1. Καλά πράγματα μπορεί τι ανέν αμένγκε ανησυχία, ντα σο μπορεί τι πακιάς;

ΝΙΩΣΑΛΕΝ ποτές ότι τασαβέλα-τουμέν η ανησυχία; * Μπορεί οντουβά σο βακερντέ ή κερντέ ο γιαβερά τι ντουκχαντάς τουμαρό γκι. Ή μπορεί τι τσσουβένα τουμαρέ γκίστε εκχέ πραγμάσκε σο βακερντέν ή κερντέν τουμέν. Για παράδειγμας, μπορεί τι κερντέν εκ λάθος ντα νταρένα ότι ο Ιεχωβά ποτές να κα συγχωρίνελ-τουμέν. Εκτός ανταλέσταρ, μπορεί τι πακιάνα ότι τουμαρί μπαρί ανησυχία σικαβέλα ότι να τθερένα μπουτ πίστη ντα ότι να ισινέν λατσσέ τζενέ. Αλλά ισί μπαγιά ανταβά;

2. Καλά παραδείγματα κατά Γραφή ντένα-αμέν τι αγαβάς ότι άμα ανησυχίνασα ανταβά να σικαβέλα ότι να τθεράσα πίστη;

² Ανέν τουμαρέ γκοντιάτε χάνικ παραδείγματα κατά Γραφή. Η Άννα, σο αβιλί ι Σαμουηλίσκι ντάι, ισινέ μπουτ πιστή τζουβέλ. Αλλά χάλας-λα η ανησυχία κάνα εκ τζενί λάκε κχερέσταρ πρασάλας-λα μπουτ. (1 Σαμ. 1:7) Ο απόστολος Παύλος τθερέλας ζουρανί πίστη, αλλά τασαβέλας-λες «η ανησυχία σαρέ ι κχανγκιρίνγκε». (2 Κορ. 11:​28) Ο βασιλιάς Δαβίδ τθερέλας αζόμ ζουρανί πίστη ντα οτθάρ ο Ιεχωβά μανγκλάς-λες μπουτ. (Πράξ. 13:​22) Όμως, κερντάς λάθη ντα οντουλέσκε τθερέλας μπουτ μπαρί ανησυχία. (Ψαλμ. 38:4) Ο Ιεχωβά λοκχιαρντάς ντα γαλιντάς ο γκι ανταλέ τρινέ τζενένγκο. Κα ντικχάς σο σικλιάσα λένταρ.

3. Σαρ μπορεί τι ανέν αμένγκε ανησυχία ο λάφια ι γιαβερένγκε;

³ Κάνα ο γιαβερά κερένα αμέντζαρ λάφι μπέτι τροπόσαρ ή να σικαβένα αμένγκε λατσσιπέ, μπορεί τι τσσουβάσα αμαρέ γκίστε. Ανταβά αβέλα-πες πιο μπουτ κάνα οντουβά σο ντουκχαβέλα αμαρό γκι ισί εκ λατσσό αμάλ ή εκ αμαρέ τζενένταρ. Μπορεί τι νταράσα ότι τσσιναντάμ τι αβάς αμαλά. Ισί φαρ σο ανταβά τζενό κερέλα λάφι χωρίς τι σκεφτίνελ, ντα αμένγκε ισί σαρ τι ντελ-αμέν τσσουριάσαρ! (Παρ. 12:​18) Ή εκ γιαβέρ τζενό μπορεί τι μανγκέλ τι ντουκχαβέλ-αμέν πι λαφίντζαρ. Ανταβά αβιλό-πες εκχέ πφενιάκε. Βόι βακερέλα: «Πριν χάνικ μπρεσά, εκ τζενί σο πακιάβας ότι ισινέ λατσσί αμαλίν βακερντάς ψέματα μάνγκε κο Ίντερνετ. Ανταβά αντάς μάνγκε ντουκχ ντα τσσουντόμ μι γκίστε. Ναστί αγαβάβας σόσκε εκ αμαλίν σο ντάβας λάκε μπέσα κερντάς-λες ανταβά». Άμα ντουκχαντάς τουμαρό γκι εκ λατσσό αμάλ ή εκ τουμαρέ τζενένταρ, τθερένα τι σικλιόν μπουτ κατά Άννα.

4. Καλά μπαρέ προβλήματα τθερέλας τι νακχέλ η Άννα;

⁴ Η Άννα τθερέλας τι νακχέλ μπαρέ προβλήματα. Για μπουτ μπρεσά, ναστί κερέλας τσσαβέν. (1 Σαμ. 1:2) Μπουτ Ισραηλίτες πακιάνας ότι εκ τζουβέλ σο ναστί κερέλας τσσαβέν τθερέλας οπρά-πέστε αρμάν. Ανταβά ισινέ μπαρί λατζ. (Γέν. 30:1, 2) Εκτός ανταλέσταρ, λάκο ρομ τθερέλας γιαβερέ-ντα ρομνιά, ι Φενιννά, σο κερντάας λέσκε τσσαβέν. Η Φενίννα ζηλίνελας ι Αννά ντα “πρασάλας-λα μπουτ για τι στεναχωρίνελ-λα”. (1 Σαμ. 1:6) Κι αρχή, η Άννα ναστί νταϊντίνελας ανταλά δυσκολίες. Στεναχωρίντιβελας αζόμ μπουτ σο “ροβέλας ντα να χάλας”. Τθερέλας «μπαρό κερκιπέ αντρέ πι γκίστε». (1 Σαμ. 1:7, 10) Σαρ λοκχιλό λάκο γκι;

5. Σαρ βοηθιντάς ι Αννά η προσευχή;

⁵ Η Άννα πουταρντάς πο γκι κο Ιεχωβά αντράλ κατά προσευχή. Σοράν, βακερντάς κο αρχιερέας Ηλεί οντουλά σο νακχέλας. Βοβ βακερντάς λάκε: «Τζα λατσσιμάσαρ, ντα ο Ντεβέλ σο πακιάλα ο Ισραήλ τι ντελ-τουτ οντουβά σο μανγκλάν λέσταρ». Σο αβιλό-πες; Η Άννα «νασλί . . . ντα χαλάς, ντα λάκο μούι να ντικχίντιβελας στεναχωριμέ». (1 Σαμ. 1:​17, 18) Η προσευχή βοηθιντάς-λα τι αρακχέλ πάλι πι ειρήνη.

6. Σο σικλιάσα ι προσευχιάκε κατά Άννα ντα κατά εδάφια Φιλιππησίους 4:6, 7;

⁶ Κα αρακχάς πάλι αμαρί ειρήνη άμα να  τσσιναβάσα τι προσευχίντιβας. Η Άννα ντινάς μπουτ πι σαατίσταρ για τι κερέλ λάφι πι Νταντέσαρ, ι Ιεχωβάσαρ. (1 Σαμ. 1:​12) Αμέν-ντα μπορίνασα τι κεράς λάφι ι Ιεχωβάσαρ μπουτ σαάτι ντα τι βακεράς λέσκε σο ανησυχίνελα-αμέν, σο νταραβέλα-αμέν ντα κάι ισινάμ μπίζουρανε. Νανέ ανάγκη αμαρέ προσευχές τι αβέν τέλειες ή τι πφεράς-λεν σουκάρ λαφίντζαρ. Καζόμ βακεράσα κο Ιεχωβά σο κερκιαρέλα αμαρό γκι μπορεί ατζέ-ντα τι λελ-αμέν ροϊπέ. Αλλά ο Ιεχωβά ποτές να κα κχινιόλ σο ασουνέλα-αμέν. Δεν πρέπει τι προσευχίντιβας σάντε αμαρέ προβληματένγκε. Πρέπει τι ντας-αμέν γκοντί ο λάφια σο ισί κο εδάφια Φιλιππησίους 4:6, 7. (Διαβάνεν) Ο Παύλος βακερντάς ότι αντράλ κατά προσευχή πρέπει τι βακεράς ευχαριστώ κο Ντεβέλ ντα τι σικαβάς λέσκε εκτίμηση. Ο πράγματα σο τσσίντενα-αμέν τι βακεράς ευχαριστώ κο Ιεχωβά ισί αζόμ μπουτ σο ναστί γκιντιόνα. Χάνικ ανταλένταρ ισί ο δώρος ι ζωγιάκο, ο πράγματα σο λατσσαρντάς, λέσκι αφοσιωμέ αγάπη ντα ο σουκάρ πράγματα σο μπεκλεντίνασα τι αβέν. Σο γιαβέρ σικλιάσα κατά Άννα;

7. Σο κερέλας μπουτ φαρ η Άννα ντα λάκο ρομ;

⁷ Παρόλο σο τθερέλας ανταλά προβλήματα, η Άννα τζάλας μπουτ φαρ πι ρομέσαρ κι Σηλώ, κο τθαν σο ντένας λατρεία ι Ιεχωβάς. (1 Σαμ. 1:​1-5) Ισινέ κι σκηνή της μαρτυρίας αζομάν σο ο αρχιερέας Ηλεί ντινάς-λα ζορ κάνα βακερντάς λάκε ότι πακιάλας ότι ο Ιεχωβά κα απαντίνελας λάκε προσευχιάτε.​—1 Σαμ. 1:9, 17.

8. Σαρ βοηθίνενα-αμέν ο συναθροίσεις; Εξηγίνεν.

⁸ Κα αρακχάς πάλι αμαρί ειρήνη άμα να κα τσσιναβάς τι τζας κο συναθροίσεις. Κι προσευχή σο κεράσα για τι πουτράς ι συνάθροιση μπουτ φαρ μανγκάσα κατά Ντεβέλ τι ντελ-αμέν πο πνεύμας. Η ειρήνη ισί αντρέ κο καρπός ανταλέ πνευμάσκο. (Γαλ. 5:​22) Άμα τζάσα κο συναθροίσεις ατζέ-ντα κάνα τθεράσα μπαρέ ανησυχίες, μουκχάσα ι Ιεχωβάς ντα αμαρέ πφραλέν τι ντεν-αμέν ζορ ντα τι βοηθίνεν-αμέν τι αρακχάς πάλι ειρήνη αμαρέ γκοντιάτε ντα αμαρέ γκίστε. Η προσευχή ντα ο συναθροίσεις ισί μπουτ σημαντικά πράγματα σο ντέλα-αμέν ο Ιεχωβά για τι “γαλίνελ αμαρό γκι”. (Εβρ. 10:​24, 25) Ντικχέν σο γιαβέρ σικλιάσα κατά Άννα.

9. Σο να αλλαξάλο κι Αννάκι ζωή, αλλά σο αλλαξάλο;

⁹ Ο προβλήματα ι Αννάκε να νασλέ οντιά στιγμή. Κάνα βουρτισάλι κατά σκηνή της μαρτυρίας, έπρεπε τι μπεσέλ πάλι κο ίδιος κχερ ι Φενιννάσαρ. Ντα η Γραφή να βακερέλα ότι η Φενίννα αλλαξάλι. Σαρ ντικχίντιβελα, η Άννα ασουντάς γιαβερά-ντα μπέτι λάφια λάταρ. Αλλά αρακχλάς πάλι ι ειρήνη σο τθερέλας αντρέ πέστε ντα ατσσικιαρντάς-λα. Ντεν-τουμέν γκοντί ότι, κάνα μουκχλάς πο πρόβλημας κι Ιεχωβάσκε βαστά, νασλό λάταρ ο πφαριπέ. Μουκχλάς ι Ιεχωβάς τι “λοκχιαρέλ ντα τι γαλίνελ λάκο γκι”. Ντα χάνικ πιο σοράν ο Ιεχωβά ντινάς κι Άννα ι ευλογία τι τθερέλ τσσαβέν!​—1 Σαμ. 1:​19, 20· 2:21.

10. Σο σικλιάσα κατά Άννα;

¹⁰ Κα αρακχάς πάλι αμαρί ειρήνη ατζέ-ντα άμα αμαρό πρόβλημας να νασέλα. Ατζέ-ντα άμα κεράσα προσευχή αντράλ αμαρέ γκίσταρ ντα να χασαράσα ο συναθροίσεις, μερικά προβλήματα να νασένα. Αλλά κατά Άννα σικλιάσα ότι τίποτα ναστί τσσιναβέλα ι Ιεχωβάς τι κοβλιαρέλ αμαρί ντουκχ. Ο Ιεχωβά να κα μπιστρέλ-αμέν ποτές, ντα άμα κα ατσσάς πιστοί, κα αβέλ ο σαάτι σο κα ευλογίνελ-αμέν.​—Εβρ. 11:6.

11. Καλά πράγματα κερένας ι Παυλός τι ανησυχίνελ;

¹¹ Μπουτ πράγματα κερένας ι Παυλός τι ανησυχίνελ. Για παράδειγμας, μανγκέλας ι  πφραλέν ντα ι πφενίν, οτθάρ λένγκε προβλήματα να νασένας λέσκε γκοντιάταρ. (2 Κορ. 2:4· 11:​28) Καζόμ κερέλας έργος, τζενέ σο τζάνας λέσαρ κόντρα μπουτ φαρ νταπλέ-λες ντα τσσουντέ-λες φυλακή. Νταϊντιντάς γιαβερά-ντα προβλήματα σο κερένας-λες τι ανησυχίνελ, σαρ ισινέ ότι “τζουβντιόλας χάνικ πραγματέντζαρ”. (Φιλιπ. 4:​12) Ντα άμα κα σκεφτίνας ότι ο καράβια σο τσσουντάας-πες καταστραφισάλεας κι ντεριάβ τριν ή πιο μπουτ φαρ, αγαβάσα καζόμ κα ανησυχίνελας κάνα ισινέ τι κερέλ ταξίδι καραβίσαρ. (2 Κορ. 11:​23-27) Σο βοηθιντάς-λες;

12. Σο κερέλας ι Παυλός τι ανησυχίνελ πιο χάνικ;

¹² Ο Παύλος ανησυχίνελας κάνα λέσκε πφραλά ντα πφενιά τθερένας προβλήματα, αλλά να προσπαθίνελας τι βοηθίνελ-λεν κορκορό. Αγαβέλας ότι ναστί κερέλας-λεν σαρέ. Μανγκέλας γιαβερένταρ-ντα τι βοηθίνεν κι κχανγκιρί. Για παράδειγμας, ντινάς μπουτ μπουτιά τζενέντε σο ισινέ μπεσαλήδες σαρ κο Τιμόθεος ντα κο Τίτος. Οντουλά σο κερένας ανταλά πφραλά σίγουρα κερένας ι Παυλός τι ανησυχίνελ πιο χάνικ.​—Φιλιπ. 2:​19, 20· Τίτο 1:1, 4, 5.

13. Σαρ κα μοιάζεν κο Παύλος ο πρεσβύτεροι;

¹³ Τι μανγκέν βοήθεια γιαβερένταρ. Σαρ ο Παύλος, αντικάς αντιβές-ντα μπουτ πρεσβύτεροι σο πφαμπόνα ι γιαβερένγκε ανησυχίνενα κάνα ο πφραλά νακχένα προβλήματα. Αλλά εκ πρεσβύτερος ναστί κερέλα-λεν σαρέ. Άμα αγαβέλα-λες ανταβά, κα μανγκέλ βοήθεια γιαβερέ μουρσένταρ ντα κα σικλιαρέλ ι τερνέ πφραλέν τι βοηθίνεν-λες κι κχανγκιρί.​—2 Τιμ. 2:2.

14. Σο να νταρέλας ο Παύλος, ντα σο σικλιάσα λέσταρ;

¹⁴ Τι αγαβέν ότι τθερένα ανάγκη τι λοκχιόλ τουμαρό γκι. Ο Παύλος ισινέ ταπεινός, οντουλέσκε μανγκέλας πι αμαλένταρ τι ντεν-λες ζορ. Να νταρέλας ότι κα ντικχίντιβελας μπίζουρανο άμα κα μουτθαβέλας ότι γιαβερά τζενέ λοκχιαρντέας-λες. Κάνα γραφιντάς κο Φιλήμονας, βακερντάς: «Λιντόμ μπουτ χαρά ντα λοκχιλό μο γκι κάνα ασουντόμ καζόμ μανγκέσα ι πφραλέν». (Φιλήμ. 7) Ο Παύλος κερντάς λάφι μπουτέ γιαβερέ τζενένγκε σο ντινέας-λες μπουτ ζορ κάνα τθερέλας προβλήματα. (Κολ. 4:​7-11) Κάνα ισινάμ ταπεινοί ντα αγαβάσα ότι χρειαζίντιβασα τι ντεν-αμέν ζορ, ο πφραλά ντα ο πφενιά κα βοηθίνεν-αμέν χαράσαρ.

15. Σαρ λοκχιλό ι Παυλόσκο γκι κάνα νακχέλας δυσκολίες;

¹⁵ Τι λεν ζορ κατά Ντεβλέσκο Λάφι. Ο  Παύλος τζανέλας ότι η Γραφή κα λοκχιαρέλας λέσκο γκι. (Ρωμ. 15:4) Οτθέ κα αρακχέλας σοφία-ντα για τι ντελ-λεν πέρα σο-ντα πρόβλημας τι νακχέλας. (2 Τιμ. 3:​15, 16) Κάνα ισινέ πφαντό δεύτερη φαρ κι Ρώμη, αγαντάς ότι λέσκο μεριπέ ερεσέλας σουγκό. Σο κερντάς οντουλέ δυσκολιέντε; Μανγκλάς κατά Τιμόθεος τι αβέλ σουγκό ντα τι ανέλ «ο ρόλοι». (2 Τιμ. 4:6, 7, 9, 13) Σόσκε; Επειδή οντουλά ρόλοι μάλλον τθερένας λάφια κατά Εβραϊκές Γραφές σο κα μπορίνελας τι διαβάνελ για τι σικλιαρέλ-πες. Άμα σαρ ο Παύλος σικλιαράσα-αμέν μπουτ φαρ κατά Ντεβλέσκο Λάφι, ο Ιεχωβά κα “γαλίνελ αμαρό γκι” αντράλ κατά Γραφή, σο-ντα προβλήματα τι νακχάσα.

16. Καλά στεναχώριες αντάς πέσκε ο Δαβίδ;

¹⁶ Ι Δαβιδίς χάνας-λες ο τύψεις. Γκιλόας με τη Βηθ-σαβεέ, κανονιντάας τι μουνταρέν λάκε ρομές ντα προσπαθίνελας τι γκεραβέλ οντουλά σο κερντάας. (2 Σαμ. 12:9) Κι αρχή, ο Δαβίδ να ασουνέλας πι συνείδηση. Ανταβά κερντάς ζιάνι κι φιλία σο τθερέλας ι Ιεχωβάσαρ, αντάς λέσκε μπαρί ντουκχ κο γκι ντα νασφαλικιαρντάς-λες. (Ψαλμ. 32:3, 4) Σο βοηθιντάς ι Δαβιδίς τι νακχαβέλ ανταγιά στεναχώρια σο αντάας πέσκε, ντα σο κα βοηθίνελ-αμέν άμα κα κεράς εκ μπαρό λάθος;

17. Σαρ αγαντίντιβελα κο εδάφια Ψαλμός 51:​1-4 ότι ο Δαβίδ μετανιωσάλο μπαγιά;

¹⁷ Μανγκέν κατά Ντεβέλ τι συγχωρίνελ-τουμέν. Τελικά ο Δαβίδ προσευχισάλο κο Ιεχωβά. Μετανιωσάλο μπαγιά ντα μουτθαντάς πο αμαρτίες. (Διαβάνεν Ψαλμός 51:​1-4) Σο μπαρό πφαριπέ νασλό οπρά-λέσταρ! (Ψαλμ. 32:1, 2, 4, 5) Άμα κερντέν εκ μπαρί αμαρτία, μα γκεραβέν-λα. Μουτθαβέν-λα ι Ιεχωβάσκε αντράλ κατά προσευχή. Αντικάς κα λοκχιόν χάνικ ντα να κα χαν-τουμέν αζόμ μπουτ ο τύψεις. Αλλά για τι αβέν πάλι αμαλά ι Ιεχωβάσαρ, να ερεσέλα σάντε η προσευχή.

18. Σο κερντάς ο Δαβίδ κάνα λιντάς διόρθωση;

¹⁸ Δεχτίνεν ι διόρθωση. Κάνα ο προφήτης Νάθαν μπουτσσάντιλο κατά Ιεχωβά κο Δαβίδ για τι βακερέλ λέσκε ότι αμαρτιντάς, ο Δαβίδ να αρακχέλας δικαιολογίες ούτε βακερντάς ότι οντουβά σο κερντάας να ισινέ μπουτ γκεραλό. Βακερντάς σουγκό ότι αμαρτιντάας, όχι σάντε κόντρα κο ρομ κι Βηθ-σαβεάκο, αλλά πιο μπουτ κόντρα κο Ιεχωβά. Ο Δαβίδ δεχτιντάς ι διόρθωση ι Ιεχωβάσκι, ντα ο Ιεχωβά συγχωριντάς-λες.  (2 Σαμ. 12:​10-14) Άμα κερντάμ εκ μπαρί αμαρτία, πρέπει τι κεράς λάφι οντουλέντζαρ σο ο Ιεχωβά τσσουντάς τι αρακχαβέν-αμέν ντα τι σικλιαρέν-αμέν. (Ιακ. 5:​14, 15) Ντα δεν πρέπει τι αρακχάς δικαιολογίες. Καζόμ πιο σουγκό κα δεχτίνας ντα κα ντας καν κι διόρθωση, καγιά-ντα τι αβέλ ανταγιά, αζόμ πιο σουγκό κα αρακχάς πάλι αμαρί ειρήνη ντα αμαρί χαρά.

19. Σο πρέπει τι αβάς αποφασισμέ τι κεράς;

¹⁹ Τι αβέν αποφασισμέ μα τι κερέν ο ίδια λάθη. Ο βασιλιάς Δαβίδ τζανέλας ότι για μα τι κερέλ πάλι ο ίδια λάθη χρειαζίντιβελας ι βοήθεια ι Ιεχωβάσκι. (Ψαλμ. 51:7, 10, 12) Οτθάρ μπερί σο ο Ιεχωβά συγχωριντάς-λες, ο Δαβίδ ισινέ αποφασισμέ μα τι τσσουβέλ μπέτι πράγματα πι γκοντιάτε. Αντικάς, αρακχλάς πάλι ι ειρήνη αντρέ πέστε.

20. Σαρ σικαβάσα ότι εκτιμίνασα ι Ιεχωβάσκι συγχώρηση;

²⁰ Σικαβάσα ότι εκτιμίνασα ι Ιεχωβάσκι συγχώρηση κάνα μανγκάσα-λα αντράλ κατά προσευχή, δεχτίνασα ι διόρθωση ντα μαράσα-αμέν μα τι κεράς πάλι ο λάθη σο κερντάμ. Κάνα κεράσα-λεν ανταλά, αρακχάσα πάλι ι ειρήνη αντρ’ αμέντε. Εκ πφραλ, ο Τζέιμς, σο κερντάς εκ μπαρί αμαρτία, αγαντάς καζόμ μπαγιά ισί ανταβά. Βοβ βακερέλα: «Κάνα μουτθαντόμ μι αμαρτία κο πρεσβύτεροι, ισινέ σαρ τι νασλό οπρά-μάνταρ εκ μπουτ μπαρό πφαριπέ. Χάνικ χάνικ αρακχάβας πάλι ι ειρήνη μι γκοντιάκι». Καζόμ ζορ λάσα σο τζανάσα ότι «ο Ιεχωβά ισί πασέ οντουλέντε σο τθερένα πφανγκό γκι [ντα] σώνελα οντουλέν σο ισί μπουτ στεναχωριμέ»!​—Ψαλμ. 34:18.

21. Σαρ μουκχάσα ι Ιεχωβάς τι γαλίνελ αμαρό γκι;

²¹ Καζόμ ερεσάσα κο τέλος κι τελευταίε ντιβεσένγκο, κα τθεράς πιο μπουτ ανησυχίες. Κάνα ο ανησυχίες τασαβένα τουμαρί γκοντί, τι μανγκέν σουγκό ι Ιεχωβάσκι βοήθεια. Μα τσσιναβέν τι σικλιαρέν-τουμέν κατά Γραφή ντα τι ρόντεν αχόρτ. Σικλιόν κατά Άννα, κατά Παύλος ντα κατά Δαβίδ. Μανγκέν τουμαρέ Νταντέσταρ, κατά Ιεχωβά, τι βοηθίνελ-τουμέν τι αγαβέν σόσκε ανησυχίνενα. (Ψαλμ. 139:​23) Μουκχέν οπρά-λέστε τουμαρέ προβλήματα, ντα ατζέ πιο μπουτ κάνα ισί μπουτ πφαρέ τουμένγκε ή κάνα ναστί κερένα τίποτα για τι νασκιαρέν-λεν. Αζομάν κα αβέν σαρ ο ψαλμωδός σο γκιλιαντάς ι Ιεχωβάσκε: «Κάνα μο ανησυχίες τασαντέ-μαν, τούι λοκχιαρντάν ντα γαλιντάν μο γκι».​—Ψαλμ. 94:19.