1. Anto ray nayarin sengegan na kapagaan, tan antoy epekto na satan ed sikatayo?

KASIN no maminsan et wala ray kapagaan * mo? Ompan mapagpaga ka lapud asakitan ka ed imbaga o ginawa na arum. Odino wala ray imbagam o ginawam ya pampapagaan mo. Singa bilang, ompan walay agawaan mon lingo tan iisipen mon agka lan balot naperdona nen Jehova. Aliwan satan labat, nayarin isipen mo ni ingen ya lapud mapagpaga ka et makapuy so pananisiam tan mauges kan too. Balet duga kasi itan?

2. Anto ran alimbawa ed Biblia so mangipapanengneng ya agto labay ya ibagan makapuy so pananisia tayo no mapaga tayo?

² Konsideraen tayo so pigaran alimbawa ed Biblia. Si Hana ya nagmaliw ya ina nen propeta Samuel et mabiskeg so pananisia to. Balet kinmapuy a maong so liknaan to lapud aliwliwan impantrato ed sikato nen Penina. (1 Sam. 1:7) Mabiskeg met so pananisia nen apostol Pablo balet agaylay “panagpaga [to] ed amin a kongregasyon.” (2 Cor. 11:28) Si Arin David et talagan mabiskeg so pananisia to kanian sikatoy inar-aro nen Jehova. (Gawa 13:22) Balet sikatoy agonigon a maong lapud saray agawaan ton lingo. (Sal. 38:4) Niligliwa tan pinakalma  nen Jehova irayan lingkor to. Pantongtongan tayo natan no antoy naaralan tayod alimbawa ra.

3. Akin et nayarin onkapuy so liknaan tayo ed imbaga na arum?

³ Nayarin ompaga itayo no walay imbaga o ginawa na arum ya asakitan itayo. Tan mas ansakit no say nanggawa ed satan et maapit ya kaaro odino kanayon tayo. Ompan isipen tayo ya aglan balot nipawil so maong a relasyon tayod sikato. Nayarin sikatoy angibaga na saray salitan agla ninonot tan say pakalikna tayo et singa to tayo sinaksak na espada! (Pro. 12:18) No maminsan ni ingen et gagalaen na arum so mangibalikas na saray salitan pakasakitan tayo. Ontan so agawa ed sakey ya kabataan a sister. “Pigaran taon lay apalabas,” so kuan to, “walay ipapasen kon kaaro ya angikayat na tsismis nipaakar ed siak diad social media. Asakisakitan ak tan aburido ak ya maong. Agak makapanisia ya traidoren to ak.” No asalim lay sinakitan na kaarom odino kanayon mo, dakel so naaralan mod si Hana.

4. Anto ray problema nen Hana?

⁴ Amayamay so problema nen Hana. Abaybayag ya anggapoy anak to. (1 Sam. 1:2) Diad Israel nensaman, iisipen da ya no ag-onanak so sakey a bii, sikatoy agbebendisyonan na Dios. Kanian nababaingan a maong si Hana. (Gen. 30:1, 2) Tan say mas ansakit, wala ni sakey ya asawa nen Elkana ya si Penina tan dakel so anak da. Sakey ni, panseselosan nen Penina si Hana kanian ‘agto tutundaan ya sutilen pian pasyodoten.’ (1 Sam. 1:6) Aburido si Hana ed situasyon to. “Sikatoy onakis tan agmangan” lapud “agaylay ermen to.” (1 Sam. 1:7, 10) Panon ya aligliwa si Hana?

5. Panon ya akatulong ed si Hana so impanpikasi to?

⁵ Nampikasi si Hana, tan imbalikas tod si Jehova so amin ya nalilikna to. Kayari ton nampikasi, imbaga tod Atagey ya Saserdoten si Eli so nipaakar ed situasyon to. Imbaga nen Eli ed si Hana: “La ka, niwala komon ed sikay kareenan, tan iter komon na Dios na Israel so kinerew mod sikato.” Antoy resulta? “Linma la [si Hana] tan sikatoy angan la, tan agla maermen.” (1 Sam. 1:17, 18) Akatulong so pikakasi pian ondeen so nonot to.

6. Anto ray naaralan tayo ed si Hana tan ed Filipos 4:6, 7 nipaakar ed pikakasi?

 ⁶ Ondeen so nonot tayo no seetan tayoy manpikasi. Andukerukey so impanpikasi nen Hana ed si Aman Jehova. (1 Sam. 1:17, 18) Maabig no dukeyan tayo met so pikakasi tayo. Ibaga tayod si Jehova so amin ya kapagaan, pakatatakotan, tan saray kakapuyan tayo. Agmet kaukolan ya masyadon inas-asikaso odino marakdakep so pikakasi tayo. Ompan makaakis tayo ni ingen legan tayon ibabaga ed si Jehova so pakakaaburidoan tayo. Makaseguro itayo ya sikatoy akaparaan ya ondengel. Balet aliwan saray problema labat so ipikasi tayo. Nepeg tayon tandaan imay nabasa ed Filipos 4:6, 7. (Basaen.) Espisipikon binitla nen Pablo ya nepeg tayon pisalamatan si Jehova diad saray pikakasi tayo. Dakel so nepeg tayon pisalamatan ed si Jehova. Singa bilang, sarag tayon pisalamatan so regalo ton bilay, saray marakdakep ya pinalsa to, say matoor a panangaro to, tan say balibalin ilalo ya inter to ed sikatayo. Anto ni naaralan tayo ed si Hana?

7. Antoy regular ya gagawaen nen Hana tan say asawa to?

⁷ Anggano amayamay so problema nen Hana, agtinmunda ya mila ed si asawa to diad tabernakulo ed Silo pian mandayew ed si Jehova. (1 Sam. 1:1-5) Ditan akatongtong nen Hana so Atagey ya Saserdoten si Eli tan binmiskeg so liknaan to ed samay imbaga nen Eli ya iter komon nen Jehova so kerew to.​—1 Sam. 1:9, 17.

8. Antoy nitulong ed sikatayo na saray aral? Ipaliwawa.

⁸ Ondeen so nonot tayo no itultuloy tayoy onatendi ed aral. Kaslakan ya diad panlukas a pikakasi ed aral et kekerewen so tulong na masanton espiritu na Dios. Say kareenan et kabiangan na bunga na masanton espiritu. (Gal. 5:22) No miaral itayo anggano amayamay so problema tayo, iikdan tayo na pankanawnawa si Jehova tan saray agagi ya pabiskegen itayo pian ondeen so nonot tan puso tayo. Say pikakasi tan saray aral so manunan uusaren nen Jehova pian pakalmaen itayo. (Heb. 10:24, 25) Amtaen tayo so sakey nin naaralan tayo ed eksperiensya nen Hana.

9. Antoy ag-anguman ed situasyon nen Hana, balet antoy akatulong ed sikato?

⁹ Agtampol ya naandi iray problema nen Hana. Kasempet nen Hana manlapud impandayew tod tabernakulo, kaiba to nin siansia ed sakey ya abung si Penina. Tan anggapoy ibabaga na Biblia ya anguman so ugali nen Penina. Kanian posiblin tuloytuloy ya inanosan nen Hana so paniinsulto to. Balet mareen la so nonot nen Hana. Agla mapagpaga lapud impalima to lad si Jehova so problema to. Inabuloyan to ya sikatoy ligliwaen tan pakalmaen nen Jehova. Kalabas na panaon, si Hana et abendisyonan na pigaran ananak!​—1 Sam. 1:19, 20; 2:21.

10. Antoy naaralan tayo ed alimbawa nen Hana?

¹⁰ Ondeen so nonot tayo anggano wadtan ni so problema. Anggano impasya so pampipikasi tayo tan regular tayon onaatendi ed saray aral, wala ray problema ya talagan agnaekal. Balet naaralan tayo ed alimbawa nen Hana ya anggapoy makaamper ed si Jehova diad itulong to ed sikatayo pian onkalma so puso tayo. Ag-itayon balot paulyanan nen Jehova, tan segurado ya bendisyonan to itayo no agtayo onsuko.​—Heb. 11:6.

11. Anto ray nampagaan nen Pablo?

¹¹ Dakel so nampagaan nen Pablo. Singa bilang, lapud inar-aro to ray agagi, sankanonot  to iray problema da. (2 Cor. 2:4; 11:28) Diad panusumpal tod asainmin to bilang apostol, sikatoy aminpigan nilewet tan impriso na saray onsusumpa. Inanosan to met iray mairap ya kipapasen. Asali to ni ingen ya ngalngali anggapoy naakan to. (Fil. 4:12) Amitlo met ya asali ton agaygay so barko ya niluganan to, kanian nayarin natatakot la kada no manbiahe ed dayat. (2 Cor. 11:23-27) Antoy akatulong ed si Pablo pian agmasyadon mapaga?

12. Antoy akatulong pian nabawasan so kapagaan nen Pablo?

¹² Mapaga si Pablo no wala ray problema na saray agagi, balet agto sinalin resolbien ya bukor iratan. Amta to ya walay limitasyon to. Nampatulong ed arum diad pangasikaso ed saray kongregasyon. Alimbawa, inmatalek toy dakel ya responsabilidad ed saray kualipikadon lalaki ya singa si Timoteo tan Tito. Seguradon baleg so nitulong da pian nabawasan so kapagaan nen Pablo.​—Fil. 2:19, 20; Tito 1:1, 4, 5.

13. Panon ya naalig na saray elder si Pablo?

¹³ Manpatulong ed arum. Singa si Pablo, dakel ya maaron elder natan so mapagpaga met no wala ray problema na saray kakongregasyon da. Balet agsarag na sakey ya elder ya tulongan so amin ya membro na kongregasyon. Kanian nepeg ton bidbiren ya kaukolan toy manpatulong ed arum ya kualipikadon lalaki tan mangipasal na saray mas ugaw ya brother diad pangasikaso ed pulok na Dios.​—2 Tim. 2:2.

14. Antoy agnampagaan nen Pablo, tan antoy naaralan tayo ed alimbawa to?

¹⁴ Bidbiren ya kaukolan moy panamabiskeg. Mapaabeba si Pablo, kanian binidbir to ya kaukolan to so panamaseseg na kakaaro to. Agto nampagaan ya ompan isipen na arum ya sikatoy makapuy lapud kaukolan toy panamabiskeg. Oniay imbaga nen Pablo ed sulat tod si Filemon: “Aliketan ak tan aligliwa ak a maong lapud arengelan koy panangarom.” (Filem. 7) Binitla met nen Pablo so pigaran kakimeyan to ya amaseseg ed sikato diad mairap iran situasyon. (Col. 4:7-11) No mapaabeba tayon bidbiren ya kaukolan tayoy panamaseseg, maliket iray agagi ya ontulong ed sikatayo.

15. Antoy ginawa nen Pablo nen aburidon maong?

¹⁵ Aralen so Salita na Dios. Amta nen Pablo  ya makaligliwa so Kasulatan. (Roma 15:4) Amta to met ya nabasa ditan so karunongan ya ontulong ed sikaton nasarag iray subok. (2 Tim. 3:15, 16) Nen nipriso si Pablo diad Roma ed komaduan pankanawnawa, pakalikna to et asingger lay ipatey to. Diad satan ya makapaaburidon situasyon, antoy ginawa nen Pablo? Kinerew tod si Timoteo ya onlad sikato ya tampol tan ‘awiten to iramay lukot.’ (2 Tim. 4:6, 7, 9, 13) Akin? Posible ya saraman a lukot et kabiangan na Hebreon Kasulatan ya nausar nen Pablo ed panaral to. No regular tayon aralen so Salita na Dios ya singa ginawa nen Pablo, usaren itan nen Jehova pian pakalmaen itayo ed anggan anton subok ya dadalanen tayo.

16. Antoy alikna nen David lapud ginawa to ya graben kasalanan?

¹⁶ Akonsiensian maong si David lapud graben kasalanan to. Sikatoy akikalugoran ed si Bat-sheba, nanggaway paraan pian ompatey so asawa nen Bat-sheba, tan sinali ton iyamot iratan a krimen. (2 Sam. 12:9) Diad unaan, imbaliwala nen David so konsiensia to. Lapud satan, aderal so relasyon tod si Jehova, anggapoy deen na nonot to, tan naapektoan met so bunigas to. (Sal. 32:3, 4) Antoy akatulong ed si David pian nasarag to so kapagaan ya resulta lanlamang na ginawa ton kasalanan? Tan antoy makatulong ed sikatayo no akagawa tayo met na seryoson kasalanan?

17. Panon ya nanengneng so impapuson panagbabawi nen David diad Salmo 51:1-4?

¹⁷ Kerewen so panamerdona nen Jehova. Nampikasi ya siansia si David. Impanengneng toy impapuson panagbabawi tan impatua to ray kasalanan to ed si Jehova. (Basaen so Salmo 51:1-4.) Lapud satan et sikatoy akainawa! (Sal. 32:1, 2, 4, 5) No akagawa kay seryoson kasalanan, agmo itan iyaamot. Imbes, ipatuam itan ed si Jehova diad pikakasi. Seguradon makainawa ka lapud agka la tanton nakokonsiensia. Balet no talagan labay mon nipawil so relasyon mod si Jehova, wala ni nepeg mon gawaen.

18. Antoy reaksion nen David ed disiplina?

¹⁸ Awaten so disiplina. Nen imbaki nen Jehova si propeta Natan pian katongtongen si  David ed saray kasalanan to, agla nankatunongan si David tan agto sinalin palemewen so kasalanan to. Inamin ton tampol ya sikatoy nankasalanan ed asawa nen Bat-sheba, tan nagkalalo la ed si Jehova. Inawat nen David so disiplina ya nanlapud si Jehova, kanian sikatoy pinerdona To. (2 Sam. 12:10-14) No akagawa tayoy seryoson kasalanan, nepeg itayon mitongtong ed saramay tinuro nen Jehova ya manpastol ed sikatayo. (Sant. 5:14, 15) Tan agtayo la ikakatunongan so ginawa tayon kasalanan. No awaten tan iyaplika tayon tampol so disiplina, ondeen ya tampol so nonot tayo tan nalikna tayo lamet so liket.

19. Antoy determinado tayon gawaen?

¹⁹ Gawaen so anggaay nayarian ya agla uliten so ginawam ya kasalanan. Amta nen Arin David ya kaukolan toy tulong nen Jehova pian agto la naulit so ginawa ton kasalanan. (Sal. 51:7, 10, 12) Nen sikatoy pinerdona nen Jehova, ginawa nen David so anggaay nayarian ton labanan iray mauges a pilalek. Bilang resulta, nagmaliw a mareen so nonot to.

20. Panon tayon nipanengneng ya aapresyaen tayo so panamerdona nen Jehova?

²⁰ Nipanengneng tayo ya aapresyaen tayo so panamerdona nen Jehova no kerewen tayo itan ed pikakasi, awaten tayo so disiplina, tan gawaen tayoy anggaay nayarian tayon agla uliten so kasalanan tayo. Diad ontan et magmaliw ya mareen so nonot tayo. Apaneknekan itan nen James, sakey ya brother ya akagawa na seryoson kasalanan. Imbaga to: “Nen impatuak ed saray elder so kasalanan ko, nakal so ambelat ya sasakbaten ko. Nagmaliw ya mareen so nonot ko.” Talagan makapabiskeg ya “si Jehova et asingger ed samay asugatay puso to; ililiktar to iramay nagogonigon so espiritu ra”!​—Sal. 34:18.

21. Panon tayon nipanengneng ya aabuloyan tayon pakalmaen itayo nen Jehova?

²¹ Legan ya manasingger so anggaan, seguradon ondakel so kapagaan tayo. No napapagaan ka, kerew mon tampol so tulong nen Jehova. Seetan mon aralen so Biblia. Alig moy alimbawa nen Hana, Pablo, tan David. Ipikasim ed si Aman Jehova ya tulongan to kan natalosan no akin ya mapagpaga ka. (Sal. 139:23) Ipaawit mod sikato iray problemam, lalo la iramay agmo kontrolado. No ontan so gawaen mo, naliknam imay inkansion na salmista ed si Jehova: “Sanen nadadaeg ak na saray kapagaan, niligliwa tan pinakalma mo ak.”​—Sal. 94:19.