1. San kan gi wi broko-ede èn fa dati kan meki wi firi?

OITI wan sani gi yu furu broko-ede? * Kande yu e broko yu ede fu di wan sma taki noso du wan sani di hati yu. Noso kande yu taki noso du wan sani di e gi yu broko-ede. Fu eksempre, kande yu meki wan fowtu èn yu e aksi yusrefi efu Yehovah o gi yu pardon. Kande yu e denki srefi taki na fu di yu bribi swaki, meki yu e broko yu ede. Kande yu abi a firi leki yu a no wan bun sma. Ma a sani dati tru?

2. Sortu eksempre na ini Bijbel e sori taki te wi abi broko-ede, dan dati no wani taki dati wi bribi swaki?

² Luku wan tu eksempre na ini Bijbel. Hana, di ben tron a mama fu a profeiti Samuel, ben abi wan tranga bribi. Toku a ben abi furu broko-ede fu di wan sma na ini en osofamiri no ben e libi bun nanga en (1 Sam. 1:7). Na apostel Paulus ben abi wan tranga bribi, ma a ben e ’broko en ede nanga ala den gemeente’ (2 Kor. 11:28). Fu di Kownu David ben abi wan tranga bribi, meki Yehovah ben lobi en srefisrefi (Tori 13:22). Toku David ben meki wan tu fowtu di ben gi en furu broko-ede (Ps. 38:4). Yehovah trowstu den alamala èn a meki den firi prisiri  baka. Meki wi luku san wi kan leri fu den sma disi.

3. Fa den sani di trawan e taki kan gi wi broko-ede?

³ Te tra sma e taki noso du sani di e hati wi, dan dati kan gi wi broko-ede. A e hati moro te wan mati noso wan famiri du so wan sani nanga wi. Kande yu e prakseri taki noiti moro yu nanga a sma o de mati. Son leisi wan sma kan taki sani sondro fu denki èn a kan de neleki a dyuku wi nanga wan feti-owru! (Odo 12:18) Noso kande wan sma e taki sani fu espresi fu hati yu. Na disi ben miti wan yongu sisa. A e taki: „Wan tu yari pasa wan bun mati fu mi ben e fruteri wan lo lei fu mi tapu Internet. A sani dati ben hati mi èn a ben gi mi broko-ede. Mi no ben man frustan fa wan bun mati ben kan du so wan sani nanga mi.” Efu wan bun mati noso famiri du wan hati sani nanga yu, dan yu kan leri furu fu Hana.

4. Sortu problema Hana ben abi?

⁴ Sortu problema Hana ben abi? Furu yari langa a no ben man kisi pikin (1 Sam. 1:2). Na ini Israel fu a ten dati sma ben e bribi taki te wan uma no ben man kisi pikin, dan na Gado no ben blesi en. A sani disi ben meki Hana firi syen (Gen. 30:1, 2). San ben meki en moro ogri gi Hana, na taki Penina, a tra wefi fu en masra, ben abi pikin. Penina ben dyarusu tapu Hana èn a ’ben e tanteri en doronomo, fu di a ben wani Hana firi sari’ (1 Sam. 1:6). A sani disi ben meki Hana firi brokosaka. A ben sari so te, taki ’a ben e krei èn a no ben wani nyan’ (1 Sam. 1:7, 10). San trowstu Hana?

5. Fa begi yepi Hana?

⁵ Hana begi Yehovah èn a fruteri en fa a ben e firi. Baka di a begi a fruteri Granpriester Eli san ben miti en. Eli taigi en: „Meki sani waka bun nanga yu èn meki a Gado fu Israel gi yu san yu aksi en.” San ben de a bakapisi? Hana „gowe go nyan èn a no ben de nanga wan sari fesi moro” (1 Sam. 1:17, 18). Begi yepi Hana fu no sari moro.

6. San a tori fu Hana èn Filipisma 4:6, 7 e leri wi fu begi?

⁶ Efu wi e tan begi Yehovah, dan wi no o  broko wi ede so furu moro. Hana ben e taki langa nanga en hemel Papa (1 Sam. 1:12). Wi kan taki langa tu nanga Yehovah te wi e fruteri en san e gi wi broko-ede, san wi e frede èn sortu swakifasi wi abi. Te wi e begi Yehovah, dan wi no abi fu gebroiki moi wortu èn wi no musu frede taki wi no sabi taki bun. Son leisi wi kan krei srefi te wi e fruteri Yehovah fu den problema fu wi. Toku noiti Yehovah o weri fu arki wi. Boiti taki wi e begi fu den problema fu wi, wi musu memre tu san skrifi na Filipisma 4:6, 7. (Leisi en.) Paulus taki dati te wi e begi, wi musu gi Gado tangi tu. Wi abi furu reide fu gi Yehovah tangi. Fu eksempre, wi kan taki en tangi gi a libi, gi den sani di a meki, gi a lobi di a e sori gi wi èn gi a moi howpu di wi abi. Sortu tra sani wi kan leri fu Hana?

7. San Hana nanga en masra ben gwenti du?

⁷ Aladi Hana ben abi problema, toku a ben abi a gwenti fu go na a oso fu Yehovah na Silo makandra nanga en masra (1 Sam. 1:1-5). Na di Hana ben de na a tabernakel, Granpriester Eli taigi en taki a ben howpu taki Yehovah ben o piki a begi fu en. A sani disi trowstu Hana.​—1 Sam. 1:9, 17.

8. Fa den konmakandra kan yepi wi? Tyari disi kon na krin.

⁸ Den gemeente konmakandra kan yepi wi fu no broko wi ede tumusi. Nofo tron te wan brada e begi na a bigin fu a konmakandra, a e aksi Gado fu gi wi en santa yeye. Freide na wan fu den fasi di a yeye e meki sma kisi (Gal. 5:22). Te wi e go na den konmakandra awinsi wi e stress, wi e gi Yehovah nanga wi brada nanga sisa na okasi fu gi wi deki-ati èn fu yepi wi fu firi bun baka. Begi nanga den konmakandra na tu prenspari sani di Yehovah e gebroiki fu trowstu wi (Hebr. 10:24, 25). Meki wi taki fu wan tra sani di wi kan leri fu Hana.

9. (a) A situwâsi fu Hana ben kenki? Fruklari dati. (b) San ben yepi en?

⁹ Den problema fu Hana no ben lusu wantewante. Di Hana drai go baka na oso a ben musu libi ete nanga Penina na ini wán oso. Èn Bijbel no e taki dati Penina ben tapu fu tanteri Hana. Sobun, a sori leki Penina ben e tan taigi Hana hati sani. Ma Hana no ben e sari moro. Fu di Hana ben abi a frutrow taki Yehovah arki a begi fu en, meki a no ben broko en ede moro. A gi Yehovah na okasi fu trowstu en. Bakaten Yehovah blesi Hana èn a meki a kisi pikin.​—1 Sam. 1:19, 20; 2:21.

10. San wi e leri fu na eksempre fu Hana?

¹⁰ Wi kan firi bun baka awinsi a problema no lusu. Awinsi wi e begi fayafaya èn awinsi wi e go na den konmakandra, toku son problema no o lusu. Na eksempre fu Hana e leri wi taki noti no kan tapu Yehovah fu trowstu wi. Noiti Yehovah o frigiti wi èn a o blesi wi te wi e horidoro.​—Hebr. 11:6.

11. Sortu sani ben e gi Paulus broko-ede?

¹¹ Furu sani ben e gi Paulus broko-ede. Fu di a ben lobi den brada nanga sisa fu en, meki a ben e broko en ede nanga den te den ben abi problema (2 Kor. 2:4; 11:28). Di Paulus ben e du a preikiwroko, gensman ben e fon en èn den ben poti en na strafu-oso. A ben abi tra problema tu di ben gi en broko-ede.  Fu eksempre, son leisi a ben „de nanga angri” (Fil. 4:12). Bijbel e taki fu dri okasi pe a boto di Paulus ben de na ini ben sungu. Sobun, a kan taki bakaten a ben e frede te a ben e teki boto (2 Kor. 11:23-27). San yepi Paulus fu no broko en ede tumusi?

12. San yepi Paulus fu no broko en ede tumusi?

¹² Paulus ben e broko en ede te den brada nanga sisa fu en ben e kisi problema, ma a no ben pruberi fu lusu ala den problema en wawan. Paulus ben sabi taki a no ben man du ala sani. Dati meki a ben poti tra brada fu yepi na ini a gemeente. A meki man soleki Timoteyus nanga Titus tyari frantwortu tu fu di a ben kan frutrow den. A wroko di den brada dati du ben meki taki Paulus no ben e broko en ede tumusi.​—Fil. 2:19, 20; Tit. 1:1, 4, 5.

13. Fa owruman kan teki na eksempre fu Paulus?

¹³ Aksi tra sma fu yepi yu. Neleki Paulus furu owruman na ini a ten disi e broko den ede nanga den brada nanga sisa di e kisi tesi. Ma wan owruman no man yepi ala sma na ini a gemeente. Efu a e frustan taki a no man du ala sani, dan a o aksi tra lepi brada fu yepi en èn a o leri yongu brada fu tyari frantwortu na ini a gemeente tu.​—2 Tim. 2:2.

14. Nanga sortu sani Paulus no ben e broko en ede èn san wi kan leri fu en?

¹⁴ Yu abi trowstu fanowdu tu. Fu di Paulus ben abi sakafasi, meki a ben sabi taki a ben abi deki-ati fanowdu fu den mati fu en. A no ben e broko en ede taki sma ben o wisiwasi en fu di a ben kisi deki-ati fu trawan. Paulus ben taigi Fileimon: „Di mi yere fu a lobi fu yu, a gi mi furu prisiri nanga trowstu” (Fileim. 7). Paulus ben kari den nen fu wan tu tra brada di gi en furu deki-ati na ini muilek ten (Kol. 4:7-11). Te wi e frustan taki wi abi trowstu fanowdu, dan wi o suku yepi èn den brada nanga sisa o de klariklari fu horibaka gi wi.

15. San Paulus du di a ben de na ini wan muilek situwâsi?

¹⁵ Frutrow tapu Gado Wortu. Paulus ben sabi taki Gado Buku ben kan trowstu en (Rom. 15:4). Gado Buku ben o gi en a koni tu fu man pasa iniwan tesi (2 Tim. 3:15, 16). Di Paulus ben de na  strafu-oso na ini Rome a di fu tu leisi, a ben sabi taki heri esi den ben o kiri en. San Paulus du na ini a muilek situwâsi dati? A aksi Timoteyus fu kon na en esi-esi èn fu tyari „den bukulolo” kon (2 Tim. 4:6, 7, 9, 13). Fu san ede? Fu di den bukulolo dati ben abi pisi fu den Hebrew Buku fu Bijbel di Paulus ben kan studeri. Te wi e studeri Gado Wortu neleki Paulus, dan Yehovah o gebroiki Bijbel fu trowstu wi awinsi sortu tesi wi e kisi.

16. Fa David ben e firi di a du wan seryusu sondu?

¹⁶ David ben du wan bigi ogri èn dati meki a ben abi konsensi fonfon. A ben du hurudu nanga Batseiba, a seti sani so taki sma kiri a masra fu Batseiba èn wan heri pisi ten a pruberi fu kibri den sondu fu en (2 Sam. 12:9). Na ini a bigin, David no ben arki en konsensi. A sani disi pori en matifasi nanga Yehovah, a ben firi brokosaka èn a ben kon siki srefi (Ps. 32:3, 4). San yepi David fu no firi brokosaka moro fu den sondu di a du èn san kan yepi wi efu wi du wan seryusu sondu?

17. Fa Psalm 51:1-4 e sori taki David ben sari trutru fu san a ben du?

¹⁷ Begi Gado fu gi yu pardon. Te fu kaba David begi Yehovah. A ben sari fu den sondu fu en èn a taigi Yehovah ala san a du. (Leisi Psalm 51:1-4.) Disi yepi en fu prisiri baka! (Ps. 32:1, 2, 4, 5) Efu yu du wan seryusu sondu, dan no pruberi fu kibri a tori. Ma begi Yehovah èn taigi en san yu du. Yu o firi moro bun èn yu no o abi so furu konsensi fonfon moro. Ma efu yu wani kon abi wan bun matifasi baka nanga Yehovah, dan begi wawan no sari.

18. San David du di a kisi piri-ai?

¹⁸ Teki piri-ai. Di Yehovah seni a profeiti Natan fu sori David sortu sondu a du, David no pruberi fu gi tra sma a fowtu èn a no pruberi fu sori taki a sondu fu en no bigi so. Wantewante a taki dati a sondu teige a masra fu Batseiba èn teige Yehovah. David teki a piri-ai di Yehovah gi en èn Yehovah gi en pardon (2 Sam. 12:10-14). Efu wi du wan seryusu sondu, dan wi musu taki nanga den brada di Yehovah poti fu yepi wi (Yak. 5:14, 15). Wi no musu pruberi fu gi tra sma a fowtu  noso fu taki dati wi no ben man yepi. O moro esi wi e teki a piri-ai, o moro esi wi o firi bun baka èn wi o prisiri baka.

19. San wi musu bosroiti fu du?

¹⁹ Teki a bosroiti fu no du a srefi sondu baka. Kownu David ben sabi taki a ben o abi a yepi fu Yehovah fanowdu fu no du den srefi sondu baka (Ps. 51:7, 10, 12). Baka di Yehovah gi en pardon, David bosroiti fu no prakseri sani moro di no bun. Disi meki taki a no ben firi brokosaka moro.

20. Fa wi kan sori taki wi de nanga tangi taki Yehovah e gi wi pardon?

²⁰ Yehovah de klariklari fu gi wi pardon. Fa wi kan sori taki wi de nanga tangi gi dati? Wi kan du dati te wi e begi en fu gi wi pardon, te wi e teki a piri-ai fu en èn te wi e meki tranga muiti fu no du a srefi sondu baka. Te wi e du den sani disi, dan wi no o firi brokosaka moro. James, wan brada di ben du wan seryusu sondu, ben ondrofeni disi. A e taki: „Di mi fruteri den owruman sortu sondu mi du, dan a ben gersi leki wan hebi lai fadon komoto fu mi skowru. Mi bigin firi moro bun.” A e gi wi furu deki-ati fu sabi taki „Yehovah de krosibei fu den sma di lasi-ati. A e frulusu den wan di brokosaka”!​—Ps. 34:18.

21. San wi musu du efu wi wani taki Yehovah yepi wi fu firi prisiri baka?

²¹ Fu di a kaba de so krosibei, meki moro nanga moro sani kan gi wi broko-ede. Te yu abi broko-ede, dan no draidrai fu suku yepi na Yehovah. Studeri Bijbel fayafaya. Leri fu na eksempre fu Hana, Paulus nanga David. Aksi yu hemel Papa fu yepi yu fu frustan fu san ede yu e broko yu ede (Ps. 139:23). Meki a yepi yu nanga den problema fu yu, spesrutu den wan di yu no man lusu nownow. Te yu e du dati, dan yu kan firi leki a psalm skrifiman di ben singi gi Yehovah: „Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka.”​—Ps. 94:19.