1. Ko e heigoa ne liga fakatupu e fakaatukehe, ti lauia fēfē a tautolu he mena ia?

KUA lauia lahi nakai a koe he fakaatukehe? * Liga logona hifo e koe e fakaatukehe ha kua fakamamahi he tau mena ne talahau po ke taute he falu. Po ke liga fakaatukehe a koe ke he mena ne talahau po ke taute e koe. Ma e fakatai, liga taute e koe e hehē ti tupetupe to nakai fakamagalo e Iehova a koe. Ke au atu e kelea, liga talitonu a koe ha kua molea e fakaatukehe haau, kua temotemoai e tua haau ti eke a koe mo tagata kelea. Ka e pihia mooli nakai?

2. Ko e heigoa e tau fakataiaga he Tohi Tapu ne fakakite ka fakaatukehe kua nakai kakano kua temotemoai e tua ha tautolu?

² Manamanatu ke he falu fakataiaga gahoa he Tohi Tapu. Ko Hana ne eke mo matua fifine he perofeta ko Samuela, ko e fifine ne malolō e tua. Ka e fakaatukehe lahi a ia he taute fakakelea he taha tagata he magafaoa haana a ia. (1 Samu. 1:7) Malolō e tua he aposetolo ko Paulo, ka e lahi e “kapaletu ha ko e tau ekalesia oti.” (2 Kori. 11:28) Malolō lahi e tua he Patuiki ko Tavita ti ha ha i ai e fakafetuiaga uho lahi ha Iehova mo ia. (Gahua 13:22) Ka e taute e Tavita e tau hehē ne fakatupu a ia ke matematekelea he pehia he fakaatukehe. (Sala. 38:4) Fakamafana mo e fakatotoka e Iehova a lautolu takitokotaha. Kia kumikumi a tautolu ke he mena ka fakaako mai he tau fakataiaga ha lautolu.

3. Maeke fēfē e tau kupu vagahau he falu ke fakaatukehe a tautolu?

³ Ka vagahau vale po ke nakai mahani totonu e falu, to liga fakaatukehe a tautolu. Pihia mooli kaeke ko e kapitiga po ke taha he magafaoa tata ka fakamamahi a tautolu. Liga tupetupe a tautolu kua galo e fakafetuiaga ha tautolu mo e tagata ia. Falu magaaho, liga ko e tagata ne fakamamahi a tautolu kua nakai manamanatu to vagahau, ti liga logona hifo e tautolu kua tuga e tuina he pelu! (Fakatai 12:18) Po ke taha tagata kua liga fifili pauaki ke fakaaoga e tau kupu ke eke mo kanavaakau. Ne fehagai e matakainaga fifine fuata mo e paleko nei. “He tau tau kua mole,” he ui e ia, “fai tagata ne manatu au ko e kapitiga mitaki ne kamata ke fakaholofa e tau tala pikopiko hagaao ki a au he initanete. Ne mamahi mo e fakaatukehe au. Nakai maeke au ke maama e kakano ne hoka halatua pihia e ia au.” Ka fakamamahi he kapitiga po ke magafaoa tata a koe, lahi e mena ka fakaako e koe mai ia Hana.

4. Ko e heigoa e tau lekua uka ne fehagai mo Hana?

⁴ Fehagai a Hana mo e falu lekua uka. Loga e tau ne nakai maeke a ia ke fai tama. (1 Samu. 1:2) He aga fakamotu i Isaraela, ko e fifine tūfua ne tokutoku kua malaia. Ti mā lahi a Hana ha ko e mena nei. (Kene. 30:1, 2) Ke au atu e kelea ha Hana, ko Penina e taha hoana he taane haana ne fanafanau e tau tama mo e taane haana. Onoono mahekeheke a Penina ki a Hana ti “fakahogohogomanava foki a ia kia ia [Hana] ke ita ai.” (1 Samu. 1:6) He mogo fakamua, momoko lahi mahaki a Hana ke he tau paleko uka nei. Ita lahi a Hana ti “tagi ai a ia, mo e nakai kai a ia.” “Ne mamahi hana loto.” (1 Samu. 1:7, 10) Moua fēfē e Hana e mafanatia?

5. Lagomatai fēfē he liogi a Hana?

⁵ Liligi e Hana e tau logonaaga haana ki a Iehova he liogi. He mole e liogi haana, fakamaama e ia e tuaga ke he Ekepoa ne Mua ko Eli. Pehē a Eli ki a ia: “Kia fano ā koe mo e monuina; kia foaki mai foki he Atua a Isaraela e tau mena kua ole e koe kia ia.” Ko e heigoa e fua? Ati “fano ai [a Hana], ti kai a ia ti nakai tuai mata momoko a ia.” (1 Samu. 1:17, 18) Lagomatai he liogi a Hana ke liu moua e mafola.

6. Ko e heigoa ka fakaako e tautolu mai he liogi ha Hana mo e he Filipi 4:6, 7?

⁶ Maeke a tautolu ke liu moua e mafola ka  fakamakamaka ke he liogi. Lahi e magaaho a Hana ne tutala ke he haana Matua he lagi. (1 Samu. 1:12) Maeke foki a tautolu ke lahi e magaaho ke tutala ki a Iehova hagaao ke he tau fakaatukehe, tau matakutaku, mo e tau lolelole ha tautolu. Nakai lata e tau liogi ha tautolu ke talahau e tau mena oti ke he puhala mitaki lahi. Falu mogo ne liga talahau e tautolu e tau kupu mamahi mo e tagi he maanu. Pete ia, to nakai fiu a Iehova he fanogonogo ki a tautolu. Lafi ke he liogi hagaao ke he tau lekua ha tautolu, lata ke manatu e fakatonuaga he Filipi 4:6, 7. (Totou.) Talahau pauaki e Paulo kua lata a tautolu ke foaki e tau liogi fakaaue. Loga lahi e kakano ke fakaaue a tautolu ki a Iehova. Ma e fakatai, fakaaue a tautolu ki a ia ma e mena fakaalofa he moui, tau tufugatia, fakaalofa noa, mo e amaamanakiaga homo ue atu ne foaki mai e ia ki a tautolu. Ko e heigoa foki ka fakaako e tautolu mai ia Hana?

7. Ko e heigoa ne taute tumau e Hana mo e taane haana?

⁷ Pete ni e tau lekua ha Hana, ne fina atu tumau a ia mo e taane haana ke he matakavi tapuaki ha Iehova i Sailo. (1 Samu. 1:1-5) Ko Hana he faituga he mogo ne tala age e Ekepoa ne Mua ko Eli kua amanaki a ia ke tali e Iehova e liogi ha Hana.​—1 Samu. 1:9, 17.

8. Ko e heigoa kua taute he tau feleveiaaga ke lata mo tautolu? Fakamaama.

⁸ Maeke a tautolu ke liu moua e mafola ka matutaki a tautolu ke o mai he tau feleveiaaga. Ko e liogi hafagi he tau feleveiaaga ha tautolu ne fa putoia e ole ke he agaaga he Atua ke fakalataha mo tautolu. Ko e mafola ko e vala he fua he agaaga ia. (Kala. 5:22) Ka o mai a tautolu ke he tau feleveiaaga pete he tupetupe, foaki e tautolu ki a Iehova mo e tau matakainaga ha tautolu e magaaho ke fakamalolō mo e lagomatai a tautolu ke liu moua e mafola he tau manamanatuaga mo e tau loto. Ko e liogi mo e tau feleveiaaga ko e tau matapatu puhala kua fakaaoga e Iehova ke fakatotoka a tautolu. (Hepe. 10:24, 25) Mailoga e taha mena foki ka fakaako e tautolu mai he mena ne tupu ki a Hana.

9. Ko e heigoa ne nakai hiki he tuaga ha Hana, ka ko e heigoa ne lagomatai a ia?

⁹ Ko e fakaatukehe a Hana ne nakai galo mafiti. He mogo ne liu a Hana ki kaina mai he faituga ne tapuaki ai, lata agaia a ia ke nofo he taha e kaina mo Penina. Nakai fakakite he Tohi Tapu na hiki e aga ha Penina. Ti liga fakatumau a Hana ke fakauka ke he tau kupu fakahukia ha Penina. Ka e maeke a Hana ke liu moua mo e fakatumau e mafola he loto haana. Liu manatu e mena ne tupu he mole e tuku atu e Hana e tupetupe lahi mahaki haana ki a Iehova, nakai liu a ia tupetupe lahi. Kua fakaatā e ia a Iehova ke fakamafana mo e fakatotoka a ia. Fai mogo he mole, ne fakamonuina foki a Hana he fai fanau a ia!​—1 Samu. 1:19, 20; 2:21.

10. Ko e heigoa kua fakaako e tautolu mai he fakataiaga ha Hana?

¹⁰ Maeke a tautolu ke liu moua e mafola pete ka tumau e fakaatukehe ha tautolu. Pete he liogi fakamakamaka a tautolu mo e o mai tumau he tau feleveiaaga, liga tutupu agaia e falu lekua. Ka e mai he fakataiaga ha Hana, fakaako e tautolu kua nakai fai mena ke taofi a Iehova he fakatotoka e tau loto malipilipi ha tautolu. To nakai nimo e Iehova a tautolu, ti nakai leva to foaki e ia e palepale ma e mahani fakamooli ha tautolu.​—Hepe. 11:6.

11. Ko e heigoa e tau kakano ne fakaatukehe ai a Paulo?

¹¹ Loga e tau kakano ne fakaatukehe a Paulo. Tuga anei, ha kua fakaalofa a ia ke he tau matakainaga haana ne tupetupe lahi mahaki a ia ha ko e tau lekua ne fehagai mo lautolu.  (2 Kori. 2:4; 11:28) He kotofaaga ha Paulo ko e aposetolo, ne fehagai a ia mo e tau tagata totoko ne fahi mo e tuku a ia he fale puipui. Fakauka foki a ia ke he tau tuaga uka ne tupu mai e fakaatukehe tuga e “nofogati.” (Filipi 4:12) Manatu na kua lagatolu e pē he foulua haana ti liga tupetupe lahi mahaki a ia ke fano he foulua. (2 Kori. 11:23-27) Fehagai fēfē a Paulo mo e fakaatukehe?

12. Ko e heigoa ne lagomatai ke fakatote hifo e fakaatukehe ha Paulo?

¹² Fakaatukehe a Paulo ma e tau matakainaga haana he fehagai a lautolu mo e tau paleko, ka e nakai lali a ia ke fakamafola tokotaha e tau lekua oti ha lautolu. Ne mahani fakalatalata a Paulo. Fakatokatoka e ia e falu ke lagomatai ke leveki e fakapotopotoaga. Ma e fakatai, tuku age e ia e pule ke he tau tagata taane fakamooli ko Timoteo mo Tito. Ko e gahua ne taute he tau matakainaga taane nei ne lagomatai mooli ke fakatote hifo e fakaatukehe ha Paulo.​—Filipi 2:19, 20; Tito 1:1, 4, 5.

13. Fifitaki fēfē he tau motua a Paulo?

¹³ Ole ke he falu ke lagomatai a koe. Tuga a Paulo, tokologa e tau motua mahani totonu mogonei ne fakaatukehe ha kua fehagai e falu he fakapotopotoaga mo e tau kamatamata. Ka e fakagofua ni e mena he motua ne maeke ke taute. To omoomoi he mahani fakalatalata a ia ke hahamo e kavega mo e falu matakainaga taane lotomatala mo e ke fakaako e tau tagata taane fuata ke lagomatai a ia ke leveki e fuifui he Atua.​—2 Timo. 2:2.

14. Ko e heigoa ne nakai tupetupe ki ai a Paulo, ti ko e heigoa ne fakaako e tautolu mai he fakataiaga haana?

¹⁴ Talahau e manako haau ke moua e fakamafanaaga. Fakatokolalo a Paulo ti eketaha a ia ke moua e fakamafanaaga mai he tau kapitiga haana. Nakai tupetupe mooli a ia neke onoono ki a ia ko e tagata lolelole ka talahau kua fakamafana he falu a ia. He tohi ki a Filemoni, pehē a Paulo: “Kua lahi [haaku] a fiafia mo e mafanatia ha ko e hau a fakaalofa.” (File. 7) Totoku e Paulo e falu matakainaga ne fekafekau auloa ne fakamafana lahi a ia he tau magaaho fakaatukehe. (Kolo. 4:7-11) Ka talahau fakatokolalo e tautolu kua lata a tautolu ke moua e fakamafanaaga, to fiafia e tau matakainaga ke foaki ki a tautolu e lalagoaga kua lata.

15. Moua fēfē e Paulo e fakatotokaaga he fehagai mo e tau tuaga fakatupetupe?

¹⁵ Falanaki ke he Kupu he Atua. Iloa e Paulo to fakamafana he tau kupu Tohi Tapu a ia.  (Roma 15:4) To foaki ai foki ki a ia e pulotu ke fehagai mo e tau kamatamata. (2 Timo. 3:15, 16) He tuku a Paulo he fale puipui i Roma ke lagaua aki, ne logona e ia e tata lahi he mate haana. He fehagai mo e tuaga fakatupetupe, ko e heigoa ne taute e Paulo? Ole a ia ki a Timoteo ke hau fakamafiti ki a ia mo e tamai e “tau tohi.” (2 Timo. 4:6, 7, 9, 13) Ko e ha? Ha ko e tau tohi vakai ia ne liga ko e tau vala he tau Tohiaga Tapu Heperu ka fakaaoga e Paulo he fakaako fakatagata haana he Tohi Tapu. Ka fifitaki e tautolu a Paulo he fakaako tumau e Kupu he Atua, to fakaaoga e Iehova e tau kupu Tohi Tapu ke fakatotoka aki a tautolu pete e tau kamatamata kua fehagai mo tautolu.

16. Ko e heigoa e fakaatukehe ne fakatupu ni e Tavita?

¹⁶ Ha ha ia Tavita e kakano ke tupetupe ha ko e loto manamanatu agahala. Taute e ia e mahani faivao mo Patesepa, fakatoka ke kelipopo e taane haana, ti fai magaaho ne lali ke fufū e mahani hepehepe nei. (2 Samu. 12:9) He mogo fakamua, fakaheu e Tavita e loto manamanatu haana. Ko e fua, nakai ni matematekelea fakaagaaga a ia ka e pihia foki ke he manamanatuaga mo e malolō tino haana. (Sala. 32:3, 4) Ko e heigoa ne lagomatai a Tavita ke fehagai mo e fakaatukehe ne fakatupu ni e ia, ti ko e heigoa ka lagomatai a tautolu ka taute e tautolu e hehē hagahaga kelea lahi?

17. Fakakite fēfē he fakatokihala mai he loto ha Tavita e tau kupu he Salamo 51:1-4?

¹⁷ Liogi ma e fakamagaloaga. Fakahiku, ne haga atu a Tavita ki a Iehova he liogi. He fakatokihala mai he loto, ne tala age e ia e tau agahala haana ki a Iehova. (Totou Salamo 51:1-4.) Fakahiku kua moua e ia e fakatotokaaga! (Sala. 32:1, 2, 4, 5) Ka taute e koe e agahala kelea muitui, ua lali ke fufū. Ka e tala age e agahala haau ki a Iehova he liogi. To kamata mogoia a koe ke logona hifo e fakatotokaaga mai he fakaatukehe ne tupu mai he loto manamanatu agahala. Ka manako a koe ke liu moua e fakafetuiaga haau mo Iehova, lata ke fai mena foki a koe ke taute he nakai ni liogi.

18. Tali atu fēfē a Tavita ke he akonaki?

¹⁸ Talia e akonaki. He fakafano atu e Iehova e perofeta ko Natano ke talahau e agahala ha Tavita, nakai ufiufi e Tavita a ia po ke lali ke fakatote hifo e kelea he agahala haana. Ne talahau agataha e ia kua agahala a ia ke he  taane ha Patesepa, ka e mua atu ki a Iehova. Talia e Tavita e akonaki mai ia Iehova ti fakamagalo e Iehova a ia. (2 Samu. 12:10-14) Ka taute e tautolu e agahala kelea lahi, lata a tautolu ke tutala ki a lautolu ne kotofa e Iehova ke leveki a tautolu. (Iako. 5:14, 15) Ti lata a tautolu ke kalo kehe he puipui e tautolu a tautolu. Ka talia agataha e tautolu mo e fakagahua e akonaki kua moua, to mafiti ai ke liu moua e mafola mo e fiafia ha tautolu.

19. Ko e heigoa kua lata a tautolu ke eketaha ke taute?

¹⁹ Kia eketaha ke ua liu fatiaki e tau hehē taha ia. Iloa he Patuiki ko Tavita ka kalo kehe a ia ke ua liu fatiaki e tau agahala taha ia, kua lata a ia ke moua e lagomatai ha Iehova. (Sala. 51:7, 10, 12) He mole e moua e Tavita e fakamagaloaga ha Iehova, ne eketaha a ia ke kalo kehe he tau manatu hehē. Ko e fua, liu a ia moua e mafola he loto haana.

20. Fakakite fēfē kua loto fakaaue a tautolu ke he fakamagaloaga ha Iehova?

²⁰ Fakakite e loto fakaaue ha tautolu ke he fakamagaloaga ha Iehova ka liogi a tautolu ke moua ai, talia e akonaki, mo e gahua fakamalolō ke kalo kehe he liu fatiaki e tau hehē ha tautolu. Ka taute e tautolu e tau lakaaga nei, to liu a tautolu ke moua e mafola he tau loto. Ko e matakainaga ko James ne taute e agahala kelea lahi mahaki ne logona hifo pihia. Pehē a ia: “He talahau e au e agahala haaku ke he tau motua, logona hifo e au kua malagaki e mamafa he tau tukeua haaku. Kamata au ke liu moua e mafola he manamanatuaga.” Mafanatia mooli ke iloa “kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia”!​—Sala. 34:18.

21. Fakaatā fēfē e tautolu a Iehova ke fakatotoka a tautolu?

²¹ He tata lahi mai e tau aho fakamui nei, ko e tupumaiaga he fakaatukehe kua liga holo ni ki mua. Ka tupetupe lahi e tau manatu haau, ua fakamule ke kumi e lagomatai ha Iehova. Kumikumi fakamakutu e Tohi Tapu. Fakaako mai he tau fakataiaga ne fakatoka e Hana, Paulo, mo Tavita. Ole ke he haau a Matua he lagi ke lagomatai a koe ke kitia e kakano ne fakaatukehe a koe. (Sala. 139:23) Kia fakaatā a ia ke hahamo e tau kavega haau, mua atu ke he tau kavega ne tote po ke nakai maeke a koe ke tautaofi. Ka pihia, to tuga e salamo a koe ne lologo ki a Iehova: “Ko e tau manamanatu loga he haku a loto kua fiafia ai au ha ko e [“fakamafana mo e fakatotoka,” NW] mai ia koe.”​—Sala. 94:19.