1. Васо амэ можэм тэ пэрэжываем и сар када дицол пар мэндэ?

САС ТУМЭНЦА кацаво чи най, кай тумэ пала варисо тэ пэрэжываете? * Ай акана исин тумэндэ кацаво андо ди? Можэт тумэ пэрэжываете пала кода, кай варико тумэнди ԥэндя варисо най кадя или андярдя пэс найдраго. Ай можэт тумэнди ԥарэс по ди, важ кода кай тумэ екжэнэ варикаса динэ дума чи тердэ варисо найдраго. Ай можэт тумэ стердэ варисави ошыбка и гиндон, кай о Иегова тумэн никала на простия. Инке, тумэнди можэт тэ здэлпэ, кай если тумэ кадя фартэ пэрэжываете, тоди тумэ на допатян лэ Дэвлэсти, и вижал, кай тумэ нисо на ашэн. Кадя када чи най?

2. Савэ примероря анда Библия сыкавэн, кала амэ пэрэжываем, када на сыкавэл, кай амэ на допатяс лэ Дэвлэсти?

² Уӷанам дэсавэ примероря анда Библия. И Анна, дэй лэ пророкости Самуилости, фартэ патялас лэ Дэвлэсти. И всаек вой пэрэжывала через кода, кай ек мануш анда лако ери найдраго ласа обжаласпэ (1 Самуила 1:7). О апостоло Павло кадяжэ фартэ патялас лэ Иеговасти, но во пистрояс пала пэстэ: «Мэ пэрэжываю пала всаворэ собрании» (2 Коринфянам 11:28). О царё Давидо кадяжэ патялас, кай о Иегова лэс фартэ любияс (Деяния 13:22). Но о Давидо терэлас ошыбки, через савэ нащи арақэлас пэсти ҭан (Псалом 38:4). О Иегова поможыяс и подритярэлас лэн. Подам дума, сости амэ лэндар можэм тэ сытювас.

3. Васо лэ найлашэ алавэндар амэнди ашэл ԥарэс?

³ Кала амэнца ӷрубо дэн дума или на стон пар мэндэ патив, амэнди можэт тэ авэл ԥарэс. Ай инке май ԥарэс, если када амаро друӷо чи варико анда родо. Амэ можэм тэ пэрэжываем, кай через када парашэлям тэ дружысарас. Можэт варико и на камля кода тэ ԥэнэн, ай пэстирэ алавэнца, ԥэнэса, шуряса шындя (Притчи 12:18). Ай дэко нарошно ԥэнэн кацавэ алава, кай амэнди тэ ашэл май ԥарэс. Кацаво сас еқа тэрня ԥэяса. Вой росԥэнэн: «Бут бэрша палпалэ ек мэрни, сар мэ гиндосаравас подружка, ля тэ пистрой пала мандэ андо интэрнэто хохаимос. Манди кадя сас ԥарэс! Мэ нащи полавас, васо вой манца кадя обжыляпэ». Если о друӷо чи о родо обжыляпэ тумэнца найдраго, тоди тумэ можэте тэ сытён, кай и Анна.

4. Васо ла Аннати сас фартэ ԥарэс?

⁴ Ла Аннати сас фартэ ԥарэс. Важ кода кай латэ бут бэрша на сас бэяцэ (1 Самуила 1:2). Кай и израильтяноря сас кадя, если кай и хулаи нинай бэяцэ, тоди вой бибахтали. Кацавэ жувляндэ андо ди сас, кай вонэ нисо на ашэн (Бытие 30:1, 2). Ай кай ла Аннако хулай сас инке ек хулаи, Феннана латэ сас бэяцэ. И важ и Феннана и Анна сас соперница и вой лати «вся и время вихалас оди, и терэлас ла тэ ровэл» (1 Самуила 1:6). Май англал ла Аннати через када сас фартэ ԥарэс. Лати сас кадя ԥарэс, кай вой вся и время «ровэлас и на халас» (1 Самуила 1:7, 10). Через со ла Аннати ашэля май вушэро?

5. Сар ла Аннати поможысардя и молитва?

⁵ И Анна анда вся оди ля тэ мангэлпэ лэ Иеговасти. Посли када вой вся росԥэндя важ пэстэ лэ само барэ рашасти лэ Илиясти. Во ԥэндя лати: «Жа Дэвлэса, и мэк о Дэл лэ Израилёско дэл тути кода, пала со ту манглян». Со ашэля ла Аннаса? Андэ Библия пистромэ, кай вой «жыля пэстирэ дромэса» и посли када «вой ля тэ хал и пэр латэ на ля тэ ровэл о муй» (1 Самуила 1:17, 18). Через кода, кай и Анна мангляпэ, лати ашэля май вушэро по ди.

6. Со амэ можэм тэ сытювас ла Аннатар, сар вой мангляпэ и кодэлэстар, со пистромэ андэ Филиппийцам 4:6, 7?

⁶ Амэндэ можэт тэ авэл спокойно по ди, если амэ ласа вся и время тэ мангаспэ. И Анна долӷо дя дума пэстирэ небеснонэ Дадэса (1 Самуила 1:12). Амэнди кадяжэ трэбуй тэ на жалуисарас и время, кай тэ росԥэнас лэ Иеговасти пала амарэ пэрэжывании,  состар амэ дарас и пала амарэ ошыбки. Во на аштярэл, кай андэ молитва амарэ алава вся и время авэна шукарнэ. Дэкала амэ ясвэнца можэм тэ росԥэнас лэ Иеговасти, васо амэнди ԥарэс по ди. Андэ кацави время о Иегова на цыёл амэн тэ ашунэл. Кала мангаспэ, амэ трэбуй най кати тэ росԥэнас лэ Дэвлэсти пала пэско ԥаримос, но инке трэбуй тэ на бистрас, со запистромэ андэ Филиппийцам 4:6, 7 * (адиносар). О Павло ԥэндя, кай амэнди фартэ трэбуй андэ молитвы тэ блаӷодарисарас лэ Иеговас. И амэндэ исин бут, васо када тэ терас. Амэ можэм тэ блаӷодарисарас лэс важ и жызня, сави во амэнди дя, важ о шукаримос, саво во создал, важ лэстири любовь и важ о лашимос, саво авэла англэ. Сости инке амэ сытювас кай и Анна?

7. Со вся и время терэнас и Анна и лако хулай?

⁷ Хоть ла Аннати сас ԥарэс, вой всаек пэстирэ хуласа вся и время ԥирэлас андо Силомо, кай тэ тэлён лэ Иеговасти (1 Самуила 1:1—5). И котэ ворта паша свынто бари катуна о само баро рашай о Илиё подритярдя ла Анна лашэ алавэнца и ԥэндя лати, кай о Иегова ашунэла латири молитва (1 Самуила 1:9, 17).

8. Сар амэнди моӷут тэ поможын и собрании?

⁸ Амэндэ авэла драго по ди, если амэ вся и время ласа тэ ԥирас пэ собрании. Кала залэлпэ кажно собрания, амэ мангаспэ лэ Иеговасти, кай тэ дэл амэнди пэско свынто духо. Ек анда кода, со терэл о свынто духо, када, кай тэ авэл мирно (Галатам 5:22). Если амэ на шас сама пэ кода, кай амэндэ бут пэрэжывании и всаек ԥирас пэ собрании, кадэлэса амэ домэкас, кай о Иегова и амарэ ԥрала и ԥэя тэ подритярэн амэн и тэ поможын амэнди, кай амэндэ тэ авэл спокойно по ди. Со май фартэ о Иегова амэн подритярэл, када, кала амэ мангаспэ и ԥирас пэ собрании (Евреям 10:24, 25). Акана подаса дума, сости амэ инке можэм тэ сытювас кай и Анна.

9. Со андэ ла Аннатири жызня ашэляпэ кадя, ай со паруделя?

⁹ О ԥаримос кай и Анна сразу на ужыля. Кала вой дя дума лэ Илиёса паша свынто бари катуна и авеля цэрэ, вой кадяжэ жувэлас андо ек цэр ла Феннанаса. И андэ Библия най пистромэ, кай и Феннана ля пэс тэ андярэл па аврятэ ла Аннаса. Файма, и Анна всаек кадяжэ и тэрпияс ла Феннанатар алава, савэнца вой пусавэлас ла. Но акана и Анна пэ када на шолас сама. Вой отдя вся андэ лэ Иеговастирэ вас и нэ пэрэжывала кадя, сар варикала. И Анна домэкля, кай о Иегова лати тэ дэл зор и тэ подритярэл. Ай кала прожыля время, о Иегова ашундя латири молитва и латэ арақаделяпэ бэято! (1 Самуила 1:19, 20; 2:21).

10. Сости амэ инке можэм тэ сытювас кай и Анна?

¹⁰ Амэндэ можэт тэ авэл спокойно по ди, дажэ, если амаро ԥаримос на ужал. Хоть амэ мангаспэ анда оди и ԥирас пэ собрании, дэсаво ԥаримос кадя и ашэлпэ. Но кода, со сас ла Аннаса, сытярэл амэн, кай дажэ андэ кацави время о Иегова амэнди дэл зор и кай тэ авэл драго по ди. О Иегова амэн никала на бистрэла и всаек блаӷословия амэн, важ кода кай на парашас лэс тэ кандас (Евреям 11:6).

11. Васо кай о Павло сас бут, пала со тэ пэрэжывает?

¹¹ Кай о Павло сас бут пала со тэ пэрэжывает. Во фартэ пэрэжывал пала ԥаримос, саво сас кай и ԥрала и ԥэя, важ кода кай во фартэ любияс кадэлэ христианонэн (2 Коринфянам 2:4; 11:28). И вороӷоря най еқварэс марэнас лэ Павлос и стонас андо баруно. Во ӷанэнас,  «со када, кала на дохутилэл» о хамос, и авэр ԥаримос (Филиппийцам 4:12). Можно кати тэ погиндосарас, со лэса сас андэ кодэя время, кала во ладэлас па моря и триварэс пэрэжудя кода, сар розмарделэсас и кораблёря (2 Коринфянам 11:23—27). Со поможыяс лэ Павлости тэ улэл и пэрэжывании анда оди?

12. Со поможыяс лэ Павлости май набут тэ пэрэжывает?

¹² О Павло пэрэжывал, кала кай и ԥрала и ԥэя сас ԥаримос, но во на терэлас вся екжэно, кай тэ улэл кадэва ԥаримос. Во полэлас, кай лэстэ на хутилэла пэ вся зор и мангэлас, кай авэр тэ поможын лэсти тэ диқэн пала собрании. Во пэрэдя лэ ԥралэнди лэ Тимофеёсти и лэ Титости, савэ на подвэдинас, бут пэстири дила. Кала кодэла ԥрала поможынас, о Павло май набут пэрэжывал (Филиппийцам 2:19, 20; Титу 1:1, 4, 5).

13. Сости и старейшыноря моӷут тэ сытён кай о Павло?

¹³ Мангэн аврэн, кай тэ поможын. Сар и о Павло, бут старейшыноря, савэ амэн любин, пэрэжывают пала ԥрала и ԥэя, савэндэ исин ԥаримос. Но и старейшыноря полэн, кай лэндэ на хутилэл зор пэ вся. Важ када вонэ домэкэн аврэн ԥралэн тэ терэн лэндири дила и сытярэн лэ май тэрнэн ԥралэн, кай тэ поможын лэнди тэ заботинпэ пала лэ Дэвлэско стадо (2 Тимофею 2:2).

14. Состар о Павло на даралас и со амэ можэм лэстар тэ сытювас?

¹⁴ Прижанэн, кай тумэн трэбуй тэ подритярэн. О Павло полэлас, кай лэсти на хутилэла зор пэ вся. Важ када во ԥэнэнас, кай лэс кадяжэ трэбуй тэ подритярэн, и лэстирэ друӷоря дэнас лэсти зор. Во на даралас, кай пэр лэстэ ԥэнэна, кай во слабо, важ кода кай лэс подритярэн и друӷоря. Андэ пэско письмо лэ Филимоности о Павло пистросардя: «Тири любовь дя манди тэ лошавав и подритярдя» (Филимону 7). Во ԥэнэнас и пала авэр ԥрала, савэнца терэлас дила, кай вонэ подритярэнас лэс, кала лэсти сас ԥарэс (Колоссянам 4:7—11). Кала амэ на гиндосарас, кай май лашэ аврэндар и полас, кай амэн трэбуй варико тэ подритярэл, тоди ԥрала и ԥэя авэна лошалэ тэ поможын амэнди.

15. Со подритярдя лэ Павлос андэ ԥари время?

¹⁵ Патян лэ Дэвлэстирэ алавэнди, савэ анда Библия. О Павло ӷанэнас, кай тэ арақэс лашэ алава, савэ подритярэн, можно кати андэ Свынто Писания (Римлянам 15:4). Кадэла алава поможынас лэсти тэ авэл  май мудро, кай тэ виритярэл любо ԥаримос (2 Тимофею 3:15, 16). Кала о Павло до дуйто бэшэлас андо баруно андо Римо, во полэлас, кай пашол лэстири смэрть. Со во тердя андэ кадэя время? Во мангля лэ Тимофеёс май йто тэ авэл лэстэ и тэ анэн и свиткоря (2 Тимофею 4:6, 7, 9, 13). Состэ? Кадэла свиткоря, файма, сас и Еврейски Писания, па савэ о Павло моӷ екжэно тэ сытёл. Если амэ, сар и о Павло, на парашас тэ сытювас па Библия, о Иегова подритярэла амэн через латэ, саво бы ԥаримос амэндэ тэ на авэл.

16. Со сас кай о Давидо по ди, кала стердя бэзэх?

¹⁶ Лэ Давидоско ди дошалярэлас лэс и сас васо. Во тердя билажавардо бэзэх ла Вирсавияса и стердя кадя, кай тэ умарэн латирэ хулас. Кадяжэ во камэлас када вся тэ угаравэл (2 Самуила 12:9). О Давидо на шолас сама пэ кода, кай лэс дошалярэл оди. И через када лэстэ римосайля и дружба лэ Иеговаса, лэсти сас кадя ԥарэс по ди, кай во дажэ занасвайля (Псалом 32:3, 4). Со поможысардя лэ Давидости тэ пэрэандярэл о ԥаримос, андэ саво во сас екжэно дошало? И со поможыя амэнди, если амэ тердям бэзэх?

17. Сар кода, со пистромэ андэ Псалом 51:1—4, сыкавэл, кай о Давидо каисайля анда вся оди?

¹⁷ Мангэнпэ, кай тэ простий. Прожыля время, и о Давидо закамля тэ мангэлпэ лэ Иеговасти. Во росԥэндя лэ Дэвлэсти пала пэстирэ ӷрехоря и анда вся оди каисайля. (Адиносар Псалом 51:1—4 *.) Посли када лэсти ашэля фартэ вушэро! (Псалом 32:1, 2, 4, 5). Если тумэ стердэ баро бэзэх, на гаравэн лэс. Мангэнпэ лэ Иеговасти, росԥэнэн лэсти пала пэско бэзэх. Посли када тумэнди авэла май вушэро и тумэн ужэ на лэла тэ дошалярэл оди. Ай сар тумэ камэн тэ рин и дружба лэ Иеговаса, тумэнди трэбуй тэ стерэн инке варисо.

18. Сар о Давидо приля и наказания?

¹⁸ Прилэн и наказания кадя, сар и трэбуй. Кала о Иегова бишалдя лэ пророкос лэ Нафанос тэ росԥэнэн лэ Давидости пала лэско бэзэх, о Давидо на ля тэ доԥэнэн, кай найдошало и кай лэстэ найбаро бэзэх. Во прижанделя,  кай тердя бэзэх най кати англа ла Вирсавияко хулай, но со май ӷлавно, во тердя бэзэх англа о Иегова. О Давидо приля и наказания и о Дэл лэс простисардя (2 Самуила 12:10—14). Если амэ тердям баро бэзэх, амэнди трэбуй тэ подас дума кодэлэнца, касти о Иегова дя тэ диқэн пала собрания (Иакова 5:14, 15). И на трэбуй тэ доԥэнэн, кай тумэ найдошалэ. Со май йто прилэна и наказания и стерэна кадя, сар ԥэнэн и старейшыноря, со май драго и май спокойно тумэндэ авэла по ди.

19. Со амэнди трэбуй тэ старысавас тэ терас?

¹⁹ Старыинпэ будэр тэ на терэн бэзэх. О царё Давидо ӷанэнас, кай упалэ тэ на терэл бэзэх, трэбуй, кай о Иегова лэсти тэ поможый (Псалом 51:7, 10, 12). Кала о Иегова простисардя лэ Давидос, во ля тэ старыийпэ тэ улэл пэстар и найлашэ гиндоря и кадэлэстар лэсти ашэля май спокойно.

20. Сар тэ сыкавас лэ Иеговасти, кай амэ лэсти блаӷодарни, важ кода кай во амэн простий?

²⁰ Трэбуй тэ мангаспэ, кай о Иегова амэн тэ простий, тэ прилас и наказания и тэ терас вся, кай будэр тэ на терас бэзэх. Кадя амэ сыкаваса лэ Иеговасти, кай блаӷодарни лэсти пала кода, кай во амэн простий. Кала амэ кадя тераса, тоди амэнди авэла драго по ди. О ԥрал, савэс ақарэн Джеймсо, и саво тердя баро бэзэх, поля када пар пэстэ. Во ԥэнэн: «Кала мэ вся росԥэндэм лэ старейшынонэнди, мандэ, ԥэнэса, бар па оди спэля. Мандэ упалэ ашэля вушэро по ди». Сар драго тэ ӷанэс, кай «о Иегова паша кодэва, ко бидаса умардо, и фэрий кодэлэс, касти ԥарэс по ди»! (Псалом 34:18).

21. Со трэбуй тэ терас, кай о Иегова амэн тэ подритярэл?

²¹ Со май пашэ о концо ла люмако, савяса правий о Сатана, со май бут амэндэ пэрэжывании. Сар кати тумэ лэн фартэ пэрэжывать, катэ жэ мангэн лэ Иеговас, кай тэ поможый. Старыинпэ май драго тэ сытён па Библия. Сытён ла Аннатар, лэ Павлостар и лэ Давидостар. Мангэн тумарэ небеснонэ Дадэс, тэ поможый тумэнди тэ полэн, васо тумэ пэрэжываете (Псалом 139:23). Домэкэн, кай о Иегова тумэн тэ подритярэл андо ԥаримос, саво тумэндэ исин, ай май фартэ кодэва ԥаримос, саво тэ улэн най па тумаро зор. Тоди тумэндэ авэла кацаво жэ андо ди, со сас кай о псалмопевцо, саво дилабэлас лэ Иеговасти: «Кала мандэ слинэ гиндоря, савэндар ԥарэс по ди, ту терэсас кадя, кай манди ашэлас май вушэро по ди» (Псалом 94:19).