1. Ano an bangin makapabaraka ha aton, ngan paonan-o ito makakaapekto ha aton?

INABAT ka na ba hin sobra nga kabaraka? * Bangin nababaraka ka tungod kay nasakitan ka han ginsiring o ginbuhat han iba. O bangin nababaraka ka han imo ginsiring o ginbuhat. Pananglitan, bangin nakahimo ka hin sayop ngan nababaraka ka nga diri ka na gud mapapasaylo ni Jehova. Mas maraot pa gud, bangin hunahunaon mo nga tungod kay sobra ka nga nababaraka, bangin kulang ka hin pagtoo ngan maraot ka nga tawo. Pero tinuod ba ito?

2. Ano nga mga ehemplo ha Kasuratan an nagpapakita nga an pag-abat hin kabaraka diri nagpapasabot nga kulang kita hin pagtoo?

² Hisgotan naton an pipira nga ehemplo ha Kasuratan. Hi Hana nga nagin nanay ni propeta Samuel, usa nga babaye nga may daku nga pagtoo. Pero, naistres gud hiya han gintratar hiya hin maraot han usa nga membro han iya panimalay. (1 Sam. 1:7) Hi apostol Pablo may marig-on nga pagtoo, pero inabat hiya hin sobra nga “kabaraka ha ngatanan nga kongregasyon.” (2 Cor. 11:28) Hi Hadi David may marig-on nga pagtoo nga tungod hito hinigugma gud hiya ni Jehova. (Buh. 13:22) Bisan pa hito, nakabuhat hi David hin mga sala nga tungod hito inabat hiya hin sobra nga kabaraka. (Sal. 38:4) Ginliaw ngan ginpakalma ni Jehova an tagsa ha ira. Aton usisahon kon ano an aton mahibabaroan ha ira ehemplo.

3. Kay ano nga bangin mabaraka kita kon may magyakan hin maraot mahitungod ha aton?

³ Kon may ginyakan o ginbuhat nga maraot ha aton an iba, bangin kita umabat hin kabaraka. Tinuod gud ito labi na kon duok  naton nga sangkay o paryente an nakasakit ha aton. Bangin kita mabaraka nga madaot an aton relasyon hito nga tawo. Usahay bangin diri tinuyo nga makayakan ha aton hin maraot an usa nga tawo, pero bangin masakitan gud kita han iya ginyakan! (Prob. 12:18) O bangin tuyoon pa ngani han usa nga magyakan hin makakasakit ha aton. Usa nga batan-on nga sister an nakaeksperyensya hin sugad hito. “Pipira ka tuig an naglabay,” siring niya, “usa nga ginhuhunahuna ko nga maopay nga sangkay an nagpasarang ha Internet hin tsismis mahitungod ha akon. Nasakitan ako ngan nabaraka. Diri ko gud masabtan kon kay ano nga ginbuhat niya ito ha akon.” Kon nasakitan ka man ha ginsiring o ginbuhat han usa nga duok nga sangkay o paryente, damu an imo mahibabaroan tikang kan Hana.

4. Ano nga makuri nga mga problema an kinahanglan atubangon ni Hana?

⁴ Kinahanglan atubangon ni Hana an pipira nga makuri nga mga problema. Ha sulod hin damu ka tuig diri hiya nagkakaanak. (1 Sam. 1:2) Damu nga Israelita an natoo nga kon an usa nga babaye diri nagkakaanak, diri hiya ginbibendisyonan han Dios. Salit inabat hi Hana hin duro nga kaawod. (Gen. 30:1, 2) An mas nakaraot pa, an iya bana may usa pa nga asawa nga hi Penina, ngan nagkaada hira mga anak. Gintratar ni Penina hi Hana sugad nga karibal ngan “padayon nga gintinamay hiya . . . basi pasakitan hiya.” (1 Sam. 1:6) Ha siyahan, hi Hana nasubo gud tungod han iya makuri nga kahimtang. Duro gud an iya kasakit nga tungod hito “nagtatangis hiya ngan diri nakaon.” Nagin “masurub-on hinduro” hiya. (1 Sam. 1:7, 10) Paonan-o naliaw hi Hana?

5. Paonan-o an pag-ampo nakabulig kan Hana?

⁵ Nag-ampo hi Hana kan Jehova ngan iginsumat niya an iya mga kasakit. Kahuman niya mag-ampo, ginsaysay niya an iya kahimtang ha hitaas nga saserdote nga hi Eli. Katapos, hi Eli nagsiring ha iya: “Lakat nga mamurayawon, ngan hinaot ihatag han Dios han Israel an imo hangyo.” Ano an resulta? “Linakat [hi Hana] ngan kinaon, ngan an iya nawong diri na masurub-on.” (1 Sam. 1:17, 18) An pag-ampo nakabulig kan Hana nga magin murayaw utro.

6. Ano nga mga leksyon mahitungod ha pag-ampo an aton mahibabaroan kan Hana ngan ha Filipos 4:6, 7?

⁶ Mahimo kita magin murayaw utro kon padayon kita nga mag-aampo. Hi Hana naggahin hin hilawig nga panahon ha pakiistorya ha iya langitnon nga Amay. (1 Sam. 1:12) Kita liwat mahimo makiistorya kan Jehova hin maiha mahitungod han aton mga kabaraka, kahadlok, ngan mga kaluyahan. An aton mga pag-ampo diri man kinahanglan magin perpekto o sobra kaopay an  pagkahan-ay han mga pulong. Bangin pa ngani magkautod-utod an aton pag-ampo tungod han mga bakho ngan pagtangis samtang iginsusumat kan Jehova an aton mga kasakit. Bisan pa hito, diri gud makakapoy hi Jehova ha pagpamati ha aton. Labot pa han pag-ampo mahitungod han aton mga problema, kinahanglan hinumdoman naton an sagdon ha Filipos 4:6, 7. (Basaha.) Espisipiko nga ginsiring ni Pablo nga kinahanglan pasalamatan naton hi Jehova ha aton mga pag-ampo. Damu gud an aton rason nga pasalamatan hi Jehova. Pananglitan, mahimo kita magpasalamat ha iya han regalo nga kinabuhi, han mag-opay nga butang nga iya ginhimo, han iya maunungon nga gugma, ngan han makaruruyag nga paglaom nga iya iginhatag ha aton. Ano pa an aton mahibabaroan tikang kan Hana?

7. Ano an regular nga ginbubuhat ni Hana ngan han iya bana?

⁷ Bisan pa han iya mga problema, hi Hana regular nga napakadto ha lugar han pagsingba kan Jehova ha Shilo upod an iya bana. (1 Sam. 1:1-5) Han nakadto hiya ha tabernakulo, an hitaas nga saserdote nga hi Eli nagsiring nga naglalaom hiya nga babatunon ni Jehova an iya pag-ampo, ngan nakaliaw ini kan Hana.​—1 Sam. 1:9, 17.

8. Ano an nahihimo ha aton han mga katirok? Iesplikar.

⁸ Mahimo kita magin murayaw utro kon padayon kita nga matambong ha mga katirok han kongregasyon. An pag-ampo ha tinikangan han aton mga katirok kasagaran na nga nag-uupod han pangaro para han baraan nga espiritu han Dios basi maggiya ha aton. An kamurayawan bahin han bunga hito nga espiritu. (Gal. 5:22) Kon natambong kita ha mga katirok bisan kon naiistres kita, gintatagan naton hi Jehova ngan an aton kabugtoan hin higayon nga dasigon kita ngan buligan kita nga magkaada utro murayaw nga hunahuna ngan kasingkasing. An pag-ampo ngan mga katirok importante nga mga paagi nga ginagamit ni Jehova basi pakalmahon kita. (Heb. 10:24, 25) Tigamni an usa pa nga leksyon nga aton mahibabaroan ha eksperyensya ni Hana.

9. Ano an waray magbag-o ha kahimtang ni Hana, pero ano an nagbag-o?

⁹ An hinungdan han mga kabaraka ni Hana waray dayon mawara. Han hi Hana inuli tikang ha pagsingba ha tabernakulo, kinahanglan pa gihapon niya umukoy ha pariho nga balay nga gin-uukyan ni Penina. Ngan waray magsiring an Biblia nga nagbag-o an batasan ni Penina. Salit posible nga kinahanglan padayon nga ilubon ni Hana an masakit nga mga pulong han iya karibal. Pero naibalik ni Hana an iya murayaw nga pag-abat ngan natipigan niya ito. Hinumdumi nga katapos niya isarig kan Jehova an iya sitwasyon, waray na gud mabaraka hi Hana. Gintugotan niya hi Jehova nga liawon ngan pakalmahon hiya. Paglabay han panahon, ginbendisyonan pa ngani hi Hana hin mga anak!​—1 Sam. 1:19, 20; 2:21.

10. Ano an aton nahibaroan ha ehemplo ni Hana?

¹⁰ Mahimo kita magin murayaw utro bisan kon aada la gihapon an hinungdan han aton kabaraka. Bisan kon naniniguro kita pag-inampo ngan regular nga natambong ha mga katirok, an iba nga mga problema bangin magpadayon. Pero ha ehemplo ni Hana, nahibaroan naton nga waray makakapugong kan Jehova ha pagpakalma ha aton nasasamok nga kasingkasing. Diri gud kita kakalimtan ni Jehova, ngan ha maabot nga panahon babalosan niya an aton pagin matinumanon.​—Heb. 11:6.

11. Ano an mga rason nga inabat hi Pablo hin kabaraka?

¹¹ Damu an rason nga inabat hi Pablo hin kabaraka. Pananglitan, tungod kay hinigugma niya an iya kabugtoan, an ira mga problema nakapabaraka gud ha iya. (2 Cor. 2:4; 11:28) Ha iya toka sugad nga apostol, kinahanglan atubangon ni Pablo an mga pangastigo ngan pagpriso ha iya  han mga parakontra. Kinahanglan liwat niya ilubon an mga kakurian nga nakapabaraka ha iya, sugad han pagin “kulang ha panginahanglan.” (Fil. 4:12) Ngan tungod kay nakaeksperyensya hiya hin kalunod han barko hin diri maminos tulo ka beses, posible nga nababaraka hiya kon nagbibiyahe ha dagat. (2 Cor. 11:23-27) Ano an nakabulig kan Pablo han inabat hiya hin kabaraka?

12. Ano an nakabulig basi maibanan an kabaraka ni Pablo?

¹² Nabaraka hi Pablo para ha iya kabugtoan han inatubang hira hin mga problema, pero waray hiya mangalimbasog nga sulbaron an ngatanan nira nga problema nga nag-uusahan la. Mapainubsanon hi Pablo. Nagpabulig hiya ha iba ha pag-ataman han kongregasyon. Pananglitan, gintagan niya hin mga responsabilidad an masasarigan nga kalalakin-an sugad kanda Timoteo ngan Tito. An mga ginbuhat hito nga kalalakin-an sigurado nga nakabulig basi maibanan an kabaraka ni Pablo.​—Fil. 2:19, 20; Tito 1:1, 4, 5.

13. Paonan-o masusubad hi Pablo han mga tigurang?

¹³ Pagpabulig ha iba. Pariho kan Pablo, damu nga mahigugmaon nga mga tigurang yana an nababaraka para ha mga membro han kongregasyon nga naatubang hin mga kakurian. Pero diri kaya han usa nga tigurang nga buligan an ngatanan ha kongregasyon. An pagin mapainubsanon magpapagios ha iya nga magpabulig ha iba nga kwalipikado nga kalalakin-an ha pagtuman hito nga buruhaton ngan tutdoan an batan-on nga kalalakin-an basi buligan hiya ha pag-ataman han panon han Dios.​—2 Tim. 2:2.

14. Ha ano waray mabaraka hi Pablo, ngan ano an aton mahibabaroan ha iya ehemplo?

¹⁴ Akseptara nga kinahanglan mo an pagliaw. Mapainubsanon hi Pablo, salit nangaro hiya hin pagparig-on tikang ha iya kasangkayan ngan ginkarawat niya ito. Matin-aw nga waray hiya mabaraka nga bangin hunahunaon han mga tawo nga maluya hiya kon sisidngon niya nga ginliaw hiya han iba. Ha iya surat kan Filemon, nagsiring hi Pablo: “Nalipay ngan naliaw gud ako han hinbatian ko an imo gugma.” (Filem. 7) Hi Pablo may gin-unabi nga mga igkasi-magburuhat niya nga nakaparig-on gud ha iya ha panahon han kasakit. (Col. 4:7-11) Kon mapainubsanon nga gin-aakseptar naton nga kinahanglan naton an pagparig-on, malilipay an aton kabugtoan ha pagbulig ha aton.

15. Paonan-o hi Pablo naliaw han inatubang hiya hin makuri nga mga sitwasyon?

¹⁵ Sarig ha Pulong han Dios. Maaram hi Pablo nga maliliaw hiya han Kasuratan. (Roma 15:4)  Maghahatag liwat ito ha iya hin kinaadman basi maatubang an bisan ano nga kakurian. (2 Tim. 3:15, 16) Ha ikaduha nga kapriso ni Pablo ha Roma, inabat niya nga hirani na hiya mamatay. Hiton makuri nga sitwasyon, ano an ginbuhat ni Pablo? Ginhangyo niya hi Timoteo nga kumadto dayon ha iya ngan dad-on an “mga linukot nga basahon.” (2 Tim. 4:6, 7, 9, 13) Kay ano? Kay ito nga mga linukot nga basahon posible nga mga bahin han Hebreo nga Kasuratan nga magagamit ni Pablo ha iya personal nga pag-aram han Biblia. Kon susubaron naton hi Pablo pinaagi han regular nga pag-aram han Pulong han Dios, gagamiton ni Jehova an Kasuratan ha pagpakalma ha aton​—anoman nga kakurian an aton gin-aatubang.

16. Ano an inabat ni David han nakahimo hiya hin seryoso nga sala?

¹⁶ Hi David may ginbuhat nga maraot nga nagpakonsensya ha iya. Nag-adulteryo hiya kan Bat-seba, iginpapatay niya an bana ni Bat-seba, ngan ha pipira ka panahon nangalimbasog nga itago an iya sala. (2 Sam. 12:9) Ha siyahan, ginbalewaray ni David an iya pag-abat hin kakonsensya. Sugad nga resulta, nadaot an iya relasyon kan Jehova ngan inabat liwat hiya hin duro nga kasubo ngan nagkasakit pa ngani. (Sal. 32:3, 4) Ano an nakabulig kan David nga maatubang an kabaraka tungod han iya sayop nga nabuhat, ngan ano an makakabulig ha aton kon makabuhat kita hin seryoso nga sala?

17. Paonan-o iginpapakita han Salmo 51:1-4 an kinasingkasing nga pagbasol ni David?

¹⁷ Pag-ampo para hin kapasayloan. Ha urhi, dinaop hi David kan Jehova pinaagi ha pag-ampo. Kinasingkasing nga nagbasol hiya ngan iginsumat niya kan Jehova an iya mga sala. (Basaha an Salmo 51:1-4.) Nakabulig gud ini nga mapakalma hiya ngan magin malipayon utro! (Sal. 32:1, 2, 4, 5) Kon nakabuhat ka hin seryoso nga sala, ayaw gud ito itago. Lugod, isumat kan Jehova ha pag-ampo an imo sala. Kon maisumat mo ito, magigin magaan an imo pag-abat ngan diri ka na makukonsensya. Pero kon karuyag mo maibalik an imo maopay nga relasyon kan Jehova, diri la pag-ampo an kinahanglan mo himoon.

18. Ano an reaksyon ni David ha disiplina?

¹⁸ Karawata an disiplina. Han ginsugo ni Jehova hi propeta Nathan basi makiistorya kan David mahitungod han iya sala, waray pakamatadonga ni David an iya kalugaringon o waray hiya magsiring nga diri man gud maraot an iya ginbuhat.  Gin-amin dayon niya nga nakasala hiya diri la ha bana ni Bat-seba kondi labaw ha ngatanan, kan Jehova. Ginkarawat ni David an disiplina tikang kan Jehova, ngan ginpasaylo Niya hiya. (2 Sam. 12:10-14) Kon nakabuhat kita hin seryoso nga sala, kinahanglan makiistorya kita ha mga ginpili ni Jehova nga mag-ataman ha aton. (San. 5:14, 15) Ngan kinahanglan likayan naton nga pakamatadungon an aton kalugaringon. Kon ginkakarawat ngan gin-aaplikar dayon naton an bisan ano nga disiplina, mas temprano nga maibabalik an aton murayaw nga pag-abat ngan kalipay.

19. Kinahanglan magin determinado kita nga buhaton an ano?

¹⁹ Magin determinado nga diri utruhon an pariho nga mga sayop. Maaram hi Hadi David nga kinahanglan niya an bulig ni Jehova basi diri na niya mautro an pariho nga mga sala. (Sal. 51:7, 10, 12) Han nakarawat na niya an pagpasaylo ni Jehova, nagin determinado hi David nga diri na gud magkaada sayop nga panhunahuna. Sugad nga resulta, nagin murayaw utro an iya hunahuna.

20. Paonan-o naton maipapakita nga mapasalamaton kita han pagpasaylo ni Jehova?

²⁰ Iginpapakita naton nga mapasalamaton kita han pagpasaylo ni Jehova kon gin-aaro naton ito pinaagi ha pag-ampo, ginkakarawat naton an disiplina, ngan naniniguro gud kita nga diri na utruhon an aton mga sayop. Kon bubuhaton naton ini nga mga pitad, magigin murayaw utro an aton hunahuna. Ito an naeksperyensyahan ni James, usa nga bugto nga nakahimo hin seryoso nga sala. Hiya nagsiring: “Han iginsumat ko ha mga tigurang an akon sala, inabat ko nga baga hin nawad-an ako hin mabug-at nga pinas-an. Nagkaada ako utro murayaw nga hunahuna.” Makaparig-on gud hibaroan nga “hi Jehova hirani ha mga ruba an kasingkasing; iya gintatalwas an mga rumok an espiritu”!​—Sal. 34:18.

21. Paonan-o naton matutugotan hi Jehova nga pakalmahon kita?

²¹ Tungod kay hirani na gud an kataposan, mas magtitikadamu an hinungdan han mga kabaraka. Kon may mga ginkakabarak-an ka, pangaro dayon han bulig ni Jehova. Admi hin maopay an Biblia. Mahibaro tikang ha ehemplo nira Hana, Pablo, ngan David. Pag-ampo ha imo langitnon nga Amay nga buligan ka nga mahibaroan an hinungdan han imo mga kabaraka. (Sal. 139:23) Tuguti hiya nga buligan ka ha imo mga problema, labi na hadton gutiay la an imo mahihimo o diri mo gud kontrolado. Kon hihimoon mo ito, magigin pariho ka han salmista nga nagkanta kan Jehova: “Han an mga kabaraka nagtabon ha akon, imo ako ginliaw ngan ginpakalma.”​—Sal. 94:19.