DILONGI 9
Bika Yave Kaku Bomba
“Mu thangu yiba mayindu mawombo, [Ngiewu] wumbomba ayi [wuvumbika] muel’ama.”—MINKUNGA 94:19.
NKUNGA 44 Nsambu wu Kisadi Kidi Kiunda Kingolo
MAMBU TUANLONGUKA a
1. Mbi bilenda kuvanga kukuazuka?
NGIE wumana viokila mu mambu ma kuvanga kukuazuka? b Ḿba wulenda kuazuka mu kibila ki mambu bankaka bamvanganga, bantubanga ayi mu mambu wutuba ove wuvanga. Dedi, ḿba ngie wuvanga nzimbala ayi wunkuazukanga mu kuyindula ti Yave kalendi kulemvukila ko. Mvandi, wulenda yindula ti bo wunkuazukanga beni, ḿba ngie wisi ko kiminu ayi widi mutu wumbi. Vayi, mawu madi makiedika?
2. Bifuani mbi bi Kibibila bimmonisa ti kukuazuka kuisinsundula ko kukhambu ku kiminu?
2 Tala mua bifuani bi Kibibila. Hana wuyiza ba ngudi yi mbikudi Samueli, wuba kiminu kingolo. Vayi kheti bobo, nandi wuyiza ba mu kiunda kingolo bo musi dikanda diandi kanlueka ntima. (1 Samueli 1:7) Mvuala Polo mvandi wuba kiminu kingolo, vayi nandi wutuba ti wuba beni “mayindu mu diambu di [bimvuka bioso].” (2 Kolinto 11:28) Ntinu Davidi wuba kiminu kingolo, diawu Yave kaba kunzondilanga beni. (Mavanga 13:22) Vayi Davidi wuvanga zinzimbala ziwombo zimvanga kukuazuka beni. (Minkunga 38:4) Kheti mu mambu moso baviokila, Yave wuba bomba ayi wuba kindisa. Ndoko tumona mbi tulenda longuka mu bifuani biawu.
MBI TULENDA LONGUKA MU KIMINU KI HANA
3. Buidi mambu bankaka bantubanga malenda tutuadisa kiunda?
3 Tulenda ba beni mu kiunda bo batu bankoluka yitu mu nganzi voti mu kukhambu ku luzolo. Tunluta banga beni mu kiunda, boti mutu bevanga mawu widi musi dikanda ditu voti nkund’itu wufikama. Kiunda beni kimbuelamanga mu kuyindula ti kikundi kitu kinkuiza tuluka. Ḿba mutu kalenda kutu lueka ntima mu khambu yindula mambu kantuba. Ayi mawu, malenda kutu tula mu kiunda. (Zingana 12:18) Vayi bankaka baveka bansolanga kutuba mambu malenda kutu lueka ntima. Khomb’itu yinkieto wuviokila mu mawu wutuba: “Mu mimvu mi mavioka, nkundi’ama yaba fiatilanga beni, wuseka buezi bo katiamuna mambu ma luvunu matedi minu mu internet. Mawu mandueka ntima ayi yiba beni kiunda. Yisa visa ko kibila mbi kamavangila.” Boti musi dikanda diaku voti nkundi’aku wufikama wukunyongisa ntima, ngie wulenda longuka mawombo mu kifuani ki Hana.
4. Mambu mbi maphasi Hana kaviokila?
4 Hana wuviokila mu mambu mawombo maphasi. Mu mimvu miwombo nandi kabasa butanga ko. (1 Samueli 1:2) Mu kikhulu ki basi Isaeli, nkieto na kukhambu buta, buna nandi wuba wusingu. Mawu mavanga Hana kuyindula ti kasi ko luvalu. (Ngenesi 30:1, 2) Ziphasi ziandi zibuelama bo nnuni’andi kakuela ayi kabuta bana na nkieto wunkaka baba tedilanga Penina. Penina waba vangilanga beni Hana kiphala ayi ‘waba kunsombulanga kadika kilumbu, muingi kunyongisa.’ (1 Samueli 1:6) Va thonono, disa ba ko diambu diluelu kuidi Hana kuviokila mu mambu amomo. Nandi wuba beni mu kiunda diawu kaba ‘didilanga ayi kabasa dianga ko.’ Hana wuyiza ba ‘kiunda kingolo mu’ ntima. (1 Samueli 1:7, 10) Buidi Hana kabakila mbombolo?
5. Mbi bisadisa Hana kuba ndembama?
5 Hana wukamba mabanza mandi kuidi Yave mu nsambu. Bosi, nandi wuzabikisa mambu kaba viokila kuidi Eli, Mfumu Zinganga Nzambi. Diawu Eli kankambila: ‘Yenda mu nyenzi, ayi bika Nzambi ka kuvana biabioso wuntomba’. Mambu mbi mayiza monika? Kibibila kimmonisa ti ‘Hana wuyenda, wudia, ayi kizizi kiandi kisa bue ba ko mu kiunda.’ (1 Samueli 1:17, 18) Bukiedika, kusambila kusadisa Hana kubue ba ndembama.
Dedi Hana buidi befu tulenda bue bakila ndembama mu ntima? (Tala bitini bi matangu 6-10)
6. Mbi kifuani ki Hana ayi mambu madi mu Filipi 4:6, 7 matulonga mu matedi kusambila?
6 Befu mvitu tulenda bue ba ndembama befu kutatamana kusambila. Dedi bo Hana kazibudila ntim’andi kuidi Yave, befu mvitu tulenda kamba Yave mu nsambu mambu ma tutatisa, ma tutula boma ayi zinzimbala zitu. (1 Samueli 1:12) Bo tumvanga mawu, tuisintomba ko kusadila bikuma biphasi voti kukolukila mu phila yivedila. Khumbu zinkaka tulenda dila bo tunzabikisa Yave mabanza mitu. Kheti bobo, Yave kalendi vonga ko kukuwa nsambu’itu. Vadi diambu dinkaka tufueti tebukanga moyo bo tumvanga minsambu. Mu Filipi 4:6, 7 (Tanga), Mvuala Polo wutuba ti tufueti vutulanga mvandi matondo bo tunsambila. Mawu madi makiedika, kibila tuidi bibila biwombo muingi kutonda Yave. Dedi, tulenda kuntonda mu nkhayilu yi luzingu, mu bivangu biandi, mu luzolo luandi lukuikama ayi mu kivuvu ka tuvana. Mbi binkaka tulenda longuka mu matedi Hana?
7. Mbi Hana ayi nnuni’andi batatamana kuvanga?
7 Kheti mu mambu kaba viokila, Hana kasa bika ko kukuenda na nnuni’andi ku Silo muingi kubuongimina Yave. (1 Samueli 1:1-5) Ayi kuawu Eli Mfumu Zinganga Nzambi kankindisila mu kunkamba mu lufiatu ti Yave wunkuiza tambudila nsambu’andi.— 1 Samueli 1:9, 17.
8. Buidi zikhutukunu zi tusadisilanga?
8 Tulenda bue ba ndembama befu kutatamana kukuenda mu zikhutukunu. Kibila va thonono zikhutukunu, tumvanganga nsambu muingi kudinda phevi yi Yave. Ayi ndembama, yidi mu khati mbutu wu phevi yinlongo. (Ngalatia 5:22) Bo tumvanga mangolo mu kukuenda mu zikhutukunu kheti mu ziphasi zi tukuazula, tuidi mu kuvana luaku kuidi Yave ayi zikhomba muingi ba tukindisa ayi ba tusadisa ku bue ba ndembama mu ntima. Diawu, kusambila ayi kulandakana zikhutukunu zidi ziphila zinkinza Yave ka tubombilanga. (Ebeleo 10:24, 25) Tala dilongi dinkaka tulenda longuka mu kifuani ki Hana.
9. Mu mambu mbi Hana katatamana kuviokila, vayi mbi nandi kavanga?
9 Hana wununga kubue baka ndembama mu ntima. Vayi mambu beni maba tatisa Hana, masa mana ko mu kinzimbukila. Kibila nandi wutatamana kuzinga va kimueka na Penina, mutu waba kuntatisanga thangu zioso. Ayi Kibibila kisimmonisa ko ti mavanga ma Penina mabaluka voti ndamba. Diawu, vaba tombulu Hana kuvibidila mu mambu Penina kaba kunkambanga. Nandi wubika Yave kambomba ayi kamvana ndembama mu kunkuekudila bizitu biandi. Ayi buviokila thangu, Yave wusakumuna Hana mu kumvana luaku lu kubuta!— 1 Samueli 1:19, 20; 2:21.
10. Mbi tulenda longuka mu kifuani ki Hana?
10 Befu tulenda bue ba ndembama kheti mambu ma tuvanga kukuazuka masimmana ko. Kheti tuntatamana kusambila ayi kukuenda mu zikhutukunu, mambu mankaka ma tukuazula mamananga ko mu kinzimbukila. Vayi dedi bo tumamuena mu kifuani ki Hana, vasi ko ni kiuma kilenda tula nkaku muingi Yave katubomba ayi kutuvana ndembama tuntomba. Yave kalasa tukuekula ko ayi mu thangu yifuana, nandi wala kutusakumuna mu lukuikumunu luitu.— Ebeleo 11:6.
MBI TULENDA LONGUKA MU KIFUANI KI MVUALA POLO
11. Bibila mbi Polo kaba muingi kukuazuka?
11 Mvuala Polo wuba bibila biwombo muingi kukuazuka. Nandi waba zolanga beni zikhomba, diawu bo bawu baba tovuka, nandi waba kuazukanga beni. (2 Kolinto 2:4; 11:28) Mu kisalu kiandi ki kusamuna, Polo wudengana batu bawombo baba kunlendanga. Khumbu zinkaka, bawu bambula ayi bantula mu buloku. Nandi mvandi wuvibidila mu mambu mankaka maphasi mamvanga kukuazuka, buka “kukhambu ku bidia”. (Filipi 4:12) Ayi kuzaba ti zikhumbu zitatu kadukukila mu dikumbi, bukiedika mawu maluta vanga nandi kukuazuka thangu zioso kaba makanga mu makumbi. (2 Kolinto 11:23-27) Mbi bisadisa mvuala Polo kuba ndembama?
12. Mbi bidekula mabanza ma mvuala Polo?
12 Kheti Polo waba kuazukilanga mambu maba tatisa zikhomba zinkaka, vayi nandi kasa meka ko kudedikisa mamoso naveka. Kibila nandi wuzaba ti naveka kalendi nunga ko kuvanga mamoso. Diawu kadindila lusadusu kuidi bankaka. Dedi wuvana kiyeku kuidi Timoteo ayi Tito muingi bansadisa kukieba bimvuka. Bukiedika lusalusu lu zikhomba beni, ludekula mabanza ma mvuala Polo.— Filipi 2:19, 20; Tito 1:1, 4, 5.
Dedi bo tube longukila mu kifuani ki mvuala Polo, mbi tufueti vanga muingi tubika kuazuka beni?(Tala bitini bi matangu 13-15)
13. Buidi bakulutu balenda landikinina kifuani ki mvuala Polo?
13 Dinda lusadusu lu bankaka. Buka Polo, vadi mvandi bakulutu bawombo mu bimvuka bankuazukanga mu kibila ki mambu maphasi zikhomba badi mu kuviokila. Vayi bukiedika kuandi ti nkulutu wumueka, kalenda nunga kusadisa baboso mu kimvuka? Ndamba. Diawu, kukikinina ti kalendi nunga ko kuvanga mamoso, kuala kumvanga kuvana biyeku kuidi bakulutu bankaka ayi kukubika matoko mankaka muingi bansadisa kukieba mamemi ma Yave.— 2 Timoteo 2:2.
14. Mbi Polo kabasa monanga ko zitsoni, ayi mbi tulenda longuka mu kifuani kiandi?
14 Kikinina mbombolo yi bankaka. Mu kukikulula, Polo waba tombanga ayi waba kikininanga mbombolo yi bakundi bandi. Ayi nandi kabasa monanga ko tsoni ti na kukikinina mbombolo yimfumina kuidi bankaka, balenda kuntadila buka mutu wulebakana. Diawu mu nkanda kasonikina Filemoni, Polo wutuba: ‘Yiba beni mayangi ayi yibaka mbombolo mu kukuwa matedi luzolo luaku.’ (Filemoni 7) Polo wutanguna mvandi mazina ma zikhomba ziwombo bankindisa mu thangu yi ziphasi. (Kolosai 4:7-11) Dedi Polo, befu kukikulula mu kutomba ayi kukikinina mbombolo yi bankaka, mu nyenze zikhomba zitu bala tuvana lusalusu tuntomba.
15. Mbi bisadisa Polo mu thangu ziphasi?
15 Fiatila mu Diambu di Nzambi. Polo wuzaba ti Diambu di Nzambi dilenda kumbomba. (Loma 15:4) Ayi nandi wuzaba mvandi ti diawu, dilenda kumvana nduenga muingi kukindama mu ziphasi. (2 Timoteo 3:15, 16) Bo kaba mu buloku mu khumbu yimuadi ku Loma, Polo wuzaba ti lufua luandi luaba fikama. Vayi mbi Polo kavanga mu thangu beni? Nandi wudinda Timoteo kenda mu thinu kuentala ayi kanata minkanda miba ‘masonoko manlongo.’ (2 Timoteo 4:6, 7, 9, 13) Kibila mbi kadindila minkanda beni? Kibila miawu miba ndambu yi masonoko ma Kiebeleo, muingi kasadila mu ndongukulu’andi. Mbi tulenda longuka? Tulenda longuka ti bosokua bumbela mambu maphasi tumviokila, befu tatamana kulonguka Kibibila, Yave kalenda sadila kiawu muingi kutubomba.
MBI TULENDA LONGUKA MU KIFUANI KI NTINU DAVIDI
Dedi bo tube muena mu kifuani ki Ntinu Davidi, mbi bilenda tusadisa mu thangu tube vola disumu dingolo? (Tala bitini bi matangu 16-19)
16. Ziphasi mbi Davidi kayituadisa naveka?
16 Davidi wuvanga mambu mambi mavanga nandi kukuazuka. Nandi wuvanga kitsuza na Bata-Seba, bosi wuvondisa nnuni’andi ayi wumeka kusueka mambu moso amomo kavanga. (2 Samueli 12:9) Va thonono, nandi kasa vua ko nkinza kilunzi kiandi. Vayi mbi biyiza monika? Kuntuala, mambu beni mamvanga kutovuka mu kiphevi, mu mayindu ayi mu kinsuni. (Minkunga 32:3, 4) Mbi bisadisa Davidi kukindama mu ziphasi aziozi kayituadisa naveka ayi mbi befu tufueti vanga boti disumu dingolo tube vanga?
17. Buidi mambu madi mu Minkunga 51:1-4, mammonisa ti Davidi wufungula masumu mandi mu ntima woso?
17 Dinda nlemvu mu nsambu. Davidi wusambila kuidi Yave. Nandi wufungula masumu mandi ayi wudinda nlemvu mu ntim’andi woso. (Tanga Minkunga 51:1-4) Kuvanga mawu, mansadisa kuba ndembama ayi kubue ba mayangi. (Minkunga 32:1, 2, 4, 5) Diawu, boti disumu dingolo bevanga, bika kumeka kusueka diawu. Vayi, zabikisa mawu mu nsambu kuidi Yave. Ngie kuvanga mawu, wala ba ndembama ayi kilunzi kiaku kialasa bue kufundisa ko. Ayi boti ngie tidi kuvutula kikundi kiaku na Yave, wufueti vanga diambu dinkaka. Diambu mbi?
18. Buidi Davidi katambudila tsembolo?
18 Kikinina tsembolo. Bo Yave kafila mbikudi Natani muingi kanzabikisa masumu mandi, Davidi kasa tomba ko kuyikakidila voti kutuba ti masumu mandi masa ba ko beni mangolo. Mu thinu nandi wutuba ti wuvola disumu mu kuvondisa nnuni Bata-Seba. Vayi diambu dilutidi nkinza, nandi wukikinina ti wusumuka va meso ma Yave. Davidi wukikinina tsembolo yi Yave, ayi Yave wunlemvukila. (2 Samueli 12:10-14) Boti disumu dingolo tuvola, tufueti zabikisa diawu kuidi bakulutu ba kimvuka muingi ba tusadisa. (Yakobi 5:14, 15) Ayi tufueti ba keba keba muingi tubika kuyikakidila. Befu kuzabikisa ayi kukikinina mu thinu tsembolo beni, tulenda fika baka ndembama ayi mayangi.
19. Mbi tufueti ba bakubama mu kuvanga?
19 Ba wukubama mu kumanga vutukila zioziawu zinzimbala. Ntinu Davidi wuzaba ti kafueti tomba lusadusu lu Yave muingi kabika kuvutukila zioziawu zinzimbala. (Minkunga 51:7, 10, 12) Bo Davidi kabaka nlemvu wu Yave, nandi wubaka makani ma kutatuka mayindu moso mambi. Mawu mansadisa kubue vutula ndembama mu ntima.
20. Buidi tulenda monisina ti tuntonda Yave mu nlemvu’andi?
20 Tuntondanga Yave mu nlemvu’andi mu kunkamba masumu mitu mu nsambu, mu kukikinina tsembolo’andi ayi mu kuvanga mangolo muingi kumanga vutukila zioziawu zinzimbala. Befu kuvanga mawu, tuala bue vutula ndembama mu ntima. Khomba mueka wuvola disumu dingolo bantedilanga James, wuyiza kikinina mawu ayi wutuba: “Bo yikamba bakulutu ba kimvuka disumu minu yivola, yimona buka minu babotula kizitu kinneni mu mavangiti. Bosi, yiyiza bue ba ndembama mu ntima.” Mayangi beni kuzaba ti ‘Yave widi wufikama kuidi batu boso badi mintima mikofakana; ayi wumvukisanga batu badi mu kiunda kingolo.’ — Minkunga 34:18.
21. Buidi tulenda bikila Yave katubomba?
21 Bo tuidi mu kuzingila mu bilumbu bi tsuka, tuzebi ti mambu ma tukuazula madi mu kubuelama lumbu ka lumbu. Diawu boti vadi diambu di kutatisa, dinda mu thinu lusalusu lu Yave. Tatatamana mvandi kulonguka Kibibila. Landakana kifuani kimboti Hana, Mvuala Polo ayi Ntinu Davidi ba tubikila. Ayi dinda Tat’itu ku diyilu muingi ka kusadisa kubakula mbi bi kuvanga kukuazuka. (Minkunga 139:23) Bika Yave ka kusadisa kunata kizitu ki mambu ma kutatisa voti mambu ngie veka wukhambu nunga kudedikisa. Ngie kuvanga mawu, ngie wala ba banga nsoniki wu minkunga wuyimbila kuidi Yave: “Mu thangu mayindu maba mawombo mu minu, [Ngiewu] wumbomba ayi [wuvumbika] muel’ama.”— Minkunga 94:19.
NKUNGA 4 ‘Yave Nsungi’ami’
a Befu boso khumbu zinkaka tunkuazukanga mu kibila ki mambu tumviokilanga. Mu dilongi adidi, tunkuiza tubila bisadi bitatu bi Yave mu thangu yikhulu, baviokila mu mambu ma bavanga kukuazuka. Ayi mvandi, tunkuiza mona buidi Yave kabombila ayi kakindisila kadika mutu mu bawu.
b TSUDUKUSU YI BIKUMA: Kukuazuka kunsundula kuba mu kiunda voti mu dibamu. Mawu malenda monika mu kibila ki kukhambu ku zimbongo, kukhambu ku buvinya bumboti, mambu va dikanda ove mu mambu tumviokila mu luzingu luitu. Tulenda kuazuka mvandi mu kibila ki zinzimbala tuvanga kumbusa, voti mu mambu tunyindulanga ti tuala monikina.
