1. O le ā e ono māfua ai ona tatou mafatia, ma e faapefea ona tatou aafia ai?

PE NA iai se taimi na matuā lofitūina ai oe i faalogona mafatia? * Atonu na māfua ona e mafatia ona o le tigā o tala po o gaoioiga na faia e isi iā te oe. Pe na e ono mafatia foʻi ona o au tala po o gaoioiga na fai i isi. O se faaaʻoaʻoga, atonu na e faia se agasala ma e popole ai ina neʻi lē faamagaloina oe e Ieova. Ae sili atu ona leaga, atonu ua e talitonu, talu ai ua lofitūina oe i mafatiaga, ua e manatu ai la e lē lava lou faatuatua, ma o oe o se tagata leaga. Ae pe e moni lenā manatu?

2. O ā faaaʻoaʻoga mai i le Tusi Paia e iloa ai o le iai o faalogona mafatia e lē uiga ai e lē lava lo tatou faatuatua?

² Seʻi o tatou iloiloina ni faaaʻoaʻoga faale-Tusi Paia. O Hana o lē na avea ma tinā o le perofeta o Samuelu, o se fafine e malosi lona faatuatua. E ui i lea, ae sa matuā mafatia ina ua agaleagaina o ia e se tasi o lona aiga. (1 Samu. 1:7) Na iai foʻi i le aposetolo o Paulo se faatuatua malosi, ae na lofitūina o ia i le “popole i faapotopotoga uma.” (2 Kori. 11:28) Na alofa tele Ieova i le tupu o Tavita ona o le malosi o lona faatuatua. (Galu. 13:22) E ui i lea, ae na faia e Tavita ni agasala ma na matuā mafatia ai o ia. (Sala. 38:4) Na faamāfanafanaina ma faatoʻafilemuina i latou uma e Ieova. Seʻi o tatou talanoa lesona e tatou te aʻoaʻoina mai i a latou faaaʻoaʻoga.

3. E faapefea i tala e fai e isi ona faapogaia ai o tatou lagona mafatia?

³ E tatou te ono lagona le mafatia pe a soona lafo mai e isi ni tala, pe e faia ni gaoioiga lē agalelei. E moni lenā manatu aemaise lava pe afai o le tagata na faatigā mai o sa tatou uō vavalalata, po o se tauaiga foʻi. E tatou te ono popole ina neʻi faaleagaina la tatou faiā ma lenā tagata. O isi taimi, o le tagata e faatigā iā i tatou e ono faia ni tala lē mafaufau, ma e pei ai ua tutuʻi i tatou i se pelu! (Faata. 12:18) E faaaogā foʻi ma le iloa e se tasi faamatalaga e pei o se auupega e faatigā ai. Na feagai se tuafafine talavou ma lenei luʻi. Na ia faapea mai, “I ni nai tausaga ua mavae, na faasalalau ai e se tasi na ou manatu o saʻu uō lelei ni tala pepelo e faatatau iā te aʻu i luga o le initaneti. Na ou lagona le tigā ma le mafatia. Na matuā ou lē malamalama lava pe aiseā ua ia tutuʻi ai aʻu faapea.” Pe afai na faatigā atu se uō vavalalata po o se tauaiga, e mafai ona e aʻoaʻoina mai ni lesona i le faaaʻoaʻoga a Hana.

4. O ā faafitauli faigatā na feagai ma Hana?

⁴ Na feagai Hana ma ni faafitauli faigatā. Mo le tele o tausaga, e leʻi mafai ona fanau o ia. (1 Samu. 1:2) O le aganuu i Isaraelu, e manatu tagata o se fafine e lē fanau, ua faamalaiaina. O lenei tulaga na lagona ai e Hana le māsiasi. (Kene. 30:1, 2) Ae na sili atu ona leaga mo Hana, ona o Penina le isi avā a lana tane na iai lana fanau. Na lotoleaga foʻi Penina iā Hana, ma na ia “matuā faatigā atu lava iā te ia . . . ina ia atuatuvale ai o ia.” (1 Samu. 1:6) I le amataga, e leʻi mafai ona onosaia e Hana nei faafitauli faigatā. Na ʻtagi o ia ma lē ʻai’ ona o lona lē fiafia tele. Na “matuā tigā lona loto.” (1 Samu. 1:7, 10) Na faapefea ona maua e Hana faamāfanafanaga?

5. Na faapefea ona fesoasoani le tatalo iā Hana?

⁵ Na sasaa atu e Hana ona faalogona iā Ieova i le tatalo. Ina ua uma lana tatalo, na ia faamatala atu ona mafatiaga iā Eli le Ositaulaga Sili. Ona faapea atu lea o Eli iā Hana: “Inā alu ia oe ma le manuia, tau ina ia foaʻi mai e le Atua o Isaraelu le mea na e ōle atu ai iā te ia.” O le ā le iʻuga? Na alu Hana “i lona ala ma ua ʻai o ia, ua lē toe foliga popole foʻi.” (1 Samu. 1:17, 18) Na fesoasoani le tatalo iā Hana e toe faatoʻafilemu ai ona faalogona.

6. O ā lesona e tatou te aʻoaʻoina mai i le Filipi 4:6, 7 ma Hana e faatatau i le tatalo?

⁶ E mafai ona toe faatoʻafilemuina i tatou pe  a finafinau i le tatalo. Na umi se taimi na talanoa ai Hana i lona Tamā i le lagi. (1 Samu. 1:12) E mafai foʻi ona tatou faaalu se taimi umi e talanoa ai iā Ieova e faatatau i o tatou mafatiaga, mea e tatou te fefefe ai, ma o tatou vaivaiga. E lē tau manaʻomia ona tatou mau upu i a tatou tatalo, pe ia lelei tele foʻi le auala e faaupu ai. O nisi o a tatou tatalo, atonu e tatou te faailoa atu ai iā Ieova le tigā o o tatou loto a o tatou fetagisi. E ui i lea, e lē fiu Ieova e faafofoga mai i a tatou tatalo. E lē gata e tatou te tatalo e faatatau i o tatou faafitauli, ae e manaʻomia foʻi ona tatou manatua le fautuaga o loo i le Filipi 4:6, 7. (Faitau.) Na taʻua patino e Paulo e tatau ona tatou ofo atu a tatou tatalo faafetai, po o le lototalisapaia. E anoanoaʻi māfuaaga e tatou te faafetai ai iā Ieova. O se faaaʻoaʻoga, e mafai ona tatou faafetai iā te ia mo le meaalofa o le ola, ana galuega mataʻina o le foafoaga, lona alofa faamaoni, ma le faamoemoe matagofie ua ia aumaia iā i tatou. O ā isi lesona e tatou te aʻoaʻoina mai iā Hana?

7. O le ā na faia e lē aunoa e Hana ma lana tane?

⁷ E ui i ona faafitauli, ae na auai e lē aunoa Hana ma lana tane i le nofoaga na tapuaʻi ai iā Ieova i Sailo. (1 Samu. 1:1-5) A o iai Hana i le faleʻie paia, na faalaeiauina o ia e Eli le Ositaulaga Sili i lona faapea atu, e na te faamoemoe o le a tali atu Ieova i ana tatalo.​—1 Samu. 1:9, 17.

8. E faapefea ona fesoasoani sauniga iā i tatou? Ia faamatala.

⁸ E mafai ona toe faatoʻafilemuina i tatou, pe a auai e lē aunoa i sauniga a le faapotopotoga. O tatalo amata i a tatou sauniga, e masani ona faaaofia ai se talosaga mo le agaga o le Atua e faatasi mai iā i tatou. O le filemu, o se vala o le fua o le agaga. (Kala. 5:22) Pe a tatou auai i sauniga e ui i o tatou mafatiaga, o le a fesoasoani mai Ieova ma o tatou uso ma tuafāfine e toe faatoʻafilemuina o tatou mafaufau ma loto. O tatalo ma sauniga o auala tāua ia e faatoʻafilemuina ai i tatou e Ieova. (Epe. 10:24, 25) Ia mātau se isi lesona e mafai ona tatou aʻoaʻoina mai i le mea na tupu iā Hana.

9. O le ā e leʻi suia i le tulaga o Hana, ae o ā mea na suia?

⁹ E leʻi vave ona mou ese atu faafitauli o Hana. Ina ua māeʻa le tapuaʻiga i le faleʻie paia ma ua toe foʻi Hana i le fale, na la nonofo faatasi pea ma Penina i le fale e tasi. E lē o taʻua i le Tusi Paia se suiga o uiga o Penina. O lea, na faaauau pea ona onosaʻi Hana i upu tutui a Penina. Peitaʻi, na mafai ona toe maua ma faatumauina le filemu o lona loto. Ia manatua, ina ua māeʻa ona tuu atu e Hana le mataupu iā Ieova, na lē toe lofitūina o ia i mafatiaga. Na ia faataga Ieova e faamāfanafana ma faatoʻafilemuina o ia. I se taimi mulimuli ane, na faamanuia e Ieova Hana i le mauaina o se fanau!​—1 Samu. 1:19, 20; 2:21.

10. O le ā e tatou te aʻoaʻoina mai i le faaaʻoaʻoga a Hana?

¹⁰ E mafai ona toe faatoʻafilemuina i tatou e tusa po o tatou feagai pea ma faafitauli. E ui e tatou te tatalo faatauanau ma auai e lē aunoa i sauniga, ae atonu o loo tatou aafia pea i nisi faafitauli. Ae i le faaaʻoaʻoga a Hana, ua tatou aʻoaʻoina ai e leai se mea e mafai ona taofia ai Ieova mai i le faatoʻafilemuina o o tatou loto mafatia. E lē taitai faagaloina i tatou e Ieova, ma e toeitiiti ona ia tauia lea o lo tatou faamaoni.​—Epe. 11:6.

11. O ā māfuaaga o mafatiaga o Paulo?

¹¹ E tele māfuaaga na mafatia ai Paulo. O se faaaʻoaʻoga, ona o lona alofa tele i ona uso ma tuafāfine, na matuā popole ai o ia i faafitauli na latou fesagaʻia. (2 Kori. 2:4; 11:28) A o talaʻi Paulo, na sasaina o ia ma tuuina i le falepuipui e tagata tetee. Na ia onosaia foʻi faigatā na  māfua ai ona mafatia e pei o le “lē tagolima.” (Fili. 4:12) Talu ai e faatolu na āfatia i ana folauga, seʻi manatu la i lona popole tele i taimi uma e folau ai. (2 Kori. 11:23-27) Na faapefea ona fesagaʻia e Paulo nei mafatiaga?

12. O le ā na fesoasoani e faaitiitia ai mafatiaga o Paulo?

¹² Na mafatia Paulo ina ua fesagaʻia e ona uso ma tuafāfine faafitauli, ae e na te leʻi taumafai e foʻia na o ia na faafitauli uma. Na iloa e Paulo le mea e gata ai lona mafai. O lea, na ia tāpā ai le fesoasoani a isi e tausia le faapotopotoga. O se faaaʻoaʻoga, na ia tuu atu ni tiute tauave se tele i tane maufaatuatuaina e pei o Timoteo ma Tito. O galuega na faia e nei uso e mautinoa na fesoasoani e faaitiitia ai mafatiaga o Paulo.​—Fili. 2:19, 20; Tito 1:1, 4, 5.

13. E faapefea ona faaaʻoaʻo toeaina iā Paulo?

¹³ Ia tāpā le fesoasoani a isi. I aso nei, e toʻatele toeaina agalelei e pei o Paulo, o loo mafatia foʻi ona o faafitauli o loo fesagaʻia e i latou i le faapotopotoga. Peitaʻi, e lē mafai e se toeaina e toʻatasi ona fesoasoani iā i latou uma. O le iloa e se toeaina o le mea e gata ai lona mafai, o le a uunaʻia ai o ia e faasoa atu tiute tauave i isi tane agavaa, ma toleni uso talavou e fesoasoani iā te ia e tausia le lafu mamoe a le Atua.​—2 Timo. 2:2.

14. O le ā e leʻi popole i ai Paulo, ma o le ā e tatou te aʻoaʻoina mai i lana faaaʻoaʻoga?

¹⁴ Ia faailoa atu e tatou te manaʻomia faamāfanafanaga. Na lotomaulalo Paulo, o lea na ia saʻili ai, ma na ia maua faalaeiauga mai i ana uō. E manino mai, e leʻi popole o ia pe a manatu isi o ia o se tagata vaivai, ona na ia faailoa atu e na te manaʻomia faamāfanafanaga. I lana tusi iā Filemoni, na ia faapea atu: “Ua matuā tele loʻu olioli ma ua faamāfanafanaina aʻu ona o lou alofa.” (File. 7) Na taʻua foʻi e Paulo isi na latou galulue faatasi, o ni ē na faalaeiau iā te ia i taimi o faigatā. (Kolo. 4:7-11) Pe a tatou lotomaulalo e faailoa atu e tatou te manaʻomia faalaeiauga, o le a fiafia o tatou uso ma tuafāfine e fesoasoani mai.

15. Na faapefea ona maua e Paulo faamāfanafanaga ina ua ia fesagaʻia faigatā?

¹⁵ Ia faalagolago i le Afioga a le Atua. Na iloa e Paulo e faamāfanafanaina o ia e Tusitusiga Paia. (Roma 15:4) Na ia iloa foʻi, o le a ia mauaina mai i Tusitusiga Paia le atamai e fesagaʻia ai so o se faigatā. (2 Timo. 3:15, 16) I le taimi lona lua na faafalepuipui ai Paulo i Roma, na ia lagona ai ua lata lona maliu. O le ā na faia e Paulo ina ua feagai ma lenā tulaga e faigatā tele? Na ia fai atu iā Timoteo e alu atu  vave ma “tusi tāʻai.” (2 Timo. 4:6, 7, 9, 13) Aiseā? Talu ai o na tusi tāʻai o ni vaega o Tusitusiga Paia Eperu, e faaaogā e Paulo mo ana ia lava suʻesuʻega o le Tusi Paia. Pe a tatou faaaʻoaʻo iā Paulo e ala i le suʻesuʻeina e lē aunoa o le Afioga a le Atua, o le a faaaogā e Ieova le Tusi Paia e faatoʻafilemuina ai i tatou po o ā lava faafitauli e tatou te fesagaʻia.

16. O ā mafatiaga na oo iā Tavita ona o lana agasala matuiā?

¹⁶ Na matuā ōia le lotofuatiaifo o Tavita. Na ia faia le mulilua ma Patesepa, faatonuina le fasiotia o le tane a Patesepa, ma taumafai e ufiufi ana mea sesē. (2 Samu. 12:9) I le amataga, e leʻi amanaʻia e Tavita lona lotofuatiaifo. O le iʻuga, na faaleagaina ai le la faiā ma Ieova, ma na oo ai iā te ia mafatiaga i le mafaufau ma maʻi ai. (Sala. 32:3, 4) O le ā na fesoasoani iā Tavita e fesagaʻia ai mafatiaga na oo iā te ia ona o lana agasala? O le ā e fesoasoani iā i tatou pe a tatou faia se agasala matuiā?

17. E faapefea ona tatou iloa mai i le Salamo 51:1-4 le salamō moni o Tavita?

¹⁷ Ia tatalo mo le faamagaloga. Na liliu atu Tavita iā Ieova i le tatalo. Na ia faaalia le salamō moni, ma taʻutino atu ana agasala. (Faitau le Salamo 51:1-4.) Maʻeu le toʻafilemu na ia mauaina! (Sala. 32:1, 2, 4, 5) Pe a e faia se agasala matuiā, aua e te taumafai e ufiufi le agasala. Nai lo o lea, ia taʻutino atu iā Ieova lau agasala i le tatalo. O le faia faapea, o le a oo ai iā te oe lagona toʻafilemu mai i mafatiaga ona o se lotofuatiaifo ua ōia. Ae pe a e manaʻo e toe faaleleia le lua faiā ma Ieova, e manaʻomia nisi gaoioiga nai lo le tau ina tatalo.

18. Na faapefea ona tali atu Tavita i aʻoaʻiga?

¹⁸ Ia talia aʻoaʻiga. Ina ua auina atu e Ieova le perofeta o Natano e faailoa atu iā Tavita ana agasala, e leʻi faia e Tavita ni faamolemolega. Na vave ona ia faailoa atu ua agasala i le tane a Patesepa, ae ua sili atu ona ia agasala iā Ieova. Na talia e le tupu o Tavita le aʻoaʻiga mai iā Ieova ma na faamagaloina o ia. (2 Samu. 12:10-14) Pe afai na tatou faia se agasala matuiā, e tatau ona tatou talanoa iā i latou ua tofia e Ieova e leoleoina i tatou. (Iako. 5:14, 15) Ia tatou ʻalofia le faia o faamolemolega. O le vave e tatou te talia ma faatatau ai so o se aʻoaʻiga e tatou te maua, o le vave foʻi lenā ona toe faatoʻafilemuina i tatou ma toe maua le olioli.

19. O le ā e tatau ona tatou maumauaʻi e fai?

 ¹⁹ Ia maumauaʻi e ʻalofia le toe faia o le agasala na fai. Na iloa e le tupu o Tavita, e na te manaʻomia le fesoasoani a Ieova ina ia ʻalofia ai le toe fai o agasala na ia faia. (Sala. 51:7, 10, 12) Ina ua faamagaloina o ia e Ieova, na maumauaʻi Tavita e ʻalofia mafaufauga sesē. O le iʻuga, na toe faatoʻafilemuina ai ona faalogona.

20. E faapefea ona tatou faaalia e tatou te talisapaia le faamagaloga a Ieova?

²⁰ E faaalia e tatou te talisapaia le faamagaloga a Ieova pe a tatou tatalo atu iā te ia e faamagalo i tatou, talia aʻoaʻiga, ma galue mamafa e ʻalofia le toe faia o mea sesē. Pe a tatou faia nei mea, o le a faatoʻafilemuina ai o tatou faalogona. Na moni lea manatu iā James o se uso na ia faia se agasala matuiā. Na ia faapea mai: “Ina ua ou faailoa atu i toeaina laʻu agasala, na pei ua matuu ese atu se avega mamafa. Na toe faatoʻafilemuina loʻu mafaufau.” Maʻeu le faamāfanafanaina i le iloa, “e latalata mai Ieova iā i latou o ē e loto momomo; ma e faaola e ia i latou o ē ua loto nutimomoia”!​—Sala. 34:18.

21. E faapefea ona tatou faatagaina Ieova e faatoʻafilemu i tatou?

²¹ A o lata ina faaiʻuina nei aso e gata ai, o le a faatupulaʻia o tatou faafitauli. O lea, pe a e mafatia ia vave saʻili le fesoasoani a Ieova. Ia filigā e suʻesuʻe le Tusi Paia. Ia faatatau lesona mai iā Hana, Paulo ma Tavita. Ia talosaga atu i lou Tamā i le lagi e fesoasoani atu iā te oe ia iloa le māfuaaga o ou mafatiaga. (Sala. 139:23) Ia faataga Ieova e tauave ou mafatiaga, aemaise lava mafatiaga e lē mafai ona tatou taulimaina. O lou faia faapea, o le a e pei ai o le faisalamo o lē na pese iā Ieova: “Ina ua tele popolega o loʻu loto, na e faamāfanafana ma faatoʻafilemuina aʻu.”​—Sala. 94:19, NWT.