1. Ino ty mety hampiasa loha antsika, le ino ty mety ho eritseretintsika?

FA NISY fotoa va iha niasa loha * marè? Mety hiasa loha iha satria nampalahelo anao ty raha nivolanini-hafa na nataony taminao. Mety hampiasa loha anao koa ty raha nivolaninao amin’olo na nataonao taminy. Mety ho nanao hadisoa, ohatsy, iha le matahotsy hoe tsy hanenga anao mihintsy Jehovah. Lafa mihamanjeky raha zay, le mety hieritseritsy iha hoe tsy ampy finoa na olo raty kanao tratsini-zay. Fe marina va zay?

2. Ino iaby ty ohatsy amy Baiboly ao mampiseho fa tsy hoe tsy ampy finoa tsika laha miasa loha?

² Diniho moa tantara amy Baiboly ao retoa. Ampela tena nanam-pinoa Hana. Fe tamin’ie mbo tsy niteraky ani-Samoela mpaminany, le nanjary niasa loha marè satria niraty fanahy taminy ty raiky amin’olo niharo trano aminy. (1 Sam. 1:7) Nana finoa matanjaky apostoly Paoly, fe tena ‘niasa loha amy fiangona rey’ ie. (2 Kor. 11:28) Tena niteani-Jehovah Davida Mpanjaka satria nana finoa matanjaky. (Asa. 13:22) Fe ndre zay, le nisy raha nanahiran-tsay azy marè. (Sal. 38:4) Nampahery noho nanambitamby an-drozy kiraidraiky Jehovah. Ndao hodinihintsika hoe ino ty azontsika ianara amin-drozy.

3. Manino ty raha volanin’olo ro mety hahakivy antsika?

³ Mety hiasa loha tsika lafa manao safà mahery na raty fanahy amintsika ty olo. Sirtò moa laha ty namantsika na ty longontsika ro manao raha mampalahelo antsika. Mety hatahotsy tsika hoe ho simba ty fifandrambesantsika aminy. Mety hanao safà tsy voadiniky amintsika olo iny, le atao raha voatomboky sabatsy io tsika! (Ohab. 12:18) Fe misy koa manao ze hamparary fo antsika amy ty safà aboakiny. Nisy ranabavy tanora raiky niaritsy raha manahaky ani-zay. Hoy ty asany: “Tao vitsivitsy lasa zay, nisy olo nampiparitaky vandy mikasiky ahy amy Internet ao. Zaho amin’io nieritseritsy hoe nama soa ie. Nalahelo aho sady niasa loha. Tsy nampoiziko hoe namako marìny ahy iny ro nahavita ani-zay.” Laha nampalahelo anao koa ty raha nataoni-namanao na longonao marìny, le afaky mianatsy raha maro baka amy Hana iha.

4. Ino ty raha sarotsy natrehini-Hana?

⁴ Nisy raha sarotsy maromaro natrehini-Hana. Tsy nanan’anaky ie tanatini-tao maro. (1 Sam. 1:2) Kanefa olo voaozo tsy miteraky zao amy Israelita reo. Nahatiaro ho afa-baraka amy zay ie. (Gen. 30:1, 2) Vomaiky nisarotsy tamy Hana raha zay, satria nanambaly ampela hafa mana anara hoe Penina zay valiny. Nanan’anaky Penina. Fahavalo ty fandrambesani-Penina ani-Hana, ka ‘nikizakizahiny avao ie soa ho menatsy.’ (1 Sam. 1:6) Tsy nahay niatriky soa ani-raha nanahira azy io tse Hana tamy voalohany. Nalahelo biby ie ka “nitany sady tsy nahatelin-kany.” “Nijaly marè” ie tam-pony tao. (1 Sam. 1:7, 10) Akory ty nahazoani-Hana fampahereza?

5. Manino ro nanampy ani-Hana ty vavaky?

⁵ Nivavaky Hana, le naborakiny tamy Jehovah iaby ze raha tsapany. Tafarani-zay ie, niresaky ty raha mahazo azy tamy Ely Mpisorobe. Bakeo nivola taminy Ely hoe: “Soasoava! Hameani-Ndranaharini-Israely iny anao lahy ze raha nangatahinao taminy!” Ino ty vokany? ‘Nandeha tamy ty tany nombany Hana, le nihina. Nihita tamy tarehiny teny hoe tsy niasa loha sasy ie.’ (1 Sam. 1:17, 18) Nanampy ani-Hana hilamin-tsay ndraiky ty vavaky.

6. Ino ty ianarantsika mikasiky vavaky laha hentea ty raha nataoni-Hana noho ty Filipianina 4:6, 7?

⁶ Afaky hilamin-tsay tsika laha mazoto mivavaky. Nanoka fotoa lava hiresaha amy Babany an-danitsy any iny Hana. (1 Sam.  1:12) Afaky manoka fotoa lava koa tsika mba hiresaha amy Jehovah mikasiky ty raha mampiasa loha noho mampatahotsy antsika, voho ty handrantsika. Tsy voatery ho voakaly marè noho milahadahatsy soa ty vavaky ataontsika. Kindraiky aza mety tsy ho voatonontsika iaby ty raha teantsika hovolany fa misarinto noho mitany tsika. Fe ndre zay, le tsy ho vozaky mijanjy antsika mihintsy Jehovah. Azontsika resahy aminy ty raha manahira antsika. Fe tsy tokony ho halinontsika koa ty torohevitsy amy Filipianina 4:6, 7 ao. (Vakio.) Niresahini-Paoly mazava soa hoe tokony hanolotsy vavaky fisaora tsika. Maro ty antony tokony hisaorantsika ani-Jehovah. Isaorantsika, ohatsy, ie satria nanome ay antsika sady namboatsy raha soa sankarazany. Tsy mivaliky koa ie sady mampitamà raha soa ho antsika. Ino koa ty ianarantsika baka amy Hana?

7. Ino ty fahazarani-Hana morovaly?

⁷ Ndre nana raha manahira aza Hana, le nahazatsy an-drozy morovaly ty nandeha amy pilasy fivavaha amy Jehovah a Silo any. (1 Sam. 1:1-5) Nisy fotoa Hana nandeha tamy tranolay masy any, le nampahery azy Ely Mpisorobe hoe teany laha valeani-Jehovah ty vavaky nataoni-Hana.—1 Sam. 1:9, 17.

8. Manino ty fivoria ro afaky manampy antsika? Hazavao.

⁸ Afaky hilamin-tsay tsika laha mivory tsy tampaky. Matetiky vavaky amy fanombohani-fivoria rey misy fangataha fanahy masy. Anatini-vokatsini-fanahi-Ndranahary io ty fiadana na filamina. (Gal. 5:22) Laha mivory avao tsika ndre tsy milamy aza ty saintsika, le hana fahafaha hampahery antsika Jehovah noho rahalahy noho anabavy reo, sady hanampy antsika hampilamy ty saintsika noho ty fontsika. Fomba bevata ampaherezani-Jehovah antsika ty vavaky noho ty fivoria. (Heb. 10:24, 25) Mbo misy raha hafa ianarantsika baka amy Hana koa.

9. Ino ty raha tsy niova tamy fiainani-Hana, fe ino ty nataony?

⁹ Tsy niala teo noho eo ty raha nahavy ani-Hana hiasa loha. Lafa baka nanompo tamy tranolay masy any ie, le tsy maintsy niharo trano tamy Penina ndraiky. Tsy mivola koa ty Baiboly hoe niova Penina. Midika zay, fa mbo tsy maintsy niaritsy ty safà maharary nataoni-rafiny iny Hana. Fe afaky nilamin-tsay ndraiky Hana. Tiarovo fa tsy niasa loha sasy Hana lafa napetrany tan-tanani-Jehovah ty raha nanahira azy. Nengany hampahery noho hanambitamby azy Jehovah. Nitahini-Jehovah koa aza Hana tafara tatoy ka afaky niteraky!—1 Sam. 1:19, 20; 2:21.

10. Ino ty ianarantsika baka amy tantarani-Hana?

¹⁰ Afaky hilamin-tsay avao tsika ndre mbo eo ty fototsini-raha manahira iny. Ndre mivavaky marè noho mivory tsy tampaky tsika, le mety mbo tsy hiala ty raha manahira sisany. Fe nianarantsika tamy tantarani-Hana fa vitani-Jehovah avao ty manambitamby antsika. Tsy hanalino antsika mihintsy Jehovah, ka hovaleany avao ty tsy fivalihantsika ndre ho ela ndre halaky.—Heb. 11:6.

11. Ino iaby ty raha nampiasa loha ani-Paoly?

¹¹ Maro ty raha nampiasa loha ani-Paoly. Teany ty rahalahy noho anabaviny, ka sahira ty sainy lafa nandiniky ty raha nahazo an-drozy. (2 Kor. 2:4; 11:28) Voatendry ho apostoly koa Paoly, ka tsy maintsy niaritsy vango noho fampigadrà nataoni-mpanohitsy. Mety ho nampiasa loha azy koa ty raha sarotsy maro niaretany, ohatsy hoe ‘lany vatia.’ (Fil. 4:12) Fa nivaky sambo intelo koa ie tamy zay farafahakeliny, ka fa azontsika an’eritseritsy avao ty  fiasan-dohany lafa nandeha sambo. (2 Kor. 11:23-27) Ino ty nanampy ani-Paoly lafa niasa loha ie?

12. Ino ty nanampy ani-Paoly tsy hiasa loha marè?

¹² Niasa loha amy ty raha mahazo ani-rahalahy noho anabaviny reo Paoly, fe tsy nivahany ie raiky avao ty raha nanahira an-drozy. Haini-Paoly ty raha tokony ho vitany. Nangataky fanampea tamin’olo hafa ie mba hikarakara ty fiangona. Naniraky lahilahy azo atokisa manahaky an-dry Timoty noho Titosy ie. Azo antoky fa nanampy ani-Paoly tsy hiasa loha marè ty asa nataoni-rahalahy reo.—Fil. 2:19, 20; Tit. 1:1, 4, 5.

13. Akory ty hanahafani-anti-panahy ani-Paoly?

¹³ Milà fanampea amin’olo. Soa fanahy manahaky ani-Paoly ty anti-panahy maro, ka miasa loha lafa miatriky raha sarotsy ty rahalahy noho anabavy amy fiangona misy azy. Fe tsy ho vitani-anti-panahy raiky raha rey. Laha miambany ie, le hizara andraikitsy amy lahilahy hafa mahafeno fepetra, sady hampiofana rahalahy tanora hanampy azy hikarakara ty aondri-Ndranahary.—2 Tim. 2:2.

14. Ino ty tsy nampiasa loha ani-Paoly, le ino ty ianarantsika baka aminy?

¹⁴ Ekeo hoe mila fampahereza iha. Niambany Paoly ka nila fampahereza baka amy ty namany. Tsy nampanino azy ty nivola hoe nisy olo nampahery azy, ndre hahavy ty olo hieritseritsy azy ho malemy aza raha zay. Nivola ho zao ie lafa nanoratsy ho ani-Filemona: “Nanday hafalea noho fampahereza bevata ho ahy ty fitiavanao.” (Filem. 7) Nisy mpiaraky miasa tamy Paoly maromaro koa nitononiny. Tena nampahery azy tanatini-fotoa sarotsy rozy. (Kol. 4:7-11) Laha miambany tsika ka mieky hoe mila fampahereza, le ho falifaly hanoha antsika rahalahy noho anabavintsika reo.

15. Ino ty nataoni-Paoly lafa niatriky raha tena nahakivy ie?

¹⁵ Ampiasao ty Safà-Ndranahary. Haini-Paoly hoe afaky mampahery azy ty Safà-Ndranahary. (Rom. 15:4) Nanome azy fahendrea koa raha io mba hahafahany miatriky fitsapà. (2 Tim. 3:15, 16) Lafa nigadra fanindroeny ta Roma any Paoly, le nitsapany hoe fa marìny ty hahafaty azy. Ino ty nataoni-Paoly lafa niatriky ani-raha tena mahakivy zay? Nihafariny ho aminy any malaky Timoty, le nampandesiny azy “boky mihoro” rey. (2 Tim. 4:6, 7, 9, 13) Ino ty antony? Mety ho tampany amy Soratsy Hebreo nampiasani-Paoly mba hanaova fianara am-bata boky  mihoro reo. Laha mianatsy tsy tampaky ty Safà-Ndranahary manahaky ani-Paoly tsika, le hampiasa ty Soratsy Masy Jehovah mba hampahery antsika, ndre ino ndre ino ty fitsapà mahazo antsika.

16. Ino ty nitsapani-Davida lafa nanao fahotà bevata?

¹⁶ Tsy mahatseriky laha nania ani-Davida marè ty eritseritsiny. Nijangajanga tamy Batseba ie. Nanao tetiky hamonoa ani-valini-Batseba iny koa ie, sady navoniny fahotà bevata nataony iny. (2 Sam. 12:9) Tsy nidareani-Davida ndre nania azy ty feoni-fieritseretany tamy voalohany. Farany nisimba ty fifandrambesany tamy Jehovah. Nikivy biby koa ie sady narary. (Sal. 32:3, 4) Ino ty nanampy ani-Davida hiaritsy ty vokatsini-fahotany, le ino ty hanampy antsika laha nanao fahotà bevata tsika?

17. Manino ty Salamo 51:1-4 ro mampiseho fa nibebaky tamy fony vatany Davida?

¹⁷ Mangataha fanengà hadisoa. Nivavaky amy Jehovah Davida tamy farany. Tena naneny ie ka nambarany amy Jehovah ty fahotany. (Vakio Salamo 51:1-4.) Zay vo nilamy ty eritseritsiny! (Sal. 32:1, 2, 4, 5) Laha nanao fahotà bevata iha, le ka avonivony ty fahotanao fa ambarao amy Jehovah amy vavaky. Hanomboky hilamin-tsay iha amy zay satria fa tsy hanea anao sasy ty eritseritsinao. Fe laha ta hilongo soa amy Jehovah ndraiky iha, le tsy ampy ty mivavaky.

18. Akory ty nataoni-Davida lafa nanary ie?

¹⁸ Ekeo ty fananara amea anao. Nirahini-Jehovah ho amy Davida any Natana mba hivola ty fahotany. Fe tsy niaro tena Davida na nanamora ty fahotany. Avy le nieky ie hoe nanota, sady tsy tamy valini-Batseba iny avao, fa sirtò tamy Jehovah. Naneky ty fananarani-Jehovah Davida, ka nanenga ty fahotany Jehovah. (2 Sam. 12:10-14) Laha nanao fahotà bevata tsika, le mila miresaky amy azy nitendreni-Jehovah hiarakandro antsika reo. (Jak. 5:14, 15) Tsy tokony hila fomba hanamarìna ty vatantsika tsika. Laha malaky maneky ani-ze fananara amea antsika tsika, le halaky koa ty hahazoantsika fiadanan-tsay noho hafalea ndraiky.

19. Tokony ho tapa-kevitsy hanao ino tsika?

¹⁹ Miezaha ho tapa-kevitsy tsy hampimpoly ani-hadisoanao iny. Haini-Davida fa nila ty fanampeani-Jehovah ie laha tsy ta hampimpoly sasy ty fahotany. (Sal. 51:7, 10, 12)  Lafa nengani-Jehovah ty hadisoani-Davida, le tapa-kevitsy ie fa hiezaky tsy hieritseritsy raha raty sasy. Zay ro nahavy azy hilamin-tsay ndraiky.

20. Akory ty ampisehoantsika fa ankasitrahantsika ty fanengani-Jehovah hadisoa?

²⁰ Asehontsika hoe mankasitraky ty fanengani-Jehovah hadisoa tsika lafa mangataky ani-raha zay amy vavaky, maneky fananara, noho manao ze azontsika atao mba tsy hampimpoly ty hadisoantsika. Laha manao ani-reo tsika, le hilamy ndraiky ty saintsika. Naneky ani-zay James, rahalahy raiky nanao fahotà bevata. Hoy ty asany: “Lafa nambarako tamy anti-panahy ty fahotako, le atao raha nisy enta mavesatsy nalà baka an-tsoroko eo. Nanjary nilamin-tsay ndraiky aho.” Tena mampahery ty mahay hoe “anilani-ze torotoro fo Jehovah, sady manavotsy ani-ze kivy”!—Sal. 34:18.

21. Akory ty anengantsika ani-Jehovah hanambitamby antsika?

²¹ Vomaiky mihamaro ty raha mampiasa loha lafa marìny ho tampitsy andro farany toy. Laha vo misy raha mampiasa loha anao, le mangataha fanampea amy Jehovah malaky. Mazotoa mianatsy Baiboly. Tiarovo ty tantarani-Hana, Paoly noho Davida. Mangataha amy Babanao an-danitsy any iny mba hanampy anao hahay ty fototsini-raha mampiasa loha anao. (Sal. 139:23) Apetraho aminy ty entanao, sirtò lafa tsy hitanao ty hatao. Laha manao ani-zay iha, le hanahaky ani-mpanao salamo raiky iny. Nihira ie hoe: “Lafa tsy nizakako sasy ty fiasan-dohako, le nampahery noho nanambitamby ahy iha.”—Sal. 94:19.