1. a) ¿Imacunamandata ninanda preocuparita ushapanchi? b) Ninanda preocuparishpaca ¿imashinata sintiripanchi?

HUAQUINBICA pipash imatapash nijpi o imatapash rurajpimi nali sintirimanda ninanda preocuparipashcanchi. * Shinallata imatapash nishpa o imatapash rurashpami ñucanchillata nali sintiri ushapanchi. Talvez shuj juchata rurashcamanda Jehová Diosca nunca na perdonahuangachu nishpapashmi ninanda preocupari ushapanchi. Na shinlli feta charinichu o nali gentemi cani nishpa pensarimandapashmi llaquilla sintiri ushapanchi. Shinapash chaicunaca ¿ciertochu can?

2. Shinlli feta charishpapash ¿picunata yapata preocuparirca?

² Cunanga Bibliapi parlashca Ana huarmigumanda yachajupashunchi. Anaca profeta Samuelpa mamami carca. Paica shinlli fetami charirca. Shina shinlli feta charishpapash llaquillapachami causarca. Paipa huasi ucumandallatami shuj huarmi Anataca ninanda llaquichishpa causan carca (1 Sam. 1:7). Apóstol Pablo shinlli feta charishpapash “tucui tandanajuj crijcunata yarishpami” paicunamanda ninanda preocuparishpa causan carca (2 Cor. 11:28). Rey Davidpash shinlli feta charijpimi Jehová Diosca paitaca ninanda juyan carca (Hech. 13:22). Shina cashpapash Davidca juchata rurashcamandami ninanda preocuparishpa, llaquillapacha causajurca (Sal. 38:4). Cai quimsandi Jehovata sirvijcuna llaquilla cajpi, preocuparishca cajpica Jehová Diosca paicunataca  juyaihuanmi ayudarca. Paicunamanda yachajupashunchi.

3. Shujcunapa nishcacunaca ¿imashinata ñucanchitaca llaquichi ushan?

³ Huaquinbica shuj ali amigo o shuj familia imatapash nishpa o rurashpami llaquilla ñucanchitaca sintichita ushan. Chaimi paihuanga culirariringami yashpa ninanda preocuparipanchi. Cutin huaquingunaca imatapash yangata parlaimandami ‘espadahuan chugrichinshna’ ñucanchitaca llaquilla sintichita ushan (Prov. 12:18). Shinapash huaquingunaca nali sintichingapapacha munashpami imacunatapash ninga. Shinami shuj joven panigutaca pasarca. Paica: “Ashtaca huatacunatami shuj alipacha amigata charircani. Shinapash shuj punllaca redes sociales nishcacunapimi ñucamanda llullacunata nishpa churashcarca. Ñuca amiga cangapaj chaicunata churajta ricushpaca nalipachami sintichihuarca” ninmi. Shuj ali amigo o familia ucumanda pipash imatapash nishpa ñucanchita llaquichijpica imata ruranata Anamanda yachajupashunchi.

4. Ana huarmiguca ¿ima llaquicunatata charirca?

⁴ Anaca huahuaguta na charita ushaimandami llaquillapacha causajurca (1 Sam. 1:2). Israelita huarmicuna huahuaguta na charita ushajpica nalicachishpami ricun carca. Chaimi Anaca pinganayachishpa, llaquilla causan carca (Gén. 30:1, 2). Chai jahuapash paipa cusaca shuj huarmitami charirca. Paica Peniná shutimi carca. Paica tauca huahuacunatami charirca. Peniná huarmica Anata na ricunayachimandami cutin cutin imacunatapash nishpa “ninanda rimashpa fiñachishpa llaquichijurca” (1 Sam. 1:6). Ashtaca huatacunatami Anaca chashna llaquihuan causarca. Chaimi Anaca “huacaitalla huacashpa” micuitapash na micushpa llaquilla causan carca. Anaca llaquillapachami carca (1 Sam. 1:7, 10). Ana ama llaquilla cachunga ¿imata ayudarca?

5. Jehovata mañanaca ¿imashinata Anataca ayudarca?

⁵ Anaca tucui shunguhuanmi Jehovata mañarca. Shina mañashca jipami Ana imashna sintirishcata sumo sacerdote Elihuan parlangapaj rirca. Chaimi Elí jarica cashna nirca: ‘Imatapash na manllashpa rilla. Cunanga, israelcunapa Taita Diosca, can mañajushcata carangapachami’ nishpa. Chai punllamandapachami, ‘pai maita shamushcatallata tigrashpa micugrirca’. Shinallata ñana “ashtahuan llaquilla carcachu” (1 Sam. 1:17, 18). Jehovata mañanami Anataca tranquilo ama llaquilla cachun ayudarca.

6. a) Ana huarmigu Jehovata mañashcamandaca ¿imatata yachajupanchi? b) Filipenses 4:6, 7​pi shimicunamandaca ¿imatata yachajui ushapanchi?

 ⁶ Jehovata mañanami tranquilo sintirichun ayudan. Anaca Jehovataca siempremi mañan carca (1 Sam. 1:12). Shinallatami ñucanchicunapash llaquicunata, problemacunata charishpa, ñucanchi pandarishcacunatapash Jehová Diosman villanalla capanchi. Juyailla, alipacha shimicunahuan mañachunga Jehová Diosca na shuyanllu. Huaquinbicarin llaquilla caimandami huacashpapash mañanchilla. Jehová Diosca ñucanchi mañashcacunataca siempremi uyan. Imapash llaquicunata o problemacunata Jehová Diosman villajushpapash Filipenses 4:6, 7⁠pi shimicunatami yarina capanchi (chai textota liipangui). Chai textopica apóstol Pabloca, Jehovata mañajushpaca agradecidocuna cana cashcatapashmi nirca. Jehová Diostaca, ñucanchiman causaita cushcamanda, paipa rurashcacunamanda, pai ñucanchita juyashcamanda, shamuj punllacunapi juyailla causaiguta carasha nishcacunamandami agradicita ushapanchi. Anamandaca ¿imatata ashtahuan yachajuita ushapanchi?

7. Ana huarmiguca ¿imatata siempre ruran carca?

⁷ Anaca llaquilla causajushpapash paipa cusagu Siló llactapi Jehovapa templo huasiman rijpica siempremi cumbashpa rin carca. Chai llactapimi Jehovata adoran carca (1 Sam. 1:1-5). Chai templo huasipimi sumo sacerdote Elí jarica, Jehová Dios canba mañashcata uyarcami nishpa Anataca cushichirca (1 Sam. 1:9, 17).

8. Tandanajuicunaman rinaca ¿imashinata ayudaita ushan?

⁸ Tandanajuicunaman rinami tranquilo sintirichun ayudan. Tandanajuicunata ña callarijushpaca siempremi Jehovapa espíritu santota mañashpa callarin. Chaimi chaipi cashpaca tranquilo sintiripanchi (Gál. 5:22). Tandanajuicunaman rishpapash llaquillallata sintirijushpaca Jehová Dios, shuj huauquipanicunapash ayudachunmi saquina capanchi. Shinami ñucanchicunaca tranquilo sintirita ushapashun. Shinaca Jehovata mañana, tandanajuicunaman rinami tranquilo sintirichun ayudan (Heb. 10:24, 25). Anamanda yachajushpa catipashunchi.

9. Anapa causai na cambiajpipash ¿imashinata paica sintirirca?

⁹ Jehovata mañashca jipallaca Anapa llaquicunaca na tucurircachu. Siló llactamanda Jehovata adorashpa paipa huasiman tigrajpica Peniná huarmica llaquichishpami catirca. Bibliapica Peniná huarmi cambiashcataca na villanllu. Anataca, Peniná huarmica imacunatapash nishpami llaquichishpa catishcanga. Imashinami ña yachajuparcanchi, Ana Jehová Diosta mañashca jipallaca paica alimi sintirirca. Jehová Diosca Ana ama llaquilla cachunmi ayudarca. Tiempohuanga Anaca huahuacunata charircami. Shinami Jehová Dios paita uyashcata ricurca (1 Sam. 1:19, 20; 2:21).

10. Anapa causaimandaca ¿imatata yachajupanchi?

¹⁰ Llaquicuna na tucurijpipash tranquilo cangapaj esforzaripashunchi. Huaquinbica Jehovata cutin cutin mañajpipash, tandanajuicunaman rijpipash llaquicuna o problemacunaca na tucurinllu. Shinaca Ana huarmigushnami, ñucanchicunapa llaquicunata o problemacunataca Jehovapa maquipi saquina capanchi. Shinami tranquilo sintirichun ayudanga. Jehová Diosca ñucanchitaca nimahora na cungangachu. Shuj punllaca ñucanchicuna cushilla causachunmi ayudanga (Heb. 11:6).

11. ¿Imacunamandata apóstol Pabloca preocuparirca?

¹¹ Apóstol Pabloca ¿imacunamandata preocuparin carca? Congregacionmanda huauquipanicunata juyaimandami ninanda preocuparin carca (2 Cor. 2:4; 11:28). Villachishpa purijujpimi apóstol Pablotaca macashpa, carcelpi paipa contracunaca vicharca. ¿Imamandata ashtahuan preocuparin  carca? Huaquinbica ‘na micunata’ charimandapashmi preocuparin carca (Filip. 4:12). Shinallata Pabloca quimsa viajetami barcopi rijushpaca mar yacupi pambarishpa llaqui aparca. Chaimi barcopi rinataca ninanda manllan carianga (2 Cor. 11:23-27). Ama manllaita charichunga ¿imashi Pablotaca ayudarca?

12. Apóstol Pablo tranquilo sintiringapaca ¿imata rurarca?

¹² Apóstol Pabloca huauquipanicunamandami siempre preocuparin carca. Shinapash paica humilde caimandami shuj huauquicunapa ayudata mañarca. Shuj huauquicuna congregacionda ñaupaman pushachunmi mañarca. Congregacionda ñaupaman pushachunga Timoteoman, Tito huauquimanmi mingarca. Congregacionda ñaupaman pushachun ayudajpica apóstol Pabloca tranquilomi sintirirca (Filip. 2:19, 20; Tito 1:1, 4, 5).

13. Ancianocunaca ¿imatata apóstol Pablomandaca yachajuita ushan?

¹³ Ayudachun mañapashunchi. Cunanbipash ancianocunaca apóstol Pabloshnami, huauquipanicuna llaquita o problemacunata charijpica paicunata juyaimanda ninanda preocuparin. Shinapash shuj anciano huauquillaca llaquicunata o problemacunata arreglaitaca na ushanllu. Ancianocuna humilde cashpaca, shuj huauquicuna paita ayudachunmi mañanga. Shinallata joven huauquicunatami Jehovata sirvijcunata cuidachunbash yachachinga (2 Tim. 2:2).

14. a) Apóstol Pabloca ¿imatata na pinganayachirca? b) Apóstol Pablomandaca ¿imatata yachajupanchi?

¹⁴ Llaquilla cashpaca animachunmi minishtipanchi. Apóstol Pabloca humilde caimandami paipa amigocuna paita animachun saquirca. Paita, paipa amigocuna animashcamandaca na pinganayachircachu. Filemón cartapica Pabloca: “Cambaj juyaimandami, ñucanchipash ninandapachami cushijunajunchi” nircami (Filem. 7). Shuj cartacunapipashmi pai llaquilla cajpi o preocuparishca cajpipash shuj huauquicuna animashcata escribirca (Col. 4:7-11). Ñucanchicunapash humilde cashpaca shuj huauquipanicuna animachunmi saquipashun. Paicunaca cushijushpami ñucanchitaca ayudanga.

15. Apóstol Pablo llaquilla sintirijujpica ¿imata paitaca ayudarca?

¹⁵ Biblia ñucanchita ayudachun saquipashunchi. Apóstol Pabloca Diospa Shimi ayudajtaca alimi yacharca (Rom. 15:4). Shinallata ima llaquita o problemata charishpapash aliguta pensarishpa rurachunbash ayudajtaca alimi yacharca (2 Tim. 3:15, 16). Roma llactapi apóstol Pablo ishcai viajeta ña preso  cashpaca pai huañunataca alimi yacharca. Cashna llaquihuan cashpaca ¿imatata apóstol Pabloca rurarca? Apóstol Pabloca escribishca rollocunata apamuchunmi Timoteotaca mañarca (2 Tim. 4:6, 7, 9, 13, NM ). ¿Imamandata escribishca rollocunataca apamuchun mañarca? Chai rollocunapica Escrituras Hebreasmanda huaquin partecunami escribishca cashcanga. Chaimandami apóstol Pabloca cai rollocunapi escribishcacunamanda paillata ashtahuan yachajungapaj mañashcanga. Shinaca ñucanchipash apóstol Pabloshna Bibliata cada punlla liijpica, Jehová Diosca Bibliata utilizashpami ima llaquicunata charijpi o ima problemacunata charijpipash ñucanchicuna tranquilo sintirichun ayudanga.

16. Juchacunata rurashcamandaca Davidca ¿imashinata sintirirca?

¹⁶ Rey Davidca Bat-Seba huarmihuanmi huainayana juchapi urmarca. Chaimi paica chai juchamanda nalipacha sintirishpa llaqui llaqui causajurca. Shinallata Davidca Bat-Seba huarmipa cusatapashmi huañuchirca. Chai juchacunataca Davidca pimanbash na villashpami causajurca (2 Sam. 12:9). Chai juchacunata na villaimandami paipa yuyaipipash nali sintirishpa ninanda sufrishpa causajurca. Shinallata espiritualmentepash nalipachami carca (Sal. 32:3, 4). Chai juchacunamanda ama llaquilla causajuchunga Davidtaca ¿imata ayudarca? Ñucanchicunapash juchapi urmashca cashpaca ¿imatata rurana capanchi?

17. Salmo 51:1-4​pi nishca shinaca, Davidca ¿imatata rurarca?

¹⁷ Jehovata perdonahuai nishpa mañapashunchi. Shuj punllaca, Davidca paipa juchacunamanda tucui shunguhuan arripintirishpami Jehová Diosman tucuita villarca (Salmo 51:1-4, liingui). Shinami Davidca tranquilo sintirirca (Sal. 32:1, 2, 4, 5). Ñucanchicunapash imapash juchapi urmashca cashpaca uchashpami Jehová Diosman villana capanchi. Shinami ñucanchillata tranquilo sintiri ushapashun. Shinapash Jehová Dioshuan ali cangapaca ¿imatata ashtahuan rurana capanchi?

18. Consejocunataca ¿imashinata Davidca chasquirca?

¹⁸ Consejocunata aliman chasquipashunchi. Davidta juchatami rurashcangui nichunga Jehová Diosca profeta Natandami cacharca. Juchatami rurashcangui nishpa profeta Natán nijpica Davidca na negarijurcachu. Chaipa randica juchatami rurashcani nishpami tucuita Natanmanga villarca. Shinallata Bat-Seba huarmipa  cusata huañuchina jucha cashcataca Davidca alimi intindirca. Ashtahuanbachaca Jehovapa ñaupajpi nalipacha cashcatami cuenta japirca. Jehová Diospa consejota aliman chasquijpimi Jehová Diosca Davidtaca perdonarca (2 Sam. 12:10-14). Ñucanchicunapash juchata rurashca cashpaca ancianocunamanmi villana capanchi. Ancianocunataca congregacionbi huauquipanicunata cuidashpa ayudachunmi Jehová Diosca churashca (Sant. 5:14, 15). Ñucanchicunapash juchapi urmashca cashpaca na negarijunachu capanchi. Ancianocunapa consejocunata aliman chasquishpa imagupipash cambiashpaca, ñucanchillatami tranquilo, cushilla causaita ushapashun.

19. Juchapi ama urmangapaca ¿imatata rurana capanchi?

¹⁹ Juchacunapi ama urmangapaj cuidaripashunchi. Davidca cutin chai juchacunapillata ama urmangapaj Jehovapa ayudata minishtishcataca alimi yacharca (Sal. 51:7, 10, 12). Jehová Dios paita perdonajpica, nalicunapi ama pensarijungapami Davidca esforzarirca. Chaimi tranquilo sintirirca.

20. Jehová Dios perdonashcamandaca ¿imashinata paita agradicishcata ricuchipanchi?

²⁰ Jehová Diosta mañashpa, consejocunata aliman chasquishpa, cutin chai nali ruraicunapillata ama urmangapami esforzarina capanchi. Shinami Jehová Dios ñucanchita perdonashcamanda agradicishcataca ricuchipashun. Shina rurashpaca ñucanchillata cushilla tranquilomi sintirishun. James shuti huauquica shinami sintirirca. Paipa juchacunamanda parlashpaca cashnami nin: “Ñuca juchata, ancianocunaman villashpaca, imapash llasha quipita ladoman saquinshnami sintirircani. Shinami cushilla sintirircani” nin. Bibliapica ninmi: ‘Shungupi ninanda llaquirishpa causajcunapa ladopi’ Jehová Dios cajtami yachachin nishpa. Shinallata “shungupi ninanda llaquirishpa causajcunatami quishpichin” nin. Chaimandami ninanda cushijupanchi (Sal. 34:18).

21. Tranquilo sintiringapaca ¿imatata rurana capanchi?

²¹ Tucurimui punllacunapi causajushcamandami cunanbica imacunamandapash ashtahuan preocuparishpa causapanchi. Imacunamandapash yapata llaquirijushpaca uchallami Jehová Diospa ayudata mascana capanchi. Bibliamanda yachajushpami catina capanchi. Shinallata Anapa, apóstol Pablopa, rey Davidpa ejemplocunamandapash yachajuna capanchi. Imamandapacha llaquirijushcata intindingapapashmi Jehovata mañana capanchi (Sal. 139:23). Ima llaquicunahuan cashpapash Jehová Dios ayudachun saquipashunchi. Shina rurashpaca, rey Davidshna sintirishpami cashna ni ushapashun: ‘Ñuca shungu ucupi ashtaca yuyaicunahuan musparijujpica, canmi ñucataca cushichihuarcangui’ (Sal. 94:19).