1. I yini swingahi yendlaka hi vilela naswona hingaha pimisa yini?

U TSHAMA u vilela * kumbe u karhateka hi mhaka ya nchumu wokarhi? Swinga yendleka u kwatisiwe hi leswi van’wana vangaswi vula kumbe vangaswi yendla. Minkama yin’wana unga vilelisiwa hi leswi wena ungaswi vula kumbe ungaswi yendla. Hi xikombiso, ungaha va u yendle xihoxo ivi u chava swaku Yehovha ange tshuki aku rivalela. Nakambe ungaha pimisa swaku leswi u karhatekaka ngopfu, lipfumelo la wena ali tiyanga naswona awu munhu wa munene. Kambe i ntiyiso leswo?

2. Hi swihi swikombiso swa le Bibeleni leswi kombaka swaku kuvilela ahi kupfumala lipfumelo?

² Ahi voneni swikombiso swingali swingani swale Bibeleni. Hana, lweyi anga gama ava mamana wa muprofeta Samuwele a ani lipfumelo la kutiya. Kambe hi kufamba ka nkama a karhatekile hi leswi a ahluphiwa kaya. (1 Sam. 1:7) Mupostola Pawulo na yena a ani lipfumelo la kutiya. Kambe a ‘akarhateka moyeni’ hi kola ka mabandla. (2 Kor. 11:28) Hosi Davhida a ani lipfumelo la kutiya lakakuva a tsakeliwa hintamu hi Yehovha. (Mint. 13:22) Kambe hi kufamba ka nkama Davhida a yendle swihoxo leswingamu yendla a karhateka ngopfu. (Pis. 38:4) Yehovha a chavelele a tlhela a rhulisa mun’wana ni mun’wana wa vona. Ahi voneni leswi hingaswi djondzaka ka swikombiso leswi.

3. Hi mhaka muni hingaha karhatekaka loko van’wana va vulavula kubiha hi hina?

³ Hinga vilela loko van’wana vahi tlhava hi marito kumbe vangahi khomi kahle, ngopfungopfu loko vanhu va kona va li vanghanu va hina kumbe maxaka. Hingaha karhatiwa hi leswi wunghanu la hina linga wonheka. Minkama yin’wana swingaha yendleka akunga li xikongomelo xa yena kuku vavisa, kambe se aku kwatisile! (Swi. 12:18) Kambe mun’wana angava aku kwatise hi maxivomu. Leswo swi humelele makwerhu mun’wana waxisati lweyi anga mumpsha. Yena a te: “Malembe nyana lawa manga hundza, lweyi animu teka a li munghanu wa mina a sungule kuvulavula kubiha hi mina. Leswo swini kwatisile swi tlhela swini vilelisa. Aningaswi twisisi swaku hi mhaka muni munhu lweyi animu tshemba a game ani djikela.” Loko u kwatisiwile hi munghanu kumbe xaka la wena, unga djondza swotala ka xikombiso xa Hana.

4. Hi swihi swikarato swo tika leswi Hana a kumaneke na swona?

⁴ Hana na yena a boheke kulangutana ni xikarhato xa kufana. Hi malembe yotala a angaswi koti kukuma n’wana. (1 Sam. 1:2) Vayisrayele va kutala ava pimisa swaku loko wansati angamu kumi n’wana, aanga katekisiwanga hi Xikwembu. Hi mhaka leyo, Hana a atitwa na ali ni tingana swinene. (Gen. 30:1, 2) Lexi axi yendla swimu karhatela ngopfu hi leswaku nuna wa yena, a ali ni nsati mun’wana kunga Penina lweyi aamu psalele vana. Penina a amu nyenya Hana naswona a “aatshamela kumu poyila, leswaku Ana a vaviseka.” (1 Sam. 1:6) Akusunguleni aswimu karhatela Hana kuva a langutana ni xiyimu lexi. A akwatile lakakuva ni swakudla aswinga yehli. Hana a avavisekile ngopfu ambilwini. (1 Sam. 1:7, 10) I mpswini swinga chavelela Hana?

5. Xikhongelo ximu pfunise kuyini Hana?

⁵ Hana a phofulele Yehovha leswi a atitwisa xiswona hi xikhongelo. Loko a khongelile a game a tlhamusela Muprista Lwenkulu Eli xiyimu xa yena, ivi Eli a ku: “Famba hi kurhula, Xikwembu axiku nyiki leswi ungaxi kombela swona.” Kuve lihi vuyelo la kona? Hana “a mukile, aya dla, aangaha vavisekanga.” (1 Sam. 1:17, 18) Xikhongelo xi pfune Hana kuva a rhula.

6. Hinga djondza yini hi xikhongelo ka Hana ni ka Vafilipiya 4:6, 7?

⁶ Hingava ni kurhula loko hi tama hi khongela ka Yehovha. Hana a hete nkama wunyingi  na a bula ni Papayi wa yena wale matilweni. (1 Sam. 1:12) Na hina hinga heta nkama wa kuleha nahi bula na Yehovha, himu byela leswihi karhataka, leswi hiswi chavaka ni leswi hi phazamaka ka swona. Aswizi swi lava hi vula marito ya kuxonga kumbe ya kuhetiseka. Minkama yin’wana hinga tsandzeka ku phofula leswi hi titwisaka xiswona ivi hi gama hi rila. Hambileswo, Yehovha angata tshuka a karhala hi kuhi yingisela. Handle ka leswo loko hi khongela hi leswi swihi karhataka hi fanele hi khumbuka marito lamanga ka Vafilipiya 4:6, 7. (Lerha.) Pawulo a kombise swaku hi fanele hi khensa Yehovha hi xikhongelo. Hi ni swivangelo swa kutala leswihi yendlaka hi khensa Yehovha. Hi xikombiso, hingamu khensa hi leswi angahi nyika wutomi, hi leswi anga yendla swilo swa swinyingi swa kuxonga, hi mhaka lirhandzu la yena la kutshembeka ni tshembo lowu angahi nyika wona. I yini swin’wana hingaswi djondzaka ka xikombiso xa Hana?

7. I yini leswi Hana ni nuna wa yena avaswi yendla nkama ni nkama?

⁷ Hambi leswi a akumana ni swikarhato, Hana aaya aXilo ni nuna wa yena nkama ni nkama leswaku vaya gandzela Yehovha. (1 Sam. 1:1-5) Loko Hana ali tabernakeleni, Muprista Lwenkulu Eli amu tiyisile hi kumu byela leswaku a atshemba swaku Yehovha ata hlamula xikhongelo xa yena. — 1 Sam. 1:9, 17.

8. Mintlhanganu yingahi pfunisa kuyini? Tlhamusela.

⁸ Hingava ni kurhula loko hi tama hi ya a mitlhanganwini. Xikhongelo lexi yendliwaka loko mitlhangano yi sungula, xi patsa kuva kukombeliwa leswaku moya wokwetsima wuva na hina. Kurhula i wun’wana wa mihandzu ya moya wa kukwetsima. (Gal. 5:22) Loko hiya mitlhanganwini hambi loko hi karhateka, hiva hi nyika mukhandlu Yehovha ni vamakwerhu kuva vahi tiyisa ni kuhi pfuna swaku hi tlhela hiva ni kurhula. Xikhongelo ni mitlhangano i swilo swa lisima leswi Yehovha aswi tirhisaka kuva ahi rhulisa mbilu. (Hev. 10:24, 25) Ahi voneni swin’wana leswi hinga swi djondzaka ka leswinga humelela Hana.

9. I yini leswi kalaka swinga cincanga ka wutomi la Hana, naswona i mpsini leswingamu pfuna?

⁹ Leswi aswi vilelisa Hana aswi tekelanga kuhela kolano. Loko va sukile a tabernakela va tlhelela kaya, Hana a tlhele aya tshama ka munti wun’we na Penina. Kambe a Bibele ali vule swaku Penina a tshike kumu hlupha. Swi tikomba Hana a afanele a tama a tiyisela xikarhatu xa yena. Kambe se a arhulile. Leswi Hana a atiyiseka swaku Yehovha axi twile xikhongelo xa yena, a tshike kuvilela. A pfumelele Yehovha a rhulisa mbilu ya yena. Hi kufamba ka nkama Yehovha a hlamule xikhongelo xa Hana hi kumu nyika n’wana. — 1 Sam. 1:19, 20; 2:21.

10. Hi djondza yini ka xikombiso xa Hana?

¹⁰ Hingaswi kota kuva ni kurhula hambi loko leswi swihi karhataka swinga heli. Hambi loko hi khongela hintamu ka Yehovha, hi tlhela hi va kona mintlhanganwini nkama ni nkama, swikarhato swin’wana aswingata hela. Kambe xikombiso xa Hana xihi djondzisa swaku akuna nchumu xinga sivelaka Yehovha kuhi rhulisa mbilu. Yehovha ange tshuki ahi rivala naswona siku lin’wana ata kuhakela kutshembeka ka hina. — Hev. 11:6.

11. Hi swilo leswi aswita yendla Pawulo a vilela?

¹¹ Akuni swilo swinyingi leswi aswita yendla Pawulo a vilela. Hi xikombiso, leswi a arhandza vamakwavu, a avilelisiwa hi swikarhato leswi ava kumana na swona. (2 Kor. 2:4; 11:28) Ka ntirho wa yena wa kuchumayela, Pawulo a kumane ni vakaneti, lava avamu ba, va tlhela  vamu peta djele. Nakambe a afanele a tiyiselela swikarhato leswi aswimu yendla a vilela swa kufana ni “kupfumala.” (Filp. 4:12) Leswi a atshame a tshovekeliwa hi boti kanharhu lakakuva kusala kutsongo leswaku a fa, swinga ha yendleka leswo swi yendle leswaku a vilela loko a famba hi boti ka makhambi man’wana. (2 Kor. 11:23-27) I yini xinga pfuna Pawulo loko a vilela?

12. I yini lexinga pfuna Pawulo leswaku anga vileli ngopfu?

¹² Pawulo a avilelisiwa hi swikarhato leswi vamakwavu ava kumana na swona, kambe anga zamanga kuswi lunghisa hi yexe. Pawulo a aswi tiva swaku angeswi koti kuyendla hinkwaswu. A kombele van’wana akuva vamu pfunisa kupfuna vamakwerhu. Hi xikombiso, a nyike wutihlamuleli vavanuna va kutshembeka va kufana na Timotiya na Tito. Aswi kanakanisi swaku ntirho lowu vavanuna lava vawu yendleke wu pumbe kuvilela ka Pawulo. — Filp. 2:19, 20; Tito 1:1, 4, 5.

13. Madoda mangamu tekelelisa kuyini Pawulo?

¹³ Pfumela swaku van’wana va kupfuna. Kufana na Pawulo, kutala ka madoda namuntlha lawa manga ni lirhandzu ma vilela hi swikarhato leswi vamakwerhu va kumanaka na swona. Kambe swinga yendleka doda lin’we lingaswi koti kupfuna hinkwavu abandleni. Loko doda liswi twisisa swaku alingeswi koti kupfuna hinkwavu abandleni, hi kuswi rhandza, lita kombela makwerhu mun’wana lweyi a fanelekaka leswaku ali pfuna kuhlayisa a ntlhambi wa Xikwembu. — 2 Tim. 2:2.

14. I yini leswi Pawulo aanga vileli hi swona naswona hi djondza yini ka xikombiso xa yena?

¹⁴ Pfumela swaku waswi lava kuchaveleliwa. Leswi Pawulo a ativeka hansi aaswi tiva swaku aaswi lava kutiyisiwa hi vanghanu va yena. A anga vilelisiwi hi leswaku van’wana vata pimisa yini loko vamu vona na a pfuniwa hi vanghanu va yena. Loko a tsalela Filimoni Pawulo a te: ‘Nivile ni kutsaka swinene ni kukufumela hikolaho ka lirhandzu la wena.’ (Fil. 7) Pawulo a tlhele a vulavula hi vatirhi kulobye lavangamu pfuna loko a li kuvileleni (Kol. 4:7-11) Loko hi tiveka hansi hitaswi twisisa swaku haswi lava kutiyisiwa naswona vamakwerhu vataswi tsakela kuhi pfuna hilaha hi lavaka ha kona.

15. I yini leswi Pawulo angaswi yendla loko a kumana ni xiyimu xa kutika?

¹⁵ Djondza Rito La Xikwembu nkama ni nkama. Pawulo aaswi tiva swaku Matsalwa mangamu tiyisa. (Rhom. 15:4) Amatamu nyika  wutlhari kuva a kota kulwisana ni miringo. (2 Tim. 3:15, 16) Ankama anga pfaleliwa djele ka wumbirhi, Pawulo aswi vonile swaku lifu la yena a li li kusuhi. Ka xiyimu xolexo xa kukarhata a yendle yini? A kombele Timotiya swaku amu yela ni tibuku “letosonga”. (2 Tim. 4:6, 7, 9, 13) Hi mhaka muni? Hi mhaka mabuku lawo ama ni matsalwa ya Xiheberu lawa Pawulo aatama tirhisa loko a yendla djondzo ya munhu hi yexe. Loko hi tekelela Pawulo hi kudjondza Rito la Xikwembu nkama ni nkama, Yehovha ata tirhisa Matsalwa akuva ahi rhulisa mbilu hambiloko hi kumana ni swikarhato swa kutika.

16. Davhida a titwise kuyini loko a yendle xidjoho lexikulu?

¹⁶ Davhida a ayendle swilo swa kubiha. A mbuyetile na Bati-xeba, a tlhela a boha makungu ya kudlaya nuna wa yena naswona kuringana nkama nyana a zame kufihla xidjoho xa yena. (2 Sam. 12:9) A kusunguleni Davhida a zame kukala anga na mhaka ni leswi lipfalo la yena alimu byela swona. Kambe leswo swi wonhe wuxaka la yena na Yehovha naswona swi yendle swaku a vilela a tlhela a vabya. (Pis. 32:3, 4) I yini leswinga pfuna Davhida akuva a kota kulwisana ni kuvilela loko aayo tilavela kona naswona hinga djondza yini loko hi yendle xidjoho lexikulu?

17. Hi kuya hi Tipisalema 51:1-4, hiswi vonisa kuyini swaku Davhida a tisolile hikakunene?

¹⁷ Khongela u kombela rivalelo. Davhida a game a khongela ka Yehovha. A tisolile a tlhela a byela Yehovha hinkwaswu leswi a aswi yendlile. (Lerha Tipisalema 51:1-4.) Leswo swimu pfunile akuva a kuma kurhula ni kutlhela a tsaka. (Pis. 32:1, 2, 4, 5) Na wena loko u yendle xidjoho lexikulu unga zame kuxi tumbeta. Kuhambana ni leswo, khongela ka Yehovha, umu byela hinkwaswu ungaswi yendla. Uta titwa na u rhulile naswona lipfalu la wena alingeku karhati. Kambe loko u lava kutlhela uva ni wuxaka lalinene na Yehovha, kulaveka u yendla swa kutlula leswo.

18. Davhida a yendle yini loko a layiwa?

¹⁸ Pfumela kulayiwa. A nkama lowu Yehovha anga rhumela Nathani kuya komba Davhida xidjoho xa yena, Davhida anga tinyimelelanga kumbe kuringeta kuvevukisa nandzu wa yena. A tekele kupfumela swaku anga djohelanga nuna wa Bati-xeba ntsena, kambe a djohele ngopfu Yehovha. Davhida a pfumele kulayiwa  hi Yehovha naswona Yehovha amu rivalelile. (2 Sam. 12:10-14) Loko ku li swaku hi yendle xidjoho xa xikulu hi fanele hiya byela lava Yehovha angava veka akuva vahi risa. (Yak. 5:14, 15) Naswona ahi fanelanga hi tinyimelela kumbe hi vevukisa nandzu wa hina. Mudjohi lweyi a tekelaka kupfumela kulayiwa a tlhela a tirhisa leswi a byeliwaka swona, angaswi kota kuva ni kurhula niku tlhela a tsaka.

19. Hi fanele hi tiyimisela kuyendla yini?

¹⁹ Tiyimiseli kukala ungaha phindhi xidjoho xa kona. Hosi Davhida a aswi tiva swaku akuva angaha tlheli a phindha swidjoho swa yena a kulaveka a pfuniwa hi Yehovha. (Pis. 51:7, 10, 12) Loko se a rivaleliwile hi Yehovha, Davhida a tivekisele kukala angahavi ni kunavela ka kubiha. Leswi swimu pfune leswaku a tlhela a kuma kurhula mbilwini.

20. Hingaswi kombisa kuyini swaku ha kunyika lisima kurivalela ka Yehovha?

²⁰ Hi kombisa swaku ha kunyika lisima kurivalela ka Yehovha loko hi khongela ka yena hi kombela swaku ahi rivalela, hi pfumela kulayiwa ni hi kukala hingaha phindhi swidjoho swa kona. Loko hi yendla swilo leswi, hita tlhela hi kuma kurhula ambilwini. James, makwerhu mun’wana lweyi a yendleke xidjoho xa xikulu, aswi vonile swaku leswo i ntiyiso. A te: “Loko ni byele madoda hi xidjoho xa mina, ni titwe ingi hi loko niyo rhuliwa ndzhwalu wa kutika ka makatla ya mina. Ni sungule kuva ni kurhula ka miyehleketo.” Hikakunene swa chavelela kutiva swaku “Yehovha a kusuhi ni lava tshovekeke mbilu; Wava ponisa lava pfotlokeke mbilu.” — Pis. 34:18.

21. Hi fanele hi yendla yini akuva Yehovha ahi rhulisa mbilu?

²¹ Leswi magamu manga kusuhi, kungaha va ni swilo swa swinyingi leswingahi yendlaka hi vilela. Loko u tshuka u sungula kukarhateka, tekela kukhongela ka Yehovha u kombela swaku aku pfuna. Djondza Bibele nkama ni nkama. Djondza ka Xikombiso xa Hana, xa Pawulo na Davhida. Kombela Yehovha, Papayi wa wena wa matilweni akuva aku pfuna kutwisisa leswi swiku yendlaka u vilela. (Pis. 139:23) Pfumelela Yehovha aku pfuna kulangutana ni swilo leswi swiku vilelisaka, ngopfungopfu loko u vona swaku awungeswi koti kuswi hlula hi matimba ya wena. Loko u yendla leswo, uta fana ni mupisalema lweyi anga yimbelela a ku: “Laha kuvilela kuni karhateke, uni chavelelile u tlhela uni rhulisa.” — Pis. 94:19.