1. Kiko por kousa ansiedat, i kon esei por afektá nos?

BO TA sinti ku ansiedat * ta tumando kontrol di bo bida? Kisas bo ta sinti bo angustiá debí na loke un hende a bisa òf hasi bo. Òf, bo ta tormentá bo mes pa algu ku bo a bisa òf hasi. Podisé bo a kometé un piká, i bo ta pensa ku Yehova hamas lo pordoná bo. Anto riba dje, kisas bo ta kere ku debí ku bo ta sinti asina, bo no tin fe i bo ta un mal hende, sí, un kaso pèrdí. Pero esei ta bèrdat?

2. Ki ehèmpel di Beibel ta mustra ku ansiedat no ta nifiká ku nos no tin fe?

² Laga nos wak algun ehèmpel di Beibel. Ana, kende a bira mama di profeta Samuel, tabatin hopi fe. Apesar di esei, el a sintié angustiá ora un hende den su famia a trat’é malu. (1 Sam. 1:7) Apòstel Pablo tambe tabatin un fe fuerte, pero el a sinti hopi “inkietut pa tur e kongregashonnan.” (2 Kor. 11:28) Rei David tabatin un fe asina fuerte ku Yehova a stim’é mashá. (Echo. 13:22) Apesar di esei, David a kometé un piká ku a kous’é hopi ansiedat. (Sal. 38:4) Yehova a konsolá i trankilisá kada un di nan. Laga nos wak kiko nos por siña for di nan ehèmpel.

3. Kon palabra di otro hende por kousa nos ansiedat?

³ Ora un hende, foral si ta un bon amigu òf un famia yegá, papia malu ku nos òf trata nos malu, esei por kousa nos ansiedat. Kisas nos ta preokupá ku nos amistat kuné lo kibra. Tin biaha, e hende ku ta hasi nos doló ta papia sin pensa i nos ta sinti manera el a hinka nos ku spada! (Pro. 12:18) Pero tin biaha, hende ta bisa kos ku e intenshon di hasi nos doló. Esei a pasa ku un ruman hóben. El a bisa: “Algun aña pasá, un hende ku mi a pensa ta mi bon amiga a kuminsá plama mentira tokante mi online. E kos ei a duel mi masha hopi mes i mi a sinti mi tur angustiá. Mi no por a komprondé dikon el a traishoná mi asina.” Si un bon amigu òf un famia yegá a hasi bo doló, bo por siña hopi for di Ana.

4. Ki situashon difísil Ana mester a trata kuné?

⁴ Ana mester a trata ku un situashon difísil. Pa hopi aña e no por a haña yu. (1 Sam. 1:2) Hopi israelita a pensa ku si un hende muhé no por haña yu, tabata pasobra e no tabatin bendishon di Dios. Ta di komprondé ku Ana tabata sintié humiá. (Gén. 30:1, 2) Anto pa kolmo, Ana su kasá tabatin un otro esposa, Penina, ku sí tabata por a haña yu. Penina a mira Ana komo un rival i “tabata provok’é sin miserikòrdia” pa lag’é sintié malu. (1 Sam. 1:6) Na promé instante, e situashon ei a hasi Ana hopi doló. E tabata asina tristu “ku e tabata yora i no tabata kome.” E situashon ei a kibr’é mashá. (1 Sam. 1:7, 10) Kon Ana a haña konsuelo?

5. Kon orashon a yuda Ana?

⁵ Ana a bisa Yehova tur loke e tabatin riba su kurason. Despues ku el a hasi orashon, el a splika su situashon na Sumo Saserdote Elí. El a bisa Ana: “Bai na pas; i ku e Dios di Israel duna bo bo petishon ku bo a hasi na dje.” Kiko tabata e resultado? Ana “a kohe su kaminda bai i a kome, i su kara no tabata tristu mas.” (1 Sam. 1:17, 18) Orashon a yuda Ana haña su trankilidat bèk.

6. Ki lès tokante orashon nos ta siña for di Ana i e konseho na Filipensenan 4:6 i 7?

⁶ Nos por haña nos trankilidat bèk si  nos perseverá den orashon. Ana a tuma su tempu pa papia ku su Tata den shelu. (1 Sam. 1:12) Nos tambe por tuma nos tempu pa papia ku Yehova tokante nos ansiedat, miedu i debilidat. Nos orashonnan no mester ta poétiko ni mester tin un struktura perfekto. Kisas nos por ta asina tristu ku lágrima ta basha for di nos wowo segun ku nos ta papia ku Yehova. Apesar di esei, Yehova nunka lo kansa di skucha nos. Pero, nos tin ku hasi algu mas ku djis hasi orashon tokante nos problemanan. Nos tin ku kòrda e konseho na Filipensenan 4:6 i 7. (Les’é.) Einan, Pablo a bisa spesífikamente ku nos mester hasi orashon di gradisimentu. Nos tin hopi motibu pa gradisí Yehova. Por ehèmpel, pa e regalo di bida, e kosnan ku el a krea, su amor leal ku e tin pa nos i e maravioso speransa ku el a duna nos. Kiko mas nos por siña for di Ana?

7. Kiko Ana ku su kasá semper tabata hasi?

⁷ Apesar di Ana su problemanan, semper e tabata bai ku su kasá na e kas di adorashon di Yehova na Silo. (1 Sam. 1:1-5) Tabata ei na e tabernakel ku Sumo Saserdote Elí a animá Ana bisand’e ku e ta spera ku Yehova ta kontestá su orashon.—1 Sam. 1:9, 17.

8. Kon nos reunionnan por yuda nos? Splika.

⁸ Nos por haña nos trankilidat bèk si nos sigui bai nos reunionnan. E orashon na komienso di nos reunionnan generalmente ta inkluí petishon pa e spiritu santu di Dios ta ku nos. Pas ta parti di e fruta di e spiritu ei. (Gal. 5:22) P’esei, ora nos problemanan ta laga nos sinti nos angustiá, nos mester sigui bai nos reunionnan. Asina nos ta duna Yehova i nos rumannan e oportunidat di animá nos i yuda nos bolbe haña pas. Orashon i reunion ta dos medio importante ku Yehova ta usa pa trankilisá nos. (Heb. 10:24, 25) Pero e relato di Ana ta siña nos un otro lès balioso.

9. Kiko no a kambia den Ana su situashon, pero kiko sí a kambia?

⁹ E kousa di Ana su ansiedat no a disparsé mesora. Ora el a regresá for di e tabernakel, ainda e tabata den e mesun kas ku Penina. Beibel no ta bisa ku Penina su aktitut a kambia. Pues, Ana probablemente mester a sigui soportá e palabranan doloroso di su rival. Pero, Ana a logra haña su pas bèk i a manten’é. Kòrda ku, despues ku el a laga e asuntu den man di Yehova, e no a sintié angustiá mas. El a konfia riba Yehova. Algun tempu despues, Yehova a kontestá Ana su orashon i Ana a haña yu.—1 Sam. 1:19, 20; 2:21.

10. Kiko nos por siña for di e ehèmpel di Ana?

¹⁰ Nos por haña nos trankilidat bèk asta si e kousa di nos ansiedat keda. Aunke nos ta hasi orashon intensamente i ta bai reunion regular, sierto di nos problemanan no ta disparsé mesora. Pero, e ehèmpel di Ana ta siña nos ku nada no por stroba Yehova di trankilisá nos kurason agitá. Yehova nunka lo lubidá nos. Si nos no entregá, tardi òf trempan lo e rekompensá nos.—Heb. 11:6.

11. Ki motibu Pablo tabatin pa sintié angustiá?

¹¹ Pablo tabatin hopi motibu pa sintié angustiá. Por ehèmpel, debí na e amor ku e tabatin pa e rumannan di kongregashon, nan problemanan tabata preokup’é.  (2 Kor. 2:4; 11:28) Den Pablo su asignashon komo apòstel, vários bes el a hañ’é ku opositor ku a batié i ser’é. Tambe el a pasa den otro difikultat ku a kous’é ansiedat, manera “biba ku tiki.” (Flp. 4:12) I si nos kòrda ku el a sufri noufragio por lo ménos tres biaha den su bida, nos por imaginá nos e angustia òf miedu ku el a sinti ora e tabata riba boto. (2 Kor. 11:23-27) Kiko a yud’é?

12. Kiko a yuda Pablo sintié mas trankil?

¹² Aunke Pablo tabata preokupá pa e problemanan di e rumannan, e no a purba di resolvé nan su so. E tabata modesto. P’esei, el a pidi otro ruman yud’é kuida e kongregashon. Por ehèmpel, el a duna hopi responsabilidat na hòmber di konfiansa, manera Timoteo i Tito. Sin duda, e trabou ku e rumannan ei a hasi a yuda ku Pablo a sintié mas trankil.—Flp. 2:19, 20; Tito 1:1, 4, 5.

13. Kon e ansianonan por imitá Pablo?

¹³ Pidi otro ruman yuda bo. Hopi ansiano ta den mesun situashon ku Pablo. Nan tin asina tantu amor pa nan rumannan ku nan ta sufri ora nan rumannan ta pasa den difikultat. Pero un ansiano no por resolvé tur problema su so. P’esei ta importante p’e ta modesto. E mester pidi yudansa di otro ruman kapasitá i entrená ruman hòmber hóben pa yud’é kuida e karnénan di Dios.—2 Tim. 2:2.

14. Kiko Pablo no a preokupá kuné, i kiko nos ta siña for di esei?

¹⁴ Rekonosé ku bo mester di konsuelo. Pablo tabata humilde, pues e tabata sa ku e tabatin mester di animashon di su amigunan. E no a preokupá ku otro hende lo a pensa ku e tabata débil debí ku su amigunan a konsol’é. Den su karta na Filemon, el a bisa: “Mi a sinti un gran goso i konsuelo ora mi a tende di bo amor.” (Flm. 7) Pablo a papia di vários kompañero ku a anim’é mashá durante tempu difísil. (Kol. 4:7-11) Si nos ta humilde i ta rekonosé ku nos mester di animashon, nos rumannan lo ta kontentu pa duna nos e yudansa ku nos mester.

15. Kon Pablo a haña yudansa durante un situashon angustioso?

¹⁵ Studia e Palabra di Dios. Pablo tabata sa ku e Skritura lo a konsol’é. (Rom. 15:4) Esei lo a dun’é tambe e sabiduria  pa trata ku kualke prueba. (2 Tim. 3:15, 16) Ora e tabata prezu na Roma pa di dos biaha, el a sinti ku su dianan pa muri tabata kontá. Kiko lo el a hasi den e situashon angustioso ei? El a pidi pa Timoteo bini lihé serka dje i trese “e ròlnan.” (2 Tim. 4:6, 7, 9, 13) Dikon? Pasobra e ròlnan ei probablemente tabata parti di e Skritura Hebreo ku e por a usa den su estudio personal. Si nos tambe studia Beibel regularmente, Yehova lo usa e palabranan ku tin den dje pa trankilisá nos, asta den situashon hopi difísil.

16. Ki ansiedat David a kousa su mes?

¹⁶ David su konsenshi tabatin rason di torment’é. El a kometé adulterio ku Bètsabé, el a plania asesinato di e esposo di Bètsabé i pa un tempu el a purba di skonde loke el a hasi. (2 Sam. 12:9) Na promé instante, el a ignorá su konsenshi. Pero esei a lag’é sufri, no solamente den sentido spiritual, pero tambe mental i físiko. (Sal. 32:3, 4) Kiko a yud’é trata ku e ansiedat ku el a kousa su mes? I kiko por yuda nos si nos a kometé un piká grave?

17. Kon e palabranan di Salmo 51:1-4 ta mustra ku David a arepentí di kurason?

¹⁷ Pidi Yehova pordoná bo. Por fin, David a resa na Yehova. Ku un kurason arepentí, el a konfesá su pikánan. (Lesa Salmo 51:1-4.) Imaginá kuantu alivio David a sinti despues di esei! (Sal. 32:1, 2, 4, 5) Si bo kometé un piká serio, no purba di skond’é. En bes di esei, habri bo kurason na Yehova i konfesá bo piká den orashon, sí, bis’é tur loke bo a hasi. E ora ei lo bo kuminsá sinti bo mas trankil i bo konsenshi lo no tormentá bo asina tantu mas. Pero si bo ke drecha bo amistat ku Yehova, bo mester hasi mas ku djis resa.

18. Kon David a reakshoná ora el a haña disiplina?

¹⁸ Aseptá disiplina. Yehova a manda profeta Natan pa saka e piká di David na kla. David no a purba di hustifiká su mes ni minimisá loke el a hasi. Mesora el a rekonosé ku el a peka no solamente kontra e esposo di Bètsabé pero, prinsipalmente, kontra Yehova. El a aseptá e disiplina di Yehova, i Yehova a pordon’é.  (2 Sam. 12:10-14) Si bo a kometé un piká serio, ta importante pa bo papia ku e ansianonan. Yehova a asigná nan pa pastoriá nos. (Sant. 5:14, 15) Ademas di esei, resistí e gana di hustifiká bo mes. Mas lihé bo aseptá e disiplina i hasi e kambionan nesesario, mas lihé lo bo haña bo pas i goso bèk.

19. Kiko nos mester ta determiná pa hasi?

¹⁹ Sea determiná pa no kometé e mesun eror. Rei David tabata sa ku, pa e no kometé e mesun piká, e tabatin mester di Yehova su yudansa. (Sal. 51:7, 10, 12) Despues ku Yehova a pordon’é, e tabata determiná pa evitá mal pensamentu. Esei a yud’é haña su pas bèk.

20. Kon nos por demostrá ku nos ta gradisidu ku Yehova a pordoná nos?

²⁰ Nos ta demostrá ku nos ta gradisidu ku Yehova a pordoná nos ora nos ta hasi orashon tokante esei, aseptá disiplina i traha duru pa evitá di ripití e mesun eror. Ora nos dal e pasonan ei, nos lo haña nos pas bèk. James, un ruman ku a kometé un piká grave, a eksperensiá esei. El a bisa: “Asina ku mi a konfesá mi piká na e ansianonan, mi a sinti manera un karga pisá a kita for di mi lomba. Mi a kuminsá haña mi pas bèk.” Ta masha animante pa sa ku Yehova “ta serka di e hende di kurason kibrá, i ta salba esnan di spiritu abatí.”—Sal. 34:18.

21. Kon nos por mustra ku nos ke pa Yehova trankilisá nos?

²¹ Segun ku fin di e último dianan ta aserká, mas kos lo presentá ku probablemente lo kousa nos ansiedat. P’esei, ora angustia òf miedu ataká bo, no tarda pa pidi Yehova yudansa. Sea un bon studiante di Beibel. Siña for di e ehèmpel di Ana, Pablo i David. Pidi Yehova yuda bo haña sa kiko ta kousa bo ansiedat. (Sal. 139:23) Tira bo karganan riba Yehova, foral ora bo tin tiki òf niun kontrol riba e situashon. Si bo hasi esei, lo bo sinti manera e salmista ku a kanta na Yehova: ‘Den e multitut di mi preokupashonnan, bo konsuelonan ta alegrá mi.’—Sal. 94:19.