1. ¿Imakunataq llakitsimashwan? Y ¿imatataq pensatsimashwan?

¿IMËLLAPIS llakikurqunkiku? * Itsa pillapis noqantsikpaq mana allita parlashqa kaptin llakikurquntsik, itsa kikintsik ruranqantsik o ninqantsik llakitsimashwan, itsa jutsallakunqantsikta Jehovä mana perdonamänapaq kaqta creintsik. Jina markäkïnintsik o yärakuynintsik pishiptinku tsënö pensëkantsik. ¿Alliku tsënö pensanqantsikqa?

2. ¿Imanirtaq markäkïnintsik o yärakuynintsik pishinqanta pensashwantsu?

² Bibliachö juk ishkë nunakunapita yachakurishun. Puntataqa Jehovä Diospa willakoqnin Samuelpa maman Änapita yachakurishun. Markäkoq o yärakoq warmi kaptimpis, chikipaqnin warmiqa imëkata rurarmi llakitseq (1 Sam. 1:7). Jina apostol Pablu markäkïyoq nuna karnimpis, ‘llapan creikoqkunapaq yarpachakunqampitam’ yachakushun (2 Cor. 11:28). Y rey Davidpaqnam, Jehoväqa shonqumpaqnö kanqanta nirqan (Hëch. 13:22). Tsënö kaptimpis jutsallakunqanrëkurmi llakikurqan (Sal. 38:4). Tsëkunapa pasëkäyaptimpis Jehoväqa pëkunata shoqarqanmi.

3. ¿Imanirtaq wakinkuna parlayanqanqa llakitsimashwan?

³ Juk amïguntsikwan o familiantsikwan yamë kawakuytaqa llapantsikmi munantsik, peru mana alli tratamashqaqa  llakikushwanmi. Itsa wakinkunaqa mana pensashpa lluta imatapis niramashwan, tsëqa ‘imëka cutsillunöran shonquman chärir’ llakitsimashwan (Prov. 12:18). Peru wakinkunaqa llakikunantsikta munarmi imatapis lluta niramantsik. Tsënöpa pasaq panim kënö willakun: “Juk kuyë yanasämi mana kaqta noqapaq Internetpa willakur qallëkurqan, tsëta ruramanqanqa imëka cutsilluwan tuksikamaqnömi karqan. Tsëmi llakikurnin waqarqä”. Tsëkunapa pasashqaqa Äna pasanqankunam yanapamäshun.

4. ¿Ima mana allikunapataq Änaqa pasarqan?

⁴ Änaqa qolloq warmi karmi atska watapa llakishqa karqan (1 Sam. 1:2). Pë kawanqan witsanchöqa, qolloq këqa llakikuypaqmi karqan. Tsëmi Änaqa penqakur llakikurqan (Gen. 30:1, 2). Jina qowampa juknin kaq warmin Peninäqa, Äna qolloq kaptinmi kushipar imëkanöpapis llakitseq (1 Sam. 1:6). Tsënö Peninä ruraptinmi Änaqa “waqar mikïtapis munaqtsu” y kutin kutin tsënö ruraptinmi masraq llakikoq (1 Sam. 1:7, 10). Tsëqa, ¿imanötaq Änaqa yamë këta tarirqan?

5. ¿Imanötaq Änata Jehoväman mañakunqan yanaparqan?

⁵ Änaqa shonqunchö llakikunqantam Jehoväta willarqan. Tsëpitanam imakunapa pasëkanqanta Diospa wayinchö yanapakoq Elïta willarqan. Tsëmi Elïqa: “Mañakunqëkinö ankupäkoq Teyta Dios yanapëkulläshï. Kananqa kushishqana kutikï” nirqan. Y Änaqa, “posadakunqanman kutï[rirmi] kushishqana mikurqan. Tsë junaqpitaqa mananam llakikurqannatsu” (1 Sam. 1:17, 18). Jehoväman mañakunqanmi yanaparqan yamëna kawakunampaq.

6. ¿Imatataq Änapita y Filipensis 4:6 y 7 ninqampita, mañakuypaq yachakuntsik?

⁶ Seguïdu mañakurninqa yamë këta tarishunmi. Änaqa manam juk rätullatsu Jehoväman mañakurqan (1 Sam. 1:12). Noqantsikpis Änanömi yarpachakunqantsikkunata y pantanqantsikkunata Jehoväman mañakunantsik. Jehoväqa manam shuyarantsu alli parlakoqraq kanantsikta.  Höraqa llakikur waqarpis pëmanqa mañakushwanmi. Jina Jehoväqa listum këkan wiyamänapaq Filipensis 4:6 y 7 (leyiri) ninqannö. Tsëmi apostol Pabluqa mañakunqantsikchö Jehoväta agradecikunapaq nirqan. Imëkatam noqantsikpaq Jehoväqa rurashqa, tsëtaqa rikantsik kawënintsikchö, kamanqankunachö, kuyamanqantsikchö y shamoq tiempuchö mas alli kawanapaq änimanqantsikchömi.

7. ¿Imatataq Änawan qowanqa imëpis rurayaq?

⁷ Llakishqa këkarpis Änaqa cada watam qowanwan Silö markaman, Jehoväta adorayänampaq ëwayaq (1 Sam. 1:1-5). Diospa wayinchö mañakur këkaptinmi tsëchö yanapakoq Elïqa, mañakunqanta Jehovä wiyanampaq kaqta nirqan (1 Sam. 1:9, 17).

8. ¿Imanötaq reunionkunaqa yamë këta tarinapaq yanapamantsik?

⁸ Reunionkunachömi yamë këtaqa tarishun. Reunionnintsik qallanampaq mañakuychöqa Jehoväpa santu espïrituntam mañakuntsik. Juk parlakïchöqa yamë këtam mañakuntsik (Gäl. 5:22). Reunionkunaman llakishqa ëwarninqa Jehovä y wawqi panintsikkunaqa, yamë sientikunapaqmi yanaparamäshun. Awmi, Jehoväqa mañakuyta y reunionkunatam patsätsishqa yanapamänapaq (Heb. 10:24, 25). ¿Ima mastataq Änapita yachakuntsik?

9. ¿Änapa kawëninchöqa imataq cambiarqantsu? Peru, ¿imataq jukläyana karqan?

⁹ Änata Peninä llakitsinqanqa manam ushakarqantsu, peru Jehoväta mañakunqampitaqa mananam llakikurqannatsu. Tsëpitaqa mananam llakishqa këninqa qaqllanchö rikakurqannatsu, shonqumpis ankashyärirqanmi. Awmi llakishqa sientikunqanta Jehoväta willarirqa mananam Änaqa imapaqpis yarpachakurqannatsu. Y tiempuwanqa mañakunqannömi Jehovä permitirqan wamrankuna kananta (1 Sam. 1:19, 20; 2:21).

10. ¿Imatataq Änapita yachakuntsik?

¹⁰ Mana allikunapa pasarpis yamë këtaqa puëdintsikmi. Mañakushqa y reunionkunaman ëwashqapis manam wakin llakikuykunaqa ushakanqatsu. Tsënö kaptimpis Jehoväqa Änatanömi yanapamäshun yamëna kawakunapaq. Tsëmi shonquntsikpita pëman markäkushqa o yärakushqaqa pëqa bendicimäshun (Heb. 11: 6).

11. ¿Imakunamantaq Pabluqa yarpachakoq?

¹¹ Apostol Pabluqa cristiänu mayinkunata kuyarmi, mana allikunapa pasayaptin pëkunapaq yarpachakoq (2 Cor. 2:4; 11:28). Yachatsikunqan witsampis chikirmi maqayarqan y llawitsiyarqan. Jina waktsa kanqanmi yarpakachätsirqan (Filip. 4:12). Y kima kuti ëwanqan barcu hundikashqa kaptinchi, barcuwan ëwëtaqa mantsaq (2 Cor. 11:23-27). ¿Imataq Pabluta yanaparqan?

12. ¿Imataq Pabluta yanaparqan mana yarpachakunampaq?

¹² Wawqi paninkunapaq Pablu yarpachakurnimpis, humildi karninmi carguyoq wawqikuna yanapayänampaq  mañakurqan. Awmi, Timoteuwan Tïtu markäkïpaq cristiänu kayaptinmi, Pabluqa wawqi panikunata yanapayänampaq nirqan. Tsë wawqikuna yanapayaptinmi apostol Pabluqa yarpachakurqannatsu (Filip. 2:19, 20; Tïtu 1:1, 4, 5).

13. ¿Imanötaq Pablunölla creikoqkunata rikaq anciänukuna rurayanman?

¹³ Jukkuna yanapamänapaq mañakushun. Kanan witsampis creikoqkunata rikaq anciänukunaqa, Pablu ruranqannöllam wawqi panikuna mana allikunapa pasayaptin yarpachakuyan. Tsënö kaptimpis manam llapan wawqi panikunataqa yanapëta puëdiyantsu, tsëmi humildi karnin jukkuna yanapayänampaq mañakuyan. Jina jövinkunatapis tsënö yanapakuyänampaqmi yachatsiyan (2 Tim. 2:2).

14. ¿Imanötaq Pablu karqan? Y noqantsikqa, ¿imatataq yachakuntsik?

¹⁴ Shoqamänataqa llapantsikmi wanantsik. Humildi karmi Pabluqa amïgunkuna shoqayänanta permitirqan. Y manam yarpachakurqantsu ima niyänampaq kaqmanqa. Tsëmi Filemonman cartakunqanchö kënö nirqan: “Alläpam kushikurqö y shoqashqa këtam tarirqö kuyakoq kanqëkita wiyarir” (Filem. 7). Jina mana allikunapa pasanqanchö amïgunkuna shoqayanqantapis willakurqanmi (Col. 4:7-11). Awmi, humildi karnin yanapamänata mañakushqaqa, wawqi panintsikkunaqa kushishqam yanaparamäshun.

15. ¿Imataq Pabluta yanaparqan yarpachakunqan witsan?

¹⁵ Diospa Palabranman markäkushun o yärakushun. Pabluqa musyarqanmi Diospa Palabranchö shoqakuyta tarinampaq kaqta (Rom. 15:4). Jina yachakunqankunaqa mana allikunapa pasanqan höram yanaparqan (2 Tim. 3:15, 16). Römachö yapë tsariyanqan witsanqa, musyarqanmi wanutsiyänampaq kaqta. Tsëmi Timoteuta, “röllukunata” aparkur raslla watukaq ëwanampaq qayatsirqan (2 Tim. 4:6, 7, 9, 13). ¿Imanirtaq röllukunata apapunampaq mañakurqan? Itsa Diospa  Palabrampita yachakuyta munarnin tsëtaqa mañakurqan. Noqantsikpis Pablu yachakunqannöllam, Bibliapita yachakurqa ima mana allikuna pasamashqapis yamë këta tarinapaq Jehovä yanapamäshun.

16. Jutsata rurëkurninqa, ¿imanötaq David sientikurqan?

¹⁶ Davidqa yarpachakurmi punuytapis puëdirqantsu, tsëqa karqan Bat-Sebawan punukïkushqa kaptin, nunanta wanutsiyänampaq mandakushqa kaptin y jutsallakunqanta mana willakushqa kaptinmi (2 Sam. 12:9). Qallananchöqa manam pitapis willarqantsu, peru tsëpitaqa jutsallakunqampitam paqasta junaqta llakikurlla kakoq (Sal. 32:3, 4). Jutsallakunqampita manana llakikunampaqqa, ¿imatataq rurarqan? Y noqantsik jutsallakushqaqa, ¿imataq yanapamäshun?

17. Salmus 51:1-4 Bibliachö ninqannö, ¿imanötaq David arrepentïdu kanqanta rikätsikurqan?

¹⁷ Jehovä perdonëkamänapaq mañakushun. Jehoväman mañakurmi Davidqa jutsallakunqanta willarirqan (leyi Salmus 51:1-4 *). Tsënö ruranqanqa shonquntapis ankashyäratsirqanmi (Sal. 32:1, 2, 4, 5). Jutsata rurashqa karqa, Jehoväta raslla willashun, ama upällaqa kakushuntsu. Tsënö rurashqaqa noqantsikpa shonquntsikpis ankashyärinqam, peru Jehoväwan yamë kanapaqqa mastaran ruranantsik.

18. Jehovä yanapaptin, ¿Davidqa jutsanta tsaparqanku?

¹⁸ Jutsata rurarqa Jehovä yanapamänata jaqishun. Jutsallakunqanta David willanampaqmi, willakoqnin Natanta Jehovä mandarqan. Pëqa manam jutsanta tsaparqantsu ni mana kaqpaq churarqantsu, tsëpa rantinqa Jehoväta llakitsinqanta y Bat-Sebapa  nunanta mana allita ruranqantam rikätsikurqan. Tsënö kaptinmi Jehoväqa perdonarqan (2 Sam. 12:10-14). Noqantsikpis jutsata rurarninqa rasllam Jehovä churanqan nunakunawan parlanantsik (Sant. 5:14, 15). Davidnömi jutsallakunqantsikpita tsapäkunantsiktsu, sinöqa rasllam willakunantsik, tsënö rurashqaqa yamë y kushishqam sientikushun.

19. ¿Imata mana ruranapaqtaq kallpachakunantsik?

¹⁹ Jutsallakunqantsikta yapëqa rurashuntsu. Davidqa allim musyarqan Jehovä yanapaptinlla, jutsa ruranqanman yapë mana ishkinampaq kaqta (Sal. 51:7, 10, 12). Jehovä perdonariptinqa, mana allikunata manana ruranampaqmi kallpachakurqan, tsëmi yamëna kawakurqan.

20. Jehovä perdonamanqantsiktaqa, ¿imanötaq agradecikushwan?

²⁰ Jehovä perdonamanqantsiktaqa agradecikuntsik pëman mañakurnin, Jehovä yanapamashqa chaskikurnin y ruranqantsik jutsata yapë manana rurarninmi. Tsënö rurashqaqa yamëmi kawakushun. Tsëtam rikantsik wawqi Jaimi jutsallakurirnin ninqanchö: “Creikoqkunata rikaq anciänukunata willarirqa, lasaq qepïta jaqireq cuentam karqan. Tsënö ruranqäpitaqa yamënam sientikurqä”. Awmi, “jutsankunapita llakikuqkunataqa TEYTA DIOS ankupanmi. Ima rurëtapis mana puëdiqkunata yanapanmi” (Sal. 34:18).

21. ¿Imanötaq Jehovä shoqamänata jaqishun?

²¹ Imëka mana allikunapa ushakënin këllachöna kaptinmi masraq imëkapaqpis yarpachakushun. Tsënö pasamanqantsik höraqa Jehovä yanapamänapaq mañakushun, Bibliapita yachakushun, Äna, Pablu y David imanö kayanqampita yachakushun (Sal. 139:23). Lasaq qepinö yarpachakuynintsikkunata Jehovä yanapamänapaq mañakushun. Tsënö rurarqa salmusta qellqaq nunanömi kënö nishun: “Jananman jananman llakikïchö këkaptïmi shoqamarnï kallpä qomar kushitsimarqunki” (Sal. 94:19).