Adihayay mihecaan, sowal no malikafay to Fangcalay Cudad, o matiliday i Taniil a hongti no Papilon ci Pilsacar awaay materek i likisi sanay, samanen awaay ko wacay no mikingkiway to nolitengan to soˈlinay ira koniya tamdaw. (Taniil 5:1) Nikawrira, itini 1854 miheca mafalicayto ko demak.

Toya mihecaan, o kakeridan no Ikok ci Yohani Tayre itini katelangan a niyaroˈ no Irake i Ur, itini ˈakawangay tapolo maheraay ko noditaˈ kimoloay a hecek. Koˈedaw no hecek 10 kongfen, iraay ko mitoˈtoˈan a tilid. O cecay matiliday ko satolon, patadoay ci Pilsacaran oya wawa no hongti ci Naponito a mitolon. Mihaenay, hato mihaiayto koya malikafay to Fangcalay Cudad a tamdaw, soˈlinayto ira ci Pilsacar.

Kawra, pangangananho no Fangcalay Cudad ci Pilsacar to hongti, cisasaay ko roma mikakingkiway a tamdaw toniya sowal, tinakoen i saka 19 hahekalan kakakosiya no Ikok ci Wilin Taepote sanay ko sowal, soˈlin ira ko somowalay to kalacafayay ci Pilsacar ato wama ningra ci Naponito a mikowan, “kawra awaay ko wacay to ngangaˈay misawacay tonini.”

Ikor, maheraay no mikingkiway to nolitengan a tamdaw, o roma tilid no hecek, na halafinay a miliyasay ko wama ni Pilsacar ci Naponito to Papilon. Pritin Hakacudad sanay ko sowal, itini roma kitakit ci Naponito a tatokian i, “na patorodan ci Pilsacar to saaroˈan no hongti ato fadangalan no sofitay.” Mihaenay toya tatokian, mikowanay ci Pilsacar i Papilon. Mihaenay, sowal no mikakingkiway to nolitengan ci Alon Milete sanay: “Panganganen no Taniil ci Pilsacar to ‘hongti’ cowa ko mararaway.”

Manaokaniw, pakaynien i midokoay to Kawas a tamdaw, o ciˈicelay a wacay ko Fangcalay Cudad, misawacay to matatodongay ko lalakaw no Taniil, o mikayatan no Kawas ko tamdaw a mitilid.—2 Timoti 3:16.