1. Duzu a bahola amaa adwenleadwenle adɔ yɛ nwo a, na kɛzi ɔbahola yeaha yɛ ɛ?

ADWENLEADWENLE * ɛdɔ ɛ nwo ɛlɛ ɔ? Bie a adwenleadwenle badɔ ɛ nwo saa awie mɔ ka edwɛkɛ anzɛɛ yɛ debie na ɔgyegye wɔ a. Anzɛɛ bie a adwenleadwenle badɔ ɛ nwo ɔlua edwɛkɛ bie mɔɔ ɛhanle anzɛɛ debie bie mɔɔ ɛyɛle la ati. Kɛ neazo la, bie a wɔyɛ nvonleɛ bie na ɔgyegye wɔ kɛ Gyihova ɛnrɛva ɛnrɛhyɛ wɔ ɛlɛ. Mɔɔ bahola azɛkye edwɛkɛ ne bɔbɔ la a le kɛ, bie a wɔ adwenle bayɛ wɔ kɛ, ɔluakɛ adwenleadwenle ne ɛyɛ kpole la ati, ɛnlɛ diedi​—yemɔti ɛnle sonla kpalɛ. Noko asoo ɛhye le nɔhalɛ?

2. Baebolo nu neazo boni mɔ a maa yɛnwu kɛ saa adwenleadwenle tɔ yɛ nwo a, ɔngile kɛ yɛnlɛ diedi ɛ?

² Suzu Baebolo nu neazo bie mɔ anwo. Hana mɔɔ rayɛle ngapezonli Samoɛle mame la ɛnee lɛ diedi kpole. Noko, adwenleadwenle dɔle ɔ nwo wɔ mekɛ mɔɔ awie mɔɔ wɔ ye abusua ne anu nee ye anli ye boɛ la. (1 Sa. 1:7) Ɛnee ɛzoanvolɛ Pɔɔlo lɛ diedi kpole, noko “asafo ne mɔ amuala anwo adwenleadwenle” dɔle ɔ nwo. (2 Kɔl. 11:28) Ɛnee Belemgbunli Devidi lɛ diedi kpole kpalɛ, ɔti ɛnee Gyihova kulo ye kpalɛ. (Gyi. 13:22) Noko, Devidi yɛle nvonleɛ bie mɔ na ɔmaanle adwenleadwenle dɔle ɔ nwo. (Edw. 38:4) Gyihova kyekyele biala arɛle na ɔmaanle bɛ ahonle dɔle bɛ azule nu.  Bɛmaa yɛzuzu mɔɔ yɛbahola yɛazukoa yɛavi bɛ neazo ne anu la anwo.

3. Kɛzi ɛdendɛlɛ ɛtane kola maa adwenleadwenle tɔ awie anwo ɛ?

³ Saa awie mɔ ka mgbole kile yɛ anzɛɛ bɛ nee yɛ anli ye boɛ a, bie a ɔbagyegye yɛ. Titili, saa ahenle mɔɔ ɛlɛgyegye yɛ la le yɛ gɔnwo kpalɛ anzɛɛ yɛ busuanli a. Bie a ɔbagyegye yɛ kɛ yɛ nee ahenle avinli bazɛkye. Bie a ahenle mɔɔ ɛlɛgyegye yɛ la badendɛ mgbane mgbane, ɔba ye zɔ a ɔmaa yɛte nganeɛ kɛ asɛɛ bɛva dadeɛ bɛwɔ yɛ la. (Mrɛ. 12:18) Bie a awie anye fuu badendɛ ɛtane ahile yɛ. Ɛhye bie dole adiema bɛlɛra bie. Ɔka kɛ: “Mekɛ bie mɔɔ ɛpɛ nu la, awie mɔɔ ɛnee mesuzu kɛ ɔle me gɔnwo kpalɛ la bɔle ɔ bo kɛ ɔka me nwo edwɛkɛ ɛtane wɔ yintanɛte ne azo. Ɔgyegyele me yɛɛ adwenleadwenle dɔle me nwo. Ɛnee mende ɔ bo kɛ ɔlɛmaa meali nyane zɔhane la.” Saa ɛ gɔnwo kpalɛ bie anzɛɛ wɔ busuanli ɛgyegye wɔ ɛlɛ a, ɛbahola wɔazukoa Hana.

4. Ngyegyelɛ boni mɔ a ɛnee ɔwɔ kɛ Hana gyinla ɔ nloa a?

⁴ Ɛnee ɔwɔ kɛ Hana gyinla ngyegyelɛ ɛsesebɛ bie mɔ anloa. Ɛvolɛ dɔɔnwo pɛle nu mɔɔ ɛnee ɔnwo a. (1 Sa. 1:2) Wɔ tete Yizilayɛ, ɛnee bɛbu raalɛ mɔɔ le mota la kɛ bɛwa ye amonle. Ɛhye maanle ɔlile nyane. (Gyn. 30:1, 2) Mɔɔ maanle Hana edwɛkɛ ne zɛkyele la a le kɛ, ɛnee ɔ hu gya raalɛ gyɛne mɔɔ bɛfɛlɛ ye Pɛnena, na yemɔ ɔwole mralɛ. Ɛnee Pɛnena anye bolo Hana, ɔti ɛnee ‘ɔkɔ zo ɔka ye ahyi kɛ ɔmaa yeava ɛya.’ (1 Sa. 1:6) Mɔlebɛbo ne, Hana anli tɛnlabelɛ ne anwo gyima kpalɛ. Edwɛkɛ ne gyegyele ye kpalɛ, yemɔti ɛnee “ɔmaa ɔsu too mɔɔ ɔnli debie a.” Ɛnee ɔlɛdi “nyane kpalɛ” wɔ ye ahonle nu. (1 Sa. 1:7, 10) Kɛ ɔyɛle mɔɔ Hana nyianle arɛlekyekyelɛ ɛ?

5. Kɛzi asɔneyɛlɛ boale Hana ɛ?

⁵ Hana vile ye ahonle nu lale ye nganeɛdelɛ ali hilele Gyihova wɔ asɔneyɛlɛ nu. Mɔɔ ɔyɛle asɔne ɔwiele la, ɔhilehilele ye tɛnlabelɛ ne anu ɔhilele Ɛsɔfo Kpanyinli Yilae. Yilae zele ye kɛ: “Kɔ anzodwolɛ nu, na Yizilayɛ Nyamenle ne ɛbua wɔ nzɛlɛlɛ ne.” Boni a vile nu rale a? “[Hana] hɔle na ɔhɔlile debie, na ɔ nyunlu anyɛ alɔbɔlɛ bieko.” (1 Sa. 1:17, 18) Asɔneyɛlɛ boale Hana maanle ɔnyianle anzodwolɛ bieko.

6. Duzu a yɛsukoa yɛfi Hana ɛkɛ yɛɛ Felepaema 4:6, 7 anu wɔ asɔneyɛlɛ nwo a?

 ⁶ Saa yɛyɛ asɔne dahuu a, yɛbahola yɛanyia anzodwolɛ bieko. Hana vale mekɛ tendenle ɔ nee ye anwuma Selɛ ne dendɛle. (1 Sa. 1:12) Yemɔti yɛdayɛ noko yɛbahola yɛava mekɛ tendenle yɛaha mɔɔ gyegye yɛ, mɔɔ maa yɛsulo nee yɛ sinlidɔlɛ nwo edwɛkɛ yɛahile Gyihova. Ɔngyia kɛ yɛka debie biala kɛnlɛma anzɛɛ pɛpɛɛpɛ. Bie bɔbɔ a yɛbaha edwɛkɛ mɔɔ ɛnle kpalɛ anzɛɛ yɛazu wɔ yɛ asɔneyɛlɛ nu. Noko, ɔnrɛyɛ Gyihova ɛvɛlɛ kɛ ɔbadie yɛ. Saa ɛye yɛ ngyegyelɛ mɔɔ yɛbayɛ nwolɛ asɔne la ɛsie ahane a, ɔwɔ kɛ yɛkakye folɛdulɛ mɔɔ wɔ Felepaema 4:6, 7 la. (Kenga.) Pɔɔlo hanle kɛ yɛyɛ moyɛlɛ asɔne. Yɛlɛ ndelebɛbo dɔɔnwo mɔɔ ɔti ɔwɔ kɛ yɛyɛ Gyihova mo a. Kɛ neazo la, yɛbahola yɛayɛ ye mo wɔ ngoane ahyɛlɛdeɛ ne, ye abɔdeɛ, ye ɛlɔlɛ kpundii ne yɛɛ anyelazo kɛnlɛma mɔɔ yemaa yɛnyia la anwo. Duzu bieko a yɛbahola yɛazukoa yɛavi Hana ɛkɛ a?

7. Duzu a Hana nee ɔ hu yɛle ye dahuu a?

⁷ Ɔnva nwo ngyegyelɛ mɔɔ ɛnee Hana ɛlɛyia la, ɔ nee ɔ hu hɔle ɛleka mɔɔ bɛsonle Gyihova la wɔ Hyaelo. (1 Sa. 1:1-5) Mɔɔ Hana wɔ ndanlɛsua ne anu la yɛɛ Ɛsɔfo Kpanyinli Yilae kyekyele ɔ rɛle na ɔhanle kɛ Gyihova babua ye asɔneyɛlɛ ne a.​—1 Sa. 1:9, 17.

8. Kɛzi debiezukoalɛ ɛhɔlɛ kola boa yɛ ɛ? Kilehile nu.

⁸ Yɛbahola yɛanyia anzodwolɛ bieko saa yɛkɔ debiezukoalɛ dahuu a. Saa yɛbɔ yɛ ayia ne mɔ abo a, yɛta yɛyɛ asɔne kɛ Nyamenle ɛva ye sunsum ne ɛboa yɛ. Anzodwolɛ boka sunsum ma ne anwo. (Gal. 5:22) Saa bɔbɔ yɛlɛyia ngyegyelɛ na yɛkɔ yɛ ayia ne mɔ a, yɛmaa Gyihova nee yɛ mediema nyia nwolɛ adenle maa yɛ anwosesebɛ na bɛboa yɛ bɛmaa yɛnyia anzodwolɛ. Asɔneyɛlɛ nee debiezukoalɛ ɛhɔlɛ le ndenle titili mɔɔ Gyihova dua zo ka yɛ ahonle to yɛ azule nu a. (Hib. 10:24, 25) Suzu debie bieko mɔɔ yɛbahola yɛazukoa yɛavi Hana edwɛkɛ ne anu la anwo.

9. Duzu a yeangakyi wɔ Hana tɛnlabelɛ ne anu a, na duzu a zile a?

⁹ Debie mɔɔ maanle adwenleadwenle dɔle Hana anwo la anvi ɛkɛ ndɛndɛ ne ala. Ɛnee saa Hana kɔsonle wɔ ndanlɛsua ne anu ba a, ɔwɔ kɛ ɔ nee Pɛnena tɛnla awuke ko anu. Yɛɛ Baebolo ne ɛnga kɛ Pɛnena hakyile ye subane. Yemɔti ɛnee ɔwɔ kɛ Hana kɔ zo gyinla ɔ hola ɛdendɛlɛ ɛtane ne anloa. Noko Hana holale nyianle anzodwolɛ bieko na ɔmaanle ɔdɛnlanle ɛkɛ dahuu. Kakye kɛ, mɔɔ Hana vale edwɛkɛ ne wulale Gyihova asa la, yeanli nyane bieko. Ɔmaanle Gyihova adenle ɔmaanle ɔkyekyele ɔ rɛle na ɔhanle ye ahonle ɔdole ye azule nu. Yeangyɛ biala, bɛyilale Hana bɛmaanle ɔdaye noko ɔwole ɔ mra.​—1 Sa. 1:19, 20; 2:21.

10. Duzu a yɛsukoa yɛfi Hana edwɛkɛ ne anu a?

¹⁰ Yɛbahola yɛanyia anzodwolɛ bieko saa bɔbɔ mɔɔ fa adwenleadwenle ne ba la tɛbɔ ɛkɛ a. Ɔnva nwo kɛ bie a yɛbayɛ asɔne ɛsesebɛ na yɛahɔ debiezukoalɛ dahuu la, yɛ ngyegyelɛ bie mɔ ɛnrɛvi ɛkɛ. Noko Hana edwɛkɛ ne maa yɛnwu kɛ debie biala ɛnrɛhola ɛnrɛzi Gyihova adenle kɛ ɔbaha yɛ ahonle yeado yɛ azule nu. Gyihova arɛle ɛnrɛvi yɛ ɛlɛ, na ɔbamaa yɛanyia yɛ nɔhalɛlilɛ ne anwo ahatualɛ wɔ ye mekɛ kpalɛ nu.​—Hib. 11:6.

11. Duzu ati a adwenleadwenle dɔle Pɔɔlo anwo a?

¹¹ Ninyɛne mɔɔ maanle adwenleadwenle dɔle Pɔɔlo anwo la zonle. Kɛ neazo la, kɛmɔ  ɔkulo ɔ mediema la ati, ɛnee ɔdwenle ngyegyelɛ mɔɔ bɛlɛyia la anwo. (2 Kɔl. 2:4; 11:28) Mɔɔ Pɔɔlo yɛ ye gyima kɛ ɛzoanvolɛ la, dwazotiama bole ye na bɛdole ye efiade. Ɛnee eza ɔwɔ kɛ ɔgyinla ngyegyelɛ mɔɔ fa adwenleadwenle ba la anloa, bie a le “ehyia.” (Fel. 4:12) Yeanyɛ boɛ fee la, meli mɔɔ ɔvale ɔdule adenle la butule fane nsa mɔɔ anrɛɛ ye ngoane fi ɔ sa a, yemɔti ɛnee saa ɔbava meli yeadu adenle a adwenleadwenle tɔ ɔ nwo. (2 Kɔl. 11:23-27) Duzu a boale Pɔɔlo wɔ mekɛ mɔɔ adwenleadwenle dɔle ɔ nwo la ɛ?

12. Duzu a boale Pɔɔlo maanle ye adwenleadwenle zo dele a?

¹² Ngyegyelɛ mɔɔ mediema ne mɔ yiale la maanle adwenleadwenle dɔle Pɔɔlo anwo, noko yeambɔ mɔdenle kɛ ɔ ngome ɔbali nwolɛ gyima. Ɛnee ɔbɛlɛ ɔ nwo aze. Yemɔti ɔyɛle ngyehyɛleɛ ɔmaanle mediema bie mɔ boale ye ɔmaanle bɛlile ninyɛne nwo gyima wɔ asafo ne anu. Kɛ neazo la, ɔmaanle mediema mɔɔ bɛlɛ bɛ nu anwodozo le kɛ Timote nee Taetɛse tumi kɛ bɛyɛ gyima bie mɔ. Mediema ɛhye mɔ boale maanle ye adwenleadwenle zo dele.​—Fel. 2:19, 20; Tae. 1:1, 4, 5.

13. Kɛzi asafo nu mgbanyima bahola azukoa Pɔɔlo ɛ?

¹³ Maa awie mɔ ɛboa wɔ. Le kɛ Pɔɔlo la, asafo nu mgbanyima dɔɔnwo mɔɔ bɛle atiakunlukɛnlɛma la dwenle asafo ne anu amra mɔɔ bɛlɛyia ngyegyelɛ la anwo. Noko asafo nu kpanyinli ko ɛnrɛhola ɛnrɛboa awie biala mɔɔ wɔ asafo ne anu la. Mɛlɛbɛnwoaze bamaa yeava gyima ne bie yeamaa mediema mrenyia mɔɔ fɛta la na yɛatete mediema mgbavolɛ amaa bɛaboa bɛamaa bɛanlea Nyamenle mboane ne.​—2 Tim. 2:2.

14. Duzu a Pɔɔlo andwenle nwo a, na duzu a yɛbahola yɛazukoa yɛavi ye neazo ne anu a?

¹⁴ Nwu ye kɛ ɛhyia arɛlekyekyelɛ. Ɛnee Pɔɔlo bɛlɛ ɔ nwo aze, ɔti ɔmaanle ɔ gɔnwo mɔ kyekyele ɔ rɛle. Ɔda ali kɛ, yeande nganeɛ kɛ awie mɔ babu ye kɛ ɔ nwo ɛnyɛ se, ɔluakɛ yemaa ɔ gɔnwo mɔ ɛmaa ye anwosesebɛ la ati. Mɔɔ Pɔɔlo kɛlɛ Faelimɔn la, ɔhanle kɛ: “Mendele wɔ ɛlɔlɛ ne anwo edwɛkɛ la, menlile fɛlɛko kpole na me rɛle kyekyele.” (Fae. 7) Pɔɔlo bɔle ɔ gɔnwo mɔ gyimayɛvoma gyɛne mɔɔ bɛkyekyele ɔ rɛle kpalɛ wɔ ngyegyelɛ mekɛ nu la aluma. (Kɔl. 4:7-11) Saa yɛfi mɛlɛbɛnwoaze nu yɛdie yɛto nu kɛ yɛhyia arɛlekyekyelɛ a, yɛ mediema mrenyia nee mraalɛ  bavi bɛ ɛhulolɛ nu aboa yɛ wɔ mekɛ mɔɔ yɛhyia moalɛ la.

15. Mɔɔ Pɔɔlo hɔle tɛnlabelɛ mɔɔ anu yɛ se anu la, nienwu a ɔnyianle arɛlekyekyelɛ ɔvile a?

¹⁵ Fa ɛ nwo to Nyamenle Edwɛkɛ ne azo. Ɛnee Pɔɔlo ze kɛ Ngɛlɛlera ne bakyekye ɔ rɛle. (Wlo. 15:4) Ɔbamaa yeanyia nrɛlɛbɛ yeagyinla sɔnea nloa. (2 Tim. 3:15, 16) Mɔɔ bɛdole Pɔɔlo efiade mɔɔ tɔ zo nwiɔ wɔ Wulomu la, Pɔɔlo dele nganeɛ kɛ ye ewule mekɛ ɛbikye. Wɔ mekɛ ɛsesebɛ zɔhane anu, duzu a Pɔɔlo yɛle a? Ɔzele Timote kɛ ɔrɛla ɔ nwo ɛkɛ ne ndɛndɛ na anrɛɛ ɔva “nwomamobɔleɛ ne” ɔrɛla. (2 Tim. 4:6, 7, 9, 13) Kɛmɔti ɛ? Ɔbayɛ kɛ Hibulu Ngɛlɛlera ne foa mɔɔ Pɔɔlo bahola ava ayɛ ɔ ti anwo Baebolo ɛzukoalɛ la wɔ nwomamobɔleɛ zɔhane mɔ anu. Saa yɛsukoa Pɔɔlo ɔlua Nyamenle Edwɛkɛ ne mɔɔ yɛbazukoa ye dahuu la azo a, Gyihova balua Ngɛlɛlera ne azo aha yɛ ahonle ado yɛ azule nu, ɔnva nwo sɔnea biala mɔɔ yɛbayia la.

16. Duzu ngyegyelɛ a Devidi vale rale ɔ nwo zo a?

¹⁶ Devidi adwenle gyegyele ye. Ɔ nee Batehyɛba zɛkyele agyalɛ, ɔyɛle ngyehyɛleɛ ɔmaanle bɛhunle ɔ hu na akee ɔbɔle mɔdenle kɛ ɔkeda ye ɛtane ne azo. (2 Sa. 12:9) Alimoa ne, Devidi andie ye adwenle ne. Ɛhye hanle ye wɔ sunsum nu, adwenle nu yɛɛ nwonane nu. (Edw. 32:3, 4) Duzu a boale Devidi maanle ɔgyinlanle ngyegyelɛ mɔɔ ɔvale ɔrale ɔ nwo zo la anloa a, na saa yɛyɛ ɛtane kpole bie a, duzu a bahola aboa yɛ a?

17. Kɛzi edwɛkɛ mɔɔ wɔ Edwɛne 51:1-4 la maa yɛnwu kɛ Devidi nlunle ɔ nwo wɔ ye ahonle nu ɛ?

¹⁷ Yɛ asɔne sɛlɛ ɛtanefakyɛ. Devidi hɔle Gyihova ɛkɛ wɔ asɔneyɛlɛ nu. Ɔnlunle ɔ nwo wɔ ye ahonle nu, na ɔhanle ye ɛtane. (Kenga Edwɛne 51:1-4.) Nea kɛzi ɛhye maanle ye ahonle dɔle ye azule nu a! (Edw. 32:1, 2, 4, 5) Saa ɛyɛ ɛtane kpole bie a, mmabɔ mɔdenle kɛ ɛkeda zo. Emomu, fi wɔ ahonle nu ka kile Gyihova wɔ asɔneyɛlɛ nu. Ɛhye bamaa wɔ adwenle mɔɔ ɛlɛbua wɔ fɔlɛ la abɔ ɔ bo kɛ ɔka aze. Noko saa ɛkulo kɛ ɛ nee Gyihova nyia agɔnwolɛvalɛ bieko a, ɛka ɛkile ye wɔ asɔneyɛlɛ nu a ɛnee ɛtɛwiele.

18. Kɛzi Devidi yɛle ye nyɛleɛ wɔ ndeanlɛ nwo ɛ?

¹⁸ Die ndeanlɛ to nu. Mɔɔ Gyihova zoanle ngapezonli Neetan maanle ɔlale Devidi ɛtane ne ali la, Devidi ambɔ mɔdenle kɛ ɔyeye ɔ  nloa anzɛɛ ɔbu ye kɛ ɔnyɛ ɛhwee. Ndɛndɛ ne ala ɔliele ɔdole nu kɛ yeyɛ ɛtane yetia Batehyɛba ahu ne, titili Gyihova. Devidi liele Gyihova ndeanlɛ dole nu, na Gyihova vale hyɛle ye. (2 Sa. 12:10-14) Saa yɛyɛ ɛtane kpole bie a, ɔwɔ kɛ yɛka yɛkile bɛdabɛ mɔɔ Gyihova ɛkpa bɛ kɛ bɛnlea yɛ nwo zo la. (Gye. 5:14, 15) Yɛɛ ɔnle kɛ yɛbɔ mɔdenle kɛ yɛbua yɛ nwo benle. Saa yɛdie ndeanlɛ biala mɔɔ bɛbava bɛamaa yɛ la yɛto nu na yɛfa yɛyɛ gyima a, ɔnrɛhyɛ yɛbanyia anzodwolɛ nee anyelielɛ bieko.

19. Duzu a ɔwɔ kɛ yɛbɔ kpɔkɛ kɛ yɛbayɛ a?

¹⁹ Bɔ kpɔkɛ kɛ ɛnrɛzia ɛnrɛyɛ ɛtane ko ne ala bieko. Ɛnee Belemgbunli Devidi ze kɛ amaa yeanzia yeanyɛ ɛtane ko ne ala bieko la, kyesɛ Gyihova boa ye. (Edw. 51:7, 10, 12) Mɔɔ Gyihova vale ye ɛtane hyɛle ye la anzi, Devidi bɔle kpɔkɛ kɛ ɔbakpo adwenle ɛtane. Ɛhye maanle ɔnyianle anzodwolɛ bieko.

20. Kɛ ɔkɛyɛ na yɛahile kɛ yɛkpondɛ kɛ Gyihova fa yɛ ɛtane kyɛ yɛ ɛ?

²⁰ Saa yɛkulo kɛ Gyihova fa yɛ ɛtane kyɛ yɛ a, ɔwɔ kɛ yɛsɛlɛ ɛtanefakyɛ, yɛdie ndeanlɛ yɛto nu na yɛbɔ mɔdenle kɛ yɛnrɛyɛ ɛtane ko ne ala bieko. Saa yɛyɛ ɛhye mɔ a yɛbanyia anzodwolɛ bieko. Adiema nrenyia bie mɔɔ bɛfɛlɛ ye James mɔɔ ɔyɛle ɛtane kpole bie la nwule kɛ ɛhye le nɔhalɛ. Ɔka kɛ: “Mɔɔ menganle me ɛtane ne mengilele mgbanyima ne mɔ la, mendele nganeɛ kɛ bɛzokoɛ me adesoa ɛnlomboɛ bie la. Akee menyianle anzodwolɛ bieko.” Yɛze kɛ “Gyihova bikye bɛdabɛ mɔɔ bɛ ahonle ɛbubu la; na ɔdie bɛdabɛ mɔɔ bɛ sa nu ɛdo la.” Ɛhye kyekye yɛ rɛle kpole!​—Edw. 34:18.

21. Kɛ ɔkɛyɛ na yɛamaa Gyihova aha yɛ ahonle ado yɛ azule nu ɛ?

²¹ Mekɛ mɔɔ awieleɛ mekɛ ɛhye ɛlɛba ye awieleɛ la, ninyɛne mɔɔ maa adwenleadwenle tɔ yɛ nwo la bazo. Saa adwenleadwenle tɔ ɛ nwo a, kpondɛ Gyihova ɛkɛ ne moalɛ ndɛndɛ. Sukoa Baebolo ne kpalɛ. Sukoa Hana, Pɔɔlo nee Devidi neazo ne. Sɛlɛ wɔ anwuma Selɛ ne kɛ ɔboa wɔ ɔmaa ɛnwu debie mɔɔ maa adwenleadwenle tɔ ɛ nwo la. (Edw. 139:23) Maa ɔzoa wɔ adesoa ne mɔ, titili nuhua ne mɔɔ ɛngola nwolɛ ɛhwee yɛ la. Saa ɛyɛ ɛhye a, ɛbayɛ kɛ edwɛndolɛnli ne mɔɔ yele Gyihova ayɛlɛ la, ɔhanle kɛ: “Mɔɔ adwenleadwenle bole me nwo zo la, ɛkyekyele me rɛle na ɛmaanle me ahonle dɔle me azule nu.”​—Edw. 94:19.