1. Yini lengabangela kukhatsateka, futsi kungasitsintsa njani?

KUKE kwenteka yini wativa ukhatsateke kakhulu? * Kungenteka ukhatsatekile ngenca yekutsi labanye bakhulume kabi nobe bente tintfo letikuvisa buhlungu. Mhlawumbe ungakhatsatwa tintfo lotikhulumile nobe lotentile. Nasi sibonelo, kungenteka wente liphutsa futsi ukhatsateka ngekutsi Jehova ngeke akucolele. Lokubi kakhulu kutsi ungase ucabange kutsi kukhatsateka kakhulu ngetinkinga lobhekene nato kusho kutsi ute kukholwa nobe ungumuntfu lomubi. Kuliciniso yini loko?

2. Ngutiphi tibonelo letiseBhayibhelini letikhombisa kutsi kukhatsateka akusho kutsi site kukholwa?

² Asesicabange ngetibonelo letimbalwa letiseBhayibhelini. Hana, lowaba ngumake wemphrofethi Samuweli bekanekukholwa lokucinile. Nanobe kunjalo, wakhatsateka kakhulu ngesikhatsi lelinye lilunga lemndeni wakhe limphatsa kabuhlungu. (1 Sam. 1:7) Umphostoli Pawula bekanekukholwa lokucinile, kodvwa ‘wakhatsateka ngawo onkhe emabandla.’ (2 Khor. 11:28) INkhosi Davide nayo beyinekukholwa lokucinile kangangekutsi Jehova bekayitsandza kakhulu. (Imis. 13:22) Nanobe kunjalo, yawenta emaphutsa layenta yativa icindzeteleke kakhulu. (Hla. 38:4) Jehova watidvudvuta letinceku takhe. Asesibone kutsi yini lesingayifundza kuto.

3. Yini lengasenta sikhatsateke nangabe labanye bakhuluma kabi?

³ Singahle sikhatsateke nangabe labanye bakhuluma kabi nobe bangasiphatsi ngemusa. Loko kuliciniso ikakhulukati nakwentiwa ngumngani lomkhulu nobe sihlobo. Singahle sive buhlungu kutsi buhlobo betfu naloyo muntfu butawuphela. Ngaletinye tikhatsi, lomuntfu losivise buhlungu kungenteka ukhulume angakacabangi, futsi singeva shengatsi usihlabe ngesikhali! (Taga 12:18) Lomunye angasebentisa emavi lati kahle kutsi atasilimata. Naku lokwenteka kulomunye dzadze losemusha, utsi: “Eminyakeni lembalwa leyendlulile, lomunye lebengimtsatsa njengemngani wami lomkhulu wacala kusakata emanga ngami etinhlelweni tekuchumana. Ngeva buhlungu kakhulu futsi ngakhatsateka. Bengingati kutsi yini leyamenta wangivisa buhlungu kangaka.” Nangabe umngani wakho lomkhulu nobe sihlobo sikuvise buhlungu, kunyenti longakufundza kuHana.

4. Ngutiphi tinkinga letimatima lokwadzingeka kutsi Hana atibeketelele?

⁴ Hana kwadzingeka abeketelele tinkinga letimatima. Besekaneminyaka leminyenti angabatfoli bantfwana. (1 Sam. 1:2) Lisiko lema-Israyeli belitsi umfati lobekangabatfoli bantfwana, Nkulunkulu bekangambusisi. Loko bekwenta Hana ative ahlazekile. (Gen. 30:1, 2) Lokubuhlungu kakhulu kutsi zakwabo longuPhenina bekabatfola bantfwana. Phenina bekanemona ngaHana futsi “abevamise kumchukuluta, khona atewuphatseka kabi.” (1 Sam. 1:6) Ekucaleni, Hana bekangakhoni kusibeketelela lesimo. Wacindzeteleka kakhulu kangangekutsi ‘abekhala, angete adla ngisho nekudla ngenca yebuhlungu nekukhatsateka kwakhe’ enhlitiyweni. (1 Sam. 1:7, 10) Wadvudvuteka njani Hana?

5. Umthantazo wamsita njani Hana?

⁵ Hana watfululela sifuba sakhe kuJehova ngemthantazo. Ngemuva kwaloko, wabese uchazela Umphristi Lophakeme Eli simo lebekakuso. Eli watsi kuye: “Hamba ngekuthula, shangatsi Nkulunkulu wema-Israyeli angakupha loko lokucele kuye.” Waba yini umphumela? Hana “wabe sewuyahamba wayakudla, nebuso bakhe abuzange buphindze bubonakale bujabhile.” (1 Sam. 1:17, 18) Umthantazo wasita Hana waba nekuthula.

6. Ngutiphi tifundvo letimayelana nemthantazo lesingatifundza kuHana nasemBhalweni waFiliphi 4:6, 7?

 ⁶ Singaphindze sikutfole kuthula nangabe sichubeka sithantaza kuJehova. Hana wacitsa sikhatsi lesinyenti akhuluma naBabe wakhe losezulwini. (1 Sam. 1:12) Natsi singenta lokufanako, sitjele Jehova tintfo letisikhatsatako, lesitesabako kanye nemaphutsa etfu. Imithantazo yetfu akukafanele ibe silandzelo nobe siyibhale phansi. Ngaletinye tikhatsi singahle sikhale nasithantaza kuJehova simtjela ngetintfo letisikhatsatako. Nanobe kunjalo, Jehova ngeke adzinwe kusilalela. Ngetulu kwekuthantaza ngetinkinga tetfu, kufanele sikhumbule seluleko lesikuFiliphi 4:6, 7. (Fundza.) Pawula watsi kufanele simbonge Jehova nasithantaza. Sinetizatfu letinyenti tekumbonga. Nasi sibonelo, singambonga Jehova ngesipho sekuphila, indalo yakhe, lutsandvo lwakhe kanye nelitsemba lelijabulisako lasinikete lona. Yini lenye lesingayifundza kuHana?

7. Yini Hana kanye nendvodza yakhe lebebahlale bayenta?

⁷ Ngetulu kwetinkinga labhekana nato, Hana nendvodza yakhe bachubeka baya kuyokhonta Jehova eShilo. (1 Sam. 1:1-5) Hana bekasethempelini ngesikhatsi Umphristi Lophakeme Eli amkhutsata futsi amtjela kutsi uyetsemba kutsi Jehova utawuphendvula umthantazo wakhe.—1 Sam. 1:9, 17.

8. Kuba khona emihlanganweni kungasisita njani? Chaza.

⁸ Singaphindze sikutfole kuthula nangabe sichubeka siya emihlanganweni yelibandla. Nakucala imihlangano, umzalwane lothantazako uvame kucela kutsi umoya waNkulunkulu ube khona. Kuthula kungulesinye setitselo temoya. (Gal. 5:22) Nangabe siba khona emihlanganweni ngisho nobe sicindzetelekile, sisuke sinika Jehova kanye nebazalwane nabodzadzewetfu litfuba lekutsi basikhutsate futsi basisite kuze siphindze sibe nekuthula. Umthantazo kanye nekuba khona emihlanganweni kutindlela letibalulekile Jehova lasidvudvuta ngato. (Heb. 10:24, 25) Asesicoce ngalesinye sifundvo lesingasitfola kulokwenteka kuHana.

9. Yini lengazange ishintje etinkingeni Hana lebekabhekene nato, kodvwa yini leyashintja?

⁹ Tinkinga Hana labhekana nato atizange tisheshe tiphele. Nakabuya kuyokhonta Jehova ethempelini, Hana bekudzingeka kutsi abuyele ekhaya ayohlala naPhenina. LiBhayibheli alisho kutsi Phenina wayekela kuhlupha Hana. Ngako kungenteka kutsi Hana kwadzingeka achubeke abeketelela emagama labuhlungu lebekakhulunywa nguPhenina. Kodvwa Hana waphindze waba nekuthula. Khumbula kutsi ngemuva kwekushiyela lendzaba kuJehova, Hana akazange aphindze akhatsateke. Wavumela Jehova kutsi amdvudvute, futsi ngekuhamba kwesikhatsi wabatfola bantfwana!—1 Sam. 1:19, 20; 2:21.

10. Yini lesiyifundzako kulokwenteka kuHana?

¹⁰ Singaphindze sikutfole kuthula ngisho nobe kusekhona loko lokusibangela tinkinga. Ngisho nobe singathantaza kanjani futsi sibe khona njalo emihlanganweni, letinye tinkinga tingahle tingapheli. Lokwenteka kuHana kusifundzisa kutsi kute lokungavimbela Jehova kutsi ayekele kusidvudvuta. Jehova ngeke asikhohlwe futsi ngekushesha utasiniketa umvuzo wekwetsembeka kwetfu.—Heb. 11:6.

11. Ngutiphi tintfo letenta Pawula wakhatsateka?

¹¹ Kunetintfo letinyenti letenta Pawula wakhatsateka. Ngenca yekutsi bekabatsandza bazalwane nabodzadze, bekakhatsateka  ngetinkinga lebebabhekana nato. (2 Khor. 2:4; 11:28) Ngesikhatsi asengumphostoli, Pawula kwadzingeka abeketele ngesikhatsi baphikisi bamshaya futsi bamfaka ejele. Kwaphindze kwadzingeka abeketelele bumatima lobebumenta akhatsateke, lobufaka ekhatsi “kuba nalokuncane.” (Fil. 4:12) Nasikhumbula kutsi wake wephukelwa ngumkhumbi tikhatsi letintsatfu futsi aphose afa, singabona kutsi bekakhatsateka kanganani nakahamba ngawo. (2 Khor. 11:23-27) Yini leyasita Pawula ngesikhatsi akhatsatekile?

12. Yini leyasita Pawula wangakhatsateki kakhulu?

¹² Pawula bekeva buhlungu nangabe bazalwane bakhe nabodzadze babhekana netinkinga, kodvwa akazange etame kuticalula tonkhe tinkinga tabo. Pawula bekatfobekile. Wacela labanye kutsi bamsite kuze kunakekelwe libandla. Sibonelo saloko kutsi waniketa Thimothi naThithusi lebebatsembekile emalungelo lengetiwe abandleni. Siyaciniseka kutsi umsebenti labawenta labazalwane wasita Pawula kutsi anciphise kukhatsateka.—Fil. 2:19, 20; Thit. 1:1, 4, 5.

13. Labadzala belibandla bangamlingisa njani Pawula?

¹³ Cela labanye kutsi bakusite. Lamuhla, labadzala belibandla labanyenti labanelutsandvo bakhatsateka njengaPawula nangabe emalunga elibandla abhekana nebumatima. Kodvwa kungenteka lomdzala angakhoni kusita bonkhe bantfu ebandleni. Nangabe atfobekile, utawunika lamanye emadvodza lafanelekako leminye imisebenti, aphindze aceceshe lamanye emadvodza lasemasha kutsi anakekele timvu taNkulunkulu.—2 Thim. 2:2.

14. Yini Pawula langazange akhatsateke ngayo, futsi yini lesingayifundza kuye?

¹⁴ Vuma kutsi uyakudzinga kudvudvutwa. Pawula bekatfobekile, ngako bekati kutsi uyakudzinga kudvudvutwa nekukhutsatwa bangani bakhe. Akazange akhatsateke ngekutsi labanye bebatawucabanga kutsi ubutsakatsaka ngenca yekutsi bekakhutsatwa bangani bakhe. Nakabhalela Filemoni, Pawula watsi: “Ngajabula futsi ngadvudvuteka kakhulu nangiva ngelutsandvo lwakho.” (Flm. 7) Pawula wakhuluma ngalabanye bazalwane lebebamkhutsate kakhulu ngetikhatsi tekucindzeteleka. (Khol. 4:7-11) Nangabe sitfobekile futsi sivuma kutsi siyakudzinga kukhutsatwa, bazalwane betfu nabodzadze batakujabulela kusisekela.

15. Yini Pawula layenta nakabhekene netimo leticindzetelako?

 ¹⁵ Yetsembela eVini laNkulunkulu. Pawula bekati kutsi imiBhalo itamdvudvuta. (Rom. 15:4) Beyitawuphindze imnikete kuhlakanipha kuze akhone kubhekana netilingo. (2 Thim. 3:15, 16) Ngesikhatsi aboshwe kwesibili eRoma, Pawula bekacabanga kutsi besekatawufa. Yini layenta ngalesikhatsi acindzetelekile? Wacela Thimothi kutsi afike ngekushesha futsi ‘aphatse nemiculu.’ (2 Thim. 4:6, 7, 9, 13) Leni? Ngobe lemiculu kungenteka beyitincenye temiBhalo yesiHebheru Pawula lebekangayisebentisa nakadadisha. Nangabe silingisa Pawula sidadisha liVi laNkulunkulu onkhe malanga, Jehova utasidvudvuta kuto tonkhe tilingo lesibhekana nato ngisho nobe tingaba matima kangakanani.

16. Davide wativa njani ngesikhatsi ente sono lesikhulu?

¹⁶ Davide wenta intfo lembi kakhulu. Waphinga naBhatisheba, wahlela kutsi indvodza yaBhatisheba ibulawe futsi wabufihla lobubi lebekabentile. (2 Sam. 12:9) Davide wacale wangawulaleli nembeza wakhe futsi loko kwabulimata buhlobo bakhe naJehova, waphindze wacindzeteleka kakhulu waze wagula. (Hla. 32:3, 4) Yini leyasita Davide wakhona kubhekana nekukhatsateka ngenca yesono lebekasentile, futsi yini lengasisita nangabe sente sono lesikhulu?

17. Ngekusho kweTihlabelelo 51:1-4, yini lekhombisa kutsi Davide bekaphendvuke mbamba?

¹⁷ Thantaza ucele Jehova akucolele. Ekugcineni, Davide wathantaza kuJehova, waphendvuka mbamba futsi wativuma tono takhe. (Fundza Tihlabelelo 51:1-4.) Loko kwamsita Davide wakhululeka waphindze wajabula! (Hla. 32:1, 2, 4, 5) Nangabe wente sono lesikhulu, ungasifihli kodvwa sivume kuJehova ngemthantazo. Nawenta njalo, utawukhululeka futsi utawuba nanembeza lohlantekile. Nawufuna kulungisa buhlobo bakho naJehova, kunyenti lokufanele ukwente ngisho nobe sewuthantazile.

18. Yini Davide layenta nakaniketwa siyalo?

¹⁸ Semukele siyalo. Ngesikhatsi Jehova atfuma umphrofethi Nathani kutsi ayokwembulela Davide sono sakhe, Davide akazange abeke taba nobe atsi loko lakwentile  bekungasiko kubi kangako. Ngekushesha, wavuma kutsi bekangakoni kumyeni waBhatisheba kuphela, kodvwa bekone kakhulu kuJehova. Davide wasemukela siyalo lebesivela kuJehova, futsi Jehova wamtsetselela. (2 Sam. 12:10-14) Nangabe sente sono lesikhulu, kufanele sikhulume nalabo Jehova lababeke kutsi beluse umhlambi wakhe. (Jak. 5:14, 15) Akukafanele sibeke taba, kodvwa kumelwe sisheshe sisemukele futsi sisisebentise siyalo labasiniketa sona kuze sibe nekuthula futsi sijabule.

19. Yini lokufanele sitimisele kuyenta?

¹⁹ Timisele kutsi ungaphindzi emaphutsa lafanako. INkhosi Davide yavuma kutsi beyiludzinga lusito loluvela kuJehova kuze ingawaphindzi emaphutsa lebeyiwentile. (Hla. 51:7, 10, 12) Ngemuva kwekucolelwa nguJehova, Davide watimisela kutsi angabi nemicabango lemibi. Loko kwamenta waba nekuthula.

20. Yini lesingayenta kuze sikhombise kubonga ngekutsi Jehova usitsetselele?

²⁰ Sitawube sikhombisa kutsi siyabonga ngekutsi Jehova usicolele nangabe sithantaza, semukela siyalo futsi setama kamatima kungawaphindzi emaphutsa lafanako. Nangabe senta njalo, sitawuphindze sibe nekuthula. Lomunye umzalwane lokutsiwa nguJames lowenta sono lesikhulu wakubona loku, utsi: “Ngesikhatsi ngivuma sono sami kulabadzala belibandla, ngeva shengatsi kususwa umtfwalo lomkhulu emahlombe ami. Ngaphindze ngaba nekuthula.” Kukhutsata kakhulu kwati kutsi ‘[Jehova] uhlala asedvute nalabo labanetinhlitiyo letephukile, uyabasindzisa labanemoya lowephukile’!—Hla. 34:18.

21. Singamvumela njani Jehova kutsi asidvudvute?

²¹ Njengobe sesiya ngasekupheleni kwemalanga ekugcina, kungenteka tibe tinyenti tintfo letitasikhatsata. Nangabe unemicabango lekukhatsatako, kufanele uthantaze ngekushesha ucele Jehova akusite. Timisele nawudadisha liBhayibheli. Fundza kulokwenteka kuHana, kuPawula nakuDavide futsi ucele Babe losezulwini kutsi akusite utibone tintfo letingakwenta ukhatsateke. (Hla. 139:23) Vumela Jehova akusite ukhone kubhekana netinkinga takho, ikakhulukati leto letibonakala tingetulu kwemandla. Nangabe wenta njalo, utawube ulingisa umhlabeleli lowatsi: “Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.”—Hla. 94:19.