1. Eaa te ka akatupu i te taitaia, e eaa ta tatou ka manako maata atu?

KUA tupu ana te manako mirimiri ngata kia koe? * Penei ka taitaia koe no te mea kua tuatua akakino mai tetai ia koe. Penei ka taitaia koe i taau i tuatua ana. Ei akaraanga, penei kua rave koe i te kino e kare rava a Iehova e akakore mai i taau ara. E penei ka manako pera koe no toou taitaia e kua paruparu toou akarongo e e tangata kino koe. E tika ainei te reira?

2. Eaa te au akaraanga Pipiria te akaari maira me taitaia tetai kare tona akarongo i paruparu?

² Akamanako ana i te au akaraanga Pipiria. Ko Hana, koia te metua vaine o te peroveta ko Samuela, e vaine akarongo aia. Inara kua tupu te ngakau mirimiri ngata kiaia no te tuatua akakino a tona ngutuare tangata. (1 Samu. 1:7) E akarongo maata to te apotetoro ko Paulo, inara kua rokoia aia e te ‘pekapeka ra i te au rā katoa nei, i te akono anga i te au ekalesia katoa ra.’ (2 Kori. 11:28) E akarongo maata to te Ariki ko Davida e kua akaperepere iora a Iehova iaia. (Anga. 13:22) Noatu rai, kua rave a Davida i te kino e kua tupu te ngakau taitaia kiaia. (Sala. 38:4) Kua akapumaana e kua akamaru a Iehova ia ratou. Ka tamou mai tatou i te apiianga mei ia ratou.

3. Akapeea te tuatua akakino anga a tetai me akatupu i te au manako taitaia?

³ Me tuatua kino mai tetai, penei ka taitaia tatou. E me na tetai oa vaitata tikai me kore tetai kopu tangata te reira i tuatua. Ka manata tatou e kua kore to tatou pirianga ki te reira taeake. Tetai taime ko te tangata ka akakino mai ia tatou, penei ka tuatua manako kore mai aia, e ka manako tatou mei tera te tu, e kua koputa ia tatou ki te koke! (Mase. 12:18) Penei ka akakoro tetai tangata i te tuatua akakino i tetai ke. Kua na roto ana tetai tuaine mapu i teia manamanata. “I tetai au mataiti,” karanga aia, “kua urutoe toku oa meitaki iaku ki runga i te initaneti. Kua mamae e kua taitaia tikai au. Kare roa au i manako ana e ka akakino aia iaku.” Me kua tupu ana te mamae kia koe mei toou oa me kore toou kopu tangata, ka maata taau ka apii mai mei te akaraanga o Hana.

4. Eaa te manamanata ta Hana i na roto?

⁴ Kua na roto ana a Hana i te au manamanata ngata. No tetai tuatau roa kare aia i anau tamariki ana. (1 Samu. 1:2) I roto i te oraanga o te Iseraela ko tetai vaine pa, kare te Atua i akameitaki mai iaia. Kua akataitaia maata teia iaia. (Gene. 30:1, 2) Kua anau tamariki te rua o te vaine ko Penina e kua kino atu tona turanga. Kua manako a Penina ia Hana e e enemi nona e ‘kua akakoko rava iaia kia mii.’ (1 Samu. 1:6) I te akamata anga, kare i rauka ia Hana i te akakoromaki i tona turanga mamae. Kua taitaia tikai aia e kua “aue iora aia, e kare akera i kaikai.” Kua “tumatetenga rava” tona ngakau. (1 Samu. 1:7, 10) Eaa tei akapumaana maata ia Hana?

5. Akapeea te pure te tauturu anga ia Hana?

⁵ Kua akakite a Hana i tona ngakau taitaia kia Iehova, na roto i te pure. I muri ake i tona pure anga, kua akamārama aia i tona turanga ki te Taunga Maata ko Eli. Akakite aia e: “Kia ora koe i to aerenga: e kia akatika mai oki te Atua no Iseraela i taau i pati.” Eaa tei tupu? “Kua aere iora taua vaine ra i tona aerenga, e kua kaikai iora, e kare atura tona mata i kinokino ra.” (1 Samu. 1:17, 18) Kua tauturu te pure ia Hana kia maru aia.

6. Eaa te au apiianga no te pure mei ia Hana e Philipi 4:6, 7?

⁶ Ka ‘au tatou me pure tamou marie.  Kua pure tamou marie a Hana ki tona Metua i te rangi. (1 Samu. 1:12) Ka rauka rai ia tatou i te tuatua kia Iehova no to tatou taitaia, ta tatou e mataku ra e to tatou turanga apikepike. Kare tatou e anoanoia kia pure na roto i te au tuatua akareka. Tetai taime ka tuatua tatou ma te mirimiri ngata e te aue e te mamae ngakau. Noatu te reira kare rava a Iehova e iu i te akarongo mai kia tatou. I te pae mai i te pure anga no runga i to tatou au manamanata, kia akamaara katoa tatou i te au reo akamaroiroi tei tataia i roto ia Philipi 4:6, 7. (E tatau.) Karanga a Paulo kia taiku tatou i ta tatou pure ma te au manako akameitakianga. Maata ta tatou tumu no te akameitaki ia Iehova. Ei akaraanga, ka akameitaki tatou iaia no to tatou oraanga, no tana au angaanga i anga aia, tona aroa tiratiratu, e te au manakonakoanga manea tana i oronga mai. Eaa atu ta tatou ka apii mai mei ia Hana?

7. Eaa ta Hana raua ko tana tane i rave putuputu?

⁷ Noatu tona manamanata, kua aere putuputu a Hana raua ko tana tane ki to Iehova ngai akamorianga i Silo. (1 Samu. 1:1-5) Ia Hana i ko i te are uipaanga kua tuatua te Taunga Maata ko Eli kiaia e kia akarongo mai a Iehova i tana pure.—1 Samu. 1:9, 17.

8. Akapeea te uipaanga me tauturu ia tatou? Akamārama mai.

⁸ Ka ‘au tatou me aere putuputu ki te au uipaanga putuputuanga. Te pure akamata anga o ta tatou uipaanga ka kapiti mai i te pati anga i to te Atua vaerua. E tuanga te ‘au no te ua o te vaerua. (Gala. 5:22) Me aere tatou ki ta tatou uipaanga noatu te taitaia ra tatou, oronga tatou i tetai tuatau no Iehova e te au taeake e te au tuaine kia akamaroiroi ia tatou e te tauturu ia tatou kia ‘au te manako e te ngakau. Mea puapinga te pure e te uipaanga ta Iehova e taangaanga ana no te akamaru ia tatou. (Ebe. 10:24, 25) Akara akaou tatou i tetai apiianga mei te akaraanga o Hana.

9. Eaa to Hana turanga kare i taui, inara eaa tei tauturu iaia?

⁹ Kare i ngaro te tumu i taitaia maata ai a Hana. I te oki anga a Hana ki te kainga mei te akamorianga i ko i te are uipaanga, kua noo kapiti ratou ko Penina. Kare te Pipiria i akakite mai ana me kua taui te tu o Penina. No reira kua akakoromaki a Hana i te au tuatua akakino a teia vaine. Inara kua rauka ia Hana i te akakoromaki i tona turanga e te noo ‘au ua. I te uri anga i tona taitaia kia Iehova, kua akamaru te reira ia Hana. Kua tuku aia e na Iehova e akamaru e te akapumaana iaia. I muri iora, kua akameitakiia a Hana e kua anau tamariki katoa aia!—1 Samu. 1:19, 20; 2:21.

10. Eaa ta tatou i apii mai mei te akaraanga o Hana?

¹⁰ Ka ‘au tatou noatu to tatou manamanata. Noatu e ka pure ngakau tae tatou e ka aere putuputu ki te uipaanga, ka vai rai te manamanata. Inara mei te akaraanga o Hana, kua kite mai tatou ka tamaru a Iehova i to tatou ngakau mirimiri ngata. Kare rava a Iehova e akaruke ia tatou, e kare e roa atu ka tutaki aia ia tatou me kare tatou e tuku i te ‘au.—Ebe. 11:6.

11. Eaa te tumu i taitaia maata ai a Paulo?

¹¹ Maata te tumu i tumatetenga ai a Paulo. Ei akaraanga, no tona inangaro i  tona au taeake e te au tuaine, kua taitaia maata aia no ratou. (2 Kori. 2:4; 11:28) Iaia e rave ra i tana angaanga, kua pāpāia a Paulo kua tiriaia ki roto i te are auri e te aronga patoi iaia. Kua akakoromaki katoa aia i te au turanga ngata tei akataitaia iaia, e kua “tika iaku te akaaka.” (Phili. 4:12) E toru taime kua kite ana aia me iri te paî, kua taitaia maata aia iaia e teretere ra na runga i te paî. (2 Kori. 11:23-27) Eaa tei tauturu ia Paulo i tona taitaia anga?

12. Eaa tei tauturu ia Paulo kia kore e taitaia maata?

¹² Taitaia maata a Paulo i tona au taeake e te au tuaine me manamanata ratou, inara kare aia i tauta ana i te akatikatika i to ratou manamanata. E tu akaaka to Paulo. Kua pati aia i tetai ke kia tauturu i te putuputuanga. Ei akaraanga, kua pati aia i te nga taeake irinakiia mei ia Timoteo e Tito kia tauturu mai. Ta raua angaanga i rave kua tamaru mai i to Paulo taitaia.—Phili. 2:19, 20; Tito 1:1, 4, 5.

13. Akapeea te aronga pakari me aru i te akaraanga o Paulo?

¹³ E pati i tetai kia tauturu mai. Mei ia Paulo rai, e maata te aronga pakari e taitaia ana no te au taeake i roto i te putuputuanga e na roto ra i te manamanata. Inara kare e rauka i te aronga pakari i te tauturu i te katoatoa. Ka akakeu te tu akaaka i tetai tangata pakari kia tuʼa i tana apainga ki te au taeake tukatau e te tereni i te au mapu tane kia tauturu i te akono i te anana a te Atua.—2 Timo. 2:2.

14. Eaa ta Paulo kare i manata, e eaa ta tatou ka apii mai mei tona akaraanga?

¹⁴ Akakite e te anoano ra koe i te akapumaana. E tangata akaaka a Paulo, no reira kua pati tauturu aia kia akamaroiroiia mai e te au taeake. Kare aia i manata ana e ka manakoia e e tangata paruparu me akapumaanaia aia e tetai ke. I te tataanga kia Philemona, karanga a Paulo e: “E rekareka maata oki to matou e te pumaana i toou aroa.” (Phile. 7) Taiku katoa a Paulo i tetai au taeake tei akamaroiroi iaia i tona tuatau taitaia. (Kolo. 4:7-11) Me akakite tatou na roto i te tu akaaka e te anoano ra tatou i te akamaroiroi, ka rekareka to tatou au taeake e te au tuaine i te akapumaana mai ia tatou.

15. Akapeea a Paulo i te akapumaana angaia, iaia e taitaia ra?

¹⁵ E irinaki i te Tuatua a te Atua. Kua kite  a Paulo e ka akapumaana te au Tuatua Tapu iaia. (Roma 15:4) Ka rauka iaia te pakari kia akakoromaki i tona turanga. (2 Timo. 3:15, 16) Iaia i roto i te are auri i Roma no te rua o te taime, kua manako a Paulo e ka vaitata aia i te mate. Noatu tona turanga taitaia, eaa ta Paulo i rave? Kua pati atura aia ia Timoteo kia apai viviki mai i “te au buka.” (2 Timo. 4:6, 7, 9, 13) Eaa ra te tumu? No te mea e au puka Tuatua Tapu Epera te reira ta Paulo ka taangaanga no te tamou apii Pipiria. Me aru tatou i te akaraanga o Paulo i te apii putuputu i te Tuatua a te Atua, ka taangaanga a Iehova i te au Irava ei tamaru ia tatou noatu to tatou manamanata.

16. Eaa te manamanata ta Davida i akatupu kiaia?

¹⁶ Kua rave a Davida i tetai angaanga kino tei akataitaia iaia. Kua akaturi raua ko Bateseba, kua tamate i ta Bateseba tane, e kua uuna i tana angaanga kino i rave. (2 Samu. 12:9) Kare a Davida i akarongo ana ki te au akamatakiteanga a tona akava ngakau. No reira kua takino te reira i tona pirianga kia Iehova, e kua taitaia maata i te pae vaerua, pae manako e te kopapa. (Sala. 32:3, 4) Eaa tei tauturu ia Davida kia akakoromaki i tona turanga ngata, e eaa te ka tauturu ia tatou me rave tatou i te tarevake?

17. Akapeea tatou e kite ei e kua tataraara a Davida no tana i rave i roto ia Salamo 51:1-4?

¹⁷ Pure no te akakoreanga ara. Kua pure a Davida kia Iehova. Ma te ngakau tataraara, kua aaki aia i tana au ara. (E tatau ia Salamo 51:1-4.) Kua akapumaana teia iaia! (Sala. 32:1, 2, 4, 5) Me rave koe i te ara kino, auraka e uuna i te reira. Mari ra, e akakite i taau au ara kia Iehova na roto i te pure. Ka maru koe mei toou turanga taitaia. Me inangaro koe e kia meitaki akaou to korua pirianga ko Iehova, e maata atu taau ka rave i te pure.

18. Eaa ta Davida i rave i te ako angaia aia?

¹⁸ Āriki i te ako. Te tono anga a Iehova i te peroveta ko Natana kia tuatua kia Davida no tana ara, kua āriki rai a Davida i te reira. Āriki rai aia e kua apa aia ia Iehova, no te tamate i te tane a Bateseba. Kua āriki a Davida i te ako no ko mai ia Iehova, e kua akakore a Iehova i tana ara. (2 Samu. 12:10-14) Me kua rave tatou i te kino, ka anoanoia tatou kia tuatua ki te  aronga ta Iehova i iki ei tauturu ia tatou. (Iako. 5:14, 15) Auraka tatou e kimi ravenga i te patoi i te reira. Me viviki tatou i te āriki e te taangaanga i te ako tei orongaia mai, ka viviki tatou i te akatupu akaou i te ‘au e te rekareka.

19. Eaa ta tatou ka aruaru i te rave?

¹⁹ E aruaru kia kore e rave akaou i te kino. Kua kite te Ariki ko Davida e ka anoano aia i ta Iehova tauturu, kia kore aia e rave akaou i te kino. (Sala. 51:7, 10, 12) Te akakore anga a Iehova i tana ara, kua aruaru a Davida kia tangaro i te au manako viivii. No te reira, kua ‘au akaou aia.

20. Akapeea tatou me āriki i to Iehova tu akakoreanga ara?

²⁰ Āriki tatou i to Iehova tu akakoreanga ara me pure tatou no te reira, me rave i tana akoanga, e te aruaru eiaa e rave akaou i te kino. Me rave tatou i teia takainga, ka tupu akaou te ‘au. Kua kite a James i te tika o teia, tetai taeake tei rave ana i te kino. Karanga aia: “I toku tuatua anga ki te aronga pakari no taku kino i rave, kua maru mai toku turanga. Kua ‘au akaou au.” Mea pumaana i te kite e “te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia”!—Sala. 34:18.

21. Akapeea tatou me ariu kia Iehova kia tamaru ia tatou?

²¹ I te openga e vaitata maira, ka maata ua atu te taitaia. Me rokoia koe e te au manako mirimiri ngata, e pati i ta Iehova tauturu. Apii putuputu i te Pipiria. Apii mei te akaraanga o Hana, Paulo, e Davida. E pati i toou Metua i te rangi kia tauturu ia koe kia kite i te tumu i tupu ei te taitaia. (Sala. 139:23) E uri i toou taitaia kiaia, te mea tikai kare e rauka ia koe i te akakoromaki. Me pera koe, ka aite koe mei te tata taramo tei imene kia Iehova: “I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.”—Sala. 94:19.