1. Eaha te nehenehe e faatupu i te ahoaho e eaha te manaˈo e hiti mai?

 UA AHOAHO b aˈenei outou no te parau aore ra ohipa a te tahi taata? Peneiaˈe, o outou tei faahiti aore ra tei rave i te hoê ohipa tano ore. Ua hara paha outou a haapeapea ˈtu ai eita o Iehova e faaore i ta outou hara. Te mea ino roa ˈtu, no te ahoaho, e hiti roa mai paha te manaˈo e taata paruparu outou e te faufaa ore.

2. Ia ahoaho tatou, te auraa anei e faaroo paruparu to tatou? A horoa i te hiˈoraa.

² E faaroo puai to Hana, te metua vahine o Samuela. Noa ˈtu râ, ua ahoaho oia a haamauiui ai te hoê mero utuafare ia ˈna. (Sam. 1, 1:7) E faaroo aueue ore to te aposetolo Paulo, ua tapitapi râ oia “no te mau amuiraa atoa.” (Kor. 2, 11:28) Ua tauturu te hoê faaroo puai i te arii Davida ia riro ei taata herehia e Iehova. (Ohi. 13:22) Noa ˈtu râ, ua rave Davida i te hara e ua teimaha roa to ˈna aau i te ahoaho. (Sal. 38:4) Ua faarue anei Iehova i teie na tavini e toru? Aita, ua tamahanahana e ua tamǎrû oia i to ratou aau. E hiˈo anaˈe e nafea tatou e faufaahia ˈi i te hiˈoraa o Hana, o Paulo e to Davida.

3. Eaha te mau parau o te faatupu i te ahoaho?

³ E ahoaho aore ra e haapeapea paha tatou no te parau aore ra ohipa ino a vetahi ê. Mea mauiui roa mai te peu na te hoê hoa piri aore ra mero utuafare i na reira mai. E  haapeapea paha tatou ia tupu te au ore i rotopu ia tatou. I te tahi taime, e faahiti te tahi i te parau feruri-ore-hia o tei au i te ˈoˈe patiatia ra te huru! (Mas. 12:18) Peneiaˈe, ua maiti roa i te faahiti i te tahi parau teiaha no te haamauiui ia tatou. Te na ô ra te tahi tuahine tei farerei i tera tupuraa: “Tau matahiti i teie nei, ua faatia haere te hoê taata ta ˈu i faariro na ei hoa i te parau no nia ia ˈu i nia i te natirara. Ua haapeapea vau e ua mauiui roa to ˈu aau. Aita vau i taa no te aha o ˈna i na reira ˈi na muri mai i to ˈu tua.” Ua ahoaho aˈenei outou no te parau aore ra ohipa a te hoê hoa aore ra mero utuafare? Mai te peu e e, e haapiiraa ta outou e nehenehe e huti mai i te hiˈoraa o Hana.

4. Eaha te mau tupuraa fifi ta Hana i faaruru?

⁴ Ua faaruru Hana e rave rau tupuraa fifi. E rave rahi matahiti te maoro, aita Hana i nehenehe e fanau i te tamarii. (Sam. 1, 1:2) E tupuraa haama roa. I tahito ra, i manaˈo na to Iseraela aita te Atua e haamaitai ra i te hoê vahine tei ore i tamariihia. (Gen. 30:1, 2) Taa ê noa ˈtu i te reira, o Penina te tahi atu vahine a ta ˈna tane e ua fanau oia i te tamarii. Ua faariro râ Penina ia Hana ei enemi, e hopea ore oia i te faahaama e te haamauiui ia Hana. (Sam. 1, 1:6) I te haamataraa, ua ahoaho roa Hana no taua tupuraa ra. No te peapea o to ˈna aau, “oto ihora Hana, e aore aˈera i amu i te maa.” (Sam. 1, 1:7, 10) Ua tae roa i te hoê faito ua “inoino roa” te aau o Hana. Mea nafea o ˈna i te tamahanahanaraahia?

5. Mea nafea te pure i te tautururaa ia Hana?

⁵ Ua faaite Hana i te mau manaˈo atoa o to ˈna aau ia Iehova na roto i te pure. Ua faataa atoa oia i to ˈna tupuraa i te tahuˈa rahi ra o Eli. Parau maira Eli ia Hana: “Ia ora na oe i te haerea; e ia faatia mai hoi te Atua no Iseraela i ta oe i ani atu ia ˈna.” Eaha tei tupu i muri iho? Ua haere atura Hana, ua amu i te maa e aita to ˈna mata i peapea faahou. (Sam. 1, 1:17, 18) Ua tamǎrû mau te pure i te aau o Hana.

6. Eaha te haapiiraa e huti mai no nia i ta Hana pure e e nafea tatou ia haapao i te aˈoraa i roto i te Philipi 4:6, 7?

⁶ E tamǎrû Iehova i to tatou aau ia tamau tatou i roto i te pure. Ua paraparau maoro Hana i to tatou Metua i te raˈi.  (Sam. 1, 1:12) E nehenehe ta tatou pure e roa-atoa-hia ia faaite tatou ia Iehova i ta tatou mau hara aore ra te tumu e ahoaho e e taiâ ˈi tatou. Eita e titauhia ia faahiti i te mau parau nehenehe roa. I roto i te pure, e matara mai paha te parau mauiui no te inoino o to tatou aau, e maumau atoa paha ta tatou pure a taˈi ai tatou. Noa ˈtu râ, e faaroo noa Iehova ia tatou ma te faaoromai. Eita tatou e pure noa ia ˈna i te taime fifi, e haamanaˈo râ tatou i te aˈoraa e horoahia ra i roto i te Philipi 4:6, 7. (A taio.) Te faaite ra Paulo e titau-atoa-hia ia haamaitai, aore ra ia haamauruuru, ia Iehova. E rave rahi tumu e na reira ˈi tatou, no te ora anei ta Iehova i horoa mai, te mau mea ta ˈna i poiete, no to ˈna here tamau aore ra te tiaturiraa faahiahia ta ˈna i horoa mai. Eaha ˈtu â te haapiiraa e huti mai i te hiˈoraa o Hana?

7. Eaha ta Hana raua ta ˈna tane i tamau na i te rave?

⁷ Noa ˈtu to ˈna mau fifi, aita Hana i mairi i te apee i ta ˈna tane no te haere e haamori ia Iehova i Silo. (Sam. 1:1-5) Tei te sekene hoi o Hana a parau atu ai te tahuˈa rahi ra o Eli ia horoa mai Iehova i ta ˈna i ani atu na roto i te pure.—Sam. 1:9, 17.

8. E nafea te mau putuputuraa e tauturu ai ia tatou? A faataa.

⁸ E tamǎrû Iehova i to tatou aau ia tamau tatou i te apiti i te mau putuputuraa. I roto i te pure omuaraa o te mau putuputuraa, e anihia te varua moˈa o te Atua. E hoê tuhaa o te hotu o te varua, o te hau ïa. (Gal. 5:22) E ravea te pure e te mau putuputuraa no te fanaˈo i te hau no ǒ mai ia Iehova. (Heb. 10:24, 25) Ia tae tatou i te putuputuraa noa ˈtu to tatou ahoaho, te vaiiho ra ïa tatou ia Iehova e i te mau taeae e tuahine ia tamǎrû i to tatou feruriraa e aau. E haapiiraa ê atu ta te tupuraa o Hana e horoa mai ra.

9. Ua taui oioi anei te tupuraa o Hana? Eaha râ tei tauturu ia ˈna?

⁹ Aita te tumu o to Hana ahoaho i ore oioi. A hoˈi mai ai na te sekene, ua ora noa â Hana i roto i te hoê â fare e to Penina. Aita atoa te Bibilia e faaite ra ua taui te huru o Penina. Te auraa, ua titauhia ia Hana ia faaoromai â i te mau parau mauiui a Penina. I teie râ taime, aita Hana i haapeapea faahou. Eaha te tumu? Ua oti Hana i te tuu i to ˈna fifi i roto i te rima o Iehova. Ua vaiiho oia ia Iehova ia tamahanahana e ia tamǎrû i to ˈna aau. Tau taime i muri aˈe, ua haamaitai Iehova ia Hana e ua fanau oia i te tamarii!—Sam. 1, 1:19, 20; 2:21.

10. Eaha te haapiiraa ta tatou i huti mai na roto i te hiˈoraa o Hana?

¹⁰ E tamǎrû Iehova i to tatou aau noa ˈtu aita te tumu o to tatou ahoaho i ore. Eita paha to tatou tupuraa e maitai oioi mai noa ˈtu e tamau tatou i te pure e i te apiti i te mau putuputuraa. Na roto râ i te hiˈoraa o Hana, ua haapapu mai Iehova eita roa te hoê mea e nehenehe e tapea ia ˈna ia tamǎrû i to tatou aau paruparu. Ta tatou tuhaa, o te tiaturiraa ia Iehova, te vaiihoraa ïa i to tatou fifi i roto i to ˈna rima. Eita roa tatou e moˈe ia Iehova, e haamaitai mai iho â oia ia tapea tatou i to tatou haapao maitai.—Heb. 11:6.

11. Eaha te tumu i ahoaho ai Paulo i te tahi taime?

¹¹ E rave rahi tumu i ahoaho ai te aposetolo Paulo. Ua haapeapea roa oia no te mau taeae e tuahine a faaruru ai ratou i te fifi rahi. (Kor. 2, 2:4; 11:28) I te roaraa  o ta ˈna taviniraa, e rave rahi enemi tei hamani ino e tei huri ia Paulo i roto i te fare tapearaa. Ua ahoaho atoa oia i roto i te tahi atu mau tupuraa mai te ereraa i te maa. (Phil. 4:12) E toru atoa taime to Paulo atiraa a parari ai te pahi e ua fatata roa i te pohe. Ua haapeapea roa paha Paulo na mua ˈˈe a faareva ˈi na nia i te pahi. (Kor. 2, 11:23-27) Eaha râ tei tamǎrû ia Paulo?

12. Eaha tei tamǎrû i te feruriraa e aau o Paulo?

¹² Parau mau, ua haapeapea Paulo no te mau taeae e tuahine, aita râ oia i manaˈo e afaro to ratou mau fifi ia ˈna anaˈe. Ua farii Paulo eita ta ˈna e nehenehe e rave i te mau ohipa atoa. Faanaho atura ia tauturuhia o ˈna no te aupuru i te amuiraa. Ei hiˈoraa, ua vaiiho oia i te tahi mau hopoia i roto i te rima o te tahi atu mau taeae tiaturihia mai ia Timoteo raua Tito. Papu roa e ua tamǎrû mau te reira i te feruriraa e te aau o Paulo.—Phil. 2:19, 20; Tito 1:1, 4, 5.

13. E nafea te mau matahiapo e pee ai i te hiˈoraa o Paulo?

¹³ A ani i te tauturu a vetahi ê. Mai ia Paulo, e rave rahi matahiapo î i te here o te haapeapea rahi nei no te mau taeae e tuahine e fifi ra i roto i te amuiraa. Eita râ e tia i te hoê anaˈe matahiapo ia tauturu i te mau mero atoa. Ia haamanaˈo te mau matahiapo i te reira, e tufa ratou i te hopoia i te tahi atu mau taeae tiaturihia e e faaineine atoa i te mau taeae apî no te aupuru maite i te nǎnǎ a te Atua.—Tim. 2, 2:2.

14. Eaha ta Paulo i ore i haapeapea e eaha te haapiiraa ta tatou e huti mai?

¹⁴ A farii e hinaaro outou i te tamahanahanaraa. No to ˈna haehaa, ua imi e ua farii Paulo i te faaitoitoraa a to ˈna mau hoa. A ani ai i te tamahanahanaraa a vetahi ê, aita roa ˈtu Paulo i haapeapea aˈunei e manaˈohia ˈi e taata paruparu oia. I to ˈna papairaa ia Philemona, ua na ô oia: “Ua oaoa e ua mahanahana roa hoi to ˈu aau i te faaroorooraa i to oe here.” (Philem. 7) Ua faahiti atoa Paulo i te iˈoa o te mau hoa ohipa tei faaitoito rahi ia ˈna i te taime fifi. (Kol. 4:7-11) Ia farii atoa tatou ma te haehaa e hinaaro tatou i ta vetahi ê faaitoitoraa, e oaoa roa te mau taeae e tuahine i te tauturu mai i te taime hinaarohia.

15. Eaha tei tamǎrû ia Paulo i te taime fifi?

 ¹⁵ A vaiiho i te Parau a te Atua ia tamǎrû ia outou. Ua ite Paulo e fanaˈo oia i te tamahanahanaraa na roto i te mau Papai moˈa. (Roma 15:4) Ua tauturu atoa te reira ia ˈna ia haa ma te paari i mua i te ati. (Tim. 2, 3:15, 16) A tapeahia ˈi Paulo i te piti o te taime i Roma, ua taa ia ˈna ua fatata to ˈna hora. Ua nafea Paulo i tera taime ahoaho mau? Ua ani oia ia Timoteo ia hopoi oioi mai i “te mau otaro.” (Tim. 2, 4:6, 7, 9, 13) E au ra e e tuhaa teie mau otaro o te mau Papai Hebera o ta Paulo e nehenehe e faaohipa i roto i ta ˈna iho haapiiraa Bibilia. E pee anaˈe i te hiˈoraa o Paulo ma te haapii tamau i te Parau a te Atua, e tamǎrû ïa Iehova i to tatou feruriraa e aau noa ˈtu eaha te fifi ta tatou e faaruru.

16. Eaha te faahopearaa a rave ai Davida i te hara?

¹⁶ Ua ahoaho rahi atoa te arii Davida i to ˈna raveraa i te hara. Ua faaturi oia e o Bate-seba, ua rave i te faanahoraa no te haapohe i te tane a tera vahine e ua huna i ta ˈna mau hara maa taime. (Sam. 2, 12:9) I te haamataraa, aita Davida i tâuˈa i to ˈna manaˈo haava. Eaha te faahopearaa? Ua fifi to ˈna auhoaraa e o Iehova, ua teimaha to ˈna feruriraa e aau e ua maˈi-roa-hia. (Sal. 32:3, 4) Eaha tei tamǎrû ia Davida i to ˈna raveraa i te hara? Eaha te tauturu mai ia rave noa ˈtu tatou i te hara?

17. I roto i te Salamo 51:1-4, mea nafea e itehia ˈi ua tatarahapa mau Davida i ta ˈna mau hara?

¹⁷ A ani ia Iehova ia faaore i ta outou hara. I muri mai, ua faˈi Davida i ta ˈna mau hara ia Iehova ma te aau tatarahapa mau e te haavare ore. (A taio i te Salamo 51:1-4.) Ua tamǎrû mau te reira i te feruriraa e te aau o Davida e oaoa faahou maira oia. (Sal. 32:1, 2, 4, 5) Ia hara noa ˈtu outou, eiaha e huna, a faˈi râ i ta outou hara ia Iehova na roto i te pure. E faaea ïa to outou manaˈo haava i te faahapa ia outou e e tamǎrû te reira i to outou feruriraa e aau. Ia maitai faahou râ to outou auhoaraa e o Iehova, eita e navai noa ia pure.

18. Mai te aha te huru o Davida i te aˈoraahia o ˈna?

¹⁸ A farii i te aˈo. I to Iehova tonoraa i  te peropheta Natana ia Davida ra, aita Davida i imi i te otoheraa. Ua farii oioi oia ua haamauiui ta ˈna hara eiaha noa i te tane a Bate-seba, ia Iehova atoa râ. Ua farii Davida i te aˈo e faaore aˈera Iehova i ta ˈna hara. (Sam. 2, 12:10-14) Ia rave noa ˈtu tatou i te hara, e faaite anaˈe i te reira i te feia ta Iehova i faatoroa no te aupuru ia tatou. (Iak. 5:14, 15) Eiaha e imi i te otoheraa. Ia farii oioi tatou i te aˈo, oioi atoa ïa to tatou feruriraa e aau i te tamǎrûhia!

19. Ia faaoti papu tatou i te aha e tia ˈi?

¹⁹ A faaoti papu eiaha e tapiti i ta outou hara. Ua ite Davida e hinaaro o ˈna i ta Iehova tauturu no te ore e tapiti i ta ˈna hara. (Sal. 51:7, 10, 12) I to Iehova faaoreraa i ta ˈna hara, ua faaoti papu Davida eiaha te mau manaˈo tia ore ia haaviivii faahou i to ˈna feruriraa. I reira noa to ˈna aau i te tamǎrûraahia.

20. E nafea ia faaite i te mauruuru ia faaore Iehova i ta tatou hara?

²⁰ E faaite tatou i te mauruuru ia Iehova ia pure tatou ia ˈna no te faaore i ta tatou hara, ia farii tatou i te aˈo e ia ore tatou ia tapiti i ta tatou hara. E tamǎrû mau te reira i to tatou feruriraa e aau. Tera mau ta te taeae James i haapapu, te na ô ra oia: “I to ˈu faˈiraa i ta ˈu hara i te mau matahiapo, mai te huru ra e e ofai rahi tei tatarahia mai nia mai i to ˈu tua. Ua topa roa to ˈu hau i muri mai.” Mea mahanahana ia ite “te fatata nei Iehova i te feia aau paruparu ra; e te faaora nei oia i te taata aau taiâ.”—Sal. 34:18.

21. E nafea ia vaiiho ia Iehova ia tamǎrû i to tatou feruriraa e aau?

²¹ A piri noa mai ai te hopea, e rahi atu â te tumu e ahoaho ai tatou. I tera mau taime, e imi oioi anaˈe i te tauturu a Iehova. E haapii maite anaˈe i te Bibilia e e pee anaˈe i te hiˈoraa o Hana, o Paulo e to Davida. E ani anaˈe i te tauturu a to tatou Metua i te raˈi no te ite i te tumu e haapeapea ˈi tatou. (Sal. 139:23) I mua i te tupuraa aita e ravea ta tatou, e tuu anaˈe i te reira i roto i te rima o Iehova! E himene ïa tatou mai te papai salamo tei parau ia Iehova: “A rahi roa mai ai te manaˈo tapitapi i roto ia ˈu, ua tamahanahana e ua tamǎrû oe ia ˈu.”—Sal. 94:19, NWT.