:1, 4, 5).

13. ¿Kenon tlayekankej uelis kichiuaskej ken Pablo?

¹³ Yakaj matiktlajtlanilikan matechpaleui. Ijkon ken Pablo, miyekej tokniuan tlayekankej noijki melak najmanaj ijkuak tlajyouiyaj tokniuan pampa melak kintlasojtlaj. San ika, se tlayekanketl xuelis san iselti kinpaleuis tokniuan. Yejuamej kasikamatij ika noneki yakaj makinpaleui, ika yejon, kintlajtlaniliaj oksekimej tokniuan makinpaleuikan, noijki kinmajmachtiaj telpokamej kenon kitlajpiyaskej tlanechikojli (2 Tim. 2:2).

14. ¿Tlenon xkajmanaya Pablo, niman tlenon tiuelij itech?

¹⁴ Matikasikamatikan ika tinochimej tiknekij yakaj matechyolseui. Pablo yolyemanki katka, yejua ika, kasikamatiya ika nonekiya makiyolseuikan iamigos. Yejua xkajmanaya tla oksekimej kinemiliayaj ika xyolchikauak katka pampa tokniuan kiyolchikauayaj. Ijkuak okitlajkuilouili Filemón, yejua okijto: “Motetlajsojtlalis nechmaka miyek yolpaktli niman yoleualistli” (Filem. 7). Pablo noijki okinteneuj sekimej tokniuan akin okiyolchikaujkaj ijkuak melak najmantoya (Col. 4:7-11). Tla tiyolyemankej niman tikasikamatij ika noneki matechyolchikauakan, tokniuan kinektoskej techyolchikauaskej.

15. ¿Tlenon okipaleui Pablo ijkuak melak najmanaya?

¹⁵ Matitlaneltokakan itech iTlajtol toTajtsin. Pablo kimatstoya ika iTlajtol toTajtsin kiyolseuiskia (Rom. 15:4). Noijki kimatstoya ika “on iYektlajkuilol Dios” kipaleuiskia kuajli matlanemili niman ijkon uelis kixikos maski san katlejua tlauejli (2 Tim. 3:15, 16). Ijkuak ika okpa okitsajkej ne Roma, okimat ika imikiskia. Yejon melak okiyolajman, san ika  ¿tlenon okichiuj ijkuak ijkon onomachili? Okitlajtlanili Timoteo nimantsin makitati niman makimitkili tlajkuilolamamej (2 Tim. 4:6, 7, 9, 13). ¿Tleka? Pampa kanaj seki itech yejon tlajkuilolamamej katkaj Tlajkuiloltin ika Hebreo, kuakon, Pablo ueliskia kintekitiltis niman ijkon nomachtis. Tla tejuamej nochipa tomachtiaj Biblia ijkon ken Pablo, Jehová techyolseuis ika iTlajtol, maski san katlejua tlauejli tikixnamikiskej.

16. ¿Kenon onomachili tekiuaj David ijkuak otlajtlako?

¹⁶ David melak kajmanaya pampa okichiujka tlen melak xkuajli. Oauilnenka iuan Bat-Seba niman okichiuj makimiktikan iueuentsin, niman noijki kinekiya kiyanas nochi tlen xkuajli okichiujka (2 Sam. 12:9). Pampa David kachtopa xkinekiya kijtos tlen okichiujka, xsan okiyolkoko Jehová, noijki melak onoyolajman niman hasta opeuj kualo (Sal. 32:3, 4). ¿Tlenon okichiuj David niman ijkon xok tlajyouis ipampa itlajtlakol? ¿Tlenon techpaleuis tla tejuamej tikchiuaj se ueyi tlajtlakojli?

17. ¿Kenon techititia Salmo 51:1-4 ika David yemelak yonoyolkuepka?

¹⁷ Matiktlajtlanilikan Jehová matechtlapopolui. Sakin, David okichiuili teoyotl Jehová niman okinokuiti itlajtlakoluan (xpoua Salmo 51:1-4). Yejuin okipaleui kuajli manomachili (Sal. 32:1, 2, 4, 5). Tla tikchiuaj se tlajtlakojli, maka matikiyanakan. Matiknotsakan Jehová niman matikijlikan tlen otikchiujkej. Tla ijkon tikchiuaj, tiyolseuiskej niman xok totlajtlakoltijtoskej. San ika, tla tiknekij oksejpa kuajli touikaskej iuan Jehová, noneki tikchiuaskej okse tlemach.

18. ¿Tlenon okichiuj David ijkuak Jehová okimelajkatlali?

¹⁸ Matikselikan ken techmelajkatlalis Jehová. Ijkuak Jehová okititlan teotlajtoketl Natán matlajtoti iuan David itech itlajtlakol, David xsan tlemach ika onotlami nion xokijto ika itlajtlakol xueyi kijtosnekiya. Nimantsin okinokuiti ika xsan okichiuilijka tlen xkuajli iueuentsin Bat-Seba, noijki okasikamat ika otlajtlakojka ixpan Jehová. David okiseli ken okimelajkatlali Jehová, niman Jehová okitlapopolui (2 Sam. 12:10-14). Tla otikchiujkej se ueyi tlajtlakojli, noneki titlajtoskej iuan tokniuan akin toTajtsin yokintlali matechtlajpiyakan (Sant. 5:14, 15). Ijkuak touan tlajtoskej, maka san tlemach ika matotlamikan. Tla nimantsin tikseliaj ken techmelajkatlalia  Jehová niman tikchiuaj tlen techtlajtlanilia, más totoka tiyolseuiskej niman tiyolpakiskej.

19. ¿Tlenon yotikijtokej tikchiuaskej?

¹⁹ Maka oksejpa matikchiuakan sa no yejua tlajtlakojli. Tekiuaj David kimatstoya ika nonekiya toTajtsin makipaleui niman ijkon xok oksejpa kichiuas sa no yejua tlajtlakojli (Sal. 51:7, 10, 12). Ijkuak toTajtsin okitlapopolui, kuajli okijto ika xok kinemiliskia tlen xkuajli. Pampa ijkon okichiuj, David oksejpa kuajli onomachili.

20. ¿Kenon tikteititiaj ika tiktlasojkamatij ika Jehová techtlapopoluiya?

²⁰ Tikteititiaj ika tiktlasojkamatij ika Jehová techtlapopoluiya ijkuak ipan teoyotl tiktlajtlaniliaj matechtlapopolui, ijkuak tikseliaj ken techmelajkatlalia niman ijkuak tokojtiliaj xok tikchiuaskej sa no yejua tlajtlakojli. Ijkuak tikchiuaj yejuin, oksejpa tiyolseuij. Yejon tlen ipan onochiuj tokniuj James, akin okichiujka se ueyi tlajtlakojli. Yejua kijtoua: “Ijkuak onikimijli tlayekankej ika yonitlajtlakojka, kentla niknokixtiliskia itlaj tlen nopan yetixtoya. Opeuj nikmachilia ika niyolseujtiaya”. Melak techyolpaktia tikmatiskej ika Jehová “nemi nisiu para kinyoltlalia on yejuan sanoyej noyolkokouaj” niman ika kinmakixtia “on yejuan xok kipiyaj tlamachalistli” (Sal. 34:18).

21. ¿Kenon uelis tokauiliskej matechyolseui Jehová?

²¹ Aman ika tinemij ipan sa itlamiyan tonaltin, miyekixtias tlen kichiua matoyolajmanakan. Ijkuak melak tajmanaskej noso totekipachoskej, nimantsin matikijlikan Jehová matechpaleui. Nochipa matomachtikan Biblia. Matikchiuakan ken Ana, Pablo niman David. Matiktlajtlanilikan Jehová matechpaleui matikmatikan tleka tajmanaj (Sal. 139:23). Matijkauilikan Jehová matechpaleui niman matikneltokakan ika kiyektlalis tlen tejuamej xtiuelij tikyektlaliaj. Tla ijkon tikchiuaj, tomachiliskej ken salmista akin okikuikatili Jehová: “Ijkuak ajmantli nechyolajmanaya, otinechyolchikauj niman otinechyolseui” (Sal. 94:19, TNM).