1. Hadia manö zi tola mangaʼasogö khöda faʼabu dödö, ba hadia zi tola tumbu ba wangera-erada?

HADIA no irai örasoi waʼabu dödö? * Tola manö örasoi zimane daʼö börö me so niha zangumaʼö mazui samalua amuata sangafökhöiʼö tödömö. Mazui abu dödömö ba woʼangeragö fehede mazui amuatamö samösa. Duma-dumania, te no öfalua zala ba abu dödömö alai na lö iʼefaʼö zalamö andrö Yehowa. Ba sabölö-bölönia, na talafo örasoi waʼabu dödö, tola manö tumbu ba gera-eramö wa yaʼugö andrö tenga niha samati ba tenga niha si sökhi. Hizaʼi, hadia atulö daʼö?

2. Ba Zura Niʼamoniʼö, haniha manö duma-duma zangoromaʼö wa tenga börö me ambö taʼokhögö wamati andrö wa tarasoi waʼabu dödö?

² Angeragö ösa duma-duma si so ba Zura Niʼamoniʼö. Ina zamaʼeleʼö sotöi Samueli yaʼia daʼö Khana, yaʼia andre samösa ira alawe sangokhögö famati saro. Hizaʼi, abu sibai dödönia me so samösa nösi nomonia zamalua khönia si lö atulö. (1 Zam. 1:7) Iʼokhögö wamati saro zinenge sotöi Faulo, hizaʼi irasoi waʼabu dödö ba ’aombö dödönia ba mbanua niha Keriso misa’. (2 Kor. 11:28) Mamati sibai Dawido, ba iʼomasiʼö ia Yehowa. (Hal. 13:22) Hewaʼae simanö, no irai ifalua zala Dawido, ba sindruhu-ndruhu abu dödönia börö zalania andrö. (Zin. 38:5) Irara ba iʼokafuiʼö dödöra Yehowa. Datatutunö hadia manö wamahaʼö si tola tahalö moroi ba duma-dumara.

3. Hana wa tola abu dödöda börö wehede niha böʼö?

³ Tola manö abu dödöda na so niha sangumaʼö mazui samalua khöda amuata si lö sökhi. Tola itugu monönö daʼö, na niha sangafökhöiʼö tödöda andrö yaʼia daʼö si fahuwu  khöda mazui ösi nomoda. Tola manö abu dödöda na tekiko wahuwusada khönia. Itaria, tola manö lawaʼö wehede si lö fakhamö laʼangeragö, ba tarasoi waʼafökhö hulö nifahö faoma gari. (Gamd. 12:18) Mazui, tola manö iʼodödögö wangumaʼö fehede sangafökhöiʼö tödöda. No irai alua zimane daʼö khö dalifusöda ira alawe si bohou ebua. Imane, ”Hauga fakhe silalö, so samösa zi fahuwu khögu zangobousi yaʼo ba media sosial. Afökhö sibai dödögu ba urasoi waʼabu dödö. Lö aboto ba dödögu hadia mbörö wa iʼafökhöiʼö dödögu simane daʼö.” Na no irai iʼafökhöiʼö dödömö si fahuwu mazui ösi nomomö, tola öfahaʼö ndraʼugö moroi ba duma-duma Khana.

4. Hadia manö gabula dödö salua khö Khana?

⁴ So ösa gabula dödö sebua nitaögö Khana. Ba zi hauga fakhe, lö iʼokhögö ndraono. (1 Zam. 1:2) Me luo daʼö, faduhu dödö ndraono Gizaraʼeli wa ira alawe si lö moʼono, no si göna fangelifi moroi khö Lowalangi. Andrö wa aila sibai Khana. (1 Moz. 30:1, 2) So nasa danö böʼö zonönö faʼabu dödönia. So woʼomo tanö böʼö khö ndronga Khana töinia Fenina, ba no so ndraononia. Afökhö sibai dödö Fenina khö Khana, ba ’ibusi dödönia fehede famaosi tödönia, ba wangandrö fönunia’. (1 Zam. 1:6) Ba wamobörö, abu sibai dödö Khana ba gabula dödö salua khönia andrö. Ba ”mege-ege Khana, ba lö manga” börö ”waʼabu dödönia” andrö. (1 Zam. 1:7, 10) Ba gafuriata, hadia mbörö wa tola terara dödö Khana?

5. Hewisa wangandrö tola möi fanolo Khana?

⁵ Mangandrö Khana ba wanutunö ösi dödönia khö Yehowa. Me no aefa mangandrö ia, ifatunö khö Gere Sebua sotöi Eli hadia zalua khönia. Aefa daʼö imane khönia Eli, ”Fuliʼö, yaʼohahau dödöu, ibeʼe saʼae khöu Lowalangi ndraono Gizaraʼeli niʼandröu khönia!” Hadia zalua aefa daʼö? Ba ”mofanö ndra alawe andrö ba manga ba döhö waʼabu dödö”. (1 Zam. 1:17, 18) Fangandrö zangaʼasogö faʼahono dödö khö Khana.

6. Moroi ba duma-duma Khana hegöi nisura ba Filifi 4:6, 7, hadia wamahaʼö si tola tahalö sanandrösa ba wangandrö?

⁶ Tarasoi waʼahono dödö na lö taböhöli wangandrö khö Yehowa. Ara sibai iʼogunaʼö ginötö Khana ba wangandrö khö Namania si so ba zorugo. (1 Zam. 1:12) Tola göi ara taʼogunaʼö ginötö ba wangandrö khö Yehowa ba tatutunö khönia zabu dödöda, faʼataʼu, hegöi zoʼamböta yaʼita. Lö moguna sökhi sibai ba toföfö ngawua wehededa na  talau mangandrö. Itaria, tola manö meʼe ita ba wanutunö zabu dödöda khö Yehowa. Hewaʼae simanö, lö irai aföli Yehowa ba wamondrondrongo yaʼita. Baero ba woʼangandröi zabu dödöda, moguna tafalua niwaʼö ba zura Filifi 4:6, 7. (Baso.) Ifatunö khöda Faulo, wa moguna göi taʼandrö saohagölö ba ginötö mangandrö ita. Oya sibai zinangea taʼandrö saohagölö khö Yehowa. Duma-dumania, tola taʼandrö saohagölö me no ibeʼe khöda waʼauri, ngawalö niwöwöinia sahöli-höli dödö, faʼomasinia si lö faröi, hegöi dötönafö sahöli-höli dödö si no ibeʼe khöda. Hadia nasa wamahaʼö si tola tahalö khö Khana?

7. Hadia zi lö tebulö ifalua Khana hegöi foʼomonia?

⁷ Hewaʼae na oya gabula dödö salua khönia, lö tebulö fao Khana khö woʼomonia ba weʼamöi ba nose Lowalangi si so ba Zilo, ba wamalua famosumange khö Yehowa. (1 Zam. 1:1-5) Ba nose Lowalangi andrö ifatunö khönia Ere Sebua sotöi Eli, wa itötöna enaʼö ifondrondrongo wangandrönia Yehowa. Teʼabölöʼö sibai Khana ba wamondrongo fehede daʼö.​—1 Zam. 1:9, 17.

8. Hewisa wa tola möi fanoloda weʼamöi ba gangowuloa? Tutunö.

⁸ Tola taʼokhögö waʼahono dödö na lö taböhöli weʼamöi ba gangowuloa. Mubörögö gangowuloa faoma fangandrö. Si toʼölönia, iʼandrö geheha niʼamoniʼö moroi khö Yehowa talifusöda sangolohesi fangandrö, enaʼö so waʼohahau dödö sagötö mufalua gangowuloa. Faʼohahau dödö no bua-bua geheha. (Gal. 5:22) Na möi ita ba gangowuloa hewaʼae so zabu dödöda, tola itolo ita Yehowa hegöi ira talifusöda ba wangokhögö faʼohahau dödö hegöi faʼohahau wangera-ngera. Fangandrö hegöi angowuloa, daʼa dombua lala siföföna niʼogunaʼö Yehowa ba wameʼe khöda faʼahono dödö. (Heb. 10:24, 25) Datatutunö wamahaʼö tanö böʼö si tola tahalö khö Khana.

9. Hadia zi lö iʼanemaiʼö tebulö ba waʼauri Khana, hizaʼi hadia zi tola manolo yaʼia?

⁹ Lö iʼanemaiʼö taya fefu waʼabu dödö nirasoi Khana. Me no awai lafalua wamosumange ba mangawuli ira ba nomora, lö tebulö sambua omo nasa Khana khö Fenina. Ba lö irai itutunö Sura Niʼamoniʼö wa tebulö mbua-bua Fenina. Andrö, tola manö iforege nasa Khana ba wangokhögö faʼanau gölö ba wanemaʼö fehede sagafökhö moroi khö Fenina. Hizaʼi, lö tebulö iʼokhögö waʼohahau dödö Khana. Hadia mbörö? No tatutunö mege wa lö saʼae abu dödö Khana, me no itouʼö fefu zabu dödönia khö Yehowa. Iʼodaligö Yehowa. Ba gafuriata, ifondrondrongo wangandrönia Yehowa ba tola moʼono ia!​—1 Zam. 1:19, 20; 2:21.

10. Hadia wamahaʼö si tola tahalö moroi ba duma-duma Khana?

¹⁰ Tola taʼokhögö waʼohahau dödö hewaʼae lö nasa si taya gabula dödöda. Hewaʼae asese talau mangandrö ba asese möi ita ba gangowuloa, so ösa gabula dödö si tebai taya. Hizaʼi, moroi ba duma-duma Khana, tafahaʼö ita wa gofu hadia zalua khöda, tola iʼokafui dödöda Yehowa. Lö irai iʼolifugö ita Yehowa, na ba ginötönia dania, hasambalö ibeʼe luoda börö me lö faröi ita khönia.​—Heb. 11:6.

11. Hadia mbörö waʼabu dödö Waulo?

¹¹ Oya sibai wangabu dödö nitaögö Waulo. Duma-dumania, börö me iʼomasiʼö ndra talifusönia, abu sibai dödönia me iʼila wa lataögö gabula dödö. (2 Kor. 2:4; 11:28) Baero daʼö, sagötö wamaluania halöwö tobali sinenge, ato niha zi lö omasi khönia. Laböbözi ba labeʼe ia ba gurunga. Oya göi danö böʼö salua khönia, zi möi börö waʼabu  dödönia. Duma-dumania, no irai ”itörö waʼatosasa”. (Fil. 4:12) No irai tölu kali arakhagö ahöndrö göfa nitörö Waulo. Tatu manö so khönia waʼaombö dödö, ero itörö göfa na ifalua wofanö. (2 Kor. 11:23-27) Hadia zanolo Faulo ba wanaögö faʼabu dödönia?

12. Hadia zanolo Faulo ba wangalösi faʼabu dödönia?

¹² Abu sibai dödö Waulo me alua gabula dödö khö ndra talifusönia. Hizaʼi, lö itaögö samösa gabula dödö andrö. Aboto ba dödönia wa so zi tebai ifalua moloʼö faʼabölönia. Iʼandrö wanolo moroi ba niha böʼö, ba wanolo ndra talifusö si göna abula dödö andrö. Duma-dumania, oya halöwö nibeʼenia khö ndra matua si tola mufaduhusi tödö simane Timoteo ba Tito. Tola manö alö waʼabu dödö Waulo börö wanolo moroi khöra.​—Fil. 2:19, 20; Tit. 1:1, 4, 5.

13. Hewisa ndra satua sokubaloi ba woloʼö duma-duma Waulo?

¹³ Andrö wanolo moroi ba niha böʼö. Iadaʼa, ato zatua sokubaloi zangokhögö faʼomasi simane Faulo. Abu dödöra na so ndra talifusö si göna abula dödö. Hizaʼi, tebai itolo fefu ndra talifusöda ba gangowuloa zi samösa satua sokubaloi. Na aboto ba dödönia wa so zi lö ikhamö faʼabölönia, falulu fohalöwö ia khö ndra talifusöda tanö böʼö si so noro dödö ba gangowuloa. Ifahaʼö göi ndra talifusöda si bohou ebua, enaʼö tola dania latolo ia ba wondrorogö mbiri-biri Lowalangi.​—2 Tim. 2:2.

14. Hadia zi lö iʼaombösi tödö Faulo, ba hadia wamahaʼö si tola tahalö moroi ba duma-dumania?

¹⁴ Faduhuʼö wa moguna khöu wangabölöʼö moroi ba niha böʼö. So wangide-ngideʼö khö Waulo, aboto göi ba dödönia wa moguna khönia wangabölöʼö moroi khö ndra si fahuwu khönia. Ifaduhuʼö wa no irai itema wangabölöʼö moroi ba niha böʼö, ba lö aombö dödönia alai na so ba wangera-ngera niha böʼö, wa yaʼia andrö niha si lö faʼabölö. Me isura zurania khö Wilemo, imane Faulo, ”Urasoi waʼomuso dödö sebua ba terara dödögu me urongo waʼomasimö.” (File.  7) Isura göi Faulo haniha manö döi ndra talifusönia ba wamati, sangabölöʼö yaʼia me itaögö gabula dödö. (Kol. 4:7-11) Na taʼokhögö wangide-ngideʼö ba tafaduhuʼö wa moguna khöda wangabölöʼö moroi ba niha böʼö, hasambalö aoha gölö ndra talifusöda ba wameʼe fanolo soguna khöda.

15. Hewisa Waulo ba wanöndra fondrara dödö ba ginötö göna ia fanandraigö?

 ¹⁵ Alui wondrara dödö moroi ba Daromali Lowalangi. Aboto ba dödö Waulo wa tola isöndra wondrara dödö moroi ba Zura Niʼamoniʼö. (Rom. 15:4) Daʼö göi zanolo yaʼia ba wangokhögö faʼatua-tua ba wanaögö fefu wanandraigö salua khönia. (2 Tim. 3:15, 16) Me lakuru ia ba Roma ba zi mendrua kali, irasoi Faulo wa lö ara tö mate ia. Hadia nifalua Waulo me alua khönia wanandraigö sabua andrö? Iʼandrö khö Dimoteo ba wamalukhaisi yaʼia ba iʼohe ”gölu-gölu zura”. (2 Tim. 4:6, 7, 9, 13) Hana? Gölu-gölu zura andrö, hulö moroi ba Mbuku Niʼamoniʼö Heberaiʼo ba omasi Waulo ba wombaso hegöi ba woʼangerönusi nösinia. Na taʼoʼö duma-duma Waulo ba wombaso hegöi ba wamahaʼö yaʼita ba Daromali Lowalangi ero maʼökhö, hasambalö iʼogunaʼö Zura Niʼamoniʼö andrö Yehowa, ba wameʼe khöda faʼahono dödö—gofu hadia wanandraigö salua ba waʼaurida.

16. Hadia nirasoi Dawido me no ifalua horö sebua?

¹⁶ No irai ifalua horö sebua Dawido. Mohorö ia khö Mbaseba ba itatugöi enaʼö labunu woʼomo Mbaseba. Ara maʼifu ibiniʼö horönia Dawido. (2 Zam. 12:9) Ba wamobörö, iforege Dawido enaʼö lö itegu-tegu ia tödönia ba zala si no ifalua. Börö me ifalua daʼö, tekiko wahuwusania khö Yehowa. Abu sibai dödönia ba iʼohe mofökhö. (Zin. 32:3, 4) Hadia zanolo Dawido ba wanaögö abula dödö börö zala si no ifalua, ba hadia göi zi tola manolo yaʼita na no tafalua horö sebua?

17. Hewisa Zinunö 51:3-6 ba wangoromaʼö wa sindruhu-ndruhu mangesa dödö Dawido ba zala si no ifalua?

¹⁷ Andrö wangefa. Ba gafuriata mangandrö Dawido khö Yehowa. Sindruhu-ndruhu mangesa dödönia, ba ifatunö zala si no ifalua khö Yehowa. (Baso Zinunö 51:3-6.) Buania, ifuli zui iʼokhögö waʼohahau dödö hegöi faʼomuso dödö! (Zin. 32:1, 2, 4, 5) Na no öfalua horö sebua, böi bini-biniʼö. Angandrö khö Yehowa ba fatunö horö si no öfalua. Aefa daʼö, tola öʼokhögö waʼahono dödö, ba tola itugu alö waʼabu dödömö börö zala si no öfalua. Hizaʼi, na omasiʼö ifuli fahuwu khö Yehowa, so danö böʼö zinangea öfalua.

18. Hewisa dödö Dawido me labeʼe khönia degu-degu?

¹⁸ Tema degu-tegu. Me ifatenge Yehowa  zamaʼeleʼö sotöi Natano ba wamalukhaisi Dawido, ba ifatunö khönia sanandrösa ba horö si no ifalua, lö iforege Dawido enaʼö aefa ba hulunia mazui iwaʼö wa lö abölö-bölö sibai zala si no ifalua. Iʼanemaiʼö ifaduhuʼö wa no fasala ia khö woʼomo Mbaseba, ba sabölö-bölönia fasala ia föna Yehowa. Itema degu-tegu moroi khö Yehowa, ba iʼefaʼö zalania Yehowa. (2 Zam. 12:10-14) Na no tafalua horö sebua, moguna fahuhuo ita khö ndra talifusöda si no ituyu Yehowa tobali kubalo. (Yak. 5:14, 15) Böi taheta ba huluda. Na taʼanemaiʼö tatema ba tafalua degu-tegu nibeʼe khöda, tola ifuli taʼokhögö waʼohahau dödö hegöi faʼomuso dödö.

19. Hadia gangetula sinangea tahalö?

¹⁹ Halö gangetula enaʼö lö öfuli öfalua zala simane daʼö. Aboto ba dödö Razo Dawido wa moguna khönia wanolo moroi khö Yehowa enaʼö lö ifuli ifalua zala simane daʼö. (Zin. 51:9, 12, 14) Me no aefa iʼefaʼö zalania Yehowa, ihalö gangetula ba wanimbagö fefu gisö-isö dödö si fasala. Buania, irasoi Dawido waʼohahau dödö.

20. Hewisa wangoromaʼöda wa taʼameʼegö tödö wangefa horö nibeʼe Yehowa?

²⁰ Na taʼandrö wangefa, tatema degu-tegu, ba taforege enaʼö lö tafuli tafalua zala simane daʼö, no taforomaʼö wa taʼameʼegö tödö wangefa horö nibeʼe Yehowa. Na no tafalua fefu daʼö, tola ifuli zui taʼokhögö waʼohahau dödö. Daʼö zalua khö dalifusöda ira matua sotöi James, si no irai mamalua horö sebua. Imane, ”Me no aefa ufatunö zala si no ufalua khö ndra satua sokubaloi, urasoi wa hulö no tefazawa noro sebua moroi ba galisigu. Ifuli zui uʼokhögö waʼohahau dödö.” Tatu terara sibai dödöda börö me taʼila wa ”ahatö Yehowa ba zi no arasa tödö ba itolo zi no atata era-era”!​—Zin. 34:19.

21. Hewisa wangoromaʼöda wa omasi ita na Yehowa zondrara tödöda?

²¹ Lö ara tö gamozua ngaluo safuria, andrö wa tola manö itugu tarasoi waʼaombö-aombö dödö hegöi faʼabu dödö. Na alua khöu zimane daʼö, aliokö ba wangandrö fanolo moroi khö Yehowa. Böi böhöli ba wamahaʼö yaʼugö ba Zura Niʼamoniʼö. Fahaʼö ndraʼugö ba duma-duma Khana, Faulo hegöi Dawido. Andrö wanolo moroi khö Yehowa enaʼö öʼila hadia mbörö wa örasoi waʼabu dödö. (Zin. 139:23) Beʼe noro Yehowa zaombö-aombö dödöu, mendrua manö na lö oya zi tola öfalua ba wangasiwai zalua. Hasambalö örasoi zimane nirasoi zanura sinunö khö Yehowa me imane, ”Ba waʼoya ngawalö waʼabu dödögu andrö, ba iʼokafui dödögu fondrara tödö andrö khöu.”​—Zin. 94:19.