1. Wuarom moak wie ons eenjemol Sorjen, un waut kaun daut aun ons doonen?

HAUTST du mol groote Sorjen? * Veleicht säd ooda deed doa wäa waut, waut die toosad. Ooda du hast daut wäajen waut schwoa, waut du jesajcht ooda jedonen hast. Woomäajlich hast du eenen Fäla jemoakt un beduascht, aus Jehova die daut jeemols vejäwen woat. Un noch schlemma es, daut du nu denkjst, daut du een schlajchta Mensch best un daut dien Gloowen schwak es, wäajen du die soo väl Sorjen moakst. Oba es daut soo?

2. Es eena schwak em Gloowen, wan eena sikj Sorjen moakt? Laj daut ut.

² Unjasto wie ons mol een poa Biespels ut de Schreft. Hana wia dän Profeet Samuel siene Mutta un haud eenen stoakjen Gloowen. See haud väl Sorjen, wäajen see von wäm ut äare Famielje schlajcht behaundelt wort (1. Sam. 1:7). De Apostel Paulus haud uk eenen stoakjen Gloowen, oba am sad “de Sorj om de Jemeenten” sea too (2. Kor. 11:28). Un dän Kjennich David räakjend Jehova sea väl, wäajen dän sien Gloowen soo stoakj wia (Apj. 13:22). Un doch muak David groote Fäla un wia doa sea truarich äwa (Psa. 38:4, NW). Jehova deed jieda eenen von dee treesten un berujen. Well wie mol seenen, waut wie von dee lieren kjennen.

3. Wuarom kaun ons daut toosaten, waut aundre sajen?

³ Daut kaun ons toosaten, wan aundre hunjsch met ons räden ooda nich leeftolich sent, besonda wan daut een gooda Frint ooda wäa von daut Frintschoft es. Veleicht bedua wie dan, aus deejanja ons noch waut räakjent. Eenje räden onväasechtich un ons späat sikj daut dan soo, aus wan dee ons metem Schwieet spekjen wudden (Spr. 12:18). Un aundre sajen mau rajcht met Fliet soont, waut ons weedeit. Eene junge Sesta beläwd daut mol. See sajcht: “Een poa Joa trigj vetald eene goode Frind äwa Internet Läajes von mie. Daut deed mie wee un sad mie sea too. Ekj kunn daut nich vestonen, wuarom see mie daut aundeed.” Wan die mol een gooda Frint ooda wäa von daut Frintschoft velazt haft, dan kaun Hana äa Biespel die sea halpen.

4. Waut fa groote Trubbels haud Hana?

⁴ Hana haud nich mau bloos eenen Trubbel. Joarenlank kunn see nich Kjinja haben (1. Sam. 1:2). Daut schämd sikj ar sea, wäajen väl Israeliten ieeschtemma dochten, daut soont eene Strof von Gott wia (1. Mo. 30:1-2). Een aundra Trubbel wia, daut Hana äa Maun noch met eene aundre Fru befriet wia un daut dee kunn Kjinja haben. Dee heet Peninna un deed “Hana sea veachten un beleidjen”, wiels see aufjenstich wia (1. Sam. 1:6). Aul daut sad Hana sea too. See haud daut soo schwoa, daut see “nich äten kunn un eefach hielen must” un “sea jeschloagen” wia (1. Sam. 1:7, 10). Woo funk see Troost?

5. Woo holp Hana daut Jebäd?

⁵ Hana schedd sikj to Jehova ut. Nodäm aus see jebät haud, säd see dän Huagen Priesta Eli daut, waut ar toosad. Un hee säd: “Go en Fräd. Mucht Israel äa Gott die daut jäwen om waut du jebät hast.” Waut passieed dan? Hana “jinkj trigj un eet, un wia nich mea soo truarich” (1. Sam. 1:17-18). Wiels see jebät haud, kunn see wada ennalich Fräd haben.

6. (a) Waut kjenn wie von Hana äwa daut bäden lieren? (b) Waut kjenn wie von Filippa 4:6-7 lieren?

⁶ Wie kjennen wada ennalich Fräd haben, wan wie aunhoolent bäden. Hana bäd lang to äaren himlischen Voda (1. Sam. 1:12, NW). Wie kjennen uk lang to Jehova bäden un dän krakjt sajen, waut ons Angst ooda Sorjen moakt ooda woone  Schwakheiten wie haben. Daut es nich needich, daut wie besondre ooda sea huage Wieed brucken, wan wie bäden. Un veleicht roa wie eenjemol soogoa, wan wie Jehova sajen, wua wie daut schwoa met haben. Oba Jehova woat daut kjeenmol enoolent, no onse Jebäda to horchen. Wan wie bäden, dan sell wie uk daut em Denkj hoolen, waut Filippa 4:6-7 sajcht (läs). Paulus rot ons too, daut wie uk bäden sellen, om Jehova to danken. Un daut jeft soo väl, wua wie kjennen fäa dankboa sennen: biejlikj fa daut Läwen, de wundascheene Hopninj, waut hee ons jejäft haft; un uk fa aul de Sachen, waut hee jemoakt haft, un fa siene truhoatje Leew. Waut kjenn wie noch von Hana lieren?

7. Waut deeden Hana un äa Maun pinkjlich?

⁷ Hana haud väl Trubbels, oba dee wankt doawäajen pinkjlich met äaren Maun toop no dee Städ en Silo, wua Jehova aunjebät wort (1. Sam. 1:1-5). Un doa bie daut Aunbädungszelt spruak de Huaga Priesta Eli ar Moot too un säd, daut hee hopt, daut Jehova äa Jebäd erhieren wudd (1. Sam. 1:9, 17).

8. Woo kjennen de Toopkomes ons halpen? Laj daut ut.

⁸ Wie kjennen wada ennalich Fräd haben, wan wie nich opphieren, no de Toopkomes to wanken. Jeweenlich fangen onse Toopkomes met een Jebäd aun, wua een Brooda om dän heiljen Jeist bäden deit. Un Fräd jehieet je to dän Jeist siene Frucht (Gal. 5:22). Wan wie uk en schwoare Tieden no de Toopkomes wanken, dan kjennen Jehova un onse Breeda un Sestren ons doa Moot toospräakjen un berujen. De Toopkomes un daut Jebäd sent twee wichtje Sachen, waut Jehova brukt, om ons to treesten un to berujen (Heb. 10:24-25). Well wie nu mol seenen, waut wie noch von Hana äare Jeschicht lieren kjennen.

9. Waut endad sikj nich bie Hana, oba wuarom wia ar daut nu leichta?

⁹ Hana äare Trubbels jinjen nich fuaz äwa. Aus see von daut Aunbädungszelt trigj no Hus kjeem, must see doa wieda met Peninna foadich woaren. Un de Schreft sajcht nich, daut Peninna sikj endad. Secha hieed see nich opp, Hana derch äare Wieed to velazen. Oba Hana haud wada ennalich Fräd. See veleet sikj doaropp, daut Jehova no äa Jebäd horchen wudd, un muak sikj nich mea soo väl Sorjen. See leet sikj von Jehova treesten un berujen. Un lota säajend Jehova ar un see haud miere Kjinja (1. Sam. 1:19-20; 2:21).

10. Waut kjenn wie von Hana äare Jeschicht lieren?

¹⁰ Wie kjennen wada ennalich Fräd haben, wan onse Trubbels uk nich äwagonen. Eenje Trubbels woaren ons woomäajlich wieda toosaten, wan wie uk väl bäden un pinkjlich no de Toopkomes wanken. Oba Hana äare Jeschicht wiest ons, daut Jehova ons doawäajen en jieda Loag treesten un berujen kaun. Hee woat kjeenmol von ons vejäten un met de Tiet woat hee ons beloonen, wan wie nich oppjäwen (Heb. 11:6).

11. Waut fa Sorjen haud Paulus?

¹¹ Paulus haud väl Uasoak, sikj Sorjen to moaken. Biejlikj sad am daut sea too, daut siene Gloowesbreeda Schwierichkjeiten hauden, wiels hee dee väl räakjend (2. Kor. 2:4; 11:28). Un en sienen Deenst must hee foaken met Jäajna foadich woaren, waut am schluagen un enstopten. Hee must uk aundret derchmoaken, biejlikj daut am  daut knaup jinkj (Filip. 4:12). Un secha haud hee daut uk schwoa, wan hee metem Schepp metfoaren must, wiels hee wia je oppet weinichste aul dree Mol metem Schepp veojjlekjt (2. Kor. 11:23-27). Woo kunn Paulus met aul daut foadich woaren?

12. Waut holp Paulus, met siene Sorjen foadich to woaren?

¹² Paulus muak sikj Sorjen, wan de Breeda un Sestren schwoaret derchmuaken, oba hee proowd nich, de äare Trubbels auleen to fiksen. Paulus hilt em Denkj, daut hee nich aules selfst doonen kunn. Hee sach doano, daut aundre am holpen, sikj om de Breeda to kjemren. Biejlikj jeef hee soone Mana aus Timotäus un Titus, wua hee sikj opp veloten kunn, mea Veauntwuatunk. Wiels dee am holpen, sikj om de Vesaumlungen to kjemren, haud Paulus secha weinja Sorjen (Filip. 2:19-20; Tit. 1:1, 4-5).

13. Woo kjennen Eltestasch Paulus nodoonen?

¹³ Froag aundre no Help. Soo aus Paulus moaken uk vondoag dän Dach väl leeftolje Eltestasch sikj om deejanje von de Vesaumlunk Sorjen, waut groote Trubbels haben. Oba een Eltesta kaun sikj nich auleen om jiedrem eenen kjemren. Wan hee daut em Denkj helt, dan woat hee aundre Breeda no Help froagen, waut een goodet Väabilt sent. Un hee woat uk jinjre Mana utlieren, daut see am halpen kjennen, sikj om Gott siene Schop to kjemren (2. Tim. 2:2).

14. Waut beduad Paulus nich, un waut kjenn wie von am lieren?

¹⁴ Denkj doaraun, daut die uk Troost fält. Wäajen Paulus deemootich wia, wist hee, daut am daut fäld, daut siene Frind am Moot toospruaken. Hee räd gaunz frie doavon, daut aundre am jetreest hauden, un beduad nich, daut se am doawäajen fa läach aunseenen wudden. En sienen Breef aun Filemon schreef Paulus: “Wie haben doaderch väl Freid un Troost jekjräajen daut du aundre soo goot best” (Filem. 7). Paulus räd uk noch von aundre Gloowesbreeda, waut am en schwoare Tieden väl Moot jejäft hauden (Kol. 4:7-11). Wan wie daut deemootich toostonen, daut ons Troost fält, dan woaren onse Breeda un Sestren ons wellich halpen.

15. Waut deed Paulus, aus hee eene sea schwoare Tiet haud?

¹⁵ Velot die opp Gott sien Wuat. Paulus wist, daut de Schreft am Troost jäwen  wudd (Reem. 15:4). Dee wudd am uk de Weisheit jäwen, om met jieda Trubbel foadich to woaren (2. Tim. 3:15-16). Aus hee toom tweede Mol en Room enjestopt wia, späad sikj am daut soo, daut sien Läwen boolt to Enj sennen wudd. Waut deed hee en dise schwoare Tiet? Hee bestald, daut Timotäus fuaz komen sull un am “de Buakrollen” metbrinjen (2. Tim. 4:6-7, 9, 13). Wuarom? Opp dise Buakrollen wia secha waut von de Hebräische Schreften bowen, waut Paulus brucken kunn, wan hee fa sikj selfst studieed. Wan wie Paulus nodoonen un pinkjlich de Schreft studieren, dan woat Jehova ons derch sien Wuat treesten, endoont waut wie derchmoaken.

16. Waut muak David derch, wäajen hee eenen grooten Fäla muak?

¹⁶ David ploagd sien Jewessen, wäajen hee waut sea schlajchtet jedonen haud. Hee haud met Batseba de Ehe jebroaken un dee äaren Maun ombrinjen loten, un dan wull hee daut uk noch plietsch hoolen (2. Sam. 12:9). Eene Tietlank horcht hee nich no sien Jewessen. Doawäajen haud hee daut sea schwoa un kunn nich mea Frint sennen met Jehova un feeld sikj mau rajcht krank (Psa. 32:3-4). Woo kunn David met de Trubbels foadich woaren, waut hee sikj selfst enjerieet haud? Un waut kaun ons halpen, wan wie eenen grooten Fäla jemoakt haben?

17. Woo wiest Psalm 51:3-6, daut David daut opp iernst leet wia, waut hee jedonen haud?

¹⁷ Bäd om Vejäwunk. Met de Tiet deed David to Jehova bäden. Am wia daut sea leet, waut hee jedonen haud, un hee bekjand siene Sinden (läs Psalm 51:3-6). Doahinja jinkj am daut wada väl bäta (Psa. 32:1-2, 4-5). Wan du eene groote Sind begonen hast, dan proow daut nich unjare Dakj to hoolen. Bäd to Jehova un saj dän aules, waut du jedonen hast. Dan woascht du die ruja feelen un dien Jewessen woat die nich mea soo baudren. Oba wan du wada west Frint woaren met Jehova, dan rieekjt daut nich too, bloos to bäden.

18. Waut deed David, aus hee trajchtjewäsen wort?

¹⁸ Nemm daut aun, wan du trajchtjewäsen woascht. Aus Jehova dän Profeet Natan no David schekjt toom met am äwa dän siene Sind räden, deed David sikj nich  rajchtfoadjen un jeef uk nich väa, daut et met siene Sind nich soo oajch wia. Hee stunt daut fuaz too, daut hee sikj aun Batseba äaren Maun veschulcht haud un ver aulem aun Jehova. David leet sikj von Jehova trajchtwiesen un Jehova vejeef am (2. Sam. 12:10-14). Wan wie eene groote Sind begonen haben, dan mott wie met deejanje räden, waut Jehova aus Hoads aunjestalt haft (Jak. 5:14-15). Un wie motten oppaussen, daut wie ons nich rajchtfoadjen. Je ea wie ons trajchtwiesen loten, je ea woa wie wada ennalich Fräd un Freid haben.

19. To waut sell wie ons gaunz eenich sennen?

¹⁹ Sie die gaunz eenich, dänselwjen Fäla nich noch eemol to moaken. De Kjennich David wist, daut hee Jehova siene Help brukt toom nich wada deeselwje Sinden doonen (Psa. 51:9, 12, 14). Nodäm aus Jehova am vejäft haud, wia hee sikj gaunz eenich, sikj nuscht schlajchtet mea jankren to loten. Un soo kunn hee wada ennalich Fräd haben.

20. Woo kjenn wie wiesen, daut wie doafäa dankboa sent, daut Jehova ons vejeft?

²⁰ Aun waut es daut to seenen, daut wie doafäa dankboa sent, daut Jehova ons vejeft? Wan wie am doano froagen un ons trajchtwiesen loten un ons dan sea aunstrenjen, daut wie nich wada dänselwjen Fäla moaken. Wan wie daut doonen, dan woa wie wada ennalich Fräd haben. Een Brooda, waut James heet un mol eene groote Sind begonen haft, haft daut utjefungen. Hee sajcht: “Aus ekj de Eltestasch daut säd, waut ekj jedonen haud, foll mie een groota Steen vom Hoat. Ekj feeld mie dan väl ruja.” Jehova “es aul dee no aun, dee een jebroaknet Hoat haben, un halpt dee, dee een bedrekjten Jeist haben” (Psa. 34:19). Jeft ons daut nich väl Moot?

21. Woo kjenn wie ons von Jehova treesten un berujen loten?

²¹ Je noda daut Enj von dise Welt kjemt, je mea Trubbels woa wie woomäajlich haben. Wan du daut met waut schwoa hast, dan froag Jehova fuaz no Help. Studia flietich de Schreft. Un lia von Hana, Paulus un David. Bäd dienen himlischen Voda, daut hee die halpt to vestonen, wuarom die aules soo schwoa es (Psa. 139:23). Lot die von am halpen, besonda wan du Trubbels hast, wua du selfst nich väl ooda nuscht met doonen kaust. Dan woascht du krakjt daut beläwen, wua de Psalmenschriewa von schreef. Hee säd to Jehova: “Aus ekj ennalich sea beduat wia, freid miene Seel sikj to dienen Troost” (Psa. 94:19).