1. (a) Wanem samting inap mekim yumi wari na tingting planti? (b) Taim yumi tingting planti, dispela inap mekim na yumi pilim olsem wanem?

OLSEM WANEM? Yu bin wari na tingting planti long sampela samting? * Ating yu wari na tingting planti long tok o pasin ol narapela i mekim long yu. O ating yu wari na tingting planti long tok o pasin we yu yet i mekim. Ating yu mekim rong, na yu tingting planti olsem Jehova i no inap fogivim yu. Taim yu tingting planti, yu inap pilim olsem yu sot long bilip—yu pilim olsem yu man nogut. Yu ting dispela tingting i stret?

2. Stori long ol eksampel i soim olsem pasin bilong tingting planti i no makim olsem yumi sot long bilip.

² Skelim sampela eksampel i stap long Baibel. Hana em meri i gat strongpela bilip, na bihain em i kamap mama bilong profet Samuel. Tasol bel hevi i daunim em taim wanpela long famili bilong em i mekim hatpela pasin long em. (1 Sml. 1:7) Aposel Pol i gat strongpela bilip, tasol em i “wari long ol kongrigesen.” (2 Kor. 11:28) King Devit i gat strongpela bilip, olsem na Jehova i laikim em tru. (Apo. 13:22) Maski i olsem, Devit i mekim ol rong na dispela i daunim em tru. (Sng. 38:4) Jehova i mekim isi bel bilong Hana, Pol, na Devit. Yumi ken stori long skul yumi inap kisim long eksampel bilong ol.

3. Olsem wanem toktok bilong ol narapela inap mekim yumi bel hevi?

³ Taim ol narapela i mekim hatpela tok o hatpela pasin, yumi inap bel hevi. Moa yet sapos man i mekim yumi bel hevi em wanpela gutpela pren o wanblut. Ating yumi wari olsem yumi no inap pas gut moa wantaim em. Sampela taim em i no tingting gut na toktok na yumi inap pilim olsem tok bilong em i olsem bainat i sutim yumi! (Prov. 12:18) O, em inap min long mekim ol tok bilong daunim yumi. Kain samting olsem i bin kamap long wanpela yangpela sista. Em i tok: “Sampela yia i go pinis, wanpela gutpela pren i mekim ol giaman stori long mi long Intenet. Mi bel hevi tru na tingting planti. Mi no save wai na em i mekim ol tok i olsem bainat i sutim mi.” Sapos wanpela gutpela pren o wanblut i mekim yu bel hevi, stori bilong Hana inap strongim yu.

4. Hana i bungim wanem ol bikpela hevi?

⁴ Hana i bungim sampela bikpela hevi. Inap planti yia, em i no inap karim pikinini. (1 Sml. 1:2) Sapos wanpela meri i no inap karim pikinini, ol manmeri bilong lain Israel i save tok olsem God i no blesim dispela meri. Olsem na Hana i sem nogut tru. (Stt. 30:1, 2) Hana i bel hevi moa yet bikos man bilong em i gat narapela meri, Penina, na dispela meri i karim ol pikinini. Penina i save birua long Hana na “tok bilas long em bilong mekim em i bel hevi.” (1 Sml. 1:6) Pastaim Hana i hatwok tru long karim ol dispela bikpela hevi. Em i bel hevi tru, olsem na “em i save krai na i no save kaikai.” Em i “pilim nogut tru.” (1 Sml. 1:7, 10) Olsem wanem Hana i kisim bel isi?

5. Olsem wanem beten i helpim Hana?

⁵ Hana i beten na autim olgeta wari bilong em long Jehova. Bihain long em i beten, em i tokim Hetpris Eli long hevi bilong em. Eli i tokim em: “Yu ken go wantaim bel isi na God bilong Israel i ken givim yu samting em yu bin askim.” Wanem samting i kamap? Hana “i lusim em na i go na em i kaikai na em i no bel hevi moa.” (1 Sml. 1:17, 18) Beten i helpim Hana long kisim gen bel isi.

6. Yumi inap kisim wanem skul long Hana na tok bilong Filipai 4:6, 7 long pasin bilong beten?

⁶ Yumi inap kisim gen bel isi sapos yumi beten oltaim long Jehova. Hana i lusim longpela haptaim long toktok wantaim Papa bilong em  long heven. (1 Sml. 1:12) Yumi tu inap lusim longpela haptaim long toktok wantaim Jehova long ol samting yumi tingting planti long en, pret long en, na ol popaia bilong yumi. I no olsem yumi mas stailim o bilasim ol tok yumi kolim long beten. Namel long beten bilong yumi, sampela taim yumi inap krai taim yumi autim hevi bilong yumi. Maski i olsem, Jehova i no inap les long putim yau long yumi. Na tu, yumi mas tingim tok i stap long Filipai 4:6, 7. (Ritim.) Pol i tok yumi mas mekim ol beten bilong tok tenkyu long God. I gat planti risen na yumi mas tok tenkyu long Jehova. Yumi ken tok tenkyu long laip bilong yumi, ol naispela samting em i wokim, gutpela pasin laikim bilong em, na gutpela hop em i givim long yumi. Orait, yumi inap kisim wanem skul moa long Hana?

7. Oltaim Hana na man bilong em i save mekim wanem?

⁷ Maski Hana i gat ol hevi, oltaim em i save go wantaim man bilong em long ples bilong lotuim Jehova long Silo. (1 Sml. 1:1-5) Wanpela taim Hana i stap long haus lotu sel na Hetpris Eli i lukim em. Eli i strongim em na tok Jehova i ken givim samting Hana i beten long en.—1 Sml. 1:9, 17.

8. Ol miting inap helpim yumi olsem wanem? Eksplenim.

⁸ Yumi inap kisim gen bel isi sapos yumi go oltaim long ol miting. Long beten bilong kirapim miting, planti taim brata i save askim God long givim holi spirit long yumi. Bel isi em wanpela pasin bilong holi spirit. (Gal. 5:22) Sapos yumi go long miting maski yumi wari na tingting planti, yumi opim rot long Jehova na ol bratasista long strongim na helpim yumi long kisim gen bel isi. Beten na miting em ol nambawan samting Jehova i yusim bilong mekim isi bel bilong yumi. (Hib. 10:24, 25) Yumi ken stori long narapela skul yumi inap kisim long ekspiriens bilong Hana.

9. (a) Wanem samting i no senis long hevi bilong Hana? (b) Pastaim em i bel hevi, tasol wanem senis i kamap?

⁹ Hevi bilong Hana i no pinis wantu tasol, nogat. Taim Hana i lusim haus lotu sel na go bek long ples, em i stap yet long wankain haus em Penina i stap long en. Baibel i no stori long Penina i senisim pasin bilong em. Olsem na ating Penina i tok bilas yet long Hana. Tasol Hana i kisim gen bel isi na em i no larim bel hevi i daunim em. Hana i no bel hevi moa bikos em i putim hevi bilong em long han bilong Jehova. Em i larim Jehova i strongim na mekim isi bel bilong em. Bihain Jehova i bekim beten bilong Hana na em i karim ol pikinini!—1 Sml. 1:19, 20; 2:21.

10. Yumi kisim wanem skul long eksampel bilong Hana?

¹⁰ Yumi inap stap bel isi gen maski hevi i stap yet. Yumi inap givim bel tru long beten na go oltaim long ol miting, tasol sampela hevi bilong yumi inap stap yet. Long stori bilong Hana, yumi kisim save olsem i no gat wanpela samting inap stopim Jehova long mekim isi bel bilong yumi. Jehova i no inap lusim tingting long yumi, na em bai blesim pasin bilong yumi long stap gut long bilip.—Hib. 11:6.

11. Wanem ol samting i mekim na Pol i wari na tingting planti?

¹¹ Planti samting i mekim na Pol i wari na tingting planti. Em i laikim tru ol bratasista, olsem na em i tingting planti long ol hevi i painim ol. (2 Kor. 2:4; 11:28) Taim Pol i mekim wok aposel, planti taim ol birua i paitim em na putim em long kalabus. Na tu, ol narapela samting i mekim em i wari na tingting planti, kain olsem hevi bilong “stap rabis.” (Fili. 4:12) Inap 3-pela taim olgeta, sip em i stap long en i bagarap long solwara, olsem na ating em i save tingting planti taim em i kalap  long bot. (2 Kor. 11:23-27) Olsem wanem Pol i karim hevi bilong wari na tingting planti?

12. Wanem samting i helpim Pol na em i no wari na tingting planti tumas?

¹² Pol i tingting planti na wari taim hevi i painim ol bratasista, tasol em i no traim long stretim hevi bilong ol long strong bilong em yet. Pol i bihainim pasin daun. Em i stretim rot long ol narapela i ken mekim sampela samting bilong helpim kongrigesen. Em i trastim Timoti na Taitus, na em i makim tupela long mekim sampela wok. Wok bilong ol dispela brata i helpim Pol na em i no wari na tingting planti tumas.—Fili. 2:19, 20; Tai. 1:1, 4, 5.

13. Olsem wanem ol elda inap bihainim pasin bilong Pol?

¹³ Askim ol narapela long helpim yu. Olsem Pol, ol elda long nau i save pilim hevi bilong ol narapela, olsem na ol i save tingting planti na wari taim hevi i painim ol bratasista long kongrigesen. Wanpela elda tasol i no inap helpim olgeta insait long kongrigesen. Pasin daun bai kirapim em long serim dispela wok wantaim ol brata i winim mak, na trenim ol yangpela brata na bai ol inap helpim em long lukautim ol sipsip bilong God.—2 Tim. 2:2.

14. (a) Pol i no tingting planti long wanem samting? (b) Yumi inap kisim wanem skul long eksampel bilong em?

¹⁴ Askim ol narapela long strongim yu. Pol i gat pasin daun, olsem na em i askim ol pren long strongim em. Taim em i tok olsem ol narapela i bin strongim em, sampela inap tingim em olsem man i no gat strong, tasol em i no tingting planti long dispela samting. Taim em i raitim pas i go long Filemon, Pol i tok: “Mi kisim bikpela amamas na bel i stap isi taim mi harim stori long pasin laikim bilong yu.” (File. 7) Pol i kolim nem bilong sampela wanbilip em ol i bin strongim em taim em i bel hevi. (Kol. 4:7-11) Taim yumi tokaut olsem yumi nidim tok bilong strongim yumi, ol bratasista bai amamas long sambai long yumi.

15. Olsem wanem Pol i kisim helpim taim hevi i laik daunim em?

¹⁵ Bilip long Tok Bilong God. Pol i save olsem tok bilong Baibel inap strongim em. (Rom 15:4) Na tu, tok bilong Baibel i givim em savetingting na em inap sanap strong na karim kain kain hevi i painim em. (2 Tim. 3:15, 16) Taim Pol i kalabus namba 2 taim long Rom, em i pilim olsem dai bilong em i kam klostu.  Long dispela taim, Pol i mekim wanem? Em i tokim Timoti long kam kwiktaim na bringim “ol skrol.” (2 Tim. 4:6, 7, 9, 13) Wai? Bikos ol dispela skrol i hap bilong Ol Skripsa Hibru em Pol inap yusim long mekim stadi bilong em yet. Taim yumi bihainim eksampel bilong Pol na stadi oltaim long Tok Bilong God, Jehova inap yusim tok bilong ol Skripsa long mekim isi bel bilong yumi—maski yumi bungim wanem kain hevi.

16. Devit i no stretim hevi, olsem na wanem samting i kamap long em?

¹⁶ I gat risen na bel bilong Devit i kotim em na em i tingting planti. Em i mekim pasin adaltri wantaim Batseba, stretim rot long kilim i dai man bilong Batseba, na inap sampela haptaim em i traim long haitim ol rong bilong em. (2 Sml. 12:9) Pastaim, Devit i pilim olsem maus bilong bel i kotim em, tasol em i no stretim hevi. Olsem na em i no pas gut moa wantaim God, na tu, em i bel hevi na sik i painim em. (Sng. 32:3, 4) Olsem wanem Devit i stretim dispela hevi? Olsem wanem yumi inap stretim hevi sapos yumi mekim bikpela rong?

17. Olsem wanem Song 51:1-4 i soim olsem Devit i tanim bel tru?

¹⁷ Beten askim God long fogivim yu. Pastaim Devit i no autim sin bilong em, tasol bihain em i beten long Jehova. Em i tanim bel tru na tokaut long ol rong em i mekim. (Ritim Buk Song 51:1-4.) Dispela i helpim em long stap bel isi tru na amamas gen! (Sng. 32:1, 2, 4, 5) Sapos yu mekim bikpela rong, no ken traim long haitim. Beten na tokim Jehova long rong yu mekim. Bel bilong yu bai stap isi na maus bilong bel i no inap kotim yu. Tasol sapos yu laik stretim gen pasin bilong yu long pas gut wantaim Jehova, orait yu mas mekim sampela samting moa.

18. Devit i mekim wanem taim em i kisim tok bilong stretim em?

¹⁸ Kisim tok bilong stretim yu. Taim Jehova i salim profet Natan i go bilong kamapim klia sin bilong Devit, Devit i no givim eskius o tok olsem em liklik rong tasol, nogat. Em i tokaut olsem em i mekim bikpela rong taim em i kilim man bilong Batseba, na tu, em i mekim sin long ai bilong Jehova. Devit i kisim tok Jehova i givim bilong stretim em, na Jehova i fogivim em. (2 Sml. 12:10-14) Sapos yumi mekim bikpela sin, orait yumi mas toktok  wantaim ol man em Jehova i makim bilong stap olsem ol wasman. (Jems 5:14, 15) Na yumi no ken givim eskius. Taim yumi hariap long kisim na bihainim tok bilong stretim yumi, bai yumi kisim gen bel isi na stap amamas.

19. Yumi mas strongim tingting long mekim wanem?

¹⁹ Strongim tingting long abrusim wankain rong. King Devit i save olsem em i mas kisim helpim i kam long Jehova na bai em i no ken mekim gen wankain rong. (Sng. 51:7, 10, 12) Jehova i fogivim Devit, na Devit i tingting strong long abrusim ol laik nogut. Olsem na em i kisim gen bel isi.

20. Olsem wanem yumi inap soim olsem yumi pilim tru pasin bilong Jehova long fogivim yumi?

²⁰ Taim yumi beten askim God long fogivim yumi, na kisim tok bilong stretim yumi, na traim bes long abrusim wankain rong, yumi soim olsem yumi pilim tru pasin bilong Jehova long fogivim yumi. Taim yumi mekim ol dispela samting, yumi bai kisim gen bel isi. Dispela samting i bin kamap long James, em wanpela brata husat i bin mekim bikpela rong. Em i tok: “Taim mi tokim ol elda long rong mi mekim, mi pilim olsem bikpela hevi i no stap moa long solda bilong mi. Mi pilim olsem mi stap bel isi gen.” Yumi kisim strong taim yumi tingim olsem “Jehova i save stap klostu long ol manmeri em hevi i daunim tru ol; na em i save kisim bek ol manmeri bel bilong ol i bagarap”!—Sng. 34:18.

21. Olsem wanem yumi inap larim Jehova i mekim isi bel bilong yumi?

²¹ Yumi wok long go klostu moa long pinis bilong dispela taim, olsem na planti samting bai mekim yumi wari na tingting planti. Taim yu wari na tingting planti, kwiktaim yu mas beten na askim Jehova long helpim yu. Stadi gut long Baibel. Kisim skul long eksampel bilong Hana, Pol, na Devit. Askim Papa bilong yu long heven long helpim yu long luksave long samting i mekim na yu wari na tingting planti. (Sng. 139:23) Larim em i helpim yu long karim ol hevi we yu yet i no gat strong long karim. Sapos yu mekim olsem, yu bai pilim wankain olsem man bilong raitim song, em i singim song long Jehova na tok: “Taim wari na tingting planti i daunim mi, yu save strongim mi na mekim bel bilong mi i stap isi.”—Sng. 94:19.