1. Маин сэрен ми сюлэмшугъяськыны быгатӥськомы но кызьы со ми вылын шӧдӥськыны быгатэ?

 НЮРЪЯСЬКИДЫ-А тӥ куке но сюлэмшугъяськонэн b? Оло нош тӥ сюлмаськиськоды, малы ке шуоно кин ке но тӥледыз кылъёсыныз яке ужъёсыныз вӧсь кариз. Оло нош тӥляд сюлэмды интыяз ӧвӧл, малы ке шуоно тӥ асьтэос кинэ ке но вӧсь кариды. Яке тӥ янгышады но малпаськоды, вылды, Иегова тӥледыз ноку но простить уз кары шуыса. Но тӥ малпаны быгатоды, тӥ та сярысь сокем сюлмаськиськоды бере, тӥляд осконды ляб но тӥ урод адями луиськоды шуыса. Нош озьы-а со?

2. Библиысь кыӵе учыръёс возьмато, милям сюлэмшугъяськонъёсмы ляб осконмы сярысь уг верало шуыса?

² Эскеромы Библиысь куд-ог учыръёсты. Анналэн, Самуил пророклэн анаезлэн, юн осконэз вал. Озьы ке но со сюлэмшугъяськыса улӥз, малы ке шуоно картэзлэн мукет кышноез соин ассэ умойтэм возиз (1 Экс. 1:7). Апостол Павеллэн но юн осконэз вал, озьы ке но ачиз сярысь со гожтӥз: «Вань черкъёс [«кенешъёс», ВД] сярысь но мыным сюлмаськыны кулэ» (2 Кор. 11:28). Давид эксэйлэн юн осконэз вал, со понна Иегова сое туж яратӥз (Ап. уж. 13:22). Озьы ке но Давид янгышъёс лэсьтӥз, кудъёсыз сое сюлмаськытӥзы (Пс. 37:5). Иегова соос пӧлысь котькудзэ буйгатӥз но котькудӥзлы  каньыллык сётӥз. Ойдолэ эскеромы, малы милемыз дышетыны быгато та учыръёс.

3. Малы милям кӧтмы ӝож луыны быгатэ, куке кин ке но вӧсь карись кылъёс вера?

³ Куке милемын чурыт верасько яке асьсэды лек возё, милям кӧтмы ӝож луыны быгатэ, уката но милемыз матысь эшмы яке ӵыжы-выжымы вӧсь каре ке. Ми сюлмаськыны быгатомы, кусыпъёсмы сӧриськизы шуыса. Куд-огъёсыз малпаськытэк вераны быгато но пуртэн вандэм кадь вӧсь каро (Мад. 12:18). Нош куд-огъёсыз валаса вылысь верало сыӵе кылъёсты, кудъёсыз милемыз золгес вӧсь карысалзы. Таӵе учырен пумиськиз одӥг егит сузэр. Со вера: «Кӧня ке аръёс талэсь азьло нылаш, кудзэ мон эшеным лыдъяй, интернетын мон сярысь пӧяса вераны кутскиз. Мыным туж вӧсь вал! Мон валаны ӧй быгаты, малы со монэн ассэ озьы возиз». Тӥледыз матысь эшты яке ӵыжы-выжыды вӧсь кариз ке, тӥледлы Анналэн учырез юрттоз.

4. Кыӵе югдуре сюриз Анна?

⁴ Анна секыт югдуре шедиз. Трос аръёс ӵоже солэн нылпиосыз ӧй вал (1 Экс. 1:2). Израиль калыкысь тросэз малпазы, кышномурт нылпи вайыны уг быгаты ке, Иегова сое бакель уг кары шуыса. Сыӵе кышномуртъёс асьсэды ултӥямен шӧдӥзы (Ул.-выл. 30:1, 2). Вал на эшшо одӥг муг, кудӥз сэрен Анналы эшшо секытгес луылӥз. Солэн картэзлэн вал мукет кышноез, Феннана, кудӥз солы нылпиос вайылӥз. Феннана Анналы вожъяськиз но сое «туж ӝоже уськытылӥз, Анна ӝожъяськыны мед кутскоз шуыса» (1 Экс. 1:6). Та югдур кылдэмен, Анна сюлэмшугъяськыса улӥз. Солы сокем секыт вал, со «бӧрдэ, уг но сиськы вал» (1 Экс. 1:7, 10). Кытысь Анна буйгатскон шедьтӥз?

5. Кызьы Анналы вӧсяськон юрттӥз?

⁵ Анна Иеговалы вӧсяськиз но солы сюлэмзэ усьтӥз. Собере кылдэм югдурез сярысь со вераз быдӟым священниклы, Илийлы. Нош Илий солы шуиз: «Каньылэн мын, Израильлэн Инмарез курондэ быдэстоз, мар тон Солэсь курид». Кызьы со Анна вылын шӧдӥськиз? Библиын гожтэмын, со «отысь кошкиз; сиськиз, азьло кадь ымнырыз ӝож тусъем ӧй ни вал» шуыса (1 Экс. 1:17, 18). Вӧсяськон Анналы буйгатскыны юрттӥз.

6. Малы дышетэ милемыз вӧсяськон пумысен Анналэн учырез но Филиппыослы 4:6, 7 гожтэм кылъёс?

⁶ Ми каньыл сюлмын улыны быгатомы,  ялан вӧсяськимы ке. Анна кема вераськиз инмысь Атаеныз (1 Экс. 1:12). Милемлы но дырмес жаляно ӧвӧл, Иеговалы сюлмаськонъёсмы, кышканъёсмы но янгышъёсмы сярысь веран понна. Вӧсяськонъёсмы одно ик чебер кылъёсын верамын но кылбур кадь вольыт луыны кулэ ӧвӧл. Сюлэмшугъяськонъёсмы сярысь Иеговалы веракумы, куддыръя ми бӧрдыны но быгатӥськомы. Сыӵе дыръёсы но Иегова милемыз кылзыны уг жадьы. Вӧсяськыкумы ми Инмарлы шуг-секытъёсмы сярысь гинэ вераны кулэ ӧвӧл, нош озьы ик лыдэ басьтоно визь-кенешез, кудӥз гожтэмын Филиппыослы 4:6, 7 (лыдӟе). Павел пусйиз, вӧсяськыкумы ми Иеговаез тау карыны кулэ шуыса. Но со понна милям трос мугъёсмы вань. Кылсярысь, солы тау шуыны луэ милемлы улон кузьмамез понна, паймымон кылдытэмъёсыз, оскымон яратонэз но вуоноезлы оскон сётэмез понна. Малы эшшо дышетэ на милемыз Анналэн учырез?

7. Мар ялан каризы Анна но солэн картэз?

⁷ Сюлэмшугъяськонъёсыз шоры учкытэк, Анна картэныз ӵош Сӥлом каре ялан ветлӥз, Иеговалы йыбыртъян понна (1 Экс. 1:1—5). Скиния дорын быдӟым священник, Илий, Аннаез юнматӥз но оскытӥз, Иегова вӧсяськемезлы ответ сётоз шуыса (1 Экс. 1:9, 17).

8. Кызьы милемлы юрттыны быгато кенешлэн пумиськонъёсыз?

⁸ Ми каньыл сюлмын улыны быгатомы, азьланяз но христиан пумиськонъёсы ветлӥмы ке. Котькуд пумиськонлэн кутсконаз вын-агайёс ӵем дыръя вӧсясько, Иегова милемлы святой духсэ мед сётоз шуыса. Тупаса улон, яке каньыл сюлмын улон, духлэн емышез пӧлы пыре (Гал. 5:22). Шуг-секытъёсмы шоры учкытэк, ми христиан пумиськонъёсамы ветлӥськомы ке, соку Иегова, озьы ик вын-агайёс но сузэр-апайёс милемыз буйгатыны быгатозы но каньыл сюлмын улыны юрттозы. Вӧсяськонъёс но пумиськонъёсы ветлон туж кулэ луо, Иегова милемыз буйгатыны мед быгатоз шуыса (Евр. 10:24, 25). Нош табере эскеромы, малы эшшо дышетэ на милемыз Анналэн учырез.

9. Мар Анналэн улоназ азьло сямен кылиз, нош мар воштӥськиз?

⁹ Анналэн шуг-секытъёсыз син куспын ӧз быре. Куке Анна, Илиен вераськемез бере, дораз берытскиз, со азьло сямен ик Феннанаен одӥг коркан улӥз. Но Библиын уг вераськы, Феннана Аннаен ассэ мукет сямен возьыны кутскиз шуыса. Анналы азьланяз но солэсь вӧсь карись кылъёссэ чидано луиз, вылды. Нош табере Анна соин сэрен сюлэмшугъяськыса ӧз улы. Куке Анна Иеговалы оскиськиз, со ӧз сюлмаськы ини. Анна Иеговалы лэзиз сое буйгатыны но сюлэмзэ каньыл карыны. Нош кӧня ке дыр ортчыса, Иегова вӧсяськемезлы ответ сётӥз, но солэн нылпиез вордӥськиз! (1 Экс. 1:19, 20; 2:21).

10. Малы эшшо дышетэ на милемыз Анналэн учырез?

¹⁰ Ми каньыл сюлмын улыны быгатомы, шуг-секыт озьы ик кыле ке но. Ми ӟырдыт мылкыдын вӧсяськиськомы но пумиськонъёсы ялан ветлӥськомы ке но, куд-ог шуг-секытъёс нокытчы уг пыро. Нош Анналэн учырез дышетэ милемыз, сыӵе югдуръёсын но Иегова буйгатыны но каньыллык сётыны быгатэ шуыса. Иегова милемыз ноку уз вунэты но оскымон кылеммы понна одно ик бакель кароз (Евр. 11:6).

11. Кыӵе мугъёсын сэрен Павел сюлэмшугъяськыса улӥз?

¹¹ Павеллэн сюлэмшугъяськыны трос мугъёсыз вал. Кылсярысь, со туж сюлмаськиз шуг-секытъёс сэрен, кудъёсыныз вын-агайёс но сузэр-апайёс пумиськылӥзы, малы  ке шуоно соос Павеллы туж дуно пото вал (2 Кор. 2:4; 11:28). Куке Павел апостол луыса ужаз-тыршиз, пумитъяськисьёс сое жугылӥзы но пытсэтэ пуктылӥзы. Со «начар улонэз» тодӥз, озьы ик мукет шуг-секытъёсты но чидано луиз (Флп. 4:12). Павел ог куинь пол корабль куашкан-выёнэ учыралляз бере, со юн куректыса улӥз, дыр (2 Кор. 11:23—27). Мар юрттӥз Павеллы сюлэмшугъяськытӥсь малпанъёссэ вормыны?

12. Мар юрттӥз Павеллы ӧжытгес сюлмаськыны?

¹² Павел вын-агайёс но сузэр-апайёс понна сюлмаськиз, но соослэсь шуг-секытъёссэс ачиз сэрттыны-пертчыны ӧз тыршы. Со валаз, ваньзэ лэсьтыны уг быгаты шуыса, но мукетъёссэ куриз, кенеш понна сюлмаськыны солы мед юрттозы шуыса. Озьы со трос ужъёссэ сётӥз оскымон христианъёслы, кылсярысь, Тимофейлы но Титлы. Та агайёслэн юрттэмзылы луыса Павел, зэмзэ ик, ӧжытгес сюлмаськыны быгатӥз (Флп. 2:19, 20; Тит. 1:1, 4, 5).

13. Кызьы тӧроос Павеллэсь адӟем карыны быгато?

¹³ Мукетъёсызлэсь юрттэт куре. Павел кадь ик, тросэз тӧроос сюлмасько вын-агайёс но сузэр-апайёс понна, кудъёсыз шуг-секытъёсын пумиськыло. Но тӧроос ваньзэ лэсьтыны уг быгато. Зӥбыт-востэм луон соослэсь мылкыдзэс ӝутэ мукет оскымон вын-агайёслы ужъёссэс сётыны, соос но Инмарлэн уллёез понна сюлмаськыны мед быгатозы шуыса (2 Тим. 2:2).

14. Малэсь ӧз кышка Павел но малы дышетэ милемыз солэн учырез?

¹⁴ Валаны тырше, тӥледлы буйгатон кулэ шуыса. Павел зӥбыт-востэм адями вал, соин ик со тодӥз, солы эшъёсызлэн буйгатэмзы кулэ шуыса. Со ӧз сюлмаськы, мукетъёсыз сое ляб адямиен лыдъялозы шуыса, куке эшъёсызлэн сое буйгатэмзы сярысь тодозы. Филимонлы гожтэтаз Павел вераз: «Тынад яратонэд монэ туж шумпоттӥз, мылкыдме лӧпкытӥз» (Флм. 7). Озьы ик со вераз соин ӵош мукет ужась-тыршисьёсыз сярысь но, кудъёсыз солы секыт дыръя юрттылӥзы (Кол. 4:7—11). Ми зӥбыт-востэмен валаськомы ке, милемлы буйгатон кулэ шуыса, вын-агайёс но сузэр-апайёс милемлы шумпотыса юрттозы.

15. Мар юрттӥз Павеллы секыт дыръёсы буйгатскон шедьтыны?

¹⁵ Инмарлэн Кылызлы оскиське. Павел тодӥз, буйгатон Библиысь шедьтыны луэ шуыса (Рим. 15:4). Инмарлэн Кылыз быгатӥз солы визьлык сётыны, кудӥз котькыӵе  шуг-секыт пыр потон понна кулэ луэ (2 Тим. 3:15, 16). Римын кыкетӥзэ жильыетын пукыкуз, Павел валаз, ӝоген кулоз шуыса. Мар со кариз, таӵе югдуре сюрыса? Со куриз Тимофеез ӝоггес со доры лыктыны но бинялтэм книгаосты вайыны (2 Тим. 4:6, 7, 9, 13). Малы? Отын Еврей Гожтэмъёсысь куд-ог книгаос вал, вылды, кудъёссэ со уже кутыны быгатысал, ас понназ Инмар Кылэз эскерыкуз. Ми но, Павел сямен, Библиез ялан эскериськомы ке, Иегова милемыз аслаз Кылыз пыр буйгатоз, кыӵе гинэ шуг-секытъёсын ми медам пумиське.

16. Кызьы Давид вылын шӧдӥськизы лэсьтэм янгышъёсыз?

¹⁶ Давид урод уж лэсьтӥз, кудӥз сэрен сое возьытлыкез йырйиз. Вирсавияен со азон-калгон сьӧлыке пыриз, лэсьтӥз озьы, солэсь картсэ мед виёзы шуыса, но кӧня ке дыр ӵоже сьӧлыкъёссэ ватыса улыны тыршиз (2 Экс. 12:9). Нырысь Давид лыдэ ӧз басьты, мар вераз возьытлыкез. Но соин сэрен солэн Иеговаен кусыпъёсыз сӧриськизы, со туж сюлэмшугъяськыса улӥз но висьыны кутскиз (Пс. 31:3, 4). Мар юрттӥз Давидлы вормыны сюлмаськонъёссэ, кудъёсыз аслаз шонертэм ужъёсыз сэрен кылдӥзы, но мар юрттоз милемлы, куке ми бадӟым янгыш лэсьтӥмы?

17. Кызьы Псалтирь 50:3—6 возьматэ, Давид сьӧлыкъёсыз понна сюлмысь ӧпкелиз шуыса?

¹⁷ Сьӧлыкъёстэс куштон сярысь вӧсяське. Кӧня ке дыр ортчыса, Давид Иеговалы вӧсяськыны малпаз. Со туж жаляз, сьӧлыказ шуыса, но ваньзэ Иеговалы вераз. (Лыдӟе Псалтирез 50:3—6.) Собере макем капчи луиз солэн сюлмаз! (Пс. 31:1, 2, 4, 5). Тӥ секыт сьӧлыкады ке, сое ватыны эн тырше. Иеговалы вӧсяське но, номыре ватытэк, сьӧлыкты сярысь вералэ. Собере тӥляд сюлэмды капчиялоз, но возьытлыкты сокем уз йырйы ни. Нош тӥляд Иеговаен кусыпъёстэс тупатэмды потэ ке, тӥледлы эшшо мар ке но кароно на.

18. Кызьы Давид учкиз кылкутытон шоры?

¹⁸ Кылкутытон шоры шонер учке. Куке Иегова ыстӥз Давид доры Нафан пророкез, Давид ӧз тыршы ассэ шонере поттыны но вераны, лэсьтэм ужез туж ик урод ӧй вал шуыса. Со соку ик соглаш кариськиз, Вирсавиялэн картэзлы пумит сьӧлыкам сяна, нырысь ик со Иеговалы пумит сьӧлыказ шуыса. Давид Иеговалэсь кылкутытонзэ  ӧз палэнты, но Инмар сое простить кариз (2 Экс. 12:10—14). Ми секыт сьӧлыкамы ке, милемлы вераськоно соосын, кинъёсты Иегова милемлы возьмасьёс карыса пуктӥз (Иак. 5:14, 15). Но ми асьмеды шонере поттыны кулэ ӧвӧл. Макем ӝоггес ми кылкутытонэн соглаш кариськомы но тӧроослэсь верамзэс уже кутомы, сокем ӝоггес милям сюлмамы каньыллык но шумпотон луоз.

19. Кыӵе мылкыдмы милям луыны кулэ?

¹⁹ Мылкыдды мед луоз, лэсьтэм сьӧлыкъёстэс азьланяз лэсьтытэк улыны. Давид эксэй тодӥз: сыӵе ик сьӧлыкъёсты выльысь медаз лэсьты шуыса, солы Иеговалэн юрттэтэз кулэ луоз (Пс. 50:9, 12, 14). Куке Иегова сое простить кариз, солэн мылкыдыз вал шонертэм малпанъёсыныз нюръяськыны. Собере Давид каньыл сюлмын улыны быгатӥз.

20. Кызьы ми Иеговалы возьматыны быгатӥськомы, сьӧлыкъёсмес куштэмез понна тау кариськомы шуыса?

²⁰ Ойдолэ Иеговалы вӧсяськомы, со милемыз простить мед кароз шуыса, кылкутытон шоры шонер учкомы но лэсьтомы ваньзэ, азьланяз янгышъёсмес выльысь лэсьтытэк улон понна. Озьы ми Иеговалы возьматомы, сьӧлыкъёсмес куштэмез понна тау кариськомы шуыса. Та вамышъёс юрттозы милемлы каньыл сюлмын улыны. Джеймс нимо агай, кудӥз секыт сьӧлык лэсьтӥз, тае ас вылаз шӧдӥз. Со вера: «Куке мон ваньзэ тӧроослы верай, мынам пельпумъёсы вылысь секыт из усиз кадь. Мон нош ик капчи сюлмын улыны кутски». Милемыз туж буйгатэ малпан, «сюлмынызы чигиськыса улӥсьёслы Кузё-Инмар матын улэ, духенызы зӥбыт муртъёсты Со уте» шуыса (Пс. 33:19).

21. Мар кароно, Иегова милемыз мед буйгатоз шуыса?

²¹ Та дуннелэн пумыз матэктэмъя, милям сюлэмшугъяськонъёсмы тросгес луо. Куке тӥляд сюлмаськытӥсь малпанъёсты кылдо, соку ик Иеговалы, юрттэт курыса, вӧсяське. Библиез тыршыса эскере. Адӟем каре Анналэсь, Павеллэсь но Давидлэсь. Инмысь Атайдылэсь юрттэт куре, валаны мед быгатоды шуыса, малы тӥ сюлэмшугъяськыса улӥськоды (Пс. 138:23). Лэзе Инмарлы юрттыны тӥледлы сюлмаськонъёстэс вормыны, тужгес но сооссэ, кудъёсыныз тӥ номыр карыны уд быгатӥське. Соку тӥляд луозы псаломъёсты гожъясьлэн кадь ик шӧдонъёсты, кудӥз Иеговалы кырӟаз: «Кӧтӝожъёс сюлэмам аляку, Тынад буйгатэмед лулме каньыл каре» (Пс. 93:19).