1. Yaandeemmo gede assannonkeri maa ikkara dandaanno? Yaaddo mayine hendeemmo gede assitankera dandiitanno?

BUUTO yaachishannori iille egenninohe? * Wolootu coyidhinori woy assitinori xissiisinohe daafira yaadoottoha ikkara dandaanno. Hattono, ati umikki coyiˈroottori woy assoottori yaachishinoheha ikkara dandaanno. Lawishshaho, mitte soˈro loosootto daafira Yihowa horo gatona diyaannoe yite yaadoottoha ikkara dandaanno. Yaaddo waaddannoehu ammana ajjinoehuraati woy busha mancho ikkoommohuraati yite hedattoha ikkiro roore yaadattora dandaatto. Ikkina hatto yee heda garahoni?

2. Yaaddo amaddannonkehu ammana ajjinonke daafira ikkinokkita leellishshannoti Qullaawu Maxaafi giddo kulloonni lawishshuwa hiikkuriiti?

² Hanni Qullaawu Maxaafi giddo kulloonniha mito lawishsha laˈno. Masaalaanchu Saamueeli ama Haanna kaajja ammana noose manchooti. Ikkirono, ise ginase waaddinose daafira buuto yaaddino. (1 Sam. 1:7) Soqqamaasinchu Phaawuloosino, jawaata ammana noosiha ikkirono, songuwate daafira ‘yaadino.’ (2 Qor. 11:28) Moote Daawitino kaajjado ammana noosihonna Yihowa lowo geeshsha baxannosiho. (Soq. 13:22) Ikkirono, isi cubbo loosino daafira buutote yaaddo amaddinosi. (Far. 38:4) Yihowa insa mitto mittonka jawaachishinonsa. Hanni ninke insa lawishshinni maa ronseemmoro laˈno.

3. Wolootu coyidhinori yaandeemmo gede assankera dandaannohu hiittoonniiti?

³ Wolootu gara ikkinokkire coyidhunkero woy assitunkero yaandammora dandiineemmo. Xissiisiˈneemmo gede assinonkehu jaalanke woy fiixanke ikkiro isinni roore yaandammora dandiineemmo. Hakko manchi ledo noonke jaaloomi xaate baino yine yaandeemmoha ikkara dandaanno. Mito woyite mittu manchi gari garimmo laikkinni coyiˈrinori urdete gede qasankera dandaanno. (Law. 12:18) Woy mitootu affanni heedhe xissiissankera yite qaalunni qassankera dandiitanno. Mitte wedellitte rodoora togoori iillinose. Ise togo yitino: “Boodu dirira albaanni mitte dancha jaalaˈyaati yee hedoommati interneetete widoonni suˈmaˈya huntino. Tennera lowo geeshsha xissiisiˈroomma, hattono dadilloomma. Tini ammaneemma jaalaˈya togo xissiisannore mayira assituro diafoomma.” Aterano, jaalikki woy fiixikki xissiisannore assinoheha ikkiro Haanna lawishshinni lowore rosa dandaatto.

4. Haannara hiittoo qarri iillinose?

⁴ Haannara lowo qarri iillinose. Ise lowo diro ila hoogge keeshshitino. (1 Sam. 1:2) Israeelete budira ilaweelo mancho mannu rumantinote gede asse laˈˈanno. Tini Haanna lowo geeshsha saalsiissinose. (Kal. 30:1, 2) Haanna roore yaaddanno gede assinori, minaannisera ooso iltinoti Finaana yinanniti wole galte heeˈrate. Haanna ginase Finaana ‘qussitanni caacceessitinose.’ (1 Sam. 1:6) Umi qara Haannara iillinoseri lowo geeshsha dadillisinose. Konni daafira ‘ise wiˈlitanni ita hooggino.’ Hattono, lowo geeshsha ‘caaccaabbino.’ (1 Sam. 1:7, 10) Ikkina, Haanna shesho afidhinohu hiittoonniiti?

5. Huuccatto Haanna kaaˈlitinosehu hiittoonniiti?

⁵ Haanna giddoseta huuccattotenni Yihowara hasaaphitino. Ise huuccatto assidhuhu gedensaanni iillinosere Kakkalaanote Biilira Eelira kuˈlitino. Hakkiinni Eeli “Israeelete Magani huucciˈroottare oohena, keerunni haˈri” yiinose. Tini kaaˈlitinoseri nooyya? Ee, Haanna “hakkiinni kaˈe hadhe sagaleno ittu. Hakkunni gedensaanni albisera dadillu dileellino.” (1 Sam. 1:17, 18) Huuccatto Haanna wirro keere afidhanno gede kaaˈlitinose.

6. Haanna lawishshinninna Filiphisiyusi Sokka 4:6, 7 noo hedonni huuccattote daafira maa ronseemmo?

 ⁶ Jaante huucciˈnummoro wirro keere afiˈra dandiineemmo. Haanna seeda huuccatto assidhino. (1 Sam. 1:12) Ninkeno, lowo yanna gaaˈmine yaaddonke, waajjishinonkerenna laanfenke Yihowara hasaapha dandiineemmo. Huucciˈneemmo woyite doorantino qaalla horoonsiˈra hoongammora dandiineemmo. Qoleno, huucciˈneemmo woyite heqqifantanni aaraambe coyiˈneemmo yanna heedhara dandiitanno. Ikkirono, Yihowa daafuroommo yee huuccattonke macciishsha digiwanno. Qarrinke daafira huucciˈneemmoha ikkirono Filiphisiyusi Sokka 4:6, 7 noo amaaleno qaaga hasiissannonke. (Qummeeshsha nabbawi.) Phaawuloosi huuccattotenni Magano galaxxa hasiissannonketa coyiˈrino. Yihowa galaxxineemmo gede assannonkehu batinyu coyi no. Lawishshaho, heeshsho uyinonkehura, kalaqinori daafira, hattono, geedote baxillisiranna dhagge ikkitanno hexxo uyinonke daafira iso galaxxa hasiissannonke. Haanna lawishshinni wolere maa ronseemmo?

7. Haannanna minaannise duucha woyite maa assitanno?

⁷ Haannara qarrise hooˈlinokkiha ikkirono, minaannise ledo ganyite Yihowa magansiˈnanniwa Seelo haˈra diagurtino. (1 Sam. 1:1-5) Kakkalaanote Biili Eeli Haanna ‘huucciˈroottare Yihowa oohe’ yee jawaachishinosehu xaadooshshu dunkaana martinowaati.—1 Sam. 1:9, 17.

8. Gambooshshuwa kaaˈlitannonkehu hiittoonniiti? Xawisi?

⁸ Ganyine songote gambooshshe haaˈneemmoha ikkiro, wirro keere afiˈra dandiineemmo. Duucha woyite gambooshshu hanafora Maganu ayyaani ledonke ikkanno gede huucciˈneemmo. Keeru qole hakko ayyaani gumi wodooti. (Gal. 5:22) Yaande heeˈne nafa gambooshshe haaˈneemmoha ikkiro, Yihowanna roduuwinke jawaachishshannonke; hattono wirro giddoyidi keere afiˈneemmo gede kaaˈlitannonke. Yihowa jawaachishannonke doogga giddo qara huuccattotenna gambooshshuwate. (Ibi. 10:24, 25) Hanni xa Haanna lawishshinni ronseemmoha wole roso laˈno.

9. Haanna yaachishannori dihoˈlino yineemmohu mayiraati? Ikkirono, ise kaaˈlinoseri maati?

⁹ Haanna yaachishannori hakkawotenni dihoˈlino. Ise xaadooshshu dunkaaniwa Yihowa magansidhe minisera higguhu gedensaannino ginase Finaana ledo heedhino. Qullaawu Maxaafi Finaana akati soorraminota dikulanno. Hakko daafira Haanna ginase qussitannase cincite heedhinoha ikkara dandaanno. Ikkirono, Haanna wirro giddoyidi keere afidhe heedhino. Ise qarrase baala Yihowara kuˈlituhu gedensaanni wirro diyaaddino. Haanna Yihowa sheshifachishannosenna jawaachishannose gede assidhino. Qoleno, boode yanna gedensaanni Yihowa isera ila oye maassiˈrinose!—1 Sam. 1:19, 20; 2:21.

10. Haanna lawishshinni maa ronseemmo?

¹⁰ Yaachishannonkeri hoˈla hoogiro nafa wirro keere afiˈra dandiineemmo. Jaante huucciˈneemmohanna ganyine gambooshshe haˈneemmoha ikkiro nafa mitu qarri aaninkenni hoˈla hoogara dandaanno. Ikkirono, Haanna lawishshinni, Yihowa dadillino wodananke sheshifachishannokkinna jawaachishannokki gede assasira dandaannori nookkita ronseemmo. Yihowa horonta dihawannonke; isi hexxo mudha hoongummoro, bayichonko woy gale hose ammanamankera maassiˈrannonke.—Ibi. 11:6.

11. Phaawuloosira iillinosihu yaachishannosi coyi maati?

¹¹ Phaawuloosi yaadanno gede assannori lowori no. Lawishshaho, isi baxannori ammanate roduuwisira qarru iillinonsa daafira buuto yaadino. (2 Qor. 2:4; 11:28) Phaawuloosi sabbakannota gibbannori duucha higge gantinosi, hattono usuru minira eessitinosi. Lawishshaho, isi ‘hoongenna’ wole yaachishanno coye cince heeˈra hasiissinosi. (Fil. 4:12) Hatte taaenkura ajayi ajeenna sase higge haˈranni noo markaawe hiqqaqqantino; tini isi lowo geeshsha yaadanno gede assitinositi dihuluullissannote. (2 Qor. 11:23-27) Phaawuloosi iillinosi qarra dandee heeˈranno gede kaaˈlinosiri maati?

12. Phaawuloosi duhi shaalanno gede kaaˈlinosiri maati?

¹² Phaawuloosi ammanate roduuwisira qarru iillinonsa daafira yaadinoha ikkirono, iillinonsa qarra baala isi callu tirate diwoˈnaalino. Phaawuloosi dhukasi afinoho. Isi songo towaata wolootu kaaˈlitannosi gede assino. Lawishshaho, isi ammanantino roduuwira Ximootewoosiranna Tiitora lowo looso uyino. Kuri roduuwi Phaawuloosira duhasi shaashshitinoti dihuluullissannote.—Fil. 2:19, 20; Tit. 1:1, 4, 5.

13. Cimeeyye Phaawuloosi lawishsha harunsa dandiitannohu hiittoonniiti?

¹³ Woloota kaaˈleˈˈe yiiyye. Xaa yannarano Phaawuloosi gede shaqqadda songote cimeeyye roduuwaho qarru iillanno woyite yaaddanno. Ikkirono mittu cimeessi callaho songo woˈma kaaˈla duha ikkitasira dandiitanno. Hakko daafira, dhukasi afino cimeessi ikkadda ikkitino roduuwa kaaˈleˈˈe yaanno; hattono Yihowa hoshsha towaata kaaˈlitanno gede wedella roduuwa qajeelsanno.—2 Xim. 2:2.

14. Phaawuloosi mayyee diyaadino? Ninke isi lawishshinni maa ronseemmo?

¹⁴ Sheshifachishannohu hasiisannoˈneta ammanne. Phaawuloosi umosi heeshshi assannoha ikkino daafira, jaallasiwiinni shesho afiˈra hasiissannosita afino. Isi wolootu jawaachishshinosi daafira mannu laafaho yaannoe yee horo diyaadino. Hatteentenni, isi Filimoonira borreessino sokkara “baxillikki lowo hagiirrenna jawaante uyinoe” yiino. (Film. 7) Phaawuloosi qarru iillisi woyite baasa jawaachishshinosire wole ledosi soqqantinoreno kulino. (Qol. 4:7-11) Ninkeno, umonke heeshshi assine jawaante hasiissannonketa ammannummoro, roduuwinke hagiirrunni kaaˈlitannonke.

15. Phaawuloosi qarru iille noosi yannara jawaante afiˈrinohu hiittoonniiti?

 ¹⁵ Maganu Qaale addaxxe. Phaawuloosi Qullaawa Borro jawaachishshannosita afino. (Rom. 15:4) Isi Qullaawa Borronni iillannosi fonqolo cince saˈˈate kaaˈlitannosi hayyo afiˈrino. (2 Xim. 3:15, 16) Phaawuloosi layinkimeeshsho Roomaho usurame noo yannara mulenni reyannoha lawinosi. Ikkina Phaawuloosi hattee qarru yannara maa assiyya? Isi Ximootewoosi Qullaawa Borro “xaaxo” haaˈre rahe isiwa maranno gede kulinosi. (2 Xim. 4:6, 7, 9, 13) Mayira? Tini xaaxo Phaawuloosi hojju xiinxallo assiˈrate horoonsiˈrannota Ibiraawootu Afiita Qullaawa Borro gafa ikkitukkinni digattino. Ninkeno, Phaawuloosi gede Maganu Qaale ganyine xiinxallineemmoha ikkiro, aye geeshshi fonqoli iillinkerono, Yihowa Qullaawa Borro widoonni jawaachishannonke.

16. Daawiti isiniitira yaaddo abbiˈrinohu hiittoonniiti?

¹⁶ Moote Daawiti shota ikkinokki cubbo loosino daafira tiiˈˈisi bushiishinosi. Isi Bersaabehi ledo foorino; hakkiinni minaannase shiishiishe loosino cubbo maaxate woˈnaalino. (2 Sam. 12:9) Umi qara Daawiti tiiˈˈisi yaannosire lashshi assino. Tini ayyaanaamittesi calla ikkikkinni mannimmasinna surresino gawajjitino. (Far. 32:3, 4) Daawitira loosino cubbi abbinosi yaaddo cince saˈˈanno gede kaaˈlinosiri maati? Ninkeno lowo soˈro loonsummoro mayi kaaˈlannonke?

17. Faarso 51:1-4 noo hedo Daawiti giddosinni maaro einota leellishshannohu hiittoonniiti?

¹⁷ Maaro afiˈrate huuccidhe. Gedensaanni Daawiti Yihowa huucciˈrino. Isi loosino cubbo kule giddosinni maaro eino. (Faarso 51:1-4 nabbawi.) Tini lowo geeshsha fooliishshiishshinosi! (Far. 32:1, 2, 4, 5) Kiˈneno, shota ikkinokki cubbo loossiniro, maaxate woˈnaaltinoonte. Hatteentenni cubboˈne huuccattotenni Yihowara kulle. Hatto assitiniro, tiiˈˈiˈne bushiishanni abbino yaaddonni gaˈlabbo afidhinanni. Ikkirono, Yihowa ledo nooˈne jaalooma bashshowa qolate huuccattotenni sainore assa hasiissannoˈne.

18. Daawiti seejjinisi yannara maa assino?

¹⁸ Seejjo adhe. Yihowa masaalaanchu Naataani, Daawitira cubbosi kulanno gede soyi  woyite Daawiti dimoromino woy cubbosi ajishate diwoˈnaalino. Isi Bersaabehi minaanna calla ikkikkinni baalunkunni roore Yihowa baddalinota ammanino. Daawiti Yihowa uyinosi seejjo adhino; Yihowano maarinosi. (2 Sam. 12:10-14) Ninkeno, shota ikkinokki cubbo loonsummoro Yihowa towaattankera shoomino cimeeyyera kula hasiissannonke. (Yai. 5:14, 15) Qoleno, moroma dihasiissannonke. Uyinanninke seejjo ikkitutano ikkituro, adhine bayichonko loosunni leellinshummoro, mulenni wirro keerenna hagiirre afiˈneemmo.

19. Maa assate murciˈra hasiissannonke?

¹⁹ Mitte hinge loonsoommo soˈro lende loonseemmokki gede qoropha hasiissannonke. Moote Daawiti loosino soˈro wirro loosannokki gede Yihowa kaaˈlo hasiissannosita afino. (Far. 51:7, 10, 12) Daawiti Yihowa maarisihu gedensaanni busha hedo hooˈlate murciˈrino. Hakko daafira isi wirro giddoyidi keere afiˈrino.

20. Maarosira Yihowa galanteemmota leellisha dandiineemmohu hiittoonni?

²⁰ Maaro afiˈrate huucciˈneemmohanna seejjo adhineemmoha, hattono loonsoommo soˈro lende loonseemmokki gede sharrammeemmoha ikkiro maarosira Yihowa galanteemmota leellisha dandiineemmo. Hatto assinummoro, wirro giddoyidi keere afiˈneemmo. Shota ikkinokki cubbo loosinohu Jeemsi yinanni rodii tini halaale ikkitinota huwatino. Isi togo yiino: “Cubboˈya cimeeyyete kuˈlummota duhu aaniˈyanni hoˈlinoe. Qoleno, wirro surrete keere afiˈroommo.” Yihowa “dadillunni hiiqqantinorira mule” noota hattono, “hexxo hoogginore” gatisannota afanke lowo geeshsha jawaachishshannonke.—Far. 34:18.

21. Yihowa jawaachishannonke gede maa assa hasiissannonke?

²¹ Goofimarchu yanna gambissanni hadhu kiiro yaandeemmo gede assannonke coyi lexxara dandaanno. Yaachishannori tuncu yiihero, keeshshittokkinni kaaˈlannohe gede Yihowa huucciˈri. Qullaawa Maxaafa diinaggaabbe xiinxalli. Haanna, Phaawuloosinna Daawiti lawishsha harunsi. Yaachishannohere badde afa dandaatto gede kaaˈlahera iimi Annakki huucciˈri. (Far. 139:23) Hakko iso wolqakkira aleenni ikkinori tuncu yaannohe woyite duhakki isi aana tuqqi. Hatto assittoro atino faarsaasinchu gede Yihowara “yaaddonna dadillu amadie yannara, sheshifachishshe, hagiirsiisoottoe” yite faarsatto.—Far. 94:19.