1. Tanbasá ema sente laran-taridu? Neʼe halo ema sente oinsá?

ITA sente ona laran-taridu demais ka lae? * Karik Ita sente laran-taridu tanba ema seluk hatete ka halo buat ruma neʼebé hakanek Ita-nia laran. Ka karik Ita laran-taridu tanba buat neʼebé Ita hatete ka halo ona. Porezemplu, karik Ita halo ona sala ida no hanoin barak katak Jeová sei nunka perdua Ita. Ka karik Ita sente katak tanba Ita laran-taridu demais, neʼe hatudu Ita ladún iha fiar no Ita mak ema aat. Neʼe loos ka lae?

2. Ezemplu saida deʼit mak hatudu katak laran-taridu la dehan katak ita la iha fiar?

² Mai ita haree ezemplu balu husi Bíblia. Ana mak profeta Samuel nia inan no nia mak feto neʼebé iha fiar boot. Maibé nia mós tenke tahan hasoru laran-taridu tanba ema iha ninia umakain trata aat nia. (1 Sam 1:7) Apóstolu Paulo iha fiar neʼebé metin, maibé nia sente “laran-taridu kona-ba kongregasaun hotu”. (2 Kor 11:28) Liurai David iha fiar neʼebé metin no Jeová hadomi tebes nia. (Após 13:22) Maibé David halo sala neʼebé halo nia sente laran-taridu demais. (Sal 38:4) Jeová fó kmaan no halo kontente sira ida-idak. Mai ita aprende kona-ba sira-nia ezemplu.

3. Oinsá mak ema seluk nia liafuan bele halo ita laran-taridu?

³ Bainhira ema koʼalia liafuan kroʼat ka hatudu hahalok aat ba ita, karik ita sente laran-taridu, liuliu se ema neʼe mak ita-nia belun diʼak ka família. Karik ita laran-taridu tanba ita sente ida-neʼe estraga ona ita-nia relasaun diʼak ho ema neʼe. Dala ruma ema koʼalia liafuan kroʼat la ho neon, maski nuneʼe ita sente hanesan nia sona ita ho surik. (Prov 12:18) Ka karik ema ruma ho neon uza liafuan atu hakanek ita. Irmán joven ida hasoru situasaun neʼebé hanesan. Nia dehan: “Tinan balu liubá, haʼu-nia belun diʼak ida komesa habelar lia-bosok kona-ba haʼu liuhusi internét. Haʼu sente laran-kanek no laran-taridu. Haʼu la komprende tanbasá nia hakanek haʼu-nia laran.” Se Ita-nia belun diʼak ka família hakanek Ita-nia laran, Ita bele aprende buat barak husi Ana.

4. Ana tenke tahan hasoru susar saida deʼit?

⁴ Ana tenke tahan hasoru susar oioin. Ba tinan barak nia la iha oan. (1 Sam 1:2) Ema Izraél hanoin katak se feto ida labele iha oan, neʼe katak Maromak la haraik bensaun ba nia. Neʼe halo Ana sente moe. (Gén 30:1, 2) Aat liután mak ninia laʼen iha feen seluk naran Penina, no Penina iha oan. Penina mós laran-moras ba Ana no Penina “hatún beibeik Ana hodi halo nia laran-kanek”. (1 Sam 1:6) Ana sai triste tebes ho ninia situasaun. Nia sai triste “toʼo nia tanis no lakohi han”. Nia “sente laran-susar tebes”. (1 Sam 1:7, 10) Oinsá Ana bele hetan kmaan?

5. Oinsá mak orasaun ajuda Ana?

⁵ Ana fakar sai ninia sentimentu ba Jeová liuhusi orasaun. Depois neʼe, nia esplika ninia situasaun ba Amlulik Boot Eli. No Eli hatete: “Laʼo ho dame bá. Haʼu hein katak Izraél nia Maromak sei fó buat neʼebé ó husu ona ba nia.” Rezultadu mak saida? Ana “fila no han, no ninia oin la murón tan”. (1 Sam 1:17, 18) Orasaun ajuda Ana atu sente kmaan fali.

6. Lisaun saida deʼit mak ita bele aprende husi Ana no husi Filipe 4:6, 7 kona-ba halo orasaun?

⁶ Ita bele sente kmaan fali se ita kontinua halo orasaun. Ana uza tempu  naruk atu koʼalia ho ninia Aman iha lalehan. (1 Sam 1:12) Ita mós bele koʼalia naruk ho Jeová kona-ba ita-nia laran-taridu, ita-nia taʼuk no mós ita-nia fraku sira. Ita la presiza hatoʼo buat hotu ho perfeitu ka uza liafuan furak oioin. Dala ruma ita tanis bainhira fó sai ita-nia laran-susar ba Jeová. Maski nuneʼe, Jeová nunka kole atu rona ba ita. Ita mós presiza hanoin-hetan konsellu neʼebé hakerek iha Filipe 4:6, 7. (Lee.) Paulo hatete katak ita presiza fó agradese ba Jeová liuhusi orasaun. Iha razaun barak atu fó agradese ba Jeová. Porezemplu, ita bele fó agradese ba Jeová tanba nia fó ita moris, nia kria buat furak oioin, nia hatudu domin neʼebé laran-metin ba ita no nia fó ita esperansa furak. Ita bele aprende saida tan husi Ana?

7. Saida mak Ana no ninia laʼen halo beibeik?

⁷ Maski Ana hasoru susar oioin, maibé Ana hamutuk ho ninia laʼen bá beibeik Silo atu adora Jeová. (1 Sam 1:1-5) Bainhira Ana adora Jeová iha tenda santu, Amlulik Boot Eli fó kmaan ba Ana hodi dehan katak nia hein Jeová sei hatán Ana nia orasaun.—1 Sam 1:9, 17.

8. Oinsá reuniaun bele ajuda ita? Esplika toʼok.

⁸ Ita bele sente kmaan fali se ita kontinua tuir reuniaun sira. Bainhira reuniaun komesa, baibain irmaun ida halo orasaun atu husu Jeová nia espíritu hamutuk ho ita. Dame mak hahalok ida neʼebé mai husi espíritu santu. (Gal 5:22) Bainhira ita tuir reuniaun maski ita estrese, ita fó oportunidade ba Jeová no irmaun-irmán sira atu fó kmaan mai ita no ajuda ita atu sente hakmatek iha laran. Orasaun no reuniaun mak dalan importante neʼebé Jeová uza atu fó kmaan mai ita. (Ebr 10:24, 25) Mai ita koʼalia tan kona-ba saida mak ita bele aprende husi Ana nia ezemplu.

9. Ana nia situasaun troka ka lae? Esplika toʼok. Maibé saida mak ajuda Ana?

⁹ Ana nia susar la lakon kedas. Bainhira Ana fila fali ba uma, nia nafatin hela iha uma neʼebé hanesan ho Penina. Bíblia la fó sai katak Penina troka ninia hahalok. Entaun karik Ana tenke kontinua tahan hasoru Penina nia liafuan kroʼat. Maibé Ana la sai laran-taridu tan. Hanoin-hetan katak depois Ana entrega tiha ninia laran-susar ba Jeová, Ana la hanoin barak tan. Nia sadere ba Jeová atu fó kmaan no halo nia kontente. Tempu balu liutiha, Jeová haraik bensaun ba Ana hodi iha oan.—1 Sam 1:19, 20; 2:21.

10. Saida mak ita aprende husi Ana nia ezemplu?

¹⁰ Ita bele sente kmaan fali maski ita-nia problema la lakon. Maski ita kontinua halo orasaun no tuir beibeik reuniaun sira, dala ruma ita-nia problema balu sei iha nafatin. Husi Ana nia ezemplu, ita aprende katak la iha buat ida mak bele hanetik Jeová atu halo ita sente kmaan. Jeová nunka haluha ita, no nia sei fó kolen ba ita-nia laran-metin.—Ebr 11:6.

11. Saida deʼit mak halo Paulo laran-taridu?

¹¹ Iha buat barak neʼebé halo Paulo laran-taridu. Porezemplu, tanba nia hadomi tebes ninia irmaun-irmán sira, nia sente laran-taridu kona-ba problema neʼebé sira hasoru. (2 Kor 2:4; 11:28) Bainhira Paulo haklaken, dala barak ema baku nia no hatama nia ba komarka. Nia mós tenke tahan susar sira seluk neʼebé halo nia laran-taridu, hanesan iha “sasán uitoan” deʼit. (Flp 4:12) Dala tolu ró neʼebé  nia saʼe sai aat, tan neʼe ita bele fiar katak nia sente laran-taridu bainhira halo viajen ho ró. (2 Kor 11:23-27) Oinsá mak Paulo tahan hasoru laran-taridu?

12. Saida mak ajuda Paulo atu la laran-taridu demais?

¹² Maski Paulo laran-taridu kona-ba ninia irmaun-irmán sira neʼebé hasoru susar, maibé nia la koko atu hadiʼa sira-nia problema mesak. Paulo hatudu haraik an no husu ema seluk atu ajuda nia tau matan ba kongregasaun. Porezemplu, nia fó responsabilidade ba mane sira neʼebé nia bele konfia hanesan Timóteo no Tito. Ita bele fiar katak irmaun sira-neʼe nia serbisu ajuda Paulo atu la sente laran-taridu demais.—Flp 2:19, 20; Tito 1:1, 4, 5.

13. Oinsá mak katuas sira bele banati-tuir Paulo?

¹³ Husu ema seluk atu ajuda. Hanesan Paulo, ohin loron katuas kongregasaun barak sente laran-taridu kona-ba irmaun-irmán sira neʼebé hasoru susar. Maibé katuas ida deʼit labele ajuda ema hotu iha kongregasaun. Katuas neʼebé haraik an sei husu ajuda husi irmaun seluk no treinu mane joven sira atu ajuda nia tau matan ba Maromak nia bibi-lubun.—2 Tim 2:2.

14. Paulo la hanoin barak kona-ba saida? Saida mak ita bele aprende husi ninia ezemplu?

¹⁴ Rekoñese katak Ita presiza hetan kmaan. Paulo haraik an, tan neʼe nia hatene katak nia presiza hetan kmaan husi ninia belun sira. Nia la hanoin barak katak ema seluk sei haree nia nuʼudar ema fraku tanba hetan kmaan husi ema seluk. Bainhira Paulo hakerek ba Filemon, nia dehan: “Haʼu hetan ona ksolok boot no sente kmaan tanba haʼu rona kona-ba ó-nia domin.” (Flm 7) Paulo mós temi maluk serbisu-naʼin seluk neʼebé fó kmaan ba nia durante tempu estrese. (Kol 4:7-11) Bainhira ita ho haraik an rekoñese katak ita presiza hetan kmaan, ita-nia irmaun-irmán sira sei kontente atu apoia ita.

15. Oinsá mak Paulo hetan kmaan bainhira estrese?

¹⁵ Sadere ba Maromak nia Liafuan. Paulo hatene katak Eskritura sira bele fó kmaan ba nia. (Rom 15:4) Eskritura mós fó nia matenek atu tahan hasoru susar oioin. (2 Tim 3:15, 16) Bainhira sai dadur iha Roma ba dala segundu, Paulo  sente katak lakleur tan nia sei mate. Saida mak Paulo halo iha situasaun susar neʼe? Nia husu Timóteo atu mai lalais no “lori mós livru sira”. (2 Tim 4:6, 7, 9, 13) Tanbasá? Tanba karik livru sira-neʼe mak parte husi Eskritura Lian Ebraiku neʼebé Paulo bele uza atu estuda mesak. Bainhira ita banati-tuir Paulo hodi estuda beibeik Maromak nia Liafuan, Jeová sei uza Eskritura sira-neʼe atu fó kmaan mai ita maski ita hasoru situasaun neʼebé susar loos.

16. David sente oinsá bainhira nia halo sala sériu?

¹⁶ David halo sala sériu no neʼe halo ninia konxiénsia la hakmatek. Nia halo sala seksuál ho Bat-Seba, halo planu atu oho Bat-Seba nia laʼen no ba tempu balu nia koko atu subar ninia sala. (2 Sam 12:9) Foufoun David la rona ba ninia konxiénsia. Rezultadu mak nia estraga ninia relasaun diʼak ho Jeová. Nia mós sai estrese tebes no sai moras. (Sal 32:3, 4) Saida mak ajuda David atu tahan hasoru ninia laran-taridu tanba halo sala? Saida mak bele ajuda ita se ita halo sala sériu?

17. Oinsá mak Salmo 51:1-4 hatudu katak David arrepende an?

¹⁷ Halo orasaun atu husu perdua. Ikusmai David halo orasaun ba Jeová. Nia arrepende an duni no fó sai ninia sala ba Jeová. (Lee Salmo 51:1-4.) Neʼe ajuda nia atu sai kalma no kontente fali. (Sal 32:1, 2, 4, 5) Se Ita halo sala sériu, keta subar Ita-nia sala. Koʼalia sai ba Jeová liuhusi orasaun. Depois neʼe Ita bele sente kmaan no la sente laran-taridu tan kona-ba Ita-nia sala. Maibé se Ita hakarak atu hadiʼa Ita-nia relasaun ho Jeová, Ita presiza halo buat seluk tan.

18. David halo saida kuandu hetan dixiplina?

¹⁸ Simu dixiplina. Bainhira Jeová haruka profeta Natan atu koʼalia ba David kona-ba ninia sala, David la koko atu defende an ka dehan katak ninia sala ladún sériu. David rekoñese kedas katak nia halo ona sala hasoru Bat-Seba nia laʼen no liuliu hasoru Jeová. David simu dixiplina husi Jeová, no Jeová perdua nia. (2 Sam 12:10-14) Se ita halo sala sériu, ita presiza koʼalia ho ema sira neʼebé Jeová hili atu tau matan ita. (Tgo 5:14, 15) Ita labele koko atu defende an. Se ita  simu kedas dixiplina no halo tuir, ita sei hetan fali kmaan no kontente.

19. Ita presiza hakaʼas an atu halo saida?

¹⁹ Hakaʼas an atu la halo sala neʼebé hanesan. Liurai David hatene katak atu la halo sala neʼebé hanesan, nia presiza Jeová nia ajuda. (Sal 51:7, 10, 12) Depois Jeová perdua tiha David, nia hakaʼas an atu la haburas tan hanoin neʼebé sala. Rezultadu mak nia sente kmaan fali.

20. Oinsá ita bele hatudu agradese tanba Jeová perdua ita?

²⁰ Bainhira ita halo orasaun hodi husu perdua, simu dixiplina, no hakaʼas an atu la halo sala neʼebé hanesan, ita hatudu katak ita agradese tebes tanba Jeová perdua ita. Hodi halo nuneʼe, ita sei sente kmaan fali. Irmaun James neʼebé halo sala sériu sente hanesan neʼe, nia hatete: “Bainhira haʼu fó sai haʼu-nia sala ba katuas sira, haʼu sente hanesan naha todan hasai tiha husi haʼu-nia kabaas. Haʼu komesa sente fali dame.” Ita sente kmaan tebes tanba hatene katak “Jeová besik ema sira neʼebé laran-kanek; nia salva sira neʼebé laran-triste”.—Sal 34:18.

21. Oinsá mak ita bele hatudu katak ita hakarak Jeová fó kmaan mai ita?

²¹ Tanba ita besik daudaun ba mundu nia rohan, iha buat barak liután neʼebé bele halo ita laran-taridu. Bainhira Ita sente laran-taridu, buka kedas ajuda husi Jeová. Estuda Bíblia ho badinas. Aprende husi Ana, Paulo no David nia ezemplu. Husu Ita-nia Aman iha lalehan atu ajuda Ita buka-hatene hun ba Ita-nia laran-taridu. (Sal 139:23) Entrega Ita-nia problema ba nia, liuliu problema neʼebé Ita labele kontrola. Se Ita halo nuneʼe, Ita bele sai hanesan ema neʼebé hakerek salmo ida. Nia kanta ba Jeová: “Bainhira haʼu laran-taridu tebes, Ita fó kmaan ba haʼu no halo haʼu kontente.”—Sal 94:19.